|
وردي..ونانسي عجاج..أمانة ما إتلومتو
|
لابسين بناطلين كولدرايت... جداد من الورقة... وقمصان كاروهات من الورقة برضو.. ونعلات برضهن جداد من الورقة....وحاشين القمصان ومشنطين... وسرحنا شعرنا.. ومرقنا... معاي ود اعمي... كان النضم دا في القاهرة زمن طول.... قلنا الليلة نسهر.... في القاهرة دي ونصوطا فوق تحت....نصوطها صواطة جوهرة الصقلي ما صاطها ليها... ومرقنا... ومشينا شارع الهرم.. ودخلنا كازينو دفعنا القريشات عشرة جنية رسوم دخول قلنا انشاء الله ما اتلمت....مشينا قعدنا قداااااام... جنب الخشبة.... الرقاصة كانت تتهوزز... وقعدنا وكل واحد فينا فاتح خشمو مترين من الدهشة والفرحة... ونية الصواطة الناوي عليها....جانا الجرسون ( الباهوات ياخدو ايه؟)... قلنا لو( جيب لنا قزازتين بيستي كولا صاقطاااااات).... تتعشو ايه؟....قلنا ليهو عشا ما دايرين والله حدها الحلق... قال لنا لا ابدا اي زول يجي هنا لازم يتعشا.... اتلفلت علي ود اعمي وقلت لو الزول دا وقت حلف علينا نتعشى ما نكسر خاترو.... جيب لنا اي حاجة على مزاجك.... الراجل ما صدق يجري وكل مرة يجيب صينية مليانة صُحانة ويردمها قدامنا..... اتلفت علي ود اعمي وقال لي(والله يا جنا اظننا وقعنا فوق بكان اهلو كريمين..كرم شديد خلاس).... يا مومن يا مصدق اكلنا لمن شبعنا... وقلنا كدي مشينا غسلنا ايدينا ..وجينا راجعين ... وقعدنا الجرسون جاب الفاتورة..كانت مائة وتمنطاشر جنية.... ونحن العندنا كلو دايرين نتفسح بو في مصر ايامنا كلها متين جنية...... قال دا حسابكم.... قلنا ليهو نحن دافعين عشرة جنية ساعتنا الدخلنا ..والله وماك طالبنا حليفة قايلين العشا دا فنجرة منكم ساكت... المهم بعد حجة وبعد جونا اربعة تنفار الواحد فيهم قدر هرم خوفو دفعنا القريشات..... وصبحت علينا الواطا وقعدنا نفكر في الرجعة علي السودان وطرنا من الفسحة في القاهرة طيرة حلوف من الجروف.......
راس السنة جا.. الايام دي اعلانات عن الحفلات... حفلات الفنانين ومعاها عشاء فاخر....كل زول داير يغني يجيب عشاهو معاهو يبيعو للناس ويقعد يغني...وفاخر دي ما بعرفها كيفنو ح يكون.... لكن لي حسي قدر ما اكلت عشا فاخر.... ما مرقت من كريع جدادة وبيضة مكوعة فوقها زيتوناية...ورغيفة قدر الزلابية...المهم دا نضم ما بيبقى ولوم كبير... يا تعشو الناس علي حسابكم يا ما تجيبو طاري اللكل دا.... وخلو كل زول يتعشى عند اهلو ويجيكم متعشي.... يبقى زول غنا ورقيص وهيصة...والله انا نضر فنجّرة احمد المك وافراح ما لاقتني....مشينا الحفلة حقت العرس حقهم .. واتعشينا عشا فاخر.. ورقصنا وهيصنا.... مع ترباس وندى القلعة... وعاصم البنا....وفنانين كتااااار.....وبي سااااااااكت لا قرش لا تعريفة....ولا في زول قالنا ادفعو واللا ما تدفعو... تجو انتو يا وردي ويا نانسي تقولو عندكم حفلة في راس السنة... وتعزمو الناس وتقولو ليهم تدخلو علينا بي مائة وعشرين جنية وتخسمو منها حق الللكل؟ ... الللكل يا وردي و نانسي؟ افو....أمانة ما اتلومتو.....لكن ان بقيت اصلي داير امشي اتعشا بجي اتعشا عندكم...علا عشا انصاف مدني وحات الله ان قتلوني ما بحوم عليهو
|
|
|
|
|
|
|
|
Re: وردي..ونانسي عجاج..أمانة ما إتلومتو (Re: Ali Sirelkhatim)
|
قشيران
الليلة ظهرت من وين؟؟ حمد الله على سلامتك اها عزومتك الفي "كتاب الوجه" دي فيها عشاء اسفيري ولا عشاء صفري(بضم الصاد) ولا حتى عشايا سفري؟؟؟
بعدين يا ناس الجزيرة شرنات انتو مالكم ومال راس السنة ولا قعرها؟ خليكم في كدايسكم دي و عدوها ونسة مع العوض ود مصطفى واكلولكن فطير بي لبن و كل جدادتن على بيتها.
| |
|
|
|
|
|
|
Re: وردي..ونانسي عجاج..أمانة ما إتلومتو (Re: عبير خيرى)
|
الاخت عبير خيري انا بخير اما سوعالكم عن كديستنا قد اثلج صدورنا ومقدرنو....ويسعل منك الخير يا يمة .. وربنا يحفض ويغتي علي كدايسكم ان بكري ابو بكري عدو الحيوان والحياونية... شايل عكازو ويساكك فيها من بوسطي لي بوسطي... لحدي ما هاجرت... وهي تداعي فيهو.....
| |
|
|
|
|
|
|
|