|
(مرت الأشجار) قصيده جديده لشاعر الشعب محجوب شريف
|
مرت الأشجار
كالخيال أحلام
ناس لطاف وظراف
مابين غزال وزراف
مابين ظلال وغمام
مرت الأشجار
طابق طبق طابقين
في ضلهن كرتون
حر والسقط أولاد
تحت المطر ياجون
لاعندكم عداد
ولابوهيتك كم لون
ما احتجت لي حداد
يوما ولا نجار
وكنت ألطف جار
ومرت الاشجار
الباقي تحت العين
حيث الرماد أحجار
من يوما داك فاقداك
كل الدروب فوق راي
ياخيت وهيت ياكيت
حس المقص بكاي
سكسك سنون براق
نار الفراق جواي
أمونه ست الشاي
صمت الكبابي عويل
برادا ساكت ساي
ياحليل تريزا قريب
كانونا كان بي جاي
ياحليل جناها جناي
هم يسألون وعيون
تحزن تقول باي باي
يامنتهي الأشواق
اتمحن الكنتين
والنيمه ذات الساق
القدره كم تشتاق
كم كمشه مويه فول
سمسم عمل زقزاق
وين الملامح ديك
يازحمه البصات واللفه والدقداق
ليل القهاوي حزين
عدد الكراسي فراق
جفت عروق السوق
ريق الطريق العام
واتحتت الأوراق
---------
وين ياسواد العين
مشهد علي صعبان
شبان وهم حبان
تحت النجوم الفوق
في عتمة الميدان
الشوق بلا بيبان
من وين ذهاب واياب
وكلاهما تعبان
ابنوسة اللاوو
ياحليلا غصن البان
جمر الحصي الوقاد
علا الكتف أركان
ميري الفراق بي طال
وسال سيل الدمع هطال
لكنو مهما كان
لو بالوسم سكان
لو بالرسم جيران
متين بقيت يانيل
عددا من الخيران
نتدفي بس أو قول
نعزم بعض يوم داك
بنولع النيران
29 يناير 2011
|
|
|
|
|
|
|
|
Re: (مرت الأشجار) قصيده جديده لشاعر الشعب محجوب شريف (Re: عاطف مكاوى)
|
يا سلااااام علي الشفيف ووريف
محجوب شريف
ما احر الفراق لميري وتريزا وبول ومادوت
انخربت خرطة السودان ومنظر الانسان
اهل الجنوب هم هن اجمل شعب
يا سلام في القلب حسرة وبالعين دمعه
ماشييين مخلننا ليييه
للكجر واهل الفهم المتخلف
ما بين شريعة وعنف وكثافة انسان
وما بين حكم علماني ولطافة انسان الجنوب
حسرة حسرة حسرة
حتي ان ما تبقي من وطن اصبح مسيخ
| |
|
|
|
|
|
|
Re: (مرت الأشجار) قصيده جديده لشاعر الشعب محجوب شريف (Re: طارق الأمين)
|
شكرا ياطارق وكالعادة نص مفعم بالحنين الدافق والعاطفة الجياشة والبساطة والسهولة العميقة ... نعي مفجع لوطن مفرتك Quote: ميري الفراق بي طال |
يبكي محجوب الفراق والتمزق وهو الذي طالما غني للوحدة والسلام والتنمية ودولة المواطنة :-
Quote: عشة...كلمينا ميري...زكرينا كل سنكي احسن يبقي مسطرينا نحنا شعب اسطي يلا جيبو مونا نبني ..نبني..نبني مسرحا ...ونادي مصنعا وبوستة حرب لالالا
كبري استبالة صالة للثقافة جاى..جاى..جاى مافي حاجة ساى كل عندو دين والكل عندو راي بور وبور سودان بارا والجنينة عبري ولا واو حاجة مش كويسة كل زول براو ايد...وايد..وايد تزرع الجديدغابة النشيد ايد...وايد...وايد مافي بينا سيد ايد.وايد..وايد نلحق البعيد ولعووووووووو الرتينة وكل سنكي احسن يبقي مسطرينا |
وهاهي ميري الرمز تغادر راحلة والنيل القديم يتحول لترع وخيران متفرقة ومتنافرة
Quote: متين بقيت يانيل
عددا من الخيران |
...........
| |
|
|
|
|
|
|
Re: (مرت الأشجار) قصيده جديده لشاعر الشعب محجوب شريف (Re: ابو جهينة)
|
التحية لشاعر الشعب محجوب والتحية للفقراء الذين قهرهم الضُر في الشمال والجنوب والذين لم يعرفوا لِمَ يُفْعَل بهم هكذا
لقد التقى انفصاليو الجنوب والشمال ومؤامرة رأس المال العالمي ليتقرر مصير وطن ، لا يدري أبناؤه إلى أي مصير * لقد كان التزوير في انتخابات أبريل الماضي واستفتاء يناير 2011 ولا أحد يتحدث عن التزوير من المراقبين الأجانب ، الصمت الصمت ضد أن يكون الجنوب إلا منفصلاً ....
والضحايا على الحدود يقبعون .. والفتنة أشر من القتل * نيفاشا كتبها الأمريكيون والسلاح للجنوب من إسرائيل منذ الستينات وفي دارفور كان تسليحها كانت فكرة شارون الذي يقبع جسداً ينتظر الموت السريري بغض النظر عن مطالب الشعب وحرق أكثر من ألف قرية نتيجة انتقام نظام حكم .
*
الوطن بؤرة مؤلم الحديث عنها ، التقى كل الأشرار في جلسة مصالح واحدة ليقرروا نزع القلوب التي تُحب عن الأجساد التي تحيا
*
| |
|
|
|
|
|
|
Re: (مرت الأشجار) قصيده جديده لشاعر الشعب محجوب شريف (Re: jini)
|
Quote: أمونه ست الشاي صمت الكبابي عويل برادا ساكت ساي ياحليل تريزا قريب كانونا كان بي جاي ياحليل جناها جناي هم يسألون وعيون تحزن تقول باي باي يامنتهي الأشواق |
محجـوب شـريف .. يا نبض الضمـير الحي متعـك الله بالصحة وخفف عنك وعنا وعنهم ألم الفراق .. طارق اللمـين .. شكـرا يازول يا زين
| |
|
|
|
|
|
|
|