|
|
 بالبلدى يا جماعة كدى اسمعونى مرة .... سياسيين وإقتصاديين ومفكرين وشعب
|
*******
بسم الله الرحمن الرحيم
نبدأ
نضع الكرة ارضا ولا أقول ليكم حاجة خليها وطاة ،،،، اللعب بنزاهة وقبل ذلك بأخوة صادقة ،،، السودان دا مش بلد كبيرة (نعم وانا ما جيت بحاجة جديدة ) ، شماله فيه الأراضى الزراعية والمياة ، وجنوبه فيه البترول والغابات ... لحدى هنا الكلام مش حلو؟؟ حلو جدا !!
هذا فى حالة استخدامنا وإستغلالنا لمواردنا بصورة سليمة ورشيدة وبدون فساد مالى ولا إدارى سنتخطى تنمويا كافة اقطار افريقيا فى زمن وجيز ،،، اليوم كل الناس تضحك على حالنا ،،، مشكلتنا دى داخل البيت الواحد حلها ساهل لو تركنا الأنانية والتكابر على بعض
فى الإتحاد الأوربى دا ... الزول البيرتكب حماقة ويسئ ليهو شخص على اساسى عنصرى أو عرقى قيامة سجنو بتقوم .... والقانون قوى لا فيهو دا عمو قاضى ولا حبوبتو وزيرة المالية ولا جدو الرئيس .... القانون دا القانون وبس ... عندنا هنا فى الصين الفساد المالى يعنى الموت ...لهذا السبب النظام المالى فى الصين معقد وقانونو مُر لانو بجيب الأجل والسبب هو معرفة المشرعين بضعف النفس البشرية عشان كدا الدولار الواحد الورق العاملنو ليهو والفايلات الخاصة بهذا الدولار فى بعض الأحيان تفوق قيمتو قيمة الدولار نفسو
طيب الإتحاد الأوربى شنو اللخلا الساسة يتوحدو ....لانهم عرفو مصلحتهم وين ... وبعدين كلام انا من القبيلة الفلانية وداك من القبيلة الفلانية عشان كدا انا احسن منو ....دا بقى كلام ناس متخلفين أكل الدهر عليهم وشرب ،،، نعم متخلفين ،،، اليوم الحقائق تركز على العلم (أوباما) والدين بتاعنا نحنا يقول فى حديث الرسول (( من أبطأ به عمله ، لم يسرع به نسبه )) – ( وكلكم شفتو صاحب شركة مايكرو سوفت قال اولادو يجب ان يشقو طريقهم لوحدهم وتبرع بثروته لصالح موسسة ميلندا فاونديشن
انتو مفتكرين انو امريكا دى البتعمل فيهو دا حبا فى اهلنا فى الجنوب ، لا لا ، فى شغل كتير حيتم ، المنقة السايبة والخشب السايب
والبترول والشركات الهسى اشترو معداتم عشان يبنو بالغالى وحاجات كتيرة الجوة الأرض دى الناس ناوية ليها ،،، طيب يبقى شنو
يبقى يا جماعة نخط الرحمن فى قلبنا (زى ما بتقول الحبوبات ) وخير السودان دا كتير بس داير إدارة علمية وعملية وقانون قوى ونظام معقد عشان ما تكون فيهو خُرم عشان الناس البتلعب ما تتمكن تشوف بيهو ، نظام إدارى معقد ما تعرف تجيهو من وين ، قانون لما تحاول تلعب بتكون يدك فوق راسك عشان كع ما تضربك وأكيد حتضربك قبل ما تعلب.
تأمين الغذاء يا جماعة هسى العربات الداخلة فى الحرب دى كان عند ناس الحكومة ولا عند الحركات يعنى لو جبناها تركترات وخلينا خلق الله دى تزرع يعنى حنجوع يوم من الأيام ؟؟ طبعا لا ، تبقى الدولة تحتاج تخلى المزارعين ديل يدهم مطلوقة يعنى يزرعو مشاريع حكومية لتأمين الغذاء لكافة الشعب ،، والبترول موجود ، استهلاك محلى للزراعة اما ا لمعادن وغيرها تذهب للخزينة ،،، الجبايات معروف عنها عندما تكون عالية ستوقف الإنتاج نفسه .
طيب لما تشعر بأن القطار ماشى من الجزيرة شايل الخير دا كلو وموديهو الجنوب وجايب من الجنوب اى حاجة تمشى الميناء عشان تتصدر منو تانى البكون أقوى مننا ،،،،، نحنا شعب قليل ،،، يعنى سكان مدينة بكين مرتين يعادلو سكان السودان كلو ،، مع انو ارضنا تعادل ربع مساحة الصين بكاملها ..
ولما تركب القطر وتمشى الجنوب والسياحة تدور والبترول يدور والزراعة تدور ومحاربة الجريمة وقطاع الطرق تدور ،،، والناس متوحدة فى قرارها ،،متوحدة فى كلمتها ،،، متآخين ، متحابين ،،، يعنى مفتكرين دى ما ممكن تبقى ،،،، هسى الناس لو اعتذرت لبعض وتنازلت لبعض وتساوت امام القانون العام للدولة والدستور تضمن محاربة العنصرية والقبلية بقوة وبدون تلاعب ،،، تانى بتكون فى عوجة ،،،،
الناس فى السودان التقول ضارباهم عين ،،، ذى ما بقولو شيابنا زمان ،،، الوحدة هى الحل الوحيد عشان نستفيد من حاجة اسمها الندرة النسبية ، عشان نتكامل ، عشان نكون اقوياء ، دول اتحدت نحنا شعب غالبنا نتحد ،،،، العلم العلم العلم ،،، هو اساس التقدم والتطور على مستوى الأفراد والدول ،،،، زول كفاءة أحسن يكون قدام عشان البلد تمشى ، زول ما عندو كفاءة ما يحجز طربيزة غلط لانو حيوقف الشغل ،،، الناس دى مفتكرة الشعوب تقدمت كيف ؟؟؟ الطرابيز الصح هى الودت الناس لقدام ،،، اى ترس محلوج حيوقف الشغل التروس لازم تكون سنينة والزيت لازم يكون جديد عشان تقدر تدخل ميدان السباق ، مكنة قديمة وعمرها الأفتراضى انتهى تتخارج تدخل الخدمة مكنة جديدة ،،، ولازم يكون فى مصانع لمكنات جديدة (كل سلك الخدمة المدنية ).
المحسوبية والفساد وهشاشة القانون وركاكة السيستم اى النظام هى البتودى البلدان التوج ،،، الناس تنظف قلوبا ،،، تخط يدينا فى بعض بعد داك البلد بتقوم ليها قايمة ،،، فى فساد ،،، فى محسوبية ،،،، مافى قانون ،،،، ما فى تطوير للنظام الإدارى ،،،،يبقى الكلام عن التطور إستهلاك زمن بدون فائدة .
الشعوب تطورت ،،، تقدمت ،،، إرتقت بالعلم ،،، نحنا لسا فى أكتلو ،،،وأقبضو ،،، وداك قبيلتو فلانية وداك قبيلتو علانية ،،،، يا ناس مفروض الناس تكون قومية التوجة نظام القبيلة والبيت دا إطار ضيق ،،، وبينى وبينك ما إطار إنسان متطور ،،، اليوم الناس اخدت العالمية ،،،، يعنى ممكن لما تكون متعلم اى بلد تقبلك بس تبقى بعيد من السياسة ،،، لانو السياسة دى فى ناس طالعين لها وهم اصلا سياسيين ،،،، الرئيس الأمريكى ليه الشعب الأمريكى قبلو ،،،، لانو المؤسسية لا مجاملة فيها ،،،،
الناس تتعلم اولا ،،،، والناس البتنظر لبعضها بدونية دون إعتبار العلم تكون ناس متخلفة ،،، والبلد عايزة علم لانو فى إطار العلم اى شئ بيجى صاح ،،، العلم يعرفك بالقانون ،،، يعرفك الإقتصاد ،، يعرفك بماهية نفسك انتا ذاتك بتعادل شنو عند الناس المتعلمين ،، عشان ما تحصل (طنقعة حاصل فارغ )
يلا يا ناس المنبر نبدأ من هنا ،،،، وداعا للملاسنات ،،، مافى زول احسن من حد ،،،،إلا بالتقوى ،،،، وأنا أضيف لغير المسلمين إلا بالعلم ،،، يعنى متعلم احسن منى تتقدم الصف ،،، خبرتك احسن تتقدم ،،،، ما عندك خبرة ما تمسك محل ما محلك ولا ستوقف المكنة من الشغل وتدى فرصة للناس المعانا فى مضمار السباق يفوتونا .... ونكون على نفسها جنت براقش
بعدين زمن الرجالة بالمفهوم القديم داك ولى ،،،، هسى الزمن دا الناس عرفت كل شئ اى زول بتقول داير دواس ممكن يكون زيك وعادى يا ودرتو ... يا ودرك ... وتكونو انتو الإتنين الخسرانين ،،، يعنى كلام رجالة وانو تفوت ليك زول بالرجالة دى بقى لغة قديمة اى زول فى الزمن دا راجل ،،، والرجال مفترض تحترم بعضها ،،،، والقهر يورث الكراهية والبغضاء ،،، وليس اسلوبا لحلحلة المشاكل العالقة ،،، الناس دى تقعد فى الوطاة دى وبالرواقة الحكاية بتتحل ،،، يعنى شنباية أسد تمرقا من شنبو براحة ومعى حرورية الشغلانية يكون راضيا وما يقدر يقول أم بغم ،،، والكلمة الطيبة أحسن منها مافى يا جماعة ،،، عشان كدا ما نطلع كلام ساى ،،، الكلمة زى السهم إن مرقت تانى ما بترجع وبتجرح وجرحا علاجو صعب.
والسؤال المهم : عشان شنو تقتل أخوك ولا أخوك يقتلك ؟؟؟ يعنى نكون فى قتال طواااااااااااااااااالى لمتين ؟؟ وين كلام الرسول عليه الصلاة والسلام (( لا يؤمن أحدكم حتى يحب لأخيه ما يحب لنفسه )) ،،، أسمعو لا يؤمن نعم لا يؤمن ،،،، يعنى ايماننا يكون إيمان خارم بارم سااااااااااااى ما دام اى واحد جارى لأجل نفسو وما يهمو أخوه ،،،، وفى ناس يقول ليك لكن نحنا اخوان ،،،،طيب يبقى (( إنما المؤمنون إخوة )) ، طيب وعلاقتنا بالمسيحيين عشان ما يجينى واحد يقول لى انتو عرفناكم مسلمين ،،،، طيب علاقتنا بالمسيحيين فى الآية التالية :
ال تعالى: " لَتَجِدَنَّ أَشَدَّ النَّاسِ عَدَاوَةً لِلَّذِينَ آمَنُوا الْيَهُودَ وَالَّذِينَ أَشْرَكُوا وَلَتَجِدَنَّ أَقْرَبَهُمْ مَوَدَّةً لِلَّذِينَ آمَنُوا الَّذِينَ قَالُوا إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لَا يَسْتَكْبِرُونَ(82)وَإِذَا سَمِعُوا مَا أُنْزِلَ إِلَى الرَّسُولِ تَرَى أَعْيُنَهُمْ تَفِيضُ مِنَ الدَّمْعِ مِمَّا عَرَفُوا مِنَ الْحَقِّ يَقُولُونَ رَبَّنَا آمَنَّا فَاكْتُبْنَا مَعَ الشَّاهِدِينَ(83) وَمَا لَنَا لَا نُؤْمِنُ بِاللَّهِ وَمَا جَاءَنَا مِنَ الْحَقِّ وَنَطْمَعُ أَنْ يُدْخِلَنَا رَبُّنَا مَعَ الْقَوْمِ الصَّالِحِينَ(84)فَأَثَابَهُمُ اللَّهُ بِمَا قَالُوا جَنَّاتٍ تَجْرِي مِنْ تَحْتِهَا الْأَنْهَارُ خَالِدِينَ فِيهَا وَذَلِكَ جَزَاءُ الْمُحْسِنِينَ(85)وَالَّذِينَ كَفَرُوا وَكَذَّبُوا بِآيَاتِنَا أُولَئِكَ أَصْحَابُ الْجَحِيمِ(86) ".
يعنى اخواننا المسيحيين فى الجنوب اقرب ناس لينا ،،،، طيب لماذا نتقاتل ؟؟ احسن نتوحد عشان نمقلب العالم دا ،،،، نحنا بسمونا دول عالم تالت لا يفهم غير القتال وحب السياسة ،،، طيب ما احسن نستفيد من الدروس المجانية (الإتحاد الأوربى ) شوفو الإتحاد السوفيتى هسى تفكك عشان كدا السيدة ديك طلعت فى الكفر ،،، وتخبط على كيفا مافى زول بيقول ليها يدك فى راسك ....
كان الشايب فى الحلة عادة ما يجلس على البنبر فى ضل الضحى وقدحو مملح بملاح الروب والسمن فى إنتظار من يأكل معه وكان طبعه لا يقوى على الأكل لوحدة ،،، وان فطر اليوم يكون همه من يفطر معه غدا ،،،، وكان ينادى يا فلان حرم بكرة يا تجى تفطر معاى يا تجى تفطر معاى .... شفتو الخيارات دى كيف ،،،،؟؟؟ ناس زى ديل كيف تلقاهم ومتين ووين ؟؟
نأسف لإستخدام اللغة الدارجة لكنها لغة التفاهم على ادنى المستويات فهى إسلوب كلام الحبوبات ويفهمها الكل ، وهى المؤخوذ بها فى منهج التوعية المجتمعية فى جمهورية الصين الشعبية كأسلوب ناجح فى ايصال المعلومة وشرحها من خلال برامج الراديو ،،، ويبدو لى فى السودان كان لدينا نموذج مماثل وهو كلام الصباح كنصائح للأسر وكيفية إدارة الخلافات وشئون المنزل بصورة عامة
واى شخص ( هبشتو ) يعفى لينا يا جماعة الموت ما معروف .... والإنسان ما عارف محطتو وين وكيف ومتين .
ونأسف لعدم مراجعة الأخطاء الإملائية التى دخلت على اللغة الدارجة نفسها ،،، لان الكتابة تمت مباشرة وصورة عفوية
أخيرا حكمة اليوم : النفوس لو تطايبت القطية بتشيل عشرين ويمكن اكتر خليهو السودان الكبير دا وفيهو فقط اربعين مليون
******
|
|
  
|
|
|
|
الرشيد البصيلى
فيس بوك
تويتر
انستقرام
يوتيوب
بنتيريست