|
|
 الثانية الأولى بعد منتصف الليل ...(سناء جعفر)
|
الثانية الأولى بعد منتصف الليل ...(سناء جعفر)
بكرة آخر يوم في سنة 2010 .. و 2011 جاية دافرة بكل عنفوان الجديد ووعوده وأحلامه .. وبعد بكرة حنغير طريقة كتابة التاريخ في مراسلاتنا .. وهو حيغير نفسه تلقائياً في شاشات التلفون والكمبيوتر .. وتفضل مشكلة تغييره جوانا .. حنرمي التقويم القديم في سلة المهملات .. لكن ما حنقدر نتخلص من كل العوالق الالتصقت بينا خلال السنة المضت .. عوالق جسدية .. عوالق روحية ونفسية ومادية وعاطفية .. عوالق حتفضل باقية معانا .. نشيلا ونعمل ليها ترحيل للسنة الجديدة .. لأنها اتحولت من أصول متغيرة إلى أصول ثابتة تحت مسمى ( ماضي ) ..
الساعة اتناشر وثانية واحدة من يوم السبت 31/12/2010م حتحصل نقلة زمنية .. اها وبعدين ؟! .. شنو الممكن يكون جديد في السنة الجديدة ؟! والثانية الأولى بعد منتصف الليل دي حيكون إحساسنا بيها شنو ؟! .. حنبقى أسرى الماضي ولا على عتبة المستقبل ولا واقفين في الحافة بين الاتنين ؟! .. حنفكر في امبارح الكان قبل ثانية واحدة ولا في بكرة البقى هسة ؟! .. حنكون في حالة تجاوز .. ولا حالة توقّع .. ولا حنقسم احساسنا بينهم الاتنين ؟! .. وهل حتكون القسمة عادلة ولا ضيزى ؟! ..
طريقة الناس في الاحتفال بمقدم السنة الجديدة بتختلف .. ناس بتحب تحتفل وسط لمة وهيصة .. وناس بتحب تحتفل بخصوصية وحميمية ومع اقل قدر ممكن من الصحب والخلان .. ناس بتحتفل في الشوارع والميادين العامة .. ولمن تهل الثانية الأولى من السنة الجديدة بطلقوا صرخات مدوية بتحمل في طياتها وداع واستقبال .. ممكن يمسكوا اقرب إنسان ليهم ويحضنوهو .. حتى لو كان إنسان غريب عنهم وما بعرفوه .. لأنه في لحظة ميلاد الثانية الأولى كلنا بنبقى أغراب عنها وفي نفس الوقت أحباب ليها .. في ناس بتستقبل الثانية الأولى في سجادة الصلاة وبين أيديها مصحف .. وفي ناس بتستقبلا في بار وبين أيديها كاس خمر .. وفي ناس ما بتحس بيها لأنها بتكون نايمة في اللحظة ديك .. وفي ناس بتقعد تستناها وفي يدها محضر جرد تبدأ تحدد فيه المكاسب والخسائر الحصلت في السنة الفاتت .. وفي ناس ما بتكون عارفة أو حاسة أو مهتمة انه في سنة انتهت .. وسنة جديدة جاية .. ناس بتكون اتشابهت عندها اللحظات والدقايق والساعات والأيام لدرجة انه ما بقى في فرق بين أمبارح والليلة وبكرة ..
طيب مرت سنة .. وجات سنة .. اها وبعدين ؟! ..
علي المستوى العام حصل شنو ؟! .. الدنيا لسة مليانة حروب .. ولسة في بلدان محتلة من بلدان تانية .. لسة الدماء بتراق لاسباب مختلفة بعضها ######## جداً .. لسة امريكا عاملة فيها شرطي العالم .. لسة في ناس بتموت من الجوع والفقر والمرض .. لسة في ازمة اقتصادية .. لسة في كوارث مناخية .. ولسة في العالم الاول في ناس مشردة ما لاقية ماوى وبتموت من البرد .. لسة الطيارات بتقع والقطارات بتتصادم .. لسة بتحصل فيضانات وزلازل وبراكين ..
ومع دة كلو .. لسة الشمس بتشرق .. والعصافير بتطير وبتزقزق .. ولسة في ناس ما فقدت القدرة على الضحك ولا الرغبة في الاستمتاع بكل هبات الحياة مهما كانت صغيرة .. لسة في ناس بتحب وتتزوج وتجيب عيال يزيدوا عدد سكان العالم .. لسة في اطباء بعالجو المرضى مجاناً .. لسة في ناس بتتبرع بملايين من ثرواتا لاجل الفقراء .. ولسة في ناس بتتطوع وتمشي مناطق فقيرة ومنسية من العالم عشان تعلم الاطفال القراية والكتابة .. لسة في ناس بتدهشك بقدرتا على احداث فرق في حياتك وحياة غيرك ..
على مستوى بلدنا الحصل شنو ؟! ..
نبدأ بالاسوأ ؟! .. احتمال اننا نتحول من بلد واحد مساحته مليون ميل مربع فيهو شمال وجنوب ... مسلمين ومسيحيين .. لبلدين .. شمال بدون جنوب .. وجنوب بدون شمال .. شمال ما فيه أي مسيحيين معترف بيهم بدليل انه رئيسنا المفدى قال في خطبته العصماء في عيد الحصاد في بلد السمسم انه في حال الانفصال حيطبق الشريعة طوالي في الشمال !! .. طيب القوانين الهم ماشيين عليها من يوم ما طبقو على انفاسنا دي شنو ؟! .. القوانين الاعدمت مجدي محجوب في قروشه وحقه وخلت اهله يطفشو من البلد ليوم الليلة قوانين شريعة ولا قوانين طوارئ ولا شنو ؟! .. القوانين القتلت وجلدت وهجّرت وصادرت وطردت ناس من شغلا وأفقرت بلد كامل دي نقول عليها شنو ؟! .. القوانين القسمت الناس نصين .. ناس عندها قروش كتيييييرة .. وناس عايشة على الكفاف نسميها شنو ؟! .. القوانين الاعدمت الأخلاق والثقافة والفكر ورقصت وهللت في جنازتهم نصنفها تحت أي نوع ؟! .. طيب الأقل من الأسوأ شنو ؟! .. انه عندنا لسة في ناس بتموت بالملاريا .. وفي ناس بتموت بالهم والحسرة والمغسة .. عندنا لسة البنية التحتية تعبانة .. التعليم تعبان .. الصحة تعبانة .. وعندنا لسة الاسعار بترتفع بدون سبب مبرر .. والغلا بطحن الناس .. والناس محتاجة لمخرج .. والمخرج مقفول .. والمفتاح ضايع عندنا لسة الناس الناس بتحلم بفرصة طلوع برة السودان والاغتراب في بلد بترولي .. او الهجرة الى بلد اوربي .. او غير اوربي .. ما عادت تفرق المهم الزول يطلع من الجحيم دة وخلاص ..
عندنا لسة شرطة نظام عام في بلد ما فيها أي نظام .. بلد غرقانة في الفوضى السياسية والاقتصادية والاجتماعية .. عندنا كل يوم بتنبت للفساد ذراع جديد .. بتلف حوالين كل شئ .. عندنا الياس اصبح سمة عامة لشعب كامل الا القلة القليلة ..
طيب مافي أي أمل ؟! .. مافي ضوء في آخر النفق ؟! .. مافي احتمال انه إحنا المشتتين في كل بقاع الأرض نرجع نتلم مع أهلنا وناسنا ونعتزل الغربة بعد أن تنتفي الأسباب الدفعتنا ليها ؟! .. مافي أمل انه بلدنا تبقى جاذبة ومبهرة ومتوحدة وعلى رأسها حاكم عادل ؟! ..
كفاية أسئلة محبطة ... قلبي وجعني ..
خلونا في رأس السنة والاحتفال بالثانية الأولى بعد منتصف الليل .. انتو ناويين تحتفلو كيف ؟! ..
احتفلو .. ما تخلوها تمر ساكت زي أي لحظة عادية .. احتفلو ولو بينكم وبين نفسكم ومع روحكم بس ..
أظن لحظة ميلاد الثانية الأولى في السنة الجديدة مناسبة تستحق الاحتفال .. استقبلوها بالبسمات مهما كنتو محبطين .. عسى ولعل تكافئكم على استقبالكم الجميل ليها بانها تمنحكم لحظات حلوة في قادم الأيام ..
ميزوها عن بقية اللحظات .. خلوها مساحة خالية من الأحزان والهموم .. أملوها بالأمنيات الجميلة والتوقعات الايجابية .. حبوها ... ايوة حبوها .. عشان ترجع ليكم الحب أضعاف مضاعفة ...
اها النقول ليكم كل سنة وانتو طيبين .. تامين لامين .. سالمين غانمين ..
سنة بخيتة ومبروكة .. وتنعاد عليكم بالخير والعافية والبركة ..
|
|
  
|
|
|
|
abubakr
صالح عبده
فيس بوك
تويتر
انستقرام
يوتيوب
بنتيريست