|
بشري سارة لجماهير العاصمة المثلثة (توجد لحمة وبيض و..... وكدة )
|
ولاية الخرطوم وزارة الزراعة والثروة الحيوانية والري إعلان هام
ضمن خطتها الرامية لتخفيف أعباء المعيشة علي المواطنين وتخفيف حدة الأسعار ، تنظم وزارة الزراعة والثروة الحيوانية والري أسواقاً متكاملة مفتوحة للبيع المباشر للجمهور غداً الخميس 20/1/2011 بميدان جاكسون بالخرطوم والمحطة الوسطي ببحري تشمل منتجات الفراخ والبيض واللحوم الحمراء الخام والمصنعة والخضروات والألبان بأسعار مخفضة بنسبة 40% من السوق . بالإضافة الي المراكز بالهيئات والمؤسسات الحكومية وعدد 26 منفذاً بطلمبات ماثيو والمحليات .
والله من وراء القصد
د. تاج الدين عثمان سعيد مدير عام وزارة الزراعة والثروة الحيوانية والري ولاية الخرطوم ورئيس غرفة الطوارئ
ــــــــــــــ المصدر صحيفة التيار الموافق 19/يناير/2011 العدد (510) الالربع الأخير للصفحة الأولي
|
|
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: طارق جبريل)
|
خضر و الله ليك وحشة و الشوق ( Misoara )
عنوانك ذكرني بقصة في حلفا الجديدة في أول أيام الهجرة إليها راجل عجوز على عربية كارو و على الكارو مثلث خشبي كبير به صور إعلان عن فيلم هندي و عمنا دة معاه جرس يدق فيهو و هو يصيح بأعلى صوتو :
بشرى سارة ... يا جماهير حلفا ... الفيلم الهندي الرهيب .. شامي كابور .. أغاني جميلة و رقص فنان ثم يختتم دعايته قائلا : و هناك مفاجآت أخرى
فسألت صديقي الشفت ( تاج الدين ) : مفاجآت دي شنو ؟ فقال : المفاجآت دي معناتا إنو عندو بنقو ملبوكة وارد الجنوب ، و ال عاوز يمشي ليهو محل مراح الحمار ، تلقاهو داسيهو مع البرسيم
( وجه ماخد نفسين مع قمشة زفير وارد صرص )
***
تخريمة : بشري سارة لجماهير العاصمة المثلثة (توجد لحمة وبيض و..... وكدة )
و كدة دي ما تشوفها لينا يمكن يكون فيها دكاي ولا نبيت
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: خضر حسين خليل)
|
يا خضر
شوف ليك ديب فريزر كبير إن شاء الله بالتقسيط وخزن الحاجات دي كلها وبأكبر كميات. ولو ماقدرت تشتري الفريزر إن شاء الله تخزن في المخيخ العلوي والسفلي بتاعاتك. في الصيف الماضي كان سعر كيلو الدجاج حوالي9 ونص وبدا يرتفع . قام الوالي أعلن إنو سيفتح منافذ لبيع الدجاج بأقل من كدا. في نفس اليوم المساء كان بتاعين بيع الدجاج بالقطاعي خاتين قطعة كرتونة قدام الدكان وكاتبين عليها سعر كيلو الدجاج 12 جنيه. فتأمل!
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: مرتضى احمد عبد القادر)
|
Quote: يا عمك الشغله دي محتاجه فحص آلي ما يدردقوك بالسعر ابو فرقه
|
يا مرتضى خضر ده معدتو وصلت مرحلة (التطبع) بعدين ياخ اسحن يموت متسمم بجداد مستورد وللا فول
على الاقل الشباب ينضموا بعين قوية عن تاريخ شهيد الجداد خضر
يالله ......صديقنا ......................مات متسمم بجداد
اها ..يقوم واحد يسال هو المرحوم البياكل جداد اكان شغال شنو؟
خضر السودان عليك بالجداد الحلال ..احسن من خضر الاوربى بتاع الخنزير الحرام
ولانامت عيون مرتضى العلمى التعبان
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: مرتضى احمد عبد القادر)
|
Quote: كيلو الضان 24 جنيه عداً ونقداً كيلو العجالي 17 جنيه عداً ونقداً (ودي في الغالب بتكلفك نص انبوبة الغاز لحين الاستواء) كيلو الفراخ 14 جنيه عداً ونقداً |
تخفيض 40%؟؟؟ يعني كيلو الضان حيبقي بالضبط 15.4 العجالي 10.2 الفراخ8.4 ياخينت قاعد تسو شنو طيب..أرسل أخانا حليم بعدد 3دفارات ومعاه عتالة سريعين للتو واللحظة والتخزين علي أنا ده وبعد يومين خت 20% بس وفكها لناس الجمله يعني يعني خزن ليك 10 طن مشكل كدة بتكون قفلت اسبوعك علي تلاتين مليون كدة وكمان لو ختيت فيها الاربيعين وبعت بالقطعة مع الصبر والمثابرة والمصابرة بتعمل ستين...وطوالي أرجي الخميس الجاي
_ ياخي دي بلد ما عندها سيد؟؟؟40% في لو بتتخفض انتو رافعينها 30% بس ليه...الناس ديل جدادهم ده بكونوا جايبنه من فيتنام ولا حتة تانية
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: Elawad Eltayeb)
|
يااااا حسبووو؟؟ دايما متعجل ...انت ما شايف مورتا من جا خاشي استلم ارتكاز كيف؟؟ الموضوع ده ما مضمون وعليه انحن يوم بكرة ده نعمله للتجربة حفل شواء كدة جنب محلاتهم وفي نص السوق .. يعني انا علي الكانون والفحم والبتاعة البركبوا فيها اللحمة حسسبو اتولي موضوع البهارات والخضار وما تنسي (البأدونس) علي قول المصاروة ما تلاوز تلاتة الف بس خضر ومورتا عليهم 2 كيلو معتبرين الهبابة بتاعة الفحم خلوها لحليم
لحدي ما يجوا ناس الكشة مؤكد بنكون فطرنا...لو الموضوع طلع تيستي كدة نمش نجيب الدفار
قلتو كيف؟؟
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: Amira Elsheikh)
|
Quote: حسسبو اتولي موضوع البهارات والخضار وما تنسي (البأدونس) علي قول المصاروة ما تلاوز تلاتة الف بس |
ياااا بوبا, تلاته جنيه ؟ إنت عايش في ياتو عصر! يا زول البهارات و الخضار و البقدونس دي براها ميزانية, عشره جنيه ما بتكفيك غايتو انا ح اتولي حق المواصلات البتجيبني و ترجعني
بالمناسبة يا بوبا, اعملو حساب اولاد الحله, من ما وريتهم بالحنك قالو لي الحجل بالرجل ما تلاوزو كلهم ستة انفار
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: عبدالكريم الامين احمد)
|
هديمك يا وليدمقدود و صابحنا الفقر و الجوع صبح باب التكل مسدود كمل حتي الملح في البيت وشن همّ الملح في البيت وكت ملح الدموع موجود؟! دحين يا وليد هو ديل موُ قالوا ناس إنجاز ؟!! وشن سّولنا مما جونا غير حرقو الفضل بالجاز ؟ كّل شيتا صعب في السوق من الكبريتة للطايوق و كان جانا البخت تموين رطيل سكر و صابونتين نجيب من وين ؟ و اخوك مرفود و عدمان الشهر ملين ؟ أمس زازيت اكوس الدين مشيت لسمية بت مامون لقيت جابولها تلفزيون سمح بالحيل تشوف الصورة بى كم لون وكت في نشرة ألأخبار ظهر مك البلد يضحك جضومو كبار مزرر الكرش بزرار لا مهموم لا مغموم لا زعلان و شيهو يراري بالألوان.. وقّد في حشايا تباق نار طريت رفد الوليد و الجوع و سال دمع الغبينة الحار اريتك يا ملك فد يوم يخلى الجوع عينيك ما تنوم أريتك يا ملك فد يوم تحس بي غصة المظلوم دحين يا وليد هو ديل ما لهم و مال الدين وكت قولهم كلام الله و فعالهم ما فعال صالحين كتير فيهم عديل حقار و بالقرآن كمان تجار و كضابين أكان بنزين عدم .. أو جاز وتعبوُ الناس و ضاقو خلاص صفوف واقفين يقولولك إرادة الله وكان عدم الرخيص و الغالى في التموين يقولولك ده . غضب الله و كان الموية صبحت طين يقولولك ده من امريكا والعملا حمونا الشب ولاد الكـــــــــــلب
عشان الشعب يحرن تب يقبّل من صراط الدين دحين يا وليد هو ديل ما لهم و مال الدين أكان كنزو الدهب و المال بلايينهم تسوى جبال وعرباتهم تخطف العين و بناياتم قصور في قصور وحاة الله و كتاب الله أكان ادونا طوب فد سور كان سوينا الف أويضة لي مسكين
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: عبدالكريم الامين احمد)
|
Quote: العرض دا مفترض يشمل الايسكريم بانواعه+كريم كراميل (التوقيع مارى انطوانيت سودانية)
|
بالنسبة اللغاويس الفوق دي أميرة ماري..ما تلخبطي التخصصات والي الولاية عليه بتوفير الأمن والغذاء والضروريات يعني الهبر الكبيرة موضوع الايسكريم ده و(الدرسنق ) وغيرهم بما فيها الدكوة بالشطة تخصص وزارة الشئون الاجتماعية القادينا بيها صلاح غريبة
عشان رأينا ده يصل الجهات المختصة ونطلع لازم نكون مرتبين ونعرف التخصصات ... لازم نبقي شعب يفهم في الكاريزما وعنده نوستالجيا في المطالب
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: خضر حسين خليل)
|
خضر ..
وبي كدة ما في أي سبب لي إنتفاضة شعبية ولا لي محمدعادل يحرق نفسو ..!!
حكومة زكية كيف ترا ها ..!!
غايتو كدي بكرة النشوف .. بشيل معاي مية جنيه وشوالين كبار أشوف حا يجيبوا لي شنو !!!
وبالمناسبة يا فردة ..
دا شغل جكومة ومحليات في تخفيض 40 في المية لكن دا ما بيشمل الضريبة الحا يضيفوها ليك وهي 15 في المية قيمة مضافة !!
وكم إيصال ودمغة دعومات كدة ..!!
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: خضر حسين خليل)
|
Quote: إن غدٍ لناظره قريب
|
غدا شنو يا عمك اتصلت بناس البيت قبل ساعة... اتحرك وفد من ناس الحلة يحملون فرشات ومعسكرين لباكر فى الغابة .........وحوش جامعة السودان
كما نفيدكم بان المواطن الرفاعى حجر شوهد فى الموقع يحمل شوال فاضى ومخدة بمبيه
تنويه....ونقلا عن البى بى سى..لا يحق لاى مواطن الاستفادة من العرض اعلاه
الا وفقا لعدة شروط 1- ان يحمل شهادة طبية تؤكد اصابتة بالملاريا تلات مرات فى الشهر على الاقل 2-ان يكون من المستاجرين وليس اصحاب الملك(احضار شهادة سكن) من اللجنة الشعبية او لجنة صديقة 3- ان يكون مر على وجوده فى السودان الشمالى 6 سنوات 4-ان لايكون مارس السياسة بعد 1989..شهادة من قوش شخصيا 5-ان يكون من المعجبين بالطيب مصطفى(احتمال الجداد يكون من دار اقرا لتوزيع الدواجن)
تابعونا لجنة خضر للاعلام الغذائى
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: Elawad Eltayeb)
|
Quote: التونسية حتقوم وصاحبنا وزير الزراعة ده قاعد جمب طلمبة ماثيو يبيع في البيض للجماهير |
دايماً لماح يا العوض اخوي أنا ده كلو ما هماني كدي أقرأ بإسم ربك الذي خلق للكلام البي الاحمر ده
Quote: د. تاج الدين عثمان سعيد مدير عام وزارة الزراعة والثروة الحيوانية والري ولاية الخرطوم ورئيس غرفة الطوارئ |
طوارئ شنو يا العوض دي ثروة زراعية وحيوانية ولا مطافي ولا نجدة وعمليات ولا حوادث الخرطوم ولا الحاصل شنو ؟
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: خضر حسين خليل)
|
Quote: أما بالنسبة لي ناس بلاد برة نرجوا منهم التنسيق مع مسؤول اللجنة الأستاذ معاوية عبيد سارع بحجز نسختك الكمية محدودة |
لزوم شنو ناس برة يحجزو نسخهم؟ جدادكم ولحمتكم الـ بلجنة طوارىء ديل؟ هنا 3 جدادات كبااار ب 22 درهم , طبق البيض بـ 13 درهم واللحمة أشكال وألوان.
حول لى قريشاتك الـ ح تديها لى جداد ولحمة الولاية المضروبات ديل , وبرسل ليك كرتونة كبيييرة جداد وكرتونة لحمة وأنت قاعد فى بطن بيتكم.
_____________________________
ياخضر الحاجة بطرفكم , بعد ماتاكلو كان ماجاتكم حاجة بِرها بى جدادة جدادتين.
وسلاامو
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: ياسر بيناوي)
|
عاجل عاجل
نرجو من جميع المتسوقين غدا الاحتفاظ بقسيمة الشراء
يوجد سحب على جائزة قيمة عالية القيمة (المعنوية)
الجائزة عبارة عن ( خروف صينى يعمل بالكهرباء)
يعنى لا قش لا مويه لا باع باع وازعاج..وبدون كمونية مما يساعد فى توفير المويه على المشترى
والمفاجاة...الجلد بطلع برهووووا...لابس جلد بسوستة
نتمى لكم حظا سعيد وخروفا مطيعا
السحب لايشمل هولاء 1-حسبو 2-بيناوى 3-حجر 4-مرتضى واسرهم
وحدة الاعلام الغذائى
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: مرتضى احمد عبد القادر)
|
Quote: كااااااااااااااااااااااااااااااااااااااااااااك يا معاوية خروفك دا حاوي عديل
|
الخروف يا مرتضى اكان عندو اربع كرعين لحدود ما وصل جمارك بن نهبان ديل فاحتمال جمركو اتنين والله العليم
تابع الجزيرة مباشر الان المواطن خضر بصحبة حسبو وحجر وبنياوى ينظمون الصفوف لغزوة ذات (الجداد واللحمة المصيرية) غدا
انشاء الله ربنا ينصرهم فى غزوتهم ....اميييين على تجار السوق الاسود وزمرتهم..
ود الباوقة قالوا عامل ركن نقاش فى الرياض بطالب بحق المغتربين من هكذا فرص غذائية
طبعا اكان مفروض يسافر لكن بعد غزوة ذات المناهل الضغط طار السماء السابع
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: معاوية عبيد الصائم)
|
Quote: الخروف يا مرتضى اكان عندو اربع كرعين لحدود ما وصل جمارك بن نهبان ديل فاحتمال جمركو اتنين والله العليم |
صاحبنا ادوهو عود يوصلو لزول في السودان قبل مايجي قال يجرب يعزف بدا يوزن في العود قطع ليهو وترين، جابو للسيدو قال ليهو طبعا الوترين ديل شالوهم في الجمارك أسي الكراعين ديل بكونو إتعملت بيهم اول حلة كوارع خروفه حي ينطط.
يا حسبو كنقر إنت دا اسي كدي عاين ليهو لمن كان صغير هنا!! قالب هوبا ولا شابي لتحت ولا بعمل في شنو بالضبط الخروف المستهبل دا
| |
|
|
|
|
|
|
Re: بشري سارة لجماهير العاصمة المثلثة (توجد لحمة وبيض و..... وكدة ) (Re: ياسر بيناوي)
|
Quote: غايتو كدي بكرة النشوف .. بشيل معاي مية جنيه وشوالين كبار أشوف حا يجيبوا لي شنو !!!
|
أها يا جماعة أنا جبيل مشيت وهاكم النجيضة :
كيلو الفراخ تسعة جنيه سعرو برة 14 جنيه كيلو اللحمة الضاني 16 جنيه برة 23 جنيه كيلو السجوك 16 جنيه برة 20 جنيه
كيلو البطاطس 3 جنيه برة 5 جنيه كيلو الطماطم جنيه ونص برة 3 جنيه كيلو الفلفلية جنيه واحد برة 2 جنيه
طبق التفاح 20 جنيه برة 27 جنيه
المهم الفروقات كبيرة لي زول داير يشتري حق أسبوع أو اسبوعين ..
البيض مختفي من السوق ..!!!
| |
|
|
|
|
|
|
|