يا ناس نجوم الغد عليكم الله فكونا من الزول دة..

Quote: يا ناس نجوم الغد عليكم الله فكونا من الزول دة..

Quote: دكتور محمد يوسف رجل خبير في مجالة و ناقد فني محترف اللوم كلو في المخرج و المعد هم اللي بيحددو روح البرنامج و مفروض يوجهو مقدمي البرنامج لتحقيق الشكل العام لروح البرنامج.

Quote: طارق يا صاحب لو عاوز الجد و( الفككان ) ما نرجوه أن يفكونا من ( نجوم الغد ) زاااتم لا مواهب حقيقية نفخة في الفاضي بمجهود آخرين كذبوا على أنفسهم وكذب عليهم آخرون فصدقوا الكذبة وعاشوها والزاد الطين بلة أن البرنامج الذي بدأ في قناة النيل الأزرق هاهو يتمدد للقناة القومية وربما يتمدد في بقية القنوات في سير طبيعي للعقلية ( القردية ) السودانية التي يعوزها الخيال الخلاق المبدع فتلجأ للتقليد حتى صار ( البحث ) عن موهبة الغناء في أوساط الخريجين وطلبة الجامعات هو هاجسنا فهل هذا هو هاجسنا ومشكلتنا وما نفتقده حقاً ؟؟

Quote: أقول هذا ولا أتفق معك في تحليلك للدكتور محمد سيف الذي أراه متمكناً من مادته مزج العلم النظري بالتطبيق العملي

يا عاطف انا ما عندي اعتراض على كونه دكتور وفاهم مادته
انا اعتراضي على الطريقة البيوجه بيها الموهوبين الموعودين ديل
يمين انا كان مكانهم كان فلعتو بالمايك


تليشة:
ياخي عريسكم دة لي هسي ما دفع لينا قسط واحد من حق القراية

Quote: لا مواهب حقيقية نفخة في الفاضي بمجهود آخرين كذبوا على أنفسهم وكذب عليهم آخرون فصدقوا الكذبة وعاشوها

Quote: وحات نضري الزول دة عامل زي دكتور الجراحة في امتحان الشفوي تقول ليه نشيل الطوحال يقول ليك لا شيل الخصية اليمين والمريض أنثى

Quote: كـلام جميل يا عاطف، وضيف ليهو برضـو (أغاني وأغاني) من حيث عدم القيمة الفنية رغم بعض الأسماء المعروفة فيهو.. بعـدين يا طارق لامـن أصلو إنت مقتنع إنو البرنامج مجوبق ومكعوج ومكلوج، يبقى المفروض تكون مبسوط من محمد سيف إنو بديهم على راسهم (أنا في الحقيقة وحتى لامن كنت في السودان الأشهر الماضية ما كنت بتابع البرنامج لقناعتي بعـدم قيمته).. على أي حال وحتى في البرامج العالمية بتاعة ال آيدولز والتالنت ـ أو أيا كان أسمها على قول حسين ـ دايما بنلقى كل واحد من لجنة التحكيم طريقتو بتختلف من التانيين، ودايما فيهم المتشدد أو الغتيت.. أنا ما بحب المثل بتاع: بقول للأعور أعور (في عينو!).. يعني هو مسكين ما عارف روحو أعور؟.. لكن الزول الما بعـرف يغني وزي ما قال عاطف فاكيها في روحو ومصدق، وإذا كنا نحنا فعلا بنبحث عن مواهب وفنانين ومبدعين، فدا مفروض طوالي وبصراحة وقـحة نقول ليهو يا زول أمشي شوف ليك شغلة تانية أقضاها.. تذكرت قصة سمعتها من خالي وهو (موسيقار) معروف في السودان، عازف كمان.. قال لامن كان في (الأولية) والكلام دا حوالي أواسط الستينيات (قبل الميلاد أي ميلادي أنا)! كان عندنا قريبنا في الحلة وهو صاحب الدكان الوحيد والراديو الوحيد، وكان خالي بمشي بقعد جنبو وبستمع للأغاني، سيد الدكان قاليهو: إنت اسع حاضن الرادي دا كدة فاهم ليهو شنو؟ خالي قال ليهو: أنا داير أسمع الغنا دا عشان أعمل زيو.. قريبنا رد عليه بسخرية: إنت الغنا دا قايلو لعب؟ شفت ميزاني البوزن بيهو السكر دا؟ الغنا دا عندو ميزان زيو كدة!!.. المهم النكتة كانت لامن تقابلوا بعد حوالي عشرين سنة من الكلام دا، وخالي ما يزال بذكر القصة وحاول يذكر صاحبو لكن قال نساها.. فقال ليهو: على أي حال أنا مشيت الإذاعة والتلفزيون كمان وعزفت فيهم،، لكن كلامك بتاع الميزان لقيتو صاح!.. مـودتي التي لا تعـرفون..

Quote: نجوم الغد قدم مواهب حقيقه وقدم انصاف مواهب وقدم ناس ساكت بلا مواهب الافضل انه دكتور سيف يقدم ليهم النصح بلا مجاملة .. لانه في ناس فكوها في روحهم ساكت وعملوا فيها نجوم جد جد ناس المجاملة في البرنامج برضو قاعدين .. يعني في موازنة وكده اكتر زول قدم نصح جميل وتوجية اجمل للمواهب الشابة .. هي الاستاذة آمال النور أجمل موهبة خرجت عن طريق البرنامج - في وجهة نظري - هي الرائعة جدا عافية حسن سلامات ود جبريل

Quote: الريس طارق ... ازيك ... مرور محبة ساكت انت بالله بتحضر فى نجوم الغد الى ألان البرنامج فقد رونقة من زمان بس د. سيف بقول الحقيقة بدون مواربة ودا الصاح لانو مناخ الغناء الان محتاج لمصفاة بالجد .... ياحبيب بفتش لبيتنا فى المنبر وفترت من البحث طبعا بعد غيبة اجبارية طويلة

Quote: هو من ناحية غياظ غياظ لكين ما يجعل غيظه ينبلع أنه بيقول الحقيقة في الوش توووش يعني ما بتمتم زي دكتور الدرديري ومحمد سليمان يقولو ليك إنت يعني ممكن لو إتمرنت كتير على الحته دي وطلعت من جلابية كمال ترباس وبنطلون كمال كيلا وطاقية خلف الله حمد وتوب عاشه الفلاتيه يعني ممكن تكون فنان وإنت ما ممكن تسافر زاتو ، كدي شوف نقد الرحباني للمبتدئين مره قال لي واحده بعد ما لعلعت وغنت لامن عيونا إتشحطن والعبره خنقتني أها قال ليها شو بتعملي ، شو هوايات تانيه عندك؟ أظنها قالت ليهو وهي ترتعد فرائضها من الخوف نا بهوي بجانب الغناء الرسم ، قال ليها خلاص بنصحك تركزي على الرسم لأنه ما إلك في الغناء ، هادا الشئ الإنتي عملتيهو ما إيلو إى علاقه بالموسيقي.

ياخي لكن الدكتور دة بس ياها ذاتها ((لو كنت فظا))

Quote: ود البشاري انت اقعد اضحك كدة لامن تبقوا تلاتة

Quote: لو فيه زول مسيخ فهو العارف نفسو مسيخ، وقالها قبل كده.. هو محمد سليمان من المواهب الرائعة جداً منار صديق، فصوتها لم يكن له مثيل لا من قبل ولا الآن.. ومن المواهب أيضاً رماز ميرغني وزميليها الذين غنوا أغنية (كيف الحيا من غير ليمك)، وصنفوا في هذه الأغنية ب(شباب مدني) للأسف لم أعرف اسماء زميليها، ولكنهما كانا رائعين بحق.. شكرا يا ود جبرين

Quote: فاقدلك معسة بعنكوليبة عشان تعرف الدرب عدييييل يا مسنوووووووووح

Quote: ومحمد سليمان

Quote: ابو النصر يا منقة زي ما قلت للحبيب عاطف انا اعتراضي على طريقة توجيهو يعلم الله تكره الزول الغناء

Quote: يا دكتووووووووووووووووور تعرف يا طارق أيِ ( لجنة حكم ) * بكون فيها واحد ( دِفش) ، بس مهم يكون لأنو الحق مرات لازم ينقال لاحظ برامج أراب قوت تالنت ، والنسخة الأمريكية أو الإنجليزية ، وزمان في قناة المستقبل برنامج سوبر إستار بس من ناحية تانية بتلقى ( الدفشين ) ديل هم أسياد الشغلة ومنقطنها . غايتو عفيت منها البت العسل الغلبت " السخيف " عمرو أديب وخلتو ما يقدر يقول كلمة من كلماتو ( الدِفشة )

Quote: هاي انت لكن مازول راقي ياو ناس ابودية اسياد الفن انت كل استاذ بعرف يغني ما القاب وبطلقوها ساكت وللا كل استاذ بيعرف يوصل المادة والتوجية للطالب على قول ناس المهندس كيكي في الكراكر والجخانين بنقول عليهو شغل هردبيس الزول دا زمان لوتذكر ماقلتلك طريقتو غلط دحين وقعلك كلامي ياوليدي

Quote: أبقوا عشرة على عيال أبو الصحافيين المرحوم بإذن الله أبوبكر الشريف

Quote: سلام يا خال بشكل شخصي أجد أن الدكتور محمد سيف شخصية صعبة وغير مرنة أبداً لكن هذا لا يعني أنه غير متخصص فالدكتور محمد سيف بالفعل متمكن في مجاله نظرياً وعملياً و فوق هذا وذاك هو انسان لا يجامل ابداً . بالجد لو في زول غياظ وماليهو حوجة في البرنامج ده فهو السيد / محمد سليمان فمن المعروف أن الدكتورين محمد سيف و الدرديري هم متخصصين اها محمد سليمان ده جايبنو لي شنو؟! يعني هو بيعرف يسمع احسن من منو!!؟ والقصة شنو !؟ وبمناسبة انسب الاستاذ بابكر صديق ذاتو بقي بايخ جدن ودمو تقيل .

محمد سليمان مهرج لا اكثر

Quote: تقول ليه نشيل الطوحال يقول ليك لا شيل الخصية اليمين والمريض أنثى

Quote: محمد سليمان مهرج لا اكثر