ثـــــــائـــر
الشاعر:بدرالدين صالح عيسى
ياحضننا الدافي الوفي
هل مما يزال ضلك
متل حضنك وهيط
حلمك معلق لسه
بالذي شايلو السبيط
هل يا ختي دنياكن هناك
زي دورة الايام هني
الصحة والتعليم كعب
حرية الراي ظني في
كدي قبل ما اتسال كيف
يالسرة هاشم كيف
يالسرة مدى الضل
رشى الفل دقي البن
اعدلي الكيف
فري البسمة
لمي النسمة
جايك ضيف
ما اظن بتسالي عن صله
الزميل ياخ داتو واضحه
الشفيع الدمو بخر
الارض هاجت وماجت
السما انفتحت شوية
الضرع قام كب نقطة
لقحة في الارض بذرة
انبت هذا الشهيد
معتصم حامد ده اسمو
ظني ابو العاص ده كودو
اما هيئاتو بيفضل
ان يكون للشعب اول
اما ليه صعدنا ليكم
اولا راكز وثابت
ثانيا ايمانا بانو
اولى مننا بجواركم
قضايا الشعب محل ما اتخطت
دايما وابدا هي جريدتو
قضايا المرأة دي وين ما كانت
هل تتخيلي ديما قضيتو
البرنامج كان سليقتو
السليقة الما بشيلا
او بالاحرى هو كان شايلها
قام ختاها
لما سمع كورالنا بغني
يا شايل السكين من ايدك ارميها
راح اتخيل
انو خطينا خطاوي تحول
والبرنامج قام اتحقق
وكل مراحل الثورة اصلا
قام اتحالف يوم من اجلا
باكر في اقرب محضر يكتب
أُنجــــــــــــــــــز
أُنجز والسكين المابي يشيلا
هو تتخيلي ضاقت دمو
ضاير كل الناس الجنبو
واجه موتو
لما بي هاشم وقاسم
خلي القدال يوانسو
يدي في التاريخ دراسة
يدي برنامج ولائحة
لمي بي فاروق كدورة
يدي ديالكتيك وورشة
عن صياغة خط سياسي
يا ابو العاص ثق تماما
دمك انت دين بفضل
شايلو راسي
المهم هسع
واساسي
انا عندى الاغنيه
بس صبرك انت
على شويه بجيهك
انا ما بقول اخذ
قصادك كم نفس
ديل بى عفنهم
ما بيساوا قدار يكونوا
شرف قصاصك
شايفك ياخ زى ما مصدقنى
ما تخونى
ولا اقولك ياخ خوننى
انا والغيرى
بس اياك ان تفقد ثقتك
يوم فى حزبك.