|
|
 ناس الريال وبرشلونة ديل جادين ؟
|
مباراة اليوم بين الريال والبرشا وقع الإختيار على فالنسيا كمنطقة محايدة لي إقامة المباراة ..
يلا أنقروا الجوطة والشكلة والاجتماعات والدخلة والمرقة في شنو ؟
كيفية طريقة قص نجيل ملعب فالنسيا !!!
حولاااااااااا ..
قالوا ليك لأنو برشلونة بيلعب كورتو الرايقة والسمحة دي في النجيلة القصيييرة..
ريال مدريد بيلعب في البرنابيو على النجيلة الطويلة ..
ناس الريال حذروا من إنو الميدان تتقص نجيلتو وتبقا قصيرة لي برشلونة ..
ناس برشلونة حذروا من إنو النجيلة تكون طويلة عشان تناسب ناس ريال مدريد ..
الإجتماعات مدورة مع عمل ملعب فالنسيا عن كيفية قص النجيلة ..
ومفكرين يخلوها حاجة في النص كده لا طويل التيلة ولا قصير التيلة ..
قمة الدقة والشغل الإداري ..
انا شخصيا ما بعتبر ده جرسة من الفريقين ولا هو حرب نفسية ..
هي فعلاً كده ..
حاجات بسيطة لكن بتأثر ...
هييييييييييييه نحن وين وهم وين ..
تتذكر يا نوبي ملعب إستاد مدني في بطولة المحليين ؟
يوم بي عجاجا وترابا واليوم التاني بي طينا..
يوم بي حفرة ويمين بي لوري تراب ..
أسة لعيبتنا ديل فارزين ياتو نجيلة بتنفع معاهم ؟؟
إداريينا عارفين أصلاً الملعب طولو كم وعرضو كم ؟؟
ويجيك مزمل يقول المفخرة ويجيك رمضان يقول ليك المقبرة ..
الله في..
تخريمة :
اقترح إقامة المباراة في دار الرياضة ..
|
|
  
|
|
|
|
|
|
|
 Re: ناس الريال وبرشلونة ديل جادين ؟ (Re: عمر الفاروق)
|
كلو كوم و مورينهو و مرينهو كوم براهو
قال ليهم ما تتدخلو في شغلي انا المدرب و انا من يقرر كيف يلعب الريال
أقترح إقامة المباراة في أرض محايدة ( الليق ) و تبديل حكمها الي (درمة )
ياخ ناس الإمارات قالو ح يشترو ليهم نادي أسباني و مفاجاءة كبري و الإعلان عنها ح يكون بكرة الخميس
عندكـ فكرة ده ياتو نادي ؟
_
حياة ريجنسي كيف بالله
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: عمر الفاروق)
|
ياخي انا قايلك عندك تحليل رياضي..لقيتك قاعد تشجع في نجيل فالنسيا
_
الناس ديل كورهم كترت ..الاسبوع الفات مورينو عشان يخرب وسط برشلونة عسم الكورة وقعد...لكن الليلة قطع شك الر يال مطقطق مطقطق بإذن واحد احد
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: GamarBoBa)
|
المضروب منو يا قمر؟
شايف الاشاعة الطلعتوها وصدقتوها في مورينهو ..
وشبكتوهو عسسم الكورة وخرب النكهة و و و ..
مورينهو ده تكنيكو وتكتيكو من الطراز الرفيع ..
كلام زي ده ناس غوارديولا ما بيفهموهو ..
ناس غوراديولا ديل لاقين الفريق الجاهز ده وبيشبكهم ليك شباااب خشو العبو الكورة البتعرفوها ..
انتو بس خلعتكم خانة بييبي الجديدة اليوم داك ..
مع اني ما بريدو ..
كورة الليلة غير.. مورينهو في مباريات الفرصة الواحدة بيعرف كيف يفوز ..
بيضربكم الليلة ..
وبيضربكم في الكورة التانية بي فارق بسيط ..وبيرجع يعسسم ليكم الكورة تاااني في المباراة الاخيرة..
| |
|
|
|
|
|
|
|
|
 Re: ناس الريال وبرشلونة ديل جادين ؟ (Re: عمر الفاروق)
|
هوي يا عمر الفاروق موش ناس برشلونه قبل فترة قالو ما عندنا مانع نلعب النهائي دا في السنتياغو برنابيو وناس الريال دقو جرس آل أيه آل خايفين يتغلبو ويشيلو منهم الكأس في أرضهم  خصوصا إنو ذكرياتهم مع نهائي الكأس في البرنابيو وحشه أوي والله جنس جرسه دي
كورة الليلة حتكون زيها زي القبليها كان قصرو النجيله كان خلوها طويله برشلونه ماسك الكورة والريال مخندق ويلعب على المرتده بيبي وسيرجيو شغالين دفس وعفص ويلكدو ومارسيلو يمثل ويتوقع ويتبكي .. برشلونه دا فريق عجيب بخت اي فريق ومدرب في حجمهم الطبيعي يعني لازم تنسى إنك فريق كبير وتدافع وتستنى لو إتسهلت تجازف ليك قون لكن ما تعمل فيها ند ليهو بخمسك وبسدسك زي المافي حاجه
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: مرتضى احمد عبد القادر)
|
| Quote: ناس غوراديولا ديل لاقين الفريق الجاهز ده وبيشبكهم ليك شباااب خشو العبو الكورة البتعرفوها .. |
و ناس رونالدو مالم مطهرين؟ ما يخشو يلعبو الكوره البعرفوها
مورينيو فى رأيي أشطر و أذكى مدرب موجود الآن , عجيب حتى في شفتنتو على الفرق التانيه و الاعلام .... لكن الليله ما عندو طريقه , ناس بارسا حيجو زعلانين من الدرون الفطيس داك و حيدوهم اعاده للخمسه .... ياخى قنزحة رونالدو دى براها تطمم البطن ....
البعملوهو ناس بارسا ده ما اسمه كرة قدم زى بتاعت ريال و ارسنال و ميلان و الهلال و اتحاد الشكابه ... ده اسمو فن
Making art with a ball
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: فيصل نوبي)
|
بالمناسبة يا شباب كورة برشلونة دي مسيخة ..ومحفوظة ..
قصة الاستحواذ وما ادراك ما 70% ده شغل كمبيوتر وتمريرات زيها زي تمريرات إدوارد جلدو زمان ديك ..
الكورة الفاتت برشلونة معظم تمريراته دي في نص ملعبو ..
رونالدو شوفوهو الليلة ..واتذكرو كلامي ده كوييييس..
العارض فك ..وفالديس من السوق العربي ان شاء الله بتخش فيهو..
برشلونة ده عبارة عن ‘نييستا ..
إنييستا تمام برشلونة تمام لا تقولوا لي ميسي لا جن احمر..
قوارديولا مدرب غير خلّاق ..وما بيفاجئك بي أي شي اثناء المباراة ..
مورينهو ممكن يكون مغلوب ويطلع مهاجم ويدخل مدافع ويدرن ويفوز ..عاااادي..
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: عمر الفاروق)
|
عمر
تصدق بديت اكجنك
وهسه الكهربا قاطعة عندنا
وبرضو محمر ليك
"مرفق الوش القاعد يدردق داك"
بى تحت تحت
كان الله كفانا شر سيرجيو بوسكبتس
تب ما بتجينا عوجة
بى تحت تحت تانى
تصدق يا عمر بقيت ما بقدر اتفرج فى كورة برشلونة
الاعصاب بقت زى الزفت والله
عليك امان الله لى تانى يوم ولا تالت يوم حتين اقدر اشوفها فى اخبار الرياضة
والنشرة ذاتها كان ما قاعد تقرا فيها حذام العجيمى
ولا بشوفا
يكون كبرنا ولا شنو ؟
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: خالد)
|
طقطقونا امس
مورينو عملها والله..بنقول مورينو ما فريق الملك
مبروك للريـالاب
برشلونة امس ما كان في الموعد
مبروك يا عبد اللطيف بكري رغم بعدك عن الموقع ونتمني عودتك السريعة....
| |
|
|
|
|
|
|
|
|
 Re: ناس الريال وبرشلونة ديل جادين ؟ (Re: محمد عبدالرحمن)
|
سلام يا كورنجية ..
كويس إنو كورة أمس دي مرقت لينا قمر بوبا كيفك يا حبيب ..
المباراة بدأت بحذر شديد من الريال مع إستحواذ للبرسا ..
إحتكاكات متكررة بين اللاعبين نسبة للشد العصبي الشديد كاد أن يفسد جوء المباراة ..
شوط أول متكافئ لحدٍ بعيد مع خطورة المرتدات للريال ..
شوط ثاني مثير سيطرة كاملة لبرشلونة كان ممكن تؤدي لهزيمة كارثية لولا يقظة كازياس النجم الأول في المباراة حسب وجهة نظري ..
مرتدات الريال شكلت خطورة كبيرة على البرسا ..
ودا كان ظاهر في إعتماد مورينهو على الإرسال الطويل مستفيداً من سرعة رونالدو وخوسيه دي مريا ..
ما عاب دفاع برشلونة إندفاعه للأمام وكان نتاجه الهدف الذي ولج مرماه من رأسية رونالدو وعكسية دي مريا المحكمة ..
المباراة في مجملة جميلة ومثيرة ..
المتعة الحقيقية في أنك بتشاهد مباراة من فريقين عملاقين يلعبان كرة ممتعة ..
مبروك يا عمر الملكي ..
وهارلدك يا مطر يا لعاب وين ما ظاهر ..
قمر بوبا وشخصي بنحب اللعبة الحلوة لكن بي تحت تحت برشلونابي عديل كده ..
غايتو ما عجبتني خندقة مورينهو طوالي ذكرتني كروجر والجماعة ناس 3 6 1 ديلك ..
مبروك لريال مدريد وحظ أوفر لبرشلونة ..
ويا عمر الفاروق الميدان يا حميدان أنتظرنا في المباراة الجاية
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: معتصم دفع الله)
|
امس ساهرت للصباح قلت عشان احضر مباراة البرشا والريال
مع انو لا ناقة لى ولا جمل في تشجيع أي منهما ... البشيل الكاس يشيل ... مافارقة
انا بشجع المريخ ... وبس
والفرق السودانية او الفريق القومي السوداني ... في المنافسات الخارجية ..
وكل الفرق الأفريقية في جميع المنافسات العالمية ...
يعني مامكن تعقد 120 دقيقية تشوف قون واحد بس ...
ومباراة ناعمة بشكل ...
بالله دكتور واحد يدخل الملعب مافي ...
اللعيبة براهم بساعدو في بعض ... ويرفعوهم من الارض ... اقصد البساط
والغريبة ... عربية إسعاف واحده ما عندهم ..
والملعب نظيف ...
والجمهور بشجع بصوت واحد ... التقول موسيقي لخلفية لفلم ...
والباصلات يملسوها مليس ... من لاعب لى لاعب ..
ديل ماشافو دورينا ... او مباراة في البطولات الافريقية ..
اول حاجة عربية الاسعاف دي لازم نغيير ليها العجلات كل مباراة ..
من كثرة الدخول والجري في الملعب ..
وكمان جزمه جديدة لكل الطاقم الطبي ... أول كل مباراة
ولازم يجرو اكتر من اللعيبة ... بنعمل ليهم تمارين لياقة خاصة ...
وبنختارهم حسب اللياقة البدنية وليس المؤهلات الطبية ..
لانو المطلوب فقط ... التدلتك بالتلج ... وتفريغ علبة مخدر ...
وأهم شرط لضيافة المباريات توفير لوري تلج .. وبوكس مخدر ..
تستهلك في اللعيبة ... والباقي للجمهور عشان يفلقو بيهو بعض ...
والعجب الباصات بين اللعيبة ... لازم صوت الباص " لب " تسمعو في التلفزيون ..
انت قايل ملاعبهم في اوروبا حلوة وجميلة كده ليه ..
عشان الباص بتاعم بملسوهو مليس ..
نحنا باصنا ... اللاعب لازم يشيل معاهو مترين نجيلة ...
وأربعة "كواريك" رملة ... وإلا ... لا يعتبر باص ...
والعجيبة منطقة المرمي ... دي لازم تكون "بادوبه " و "دلجة"
عشان الحارس والمهاجمين بعد المباراة ... ياخدو اجازة شهرين ...
وده كلو كوم والجملة التالية التي تظهر لك في الشاشة كل خمس دقايق كومين :
نعتذر للمشاهدين عن انقطاع الصورة من المصدر ....
التقول المصدر ده ماليهو علاقة بقناة البث .... أو مسؤوليتهم ...
توبه ... تاني ما مساهر واحضر دوري أوروبي ولا سجم ..
خلوني في الدوري البقوم النفس ويرفع الضغط ده ....
تقولي شنو ... تقولي منو ....
ودمتم ياشباب ....
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: ياسر نجيلة)
|
ياسر نجيلة سلام ..
انت قايل البنسوي فيهو دا كورة ..
ياخي دا عك ساي كل 11 يلاقي 11 وهاك يا دواس ..
بالله ما شفت قوارديولا ومورينهو ديل أمس ..
مدربينا المباراة كلها أرجع - غطي - لاقيهو - ختو في سدرك - تمام ..
لا خطة لا طرق لعب لا تكتيك ..
غايتو نحن يحلنا الحلة بلة الوقفوهو ناس المريخ
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: معتصم دفع الله)
|
Quote:
ياخي دا عك ساي كل 11 يلاقي 11 وهاك يا دواس ..
مدربينا المباراة كلها أرجع - غطي - لاقيهو - ختو في سدرك - تمام .. |
والله يامعتصم انت لخصت الموضوع بصورة مختصرة ومباشرة ...
بتعرف لما يكون لي كم يوم متابع الدوري الاوروبي ... واجي راجع لمتابعة دورينا ...
بكون عاوز كيس حبوب وأدوية ...
عشان استوعب الفرقوقات ....
واقنع نفسي انو الدوريين في لعب كورة القدم ...
والله فعلا ... عالم اول وتالت ماجات من فراغ ....
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: معتصم دفع الله)
|
Quote: المباراة في مجملة جميلة ومثيرة ..
المتعة الحقيقية في أنك بتشاهد مباراة من فريقين عملاقين يلعبان كرة ممتعة .. |
فعلا ياود دفع الله اتمتعنا
عمر الفاروق ... سلامات
تفالت بالبوست بتاعك جدا وبعد انقطاع من مشاهدة الريال ضد البارسا
بسبب الطقطقة الكتيرة اربعات وخمسات لما زهجنا ذاتو
لكن امس قعدت بمزاج استمتعت بداية المباراة لان السيطرة كانت ريالية
الشوط التاني قعدت ارجف وحليمة رجعت لقديمة
الريال فريق كبير
ولكن تعجبني طريقة اداء البارسا وحسب كلامهم يرجع الفضل الى المدرب الهولندي( كرويف )
هو من ادخل لهم الاسلوب الراقي وعملوا على تطويرة واتقانة طول الخمسة عشر العام السابقة
ودا حسب كلامهم وتصريحاتهم الان يلعبون بسيطرة كاملة في جميع الخطوط
بس ازعل عندما يقهرون فريقي الريال
وامس رجعنا الى حلاوة النصر بفضل مورينهو الذي يعرف كيف يوظف اللاعبين ويعرف مكامن الخطر
| |
|
|
|
|
|
|
|
|
|
Re: ناس الريال وبرشلونة ديل جادين ؟ (Re: GamarBoBa)
|
والله يا شباب
طبعا انا بشجع الريال
ومنحاز ليهو من ايام زيدان ورونالدو
ومقتنع بي انه مرينيو انه احسن مدرب في العالم
ومتابعو من تشلسي الى الانتر الى الريال
وكنت مقتنع انه الريال بي امكانياته دي محتاج الى مدرب زذ مورينيو
لكن بعد اترشه خمسه وسقط في الدوري
امنت انه الكورة مدورة
وانه لعيبة برشلونه ديل سحره
خصوصا انيستا وشافي وميسي
لكن خبرة وحنكة ودهاء مورينيو
قدر يقراء البرشا كويس
وانه لو لعب كورة مفتوحة
سوف يهزم شر هزيمة
لذا كان التقفيل والانضباط التكتيكي
والتعادل في مباراة الدوري
والفوز في مباراة الكاس
عشان ده كانت الفرحة عظيمة
قولته لي النجيلة كيف يا عمر
حرم ناس موسى الزومة
ما عارفين وين الله حاطهم
| |
|
|
|
|
|
|
| |
عمر الفاروق
فيصل نوبي
Hisham Ibrahim
GamarBoBa
مرتضى احمد عبد القادر
أبوذر بابكر
خالد
محمد عبدالرحمن
معتصم دفع الله
عبدالله كع
ياسر نجيلة
وليد عبد اللطيف
طارق عبد اللطيف نقد
فيس بوك
تويتر
انستقرام
يوتيوب
بنتيريست