|
|
|
 Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: Mahmoud Mustafa Mahmoud)
|
Quote: الورشة فاتحة والله...
غايتو لو ما في مداخلات واقتراحات تانية
الشافك شايل لحنك دا (بالوضع الراهن) يا فاروق أخوي مااااااا كضَّبْ... |
حلات (لِق لِق) ..
هو نحن لقيناك بالساهل عشان (تتخارج) بالساهل كده؟
قال وضع راهن قال.
جمعتك مباركه ياخي وبعدين قول للمطاوعه ديل دي (نزهه) روحانيه
جرب (الحنك) دا معاهم لو ما نفع قول ليهم رماكم السودان بفلذات أكباده وكمان تتلوموا فيهم؟؟
مادام هي ورشه مفتوحه كدي النجرب التنظير :
تعرف يا مصطفي أحسن شئ إنك تسكن في بيت كدا (بالمجان)
ياخي دا بيت سكنتو سمحه جنس سماح ..لا (شواطين) لا مجانين.
غايتو (سويت) لينا بيت ماهل وناسو سمحين زيك والله والله والله.
- يفيض و( يعُم) منافي الذات ،
ليت (ضمّه) عاقه تقيّل فوق راكوبة حرف (العين) الزين
- صباح (ممدوووووود) مالو لو وريتنا نفسك حدو وين ؟
ما تخاف الصوت (بطاوع) مش صوت (مطاوع) في حِلّة (مطاوعة) وبيت (مطوّع)؟
- حلاة نتقالد (الإتنين) :
غايتو في المره الأولي لما تغني المقطع دا سماحو بشبه لي (شويفعة) أمها (شطفته) وسرحت ليها بي شريط أخدر و (قدّمتا) لا عند باب القلب عشان تلحق الشفع الملتخين بي قبايل عيد الضحيه.
أما لما تغنيها في المره التانية أمانة في (ضُمتي) بضوق طعم حاجات كتيييييييييره ، لكن الشي الفرزتو من العشرقة دي (خبيز) أمي نفيسه بت كرموش في زمن والقلب خالي
غايتو الله يسامحك فينا
كدي النصلي الجمعه ونرجع
تتملي بركه.:
| |
  
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: فاروق أبوحوه)
|
Quote: - يفيض و( يعُم) منافي الذات ،
ليت (ضمّه) عاقه تقيّل فوق راكوبة حرف (العين) الزين |
سمِح آآخوي.. ونحن الورشة أصلاً فتحناها لجنس الكلام دا زاتو..
فاروق يجيب (ضمته)..وعثمان محيي الدين يجيب كمنجته..ولؤي يجيب أورغنو...ومعتز القريش أكورديونيهو..وهكذا..
أحيييييي يا مصاريني..
| Quote: - صباح (ممدوووووود) مالو لو وريتنا نفسك حدو وين ؟ |
حدو على بعد 10 سنة ضوئية من أضان المطوع..
الشايفو أنا غايتو ... نشوف مخارجة ساااااي... استوديو بس..
محبتي
النقوم على الصلاة..
جمعتك مباركة وغداك ملوخية مفروكة وكسرة ..إن شاء الله العضم الكبير داك تاااااخ يقع ليك
في جلابيتك العاجباك دي..
الجن الـ.....
استقيموا يرحمكم الله
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: فاروق أبوحوه)
|
فاروق يا زول مسكون..
يتقطر رقة جمال ولحون...
في الجن معطون..
مالك بتدور تكتلنا آآخي؟؟
Quote: يا محمود
أفتح حلق الغنا المسدود..
لو ما المنافي رصدت لك
يالبينك وبين وطنك
كمين وجع ممدود
غربه و حزن
و عميق أخدود
كان النشيد
يبقاك عيد
يفتح نداك
كوة غناك |
العمارة الساكن فيها أخوك بوليداتو دي..
جيراني (مطاوعة) الواحد دقنو ممكن تعمل ليها اجتماع أنصار سنة عديل كدا...
والعمارة في رقبتها بتاعة المطوع (سيد الجامع)...ههههههههههههه
دحين آآخوي..حلق الغنا دا ما ظنيتني قادر أفتحو أكتر من كدي...
أكيد المقصود بـ(المراحل السنية) القاعد يمر بيها اللحن إنه ياخد ملامحه ويتماهى
في نفَس النشيد
الجاني منك
ومن تباريح اغترابنا الما لقينا
وراهو غير منفى (الذوات)
رضيانة تختار الموات..
يا ربي هل كان اختيار؟؟
فاروق هوووووووي...
شيل لحنك دا واتخارج لينا ياخ..
مالك ياخ داير تقلبنا شعراء كمان؟؟
داير (تعارض) الله في حكمو؟؟
ماني شاعر آآآرفيق ..علا قالوا البيجاور السعيد يسعد..
طيب قولوا بقيت شاعر ... فاروق دا آآناس بيتصاقع؟؟
محمود مصطفى محمود
[email protected]
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: أسامة عبد الجليل)
|
أبو مهيار الحبيب...
العيد يتبارك عليك آآخوي..
أعفو مننا..
Quote: يا أخي دا شعر مدهش يا فاروق يا بخيل؟
كثر خيرك يا محمود يا بخيل شوية.
دا شغل جميل شعرا و لحنا وأداء ، عشان كدا فإني أتهمكا بالبخل.
صوتك جميل ولحنك جميل وإختيارك للنص السمح دا بيوري إنك فنان ناضج. |
إت هسي خليهو بخلنا... إت مغرقنا بكرمك النبيل دا مالك؟؟
ونحن بخلنا داسينو؟؟ أسعل أي زول...
وما تمشي بعيد..أسعل أماني وعثمان..
حلوة (أسعل) دي؟؟
Quote: لكن هذا لا يمنعني أن أقول أن التسجيل الجبتو لينا ده تعبان تعب الموت!!
ماعندكم غيرو أيهاالمبدعين البخلاء. |
نحولك لما ورد في معرض ردنا على فاروق.. ونعترف برداءة التسجيل..
لكن أبشر بالخير ... حتى لو الواحد (ينطر) يسجل في استوديو بالقروش
عشان خاطر جيتك الغالية دي يا الغالي ود الغاليين..
الواحد زاتو ما بيقدر على (نبيشة) الناس الفنانين زي أسامة دا...
لحن دا ولا كتاب الجاحظ أصلو؟؟
محبتي وشكري وتقديري..
محمود
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: أسامة عبد الجليل)
|
Quote: يا أخي دا شعر مدهش يا فاروق يا بخيل؟
كثر خيرك يا محمود يا بخيل شوية.
دا شغل جميل شعرا و لحنا وأداء ، عشان كدا فإني أتهمكا بالبخل.
صوتك جميل ولحنك جميل وإختيارك للنص السمح دا بيوري إنك فنان ناضج.
لكن هذا لا يمنعني أن أقول أن التسجيل الجبتو لينا ده تعبان تعب الموت!!
ماعندكم غيرو أيهاالمبدعين البخلاء.
أحييكما رغما عن كل شئ. |
.أسامه يا جميل
جمعتك مباركه..
إشاده يعتز بها العمل قبلنا يا حبيب ربنا يديك العافية..
عاد شوف ليك حل يا محمود مع التسجيل
غايتو كان علي أنا وحاتك يالله مكيفني تب لما مدفق.
لكن الضيوف إكرامهم واجب.
شكراً أبو مهيار.
| |
|
|
|
|
|
|
|
|
 Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: Mahmoud Mustafa Mahmoud)
|
Quote: منافي الذات
لأنك في ( القِبَل) مُشرع
أمانو يطمن الواردات..
صبابات الهوي المًترع
ضفاف النيل غنا الجايات
(سبايط) من جدايل الموج..
يونِّّس وحشة (الباقات)..
يبِّـل عطش السنين المُر.
يفيض و يعم منافي الذات
نسيمك يا صباح مطّر
ملا الساحات نِدا التُمتُم
سماح بالنعمه بتبطّر
يفت عزم الظروف الصُم ....
و حلاة نتقالد الإتنين..
صباح ممدود كما نيلين..
علي شهقة قفا الخرطوم..
علي الوجع الرجع مهزوم |
الله الله إبداع والله يا مصطفى
ابو حوة شاعر لا يشق له غبار
الكلمة حاضرة لديه ولا يجد مشقه
في كتابة النصوص التي تلامس الوجدان
كلمات رنانة وبصوتك يا محمود رؤيانة
إستمعت لهذا العمل اكثر من مرة وفي
كل مرة ازداد تشوق .
اللحن جميل يا محمود ولونية مطربنا
مصطفى سيد أحمد طاغية عليه , بس صوتك
منخفض جداً هل هو الخجل أم التواضع ّّ!!
عن نفسي اقول عمل رائع وحتماً سيكون
أجمل مع مرور الوقت .
اتمنى ان يتواصل عمل الورشة , سيروا
ونحن معكم نستمع ونستمتع .
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: هاشم أحمد خلف الله)
|
حبيبنا الفنان هاشم أبو أحمد..
جمعتك مباركة يا جميل...
Quote: الله الله إبداع والله يا مصطفى
ابو حوة شاعر لا يشق له غبار
الكلمة حاضرة لديه ولا يجد مشقه
في كتابة النصوص التي تلامس الوجدان
كلمات رنانة وبصوتك يا محمود رؤيانة
إستمعت لهذا العمل اكثر من مرة وفي
كل مرة ازداد تشوق |
.
يا سلام عليك يا هاشم ياخ.. أغرقتنا بكريم الاحتفاء.. وكلك ذوق والله..
Quote: اللحن جميل يا محمود ولونية مطربنا
مصطفى سيد أحمد طاغية عليه |
إذن: ما (ضليت..هرب مني الأمل جنيت)..
أنا يا هاشم قانع تماماً بأن تكون كل مساهماتي - إن كان لي مساهمات أصلاً - سواء كانت أدائية أو (لحنية)
قانع بأن تكون مجرد محاولات لا تعدو كونها بكاء مستمر على مصطفى الذي لن يرحل ما بقي في الدنيا وجدان سوداني..
وهل أنا إلا (نحلة) تأتيكم من حدائق مصطفى بما فيه شفاء (لبعض) الناس ما استطاعت تلك النحلة إلى ذلك سبيلا؟؟
| Quote: بس صوتك منخفض جداً هل هو الخجل أم التواضع ّّ!! |
والخوف كمان..
Quote: عن نفسي اقول عمل رائع وحتماً سيكون
أجمل مع مرور الوقت .
اتمنى ان يتواصل عمل الورشة , سيروا
ونحن معكم نستمع ونستمتع . |
جزيل الشكر والامتنان يا هاشم ياخ..
ونرجو ألا تبخل علينا إت كمان..معروف صاحب روائع...
محبتي..
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: الطيب بشير)
|
أوووووووووهــ.. أمانة الورشة ما جابت لها ناس صعبين وأهل الشي زااااتا..
الطيب بشير حتة واحدة؟؟
حبابك ياخ..
ينعاد عليك بالصحة والسلامة وجمعتك مباركة ..
Quote: أتفق..
و
أضــيــف
نحن لا نزال ننتظرك بالســــــــــودان
نسمعك (جهرة) و نقول، بعد داك، آراءنا |
أنا ذاتي أتفق آآخوي..
أنا هنا في الورشة دي مركِّبْ مكنة (ملحن)..
عمرك يا الطيب سمعت حفلة يغني فيها (حسن بابكر) أو (بشير عباس) أو (الفاتح كسلاوي)؟؟؟ ههههههههههه
أتفق.. وأضيف..ملحَّنْ تقريباً... ومليان شجن لما بهناك زاتو..
Quote: و لحنك حلو..و صوتك نهائي مو واضح
خليهو واضح يا جميل |
أبشر بالخير.. وخذوا هذه.. اتقاسموها إت وفاروق وأسامة وهاشم.. وقسموا الباقي للشعب السوداني..
إلا من أبى....(صحي هي أبى ولا أبا)؟؟
غايتو
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: فاروق أبوحوه)
|
يعُمْ منافي الذات..
يعُـ .. يعُــ
شاطر يا فاروق صاح؟؟
الورشة دي أكلت معانا كهربا تقيلة يا عمك..
الليلة كان معاي على الغداء حامد أخوي..وهو شيخ المتصفحين لسودانيزاونلاين ..وعنده قصة طويلة عريضة
في حكاية الحصول على العضوية... بورداب جدة حافظنها..
طبعاً غديتو ليك بمنافيك دي..
قبل الغداء..وبعد الغداء كمان..
أها وهو طالع قبل شوية.. قال لي ياخ اللحن دا جميل خالص.. لكن حاول أختم بالمطلع تاني..
قلت ليهو جداً.. أظنها برضها وجهة نظر سليمة..
متخيلني صاحب الورشة براي.. والورشة ورشة أخوهو..وكدا..
على العموم نحاول نجدع ليك اللحن في الإيميل بتاعك ..
عشان طريقة استعمالو غالباً في المرحلة دي ح تكون منفى عند اللزوم قصدي حبة كل 5 دقائق..
بعدين نشوف حكاية ترشيد الاستهلاك دي..
الجن الـ.....
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: Mahmoud Mustafa Mahmoud)
|
العزيز محمود مصطفى
كل سنة وإنتو طيبين باعتبار ما قد كان وما سيكون..
كلمات الشاعر الرقيق فاروق قِمة في الروعة، تُهدهِد الوجدان وتعصف بالدواخِل..
لحنك وأداءك سفح من سفوح الإبداع، يتربَّع فيه شخص مُتمرِّس يملك مفاتيح جماهيرية الغناء العُظمى غير آبِه..
أعجبني جداً الـ Vibration في أداءك متزامناً مع الـ Echo غير المقصود الصادر من نقرشة العود في نهايات الميلودي اللحني..
أعجبني ساكِت؟؟ ياخ دي حاجة ما تَخلَص..
لكما أنت وفاروق والحضور عميق إحترامي
Quote: .. لكن حاول أختم بالمطلع تاني..
|
كنت حأقول ليك كلام حامد صحبي دة قبل ما حتى أقرا مُداخلتك دي..
ولو في طريقة برضو في نهاية الكوبليه الأول تعيد المطلع بتاع:
لِلأنِّك في القِبَل مُشرع
أمانو بيطمِّن الواردات
(يمكن عشان الواردات دي دلَّعتها بإحساسك شديد لحدِّي ما بِقت تمرُق معجَّنة.. تقول بس قَرَت في مامون حمّيدة)
مُجرَّد وجهة نظر فقط ولا علاقة لها من قريب أو من بعيد بِعِدَّة وأدوات ومحتويات أصول الورشة الثابتة والمنقولة.
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: علاء الدين صالح)
|
الأخ الحبيب الشاعر الرقيق علاء الدين صالح
جارنا وود حلتنا سابقاً...
تحيات كتار ياخ وكل سنة وإنت طيب..
| Quote: كلمات الشاعر الرقيق فاروق قِمة في الروعة، تُهدهِد الوجدان وتعصف بالدواخِل.. |
فاروق تعال رد على شهقة علاء الدين..قصدي رد على مداخلة علاء الدين دا ياخ.. الراجل برضو شاعر جداً والله..
| Quote: لحنك وأداءك سفح من سفوح الإبداع، يتربَّع فيه شخص مُتمرِّس يملك مفاتيح جماهيرية الغناء العُظمى غير آبِه.. |
ياخ ما تخجلنا يا علاء ياخ... ما كترتها شوية بحكاية سفح وجماهيرية الغناء العظمى دي؟؟
لكن غير آبه دي... ريحتني ليك راحة السرور.. لكن أظن الأصح (لا يؤبه له)...
بالمحلي بتاع الحارة هنا: (ما عند أمو سالفة..أو بالكتير خالص : ماف راس أمو شي)هههههههههههه
Quote: أعجبني جداً الـ Vibration في أداءك متزامناً مع الـ Echo غير المقصود الصادر من نقرشة العود في نهايات الميلودي اللحني..
أعجبني ساكِت؟؟ ياخ دي حاجة ما تَخلَص.. |
دا الـ Vibration بدل الفاقد..الشغلانة فكت يا عمك.... والإيكو تبع الورشة وعدة الشغل..بالله ما تهبش ياخ.. الشغل دا لسه لين..
يعجبوك وليداتك يا علاء ياخ... ودا من ذوقك..
| Quote: لكما أنت وفاروق والحضور عميق إحترامي |
ولك مثل ذلك من الاحترام يا فنان..
Quote: كنت حأقول ليك كلام حامد صحبي دة قبل ما حتى أقرا مُداخلتك دي..
ولو في طريقة برضو في نهاية الكوبليه الأول تعيد المطلع بتاع:
لِلأنِّك في القِبَل مُشرع
أمانو بيطمِّن الواردات
(يمكن عشان الواردات دي دلَّعتها بإحساسك شديد لحدِّي ما بِقت تمرُق معجَّنة.. تقول بس قَرَت في مامون حمّيدة) |
أضحكتني والله.. المشكلة ما نلقى لينا فنان للحن دا يوصل لينا نفس الإحساس..
وجهة نظرك وجيهة وتم استلامها بواسطة الوردية المناوبة في الورشة الآن..
| Quote: مُجرَّد وجهة نظر فقط ولا علاقة لها من قريب أو من بعيد بِعِدَّة وأدوات ومحتويات أصول الورشة الثابتة والمنقولة. |
شوف يا حبيب..الورشة دي.. المتصفحين بتاعين سودانيزاونلاين في مشارق الأرض ومغاربها نعتبرهم شركاء أصيلين فيها.. خلي زول
حضر إلى داخل الورشة وقال كلام بالقيمة والجمال بتاع مداخلتك دي.. إنت عضو مجلس إدارة عديل يا حاج..
كن بألف خير..
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: علاء الدين صالح)
|
Quote: العزيز محمود مصطفى
كل سنة وإنتو طيبين باعتبار ما قد كان وما سيكون..
كلمات الشاعر الرقيق فاروق قِمة في الروعة، تُهدهِد الوجدان وتعصف بالدواخِل..
لحنك وأداءك سفح من سفوح الإبداع، يتربَّع فيه شخص مُتمرِّس يملك مفاتيح جماهيرية الغناء العُظمى غير آبِه..
أعجبني جداً الـ Vibration في أداءك متزامناً مع الـ Echo غير المقصود الصادر من نقرشة العود في نهايات الميلودي اللحني..
أعجبني ساكِت؟؟ ياخ دي حاجة ما تَخلَص..
لكما أنت وفاروق والحضور عميق إحترامي
|
العزيز علاء الدين صالح..
كل سنه وإنت طيب ياخي..
كلماتك قلاده في جيد هذا الجميل محمود وفي جيد الحروف ..
جميل جداً أن (تعتر) فوق الجمال صدفة وبدون تخطيط مسبق.
فمحود هذا (عِترنا ) فيه هكذا دون سابق إنذار (بحفره) أو كل ما جاء علي شاكلتها..
بارك الله في (مطر إيديك ) التي جمعتنا بهذا (الجني).
Quote: كنت حأقول ليك كلام حامد صحبي دة قبل ما حتى أقرا مُداخلتك دي..
ولو في طريقة برضو في نهاية الكوبليه الأول تعيد المطلع بتاع:
لِلأنِّك في القِبَل مُشرع
أمانو بيطمِّن الواردات
(يمكن عشان الواردات دي دلَّعتها بإحساسك شديد لحدِّي ما بِقت تمرُق معجَّنة.. تقول بس قَرَت في مامون حمّيدة)
|
قول إتنبن يا محمود ..
شكراً علي الكلام الطيب يا علاء الدين
والورشه فاتحه جيب أي حاجه (للمطوع) دا خليه ما ينوم أصلو
ياخي دا قالوا نايم من زمااااااااان كفاهو تب..
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: Mahmoud Mustafa Mahmoud)
|
Quote: يا فاروق والله حاسي بيك قاصدها كدا: علِـ ي شهقة وليس على بالألف المقصورة والمعنى واحد..لكن
عا########ي كدا وفيها حنية غريبة خلاص..عليك الله كل ما تسمع اللحن دا..أسمع الحتة دي بتركيز شوية..
وقابلني أكان ما دميعاتك جرن..
واااااا كبيدتي.. |
يا قاريني صاح إنت ..
والله هو ما قصدته با لــ (علي) المتكيه
لكنك تفوقت علي نفسك وعليها عندما جعلتها (علااااااااا) شهقة قفة الخرطوم
ورجعت لتجعلها (عليييييي) الوجع الرجع مهزوم.
أموت أنا في (التوأمة) بين (العليين)..
فوق دا كلو عليك الله قول لي كيف قدرت تختزل كل النص في هذا الوجع؟
| |
|
|
|
|
|
|
|
|
 Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: Mahmoud Mustafa Mahmoud)
|
Quote: يعُمْ منافي الذات..
يعُـ .. يعُــ
شاطر يا فاروق صاح؟؟ |
مو غلط..Quote: الورشة دي أكلت معانا كهربا تقيلة يا عمك..
|
إنت القروش الإتبرعوا بيها أهل الخير (لحستها) ؟
| Quote: بورداب جدة حافظنها.. |
لي في جده هذه صديق عزيز (الشاعر الجميل عبد العال السيد)
ياخي حتي لو ما بتعرفوا بلغوا تحياتي..
Quote: طبعاً غديتو ليك بمنافيك دي..
قبل الغداء..وبعد الغداء كمان.. |
حننتني عليه ياخي ..
هو كان مالو ومال الورشه والكركبه بتاعتنا دي؟
وكلامو ما عن الكوبلي ما تجهلو
| Quote: متخيلني صاحب الورشة براي.. والورشة ورشة أخوهو..وكدا.. |
يا عمك خليه يسمكر أي حاجه مش أخو سيد الورشه؟
| Quote: على العموم نحاول نجدع ليك اللحن في الإيميل بتاعك .. |
رسلت ليك إيميل (توقو)
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: فاروق أبوحوه)
|
إعلان هام..
تعلن إدارة الورشة عن وجود وظائف شاغرة على النحو التالي:
* عدد 50 درويش حلقة النوع البترجم داك..
* عدد 8 عازف كمان (كمنجة) (يفضل ماركة عاصم الطيب قرشي وأحمد باص واسماعيل عبد الجبار)
* عدد 2 عازف أورغن (يفضل ماركة سعد الدين الطيب)
* عدد 2 عازف ساكسفون (مي + سي)
* عدد 1 عازف أكورديون (يفضل ماركة عبد اللطيف خضر ود الحاوي)..
* عدد 1 عازف كلارنيت (يفضل ماركة الراحل أميقو)
* عدد 1 عازف ترامبيت (طرمبة)
* عدد 8 عازفي إيقاعات مهرة
ترسل الطلبات والسيرة الذاتية والعدة إلى الورشة مباشرة ويفضل إرسال نموذج من أداء (منافي الذات)..
آخر موعد لاستلام الطلبات هو يوم 09/01/2011
إدارة الورشة غير مسئولة عن ما قد يحدث للخارطة الوجدانية بعد التاريخ المذكور أعلاه..
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: عصام عيسى رجب)
|
Quote: ما تشتغل ناقد لنفسك خاصة في لحظات دفقك الأول، خلي نهر اللحن يجري ويجري، وبراهو بعرف تعرجاتو ومصبو وين
|
الحبيب عصام عيسي:
اليأس قاتل لكل الفنون ، كما قلت فإن النهر يعرف مصبه وإن تعددت المهامه والوهاد.
سأنقل لك أصداء لحن (منافي الذات) بين من أسمعتهم له.
ويكفي أن بعضهم طالبني بأن أوصله بهذا المحمود ليلحن له بعض الأعمال.
هذه وحدها تكفيه يا عزيزي..
خلي الباب مفتوح يا محمود
وأملا قلبك بالنشيد
شكراً لك يا عصام لأنك (بمطر إيديك) أهديتنا فتحاً جديداً في عالم التلحين
ألا وهو الجميل محمود مصطفي محمود..
(إنت قايل دخول النشيد زي مروقو) ؟!
قول يا لطيف.
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: أسامة عبد الجليل)
|
أسامة الحبيب...
Quote: يا سلام
والله البخل حاشاكم.
أرجو أن تتاح لنا نصوص أخرى يا فاروق لنتعرف أكثر
على هذا الصوت الشعري المتميز وعلى مجمل تجربتك الشعرية.
يا محمود لحنك متناغم مع النص لحد بعيد ، ربما ذكر لك بعض
المستمعين أن أثر مصطفى حاضر بقوة في أدائك ولكني كذلك ألحظ
تكنيك عادل الصديق في العود وهو موجود في الأداء الصوتي أيضا بدرجة أقل.
أنا سعيد بهذا الإنجاز الفني الرائع وأتمنى أن تستمر هذه المسيرة الخّلاقة.
ويللا سماح بالنعمة يبطر ويفت عزم الظروف الصم. |
غارقون نحن في كريم ثنائك ولطيف عبارتك..
لكن النصيحة لله كدا.. عادل صديق عزااااااااف...وصوت قوي ومتميز جداً..
نحن على قدر حالنا يابا.. في هذه المرحلة تقدر تقول الواحد يا دوبك عايز يوصل للناس فكرة اللحن..
لما نبقى على الأداء.. وفي حالة عدم وجود مؤدي غير محمود.. حينها سيكون لكل نوتة طعمها الخاص..
إن شاء الله..
محبتي يا أبو مهيار..
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: فاروق أبوحوه)
|
الجميل فاروق..
مساء الخير ..هنا يا الأمير.. يا المنفاك كسر الضهير..
Quote: سأنقل لك أصداء لحن (منافي الذات) بين من أسمعتهم له.
ويكفي أن بعضهم طالبني بأن أوصله بهذا المحمود ليلحن له بعض الأعمال.
هذه وحدها تكفيه يا عزيزي.. |
عصام قال ليك تكفيهو ونص وخمسة.... لعل جميل تواضعك وأدبك والجم واحتفاءك الجميل وحده
يشرفني ويزيداً يقيناً بأن الإنسان السوداني من أعظم ما خلق الله..
Quote: خلي الباب مفتوح يا محمود
وأملا قلبك بالنشيد |
باب شنو يا حبيب..؟؟
أوع يكون باب الورشة؟؟
الورشة دي أصلاً مشرعة الأبواب وهي مقامة أصلاً على قطعة أرض على قارعة الوجدان السوداني..
وأمانها يطمن الواردات.. الله كريم يابا..
| Quote: (إنت قايل دخول النشيد زي مروقو) ؟! |
وإنتو قايلين طلوع الألحان زي نزولها؟؟
ياخ تكون قاعد في المكتب في أمااااااان الله... شايل ليك بوكس فايل..
فجأة .. وبدون أي حياء.. تتخذ من ذلك البوكس فايل آلة إيقاع سودانية؟؟ الجن الـ....
إنا لله..
تعالوا بالله يا فاروق الورشة أدوها سندة مرة مرة كدي... سمِحْ؟؟
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: عصام عيسى رجب)
|
| Quote: ربنا يا محمود يفِك ويحِل عُقدة لحنك كمان وكمان |
آمين يا عصام ياخ..
| Quote: ما تشتغل ناقد لنفسك خاصة في لحظات دفقك الأول، خلي نهر اللحن يجري ويجري، وبراهو بعرف تعرجاتو ومصبو وين |
بالعكس.. أنا عايز الناس يجوا الورشة.. إن شاء الله يكونوا عايزين يدقونا زاتو..موش ينتقدونا بس...
كلامك جميل والله ياعصام ... يخلي الزول يسرح في حتات بعيدة كدا..
| Quote: وربنا يسمعنا منافي الذات ومطر إيديك في سيديهات وكستات وأروكسترات كاملة قريباً قريباً ..... قولوا يا لطيف |
تاني آآمين.. ويا لطيف..
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: فاروق أبوحوه)
|
| Quote: (أها نتمها والله نعمل رايحين)..؟؟ |
أول حاجة يا عمك...حمداً لله على سلامة الورشة من طوفان الأرشفة...
شايف المعلم بكري استجاب للنداء...
عليك أمان الله أكان انتكلت عليكم إنت وعصام عيسى
ياكم اللابدين بالجاكم في الإيميل...
يا ناس.. ما تشيلوا معانا كتف الغنا...
يا لطيف..
أزيدك ؟؟
البروفات ربما تنطلق في منتصف الأسبوع القادم..
مجموعة أماسي بقيادة الموسيقار صلاح سري على سنة ورمح...
الله كييييييييف؟؟؟ نحن بنلعب؟؟
أبشر بالخير...
محبتي ياخ
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: فاروق أبوحوه)
|
| Quote: ناس أصلو ما بتعرف هظار؟ |
نان تحسبو لِعِبْ؟؟
هووووووووووي يا فاروق..
الورشة الجد جد لسه ما بدت...
والله ناس أماسي ديل يلموا ليك في منافينا دي ويظبطوا ليها البهارات وتسمع بإضانك تسحيبات
كمنجات ناس حاتم بيمول وعبد الرحمن أب ستة
وقبلها أنين أكورديون صلاح سري وإبداعات بقية ناس أماسي ديل ... إلا تعرف حاجة..
إنت ما سمعت بالمثل البيقول:
جدة غير؟؟
قال ما داير معاكم قال..
تاني تجي مولد؟؟
جمعتك مباركة..
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: Mahmoud Mustafa Mahmoud)
|
Quote: النسخة المعاك دي يا عمك داسيها لورشة مزار النور ولا شنو؟؟
|
النسخه (الإسبير) دي إنت قايل جبناها بي أخوي وأخوك؟؟
ياخي دي شكلنا ليها لجنه لفض لجان أكل عليها الدهر (وما شال باقي عِدتو)
واللجنه دي إنبثقت عن اللجنه الأم
والتي هي نفسها (إنشطرت) من (كوم) لجان
تخطط للجنه ورشة (مزار النور)
هذا مع العلم بأن الألحان داخل الورشه علي مسؤولية صاحبها
والذي هو إنت بلا شك..
(دحين) أكرُب (حزوميتك) ساااااااااكت
غايتو ورشتك دي (عِلا) علمتنا التزوير والمنافي
برضو قول يا لطيف.
| |
|
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: Mahmoud Mustafa Mahmoud)
|
انت عارف يا محمود اخوي...ود ابنادم دا قدر ما تكون
عندو حاجة سمحة ومكملة تلاقيه يشابي لي حاجة رفيقو...
ما عارف لي شنو؟
هسي لو قلت ليك غنيتك دي ممكن...تحكرك فووووق...
حا تجي تقول لي...لا ياخ...والله نحن لسه مبتدين..
ودي مجاملة منك...وتدخل جوه نفسي وتكتب العايزو
بالنيابة عني...وتديها كوزين تواضع...
ياخ رسل الغنية دي لي ما يطلبه المستمعون الفي الخلا
ديك...وشوف براك...كان ماك مصدقني...
غنيها يا محمود...فغناك ولحنك دا نوعه انعدم ...
منذ زمان...احمد ربشة...ومصطفي...الله يرحمهم
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: nazar hussien)
|
نسبة لانقطاع خاصية الاقتباس في كمبيوتر المكتب هنا.. ولأسباب غير معروفة
عشان كدي استعملنا طريقتنا الخاصة في الكوتيشن ...
طيب.. يا نزار..
===============================================================
انت عارف يا محمود اخوي...ود ابنادم دا قدر ما تكون
عندو حاجة سمحة ومكملة تلاقيه يشابي لي حاجة رفيقو...
ما عارف لي شنو؟
=============================================================
أنا زاتي ما عارف والله... هسي دي خلقة زول عارف؟؟
لكن (ود ابنادم) دي بالغت فيها عدييييييييل..
======================================================
هسي لو قلت ليك غنيتك دي ممكن...تحكرك فووووق...
حا تجي تقول لي...لا ياخ...والله نحن لسه مبتدين..
ودي مجاملة منك...وتدخل جوه نفسي وتكتب العايزو
بالنيابة عني...وتديها كوزين تواضع...
=========================================================
ما حا أقدر أدخل جوة نفسك .. عارف لشنو؟؟ لأني عارف نفسك مسدودة
زي نفيستي دي.. مسدودة ساي من عوج الدنيا دي .. هسي دي زاتها موش فرفرة مننا ساكت؟؟
لكن شايفك زي دخلت جوه نفسي وقلت (حا تجي تقول لي .. لا ياخ..والله نحن لسه مبتدي..)..
الظاهر إنه نفسي فاتحة وأنا ما جايب خبر؟؟
الله لا كسب شيطانك..يا زول يا طاعم..
============================================================
غنيها يا محمود...فغناك ولحنك دا نوعه انعدم ...
منذ زمان...احمد ربشة...ومصطفي...الله يرحمهم
=============================================================
والله يا نزار هسي قاعد أغنيها ... لكن لما أتأكد إني قاعد براي
والهم عصف..ريحاً كسح زهرة صباي.. ويا حبذا لما أكون في (البرادو) هههههه
نزار.. أنا جادي والله.. ياخ شجعني..لكن كمان ما قدر دا..
تشجيعك ربما يؤدي للتهلكة على قول سليمان ود مساعد..
غايتو هسي أنا ما قريت أنا كتبت ليك شنو...
لكن من ناحية فرحان بجيتك .. والله فرحان بيها فرح السنين..
ربما أعود لمداخلتك دي مرات عديدة .. ساي كدا
أقراها لرويحتي دي.. موش مداخلة صاحبي؟؟
محبات كتار يا نيزو..
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: nazar hussien)
|
وبعدين يا محمود...انت عارف الجناح الجنوبي بالمعهد
الهسي جامعة السودان دا لماني فيك وفي عبدالعظيم منصور
لقيتكم فنانين كبار...عاملين فيها رايحين...متواضعين
ما عارفين قدركم...وكل واحد طفش علي حتة...
لو كنت غنيت من الزمن داك....رسمي...كان تكون محمود
حمد اصلك ماك عارفو قدر شنو...
وكذلك عبدالعظيم...كان يغني الغناء الشايقي
بالعود...ويغني لوردي كابلغ ما يكون الغناء
وكنت رفيقه في كل جلساته...ولو واصل يمين
يكاور ليك غنا الشايقية دا كلو بي عودوا دا بس..
وانا متاكد كان طلع لينا نظرية في الغناء الشايقي
بي محنة صوتو وثقافتو الموسيقية العالية وتكنيكه في عزف العود
الاتنين كنتو...ظواهر في اضاني...هو لم اسمع عنه منذ ذلك الزمان
وعله يكون بخير...وتحياتي له اينما كان...اما انت فاسمعك منذ
ان رفعت هذا اللحن وتيقنت انك لم تنقطع عن الغناء...واصل ياخ...
| |
|
|
|
|
|
|
|
|
|
Re: فاروق أبوحوه + محمود مصطفى محمود ..إلى :(منافي الذات)..ورشة تلحين على الهواء.. (Re: nazar hussien)
|
Quote: وكذلك عبدالعظيم...كان يغني الغناء الشايقي
بالعود...ويغني لوردي كابلغ ما يكون الغناء
وكنت رفيقه في كل جلساته...ولو واصل يمين
يكاور ليك غنا الشايقية دا كلو بي عودوا دا بس..
وانا متاكد كان طلع لينا نظرية في الغناء الشايقي
بي محنة صوتو وثقافتو الموسيقية العالية وتكنيكه في عزف العود
الاتنين كنتو...ظواهر في اضاني...هو لم اسمع عنه منذ ذلك الزمان
وعله يكون بخير...وتحياتي له اينما كان.. |
أنا قايل يا نزار أخوي.. الزول لما (يتقدم في السن) ويتغرب شوية كدي..
بيبقى رهيف زيادة عن اللزوم.. ياخي مرات كتيرة خالص الواحد يجوا داخلين عليهو الأولاد
يلقوهو قاعد يبكي .. مرات مرات لما يجيبلوا اتنخاجة.. وبعدين شفع الزمن دا صعب خلاص يصدقوك..
ياخ قبل كدا أنا عندي ولدي كان معاي في المدينة المنورة..أها لما جينا قدام القبر الشريف..
أخوك جعر.. ولدي ليوم الليلة بيسأل : "إنت يا بابا بكيت لشنو؟؟".. أها اتفرج بالله..
لا أذكر إني بكيت قريب دا زي بكيتي بتاعة امبارح في مداخلتك دي..
عبد العظيم وين ياخ؟؟
عبد العظيم فنان مدفق فن.. وأنا بيني وبينك زمان لما كنت ألقاهو قاعد يغني
سواء غناء شوايقة ولا غناء وردي..كنت إما عملت فيها رايح..أو أعمل فيها عيان..
كضاب البيقول ليك غنيت في حضرة عبد العظيم .. تأدباً وطمعاً وخوفاً زاتو..
تلقاهو هسي شبع مدافرة في الدنيا لما قال بس..
يا حليلنا منها يا نزار ياخ..
| |
|
|
|
|
|
|
|
| |
Mahmoud Mustafa Mahmoud
فاروق أبوحوه
أسامة عبد الجليل
هاشم أحمد خلف الله
الطيب بشير
علاء الدين صالح
عفاف علي ميرغني
حبيب نورة
nazar hussien
فيس بوك
تويتر
انستقرام
يوتيوب
بنتيريست