|
|
|
 فتحي ايوه لازم نعود نغني برغم إنو الحزن طول زي تقول ما ليهو آخر (Re: فتحي البحيري)
|
بحيري يا حبيب
ياخي من قلبي عقبالنا
اسمعوا معاي وطني
وشوف معاي الحاردلو
كتب الله له السلامة
ايوه لازم يا جميلة
نعود نغني
برغم إنو الحزن طول زي تقول ما ليهو آخر
و لا أول
ما الوجع مليان غناوي
و الحزن شايل حكاوي
و البلد حيرانة تسأل
ايه بيحصل
و ليه بيحصل
وحده وين هذا المسلسل
البلد صارت مفازة
و الفرح سافر اجازة
و البيوت يوماتي تبكي
و كل يوم لازم جنازة
و برضو لازم رغم هذا
يا جميلة نعود نغني
عشان طيور الريدة تسمع
و الزغاريد تاني ترجع
و الكلام الدابو لسع
في صدور بنوتنا يطلع
و يبقى مرجيحات و شفع
ايوه لازم يا جميلة
نعود نغني
و صوتنا يكبر
و ريشنا يغرز
و نبقى تاني
وطن محبة
و الحرب نديها دبه
و تاني نرجع لي وطّنا
و تاني نقدل في بلدنا
ما البلد حقتنا نحن
و نحن اولادها الغلابة
و هيه لينا الديمة يمه
و نحن ليها الديمة يابه
و نحن طالعين من جروفه
و نحن مارقين من ترابه
و كنا ديمه نغني ليها
و لسه ما زالت حبابه
هي البداية
و هي النهاية
و هي الدواية
و هي الكتابة
و هي الاغاني
اللسه جاية
و هي المسادير..و الربابة
آديك بلدنا
و ديله نحنا
و تاني جايين زي سحابة
عشان يعود سودانا تاني
و يبقى فردوس للتعابة
و يبقى حرية و صلابة
ايوه لازم يا جميلة
نعود نغني
برغم إنو الحزن طول
زي تقول ما ليهو آخر
و لا أول
يا جميلة
كل بداية
ليها في الآخر نهاية
و الظلام مهما طول ليه آخر
و ليه اول
| |
 
|
|
|
|
|
| |
فتحي البحيري
bunbun
bushra suleiman
فيس بوك
تويتر
انستقرام
يوتيوب
بنتيريست