|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
كان من المفترض الحضور للمطار الساعة الثامنة مساء على أن يكون الإقلاع الساعة الحادية عشر مساء ولكن كعادة سودانير تم تعديل مواعيد الطائرة على أن مواعيد الإقلاع الجديد الساعة الثانية عشر مساء ، ولكن حدث ولا حرج الطيارة تحركت الساعة الثانية صباحاً .... لييه التأخير ما معروف ونحن جوه الطيارة من الساعة الواحد تقريباً والتكييف طبعاً واقف والسخانية شديدة مع رطوبة جدة - حدّث ولا حرج) بعد شوية جاء (دكتور عوض الجاز وقعدوه في الصف الأول) طبعاً الطيارة صغيرة وما فيها درجة أولى وكدة (كلو مع بعضة) وطبعاً أدوه من العضة المخصوصة وزقوه عصير وجابو للناس بيبسي (اظن عندو المصران ما بشرب البيبسي) هههه رغم أنه كلنا أولاد تسعة والدنيا رمضان كمان ما تنسو بس رمضان بالليل طبعاً ، المهم وصلت مطار الملك عبد العزيز الدولي بجدة ووزنت العفش بعد معاناة كبيرة في الصفوف (المكعوجة) والمتداخلة والتأخير الكبير للمسافرين مع موظف الخطوط (نظام تحانيس وكدة) للوزن الزائد طبعاً – رغم التساهل الواضح للموظفين في مسألة الوزن وتفويت العديد من الأوزان للمسافرين – وهذه هي الميزة التي تجعل الناس متمسكة بسودانير ، المهم الطيارة طلعت صغيرة ( مستأجرة من شركة طيران داخلية اسمها) مارسيلاند) على ما أطن والعفش كله بدون استثناء تخلف عشان كدة عرفنا ليه تساهلوا مع الناس في الوزن. وقد نصحني أحد الأخوان الملمين بمعلومة الطائرة الصغيرة وأن العفش سوف يتخلف أن (اطلع شوية غيارات في الهاندباك بتاعتي) على الأقل أقعد بيها يومين ثلاثة لحدى ما العفش يجي. المهم وصلنا مطار الخرطوم – لقينا موظفين سودانير منتظريننا في الكاونتر وهو يبشروننا بأن عفشنا تخلف وكل واحد يسجل اسمه وعدد القطع بتاعتو وادونا رقم موبايل قالوا تدقوا عليه عشان تعرفوا العفش وصل ولا لأ. المهم الناس سجلت اسمائها وطلعت (سيدا) على الشارع يعني الواحد بعد عشرة دقائق من نزول الطيارة كان بالخارج، وصلنا البيت قرب أذان الصبح وصلينا وسلمنا على ناس الحلة ، الصباح اتصلت على الجوال طلع (مكنة كبيرة جداً) عارف الجوال مغلق ولا يمكن الوصول إليه الآن... وتييييب نعمل شنو .... نمشي المطار في النهار الحار داك والدنيا رمضان ولا كيف ، قلنا نديها يوم وبعد داك نمشي نفتش عفشنا ، صباح اليوم الثاني اتوكلنا على الدائم ومشينا المطار ودخلنا تووووشك صالة الوصول وما لقينا حاجة ... قالوا تعالوا بكرة في طيارة جاية مساء اليوم ، وجينا بكرة مافي شيء برضو بل تزداد الأمور تعقيداً لانه الطيارة الشافعة دي (قصدي الصغيرة) كلما تمشي بتجيب شوية عفش متخلف والركاب الجايين فيها (أباطهم والنجم) المهم مساسقا وجري ثلاثة أيام بنهاراتها الحارة ديك في رمضان حتى جعمت الشنط بتاعتي ، وطبعاً كانت مردوة جنب السير في حالة مزرية وبطالة جداً وكل من حضر أو حضرت لتأخذ شنطها كانت تحلف بأن هذه أخر سفرة لها بسودانير ولن تكررها ثاني مرة أبداً أبداً ، سألت عن موية زمزم وكان معي (جالونين) نظام واحد لي أهلي وواحد لأهل وزارة الداخلية (ناس أبو القدح) أها يا جماعة وين زمزمنا ، قالوا زمزم دي ح يجيبوها يوم تاني بي سفرية خاصة وبعد ين يعني تاني عندنا جكة للمطار دا يا جوك ولا كيف... واحد ود حلال قال لا روحوا المستودع بتلقوا المسئولة هناك موظفة اسمها (عائشة) بتعمل ليكم حاجة اسمها (معالجة) ومشينا لي عشة أها ياستاذة الحاصل كدة وكدة نعمل شنو – قالت خلاص امشي المستودع فوق بتلقى كمية بتاعت زمزم جات قبل فترة شيل ليك أي جركانتين واتخارج وبعدين جوالينك لما تجي يستفيد بيها غيرك. وقد كان المهم السؤال في ناس جاية من الأقاليم آآآآسف الولايات وخاصة ناس العمرة الكبار في السنة اتبهدلو بهدلة شديدة في حاجة كبيرة كدة قالت لي يا ولدي أنا هنا كل يوم بجي من الصباح لحدي العشية وشنطي ما جات أها يوم قاعد جنبها واحد من قرايبها الفي الخرطوم قال ليها هاك كلمي الجماعة في البلد كلمت أهلها قالت ليهم لحدى بكرة لو جاءت الشنط بتاعتي بخليها وبجيكم ، الشنط طايرة. هذا كلاكييييت أول بجيكم صادي متابعين ولا لأ
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: ابراهيم محمد الحسن)
|
استاذ خالد سلامات
متابيعن
Quote: على أن يكون الإقلاع الساعة الحادية عشر مساء ولكن كعادة سودانير تم تعديل مواعيد الطائرة على أن مواعيد الإقلاع الجديد الساعة الثانية عشر مساء ، ولكن حدث ولا حرج الطيارة تحركت الساعة الثانية صباحاً |
تعرف زكرتني حاجة مره ناس سودانير ديل ادونا مواعيد كانت الطائرة الساعة الرابعة عصرا جينا المطار قالو تجو الساعة 11 ليلا رجعت بي اولادي مكة جينا جدة نفس المواعيد قالوا الطائرة جاءت 7 مساء ولقت بعض الركاب وشالتهم ووعملت شتات . شفت المحن دي كيف
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
المطار مرة ثانية وسودانير عذاب
ثالث أيام العيد عادت شقيقتي وزوجها من العمرة كنت في انتظارهما بالمطار طبعاً كنا متابعنهم بالموبايل
لحدي ما ركبو الطيارة والكابتن دور الماكينة وعاوزين يعملوا التيك اوف بعد داك اتصلوا علينا وقالوا اتحركنا من جدة باقي لأنه سودانير ما مضمونة يمكن بعد يركبوا الناس يغيروا رأيهم وينزلوهم ويحولوا الرحلة إلى (كانو) محل الفكة طبعاً عموماً اتحركنا المطار من البيت بعد ساعة من إقلاع الطائرة وصل الطائر المأمون الصغير مارسيلاند أيضاً، ،وطبعاً كالعادة العفش بتاع الناس اتخلف .... وعملو للناس نفس الإجراء نفس وأدوهم رقم الموبايل الوهمي الما بجمع داك وطوالي مقفول لكنهم كانو محظوظين لانه تخلفت لهم شنطة واحدة ...+ زمزم لكن بأمانة موظفين سودانير الأرضيين بالمطار بالخرطوم كانوا متعاطفين جداً مع المسافرين ومتعاونين لأبعد الحدود ويقدمون كل مساعدة ممكنة ويجاوبون على أسئلة المسافرين الكثيرة بكل أريحية... هذه كلمة حق لا بد من قولها. بس طبعاًشنطة ولا عشرة ياكا الجايي المطار جايي المطار يعني لازم نزازي كمان عشان شنط أبو النسب وكدة وبالفعل طبعاً اخواني في العمل وأنا الوحيد الفي البيت وبالتالي لا مفر من الذهاب مع أبو النسب المطار المهم زازينا لينا زي 3 إلى 4 أيام حتى استلمنا الشنطة وموية زمزم كالعادة معالجة مع الاستاذة/ عائشة بالمستودع العلوي يعني إجازتي العشرين يوم دي قضيت منها زي اسبوع ماشي جاي المطار ويوم المغتربين وثلاثة أيام فواتح شوفو فضل فيها شنو؟؟
بجيكم صادي
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
المطار مرة ثانية وسودانير عذاب
ثالث أيام العيد عادت شقيقتي وزوجها من العمرة كنت في انتظارهما بالمطار طبعاً كنا متابعنهم بالموبايل
لحدي ما ركبو الطيارة والكابتن دور الماكينة وعاوزين يعملوا التيك اوف بعد داك اتصلوا علينا وقالوا اتحركنا من جدة باقي لأنه سودانير ما مضمونة يمكن بعد يركبوا الناس يغيروا رأيهم وينزلوهم ويحولوا الرحلة إلى (كانو) محل الفكة طبعاً عموماً اتحركنا المطار من البيت بعد ساعة من إقلاع الطائرة وصل الطائر المأمون الصغير مارسيلاند أيضاً، ،وطبعاً كالعادة العفش بتاع الناس اتخلف .... وعملو للناس نفس الإجراء نفس وأدوهم رقم الموبايل الوهمي الما بجمع داك وطوالي مقفول لكنهم كانو محظوظين لانه تخلفت لهم شنطة واحدة ...+ زمزم لكن بأمانة موظفين سودانير الأرضيين بالمطار بالخرطوم كانوا متعاطفين جداً مع المسافرين ومتعاونين لأبعد الحدود ويقدمون كل مساعدة ممكنة ويجاوبون على أسئلة المسافرين الكثيرة بكل أريحية... هذه كلمة حق لا بد من قولها. بس طبعاًشنطة ولا عشرة ياكا الجايي المطار جايي المطار يعني لازم نزازي كمان عشان شنط أبو النسب وكدة وبالفعل طبعاً اخواني في العمل وأنا الوحيد الفي البيت وبالتالي لا مفر من الذهاب مع أبو النسب المطار المهم زازينا لينا زي 3 إلى 4 أيام حتى استلمنا الشنطة وموية زمزم كالعادة معالجة مع الاستاذة/ عائشة بالمستودع العلوي يعني إجازتي العشرين يوم دي قضيت منها زي اسبوع ماشي جاي المطار ويوم المغتربين وثلاثة أيام فواتح شوفو فضل فيها شنو؟؟
بجيكم صادي
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
الحبوش أو الأحباش ناس تلهاسي ديل ياخي ملو علينا البلد بصورة ما عادية ، زمان من ما قمنا عارفينهم في الخرطوم وبالذات في الديم يعني عند (الديامة حطب القيامة) ، الآن أصبح تواجدهم في كل مكان بالعاصمة ، وفي أم درمان حدّث ولا حرج ، خد مثلاً في بيتنا عندما رجعت من السفر ، أعرف أن عندنا ثلاثة نسوان بالبيت أختي و زوجتي أخواني الاثنين ، تفاجأت برابعة أخرى ، فركت عيني مرة وإثنين وثلاثة دي منو الرابعة دي ، يمكن واحد من أخواني دبل في مرتو؟ طيب على الأقل بسكنها في بيت تاني ، يمكن مرة الجيران ، لكن البجيبا في وكت زي دا شنو (الساعة الخامسة صباحاً) ، المهم قدر ما وديت الموضوع يمين وشمال مانفع طبعاً الشمار كتلني ، وقمت سألت ليك الجماعة ، يا خوانا دي منو دي ، قالوا لي دي ما الشغالة بتاعتنا وأردفوها بكلمة حبشية. أها في بيتنا حبشية إذن ؟ حكمة الله . أنا : بس قبل كدة ما ونستونا بيها حتى في التلفون ما أديتونا الشمار دا باقي اختي بتفيدنا بالأخبار أول بأول سوى برسائل أو مس كولات وما تبقصر أبداً أبداً الجماعة : لا .. طبعاً دي ما حاجة عادية. أنا : لا ماعادية.. زمان كان عندكم شغالات محليين يعني من البلد أسى بقيتوا تستوردوهم؟ بعد كدة اصبح منظرها مألوفاً لدي بالمنزل والظاهر عليها وارد أديس أبابا جديد (كرت كرتوت) لأنها ما بتعرف كلمة واحدة بالعربي ... بس ابتسامة وترد بالإيجاب كل شي ترد بالإيجاب مع ابتسامة ، بعد كدة وبعد زياراتي للأهل والجيران والمناسبات الإجتماعية المختلفة ، لقيت ليك قصة الحبش دي منتشرة انتشار النار في الهشيم .الظاهر عشان أبو الرخا وكدة ، فقد عرفت أن الرواتب الشهرية لهن خاصة للجديد وارد بلدو ولسه ما اتعلم عربي ما بين 200 إلى 250 ألف جنية ، وبعد أن يتعلمن اللغة العربية بيرتفع سعرهن ويذهبن للخرطوم مدن العمارات والطائف والمعمورة حيث الأجور المرتفعة، يعني بجو عندنا في ام درمان يعملوا كورسات اللغة العربية وكيفية التعامل مع السودانيين ودراسة سلوكياتهم بعد كدة بمشوا للجماعة اصحاب المصارين البيض والأجور المرتفعة. ياخي أي بيت خشيتو ليك لقيت ليك فيه حبشية وبعد مرات حبشتين أو ثلاثة وفي المناسبات الإجتماعية تحرص ربة المنزل أن تأخذ معها الشغالة بتاعتها ، لييييه ما عارف ..!؟ يمكن عشان تعمل (أحمد مظهر) للجماعة رغم أننا قلنا أن تلك الظاهرة صارت متفشية في معظم البيوتات حتى اصحاب الدخل المتوسط والعادي . من الأشياء التي لفتت نظري ، أنه الشغالات لمن تحصل مناسبة اجتماعية (فرح ، كره) بتلموا كلهم مع بعض ويعملوا شلة ويتبادلوا الأخبار والونسة وإمكن الشمارات كمان. الملاحظة الأخرى أن كل هؤلاء الشغالات صغار وصغار جداً في أعمارهن يعني لم يتخطين العقد الثاني من العمر (نظام ركشات وكدة) وأغلبهن جميلات وفي ساعة الفراغ يقضين وقتهن في الاعتناء بنفسهن من تسريح ومراجعة اللبس وطلاء الأظافر وغيره ، وأغلبهن جميلات (إلا الشغالة معانا بالبيت دي ) ما عارف جابوها من وين ، ياخي دي تقطع الخميرة من البيت ، لكنها والنصيحة لله نشيطة وشغيله يعني من تقوم من الصباح لا يهدأ لها بال حتى المساء ، نظافة الحيشان والغرف وغسيل الملابس ومسح المشمعات والسيراميك والبلاط والكلام دا ، باستثناء الطبخ ليس لها أي علاقة بالمطبخ إطلاقاً ، تعمل كل ذلك وليس في فمها سوى الإبتسامة والرد بالإيجاب ، لكن سماحة نهيي – سألت الجماعة لييه جايبها (شانكنري)كدة ما تشوفوا ليكم حاجة ترد الروح ، قالوا لي بالعكس نحن دي كدة كويسة معاناً جداً جداً. هههه وأنا مسافر أردت إكرامها نقدياً ولكن الجماعة قالوا لي دي مابتعرف القروش ولا توديهم وين ، قلت ليهم وراتبها ، قالوا أن هناك متعهدة حبشة كبيرة (الظاهر دي السينير بتاعهم ) بتجي كل أول شهر تقبض الراتب بتاع الشغالات ، ولو الشغالة مريضة أو هناك إجازة عيد عندنا أو عيد عندهم بتجي تاخدهم وترجعهم تاني ، المهم الجماعة قطعوا نصيبها ورزقها. هذه قصة الحبشيات العاملات بالمنازل ويمكن هناك العديد من الأسرار والأشياء الأخرى الخافية علي ، ولكن لقصر فترة الإجازة لم ألم بأكثر من ذلك. نواصل ...
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
كنت ماشي كويس لحدي قبل هنا..
Quote: " الحبوش أو الأحباش ناس تلهاسي ديل ياخي ملو علينا البلد بصورة ما عادية ، زمان من ما قمنا عارفينهم في الخرطوم وبالذات في الديم يعني عند (الديامة حطب القيامة) ، الآن أصبح تواجدهم في كل مكان بالعاصمة ، وفي أم درمان حدّث ولا حرج ، خد مثلاً في بيتنا عندما رجعت من السفر ، أعرف أن عندنا ثلاثة نسوان بالبيت أختي و زوجتي أخواني الاثنين ، تفاجأت برابعة أخرى ، فركت عيني مرة وإثنين وثلاثة دي منو الرابعة دي ، يمكن واحد من أخواني دبل في مرتو؟ طيب على الأقل بسكنها في بيت تاني ، يمكن مرة الجيران ، لكن البجيبا في وكت زي دا شنو (الساعة الخامسة صباحاً) ، المهم قدر ما وديت الموضوع يمين وشمال مانفع طبعاً الشمار كتلني ، وقمت سألت ليك الجماعة ، يا خوانا دي منو دي ، قالوا لي دي ما الشغالة بتاعتنا وأردفوها بكلمة حبشية. أها في بيتنا حبشية إذن ؟ حكمة الله . أنا : بس قبل كدة ما ونستونا بيها حتى في التلفون ما أديتونا الشمار دا باقي اختي بتفيدنا بالأخبار أول بأول سوى برسائل أو مس كولات وما تبقصر أبداً أبداً الجماعة : لا .. طبعاً دي ما حاجة عادية. أنا : لا ماعادية.. زمان كان عندكم شغالات محليين يعني من البلد أسى بقيتوا تستوردوهم؟ بعد كدة اصبح منظرها مألوفاً لدي بالمنزل والظاهر عليها وارد أديس أبابا جديد (كرت كرتوت) لأنها ما بتعرف كلمة واحدة بالعربي ... بس ابتسامة وترد بالإيجاب كل شي ترد بالإيجاب مع ابتسامة ، بعد كدة وبعد زياراتي للأهل والجيران والمناسبات الإجتماعية المختلفة ، لقيت ليك قصة الحبش دي منتشرة انتشار النار في الهشيم .الظاهر عشان أبو الرخا وكدة ، فقد عرفت أن الرواتب الشهرية لهن خاصة للجديد وارد بلدو ولسه ما اتعلم عربي ما بين 200 إلى 250 ألف جنية ، وبعد أن يتعلمن اللغة العربية بيرتفع سعرهن ويذهبن للخرطوم مدن العمارات والطائف والمعمورة حيث الأجور المرتفعة، يعني بجو عندنا في ام درمان يعملوا كورسات اللغة العربية وكيفية التعامل مع السودانيين ودراسة سلوكياتهم بعد كدة بمشوا للجماعة اصحاب المصارين البيض والأجور المرتفعة. ياخي أي بيت خشيتو ليك لقيت ليك فيه حبشية وبعد مرات حبشتين أو ثلاثة وفي المناسبات الإجتماعية تحرص ربة المنزل أن تأخذ معها الشغالة بتاعتها ، لييييه ما عارف ..!؟ يمكن عشان تعمل (أحمد مظهر) للجماعة رغم أننا قلنا أن تلك الظاهرة صارت متفشية في معظم البيوتات حتى اصحاب الدخل المتوسط والعادي . من الأشياء التي لفتت نظري ، أنه الشغالات لمن تحصل مناسبة اجتماعية (فرح ، كره) بتلموا كلهم مع بعض ويعملوا شلة ويتبادلوا الأخبار والونسة وإمكن الشمارات كمان. الملاحظة الأخرى أن كل هؤلاء الشغالات صغار وصغار جداً في أعمارهن يعني لم يتخطين العقد الثاني من العمر (نظام ركشات وكدة) وأغلبهن جميلات وفي ساعة الفراغ يقضين وقتهن في الاعتناء بنفسهن من تسريح ومراجعة اللبس وطلاء الأظافر وغيره ، وأغلبهن جميلات (إلا الشغالة معانا بالبيت دي ) ما عارف جابوها من وين ، ياخي دي تقطع الخميرة من البيت ، لكنها والنصيحة لله نشيطة وشغيله يعني من تقوم من الصباح لا يهدأ لها بال حتى المساء ، نظافة الحيشان والغرف وغسيل الملابس ومسح المشمعات والسيراميك والبلاط والكلام دا ، باستثناء الطبخ ليس لها أي علاقة بالمطبخ إطلاقاً ، تعمل كل ذلك وليس في فمها سوى الإبتسامة والرد بالإيجاب ، لكن سماحة نهيي – سألت الجماعة لييه جايبها (شانكنري)كدة ما تشوفوا ليكم حاجة ترد الروح ، قالوا لي بالعكس نحن دي كدة كويسة معاناً جداً جداً. هههه وأنا مسافر أردت إكرامها نقدياً ولكن الجماعة قالوا لي دي مابتعرف القروش ولا توديهم وين ، قلت ليهم وراتبها ، قالوا أن هناك متعهدة حبشة كبيرة (الظاهر دي السينير بتاعهم ) بتجي كل أول شهر تقبض الراتب بتاع الشغالات ، ولو الشغالة مريضة أو هناك إجازة عيد عندنا أو عيد عندهم بتجي تاخدهم وترجعهم تاني ، المهم الجماعة قطعوا نصيبها ورزقها. هذه قصة الحبشيات العاملات بالمنازل ويمكن هناك العديد من الأسرار والأشياء الأخرى الخافية علي ، ولكن لقصر فترة الإجازة لم ألم بأكثر من ذلك. نواصل ..." |
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: عمر سعد)
|
أخونا عمر سعد سلامات كيفك يا خي إن شاء الله تكون كويس
Quote: ده المخوفنا زاتو من لاجازات |
لا يا معلم ما تخاف
Quote: مش كان تجى بى هنا احسن ليك |
الإجازة الجاية وبعدين صاحبك سعادة المستشار ذاتو كان بي هناك ...؟؟
Quote: رانى ياو لد ابعد من ولدنا ده واعمل شخيت اجيك ناطى فى كندا اعمل ليك فيها طارق المكى |
؟؟؟؟؟؟؟؟؟
Quote: ابو الجزل ناس الحله كيف كويسين |
والله في أمانة الله قابلت أغلبهم وناس رندة وقاسم بسلموا عليك ولمحت اسامة سعد في عرس بتاع العمراب (ناس عبيد إبراهيم) ومعاه براد وكاروري متقاودين.
Quote: من ديمترى لى ويلكى |
علي النعمة الجملة دي ألذ ما في المداخلة يا مان ياخي فقعت مرارتي من الضحك .. أسي الجماعة الفي البورد ديل كلهم علي النعمة ما يفهمو ليك السؤال دا...؟
Quote: وكيف محمد اخونا الكبير |
في أمان الله عمر تحياتي وشكري على المرور
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: yasir Abdelgadir)
|
أخي الدكتور/ ياسر عبد القادر
Quote: اللخو
دخلنا البوست دا قايلين القبة تحتها فكي...
وكتبنا ليك مداخلة فوق مجاملة ساكت كدي لي وجه الله
,وقت ما رديت عليها
مسحناها وكتبنا واحدة تانية قلنا ماخسارة فيك الزمن الغالي دا
وكت مارديت عليها,,,,قت الزول دا خبارو ؟؟؟ مالو مابيرد
الا بعد شفت صوانيك دي ...
عذرتك تب
واتحسرت علي دقايقي الراحت في كتابة المداخلة
ودعتك الله |
لك العتبى حتى ترضى لم نقصد ذلك وتلك ليست شيمنا نرجو أن توجد لنا العذر مع الصواني اللافة دي عزيز مودتي أبو الجزل
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
نخش على المغتربين بالتأكيد الكثير من المتداخلين والمارين والمتابعين لهذا البوست يتوقعون أنني قد عانيت الأمرين في جهاز المغتربين (اسم الدلع ) ليه جهاز شئون السودانيين العاملين بالخارج الحقيقة أن ما حدث عكس ذلك تماماً فيبدوا أن شعارهم الجديد الدفع في سرعة وصمت ، فقد ذهبت للجهاز في يوم الأربعاء قبل آخر يوم دوام في رمضان (الخميس) فقلت أحسن أخلص أوراقي الآن لأنه بعد العيد الناس كلها بتجي تعمل إجراءاتها والزحمة بتكون ألف - خاصة ناس الولايات الخارجية بيجوا يعملوا (الزحمة) والناس كلها راجعة لأن المدارس في الخليج تفتح بعد العيد بأسبوع. المهم توكلت على الحي الدائم وتحركت من بيتنا في الموردة الساعة 12:35 ظهراً وصلت المغتربين عند الواحدة ظهراً تماماً عشان ما يجي واحد ناطي يقول لي من امدرمان للمغتربين في 25 دقيقة بس أوضح ليكم خط سيري بعربة خاصة (ًمشيت بي شارع الغابة وسك العملة مروراً بالإمدادات البيطرية ونمرة اثنين وشارع واحد العمارات وبعد كدة سيدا للجهاز) وصلت لقيت صلاة الظهر وقتها قد حان والمكاتب فاضية والغربية الجماعة البرة البيبيعو استمارات إجراءات التأشيرة موجودين (بنات) قلت في سري ما بصلن مالن لكني استدركت بعدها وقلت يمكن يكونن معزورات - الله أعلم المهم دفعت ليهم واحد وخمسين ألف تقريباً رسوم استمارات تأشيرتين لي وللمدام ، انتظرنا ومشينا الشبابيك وذلك عند الواحدة والنصف ظهراً بدينا الإجراءات ،وقلنا نشوف الحكومة عايزة مننا كم مافي شيء؟. لقيت علي 450 ريال ضرائب قديمة متراكمة وبدون مقدمات قالو لي ادفع 200 ريال أو ما يعادلها بالسوداني (عملة صعبة أو محلية) والباقي خليه المرة الجاية ، قلنا ما في مشكلة بعد كدة قالوا في رسوم خدمات عليك يا معلم لفترة 4 سنين - أدفع رسوم سنتين ونأجل ليك سنتين ، وهي مبلع 65 ألف للسنة الواحدة - وفي رسوم تانية بتاعة تأشيرة ما عارفها كم الزامية خارج السن القانونية الزكاة أقل من النصاب المهم الشغلة كلها قفلت ليها قريب الخمسمائة ألف جنية 500.000 جنية دفعناها مرغمين من أجل نيل صك الإفراج من البلد كل هذا لم يستغرق عندي ال 25 خمسة وعشرين دقيقة يعني عند الساعة الثانية إلا خمسةدقائق كنت خارج المبنى عزيت السرعة للآتي : - التوقيت - يمكن أنني كنت موفق في التوقيت الذي اخترته (اليوم - الساعة) - عدم مروري عبر الإلزامية والذي ياخذ الكثير من الوقت والجهد والمال أيضاً، خاصة وأن الدنيا رمضان - عدم مروري عبر الزكاة والتي لها وقتها أيضاً
ملحوظة : لم تكن معي فكة فاعطيت أحدهم القروش على أن يرد لي الباقي فقال بالصوت العالي وبدون ان يستحي كدة الواحد عيد (طلع حق العيد) ، لكني وقفت ليه ألف أحمر وشلت قروشي على داير المليم ، لأنني أعتبرت أن هذه أنانية وانتهازية وأنا لم أعطه بصورة مباشرة أو بحسن نية إنماحاول هو أن يكووش على الباقي بطريقة مستفزة وغير جميلة. وبعدين الدنيا رمضان عموماً هذه تجربتي بالمغتربين وأحسب أن كل من جاء في ذلك اليوم لم يجد كبير عناء في تخليص إجراءات منحه صك الإفراج الذي اسم دلعه (تأِشيرة خروج) تحياتي
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
Quote: كنت اجوب في أزقتهاوأتأمل في ناسها واتذكر الماضي ، ويصيبني الضجر والملل عندما اتذكر أنني راجع مرة أخرى لديار الغربة .... خليط متناقض من المشاعر تجتاح دواخلي أأفرح أنا لأني حيث ولدت ونشأت وترعت وكبرت ودرست وتزوجت أم حزين لأنني سوف أفارق هذه الديار بعد أيام معدودة كان شعور غريب مختلط (مرة أضحك ومرة أبكي) ومرة أتحمل أساياومرة أهرب من نواحي ياخي أم درمان بين الحنايا وشعور جميل لا يوصف وحنين لماضي حلو ومستقبل زاهر بإذن الله يا الله .... ياجعفر لله درك يأ أم درمان والله عليك يا موردة |
ديدن المحبين الحُنان أخي خالد، فالشوق قتَّال والمحبة بائنة...
وهكذا دواليك، من أمدرمان لبقية الوطن الكبير...
متابعين بمحبة، فواصل واصل..
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
عوضية سمك ما شاء الله سبحانه الرازق عملت لافتة كبيرة للمحل فيلكس فيس الآن الشارع أمام المحل وأمام كبري أبو ريش يكاد يكون مغلق ويحتاج لبوليص حركة لتنظيم حركة السيارات على الشارع الرئيسي والمصفوفة على جانبي الطريق ، قبل سنتين في إجازتي كان محل تناول السمك راكوبة مسقوفة بمواد بلدية بسيطة والشراب من الزير والغسيل من ماسورة في ركن قصي دخلت العولمة الآن صارت الكراسي بلاستيكية فاخرة الماء البارد المثلج على مدار الساعة والمرواح ضاربة على الريسين وما شاء الله المباشرين مدورين في الزباين وعوضية شغالة(تش) في أمان الله ربنا يزيدها وكمان لاحظت أن كم بتاع سمك كدة فتح جنبها (عاوزين يتبركوا الظاهر) ويسترزقوا برزقها حضرت لها موقف قبل أربعةأعوام في نفس مكانها مع أحد الزباين ، الظاهر كان بياكل عندها بالجرورة ومرات يقول ليها المرة الجاية بديك ، أها يوم كدة لبدت ليه ، صاحبك أكل وغسل إيديه وعاوز (ينبرم) بدون ما يدفع كالعادة وطبعاً هي موقعها في المدخل بتاع المحل أها وهو جايي مارق (قبقبتو) من قميصو وقالت ليه يا راجل هي أديني حقي إنت كل مرة تاكل وتزوغ مني الليلة دي كان ما اديتني حقي ما بتمشي من هنا وهي رغم أنها معزورة (لها عرجة في رجلها) لكنها قوية وجامدة بالله الراجل ما قدر يفرفر ولا يتحرك ولا حتى يدلي بكلمة واحدة ، الأجاويد دخلو وحاولوا يحروروه من قبضتها لكنها أبداً ظلت ماسكاه بي يد واليد التانية تضرب بيها وهو لا حول له ولا قوة ، لمن ربك رب الخير يسر له احد الأشخاص يبدو أن له مكانة عند عوضية فتحرر من قبضتها أخيراً ووعدها بتسديد كل ما عليه وانفض السامر. نعود
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: نجاة محمد بابكر)
|
أختي نجاة سلامات وطابت أوقاتك
Quote: عليك الله انت حسع جاى من السعودية عشان تمشى قندهار وتاكل لحمة الجوع ليك شنو |
استاذة نجاة أشكرك أولاً على المرور باعتبارك أول (واحدة) تمر علينا وتشرفنا أما موضوع قندهار حقيقة جاء كدة عزومة من الشباب لشخصي الضعيف وأخونا ابراهيم علي فرح وأخونا علي وكلنا نعمل بالسعودية وتم اخبارنا به قبل يوم من مواعيده يعني لم يكن في برنامجي من البداية لكنه جاء في جرح برضو وإنتي عارفة ناس السودان كريمين كيف وبعدين بين وبينك الجوع حاصل فعلاً ياخي لحمة السودان دي زيها مافي اللحوم هنا ما مضمونة خالص خالص لكن دا طازج ومضبوح اليوم عشان كدة بتاكل وإنت متطمن موش مجمد ليه كم يوم ومن ياتو بلد جايي ما تعرفه وبعدين أقول ليك حاجة أنا بعدها كنت مسافر تاني يوم وفي حاجات كتيرة ناقصة لم اشتريها تتصوري أي حاجة افكر فيها يجي ليك بائع متجول شايلها مثلاً كنت اتمنى اغتناء شريط كاسيت لابن البادية اسمه (انساك) إلا ويجي واحد لازي درداقة وفيها كمية من الأشرطة ومسجل يلعلع بي صوت عالي وعنده كل الأشرطة لكل الفنانين كنت اريد أيضاً طاقية حمراء مشغولة باليد وارد غربنا الحبيب إلا ويجي ليك واحد ببيع الطواقي بشتى الاشكال والألوان فوجدت مبتغاي عنده بدأ سعر الطاقية بي 30 جنية في الآخر رست على 10 جنية احد الحضور كان يريد شراء سكينة استعداداً للضحية فإذا ببائع السكاكين يمر برضو يعني الجاجة البتفكري فيها بتلقيها ، بتاع السكاكين قال السكين بي 70 ريال ، في الآخر اشتريناها منه ب 30 جنية ، وهذه أمثل فقط لكن كل شيء موجود قندهار دي عالم برااااااه
هاك اللحمة دي
Quote: انت قندهار دى بمشوها النسوان |
طبعاً بمشوها النسوان وأسألي ناس إنعام حيمورة ديل مقددنها وشوف عيني يوم مشيت هناك دا شاهدت اسر بكاملها جاية نسوان وشفع وبنات ورجال كووولهم جايين ونزلو في إحدى المحلات استعداداً للسفسفة طبعاً دا غير طلبة الجامعة والمجكسين وزملاء المكاتب (زملاء وزميلات) يعني لو عاوزة تمشي تروحي مطمنة تحياتي وشكري على المرور وأرجو أن اكون قد اجبت على تساؤلاتك جزل
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
طالبة جامعية (جامعة الخرطوم) بيتنا يقع على بعد مسافة من الظلط الرئيسي ، يعني الواحد لمن ينزل في شارع الظلط عشان يدخل لي جوه بيشيل هم، خاصة من هم كبار في السن من الرجال والنساء والأطفال لذلك تجد أن بعض اصحاب الركشات (يلبدون) في الظلط اصطياداً للزباين ، وبعض أصحاب العربات الخاصة يأخذون معهم من يجدونهم في طريقهم إلى الداخل خاصة منطقة الخور (خور أبو عنجة) في النهار المشمس أو في الليل البهيم المخيف ، المهم ، كنت عائداً من أحدى المشاوير ومن الظلط داخل على الحلة وجدت إحداهن وأشرت لها إن كان داخلة للحلة (حقيقة لم استبين من هي ولا أميز من يكون الراكب عادة كل من في الطريق نوصله) فربما تكون جارة أو زائرة للجيران أو الأهل فنحن بطول التواجد خارج البلد أصبحنا لا نعرف العديد من الناس (خاصة البنات لانهن يكبرن بسرعة) المهم أشارت لي بالتوقف ، وقفت على بعد مسافة منها ، أتت وبدون مقدمات ارتمت على المقعد الأمامي بعد أن أخدت نفس عميق وكأن بها أتت من (حر لظي) إلى برودة (المحيط الشمالي) جلست بجواري دار بيننا الحوار التالي :- انا : (ببراءة) داخلة الحلة. هي : الحلة ياتا؟. أنا : حلتنا أصلو أنا راجع البيت وقلت أوصلك في طريقي ودي عادتنا هنا بنوصل كل من نجده في طريقنا. هي: أنا ماشا بيت صاحبتي ساكنة العباسية أصلها راجياني أنا وصاحباتنا اثنين تاني بنذاكر مع بعض عشان عندنا امتحانات الاسبوع الجاي . أنا: يعني إنتي طالبة. هي: أيوة. أنا : وين. هي : جامعة الخرطوم وأرتني الدفاتر الخاصة بها دون أن أطلب منها ذلك. أنا : خلاص بقدمك معاي. هي : لا خلاص ما دام وقفت توصلني، أنا كنت شايله هم المسافة البعيدة دي كلها أمشيها كيف. أنا : سمح ما عندك مشكلة. هي : بدت تحكي وتاني ما سكتت أنا أسمي (ي) ساكنة (......) وجايه لي صاحبتي وحقيقة بتسآءب كتير كدة ما عشان كنت بذاكر ، لكن كنت مساهرة مع .(خ) جارتنا أصلو امبارح بالليل بعد الساعة عشرة نادتني قالت لي راجلي متأخر برة عليك الله تعالي أقعدي معاي لحدي ما يجي ، مشيت ليها شلت معاي كتبي لكن ما قدرت اقرأ ، عملت لي شربات وبعد داك جابت الشاي وختت القهوة في النار، وجهزت العشاء لي راجلا .. وغتتو... واتمسحت... وبعد كدة قامت جهزت حفرة الدخان حقتها ، وقعدت أخدت ليها بوخه ...وبعد داك الظاهر الحفرة سخت قامت اخدت ليها استراحة وقامت على الحفرة تاني ،وبعد داك قامت واتمسحت تاني وسرحت وولعت البخور والساعة جات اثنين صباحاً وأنا لسه قاعدة معاها ، بعد داك سمعت لي حركة وشعرت أنه زوجها وصل .وبعد كدة قلت ليها أنا ماشة عشان بكرة لازم اصحى بدري عندي مواعيد ومذاكرة مع صاحباتي. وقمت رجعت البيت ، صحيت الصباح ، وأنا جايه على هنا غشيتا بالبيت ....... نتابع
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: أيمن دياب)
|
الجزء الثاني من حكاية الطالبة الجامعية لقيت ليك البيت دا يلمع وهي صحت من الصباح (نشاط شديد) قامت غسلت هدوما ونظفت البيت وغسلت العدة بتاعت العشاء ديك وغسلت هدوما للشملة الإدخنت بيها شرتا ، وغسلت هدوم الراجل لا مؤاخذة حتى (النكس) هكذا قالتها بتاعو شاراهو في الحبل ، وقشت الحوش وسوت الفطور وفطرت الراجل ولقيتو مشى ، المرة دي نشيطة نشاط ما عادي ، قلت ليها يا (خ) إنت بعد السهر السهرناه داك (وإنتي طبعاً سهرتي بعده تاني) ، قمتي من الصباح وغسلتي ونظفتي وفطرتي الراجل وغيرتي هدومك والله إنتي نشيطة خلا ص بي صراحة دي لو أنا ما بقدر أعمل العملتيه إنتي. ردت علي بي ضحكة. المهم الراجل انبسطت ونام مرتاح والصباح صحا ومشى لي مرتو التانية . أنا : هنا تدخلت أنا بالحديث قلت ليها يعني هي المرة الثانية وهو معرس قبل كدة؟. هي : أيوة أنا : عشان كدة طيب الإهتمام والنشاط دا. هي : والله حاجة عجيبة أقول ليك شي تاني أنا الصباح وأنا طالعة أبوي قال لي ماشا وين إنتي لبستي كدة وعاملة الأحمر في قدومك دا كدة، قلت ليه إنت مالك كمان الوداك تعاين لي الأحمر والأخضر العاملاهو أنا ، وفتحت الباب ومرقت. طوال الفترة التي تحدث فيها كنت (فاغراً فاهي) وحقيقة مستعجب جداً من الكلام البتقال لكني لم أشأ أن اقطع حبل سردها ، ولا أعرف ما الحكمة في سردها هذه القصة والمغزى المراد منها ، عندما وصلنا قرابة المكان المعني. هي : خلاص وصلنا تلفونك رقمه كم... أنا : حقيقة أنا تلفوني ما حافظ نمرتو وأنا نسيتو في الشاحن في البيت. هي: معقول في زول ما حافظ رقم تلفونو. أنا : أنا هي: يعني عاوز تقنعني بي كدة. أنا: أصلوا الحكاية أنو رقم جديد المعاي هي : خلاص فتحت شنطتها وأخرجت قلم وانتزعت ورقة من إحدى دفاترها المليء باللغة الإنلجليزي وكتبت لي رقمها (002490000000000). أنا: عشان اتصل عليك؟. هي : أيوة عشان نتقابل بعدين. أنا: متين هي: الساعة 4 عصر أنا: ونمشي وين؟ هي: هييييييي يا الرجال... دي الحركات البتخلي الواحدة تخاف وما تركب عربات خاصة. أنا : ما تفهميني خطأ .. يعني الفهم شنو. هي: عشان تجي توصلني بيتنا. أنا : (بيتكم بي وين يا عينيا). هي: في ال..... أنا : الظاهر عليك إنتي مفتحة...! هي: وهي تغلق الباب برفق (للدين) وأعطتني ظهرها تمشي الهوينا ، وأنا أدى ربي العجب ، طيب أيه دخلي أنا بالمره وراجلا جيرانهم وحفرة الدخان الولعوها أنصاص الليالي ...والنكس الشروه الصباحية وهل وراء هذا الكلام كلام .... طبعاً أنا أخذت كل هذا على عواهنه ولم ألقي بالاً عليه . الشيء الأكيد أنني ما اتصلت عليها ولا أشتغلت بيها الشغلة ، لأن ما لمحت له هي من خلال سردها – هذا إذا كنت أنا صائباً في تحليلي – ليس له مكان من أهتماماتي ، ولكنها كانت تجربة خضتها ونموذج لأفكار ما يدور برؤس لطالبة تدرس في إحدى اعرق جامعاتنا السودانية. وإن كان مآخذ عليها فهو ما جاء باللون الأحمر في الصياغ عاليه . وقد لاحظت ما يلي :- - الجراءة في الطرح والأسلوب والمغزى من القصة - الجراءة في طلب رقم هاتفي. - النكس المشرور في الحبل لييه؟ - ردها بفظاظة على والدها عندما سألها عن أحمر الشفاة. - مفتحة للدين (حارة شوية) موش كدة ولا ما متفقين معاي.
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
سودانير مرة أخرى الخرطوم - جدة لأني خضت تجربة صعبة في سفري من جدة - الخرطوم ولأنه كان جدول سفريات العودة من الخرطوم - جدة ملخبط وتم تأجيل الكثير من السفريات ولأنني كنت حاجز يوم جمعة وأن المدارس تفتح ابوابها السبت وحتى لا أدخل في دوامة لا يحمد عقباها ، رأيت أن اعمل على تغيير موعد الحجز يوم الأربعاء أو الخميس قبل يوم أو اثنين حتى اتجنب المفاجات ولكن قبل أن أقوم بهذا الإجراء قابلت أحد المسئولين الكبار واستشرته في الأمر ، فطمأنني وقال لي لا تغير الحجز ، لأنه فعلاً كان في مشكلة لكنها اتحلت ودخلت الخدمة الطائرة التي كانت متعطلة وكانت السبب في هذه الربكة فاطمئن ولا تغير الحجز والطيارة قائمة في مواعيدها وفعلاً ظل الحجز كما هو وعملت الـ OK والغريبة وما أدخل الريبة والشك في نفسي أن الموظف بعد ما عمل لي RECONFIRMATION التأكيد قال لي خلي تفلونك مفتوح ، قلت ربك يكذب الشينة وحسب المواعيد مفروض الحضور الساعة الثانية ظهراً على أن تقلع الطائرة الخامسة وتصل جدة السادسة والنصف آها... يوم الخميس المساء اتصل علينا ناس الخطوط قالوا الطيارة تأجلت لي متين لي بكرة وبنتصل عليك نوريك المواعيد الجديدة ... يا الله مسعنا طيارة بتتأجل ساعة ساعتين أربعةساعات لكن يوم كامل .. دي ما أدونا ليها، وبعدين المدارس البتفتح السبت وتأكيد المسئول الكبير بأن الطيارة في مواعيدها .... كلها راحت شمار في مرقة عموماً اتصلوا علينا يوم الخميس المساء قالوا الطيارة الحضور المطار بكرة الساعة حداشر صباحاً الإقلاع الساعة اثنين ، مشينا المطار الساعة حداشر صباحاً الساعة أربعة قامت الطيارة وصلنا وصلنا على خمسةونصف في جدة لحدي ما جاء العفش وطلعنا كانت الساعة سبعة ونصف وصلنا البيت ثمانية وشوية مساء ، وخسرنا يوم السبت في المدارس ويوم الأحد كمان لأن وصلناتعبانين ويوم السبت كلو كنا في المطار .. وضاعت يومين من المداس والدوام كمان وآآآآآه يا سودانير.
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: خالد حامد الجزولي)
|
الاخ خالد تحية طيبة وحمد ا لله على السلامة يظهر انك طولت شوية من السودان قبل سفرتك الاخيرة ودة واضح من دهشتك لواقع الحال فى السودان وخصوصا الاخلاق الاتغيرت وانحطت (طالبة الجامعة والزول العايز ياخد باقى قروشك) وكمان برضو تراكم الضرائب والخدمات عليك كما ذكرت لدى بعض الملاحظات اود ذكرها
Quote: وضاعت يومين من المداس والدوام كمان وآآآآآه يا سودانير. |
سودانير ابدا ما غلطانة وعداها العيب مافى زول يقول ماعارفها سجمانة ورمدانة البوديك ليها شنو؟؟؟؟ الخيارات كانت متوفرة (ناس , سما , السعودية , الوفير , صن اير , البحرينية , الخليج ... الخ) ما فى حاجة اسمها ناقل وطنى , دى شركة يمتلك معظمها مجموعة عارف الكويتية وعلى سجمها ميلوا بختها زيادة اتكلمت عن الطيارة فى الذهاب وفقط قلت انها صغيرة بس مؤكد عندها اسم ( ايربص , بوينج , ام دى امبراير , فالكون , فوكرز) وغالبا كتيب السلامة بيكون مكتوب فيه نوع الطيارة ما عندنا حاجة نقولها فى السمك واللحوم بالهناء والشفاء ودايما عامرين بالاهل والاصدقاء
| |
|
|
|
|
|
|
Re: عدت من السودان. تجارب ومواقف. سودانير.رجل مرور. طالبة جامعية. قندهار.عوضية.المغتربين (صور) (Re: احمد التجانى احمد)
|
أخي احمد التيجاني سلامات
Quote: سودانير ابدا ما غلطانة وعداها العيب مافى زول يقول ماعارفها سجمانة ورمدانة البوديك ليها شنو؟؟؟؟ |
أولادي سافروا بيها عشان كدة كان لازم أسافر بيها عشان عملت حجز العودة معهم على أساس أنه نرجع مع بعض والأولاد ما يجهجهوا المره وح تقول لي الأولاد ذاتهم إنت قاطع ليهم بالسودانية لييه أقول ليك وبالصوت العالي الوزن الوزن الوززززززن
Quote: اتكلمت عن الطيارة فى الذهاب وفقط قلت انها صغيرة بس مؤكد عندها اسم ( ايربص , بوينج , ام دى امبراير , فالكون , فوكرز) |
هي طائرات صغيرة حمولة 120 راكب تملكها شركة طيران محلية اسمها مارسيلاند
تحياتي وشكري على المرور
| |
|
|
|
|
|
|
|