|
|
 الشاعر المبدع ...محمد سفلة
|
الشاعر محمد سفله
هو امتداد لجيل العمالقه
من شعراء الطنبور الشايقيه
من امثال حسن الدابي وعبدالله محمد خير
محمد الحسن سالم حميد واسماعيل حسن
وهو شاعر كامل بمعنى انه كتب في ضروب الشعر
العاطفي والغنائي والسياسي والاجتماعي
بمفردات سلسله ومعاني عميقه وتصوير بديع
وهو شخصية مرحه لطيفه خيف الروح حاضر البديهة
التقيته اول مرة عن طريق الصدفه عند خزان جبل اولياء
في استراحة هدي وصادف انه مجموعة من نادي الطنبور
كانوا عندهم رحلة بنفس الاستراحه ووجدته مجموعة من اولاد البلد(الغابه)
من ضمنهم عرفونا به وجلسنا جلسه ما منظور مثيله
ابدع في كل ضروب الشعر ومنه ما يصلح للنشر وملكنا الدهشه
واليكم في هذا البوست مجموعة من قصائده
واغانيه التي تغنى بها فناني الطنبور
من امثال محمد النصري و جعفر السقيد و يعقوب تاج السر
|
|
 
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
بسم الله نبدا بالتوثيق
بقصيده
قلب بالصح
دا ما القلب البجرسو شوق اذا ما اختار سميرو بعاد
ولا القلب التبكي حبيبة لو غابت عن الميعاد
قلب من قام صحاري الالفة كان بيشقهن بالنوق
محكوم بسياج العفه في يوم ما سرح مطلوق
شيال للتقيل ما نحى لو ساد العمر ارقوق
ندي وريان كريم وتجواد إلا من الضعف معتوق
قلبِ نبيل وكلو جمال ومابيحقد علي مخلوق
ومهما جرحو المحبوب وخلا قليبو كلو شقوق
كتوم من قام يضاحك غيرو صابر والجرح مفتوق
عليه ما بيضحكوا الشمات وتجري دموعو روق فوق روق
قلب ما همو يقضي ايامو جنب الضامر المحزوق
قلب مشغول بهم اكبر من اشواق ورضى المعشوق
هم وطنا عشانو نزف دماهو على الارض ماروق
وهم انسان قضايا كتار وما قادر عليها يحوق
قلبي أنا ..
حكيم يعرف متين يرتاح وينسي شقاهو يصفي يروق
ومتين يعكر يكون فيضان ويبقي علي الزرع خازوق
فشكرا ياحبيب الروح على مروادك المطبوق
انا ان حبيت بقدّر زولي وان فارق(ت) بفوت بي ذوق
دة ما القلب البجرسو شوق ..الا بيبكي لما يشوف مابين الخلق في خلوق
ماخده طباعا من الغابه شايله ضميرا ماشي السوق
وتاني بيبكي لما يشوف مابين الحقوق في حقوق
نزلت من سماها زلال وطارت من تحت لفوق
وداعاً يا حبيب الروح .. وداعاً يا ملاذ الروح ..
وداعا وما بقول بنساك .. وداعا والقلب محروق
وداعا وفي الختام دنياك مناي وراي تسوي القوق
تمدلك السعاده ايدينا لي فردوسا ليك تسوق
وداعاً يا حبيب الروح ..
وسيبني اعيش قسمتي وراك باسم والكبد محروق
وقسم بالله .. رغم جراحي لسه عليك قلبي شفوق
وقبال الزمان يفرقنا بوصيك والعتاب ملحوق
بخاف يا من رضيتلي معاك غصب إتمطق العميوق
بكرة تدور عليك الدنيا ومن كاساً سقيتني تضوق
وتغنى بها الفنان المبدع
محمد النصري
| |
|
|
|
|
|
|
|
|
|
Re: الشاعر المبدع ...محمد سفلة (Re: Mohamed Abdelgaleel)
|
الجليل محمد عبد الجليل
اهلنا قالوا
ونيلا ما نضب نبعوا على مر السنسن منساب
مياهو البتجري في دمائنا تدفق لا فتر لا شاب
محمد سفله
يتغمص احساسك
وتغوص كلماته في وجدانك
ويملكك احساس بالفرح والسعاده
وتتاوه من شدة الاعجاب
يملكك الدهشه
كن قريب لتسمتع
بابداع هذا الرائع
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
كل يوم بجى مارى فى شارعنا..يسكن قريبا جدا منا..كـ شعره تماما..
واصل..واحنا متابعين..والف تحية للعزيزالمبدع محمد سفلة
Quote: وهو شخصية مرحه لطيفه خيف الروح حاضر البديهة
التقيته اول مرة عن طريق الصدفه عند خزان جبل اولياء
في استراحة هدي وصادف انه مجموعة من نادي الطنبور
كانوا عندهم رحلة بنفس الاستراحه ووجدته مجموعة من اولاد البلد(الغابه)
من ضمنهم عرفونا به وجلسنا جلسه ما منظور مثيله
ابدع في كل ضروب الشعر ومنه ما يصلح للنشر وملكنا الدهشه |
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق جبريل)
|
الضرب فوق الميت
إعدت الجراح ياغالية ما عاد البشوفو جديد
ومابشعر بقيت بالطعنه مهما كان مداها بعيد
واحد عندى كان الامى تنقص واللا تنى تزيد
واللا أصبح ملاقى مأسى واللا يطل على العيد
ماهو غريب عليها الدنيا تقصد قلبى بالتحديد
ودون الناس براى ياحلوة ابقه عدوها انا الويحيد
يانى صريعه من شبيت فوق مهد الطفولة وليد
ولم كبرته واترعرعت فى دنيا الغرام والريد
من نار العذاب الضوقتو لو ماكنت زول صنديد
كان فى قبرى بدرى رقدت فى جوف ود أحدو شهيد
إلا هواك ملانى عزيمه آه يابلبلى الغريد
بلقاك والمحن حابكانى دايماً ليه مادى الليد
الا الليله عاد فى الغربه نازف قلبى دمو صديد
والموت قبل أجيك صدقنى ياهو مصيرى تانى أكيد
الشقى فيها أمسى غرينى والقيد فى خطاى حديد
والشوق بى لهيبو ونارو يلعب فى حشاى عربيد
فى ركن السجون اتباكه أرزح فى الظلام والقيد
وخايف تبقى فيها اقدارى حاكمه على بالتأبيد
لويجدى الشعر ادمنتو كم سطرت فيهو قصيد
وترجمت العليا أغانى لو قول الشعر بيفيد
لو عش فى الجنان يابوحه غيرك ماحأبقى سعيد
ودونك لو هدولى ثماره برضىء أشوفه مره شديد
هذه ايضا تغني بها الفنان المبدع محمد النصري
وانشاء الله اوفق في اني انزل الاغاني
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
شهر زاد
شبه ذاتي بي ذاتك لقيتك انا
لقيت نفسي وعشقتك زي تراب وطني
ونقشتك فوق جدار الليل
همسة شوق ملبده في دموع شجني
لما رحلت في عينيك اهازيج غنوة التذكار
وغفرتلك الاسي الجواي
ودبتا علي الوتر غنوه
اتوسد خيالي ونم سمعتك في الدليب والناي
تقوقي ضياعي للرحل شوفتك سالي شوقك سيف
تقطعي من لحم جلدك وتلتقي في جراح قلبي
اتمنيتي زات اللحظه اكون مارد اجيب عرشك
عرش بلقيس واجدد فيك اسطورة عصا موسي
ومالك الجن وامرقك من صدي التاريخ
جمال بابل من قلب الصدف دره
واحاوربك زمن اطرش منو العلمني
منو العلمني اتبسم وقت يصل الحزن حدو
منو العلمني اتشتت شعاع محبوبتي في كل الشوارع زي ضي
منو الخلد نجومو شتي في كل شئ زي النفس لا في المروق
لا في الدخول بنحسبو لكنو في عاين لي زين اشر علي واصل يقول
اقطع كلامو قبل يتم اسوقك امش اخاف اجري اكل
اقعد واقنب بالتعب الهث واتمدد بلا احراج وبي يصل الحذن حدو
والاقيك بي حرف بكاي ...الميس بعيد الليل دخل
دسيني من الظلمه فيك لميني ساعة الهجعه بيك
قبال يسابقنا الزمن ويلحق يكـــتل فينا صفقات الخريف
موعد غناوينا الزمان تصبح خيال يتجادعا الموج
وترسي في وادي الضياع من غير ا نبقي مشردين
ومزيدا من الابداع يا سفله
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق جبريل)
|
الحبيب طارق جبريل
عليك الله محمد سفله ده
ما بحسسك انو لما يكون متوجع
العبره تخنق حلقك
ولما يكون سعيد
تحسن بي فرح وسرور وبهجه
وتود لو تطير معاهو
يا له من ابداع
كن بخير
وساعدونا بي رفع الاغاني
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
وسيبني اعيش قسمتي وراك باسم والكبد محروق
وقسم بالله .. رغم جراحي لسه عليك قلبي شفوق
وقبال الزمان يفرقنا بوصيك والعتاب ملحوق
بخاف يا من رضيتلي معاك غصب إتمطق العميوق
بكرة تدور عليك الدنيا ومن كاساً سقيتني تضوق
***
واصل التوثيق
تحياتي أبو عبداللطيف
| |
|
|
|
|
|
|
|
|
Re: الشاعر المبدع ...محمد سفلة (Re: احمد سردوب)
|
بوست رائع
يفتح النفس للربع الجديد
محمد سفلة شاعر متمكن وصاحب مقدرة كبيرة على الوصف وتطويع المفردات
التقيت به كثيرا فكان بييننا ود كبير
قبل شاعريته الفذة محمد سفلة إنسان بكل ما للكلمة من معنى وود بلد أصيل وكريم وراجل حبوب يدخل إلى القلب دون استئذان
مليار تحية واحترام لك صاحب البوست وقدرها مليارات أخرى للأستاذ محمد سفلة
انا تاني من البوست ده ما مارق
| |
|
|
|
|
|
|
|
|
|
Re: الشاعر المبدع ...محمد سفلة (Re: عبدالمجيد الكونت)
|
Quote: اتمددى اتسربينى أدخلى من كل المسام
اتوهطينى معاى فى الصحى فى المنام
واحتكرى فينى الزاد براك واتحكرينى
غـــــرف غــــــــــرف
وتاوقى من جـواى من كل الشبابيك
والشـرف
ح تشوفى ايـه غير عزتك ملكــــه
وقصر محفوف وجودك بالترف
داخل وطن مليــــون ســــــــلام
كل المدن كل القرئ كل الشوارع
زحمه بيك كل الملامح ياها زاتا
اتمددى كونينى بالطول بالعرض
ياكى السماء وياكى المــــــدى
وياكى الارض
اتسربينى ادخلى من كل المسام
من غير كلف نتجرد الانتى وانا
وانا زأتى اظهر من خلالك دوزنه |
ما اجمله هذا الشاعر الفنان الفتاك
بكلمه وقوة مفردته
| |
|
|
|
|
|
|
|
|
|
Re: الشاعر المبدع ...محمد سفلة (Re: عبدالمجيد الكونت)
|
يا كونت حبابك الف
وانا سعيد جدا بي تواجدك
لانك حقيقي سوف تثري البوست
وانا محمد سفلته التقيته وادهشني بي شعروا
وحضورا وطريقة القائه وحميميتوا في التعامل الانساني
عزمتهم في البيت في الكلاكله وعملنا لينا ليله ما منظور مثيله
ومسجله فديو وانشاء الله اوفق انزل منها مقاطع
| |
|
|
|
|
|
|
|
|
|
Re: الشاعر المبدع ...محمد سفلة (Re: احمد سردوب)
|
| Quote: معذرة ما عرقت اخليهو يشتغل ما اوتوماتك بس فشلت |
ابو حميد اذيك عساك طيب
لمن تعمل تحميل للاغنية
لاحظ للرابط بعد التحميل
بتلقى كلمة(AUTOSTART) احذفها من الرابط ، انتبه ما تحذف معاها حرف تانى من الرابط ..عشان ما يتكوجن الرابط..
وبعد كده ما بتشتغل الا بعد تضغط ليه
يلا قوم تانى اعمل ليها تحميل وشوتا تانى
تحياتى
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
القصيده الجايه
اسمه اتخاوينا
او القريه
وكتبه شاعرنا الفذ
عندما جارت به الظروف
وضاقت به الدنيا بما رحبت(ارض المليون ميل مربع)
فأجتمعوا مجموعة من الغبش
الذين لا يمتلكون
مقدرة ايجار و كهرباء وماء
وخرجواخارج حدود مدينة امدرمان
وكل واحد حسب امكانياته وضراعه
البناءغرفة جالوص
والبناء راكوبه
والمقتدر بنى بالطوب الاخدر
ولكن بعد فترة وجيزه وفي موسم الخريف
اتاهم قرار الازالة من سعادة الوزير
وطبعا بدون بديل او حتى تعويض
فولدت هذه القصيده في هذه الظروف العصيبه:
ــــــــــــــــــــــــــــــــــــــــــــــــــــــــــــــــــــــــ
أتلملمنا كم عتالى وكم سواق كمين عامل حالن ضـاق
كـم إيجـار والسمسـار وجمـر العيشـة وكيـف حـراق
اتلملمنـا مسيحـي ومسلـم واتخاوينـا عـلـى الإطــلاق
لافي سياسة ولا في نفاق لافـي مكابسـه لافـي خنـاق
همنـا واحـد كـان الضـل حزبنـا واحـد هــو الارزاق
كــنــا نـفـتــش عـــــن رقـــــراق لــوفـــي زقـــــاق
قـمـنـا مشـيـنـا مــحــل الــمــوت بـالـعـيـن يـنـشــاف
ويـــــــــوم بـطــعــيــمــو الـــــمـــــر يـــنـــضــــاق
لافـي مـدارس لا اسـواق لا مستشـفـى ولا كافتيـريـا
ولافــــــــــــــي حـــــــدائــــــــق لـــلــــعــــشــــاق
صي في صي الدنيا هجيري وديمه حصاها مولع باق
صن الراس من الصناية وحفا اقدامنا جرى الساسـاق
حتـى الشجـر فـي الخـيـران معـلـم الله مــن الاوراق
كـل الدنيـا حميـر ونيـاق وكـان الحـى افـراق افــراق
ومــا قايلـيـن أقـدارنـا تـحـى بيناتـنـا تـســوى فـــراق
وفـجـأة يــزن فـــي الـقـريـة قـــرار إزالـــة إزالـــة
العـشـوائـي ولا فـــدارى نـحــن بكـيـنـا ولا هـمـاهـو
نـحـن شكـيـنـا ولا هـمـاهـو واحتجـيـنـا ولا هـمـاهـو
فجـأة تكـون القـريـة دمــار واتشـردنـا مــع الحـجـار
اتبهدلـنـا مــع الامـطـار الـفـى كـرقـه والـفـي غـــار
الفي ضـل مضـاري جناهـو والفـى بطنـو مولـع نـار
اتـقـسـمــنــا الـــوجــــع الــــواحــــد واتــشـــردنـــا
عــــلــــى الـــحـــجـــار كـــــــــلاب وصــــغـــــار
بـس ضاقـوا ليشـن ولـيـش سبـقـوا المـطـر والسـيـل
طـفــلا طبيـعـتـو هـبـيـش جــمــرا بـقـالــو عــويــش
بيـتـاً ضــرا الـكـرتـون ضـلــوا الـسـعـف والـخـيـش
واسوبـوا مـجـري السـيـل خلـونـا مــن غـيـر ريــش
يــا رب هــل يمـكـن حـاسـب جـنـاى فـــي الـطـيـش
أم فــي العـطـش والـجـوع والهـمـلـى والطـرطـيـش
تحياتي
| |
|
|
|
|
|
|
|
|
|
Re: الشاعر المبدع ...محمد سفلة (Re: هيثم درار)
|
يا سلالالالالالالالالالالالالالالام
ي هيثمات
انا حزاراك دي بالذات
كاسره فيني ضلعه
لانها حقيقيه
وتجربه شخصيه لمحمد سفلة
وسمعته منه اكتر من مره
وكل ما اقابله بطلبه منه
تسلم يا حبيب
وما تنقطع وواصل لبداع
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
دي قصيدة يا سوسنه
ايضا من روائع مبدعنا
محمد سفله
ياسوسنة
يا سوسنة..
ويا سوسنة...
يا أحلى من لون الجمر وكتين تهب نيرانو ريح
ما بين محطات ابتسامتك والسفر خاطر جريح
اطرب شعورك شلتي في حلقة هواك طارة مديح
عبر الفصول وألوان قزح ميلاد جديد في الأزمنة
يا سوسنة..
ويا سوسنة..
رغم اندهاشك للخريف الجاي من فوق حيل الصبر مطران غنى
ورغم انتعاشك بين ايدي خايف الخريف يشرب نداك يا سوسنة
هاك عرض حال اشواقي ليك اقريهو زيدي عناك عنا
يا سوسنة..
ويا سوسنة..
عصر الألم قلبي الرهيف قطر غناك آهة وبكا
صوت استغاثة من الرفاق ناداهو يوسف واشتكى
هجم الوجع شيطان غناي يتهادى يهمس دندنة
يا سوسنة..
ويا سوسنة..
ما أحلى صورتك والدموع مرسومة فوق وجنك دروب
سرقت شفق حمرة شفاك الماخدة من سحر الغروب
نزلت ظلال واديك شهق عربان خلاك اتحزمت آمالا توب
والخوف شلع حير غناوي الفرحة فيك طراك بكا كمين سنة
يا سوسنة..
ويا سوسنة..
لا زال وراك الليل طويل وانا في انتظار الغفوة شارد بالخيال
ما بين جبال الهم أجر اقدامي في موج الرمال
ولا اتيقن القلب البنادي علي سراب محياك تعال
كل ما يشوف اترك يقيف يصرخ يقول كانت هنا
السوسنة...
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
هذه القصيده
من اجمل ما كتب
شاعرنا المبدع محمد سفله
عن حال محمد احمد المغلوب علي امره
يخاطب فيها
الذي نهب قوته وكمان بيتبجح
فوق كم بتتبجح
شان ضرعك المرضوع
من القبور مقلوع
يادابو من تب
كاتبينلو ما يربح
في زحمة الايام
ما طال حالبو الجوع
وجبنا للضيفان
خاتنو في القاطوع
بي فوق ضراء الدناع
صدقنا لو هسع
الوش يغطي اصبع
لكنو يوم باكر
لما الفجر يطلع
وريني وين تدخل
كل القبل مدقع
هوايك البنبح
قوليهو لا ينبح
لو غارك القيساب
الشلتو نص الليل
كان من ضراع زي ديل
ناساً ضعاف بالحيل
صدر امك الداقي
ادا الزمن عافي
اداهو من مافي
سايطنا والجيران
سايطنا والحلة
سايطنا والاخوان
سايطنا في الله
ما عيب عليك يا حاج
ناكل عرق محتاج
فوق كم بتتبجح
والمارقة ما منك
المارقة من كومي
قبال تصل سنك
اسمعني لو قادر
ولو ما قدر عنك
توب امك المرقوع
قطعتو من جنك
كريتو فوق حبلاً
عشميقو مو منك
المارقة ما منك
بس مارقه بت عدنان
عربيدة كضابة
شايلة اسكريم لولي
للعندو والتابه
شرت مصاريني
بي فوق كجور بابه
نامت معاك نامت
ورق العرس عندك
ورق الطلاق عندك
كان ارضي كان ابا
تنقيرك الطالع
نازل من الساقية
خدرنا من مافي
سوينا ماديلا
متكابي متلاقي
يوشن عرقنا نزل
خيتو عراقي
وماك طاري في الباقي
تمضالي اوراقي
ما ايدنا في ايدك
قايلنا بنريدك
مصلايتك المارقي
في ليلك الاسود
فوق ليها بت هارت
حاضنالا شايب اسود
غطيها بالشملي
غطيها بالمصحف
شان تاني ما تبرد
بي خشمك الاجواد
ولعلها المنقد
قلب مصاريني
قلب موازيني
بس لا تصل ديني
صح لسانك يا مبدع
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
Quote: طـفــلا طبيـعـتـو هـبـيـش جــمــرا بـقـالــو عــويــش
بيـتـاً ضــرا الـكـرتـون ضـلــوا الـسـعـف والـخـيـش
واسوبـوا مـجـري السـيـل خلـونـا مــن غـيـر ريــش
يــا رب هــل يمـكـن حـاسـب جـنـاى فـــي الـطـيـش
أم فــي العـطـش والـجـوع والهـمـلـى والطـرطـيـش
|
يا سلام يا طارق ..... اهديتنا في غربة البعاد الشوم .. اهديتنا سمح النضم منضوم
بردت الجوف مرتين ؟؟ ما اجملها من اتكاْة في هجير الغربة ام شوك
تطعن في الحشا لا بترحم ولا بتحن
شكرا ليك يا زول ملان حنين
والشكر غيمة ومطرتين للزول المسكون غنا
الشاعر محمد سفلة لك التحيا والتقدير بحجم ابداعك الكبير
ربي يملاك عافية زي ما مليتنا سعادة بنضمك المارق من الجوف
شكلي قجيت خيمتي معاكم آآآ اهلي الحنان
لي عودة ان شاء الله
شكرا أردب محنة يا طارق,,,,,,,,,,
| |
|
|
|
|
|
|
|
|
|
Re: الشاعر المبدع ...محمد سفلة (Re: اسماء الجنيد)
|
استاذتنا الرائعه
اسماء الجنيد
حضورك شرف للبوست
وتعبير شهاده وقلاده في جيد
مبدعنا محمد سفله
Quote: بردت الجوف مرتين ؟؟ ما اجملها من اتكاْة في هجير الغربة ام شوك
تطعن في الحشا لا بترحم ولا بتحن
شكرا ليك يا زول ملان حنين
والشكر غيمة ومطرتين للزول المسكون غنا
الشاعر محمد سفلة لك التحيا والتقدير بحجم ابداعك الكبير
ربي يملاك عافية زي ما مليتنا سعادة بنضمك المارق من الجوف
|
اسماء
لك قواسي مودتنا
تسلمي
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
Quote: انا حزاراك دي بالذات
كاسره فيني ضلعه
لانها حقيقيه |
ابو عبودى صباحك زين
ياخ انا ضلوعى كلها مكسرة من حزاراك دى
وود النصرى ما قصر اجاد اداءها إجادة تامة
بس فى مقطع انت ما زكرتو , فى حين إنو ود النصرى عصر على قلبو وقالو
كدى راجع الاغنية بتلقاهو
ود النصرى طبعآ صديق عزيز لاخوك وكل إجازة انزل للسودان لازم احضر ليهو حفلة حفلتين
وحفلة معاوية لازم تكون بمحمد النصرى ,, على انا بس كيف يقول داير يعرس؟؟؟
تحياتى لابو النسب
ــــــــــــ
شوف تانى داير شنو انا جاهز
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
نعود والعود احمد
كذبة أبريل
لابعدي من عينك جفي لا كت وعودك بخلفة
كان ظني يا ست الجمال يجمعني يفرقنا الوفة
غراكي اني جريت وراك وفوق دربك اعدته الحفة
غنيتة خلدتك خلود وقصص الغرام السالفة
شان انتي من دون الحسان اختارك القلب اصطفة
واخر جزاهو وقع صريع بس حقو منك ما عفة
ماني البراي صريع هواك كم زي مطعون ما شفة
اعدته امال الهموم تهدم قصورة وتنسفة
انا زول مجرح من زمان دنياي داجي مصيفة
معتاد علي النوح والبكي وفيض الدموع الزارفة
سايقاني ليه وانا زول كسيح قصت جناحي العاصفة
خليتي قلبي قريب يصل ولا الجنان الوارفة
سبتيني في نص الدرب ليه قلتيلي ازنك آسفة
لا قادر اتقدم براي لا قادر ارجع بالقفة
عمر المحبة البينا كان لحظاتو مرت خاتفة
اتمني دنياكي الامان يبراها ديمة يحالفة
بقدر وحاتك في السنين اتناسة ايام الصفة
واكبر خيول اشواقي ليك اكبح جماحة واخالفة
مظلوم من الزمن العلي احكاموا جايري ومجحفة
انا في غنواي الريد شموع وانا في حكاويهم رفة
انا عنتر المات والشجن دم عبلة لكن ما دفة
انا ريدة في اعماق ملاز الا القدر ما انصفة
صح ماني قدرك وريدي ليك في حد زاتو مجازفة
اقطع احساسي وادوم كل المشاعر المرهفة
انا زول نبيل ما برضي يوم تجرح كرامتي العاصفة
بدفع ثمن مبداي دموع مهما عيوني يكلفة
يا كذبة ابريل الخلاص لحظاتو مرت خاتفة
يا نسمة بهوي شزاها موت يسكرني لم اتكرفة
يا درة عزبني الزمن لمن لقيتة مزيفة
انا تاني ما اصبح مناي دانيات سمارك اقطفة
خليه تطويها الرياح وردة غرامنا الناشفة
واحزر تحاول يوم تعود بالماضي روحي تحلفة
خليني للوحدة الزمان من بدري اصلي موالفة
خليني فيها اعيش عزاب الزكري لا يوم الوفة
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
محمد سفلة مبدع ثم مبدع ثم مبدع ،
عرفته عن قرب هو ورفيق دربه الفنان المبدع محمد النصري في فترة زمنية سابقة وكنا آن ذاك نبحث في مداخل للإنتشار سوى عبر المنتديات الثقافية أو عبر الصحف اليومية أو عبر الإذاعة والتلفزيون وكنا نتقابل كل يوم ونجلس ونغني وكان هو ينشدنا أعظم ما كتبه فهو شاعر مسكون بالإبداع وكان كثيراً ما يقوم بوضع ألحان هذه القصايد أو قد نقول كان يخرجها ملحنة إن صح القول ,, فكم أمتعنا بغناءه وبقصائده التي تغوص بك في عوالم بعيده ،،
والذي لا يعرفه الكثيرين أنني في أول تجربة غنائية خاصة لي كانت من أشعار محمد سفلة وكانت هي أغنية أمنية التي صاغها هو وقمت أنا بتلحينها وهي باكورة إنتاجي الخاص وقد قمت بتسجيلها في ذاك الزمان في الإذاعة السودانية في برنامج دوحة الشباب الذي كانت تقدمه المرحومة الاستاذه إمتثال الدالي ،، فوجدت الأغنية صدى واسع في نفس كل من سمعها .. فالحديث عنه طويل وسأسترسل فيه لاحقاً .. ولاحقاً سأقوم بتنزيل أغنية امنية حتى تضاف لرصيد هذا الشاعر الفذ ...
لك الشكر اخي طارق على هذا الإبداع
تحياتي : ياسر العيلفون
| |
|
|
|
|
|
|
|
|
|
Re: الشاعر المبدع ...محمد سفلة (Re: ياسر السر)
|
العزيزالفنان المبدع
ياسر العيلفون
رمضان كريم وكل سنة وانت طيب
تسلم يا حبيب
حقيقي انصفت الاستاز المبدع
محمد سلفه
وهو يملك الدهشه لكل من يلتقيه
ويستمع اليهوكما ذكرت
Quote: وكنا نتقابل كل يوم ونجلس ونغني وكان هو ينشدنا أعظم ما كتبه فهو شاعر مسكون بالإبداع وكان كثيراً ما يقوم بوضع ألحان هذه القصايد أو قد نقول كان يخرجها ملحنة إن صح القول ,, فكم أمتعنا بغناءه وبقصائده التي تغوص بك في عوالم بعيده ،،
|
منتظرين
انزال الاغنيه
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
تمن هواك
محمية القلب النزف دم عمرو من عمق الجراح
وشالك رسالة ريد نبيل محمولة فوق سن الرماح
لميت حروف اشعارى فيك زينتبن صدرك وشاح
دودرت حظى من الظروف سويتو من الخوف سلاح
متحدى سطان الزمن شاقق العتامير والبطاح
سايقنى حسك فى الخيال فوق التعب قلبى استراح
باريت سكة شوقى ليك فارد صبر أيوب جناح
خطواتى مابتعرف تخاف احساسى مابيعرف نواح
رغم التباريح والظلام لازلت عشمان فى الصباح
حتى ان ذئاب محنى القبيل نطن لى فى بطن المراح
حنست أقدارى وبكيت عدن دموع عينيى مزاح
كوركت ورينى ان صبح تعذيبى فى عُرفك مباح
وقفلنى تالا الريح طرش مابيسمعن حتى الصياح
مجبور تساوقنى الظروف شيقيش تقبلنى الرياح
جامحات خيولك جنى ليل لاقنى عن ساعة الرواح
قاعد اذاكر فى الهموم الفيها ماظن لى نجاح
ضاريت فى قلب الوضوح شان انتى مدانى الصراح
كان أشقى كان اسعد معاى قوتيها ياست السماح
لاناسى ذكراك المعاى لابيها لى زول قلبى باح
ولو غيرك اتمنيت مُنى يبقه الغلط عند الله صاح
يابهجت القلب الخد فى دوبو ضرعاتى الكفاح
بدفع شبابى تمن هواك حتى ان لقيتو وراكى راح
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
يوشن عرقنا نزل
خيتو عراقي
شكرا جميل لهذا الجمال --- لهذا الابداع الذي دوما يتحفنا به المبدع محمد سفلة
فهو بحق رائع يحمل الكثير من الروعة ومخزون الابداع
مفردة سفلة تنزل على القلب وتسرى --- فهي عشق ابدي يستنشقها كل من تطرق اذنه وتمري
جميل أن نحتفي بمبدع ونفرح به وله ومعه
غرد أيها الجميل
مع خالص ودي
طارق الاحمدي
| |
|
|
|
|
|
|
|
|
|
Re: الشاعر المبدع ...محمد سفلة (Re: Tarig Sidahmed)
|
نواصل
مـحـمد
محمد فى الغربة تايه حصادو اللمه أوجــاعه
جـداول دمعو البتجرى مغلبى ديمه قراعـــه
ضهب فى لحظة وصولو المدن ماعارف طباعه
وكت سالمه مد إيدو مطنشه مدت كراعـــــه
كتم آهة غلب تكتل صنوف الاها وأنواعــه
وكسح راجع بى خيالو طرا التحنان والوداعه
خرير النيل المتسب سماحة الناس والزراعه
أنين ساقة تنوح مريكبا مفرود شراعا
لقمة لـو حتى بايته تشيله الناس بى قناعــه
وقليلة مكسور خشيمه يسبح ديمه نقاعـــه
حسيس طمبوراً ينقرش نقر فى قعدة رباعـه
وعذاب أماً تلاهيبو وجارى تملى دماعـــــــه
بكا الايام الخوالى وعروض المدن المشاعـه
وجماله المدهون مظاهر تلالى وزايفه خداعه
فجوره وأحلام صباها مجونه وهوسه وضياعه
وتقاليع غلبان يديره واللا يثنى إتباعـــــــــه
أصيل مانعاهو المبادىء يغابى يلم الجماعـه
وينوم ويمحن زمانو ويعيش الغربة فد ساعه
ضعيفاً لامن يسندو نحيلاً ماشى شمــاعـــــــه
وقسم من حالة هزالــو أخير أطفال المجاعــه
صبر فوق الجمر قنب ورويحتو تنازع نزاعه
وبخاف قبال يصد يرجع يكون أسمو غشه الاذاعه
__________________
| |
|
|
|
|
|
|
|
|
|
Re: الشاعر المبدع ...محمد سفلة (Re: طارق عبد اللطيف نقد)
|
كل سنة وانتم طيبين
بشوفك في عيون عيني
بشوفك في عيون عيني وفي جرح القليب الني
في جور الأحبة معاي وفي شمت الأعادي علي
لاني وكت سفكته الليل علي مزبح هواي ضحك
والفرح المناي حاحيتو دودرتوا وابالي يرك
لقيت ماساتي تبكي معاي وتضحك في عيون اهلك
تركتة احلامي للايام طلقته حبالة من ايدي
وقع شقي الشمال كورك لقيت شقي اليمين مشلول
انا تركته الروح قبل ما تروح وقع مني القليب مشلول
وقعدتة اغني ما حديت رغم انو المصير مجهول
بكيت لامن وجع حتي عرفت انو الطعني اخي
شرب ريق الشجن شجني ومحقني علي العي الخوف
وبقيت من الزوال جفال خليك من اشوف لي طيوف
دة انا البلفطرة قلبي عطوف من الشفتو يا ست ريدي
ما شفعت عهودك لي
نجومك كان رماها سماها ما اختارت براها ترك
دهر اشعاعا برق الخوف بقالا وحيح غناي تابوت
راجي نجاته من النجي يونس لم بلعوا الحوت
سنين الامتحان قضاها حتي نهاروا من غير ضي
شيلني عليك وقوم يا موج محل ما ترسي راضي اكون
ولا تهتمة بالمقسوم سمح حكم الله مهما يكون
ضجة في عيونك كلمة كانت في قلب للنون
غناها الزمن للدنيا لكن ما غشت اضني
| |
|
|
|
|
|
|
| |
طارق عبد اللطيف نقد
Mohamed Abdelgaleel
مُحَمَّدٍ عِوَضٌ احْمَدُ
طارق جبريل
ابو جهينة
هيثم درار
احمد سردوب
معاوية عوض الكريم
سلمى الشيخ سلامة
عبد القادر شادول
ابراهيم الصغير
اسماء الجنيد
ياسر السر
فيس بوك
تويتر
انستقرام
يوتيوب
بنتيريست