|
|
 وطـــــــــــــــــــــــــــــــن
|
وطـــــــــــــــــــــــــــــــــــــــن
1/
وكتين سِمعتَ الليل هدر،
طقطقتَ أصبع حيرة/
سنيت القلم..
"ما أنا مِن أمِس،
سايقني شوق الله الكتير،
وإحساسي سادِر في العشم..
يا ربي بلحق حدي أروح،
أطرح الصريتو في جوف الجروح،
شوقاً مضفر بالحنان,
وصهيل نغم؟
شِلتَ الوِلاد بي كُل وِداد،
خليت كلامم في البُعاد:
كِسرة ورماد..
بشبه بِلاد خليتا في خشم السُهاد
مكتولة بالزيف والعدم..
كيف يا بلد
ما الليلة في شُرف البُعاد
دفر الضلام قلب السكوت
فَرط النضِم.."
2/
زمان،
والشوق معبي الروح
كلام
ظنيت مدارات الغرام
جواي
ما بتعرف ملام..
وإحساسي زي مس الملاك
هامِس
يوشوش لي صداك
والكون غمام..
سنوات عشانك منتظر
والروح مشحتفة بالودار
أيام تمر بين المسام
تلقى الأمل فرد الهيام
والدّم يضخ صوتك غمام
والقلب دقاتو احتدام
صوت الوتر
شايل حروف اسمك
زِمام
ناديت وكل الصوت سدر
جاييك يا شوق المطر
ناديت وما شرد الظلام
كاتم محاسنك بالكدر
غابت تراتيل الوصول
والدمع فاض
زاد النحول
وأنا يا معاي
مِنك
ومشتول في العدم
3/
وكتين حنين الناي
يهبِش فيهو صوت رقراق
ينقرِش في مسام سهاي..
ووكتين خيالاتن دُغش تتهادى
تكشح في عيوني
نواي..
وتفضح في وجيهي
أساي
ب
ح
ب
ك...
وما أظِن أبداً بلاكَ يمِد صباح الحُب
شُعاعه في قلبِ
غير قلباً سماهو سماي..
وصوتوا يشُق مسافاتً على ضهر المطايا
أعياد
سَبت أعضاي..
بحِبك يا بلد مهزوم
وجوا الصّد
وِلادك ما بخبروا الجد
وكِت ما تقوم
تنفِض صبرك المكتوم
تمِد الليد
تقيف في الحد
سلام
وسلام
سلام يشعِل سماك بالنّد
يشيل من عينك التوهان
يخضِر في جروفك سعد..
سلام يا واحة الثورات
ويا عُش الطيور
والورد..
سلام يا جُملة غمامة
في صفحة كِتاب الغد..
بحبك وبينا بس
أعياد..
وأشواق ما ليها أبداً
حد..
29/3/2009م
|
|
  
|
|
|
|
بله محمد الفاضل
فيس بوك
تويتر
انستقرام
يوتيوب
بنتيريست