|
|
 يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!!
|
يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!!
زماااان قلت ليك إنو الحركة ضقلت بيك , ما إقتنعت بي كلامي , أها هسه الإنفصال أصبح حقيقة , رغم كلامك المكرر والمحفوظ إنو الحركة وحدوية (( سيبك من الحنك العاضي بتاع الوحدة الجاذبة ….. وكلام المغنطيسات داك )) , قلت ليك إنك في الحركة كنت ولا زلت وستظل جسم غريب ومهما حاولت تكون ملكي أكتر من الملك فعمرو " مساعد الياي ما ببقي ياي " والغراب مهما إتجمل وغير مشيتو ما ببقي طاؤؤس … ((كومون مااااان)).
|
|
 
|
|
|
|
|
|
|
 Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
يا ياسر عرمان:
باقي طالما طرحت نفسك للشعب السوداني وقدمت نفسك في الإنتخابات وعملت ندوات ومحاضرات وزيارات ونقة في الفارغة والمقدودة , ياخي تم جميلك وقول للشعب السوداني ده الحصل شنو في موضوع الأقرع , أكيد ما متوقع منك تقول إنك ضالع في جريمة قتل , لكن علي أسوأ الفروض أتوقع منك شهادة للتاريخ عن الحصل , صحيح أنا مقتنع إنو المتهم برئ حتي تثبت إدانتو , فأقل حاجة تجي تقول كلمة لو ما عشان أهلو فعشان الشعب السوداني التعبان ده ياخي , بعدين دي تعتبر آخر أيامك وبعديها خلاص المولد حيتفض وحتتلاشي فحقو تغتنم الفرصة وتقول كلمتك بشجاعة...
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
يا ياسر عرمان :
كلام الوحدة الرددتو عمرك كلو طلع "مكنة" ساي وما قسمت , مكنة عايزة بستم وشمبر , ممكنة دخاخينها في السما , مكنة "بلوفتها" أحسن " مجس " ما يوزنها , أما العادم أسكت خليهو ساكت (برطرط ) وكاري بالواطة لامن عامل شرار وبعد إطناشر يوم الشرار ده حيمسك نار والحريق حيقضي علي السواق والركاب , فوت طارة كلتش يا عرمان , فونيك قافلة , وكربريترك الشفط ما بجيب معاهو الحبة , بلكاتك الأربعة طافيات , الخور الوقعت فيهو يا عرمان "بوبينتك" ما بتمرقك حتي بمكنة جاز. (( كومووون ماااان)).
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: ناصر النعمان البدوي)
|
Quote: أكّد المؤتمر الوطني، أنّه لن يكون هناك وجود للحركة الشعبية بالشمال إذا إنفصل الجنوب. واتهم د. محمد مندور المهدي القيادي بالحزب في تَصريحات صحفية بالمركز العام للوطني أمس، ياسر عرمان القيادي في الحركة الشعبية بتخريب العلاقة بين الشمال والجنوب والوطني والحركة. وقال مندور: (عَرمان الآن يقرع طبول الحرب بين الشمال والجنوب)، وأكد أن الوطني لا يَسعى للحرب. وفي سياق آخر، نفى مندور تأثير البترول على ميزانية الحكومة، وقال إنّ نسبته في الموازنة لا تتجاوز (16%). وفي رَد على سؤال حول إتهامات بعض الإقتصاديين للحكومة بسحب كميات من العملة الصعبة من البنوك، قال مندور: لا يمكن لدولة عاقلة أن تسحب العملات وتترك المواطن نهباً للغلاء.
الراي العام
|
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: معاوية الأرباب)
|
اخوانا الجنوبيين طلعوا شطار جدا
لعبوا على عرمان ومنصور خالد والتجمع الوطني بكل دهاقنته، نقد والصادق والميرغني وابو عيسى، ثم تجمع جوباوفيه الترابي، اشتغلوا بنظام المراحل، لكل مرحلة ضحايا، وآخر بطل (ضحية) على خشبة المسرح هو عرمان والمطلوب منه (حسب تصريحات باقان) اسدال الستار على المشاهد الأخيرة وأن يذهب إلى بيته بعد ذلك ويتعشى فولا كاربا لتعويد معدته على ذلك لأن مسألة غداء عمل وعشاء عمل والتنطيط في فنادق الخمس نجوم انتهى وقته، ازف الوقت للرجوع للفول والطعمية...المشكلة ان البطل رفض مغادرة المسرح بعد انصراف الجمهور، وظل يؤدي دوره امام الكراسي الفاضية وهو يصيح وا قطاع الشمالاه..وا شمال القطاعاه..وا اموماه ولم تشفع له ايام النضال ولا علاقة النسب ولا ثنائيته مع ذلك الاموم..كله راح شمار في مرقة، وخاينة يا دنيا وظالمة يا دنيا
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
Quote:
ياسر عرمان , منصور خالد ...
حفظوا لنا لنا شيئا من ماء الوجه كشماليين وقفوا مع المظلوم في نضاله لاسترداد حقوقه
سموا بإنسانيتهم فوق العرقية والقبلية ولم يقل أحد منهم أنا مع غزية إن غزت , وإن ظلمت .
عاش ياسر عرمان ... شي جيفارا السودان . |
عمل شنو ياسر عرمان لي مواطن الشمال؟ ومنصور خالد زاتو عمل شنو؟
ماء وجه الشمال لو بحفظو ليهم أمثال عرمان ومنصور خالد ، أخير - مش يكون ما عندهم ماء وجه وبس - بل الأكرم ما يكون عندهم وجه من أساسو!!!
أي حقوق أسترداها مواطن الشمال بسبب عرمان؟ وشنو اللتغير في حياة إنسان الشمال بسب ياسر عرمان؟ إنسان الشمال دفع ولا زال يدفع تمن أخطاء عرمان.
ياسر عرمان في نظر أهل الشمال يعتبر بمثابة غراب الشؤم الذي زارهم في غفلة من الزمان!!!
"مالكم كيف تحكمون".
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
Quote: اخوانا الجنوبيين طلعوا شطار جدا
لعبوا على عرمان ومنصور خالد والتجمع الوطني بكل دهاقنته، نقد والصادق والميرغني وابو عيسى، ثم تجمع جوباوفيه الترابي، اشتغلوا بنظام المراحل، لكل مرحلة ضحايا، وآخر بطل (ضحية) على خشبة المسرح هو عرمان والمطلوب منه (حسب تصريحات باقان) اسدال الستار على المشاهد الأخيرة وأن يذهب إلى بيته بعد ذلك ويتعشى فولا كاربا لتعويد معدته على ذلك لأن مسألة غداء عمل وعشاء عمل والتنطيط في فنادق الخمس نجوم انتهى وقته، ازف الوقت للرجوع للفول والطعمية...المشكلة ان البطل رفض مغادرة المسرح بعد انصراف الجمهور، وظل يؤدي دوره امام الكراسي الفاضية وهو يصيح وا قطاع الشمالاه..وا شمال القطاعاه..وا اموماه ولم تشفع له ايام النضال ولا علاقة النسب ولا ثنائيته مع ذلك الاموم..كله راح شمار في مرقة |
ويالها من نهاية.
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
Quote: هونولولو ..!!
إنت الكلام دا قلتو ليهو وين ومتين ؟!
غايتو لو حصلت معجزة في أخر لحظة والنتيجة بقت وحدة إتجهز تبلع البوست دا ناشف يا محمد ...!! |
يا ناذر،،،،
قلتو ليهو قبل ما الحركة تعلن رسمياً وعلي لسان قيادات
فيها إنهم مع خيار الإنفصال.
معجزة؟
والله يا ناذر ما عارف القصة دي في منتهي البساطة ،
الشماليين عايزين إنفصال وبشدة ، والجنوبيين عايزين
إنفصال ، فيبقي الناس متفقة ، لزومو شنو اللفة الطويلة
دي وحراق الروح والكواريك دي.
عارف يا ناذر :
أبلع وما أبلع دي أنا ماشغال بيها خالص.
وحده مافي يا ناذر ، يوم تسعة قريب.
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: الشفيع وراق عبد الرحمن)
|
Quote: لاخ الفاضل محمد عبد المطلب الحسن
الله يديك العافية
وكل سنة وانت بألف خير وعافية
والله بفتش لي حاجة اعمل بيها راس سنة
بعيد عنك ( الرياض ) الحاجات دي فيها حرام
والله اديتني راس سنة ( خمج ) عديل
والله ريحتني في الزول الاسمو عرمان ده جنس راحة
عليك الله قرض على كده
وشوت
عشان توثق الاشياء بصورة دقيقة وخطيرة
جيب تاريخ خروج ياسر عرمان من السودان
والسبب الرئيسي
مع التفاصيل
تحياتي
|
أخونا كمال الشادي،،،،
كل سنة وإنت طيب.
عرمان ده كلموهو إنو مهما عمل ومهما مشي في النهاية هو
جسم غريب علي الحركة ، ومسالة إبعاده صراحة أو ضمناً
كانت مسالة زمن ليست إلا ، وما قصة إجباره علي الإنسحاب
من الإنتخابات الأخيرة إلا سوي دليل علي ذلك.
الناس حاولت كتير تديهو راسو ويوعوهو ، لكنو أبي.
جسم غريب يا عرمان ، جسم غريب!!
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: ABUHUSSEIN)
|
Quote:
أخونا محمد سلام
بوست متعة
لكن عذبت الميكانيكيين عذاب شديد
و بعدين سلاق بيض حلوة شديد
تحياتي
|
سلامات يا أبو الحسين ، وكل سنة وإنت طيب.
ياخي عرمان ده قدر ما حاولنا نفهمو الحاصل
بكل لغات العالم أبي كلو كلو ، قلنا نفهمو بي
رندوك المنطقة الصناعية عسي ولعل!!!
لكن بعد ده كلو لسه (برترت) وعلــــــي
العليهو شايفو هسه كاسر ركبه ، بعد ده
غايتو إلا نولف ليهو بي ركبة هايلوكس
ده لو لقيناهو ليهو لأنو عمك ده ركبه
موديل أوبل!!!
تحية وسلام.
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
Quote:
يا ود عبد المطلب
سؤال واضح ومحدد
ياسر عرمان طلع من السودان متين
وليييييييييييييه ؟ |
أولاً : السبب المعروف للجميع أن المذكور كان متهماً في الضلوع في جريمة قتل للطالب الأقرع ، وقبل تقديمه للمحاكمة غادر البلاد.
ثانياً : أنا لست بالمتحدث الرسمي للمذكور لأحدد سبب خروجه من السودان ، والتاريخ الذي تم فيه ذلك.
ثالثاً : هذا البوست غير معني بالتعريف بتاريخ المذكور بقدر ما هو محاولة لتوضيح موقعه في الحركة الغير مرغوب فيه ، وإستخدامه كمجرد كمبارس يؤدي أدواراً ثانوية لا أكثر ولا أقل.
رابعاً : إذا كانت لديك أي معلومات توضح ما سألت عنه فلم التردد؟ أدلو بدلوك وقدم حججك.
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
سلام يا محمد
| Quote: بعدين شايفك خشيت بي حمد وطلعت بي خوجلي وموضوع البوست وياسر عرمان ولا جيت بي جنبو ، خايف ولا شنو؟ |
طبعا دي أنا بعتبرها بس دعوة للمداخلة مرة تانية معاك لأنو ما في حاجة تخوف في طرحك وبعدين شفت ليك زول بكتب هنا في سودانيز أونلاين ده بخاف كل واحد بيجي يطرش هنا أي كلام ويمشي.
بس تعرف الكتابة هنا عندي زي الكوتشينة تلحق تلعب ليك عشرة عشرتين تبقى في البحلك منها!
Quote: أولاً : السبب المعروف للجميع أن المذكور كان متهماً في الضلوع في جريمة قتل للطالب الأقرع ، وقبل تقديمه للمحاكمة غادر البلاد.
|
ده الأنا بعرفه عنه من وسائل الإعلام وزي ما بعرف إنه كان متوقع يكون أوباما السودان!! .. يا للسذاجة !! لا هو أوباما ولا السودان زي أمريكا في مساحة الحريات المتاحة للتعبير والمشاركة السياسية...يا ود عبد المطلب السياسة عندنا ونسة بس!
أتمنى أن ينعم السودان بالسلام شماله وجنوبه وأن تمر الفترة القادمة بسلام دون إراقة دماء وأن نعيش في ظل سودان يحترم فيه كل من الشمالي والجنوبي الآخر.
تحياتي
أمير
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
Quote:
ده الأنا بعرفه عنه من وسائل الإعلام وزي ما بعرف إنه كان متوقع يكون أوباما السودان!! .. يا للسذاجة !! |
سلام يا أمير،،،
هههههههه ، ياخي ضحكت لامن صوتي راح ، ياخي دي نكتة الفين وعشرة وحداشر مع بعض ، عارف نحن كسودانيين عندنا مشكلة بتاعة تكبير وتصغير ، يعني الحاجة الصغيررررررررونة ننفخها ننفخها كدي لحدي ما تكبر ونصدق النفخة ونشاكل الما بصدق وكسر رقبة كده الناس تصدق ، والحاجة الكبيرة نصغرها نصغرها كدا ونغالط فيها ونشاكل فيها وكسر رقبة الناس تصدق.
ياخي وسائل الإعلام دي - وبصفة خاصة المقروءة - تستحق المقولة الشائعة عنها أنها مهنة من لامهنة له - ده طبعاً مع تقديرنا للصحفيين المحترمين و المؤهلين من كل الجوانب - ياخي أوباما وين وعرمان وين؟ أوباما كان محامي - براك عارف يعني شنو تكون محامي في أمريكا - وسناتور وبقي رئيس جمهورية ، ده غير إنو إسمو أبداً ما إرتبط بي أي مخالفات ، بينما المذكور إسمه إرتبط بأفظع جريمة يمكن أن يرتبط بيها إسم إنسان.
وسائل الإعلام ديل بقنبلوها قنبلة ، كترو المحلبية شديد الجماعة ديل!!!
هههههههههههههه!
ضحكتنا مع بواكير السنة الجديدة.
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: علي جلاس)
|
Quote:
باقان: الحركة تتبنى خيار الانفصال في الاستفتاء
قطع الأمين العام للحركة الشعبية باقان أموم بانحياز الحركة لتبني خيار الانفصال عند الاستفتاء المقبل، ونوه إلى أن الحركة قررت الانحياز لخيار الانفصال لأن الحكومة لم تجعل الوحدة جاذبة، داعياً لدى مخاطبته تدشين حملة الحركة الشعبية للاستفتاء بولاية البحيرات أمس المواطنين للاستعداد للتصويت بشكل سليم.
|
أها ياعرمان ، ضقلو بيك الشمس حية نهارية!!!
أها : إنت حتتبني؟ ولا ما حتتبني؟
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: الشفيع وراق عبد الرحمن)
|
Quote: عرمان : وحدة السودان ممكنة بعد الانفصال
قال الزعيم الشمالي في الحركة الشعبية لتحرير السودان ياسر عرمان إنه لايستبعد توحيد السودان من جديد علي أساس طوعي في حالة تصويت الجنوبيين لصالح الانفصال. واعتبر عرمان - الذي كان مرشح الحركة للانتخابات الرئاسية في أبريل 2010 - أن زيارة الرئيس السوداني عمر حسن البشير إلى جوبا عاصمة الجنوب السوداني الثلاثاء الماضى كانت "جيدة " ، وأنها خلقت مناخا جيدا يجب استغلاله لحل المشاكل العالقة،موضحا أن أبرز هذه المشاكل هي المواطنة والحدود وأبيي والعلاقات الاقتصادية والسياسية.
ورأى عرمان أن الطريق الأسلم بين الشمال والجنوب هو الاعتماد المتبادل، على أن يكون الشمال صلة الجنوب بالعالم العربي والشرق الأوسط، وأن يكون الجنوب صلة الشمال في شرق وجنوب أفريقيا.
ويتوجه نحو 4 ملايين جنوبي إلى صناديق الاقتراع ابتداءً من الأحد المقبل لمدة أسبوع للتصويت مع بقاء وحدة السودان أو لانفصال الجنوب، بعد نزاعات طويلة بين الطرفين منذ الخمسينات أدت إلى سقوط مئات آلاف القتلى. |
يا ياسر :
ده شنو الكلام الفوق ده ، التخريف بدا من هسه خلاص؟
صدقني إنت بقيت تهضرب وحالتك بقت صعبة شديد ، دي ياها الزاتها البسموها فرفرة مذبوح ، أو همهمة سكرات الموت.
أركز وبطل الجقلبة ، وأرجي الراجيك بس!!!!
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
يا ياسر : عارفك كلامك الفوق ده زي شنو؟
زي واحد يقول ليك : والله حقو نتحد مع الشمال ياخي ، ولا أقول ليك ياخي سيبك من الوحدة حقو نجرب إنفصال ، إسمع والله كدي موضوع الإنفصال ده نرخيهو شوية ، ونكابس وحدة.
يازول آخر كلام إنفصال بس ، بعدين الإنفصال لو ماجاب شغل مالو ممكن تااااني نرجع وحدة ، ولو الوحدة بعد داك برضو ما جابت شغل ياها ديك الغالبة قاااااعدة ممكن نرفع شعار وندق نقارة ونحارب لينا زي كم وعشرين سنة وتاااااااني نجيب ليكم إنفصال ...... وهكذا!!!!!
آر يو كيدينق مي؟
| |
|
|
|
|
|
|
|
|
|
Re: يا ياسر عرمان : إن شاء الله تكون إقتنعت إنو الحركة (ضَقُلَتْ) بيك!! (Re: Mohamed Abdelmotalib Hassan)
|
Quote: دفعت الإجراءات التي قامت بها قيادة الحركة الشعبية والخاصة بتقليص ميزانيات تسيير العمل بقطاع الشمال، إلى اتجاه الأخير لإغلاق مكاتبه بالولايات الشمالية وإصداره قرارات لكافة عضويته بأهمية الاتجاه للعمل السري.
وكشفت مصادر مطلعة بقطاع الشمال لـ(smc) أن رئيس قطاع الشمال ياسر عرمان قام بانتهاز الفرصة واستغلالها لصالح حل كافة الأطر التنظيمية للقطاع وتحويله إلى جهاز عمل استخباري يخدم أجندة الحركة الشعبية التي عملت جاهدة للاستفادة من قطاع الشمال بعد الانفصال.
وأشارت المصادر إلى أن قرارات عرمان التي قضت بأن يتم تغيير أسلوب العمل بالقطاع تحت غطاء السرية التامة تأتي في هذا السياق، مؤكدة أن هذا الاتجاه ستتم مواجهته بالرفض لا سيما بعد أن تكشف للبعض أن قرار تقليص التمويل من قبل قيادة الحركة الشعبية جاء نتيجة لحسم الحركة الشعبية أمرها بالتوجه إلى خيار الانفصال، متهمين الحركة الشعبية باستخدامهم إبان الحرب في معركتها مع الشمال. |
يا عرمان بيه:
الهضربة شنو ليك؟
هو في عمل سري بيعمل ليهو إعلام زي ده؟
سري إيه الإنت قاي تؤؤل عليه...... إنت عارف "أبله" معني السر إيه؟
بطل الجقلبة يا عرمان ، البقت بقت ، كتر البتابت عيب!!!
أركز بس يا أب شنب ، أركز ، أركز!!!
| |
|
|
|
|
|
|
| |
Mohamed Abdelmotalib Hassan
صلاح أبودية
الشفيع وراق عبد الرحمن
معاوية الأرباب
ياسر بيناوي
المكاشفي الخضر الطاهر
ناذر محمد الخليفة
كمال الشادي
ABUHUSSEIN
علي جلاس
وليد عبد اللطيف
فيس بوك
تويتر
انستقرام
يوتيوب
بنتيريست