هل رأيت المصطفى في منامك ؟

(عدل بواسطة الرشيد حسن خضر on 11-26-2010, 04:35 PM)

Quote: نرجع لموضوع الحديث، ونرجع لي رؤية النبي صلى الله عليه وسلم، شوف يا أخي ما تتوهم وترى رؤية في المنام ويقول ليك أنا الرسول تعتقد أنه الرسول محمد صلى الله عليه وسلم، أو قال ليك أنا النبي تعتقد على حسب وهمك أنو النبي محمد صلى الله عليه وسلم، يمكن ده شيطان وقال ليك أنا انبي، ما قال ليك أنا محمد، قال ليك أنا النبي وما بقصد الرسول محمد صلى الله عليه وسلم، أي رسول آخر، وما فيش نص واضح أنو الشيطان لا يتمثل بالرسل الآخرين، لا النص الواضح في الحديث لا يتمثل بصورة محمد صلى الله عليه وسلم، اذا رأيت رؤية زي دي تمشي لوبتعرف صفات النبي صلى الله عليه وسلم، تمشي تقارن هذه الرؤية التي رأيتها ومع صفات النبي صلى الله عليه وسلم، هل هي مطابقة، النبي عندو شكل معين موجودة في السنة، هل الرؤية الشفتها مطابقة لي صفات النبي صلى الله عليه وسلم الموجودة في الكتب؟ ولا ده وهمك انت ياخي؟ وخير مثال أنا المتحدث واحد جاري لو قبل الجمعة الجاية بنجيبوا معاي هنا، الرجل ده، وفي واحد آخر في مسجد، شيخ حسين مسجدكم الأخير المشيت عملت فيهو المحاضرة الما أكملتها اسمو مسجد شنو؟ نعم؟ مسجد المنظمة، هذا الرجل من نفس المسجد، واحد منهم جا وراني قصة نقص ليكم التلاتة نختم بيها الكلام، القصة الأولى جاري اسمو محي الدين، بيني وبينو شارع، جاني يوم من الأيام فرحان جدا جدا وقال لي والله اليلة يا حامد الليلة من فرحتي البنسوي أنا ما بعرفو، بتسوي شنو؟ قال لي الليلة ما تفطر وما تتغدة تجي تتغدى معاي، انت وفلان وفلان، ما شاء الله الحاصل شنو؟ قال لي الحاصل ده خلو، قال لي الليلة امشي اجيب ليكم جداد وبيض وسمك مالذ وطاب وشفت التفاح الغالي والعنب أجيبو ليكم تاكلوا الليلة من هسع خليكم جيعانين عشان تمشوا تتملوا، قلنا ليهو كويس والله دي فرحة عظيمة الله يفرحنا معاك، قال لي فرحان جدا، السبب؟ قال لي أنا مستعجل خليني أمشي، قلت ليهو لا ما بخليك تمشي، لازم توريني السبب الانت فرحت بيهو فرحة زي دي عشان نفرح معاك ونستعد ونصين البطون دي كويسة عشان نجي ناكل نشبع. قال لي السبب الآتي: امبارخ صليت في نص الحوش بتاعي، ختيت السجادة وصليت العشا في المسجد وجيت شفعت وما وترت قعدت قال لي صليت على النبي أكتر من سبعة الف مرة، صلاة، قلت ليهو الصيغة شنو وراني الصيغة، الصيغة ماها شرعية، قال صليت على النبي صلى الله عليه وسلم أكتر من سبعة ألف مرة وجاتني دقسة رقدت في محلي ده، قال بعد شوية وأنا في النوم جاني النبي محمد صلى الله عليه وسلم، قلت ليهو صلى اله عليه وسلم، قال لي جاني النبي محمد صلى الله عليه وسلم وسلم علي وقعد جنبي جلس جنبي وقعد، قال ليك شنو قال ما قال لي شي بس سلم علي السلام عليك يا محي الدين قال سلمت عليهو وجلس جنبي وما تكلم معاي، قلت ليهو كويس قلت ليهو حديث النبي صلى الله عليه وسلم بقول من رآني فقد رآني ف‘ن الشيطان لايتمثل بي، قال لي ايوه صح، الحديث ده صح؟ قلت ليهو صح وألف صح، قال اذن اتفقنا يعني شاركتني في الفرحة قلت ليهو شاركت في الفرحة قال لي خلاص أنا ماشي قلت ليهو لا ما تمشي وريني الصورة الشفت بيها محمد صلى الله عليه وسلم؟ قال لي أها قمت لي طول لسانك؟ دي أول كلمة قلت ليهو خلي طول لساني، انت عارفني لساني طويل؟ قال لي انا بعرفك انت الحاجات الزي دي ما بتوفتها تقعد تعمل لينا فيها نقة، قلت ليهو لا بس وريني عشان نفرح معاك، قال لي خليني امشي قلت ليهو ما بخليك الا توريني ولا ما بجيك، قال لي خلاص خلاص خلاص اقيف بوريك، قعد قال لي شفت جاني النبي صلى الله عليه وسلم ومن الركن بتاعي الشمالي الشرقي جا ماشي على ركن بيتي ده جاني في المحلة دي وجلس جنبي، قلت ليهو طيب وصف لي الصورة الشفتها، قال لي يا زول هوي انت عندك شك في الحديث قال لي ما عندي شك في الحديث، الحديث ده خلو أنا بعرفو أكتر منك، ما عندي شك في الحديث عندي شك في كلامك ده، قال لي شوف النبي بأي حال من الأحوال هو، قلت ليهو كويس وصفوا لي؟ قال لي شفت ـ أول وصف ـ قال لي شفت لونك ده ـ لوني أنا ده؟ـ قال لي فاتح منك شوية، قلت ليهو إنا لله وإنا إليه لراجعون، لوني ده فاتح منو شوية قال لي فاتح منك شوية، هممم! تاني؟ قال لي لابس جلابية نضيفة وقصيرة زي جلليباتكم ديل، قلت ليهو جلابية بتاعة شنو؟ قال لي والله ما متاكد ليها لكن بتكون تترون، أيوه طيب، وعندها عزبة، عندها عزبة؟ عندها عزبة، زي شغلتكم دي، وتاني، قال لي شفت رقبتوا دي طويلة. رقبتو طويلة؟ قال لي آيي. قلت ليهو إنا لله وإنا إليه لراجعون. قال لي في شنو؟ قلت ليهو رقبة الرسول طويلة قال لي طويييييلة! تاني؟ قال لي شفت الحاجة السمحة العجبتني فيهو الدقن أيوه ما شاء الله، قال لي شفت دقن السعوديين ديل البيزنوها هنا نضيفة الزريقة السوداء الهنا بقرنوها مع الشنب ده ومن هنا نضيفة وجميلة هنا دي قلت ليهو شفتها قال لي بالظبط حالقها هنا نضيفة وسمحة، قلت ليهو لا حول ولا قوة الا بالله، قال لي مالك؟ قلت ليهو كمل لي الباقي صنقع دنقر، قلت ليهو اتذكر قال لي تاني ما بتذكر شي، قلت ليهو اتذكر قال لي أيوه أيوه قلت ليهو شنو قال لي الحاجة العجبتني فيهو الحاجة السمحة العجبتني فيهو مشلخ ألف ومية وحداشر قلت ليهو لا حول ولا قوة إلا بالله إنا لله وإنا إليه لراجعون، قال لي مالك؟ قلت ليهو والله الذي لا إله إلا هو هذا الرجل الذي شفتو ما الرسول صلى الله عليه وسلم، قال لي والذي لا إله إلا هو ده الرسول صلى الله عليه وسلم، قلت ليهو والذي لا إله إلا هو ده ما الرسول صلى الله عليه وسلم، قال لي ده شنو؟ قلت ليهو والله شفت ليك واحد من المحس القاعدين بي هنا ديل (الجمهور يضحك) لكن ده ما الرسول. آهة؟ مية وحداشر ألف محسي! مع احرامنا للمحسيين يعني! ده محسي ياخي ده ماالرسول صلى الله عليه وسلم! ورجعت ليهو قلت ليهو ياخي اتقي الله ياخي انت قايل الرسول ده سوداني هو؟ قلت ليهو أول وصفك غلط، شكلي ده الرسول فاتح مني بسيط؟ ياراجل ما تتقي الله ياخي! ياخي انا شن شبهني بالرسول وياخي الكلام ده بعدو بعيد جداياخي، ولا قريب ليهو ولافاتح منو ولاوأول حاجة الرسول ده ما سوداني عشان تمثلو بواحد سوداني، أيوه وتاني؟ قلت ليهو جليلبتو قصيرة دي معليش جليلبتو قصيرة صحي، لكن بي عزبة وبتاع قلت ليهو أيوه نعم بي عزبتها، لكن تقول لي تترون ولا بتاع الزمن داك مافي تترون، أيوه، وتاني؟ قلت ليهو طيب، كونوا تقول لي رقبتو طويلة قلت ليهو انت قايلو ابو سعن ولا أبو خريطة ياخي ده الرسول صلى الله عليه وسلم. ما تقول لي رقبتو طويلة، وزدت الطين بلة قلت لي دقينتو صغيرة هنا، قلت ليهو ياخي خليني أنا انت أساسا حتجادلني وحنخش معاك في جدال كتير، ياخي قال فاسالو أهل الذكر ان كنتم لا تعلمون ياخي انت مش عندك شيوخ قال لي عندي شيوخ قلت ليهو امشي لي شيوخك قول ليهم وصفوا لي صفات الرسول صلى الله عليه وسلم الحقيقة من دقنوا ولي طولو وعرضو وشكلو كيف خلي يوصفوا ليك هل الشفتو ده؟، وقلت ليهو التاني قول ليهم الرسول ده كان مشلخ مية وحداشر ولا تي ولا اتش ولا بتاعة الجماعة اخوانا الطيبين ديلاك، كدي أسألوا شيخك ده هلي يقول ليك واحد من ديل مشلخ، كان قال ليك الرسول مشلخ خلو تعال، أنا بنوديك لي ناس، خلو كلامي ده تب، بنوديك لي ناس بيوصفول ليك النبي صلى الله عليه وسلم بوصفو الصحيح، لو لقيت الرؤية دي متكابقة مع حقة الرسول ده الرسول، لكن من قلت لي مشلخ وبتاع أسود ده ما الرسول صلى الله عليه وسلم انتبه. يبقى هل الحديث غلط؟ الحديث صاح، الشيطان تمثل بي صورة النبي صلى الله عليه وسلم؟ لا. لا ما تمثل بيهو، الرسول عندو شكل معين شوف الرؤيا الشفتها دي امشي ودي الكلام ده للكتب الموجودة تصف الرسول صلى الله عليه وسلم مطابقة؟ اذا مطابقة هو الرسول صلى الله عليهوسلم، لكن اذا ما مطابقة يبقى الشيطتن ذاتو ما تمثل بي صورة النبي تمثل ليك بي شيطان تمثل ليك بواحد من القبايل ديل، زي ده. أنا المتحدث والذي لا إله إلا هو شفت الرسول صلى الله عليه وسلم أكتر من تلاتة مرات، قسما بالذي لا إله إلا هو ده كلام أسأل من يوم القيامة تقابلو الله واسألوني من الكلام ده أمام الله شفتو أكتر من تلاتة مرات والله التلاتة مرات واحدة مطابقة مع التانية مافي! الرسول هو حرباء عشان يتشكل؟ والله كنا أجهل وكنت أعتقد أنو الرسول صلى الله عليه وسلم. مشيت لي شيخ من شيوخنا قال لي أيوه، قلت ليهو اليوم السنة الفلانية شفت الرسول بي شكل كذا كذا كذا قال لي ماشاء الله ده الرسول، فرحت فرح ما عادي، وتاني شفتو بي شكل ما بقدر بحكي ليكم عجيب مرة واحدة مشيت لي شيخ آخر قال لي دي اعمالك شوف فسر لي قال لي ايوه ده الرسول لكن ده عملك انت، الصورة الأولانية جميل جدا والصورة التانية قبيح قال لي ده الرسول لأنو الشيطان لا يتمثل بيه، شوف جهلو، لكن قال لي دي أعمالك انت زمان كان الرسول كويس أعمالك كويسة الآن أعمالك بقت كعبة، التالتة ما بقدر بحكيها ذاتو، وبرضو قال لي الرسول، والذي لا إله إلا هو هل ده الرسول؟ ده ما الرسول. ======= ============= المسجد الفيهو الراجل ده مشيت عملت محاضرة جاني واحد قال لي أنا شفت الرسول صلى الله عليه وسلم بصورة شخص، أركع ليهو، تركع ليهو؟ قال لي لأنو الرسول صلى الله عليه وسلم تمثل لي بي شكلو، منو؟ قال لي شيخ البرعي، والذي لا إله إلا هو، قال لي أنا شفت الرسول صلى الله عليه وسلم بشكل شيخ البرعي طبق الأصل من القصرة واللون والدقينة والطويقية وبتاع، قلت ليهو انا لله وإنا إليه لراجعون، قلت ليهو والله الذي لا إله إلا هو لا الرسول والرسول بشبه شيخ البرعي، وإنا لله وإنا إليه راجعون، وقال لي مشيت ليهو وركعت ليهو، قلت ليهو ركوعك ده ذاتو كفر وشرك كونو تمشي قال لي، ده ضلال هل الناس البعرفوا صفات الرسول امشي اسأل هل الرسول صلى الله عليه وسلم بشبه شيخ البرعي؟ إنا لله وإنا إليه راجعون، شوفوا الشغلة دي، شغلة أصلو دجل وكضب ما أنزل الله به من سلطان وبعدين تفسير خطأ، ياخي صورة الرسول صلى الله عليه وسلم الحقيقية، كل انسان قاعد معانا في المجلس ده عندو صورة حقيقية، الشيطان ممكن يتمثل بي شكلي ده يقول ليك أنا فلان الفلاني انت براك مش بتعرف شكلي؟ لو جيت في المنام شفتني بي صورة أي واحد من الناس ديل بكون ده انا؟ بتقول والله امبارح شفت شيخ احامد؟ جاني زول قال لي أنا شيخ حامد لكن ده ما الزول شيخ حامد ده زول آخر، أنا شيخ حامد بعرفو كذا وكذا وكذا ده ماهو لكن قال ليك أنا شيخ حامد، هل بكون أنا، لأ، يبقى شوف أفهم يا أخي، اذا شفت صورة الرسول صلى الله عليه وسلم في الرؤيا أعرضها للكتاب والسنة، لقيتها مطابقة الأصل وما أمرك بأمر ، وحتى لو أمرك بأمر الأمر ده مخالف للشي اللي كان في حياتو تركو تأكد أنو ما الرسول صلى الله عليه وسلم، إلا تنطبق الصفات كلها وما بيأمرك، سيدنا مالك رضي الله عنه رأى النبي صلى الله عليه وسلم، في الرؤيا وجا حكاها لي شيخو، شيخو قال ليهو صفه لي، شوف، انتبه، قال ليهو صفه لي، يا مالك وريني شفت الرسول كيف؟ قال ليهو شفتو بي شكل كذا وكذا وكذا لغاية ما كمل الكلام، وقال ليهو سألته سؤال ولم يجبني عليه أو جاوبني جواب أنا ما فهمتو، قل ليهو سألتوشنو؟ قال ليهو الصفات القلتها دي منطبقة في صورة محمد صلى الله عليه وسلم ده النبي، سؤالك شنو؟ قال ليهو سألتو قلت ليهو يا الرسول صلى الله عليه وسلم متى عمري، عمري بنتهي متين أنا بموت بتين؟ قال الرسول سوى لي كده لكن ما جاوبني بي كلامو قال الجواب ده أنا ما عرفتو، قال ليهو ما عرفتو قال ما عرفتو قال الرسول قال ليك كدي؟ قال آيي، قال والله ده كلو الرسول، حتى في كلامو قال ليك كدي، ده الرسول، صفتو كدي أيوه الرسول، دقنو كدي أيوه نعم، صفتو كذا أيوه نعم طولو كذا أيوه نعم، شكلو كذا أيوه نعم، وحتى لما قال ليك كذا قال له برضو ده الرسول وجاوبك، لكن الجواب انت ما عرفتو قال ليهو الجواب شنو؟ قال ليهو انت سألتو قلت ليهو شنو؟ قال سألتو قلت ليهو عمري بتين بنتهي؟ قال ليك خمسة لا يعلمها إلا الله، اللي هي الآية بتقول شنو؟ :"عنده مفاتح الغيب لايعلمها إلا هو، ويعلم ما في الأرحام، وما تدري نفس بأي أرض تموت، الخ الآية يعني الصفات الخمسة التي لا يعلمها إلا الله من ضمنها الأعمار، جاوبك يا مالك قال ليك الحاجات الخمسة ديل أن ما بعلمهم ومن ضمنها سؤالك الأنت قلت ليهو عمري بتين، فعلا ده النبي صلى الله عليه وسلم. عبد الله بن عمر قال إذا كان أي انسا جا قال ليهو أنا شفت النبي بقول ليهو صفه لي فيصف الشخص الصورة الرآها بقول ليهو انك لم تره، (يكررها) يجي واحد يقول ليهو شفت الرسول يقول ليهو صفه لي يقول ليهو شفتو كذا يقول ليهو أيوه ده الرسول صلى الله عليه وسلم، فانتبه لي دي، أي شكل ما يجي يتخيل ليك تجي تقول ده النبي محمد صلى الله عليه وسلم، لازم تنطبق الصفات بصفات النبي محمد صلى الله عليه وسلم