|
Re: لماذا لا يستشير بعض الأزواج السودانين زوجاتهم في ما يلبسونه قبل الذهاب للمناسبات العامة? (Re: دينا خالد)
|
اهلآ بالعزيزة دينا
Quote: عليك الله اقيف من العذابه فى ؟؟ رجال ونسوان ..... |
والله فعلآ العزابة ما بقصروا في اللبس...خاصة الغالي واخر الموضات ...دايرين يخشوا المنافسة وعشان يلفتوا الأنظار...ويصتادوا ويودعوا العزوبية............ الغريبة انو غالبية النسوان بواصلن بعد الزواج ...لكن غالبية الرجال بقيفوا.
Quote: الحاله بستشيروهن .. تصدق ؟؟ اى راجل يلاقيك مبشتن وقميصو لون وبنطلونو لون بكون استشار مرتو .. |
معني كدا المتزوجين يسشيروا نسوانهم ويلبسوا عكس كلامن...ولا بالمرة ما يستشيروهن.
Quote: فالمرا هى الوحيدة صاحبة المصلحة فى ان لا يبدو زوجها كدنجوان انيق فى نظر النظاره ..قايل شنو ! |
ليـــه.....خايفة يخطفوا منها ناس راجل المراة حلو حلا....وين الثقة بالنفس.................وبالزوج.
Quote: واى راجل انيق وشيك دا راجل بقاوم فى الدمار وبفرفر من الدافنه وبيتطلع للحياة بان يستعيد الثقة فى نفسه حتى لو بالمظهر الزمان وذلك اضعف الايمان .. |
والله دا معادلة صعبة....الله يكون في عوننا بعد الزواج
Quote: وبجنب نفسه تنظيرات مرته فى لبسو وبيلبس براااااااهو المافى شنو ؟ |
يعني يا يرضي نفسو ..او مرتوا..........دا وب وداك ووبين
شكرآ لك يا دينا...خلتيني اجدد عقد العزوبية لسنة أضافية...عشان اتمتع بمزاجي في اللبس شوية...... وبعدين نخط في شروط الزواج..... حريتي في اللبس وبدون نقة تحياتي
| |
|
|
|
|
|
|
Re: لماذا لا يستشير بعض الأزواج السودانين زوجاتهم في ما يلبسونه قبل الذهاب للمناسبات العامة? (Re: محمد عبد الماجد الصايم)
|
الاخ PLAYER
تحياتى
اتفق معك على أن رأى المرأة فى اللبس مهم جدا ..
و حقيقة أن اللبس اصبح عنوان حقيقى للرجل خاصة اذا كان من اصحاب المناصب او الاعمال ..
اختلفت الموضة بالنسبة للرجال كثيرا عما قبل .. بعد أن كان التناسق - Matching بين لونين او ثلاثة على الاكثر .. اصبحت الموضة الآن غير ملتزمة بالتناسق كثيرا ويمكن ان تكون من عدة الوان مع الذوق فى اختيارها .. يعنى الآن ممكن ترتدى مجموعة الوان مختلفة بس تكون منسجمة مع بعض . المرأة هى المرآة الحقيقية للرجل .. و لذلك ارى ان يستشيرها ان لم يترك لها حرية الاختيار .. وفى النهاية بالرغم من الامر كغيره من المشاركة الزوجية الآ انه يرضى الزوجة كثيرا .. و .. رضاءهن مطلووووب . مؤسف ان لا يهتم الرجل بمظهره خاصة اذا كان واجهة لاى عمل عام و خاص .
| |
|
|
|
|
|
|
Re: لماذا لا يستشير بعض الأزواج السودانين زوجاتهم في ما يلبسونه قبل الذهاب للمناسبات العامة? (Re: يوسف محمد يوسف)
|
سلام واحترام
غايتك الننقشط ليك طوالي فيني بما إني ضمن المتجوزين
بصراحة عمري ما بعرف ألبس ودي طبعاً بيسبقا إني ما بعرف أشتري لا وكمان وينك وين لمن أحِن علي رقبتي وأحلق الشعر المنكوش ديمة وما بيدخل عليهو مشط مسيح بالموية قريب الباب وإنتا طالع أها مسعلة اللبس دي ما بتكيف لي لبس إلا يكون غايظ المرة يكون شيك يكون ما شيك ما علي المهم يخليها تبرطم دي بشتنة شنو دي وكان لبستا القميص الموف داك مع البنطلون دا وكان خليت لبس الجينز طوالي كرهتنا يا اخي وعليك الله تمش تحش دقنك دي وعييييييييييييك
يااخي نضافة بنتنضف ولبس نضيف ومكوي بنلبسو وبنغير كمان لكن حكاية ماتشينق والكلام دا إلا نجي البوتيك بتاعكم بعد تفتحو ونغشا ودجبرين نتعلم الخزعبلات بتاعتو ديك ممكن تلفق والمرة تخم وتصر بعد داك
وغايتك
| |
|
|
|
|
|
|
Re: لماذا لا يستشير بعض الأزواج السودانين زوجاتهم في ما يلبسونه قبل الذهاب للمناسبات العامة? (Re: بله محمد الفاضل)
|
Quote: سلام واحترام غايتك الننقشط ليك طوالي فيني بما إني ضمن المتجوزين بصراحة عمري ما بعرف ألبس ودي طبعاً بيسبقا إني ما بعرف أشتري لا وكمان وينك وين لمن أحِن علي رقبتي وأحلق الشعر المنكوش ديمة وما بيدخل عليهو مشط مسيح بالموية قريب الباب وإنتا طالع |
اهلين وسهلآ يا بله بقي لي انك كنت شاطر في المدرسة...لانو غالبية الشطار المروا بي في المدارس بالضبط زيك.....وكمان علاقتك بالطلعات والحفلات ما تمام.. بس ما تعادي الشفع...لانو الزمن دا الجنسسة مهمة جدآ.
Quote: أها مسعلة اللبس دي ما بتكيف لي لبس إلا يكون غايظ المرة يكون شيك يكون ما شيك ما علي المهم يخليها تبرطم دي بشتنة شنو دي وكان لبستا القميص الموف داك مع البنطلون دا وكان خليت لبس الجينز طوالي كرهتنا يا اخي وعليك الله تمش تحش دقنك دي وعييييييييييييك |
المسكينة ذنبها شنو تقعد تغيظ فيها...نصيحتي ليها ما تشتغل الشغلة بلسبك ومظهرك....او تغشك وتقول: ايه الشياكة كله الليلة عشان تتغاظ انت كمان.
Quote: يااخي نضافة بنتنضف ولبس نضيف ومكوي بنلبسو وبنغير كمان لكن حكاية ماتشينق والكلام دا إلا نجي البوتيك بتاعكم بعد تفتحو ونغشا ودجبرين نتعلم الخزعبلات بتاعتو ديك ممكن تلفق والمرة تخم وتصر بعد داك وغايتك |
ما دام انت متزوج فالنظافة اهم من الشياكة....فالف مبروك عليك. بس يا ريد تغير من العادة دي,,,,عشان خاطر وراحة بال الزوجة.
تسلم وتشكر جدآ
سؤال أحساسك كان كيف يوم عرسك وانت أخر شياكة والناس بتبشر وبتبارك لك?
| |
|
|
|
|
|
|
Re: لماذا لا يستشير بعض الأزواج السودانين زوجاتهم في ما يلبسونه قبل الذهاب للمناسبات العامة? (Re: يوسف محمد يوسف)
|
Quote: الاخ PLAYER تحياتى اتفق معك على أن رأى المرأة فى اللبس مهم جدا .. و حقيقة أن اللبس اصبح عنوان حقيقى للرجل خاصة اذا كان من اصحاب المناصب او الاعمال .. اختلفت الموضة بالنسبة للرجال كثيرا عما قبل .. بعد أن كان التناسق - Matching بين لونين او ثلاثة على الاكثر .. اصبحت الموضة الآن غير ملتزمة بالتناسق كثيرا ويمكن ان تكون من عدة الوان مع الذوق فى اختيارها .. يعنى الآن ممكن ترتدى مجموعة الوان مختلفة بس تكون منسجمة مع بعض . المرأة هى المرآة الحقيقية للرجل .. و لذلك ارى ان يستشيرها ان لم يترك لها حرية الاختيار .. وفى النهاية بالرغم من الامر كغيره من المشاركة الزوجية الآ انه يرضى الزوجة كثيرا .. و .. رضاءهن مطلووووب . مؤسف ان لا يهتم الرجل بمظهره خاصة اذا كان واجهة لاى عمل عام و خاص . |
المحترم يوسف محمد شكرآ لمشاركتك الداعمة جدآ للرجل للاهتمام بمظره ... واتفق معك جدآ في قولك هذا الآن ممكن ترتدى مجموعة الوان مختلفة بس تكون منسجمة مع بعض .
Quote: و .. رضاءهن مطلووووب |
لدي سؤال: ما العمل اذا اختلف رضاءهن عن رضاهم? لك ودي
| |
|
|
|
|
|
|
Re: لماذا لا يستشير بعض الأزواج السودانين زوجاتهم في ما يلبسونه قبل الذهاب للمناسبات العامة? (Re: محمد عبد الماجد الصايم)
|
الموضوع فيهو محاذير يعني في نساء ذوقهن أخير عدمو وفي أخريات بيكون ذوقن راقي بس نصف هؤلاء بيكونن غتيتات يعني بلاوزن يختارن للزوج عشان يكون في كامل أناقته في مناسبة عامة خوفاً من الطيران المدني وعندها بتكون جنت على نفسها فلانه. المهم في الأمر الأناقة شئ ضروري لا شك في ذلك لكين زي ما قلت ليك الموضوع يحتاج أولاً إلى ثقة شديدة في العلاقة الزوجية ومن ثم يكون إختيار المرأة لزوجها بالرغم من أن البهدله والبشتنه لا تمنع الخيانه والنطيط فالمسألة ثقة قبل كل شئ. العزابة كما ذكرت معذروين والمتزوجين ربما تجد لهم العذر في الخوف من المجهول الغريبة أيام الجاهلية الأولي في بلادنا الناس كانت بتزعل لمن واحد يقول ليك والله زوجة فلان ديك جميلة هسي الحكاية فكت وبقت العكس الواحد لمن يقولو ليهو والله زوجتك شرط أو شديدة تلقاهو يفرح بي كده. على العموم أناقتنا بنسبة كبيرة تعبانه يعني أكثرنا نساء ورجالاً لا نجيد الإختيار فغالباً ما نلبس من مبدأ حاكو حاكو وهو مبدأ كما تعلم غير موفق في كل الحالات فما ترتديه أنت ويتفق الجميع ربما على أناقته لا يتناسب وآخرين فالكلام على الشماعة برضو المهم الكثير من الزوجات مرتاحات لدكتاتورية الرجل وعدم إشراكهن في إختيار الملابس مع شتارة هؤلاء الأزواج في الإختيار الأمر الذي يجعل هؤلاء الأزواج بعدين كل البعد عن سهام الحسان وحتى لا يغنو ليهم راجل المرا حلو حلا ، فراجل مبهدل في اليد خير من أنيق على المدرج ويا دار ما دخلك شر
| |
|
|
|
|
|
|
Re: لماذا لا يستشير بعض الأزواج السودانين زوجاتهم في ما يلبسونه قبل الذهاب للمناسبات العامة? (Re: محمد عبد الماجد الصايم)
|
ازيك يا ود الصايم
Quote: حقيقة كيف يا بلاير؟ إنت سألت الناس دي كولها؟ |
دا ما داير ليهو سؤال......بس أمشي لاي مناسبة سودانية واقعد لك في ركن مواجه الباب ...وعاين بتشوف شياكة المراة وبشتنة الراجل...... غالبية النسوان بختاروا الالوان المتناسقة من الشبشب للايشارب ومكياج الوجه.......وكمان لكل مناسبة لبسة لكن كده عاين لغالبية الرجال,,,,,,,,,,,,الالوان متنافرة....وملابس السوق بتودي المناسبات
Quote: فإجابتي: لأنها هي البتجهّز الملابس!! |
دا كلام دا.....تجهز لنفسها لبس سمح.....ولراجلا اللبس الشين....لـــيه لكن? البدلة مع عندك(سمحو لك بيها كيف) تسلم يا غالي
| |
|
|
|
|
|
|
Re: لماذا لا يستشير بعض الأزواج السودانين زوجاتهم في ما يلبسونه قبل الذهاب للمناسبات العامة? (Re: PLAYER)
|
شكرآ جزيلآ يا الملأ عمر فكلامك ملئ بحكم وقواعد اللبس عند المتزوجين...ومفيدة جدآ للجميع...........وعجني جدآ الاتي:
Quote: وفي أخريات بيكون ذوقن راقي بس نصف هؤلاء بيكونن غتيتات يعني بلاوزن يختارن للزوج عشان يكون في كامل أناقته في مناسبة عامة خوفاً من الطيران المدني وعندها بتكون جنت على نفسها فلانه.
البهدله والبشتنه لا تمنع الخيانه والنطيط فالمسألة ثقة قبل كل شئ.
فما ترتديه أنت ويتفق الجميع ربما على أناقته لا يتناسب وآخرين
فراجل مبهدل في اليد خير من أنيق على المدرج ويا دار ما دخلك شر |
لك ودي وتقديري
| |
|
|
|
|
|
|
|