|
|
 المَوقِف السياسي2
|
قِطاع الشِمال
سمعنا في الأخبار إنو "ياسر عرمان" لازال يتكلم عن مكتب للحركة الشعبية في قِطاع الشِمال بعد الإنْفِصال، والله الكلام ده غريب جِدًا، على أساس شنو حيقوم ها المكتب؟ الجنوب حينذاك حيكون دَولة أجنبِية، كيف يِكون ليها مكتب وحِزب في بلد تانِية؟! على كِده برضو حيجي زول ويطلب فتح لينا مكتب في نواحي جامِع فاروق، لِحِزب "الوفد" المِصري، بإعْتِبار إنو مِصر والسودان كانو حِته واحدة.. وكِده! دي ياها زي دي، ياسِر عرمان إذا كان عاوِز كسِر رقبه يدرع في رقبتو نير السِياسة ويِحْرِد بيهو حواشة الوهم، حقو يسيب حِكاية "قِطاع الشِمال" دي نوهائي، ويِنْجِر ليهو مُسَمى تانِية، ياخ الصادِق المهدي هدا ناجِر لينا قريب عُشْرُمِية مُسمى، الحِكاية ساهلة، لامِن تدور تمرُق تقول "خارِجون" ولامِن تصُد تقول "عائِدون" هسِع دي دايرالا شي! لو قام مكتب "قِطاع الشِمال" والله ناس المُهندِس/ الطَيِب مُصطفى –خال البشير- البعرفو ده عِلا يخلي حجازو معاكم صقر الجو، وما تقول كمان بعد الإنْفِصال المُهندِس/ الطَيِب مُصطفى –خال البشير- حيبقى خالي مَوضوع، تاني في شنو عاد يتْعنصرو فوقو، أصْبحنا كُلنا أولاد بلد نقعد ونقوم على كيفنا هييييع أنا أخوك إتْ.
|
|
 
|
|
|
|
|
|
|
|
Re: المَوقِف السياسي2 (Re: عزام حسن فرح)
|
بعد ظًهور النتيجة غير الرسمية لِلتصويت بِالإنْفِصال، حنكون إرْتِحنا مِن أغلب نِفاق الشِمالِيين أصحاب المشاعِر الرغيغة تِجاه إنْفِصال جنوب السودان، المشاعِر والأحاسيس الفياضة، الما ظهرت طُوال الـ55 سنة الفاتِن.. لامِن شين ولا مِن فاتِن.. هملو "منجو" و"تريزا" ساي وفاتِن..
55 سنة الجنوبي قِدامكُم يا ناس المُدُن.. وسطكُم.. شغال خدام.. أو في البلدية بنضِف الشوارِع.. أغلب أولاد الشوارِع (الشماسة) مِن الجنوبِين.. حصل عطفت على واحِد فيهُم؟ حصل لميت ليك وِليد وضاريتو جو بيتك؟ إتْبنيت طِفل جُنوبي؟ إسْتقطعت مِن مالك لِجِسم يرعى الجنوبِيين؟
شُفت إنت قدر شنو مُنافِق! كذاب.. هسِع جاي تِجوعِر لينا [منجو.. لا عاش مَن يفْصِلنا] يِفْصِل ضلوعك
بعد ظًهور النتيجة غير الرسمية لِلتصويت بِالإنْفِصال، حنكون إرْتِحنا برضو مِن سيف الوحدة الكان مُصلت فوق ريسينا، لأن وحدة معناها حرب، معناها أنانيا3 و4 و5 وبعد 50 سنة حيكون في أبوجا ونيفاشا وتصويت.
بقترِح إنو نبدأ نجهِز "لإنْفِصال ود ناس" وذلِك بِالدِخول في نظرِية "العِدة". ونظرِية "العِدة" فحواها إنو كُل طرف يِمِش ناس أبو، و يُضْرب سِتار حديدي بين الطرفين (الشِمال والجنوب) لِمُدة [4] سنوات و[10] شهور -مُش قُلت ليكُم إسمها نظرِية العِدة- وفي ها الفِترة -أي فِترة العِدة- لا نقول نِحنا الشِمالِيين في حق الجنوبِيين حرفى واحِد، لا بِالزين ولا بِالشين، ولا هُم كمان، ما تكون في أيُتُها عِلاقات بيناتنا إلا في أضَيق حُدود (مرور بترول الجنوب عبر الأراضي الشِمالِية ورسم ذلِك).. خِلال فِترة العِدة، ننسى الذِكْريات لأن أغلبها زي الزفت، وتظل وضع بؤر الإشِتِعال (أبيي مثلاً) والقضايا الخِلافية (الحدود مثلاً) في حالة سُكون.. بِيات شتوي.. مُتجمِدة طُوال فِترة "العِدة" والحركة دي عِندها إيجابِيات كتيرة/ مِنها مثلاً:
(1) كُل طرف يعرِف حاجة.
(2) كُل طرف يفضى لِهَمو الداخلي.
(3) ننسى.. يِنْسو.
| |
|
|
|
|
|
|
|
|
|
Re: المَوقِف السياسي2 (Re: ASHRAF TAHA)
|
| Quote: سمعنا في الأخبار إنو "ياسر عرمان" لازال يتكلم عن مكتب للحركة الشعبية في قِطاع الشِمال بعد الإنْفِصال، والله الكلام ده غريب جِدًا، |
ولا غريب ولا حاجة ...
هل سيكون أعضاء حزب الحركة الشعبية في قطاع الشمال جنوبيين أم شماليين ؟
الإجابة على هذا السؤال ستوضّح الفكرة !!!
زي الاتحاد والأهلي مدني في برضو الاتحاد والأهلي جدة
والهلال السوداني والهلال السعودي ...
دة لو كانت المشكلة في الاسم طبعاً ...
وأقترح أن يكون اسم الحزب "الحركة الشعبية" فقط دون قطاع الشمال ...
دمت بود ،،،
| |
|
|
|
|
|
|
|
|
Re: المَوقِف السياسي2 (Re: صبري طه)
|
ASHRAF TAHA
كيف حالك؟ علك طَيِب
Quote: أقراهو شوية شوية كدة
نظرية العِدة؟ |
يا خوي أنا ناوي أحمي ها النظرية قانونِيًا عديل كَدي، كحق فِكْري، تقوم تقول لي أقراها! تصويت الجنوبِيين شبهتو في بِداية أمري بـ"الخُلْع". لكِن بعد إسْتِفْزاز خلاياي الرمادِية بِالمشهد السياسي السوداني الفضل، خليتو "طلاق" ساي. أها ده بخلي الباب متاكا حتى قبل إنْقِضاء "العِدة" بِيَوم، فقد يحدُث شئ، من يدري؟ لا أحد.. بس لو إنْقضت "العِدة" كُل زول يِلْزم بيت ناس أبوهو الوِلْدو
| |
|
|
|
|
|
|
|
|
|
Re: المَوقِف السياسي2 (Re: ASHRAF TAHA)
|
سيدي العزيز ما يا ها الاحزاب (كفكر)
تقطع محيطات وبحور وصحارى من غير فيز
ماركسية
اسلامية
مسيحية
بوذية
كونفيشية
هندوسية
تهدم نظرية الخط المستقيم اقرب بين اي نقطتين
مما علمنا وفهمنا
ما تبخس للناس حقها
وحقك بجيك ما فيهو شك
يمكن واظن
سلام
| |
|
|
|
|
|
|
|
|
 Re: المَوقِف السياسي2 (Re: ASHRAF TAHA)
|
(*)
كويس الله مرقك من (سودانوي) و(الهوت ميل) لآفاق أرحب ..
إحرص على الباسورد المرة دي وأربطو في التكة وألعب حريف والله المرة الجاية
السني كان سوالو لوايح وفعلا فيك تاني مانلاقيك إلا عند بدرالدين ..
):
| |
|
|
|
|
|
|
|
|
|
Re: المَوقِف السياسي2 (Re: ASHRAF TAHA)
|
صبري طه
كيف حالك؟ علك طَيِب
| Quote: والهلال السوداني والهلال السعودي ... |
| Quote: دة لو كانت المشكلة في الاسم طبعاً ... |
لو كانت الحِكاية حِكاية إسم، الواحد يخُش مباراة الهلال السوداني×الهلال السعودي، يشجع الحكم ولا شنو يعني؟ طبعًا الحِكاية ما حِكاية إسم ياخ.. الفِكرة القامت بيها "الحركة الشعبِية" الكانت إسمها "حركة تحرير السودان" ما مقبولة لأغلب الشِمالِيين، وكُل المُحيط الأنا عايِش فوقو، الجنوب إنْفصل بعد ما "الحركة تحرير السودان" قِنعت تااااب مِن جبنه شندي،
الحِكاية ما حِكاية إسم.. منفِسْتو "الحركة الشعبِية" حقها إتْنجر مِن واقِع ظُروف وملابسات تاريخِية وإجْتِماعِية ذات خصوصِية، والحاجات دي ما موجودة في "قِطاع" الشِمال
ــــــــــــــ
| Quote: وأقترح أن يكون اسم الحزب "الحركة الشعبية" فقط دون قطاع الشمال ... |
ده برضو كلامي:
| Quote: ياسِر عرمان إذا كان عاوِز كسِر رقبه يدرع في رقبتو نير السِياسة ويِحْرِد بيهو حواشة الوهم، حقو يسيب حِكاية "قِطاع الشِمال" دي نوهائي، ويِنْجِر ليهو مُسَمى تانِية |
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
كمال ود الزين
كيف حالك؟ علك طَيِب
| Quote: السني كان سوالو لوايح وفعلا فيك تاني مانلاقيك إلا عند بدرالدين |
يا زول ود السُني ما بِسيها معايا
وكان سواها حليلي وين ألقى دوايا
بدرالدين لا عمًا بينا ولا حتو ولايا
تطير عيشتو سُلالة الغازي عقبو بلايا
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
ما عارِف يوم باكِر 26/01/2011م ناس حِزب الأمة حيسوو شنو بِالضبط بعد ما الصادِق المهدي قعد قعدتو مع البشير وزمرتو.. ومرق في كلامات عن إنو حِزب الأمة حيِسْتخدمو الأنصار في كركبةٍ ما كَدي، غايتو لو ها الكركبة ما فوقا الصادِق المهدي زات نفسو وعِيالو، يبقى الأنصار تم إسْتِخْدامهُم كالعادة في مآرِب أُخر
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
شنو بِالضبط بعد ما الصادِق المهدي قعد قعدتو مع البشير وزمرتو.
عزام يعزموا ليك فى كدباس. كيف حالك وكيف حال العول.
اوع تكون قعدة الصادق دى زى قعدة كلتشى مع جمال الوالى.
كان ماعرفتها اسأل منها هارون دياب ,, قول ليه سلك قال شنو
فى الزول الـ بقعد مع الوالى?
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
Quote: شنو بِالضبط بعد ما الصادِق المهدي قعد قعدتو مع البشير وزمرتو.
|
عزام يعزموا ليك فى كدباس. كيف حالك وكيف حال العول.
اوع تكون قعدة الصادق دى زى قعدة كلتشى مع جمال الوالى.
كان ماعرفتها اسأل منها هارون دياب ,, قول ليه سلك قال شنو
فى الزول الـ بقعد مع الوالى?
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
| Quote: 5 سنة الجنوبي قِدامكُم يا ناس المُدُن.. وسطكُم.. شغال خدام.. أو في البلدية بنضِف الشوارِع.. أغلب أولاد الشوارِع (الشماسة) مِن الجنوبِين.. حصل عطفت على واحِد فيهُم؟ حصل لميت ليك وِليد وضاريتو جو بيتك؟ إتْبنيت طِفل جُنوبي؟ إسْتقطعت مِن مالك لِجِسم يرعى الجنوبِيين؟ |
The ugly truth
صحيح ومؤلم
شكرا يا قريبي
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
يتبنوا شنو يا عزام يا اخوي؟.. و كفالة يتيم جنوبي شنو في السخانة دي؟
ياخي على بالحلال.. المشاعر الرغيغة سوت جنس فعايل.. لا تعرف تضحك ولا تعرف تبكي..!!
ناس يقولوا ليها المليون ميل بقت مبتورة بداء السكري.. يقعدو يجوعروا..و انت تصدق فعلا الحكاية حزن نبيل حد النبالة..و بعد شوية واحد من اهل الجعير يقول ليك.. هسع اغنية الذكريات بتاعة الشفيع دي تاني اقدر اسمعها كيف؟..
يا الفي الجنوب حيوا الشمال..
يا الفي الشروق .. ليك شوقنا طال طال
يا الفي الغروب هاك لحن المقال...
تسمع ليها شنو يا العشا باللبن.. ياخي اشطبها!!!.. مش ياهو الناس قدرت تشطب جزء من السيد المدعو الوطن.. باقي ليك ما يقدروا يشطبوا ليهم سطر في اغنية؟.. الخوف يجيك واحد و يقول ليك الوجدان ما بتشطب.. ناس التقول عمرها ما اتشوكشت..!!!
لكن بيني بينك.هو شاكوش نصاح ياخي..!!
نظرية (العدة) عميقة وواصلة يا قريبي..!
و دمت..
كبر
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
kabar
كيف حالك؟ علك طَيِب
| Quote: ناس يقولوا ليها المليون ميل بقت مبتورة بداء السكري.. يقعدو يجوعروا..و انت تصدق فعلا الحكاية حزن نبيل حد النبالة..و بعد شوية واحد من اهل الجعير يقول ليك.. هسع اغنية الذكريات بتاعة الشفيع دي تاني اقدر اسمعها كيف؟.. |
شوف الكلام وِكْتين يُمْرُق من القلُب بيدخُل القلِب دون شك.. نِقه المُتْجوعِرين والمُتْجوعِرات في ها المنبر والمنابِر الصديقة مارِق مِن "شوفوني أنا كيف رغيغ المشاعِر وعميق" وده بخليهو مارِق مِن جِهاز تاني غير القلب.. هذا المُتْجوعِر بِمارِس "علاقات عامة" وأنا بقول: يا ود يا عزام وِكْتين ها المُتْجوعِر جاتو الجُرأة وكتب نِفاقو على العلن كَدي، البخليك تصُم خِشيمك شنو مِن قوله الحق؟ لأنو يا kabar يا خوي سُكوتي عن ها المُتْجوعِر الذي جَعَرَ بِصُنف حتو نِفاق مِني، علشان كَدي بصدح وبصدع بِقولتي.
أنا نوبي مِن سُلالة عرق ليهو 5000 سنة قبل ميلاد السَيد المسيح موجود يوم الليلة في البكان الكان فيهو مِن 5000 سنة، جا بضع أعراب وصافحو مِن ها السُلالة قبل 750-850 سنة.. ده ما بخلي النوبِيين عرب.. ده بِقول إنو العِرق النوبي فيه نسبة ضئيلة جِدًا من الجينات العربية ولا فخر.
أنا مُسْلِم إكْتشفت إني مُسلِم علشان حسن فرح مُسلِم.. الحِكاية دي بِالرغم مِن إنها لُطْف مِن رب العِباد وجليل عِنايتِهِ بي، عِلا إنو ها التبعِية مااااا ريحتني.. لأني عاوِز أعبُد ربي بإخْتِياري أنا.. وده الحصل عقلنت الدين ووصلت بِهكذا عقلنه إلى أن أكون مُسلِم بِإخْتِياري الحُر.
أنا أنصاري لأنني أُمجِد أفعال القائِد / محمدأحمد عبدالله فحل التي فعلها في وبِالسودان.. وهُناك إعْتِبارات أُخرى ثانَوِية، عرقِية وجهَوِية وأُسرِية عِندها تأثير في كَوني أنصاري.
أنا مؤيِد إنفِصال جنوب السودان:
أنا حأرشِح -للأسف- البشير ... لأنو الكارِثة ده الوحيد الحيفصِل جنوب السودان
أنا مؤيِد حكم غرب السودان بكونفيدرالِية فإذا إسْتعصت يكون الإنْفِصال:
جنوب السودان قد فرِغنا منهُ ، ماذا هُناك بعد؟ نعم .. ه...ودان ... فاليكُن إذن
مِن الضروري إنو الزول يؤكِد إنو ما مُنافِق
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
لن يَجِد القاتِل إلا أن يتشبث أكْثر بِالسُلْطة، فهي تحميه، لِذا سَوف يُسْرِف بِالقتل أكْثر، هذا عِله ما يفعلهُ طاغي ليبيا، وسَوف يفعلهُ الكيزان فينا، فإنهُم يعلمون أن الأمر إذا خرج مِن بَيْنَ أَيْدِيهِمْ لن يعود أبدًا، لن يقوم لِلإسلام السياسي -على الأقل- في السودان قائِمةٌ إثر زوالِهِم. ومهما طال الزمن، مهما طال، سَوف يأتي اليَوم الذي سَوف أسألُك فيه: مِن أين لكُ هذا يا إبْن الكَلْب وأنت كُنت صُعْلوكٌ فينا ومُعْدمْ(وأخذ يُشير إلى مبنى ذو عشرة طوابِق)
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
حقنًا لِدِماء الليبِيين، يجِب أن يُتيح الثَوْرِيين لِلقذافي مخرج ونفاج، فإنهُ إذا يئس وضُيِقت علَيهِ هو وزُمْرتِهِ المخارِج، لا يستطيعوا إلا أن يُدافِعوا عن أنْفُسِهِم بِتسليح القبائِل والرشاوي وإشْعال الفِتن، وفي هذا فسادٌ كبير..
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
لَيس هُناك منطِق يجعل الإنقاذ تحكُم البِلاد والعِباد طُوال 21 سنة المُنْصرِمة، سوى وهن مُعارِضيها وسُفْهِهِمْ،مُعارِضين يبحثون عن "قُرشي"! وقد إعْترف لهُم عُمر البشير في إذاعة البي بي سي بِقتْلِهِ لـ10 ألف سوداني مدني (انظُر أدناه/التسجيل الثالِث) ودَونت سِجِلاتِهِم التي يدعون أن عدد القتلى بلغ 300 ألف ويزيد، يتشبثون في "بنطلون" بَينما خرجت صاحِبتِهِ وتركتهُم وبنطلونِها مشْرورين فوق حبِل غسيل، يُعلِقون آمالِهِم في أي نبأ مِثل حادِث "صفِية" التي يريدون مِنها "فِتْنة" [بأن أُخْرجوا يا مِسيرِية فإن شرفِكُم قد أُهْدِر] هل تعلمون مُغْتصِب "صفِية"، هل تعلم هي؟ حسُنًا مِمن أهلِها سَوف يثأرون؟! مِمن سَوف يثأرون وقد تفرقت فِعْلتهُم -إن صحت- بِين القبائِل أم أن كُل شُرطي هدف لِلمسيرِية. إن أحصَيْتُم الذين يُنادون المسيرِية بِأن أُخرجوا، سَوف تجِدونهُم يرفلون في الدِمقسِ وفي الحريرِ، إنهُم في بِلاد العالم الأول، بعد إنْتِهاء العمل يأتون ويتسلون بأن أُخْرُجوا لِتثأروا. وهن المُعارضة يتجلى أيضًا في مواقِف الساسة، أنظُر إلى الإنْشِقاقات التي حدثت في "الأُمة" و"الإتِحادي الديمُقراطي" أنظُر إلى الساسة العُظامِيين، فالصادِق المهدي لا يُمانِع في المُشاركة مع الإنقاذ.. يتمنع الميرغني.. والإثنَين لدَيهِم وزراء في الإنقاذ مِنْذُ سنوات.
الأن قد علِمْتُم لِما ظلت الإنقاذ تحكُم البِلاد والعِباد 21 سنة، لِوهن وسُفه المُعارِضين
http://news.bbc.co.uk/2/hi/programmes/hardtalk/8050309.stm
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
تونس: فَوضى خلاقة.
مِصْر: سُرِقت -أو تكاد- ثَورة شعبِها.
ليبيا: سيناريو "العِراق" أقرب.
اليمن: سيناريو "نيفاشا" في الأُفُق .
البحرين: لن تسمح دِوُل الخليج وسُنتِها أن تسْتقوى إيران بِمذهبِها.
عُمان: سَوف تقبل الجماهير بِرشَوة السُلْطان.
| |
|
|
|
|
|
|
|
|
|
Re: المَوقِف السياسي2 (Re: عزام حسن فرح)
|
Quote: بتاييد اكثر من 12 الف ناخب الشعبية تدفع بالحلو لمنصب والى جنوب كردفان
مارس 11, 2011
دفعت الحركة الشعبية برئيسه فى ولاية جنوب كردفان ونائب رئيسها فى السودان القائد عبد العزيز الحلو لمنصب والى ولاية جنوب كردفان والى جنبة اصلب كوادرها فى الولاية وقال الناطق الرسمى باسمها فى الولاية محمدين ابراهيم ان الحركة تؤكد ضرورة اجراء انتخابات حرة ونزيهة حتى يتم قبولها من الجميع … |
أنظُر الرابِط أدناه
http://www.splm-north.com/
في يوليو 2011م-مَوعِد إنْفِصال جنوب السودان رسمِيًا- ستُصنف "الجنوب" كدَولة قائِمة بِذاتِها، وأي أذرُع أو مؤيِدين لها في الجزء الشمالي من السودان، سَوف يُعْتبرون في حُكم "الطابور الخامِس" فقد كان بَين الطرفَين حرب دامت 55 سنة أُزْهِقت فيها [2] مليون إنسان وتشرد مثلهُم، عِند الإنفِصال سَوف تُعتبر "جنوب السودان" دَولة قائِمة بِذاتِها مثلها ومِثل "مِصر" و"تشاد" وسَوف تُولي "الإنقاذ" عِناية خاصة لِكِبار الساسة المحسوبين "حركة شعبية" مِثل عبدالعزيز الحلو وياسِر عرمان... إلخ وسَوف لن يقبل أغلب سُكان الشِمال بتنظيم وزعامات بِفِكر "حركة شعبية" وهذا الإتفاق النادِر بَين الكيزان والشعب، سَوف يكون بِمثابة إقرار شعبي للإنقاذ بِشرعِيتِها، فعِند الخطر تتَوحد المُخْتلِفين، وإبقاء فِكر "الحركة الشعبية" في شِمال السودان بعد قِيام دولة لهُم، مُثير.
تعَيين عبدالعزيز الحلو بِداية نِهاية رجُل قَوي، فعلت "الحركة الشعبِية" ذلِك مع رجلها القوي -حينذاك- ياسِر عرمان، عِند ترشيحِهِ لِسُدة الرئاسة بدلاً عن "سلفا كير" فإنتهى الحال بِالأخير رئيسًا ورمزًا لِدَولة "جنوب السودان" وإنتهى الحال بِياسِر عرمان، بِتلقي إتِهامات ضده مِن داخِل "الحركة الشعبِية" أدت إلى لفظِهِ، فأخذ بِنَجَر مُسميات لِمكتبِهِ في الشِمال، وتجميع فلول مؤيدي "الحركة الشعبِية" الذين تواروا.
| |
|
|
|
|
|
|
| |
عزام حسن فرح
ASHRAF TAHA
كمال علي الزين
عبدالعزيز الفاضلابى
عزان سعيد
Kabar
فيس بوك
تويتر
انستقرام
يوتيوب
بنتيريست