عَلَى حيلك أقيف واكْسِر حَنَك خوف النَّزيف يا عَبْ وواجِه مِحْنَتكْ أَسْنِد قَفَاك الأَعْوج المَهْزوم نُخَبْ عَسْكَر وتٌجَّار حَرْبْ فُكَيا ورأسماليين وعُمَلا مُفَكِّرين وعَرَبْ أَسْنِد قَفاك المُرْ على الباقي الفَضَلْ مِن قُدرَتكْ وامْرُقْ براك عَبْ وانْفَلَتْ مِن قيدو مَغْبون بالمعارف والوعي وِسْع الوَطَن في طينو واتْرَفَّق رُطانتو الفُصْحى في ساقية رَعيْ النُوق رَفاقْتو وبَقَرو وَرْتابات نِعاجو وعاجو قُطْنو الأَشْيَب الشاخْ في الجَزيرة حُبوب شَبابو النازَّة سِمْسِم في القَضارِفْ، وبَهْجَة اللارِنْجا في رُوحو المُحِبَة النَبَقْ والحِلْبَة كونْسولتو الأَطِباء الجَنْزَبيل في بُنُّو واللالوب يِطَبِّب جِنٌّو يا فُسْتان عَرَوسو الكَرْكَدي الأَبْيض كَشَح فيضْ حِنِّو واتْرادَم رٌطَبْ رَاجِنو هَذي الأرض جَنّة تَعَجَّلت سٌكَّانا شوق لي مَكَانا نوقا وضانا أَعْجَزَن الصَحَارىَ مَسيرْ حُمُرْ وَبُطانَة عَبْ ونَقَزْ عَزيز فوقْ سَمْحو مال ومَكَانة بَلداً رامي خيرا بٌقَجْ هَشَابو وطَلْحو ، تُّفَاحو المَفَلْهَم في جَبَلْ مَرَّة وحَديدو الأَصْفَر المَنْهوبْ حُبوب في كل شبر من جسمو قوم يا عب نعب احلامنا في بحر الكتال المر نقيف في السهلة وقفة حر نتل من الوسخ ايديهو واختار الوطن يا عيشة يا سطرين نعي ح يقولو ليك نحقن دم الاجيال تعال ويشيلو من جينات ولادك عينة شان يكتشفو مصل مضاد لثوراتك ح يسوقو ليك أعيان قدام من خونة الأحلام ورا وقدام تواريخم عذاباتك ح يقولو ليك جيناك مجاودين في بلد وعلى الهدوم دم كم بنية وكم ولد جايين نسامح في القديم وعلى الوشوش بسمة لئيم في سرو نفس النظرة ليك هل في القصاص حق لي عبد؟ قوم أملا هذى القدرة طين واسأل جبل توتيل يلد صخرا رحيم شان نغفر الظلم القديم أو ننسى أجيال الجلد جلد الترك والانقليز الارناؤوط المصريين الأمريكان الروس سفارات العرب والأمرا فردا فرد وامسك مسكة السوط تلقى يد من جلدتك جلدوك عبيد يا عب عساكر ساسة رمتالة فهم وقوادة جرت العادة أن يتناسل القادة العبيد في بلدك اسباب القوادة وحدس ما حدس ح يجوك بكل طريق بسوقك تاني لي سوق النخاسة ويقولو ليك هي دي السياسة فكيف تقيف يا عب قصاد العالم الملكك تقول داير ملك ولو ملكوك حقك يعيشو شعوب بلادم كيف ؟! شكك؟ - يا عب تعقلن - لن - ما تزن ويهددوك بالقيد - عبيد في الإيد زمنكم كلو تخدموا فينا سيد ورا سيد وأسيادكم عبيد لينا فما جدوى النباح ما دام الرسن في إيدنا والطوق لي رؤوسكم جيد عبيد ومرقتو تنبحو في الشوارع مرة أطعمناكم الحرية في مرواد كحل للذاكرة تمرقو كل عيد ثورة وتشمو وترجو بي الأعياد كفاك يا عب قصص أمجاد هديك الثورة في صدر العمد نيشان وفي حلق الروادي بيان صباح الانقلاب يا عب صباح حرية الوطن الكبير أبو ريش في حوش الجيش ح يبنولك وهم في هاوية شان تنخم يحيكولك أمل في بكرة من خيط خيش ويقولولك تعال انجم ح يملولك هوا سروالك المقدود كراضم عيش فهل يفرق خراك وحلم ح يدوك أصبعك تبصم على موتك إذا اتحتم ويكتبو إسمك الأكرم شهيد شعب العبيد الأول الداقس وينادو بسمك في المنابر والمساجد والكنايس وح ينشدوك تحت العلم في كل ساحات المدارس ويقولو ليك الثورة منك وليك كفيت وارتحت يا فارس وبسمك يبدوا تاني الذل عشان يبقى الظلم دارس فقوم يا عب قوم قاوم وساخة القادة في بلدك وفي العالم وقوم قاوم دوام الظلم ضد ولدك ما في الكون سوى وجه الإله دايم وقوم قاوم دول في أرض أحلامك بتبني تبيع وبتساوم وقوم قاوم قدر ما فيك أمل عايش نفس مكتوم وراس دايش وساق وارم من الساساقة في سوق المعايش قوم وجيب وطنك من السووهو مطمورة نهب للحاري والغارم كتال العيشة فرتق رفقة أولادك هجيجك في بلاد الغربة جيل ورا جيل وبلدك في بحر من النعم عايم عبيد للعالم الأول وعبيد في عالم العرب الأبي المحتل إذا ما دام وإذا اتحول عبيد ساساتك الهمل عبيد للعسكر الغاشم عبيد لي جنجويد الذل عبيد للكل والكل في نعيمنا رفل نعم نحن عبيد ومرقنا نتحرى الوكت في الظلمة نرسم في سما من روحنا للجايين هلال العيد نعم نحن نحن العبيد السود رجال الحارة في كل جيش كسر شوكة عدوه وغنم آآآآآي نحن العبيد عيشتنا في حسبة ولاد الأمرا في دول الخليج عيشة غنم آآآآآآآي نحن البنتكلم سريع ونقول يا زول ونقول بدل كلمة نعم آآآآآي آآآآآي نحن السوادنة أهل بعانخي الفي كتاب تاريخ فراعنة مصر لا صيت لا طعم آآآآآي نحن العبيد في العالم العربي الفسيح نحن الصدقنا عجم و ولولوتم فصيح نحن النصرنا محمد الأمي ورفقنا المسيح نحن المرقبنا موسى من لجة بحر ونحن الحفرنا بيد طفل بير زمزم المزحومة من أعمى وكسيح مارقين عشان نلد النبوة الجاية من أم الكتاب الأرض ورثة صالحينو الفقرا غرباء التراب نحن العبيييييد ذاتم وأها اترفقنا دمنا عيد وقمنا إلى وطن مجهد عبيد لي ربهم والحق كبس نور قلبهم مارقين يرجعوا حقهم في كل سنتمتر أرض نقطة مطر نسمة هوا ورنة حفيف مارقين نلاقي وطن طولنا منو شديد عايش في حضن الغير مارقين نرد روحنا من غربة التشريد في العرفة والتعبير نحن العبيد الفقرا مارقين نبني بيتنا على الأرض ونعيش بخير ونشوف بعيد شوف الشعوب الحرة من عقد الشعوب التايهة بين سادة وعبيد مسجونة في ظلمة مصير ح نشوف بعيد ونكون بخير ح نكون بخير
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أمين صديق
فيس بوك
تويتر
انستقرام
يوتيوب
بنتيريست