|
مـــليون مــيـل مربـع معــاك الواحـد ، طيب البـاقى كم ؟
|
.....
فى دروس الجغرافيا زمان ،
قالوا لينا مساحة السودان مليون ميل مربع
و نحنا طوالى صدقنا
ما كنا صُغار و ما إتعلمنا الغلاط لسه
لكن كان معانا شافع شليق كدا ،
و غالاط جنس غلاط.
الشافع قال لى الأستاذ:" مليونك دا شوية "
اليومداك سافرتا مع عمتى لى ناس أخوى فى نيالا
يا أستاذ أنحنا مسافرين ستة يوم ، يومين بالبص
و أربعة يوم بالقطر."
"أصلو ما ممكن دا كلو يكون مليون واحد!
المليون دا أصلو فيهو كم خمسمية جنيه ؟"
كبرنا و عرفنا إنو مساحة البلدان ما فيها ( بالضبط كدا)
مساحة تقديرية ساى
و الأكد لى الموضوع أكتر ،
لامن إشتريت لى (قطعة واطة) من ناس المغتربين
الحرامية ديلك،
مكتوب فى عقد البيع : المساحة التقديرية 450 م مربع
هى إذا كان كلها 450 متر وقدروها تقدير ،
أها المليون ميل دى معناتا مش يقدروها،
أنا خايف يكون رموا ليها الودع ، وبرَّكوا ليها الفكى.
جدنا (ود حسين)- رحيمو الله - كان زول عندو (طين) كتير
و بى قدرة قادر تحول كل ذلك الطين إلى زوجات
و عدد لا يحصى من الأعمام و العمات و الأقارب ،
البنيَّة التعجبوا يكتبلها (جدعتين) تلاتة و يعرسها
الغريب فى الأمر أن قياسات جدنا بى( الجدعة) ،
كانت أدق من قياسات أستاذ الجغرافيا البى الميل ديك.
بعد شوية كدا إكتشفت ليك إكتشاف مهم ،
إنو نحنا ذاتنا ما شغالين بنظام الأميال دا
و نظام القياس المعتمد عندنا هو النظام المترى
ما نظامنا كلو بواقى الإنجليز مخير الله
و لميت ليك فى حسبة عمك الخواجة ذات نفسو ،
و من شكلها بتكون صاح ، لأنو الرقم ذاتو مجوبك كدا
و فيهو كسور و بواقى و ماشى مع لولوة الخريطة حقتنا،
و العاجبنى فيها إنها (بالكيلومتر) يعنى الواحد أكان حريف
من سواقة (الهوستن) ساى يقدر يحسب حلتهم بعيدة قدر كيف
من سوق (الملجة)، عمك الخواجة قال :{ 2,505,813 } كلم مربع.
كبرنا تانى و مرقنا على الرزق،
ودانا أطراف البلد كلها ، و مشيت الجنوب ،
جوبا ، أويل ، توريت ، أها كان محظوظ تقوم من الخرطوم
و كان شقى تمرقها فى الأبيض تلحقلك ( يوشن)،
والله والله .. ، البلد دى كبيرة كبرة يعلم الله .
طيب إنفصال إنفصال ، ما بيناتنا ، قالوا (مقابل السلام)
يعنى زى حركات اليهود كدا مع الفلسطينيين و مبدأ
الأرض مقابل السلام ، أى زول يشيل (جدعتو) و يفرز عيشتو
طيب حبوبتى دى كانت زعلانة من جدى فوق أم كم ؟
ما ياهو كان مفتح و عارف الحاصل .
أها إذا قلنا { 2,505,813 } كلم مربع يعنى
يجو كدا زى خرتمية (جدعة) ، شلنا منهم زى كام و أربعين
فى المية ..... معاك الواحد .
طيب يكون باقيلنا كم ؟
يا جماعة إنتو الحصة جغرافيا وللا حساب ؟
......
|
|
|
|
|
|