|
|
 ايزابيلا، عيدك مبارك، شنو الغيبة؟
|
على قدر المرات القليلة البزور فيها الواحد هادا المكان..
وعلى قدر المرات الأقل البتجاوب فيها الواحد مع ما يدور في هادي الدار..
على قدر ما يفتقد ناس اسهموا ويسهموا دايماً في ترطيب وجدانو..
في جعل الحياة مكاناً ممكناً للحلم والأمل.
في جعل المكان، واجب الزيارة من آن لآخر، لينشرح منك الضمير، وأنت ترى من يعبِّر عنك. من يقولك بلغته السهلة العذبة المشتهاة..
،
إيزابيلا، شذى بت بله، أحب كتابتها، أحب أن تكون دائماً حيث: كِلِكْ، من الماوس أو "تّكَّة" مفتاح الانتر من الكيبورد..
عفويتها الناضجة، وغجريتها التي لا "ياباها" إلا حاسداً أو مكاجر.
انسانيتها في رصد التفاصيل التي لا تلتقطها العدسات العادية، ولا معطوبة الحس.
فلاحتها في أخذك لأمكنة تحبها، أو تختارها هي لك على مزاجها، أو تدعوك لها وهي تعلم أنها ستؤلمك، ستفرحك، سـ"تطلع ....." لكنها ضرورية لتعبئة رئتيك بما هو ضروري لتواصل ركضك على مضمار الانسانية.
وشذى طبيبة..
ومن الطب ما قتل.
ومن الطب ما ذهب أبعد من العقاقير والمباضع والوصفات (ذات الخط المكعوج)، وابتسامات التشجيع، على قلة الأخيرة مؤخراً..
إيزابيلا، حين تكتبك، على هذه الصفحة العمياء، تحتار كيف فكّت شفرة روحك ولم تكن ضيفها في غرفة الكشف، وكيف فكّكت كيمياءك ولم يكن شيءٌ منك عيِّنة بمعملها.
أن تغيب لبعض الوقت، ممكن. كثيرون غيرها يفعلون.
أن تختفي بسبب من الكثير من الأسباب التي ترغم البعض على الاختفاء، برضو ممكن..
ولكن، بصورة شخصية، أن افتقدها لأكثر من ستة أشهر، فذلك ما يوقظ فيّ الخوف، والظنون، والحزن على شتلات في الروح لا تقوى على عيشٍ مالم تدلق إيزابيلا حصتها-غير المعينة- في حوضها، وبكامل المحبة حين أوان "تدانها".
،
،
|
|
 
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
تأتي كثيرا لهذا المكان،
تمر عيناك على الصفحة الأولى، تفتِّش..
وين "عماد عبد الله"؟ فالرجل الفنان قادر "مريد" على أخذك من حيث كنت وغمسك حيث فرشاته تفعل فعلها في "عيال" اللون.
يلوليك، يطوطحك، يسخر منك، يضحكك، يضحّكْ الناس عليك، لكنه يعبيء إنسانك بما افتقده في زقاقات صراع لقمة العيش.
عماد عبد الله، يا راجل، وفي هذا العيد، أحبك جداً..
،
شذى بله لم ألتقيها في حياتي،
أحمد الله اني التقيتك.. وإن كان عرضاً وذات غفلة..
،
عيدك مبارك
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
،
وما أدراك ما عزاز شامي،
طائفٌ خرافيّ يطوف هنا "ولا هماهو"..
تكتب بحرف محموم، ومهموم.. جريئة، ومتحدية كـ"نالة"، تعرف ما تقول وما هماها ما يعتقده الآخرون، الذين بلا شك في حالتها هم "الجحيم".
مجرد أن تتونس مع أصحابها تفتح لك عوالم من أسرار و"تفَلِّس" طبلة الروح. كده بس، ولا ليها ولا "خساها".
متكيِّف منك شديد انا يا "بنية"، وربما لا أسرِّك إن قلت لك:
إنك تصنعين هنا، ما ليس لـ"جياد" ولا لـ"صافات" به قبلٌ لصنعه. فأنت تساهمين، بكل أنوثتك وانسانيتك، في صياغة الإنسان. كما تحبه البلاد وتشتهي..
كوني بخير وعيدك مبارك
،
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
بخ بخ يا بدرى.
لكن حقيقى, ذهب الكثيرين من هنا,
تواروا بمحض رغبة كانت قد دفعت
بهم فيما مضى إلى هنا, حين تنادوا إلى
واحة يجدوا فيها ما يرطب لفح العالم الخارجى
الغبى, لكن بكرى"الله يسامحه" جلب كل ذلك
العالم الخارجى إلى هنا, حتى صرنا كالبسطامى,
الذى ترك السر ورائه, وجاء إلى أرض الوحوش
التى تجرى فيها , ولا تحوش فيها لا رزق الترطيب ولا
يحزنون.
عارف, الكثيرين هربوا إلى الفيس بوك, حيث لا ضرب
ولا شتم, ولا أحقاد, وحيث الكلام بلا حسيب المتربصين,
ولا رقيب "المندسين", كلهم بى هناك والله, اسماء كثيرة,
أسماء كانت قد أعطت لهذا المكان سمته وطعمه فيما مضى,
ولما صار الزبد يبقى ولا يذهب جفاء, هاجروا بدينهم وديدنهم
إلى (مواقع) اخرى تحافظ على كرامتهم من سهام الإهانات الطائشة,
التى يرمى بها من هم "أطيش" منها.
عام سعيد يا بدرى, والغريب أنى تذكرتك من يومين فى معرض تذكرى لأوليفر
وتومسو الحبيب.
كن بخير يا صديقى.
محبتى
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: عبدالله شمس الدين مصطفى)
|
عبد الله يا شمس يا مصطفى،
عيدك مبارك وان شا الله ترجاهو داير وداير، زي ما بقولو اهلنا..
تسعدني والله طلتك يا صاحب، وانت سيد الذوق والكلمة الجميلة، وواحد من سدنة سماحة الروح..
،
تعرف يا حبيب،
هم -من ذكرتهم- بغيبو، بس ما بمشو بعيد، وانت عارف نحنا شعب حنيِّن، وصاحب وِلِف كتَّال. والعوجة إنو أعدانا- وهدب الله دروبهم وأطاش سهامهم- عارفين الخصلة دي وبقودونا بيها للورطة، للشرك، للمقصلة.
شفت الأذى قدر شنو؟
كل الناس الانت بتعنيهم، هم ما مشو بعيد، غابوا نعم. لكن اشارطك كلهم بتاوقوا من وكت لي تاني، عايزين يشوفوا لو في مجرد لمحة تخليهم يررجعوا زي ما كانوا لي بلدم لي مكانم..
واحنا يا صاحبي خلينا بلد بي حالا، شان جنس المساخر دي، لكن خيت العصب شادينا ليها وين ما سرحنا وين ما غبينا، وين فتحنا وين ما حلمنا.
عوجتنا عوجة..
ونقطة ضعفنا مكشوفة للعدو، وطلقتو ما بتخيب.
،
،
المرارات كتيره يا صاحب، والحكي أكبر من تحتملو شاشة خرساء.
لكن شن نسو؟ قلة حيلة ساكت تكورك للبتفتقدو وتناديهو، عساهو يسولك خاتر..
ولأنانية ماب نقدر ننكرا، دايرنو لينا، رغم اننا عارفين صعوبة المكان، وصعوبة الناس في هادا الزمن العلينا، وقسوة الكيبوردات تحت الاصابع الجـ بـ انـة.
،
فرحان اني جيت علي خاترك، ومريت من جملة ناس سمحين بتتطراهم،
أوليفر حبيبي، لا تعلم كم افتقده
اكاتبه في كل آن،
ولا أدري إن كان بالإمكان أن تبلغه تلك الونسات، أم لا..
ترانا عشمانين ويمكن تصدق ويكون الزمن زي ما قالو "لابد يوم لام"..
،
دم طيباً وخلينا نجرجر خيوط الونسة كل ما لقينا فرقة..
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
البت الضنينة .. بت اللزينا ..
ساكت حارقك جازك يا صاحب , الزولة تأمركت ..
و كان ما أخاف الكضب : أظنها نسيت كيف يفرخ الجداد سواسيواً ..
هناك جدادهم ( ديك الحبش ) و الحبش منه براء , او ( ديك رومي ) .. أو مفرنجاً باسم الـ turkey ..
و لا عندهم أب صنيفة , لا و لا مطراً كانت حدثتني عنه : ( مطرٌ تفرد له مد ذراعيها في شوارع الخرطوم أم زيفة .. فينهمر عليها و الريح تصفع , و البنية و النشوة يرعدان ) ..
و قهوتها .. يا لقهوتها إيزابيلا . هناك قهوتها الاسبيرسيو و الكابوتشينو .. ليس كمثل قهوتكم أم تفل و شرغرغ مصقر و وقاية و غرنجال ضكر .
نسيت البنية هذي البلاد أم سكاسك ( تقول أمي للمرأة المتصابية : جهولة ام سكاسك ) .. و بلادنا صارت أم سكاسك لكثرة المكياج الضال على خلقتها ..
ثم أنها غجرية ياخينا , و ما للغجر انتماءً إلا لدمهم الموبؤ بالهجرة ..
نداؤك زي كواريك " ست النسا " حين ركبت بابور البحر و تيممت المجهول , قالت للفارس في القيفة على بعيره و هو يلوح لها مودعا :
( هووووووي يا راكب عينو حمره و رقبة طويلة , قول لي حاج فاره .. ست النسا شالتا الطيارة ) ..
و أظنك حاج فاره المعني .
يطول عن إيزابيلا الكلام الكلام و و و و .. إييييييييييييييك ..
البطن شايلاهو .. مغسة .
عِلا مقطعنو في حشانا ساكت بس ..
.........
دي حاجة ..
الحاجة التانية :
أظنك بلباص و نخرتك صاقطة ..
فلماذا لم تسأل عني انا - أخوك - حين غبت .. ساااااكت لي الله سيدك ده ما بتقول أنجبر خاتر أخوي ده بكلمة .. !!؟؟ ..
خيار و فقوس يا وغد ؟؟
عيدك حلو يا أخانا ..
و معاك نكورك لهذه الغجرية :
كيف ارتحالك في العشي بلا حقائب أو لحاف ؟؟
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Emad Abdulla)
|
Quote: دي حاجة ..
الحاجة التانية :
أظنك بلباص و نخرتك صاقطة ..
فلماذا لم تسأل عني انا - أخوك - حين غبت .. ساااااكت لي الله سيدك ده ما بتقول أنجبر خاتر أخوي ده بكلمة .. !!؟؟ ..
خيار و فقوس يا وغد ؟؟
|
عماد والله لو كتبت كلامك ده قبل ما تصل لنهاية "بوستيني" تبقى دي عوجة،
والعوجة الأكبر تبقى لو أنا كتبت ما كتبت قبل أقرا لومك "الحنِّيِّن" ده
،
احمد الله، جنس الحركات دي بتخليني أحس إنو لسه في عقاب..
،
عماد،
الله يجازينا، واللاااااااااااااااهي محتار..
،
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
كان الواحد يأتي ليذهب في العوالم الضاجّة، الحميمة، القريبة، الغريبة والرحيبة لقصص عثمان محمد صالح.
عثمان كان يكتب روحه هنا ويعزمنا عليها مجاناً..
انتاشته سهام أعداء الجمال،
ناضل كي يبقى..
شهر إبداعه في وجه الجميع..
،
لم يهزم
لكنه غاب..
وافتقدناه..
دائماً نفتقدهم بعد الغياب.
عثمان، كن طيباً وين ما بقيت ابوي، واعلم،
هناك من يقرأ ما تكتب، ومن تدخل كتاباته في تشكيل خطوط كنتور آدميته.
فاكتب يا رجل، وتعال متى ما أحسست أن سحابة من سحائبك بحاجة لأن "تصب" رحمتها في "بورٍ" ما..
فهنا المكان، هنا الرحم والميلاد..
،
دم طيباً، وإنا إلى قصصك لمشتهين..
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
عبد الخالق السر،
لا حولاااااااا
ياخي ده زول كان بيكتب مقالات جادة وبحثية بشكل عجيب،
عطبراوي أو، أتبراوي
نكهة العمال والسكة الحديد، التي قربت المسافات، وكثيراً، وصفارة القطر، تفوح من احتكاك احرفه بالورقة التَخَيُّلِيَّة.
يكتب في السياسة، في الاجتماع، في الرياضة، في غيرها، فنجد في الكتابة ما يجلي البساط لتشع الاسئلة الحرجة.
كان يكتب هنا،
كان يتولى قضايانا،
كان يحسنا،
واختفى..
نعم،
اختفى كلمة بسيطة، خفيفة، مبلوعة، لنجمِّل أنفسنا تجاه ما كان.
،
عبد الخالق،
عيدك مبارك والمراد ينتم..
واحد من مفتقديك..
،
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
ود الياس يا حبيبنا ..
أنا بتكيف لما أكاويك .. و أغلغلك ، فتخرج لسانك الحلو الطويل و تصب سخريتك الحلوه ..
تعرف اخينا ..
واحد من الخلايق البيطربوني كتابةً هو بدري الياس ..
عندك شغلك البتعرفو براك و لغتك الفالتة من تابوهات القالب ، و منجورة بالمزاج ابن اللزينا ، لذلك و كل ذلك أحبك ياخي .. جد جد .
أما عن صقوطية نخرتك فلقد سبقتني بها .. بيني و بينك أنا كنت ناوي اقول وين إيزابيلا يا ناس ..
تاني قلت بلا إيزابيلا بلا بتاع ، حنستها كتير تكتب ياخي .. و أدتني الطرشا ..
البت سرقتها أمريكا يا ابن خالتي ، و تفرق دمها بين اليانكي و اللاتينيين و النيتيف أميريكانز و الأفريقانيين البيض ثم دم المهاجرين و البطاقات الخضر ..
أنا غايتو رميت طوبتها نوهائي ..
أقول ليك سر ، واحدة من الحاجات الكانت بتسن سكينة الزول للكتابة هي كتابات إيزابيلا و محمد الحاج و عزت الماهري و ميسون النجومي و عثمان محمد صالح و عزاز و ريل و دكين و فضيلي و سالي و منعم و النعمان و بت الشيخ و و و ..
بكري قام - الله يهديهو - جلبط الدنيا ياخي و فتح الباب من وسيع للنبيحة و الكلام الكعب و الفعايل الما ياها ، لمن الشغلة جاطت ، و بقت الصفحة الأولى تتور النفس و تشيلك هم الدنيا و العالمين ..
الحرابة في خترات الحرابة و الكواريك و الدفسيبة .. إنعل أبو الشنا .
المهم يا قريبي ..
ياخي كتر خيرك أن أدخلتني في زمرة الناس الكويسة .. علي علمي ببياشة شهادتك في حقي و إعمالاً بالقاعدة : ( شكارتا دلاكتا أمها و خالتا ) .
و خلينا نتجدع هنا في شأن الناس الذين غيبهم الضجيج ده .. و مرقوا بجلدهم مكتفين من الغنيمة بالفرجة و المتاوقة و مصمصة الشفاه علي هذا الحال البيض الذي إلنا إليه .
ينعاد عليك العيد يا صاحب ..
و أمانيك كلها مجابة .
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Ahmed musa)
|
سلام وعيد مبارك يا أحمد موسى،
ويا لمفارقاتنا،
ها نحن نضع إيماننا بالحرية، كبطاقة تعريف بنا،
ها أنت تنادي بالحرية لمن سلبنا كل شيء، العمر، والعافية، والوطن والحرية.
ألم أقل أن العدو يعرف كيف ينالنا بأبسط من جهدِ التقام لقمةٍ من صحن بوش؟
ألم أقل أننا مكشوفين للعدو؟
هذه البساطة أضاعت "الليندي" وها هي ذكراه تحل علينا، وأضاعت من أضاعتهم عفوية هاشم العطا، وأضاعت المؤمنين في أغوار العراق.
وتوما سانكارا في بوركينا فاسو، وغيرهم وغيرهم ممن لم نعرف.
نحنا حُنَان، ومؤمنين جداً،
الحرية لنا ولرأي الشعب وكتابها، سجانينا،
وفارشي بسط التنكيل لحكامهم ذات ليالٍ سود،
والشاربين من ذات الكأس.
لكن، ما الحرية لنا ولغيرنا،
المهم،
عسى من يذق الظلم يؤمن بالعدل.
عسى,
عسى،
عسى،
،
يا احمد موسى دم بخير ومن تحب،
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Emad Abdulla)
|
| Quote: أقول ليك سر ، واحدة من الحاجات الكانت بتسن سكينة الزول للكتابة هي كتابات إيزابيلا و محمد الحاج و عزت الماهري و ميسون النجومي و عثمان محمد صالح و عزاز و ريل و دكين و فضيلي و سالي و منعم و النعمان و بت الشيخ و و و .. |
،
والله يا صاحبي ده لا سر ولا حاجة..
عاااااارفك، زي ما عارف روحي،
زمااان كنت عايز اكتب عن الناس البجيبوني لي حوش بكري ده، ولمحت ليهم كم مرة،
وهم ضمن من ذكرت بعاليه، يا ابن اللذينة،
وكان على رأسهم، وقتها وما زال، حبيبنا "دكين". المتواري خلف "عراقي" و"سكين"..
عليك الله شفت الراجل ده كتاب كيفن وكت يسخى، ووكت يسخر، ووكت يطوطح علي هواهو؟
قلت ليهو في اكتر من مرة، ندامتك إنك ما جيت الدوحة قبل يمرق منها "عماد عبد الله"..
ويقولي "كم واحد بقولو لي كده"..
دكين ده واحد من مساليط الله، مارق لي تجمير اللغة، ونقش المسام.
والمصيبة إنو بيعمل ده كلو، وكأنو بتونس، بشاغل، بشاغب، بيتصعلك.
ابداع راعي مجان في حواشة الأبدية، ومطلوق وعفوي، وبعد ده راااااكز.
غايتو جزاهو عند الفجّر فيهو صعلكة النسيم.
،
حبيبنا دكين، كل سنة وانت طيب ابوي،
وينك ما جيت علينا؟
،
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
| Quote: ساكت حارقك جازك يا صاحب |
إنت يا عماد قايل جازي حارقني من الليلة؟ انا تعبت من الملاهاة ورا الناس السمحين، كدي شوف ده المن قبل كم واربعين:
إلى سيمباتيكو في غيابه العالي، مع جزيل الحزن
،
والزول مشى وما جا،
لكن كدي شوف شغلو الشغالو من بره لي بره،
والله ما خسران غيرنا يا صاحبي..
،
سيمباتيكو، عبد الوهاب، والله "إني" لغيابك لمحزون، ومبسوط كمان انك بتسوي في البتسوي فيهو من بره لي بره، وبنفس النفس الحار
والحاذق والحادب والرصين، وبعيد عن كل ما يؤذيك.
لم يتعلموا بعد التعامل مع النوار..
فنحن يا صاحبي سلالة البدو الرعاة.
نحتاج للكثير لنتعلم، نحتاج أن نعترف بجهلنا أولاً وبفظاظتنا حتى نعرف الدرب،
ونسير، على هدى الجمال وبركاتو..
،
عبد الوهاب سيمباتيكو،
كل سنة وانت طيب.
انا ما زلت في ذات البلاد.
وأنت أيضاً.
لك المحبة.
وللوغد عماد
،
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Emad Abdulla)
|
Quote: ساكت حارقك جازك يا صاحب , الزولة تأمركت ..
و كان ما أخاف الكضب : أظنها نسيت كيف يفرخ الجداد سواسيواً .. |
الله الله يا عماد،
خبرك جديد علي والله،
لكن ما محزن شديد،
نعم كان الواحد بقول بلد لسه فيها زي شذى بله، ممكن ترجى منها رجا،
لكن كمان والله، وانت سيد الجلد والراس، عارف انو المكان داك ما يصلح كبيئة تستقبل شذاها، ولا محل تفتح فيهو احضانا لي مطره.
صاح؟
اهي مرقت، انتصار جديد لمُتَبَنِيِي البلطجة والقبح. انتصار لمن يسيؤهم إن غيَّرنَا لون البيت وطريقة رصّ الأثاث.
وانت يا عماد يا صاحبي فنااااااااااااان،
والله فنان لي حد مزعج، لأنو الواحد يمسي ويصبح خايف علي المِتْلَك، من بلد زي الـ ما(الله) أدانا ياها.
،
تعرف،
خليل فرح وصاحبو، كانو بقولو للقبطي صاحب الحانة، ساعة يجي وكت الفطور،"فطور رمضان"، اقفل علينا الباب، ويفعل.
بعدين يجي يحاسبم بعدد الفواضي..
دي البلد الادانا ليها الله، ما البلد الاختاروها لينا ناس..
وشذى لو بقت هناك، كنا اسع متضامنين معاها عشان شوية بنطلون، أو طرحة انزلقت من كتفها التوزن رجال.
وكان، لو فعلاً ما حصل، لحقنها كم سيطان، من واحد مسكين، ممكن شذى تنقذ طفلو في مركز صحي أو شفخانة في طرف من الأطراف.
،
ايزابيلا "تأمركت"، يا خوي مبروك عليها، وحسرتي على البلد البتطرد زهورا صباح وعشية وبكامل شذاها، وتتباكى علي قلة البركة.
والسؤال:
ناس امريكا ديل لبدو بيها كده كيف؟
وليه لسه ما ورتنا حاجة من الجديد الشافتو؟
ويا خوفي عليها من لسعة المكان.
،
خلينا نتحاسر اخوي..
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Yasier Elsayed)
|
Quote: صديقى الرائع الفنان والود العجيب كما يسميه الشاعر / عاطف خيرى والفنان / محمد الطيب
الود بدر ود الياس
لاكلام لنا فى هذا المقام
فقط السلام والشوق كتير ياحبيب |
ياسر السيد، ولد شوق الطنابير وحمى الدليب،
ياخي لو ماليك كلام هنا يبقى لي منو؟
إنت يا الفنان ود الناس الفنانين.
قلت لي مشيت لي الكوره؟ والله برضك فنان وغنااااااااي وزول طنابير ودليب وأشجان تضلل دموعا غابات.
والكورة ولاها بعيده من الطنابير وانت عارف.
ولولا بيتك العامر ما كانت عشرات التسجيلات ولا نخجيبة الألحان.
ويا زول خلي الكورة عصراويات وما تحرم ليلك من أنين مع الطمبور، ونحنا مصاصين غنا وسراقين حبور.
إنت زول فنااان، غناااي، ورايق.. ما تحرمنا..
سو، وخلي خيلنا التناهد يا لمت في اللحون ويا كمان لحقت أمات طه..
،
،
عيدك سعيد واسرتك، وقعد عافي حبيبي،
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Adil Osman)
|
عادل يا صديق
يا ود بلد
ليك والله شوق..
،
Quote: بدري الياس
عيد سعيد. تجد ايزابيلا/شذى بلة هنا بكامل القها: |
،
تشكر والله، كده اتأكدت إنها هناااك، بس ما بعيد شديد، ما كل الهناك يا داب هنا.
بس اتطامنت عليها، أهي فرحانة، وبتغني.
أعرف أنها مألومة ومكلومة بكل الهناك، وأعرف أنها إن غنت ستغنينا، ستغني لنساء الانقسنا، والنوبة، والنوير، والحمر والشوايقة المحزونات.
وستأتي بعلم ومعرفة وفنون تزيل الوحل من عجل لوري تقدمنا الكحيان.
،
وعارفك يا عادل، بتنتظر في الناصية معاي منو؟
وعارفك بتفتقد منو!
فتعال نناديهم سوا.
وكلهم واحدنا في الغاية وسواد الحال..
،
دم بخير يا غالي وسلام
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Alsadig Alraady)
|
،
الصادق يا رضي
من آلاء المروق من حفرة بلدنا إنه بيوفر لينا ناس زيك هنا..
وجميل إنو الواحد كل ما مرّ مؤخراً يلاقى طيور جنتك "تورجغ" في شبابيك المكان..
ويين كنا لامن نلقاك، بعد تمشي وتغتس في هموم الهناك. ربنا يطيل جولاتك، ويجيب علينا خطوط سفراتك.
،
| Quote: أقعد سوي في سواتك دي |
وأنا يا صاحبي، شن العندي غير هادي الغناوي البيني؟
أبقى قريب..
وقول لي حافظ خير، مرررة مررة تعال بي جاي
أرمي ليك حاجة وأمش
و"محِل تقع المحبة تقوم ويتاكن فروعا"
وانت سيد العارفين..
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: بدري الياس)
|
وهناك جميلون هنا،
أعجب كيف يتحدون كل قبح،
ويواصلون سير جمالهم. ربما يغيبون هنينهة أن تسترد خيولهم أنفاسها.
لكنهم يواصلون، يتواصلون..
أبو ذر بابكر،
يا رجل،
علمنا كيف تحتمل أنفاسك خنقة المكان لتواصل ركضك لتوصيل طلبيات الحب والجمال؟
،
شكراً لشعرك الذي يعلمنا القدرة والتحدي،
وأن البقاء دوماً للحقيقي..
،
أبوذر
كل سنة وانت طيب يا جميل
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: أسامة خلف الله مصطفى)
|
Quote:
ياسر السيد، ولد شوق الطنابير وحمى الدليب،
ياخي لو ماليك كلام هنا يبقى لي منو؟
إنت يا الفنان ود الناس الفنانين.
قلت لي مشيت لي الكوره؟ والله برضك فنان وغنااااااااي وزول طنابير ودليب وأشجان تضلل دموعا غابات.
والكورة ولاها بعيده من الطنابير وانت عارف.
ولولا بيتك العامر ما كانت عشرات التسجيلات ولا نخجيبة الألحان.
ويا زول خلي الكورة عصراويات وما تحرم ليلك من أنين مع الطمبور، ونحنا مصاصين غنا وسراقين حبور.
إنت زول فنااان، غناااي، ورايق.. ما تحرمنا..
سو، وخلي خيلنا التناهد يا لمت في اللحون ويا كمان لحقت أمات طه..
،
،
عيدك سعيد واسرتك، وقعد عافي حبيبي،
، |
الود العجيب النضمو كلو غناء الساكانو حب الناس
بدر الياس
منى مستنيك تعودى
والمابجيبو ليك عبد العظيم مابيجى تانى
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Yasier Elsayed)
|
والله يابدري انت رجعتك دي زاتها بالدنيا ياخينا الواحد بكون مبسوط ساي لمن يشوفك هنا
ايزابيلا ليها الأمنيات وافتقدها مثلك والمكان كذلك ياصاح بدونها موحش
وطالما البوست جاب سيرة ناس كويسين خالص علي قول اسماعيل ود حلتنا فياريتك تكورك
لينا لي اسامة معاوية ده ياخ ـ افتقد اسامة هنا تحديداً
ليتهم يعودون ياصاحبي ليتهم يابدري
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: أسامة خلف الله مصطفى)
|
،
| Quote: أتمنى لك عيدا سعيدا يامن تحمل هموم وطنها أينما حلت..... |
وما لا قبل لأحد به من هموم الوطن يا سيدي (أسامة خلف الله)
هو ما يطفو كالدمامل الخبيثة على سطح هذا المكان، كلما تطل عليه..
لذا تأتيه حذراً مشمراً، أن يصيبك شيء من خبثه.
تفتش عن كواتٍ لا "تَعْزِم" غير الضوء الصريح والمعافى كي يعبر منها.
،
تشكر على إطلالتك لتنادي معنا على "شذى"
وعامك سيعد انت برضو..
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: محمد عبد الماجد الصايم)
|
تعْرِف يا ود الصايم،
والله بهجة مرورك "الأولى" دي عندها طعم ما عادي،
ياخ والله اشكر أول تقاطع لينا في "ملمة" ،
وشكراً لمرور ابتساماتك التسع الجميع بهذا المكان..
،
مهما كان موضوع البوست، وأياً كانت الشوتة فحضورك ياهو حضورك ،
ومعاك ننادي شذى،
قومي هيلا هوب معانا
،
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: Sabri Elshareef)
|
سلام صبري،
وأشكرك إنو جذبك المحل ونااسو عشان تجينا داخل،
عماد والصادق، فاكهة من يلمهم، ولكن ياخي شوف السوق، تلقى فاكهةً وأبا،
أشكر حظي في الدنيا الجعل جنس ديل الهينين، الزينين أولاد الجروف البطرانة ولاد أمي،
لكن،
إنت يا صبري عندك زيهم،
وغيرنا عندهم زيهم،
وهناك دايماً من هم أجمل..
وهناك من الأغنيات
ما يوجِدُ حقلاً، وروضة
،
،
تسلم صبري
ويسلم شوفك
| |
|
|
|
|
|
|
|
|
|
Re: ايزابيلا، عيدك مبارك، شنو الغيبة؟ (Re: أيزابيلا)
|
Quote: بجيكم بي كي بورد عربي قريب
|
إيزابيلا،
سعيد والله بي طلتك،
وأكيد آخرين فرحو بي جيتك، وقالدوا حضورك،
تعالي
كان بي "كيبورد عربي"
أو بدون
المهم جيتك،
أن تكوني بيننا،
أن تحكي،
أن تقولي ما تحسينه،
أن تصوري ما تلتقطه عدستك "الشوّافة"،
دونما وصااية،
ودون مجاملة.
أشكرك
أن كان لندائنا صدى بأبعادك
أن
أحسنت الظن بقاريءٍ ما
في قارعةٍ بعيدةٍ
لكنه يدرك ما يعنيه، بلدٌ واحدٌ
يسعُ الجميع،
،
،
نلتقي،،
| |
|
|
|
|
|
|
| |
عبدالله شمس الدين مصطفى
Emad Abdulla
Ahmed musa
Adil Osman
Yasier Elsayed
Alsadig Alraady
أسامة خلف الله مصطفى
خضر حسين خليل
محمد عبد الماجد الصايم
أيزابيلا
فيس بوك
تويتر
انستقرام
يوتيوب
بنتيريست