|
|
 مردوم *** فلامنكو *** دبكة
|
رمية
سلااااام الغرة يا اهل الديار البره
بييييييضا الرملة منشره
وداك الصيد فى بطن الوادى انزره
دائما، وليه ما عارف، بتخيل لى إنه الشى الوحيد البخلى الملائكة والجان يبطلو شغلهم ويقعدو يتفرجو ويستمتعو
بكون لما يكون يسمعو إيقاع مردوم شغال وصفين من الشباب والشابات برقصو
والحالة التانية برضو لما شلة اندلسيين ، ويا حبذا لو كانو غجر كمان، تكون تمت الناقصة، يكونو قاعدين تحت ضوء قمر صبى وتريان، والبنات لابسات الفساتين الزى الورود ديك، واحد أحمر وواحد اصفر وواحد ازرق، ويكون فى واحد شكله غجرى غجرى بصدح ويغنى، ويدقو فى الصفيحة البكون قاعد فوق ليها العازف ديك، والصفقة تصحى الطير النام من بدرى
الغريبة غناهم زى الزول القاعد يدوبى فى ضل فى سوق تمبول فى البطانة، دى الحاجة التانية
نفس طريقة الأداء والله، تسمع الونزو رودريغز يدوبى، زى الكأنك متكى ليك على شعبة راكوبة فى ريره ولا فى الصفية ولا فى القليعة البويضا، وقريب منك قاعد يوسف البنا يتغزل فى جقلة
التالتة كمان دبكة الشوام
حاجة فيها سحر ما عادى ابدا والله، والغريبة برضها بتتعمل تقريبا بى نفس الطريقة مع اختلاف بسيط فى الحركات
صفين بنات واولاد، رجال ونسوان، حريم وضكور، ايها أحسن، واغنيات شجية جدا وايقاع جميل
وعندى احساس انه العوالم التلاتة الساحرة دى، وعلى الرغم من بعد كل واحد فيها عن التانى، جغرافيا أو مكانيا، حاسى بإنه فى رابط بينها
يمكن الفلامنكو فى اسبانيا وفى الاندلس تحديدا يكون نتاج تحوير لى ايقاع واداء حركى راقص أو كيورغرافى جاهم من ايام جية العرب هناك، خصوصا انه جزء كبير جدا من العرب المشو مع ناس طارق وموسى كانو من الشام اصلا
بعدها بكون الفن ده تطور واخد اشكال وابعاد جديدة لكين بنفس الروح الأصيلة
أو يمكن برضو رقصات الأمازيغ فى المغرب المعربى كان ليها شوية تأثير، مع انه يبدو ما ظاهر شديد، خصوصا فى أداء النساء، رقصة العيطة الأمازيغية مثلا، الأرجل ما عندها دور كبير فى تصميم الكيوريغراف، والحركة بتتركز فى استخدام اليدين وجذع الجسم بصورة عامة
لكين شنو البلم المردوم مع الفلامنكو والدبكة؟
يمكن يكون توارد وجدان، على وزن توارد خواطر
وليه ما يكون فيهو مكون اصيل برضه وتأثير قوى من الفلامنكو، بحكم انه كتير من العرب الهاجرو للسودان جو من شمال وشمال غرب افريقيا ومعظمهم لو ما كانو كلهم، كانو من المجموعات الرجعت افريقيا بعد سقوط الأندلس
زى المسلمية مثلا فى وسط السودان، وجزء كبير منهم استقر فى سهول وبوادى ووديان كردفان ودارفور
لازم يكون فى رابط انا متأكد
حتى لو كان فى الحد الأدنى، وهو الرابط الوجدانى الجمالى الإنسانى الخلاهم كلهم يكونو ناس جميلين ومبدعين وسمحين
لو نزلتو لينا سامبلز هنا للإبداعات الجسدية دى
ينولكم ثواب وشكر ومحبة أكيد
زولكم طبعا غشيم جدا فى الأمور التقنية بتاع تنزيل الأغانى دى
|
|
  
|
|
|
|
أبوذر بابكر
فيس بوك
تويتر
انستقرام
يوتيوب
بنتيريست