|
|
 هلالابى يطلق زوجته المسكينه بعد الهزيمة ، وجعلى مريخابى ينقذ الموقف
|
عاد المشجع الهلالى الى منزله بحى العرب حافيا ، فقابلته زوجته مستغربة حضوره حافيا ، و تسألت خير يا ابو فلان و ين مركوبك يا راجل ، قال الله ينعل ابليس لقد قذفت به لعيبة المريخ فى الملعب .
المهم زوجته طيبت خاطره وقالت ليهو ما عليك يا رجل الاسبوع الفات انتو ما كنتو فايزين ، قال يا مرة انتى مجنونه 2 صفر و فى استادنا وكمان الهدف التانى من راجى .
المسكينه عاوزه تغير الحديث قالت عليك الله كدى موبايلك ده عاوزه اكلم اختى فى السعوديه ، قال ليها وين موبايلك انتى ، ردت بحسن نية شديده اجى يا ود امى انت ناسي انو عندك الصفر الدولى ويلا شنو، قال ليها انت طالق و الله ما تبيتى فى بيتى .
المهم قام سمع جارو الجعلى المريخابى ، قال يا راجل حرام عليك ذنبها شنو ، قام الهلالابى قال و الله إن بقت اخر حرمة فى الدنيا تانى ما ارجعها ، قام الجعلى قال لى المراة على الطلاق انا اتزوجك بس تمى العده ، اها قامت زوجة الجعلى قالت الله لا كسبك يا راجى خربت بيت جارتى ، و بقيتها لى ضرة .
|
|
  
|
|
|
|
|
|
|
|
Re: هلالابى يطلق زوجته المسكينه بعد الهزيمة ، وجعلى مريخابى ينقذ الموقف (Re: هجو الأقرع)
|
اها قامت زوجة الجعلى بعد ما سمعت انو الهلالابى سوف يشتكى ، صيحت ليو بى فوق الحيطة ، قائلة يا هذا من دربك دى و على المحكمة اوعك تقوم تتاخر ، و يقوموا يرفضوا الشكوى ، قال ليها طيب المشكلة انو زوجك حلف بالطلاق ، قالت ليهو اسع امش اشتكى ، انتو جماعتكم بعرفو يسمكرو كويس بنلقى حل .
قال ليها اسع انا حفيان ، قالت انت راجل التابه يا يمه هاك (جوز البراطيش ) ديل وقوم اتخارج ، قال ليها و الله عرفيتها اكان قلتى البس نعلاتى ال 2 ديل ما كان مشيت .
| |
|
|
|
|
|
|
|
|
|
Re: هلالابى يطلق زوجته المسكينه بعد الهزيمة ، وجعلى مريخابى ينقذ الموقف (Re: هجو الأقرع)
|
اها صاحبنا مشى مركز الشرطة لقاهو فاضى بس لقى شرطى قاعد براهو ، الراجل استغرب و قام سال العسكرى يا اخى وين الضابط ، و هذه فعلا حدثت ردى الشرطى قال ليهو الجماعة مشوا يفرقوا مظاهرات الصهاينه بالفوز . فى مدنى و بعض احياء الخرطوم فرقت الشرطة المريخاب المحتفلين ، اها ما علينا قام سالو انت ما مشيت معاهم مالك ، قام العسكرى شخط فيهو وقال ليهو ما شغلك .
المهم الهلالابى قال ليهو انا عندى شكوى ، بعد ما سمع الشرطى الشكوى ، وقع من الضحك فى الارض وهنا استغرب الشاكى ...............ونواصل
| |
|
|
|
|
|
|
|
|
|
Re: هلالابى يطلق زوجته المسكينه بعد الهزيمة ، وجعلى مريخابى ينقذ الموقف (Re: هجو الأقرع)
|
أها يا هجو ,, انا كمان بمط ليك القصة دي زي قصة الجريو بتاعة ناذر الخليفة...
" والمهم ان الهلالابي عمل شكلة كبيرة مع الجعلي القال عايز يزوج مرته الطلقانة وتدخل الجيران .. لكن الجعلي حلف بأنه الهلالابي ده ما يبيت في الحلة ومشى جاب عكازه وجا.. والمهم واحد من الجيران اقترح يعملوا جلسة مصالحة .. لكن الهلالابي رفض المصالحة... واحد من الجيران جنو مشاكل طلب الشرطة وقال ليهم الجعلي عاوز يقتل الهلالابي وهدده قدامي بالقتل وانا شاهد... الشرطة اعتقلت الاثنين وباتو في الحراسة يومين لغاية ما وكيل النيابة يستعرض القضية.. وبعد ان سمع وكيل النيابة القصة طلب شهود من لعيبة الهلال والمريخ عشان يوضحوا المسالة أكثر لأنه عاوز يعرف هل المشجعين المتعصبين ممكن تصل بيهم الدرجة يطلقوا نسوانهم عشان الهزيمة؟
تأجلت المحكمة ليومين آخرين لأنه لعيبة الهلال رفضوا الحضور للمحكمة لكن لعيبة المريخ ابدوا استعدادهم لتقديم شهاداتهم امام المحكمة عشان ينتصروا لمشجع المريخ الجعلي.. لكن خلال هذه المدة وقعت مصيبة كبيرة جدا حصل منها حرب كأنها حرب قبلية... ونتم القصة بعد الرجوع من اجازة الويك اند الطويلة..
| |
|
|
|
|
|
|
| |
هجو الأقرع
معتصم مصطفي الجبلابي
فايزودالقاضي
عفاف أبو حريرة
Fadl Karrar
ismeil abbas
abas
keiga2000
نادر الفضلى
haroon diyab
فيس بوك
تويتر
انستقرام
يوتيوب
بنتيريست