|
|
 ماأشرف الدمع الجسور اذا جرى (مهرجان ست الشاى فيديو وصور)
|
التحية لكل امرأة قاومت الفقر بسلاح العمل الشريف المتهم ظلما بهامشى ؟
وهو يهب الحياة وبعض من الامل لاطفال تخلى عنهم
الكفيل
الدولة
المجتمع
كم مهنه حامت وكاستا
نكتت شهادات الزمن
ماكان تخلى دراستا!
رمت اللقيمات الدغش
الكسرة قامت عاستا
كم حاجه عندها باعتا
دبلة زوجا وساعتا
ترخص حياتا وكل شئ
بس سمعتا
بس سمعتا
محجوب شريف
|
|
 
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: بكري الصايغ)
|
Quote: الأخـت الـحـبيـبـة الـحـبـوبـة،
نجلاء سيد أحمد،
تـحياتي ومـودتي،
ورمـضان كريـم اعاده الله عليك وعلي اسرتك باليمـن والبركات.
***- عـمل جـيد ومتقن. وفقكم الله بما فيه الخير والسـداد.
***- نرجو القاء المزيد من الضوء علي الموضوع بالكلمات من اجل الثوثيق.
***- لك وللجميع تحياتي ومودتي. |
الاخ العزيز بكري الصايغ شكرا
لو تعلم كم يسعدنى ويشرفى مرورك البهى
بس لااستطيع الكتابة فى البوست لان رفع الفيديو وترتيبة يأخد من وقتى الكتير ولديا كم بوست مأجل لذا اطلب من البورداب الذين كانو حضور القيام بعمل الكتابة
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: احمد محمد بشير)
|
الفاضلة نجـــلاء بت سيد احمد
ســـــلام .. ورمضان كريم
شكرا لنقلك الصورة عن تلك الشريحة من المجتمع
هؤلاء اختاروا الشرف والكسب والكد من عرق الجبين
فما أروع الكسب من عرق الجبين .. ولهن أن يفخرن بأنفسهن
ونسأل الله أن يبعد عنهن (أولاد الحرام) ودفــار الكشة وبوليس النظام العام
شكراً لكي لأنك صرت صوتاً لهم.. وعدسة تعكس نشاطهم
تصور وتعكس صور واقعية من حياتنا اليومية
كم شخص يحمل كاميرا ولكنه لا يعرف ماذا يمكنها أن تفعل
تحاياي لك وابقي شمس ما تغيبي ...
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: الامين موسى البشاري)
|
هلا بيك الامين موسى البشاري Quote:
ســـــلام .. ورمضان كريم
شكرا لنقلك الصورة عن تلك الشريحة من المجتمع
هؤلاء اختاروا الشرف والكسب والكد من عرق الجبين
فما أروع الكسب من عرق الجبين .. ولهن أن يفخرن بأنفسهن
ونسأل الله أن يبعد عنهن (أولاد الحرام) ودفــار الكشة وبوليس النظام العام
شكراً لكي لأنك صرت صوتاً لهم.. وعدسة تعكس نشاطهم
تصور وتعكس صور واقعية من حياتنا اليومية
كم شخص يحمل كاميرا ولكنه لا يعرف ماذا يمكنها أن تفعل
تحاياي لك وابقي شمس ما تغيبي ... |
ياخ كلامك دا اجمل من نقل الحدث ذات نفسو
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: نجلاء سيد أحمد)
|
الاخت نجلاء سيد أحمد،
تـحياتي ومـودتي،
ورمـضان كريـم اعاده الله عليك وعلي اسرتك باليمـن والبركات.
شكرا على هذه اللفتة الانسانية المتعددة الالوان والابعاد
اغلبهن ارامل كافحن رغم المضايقات واستطعن التغلب على التحديات فربين وعلمن واستطعن تخريج علماء اسهموا في تطور الحياة الانسانية .
وكلوا بكباية الشاى وفنجان القهوة يا نجلاء
التحية لك ولحواء بلادي المكافحة
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: الطيب شيقوق)
|
Quote:
الاخت نجلاء سيد أحمد،
تـحياتي ومـودتي،
ورمـضان كريـم اعاده الله عليك وعلي اسرتك باليمـن والبركات.
شكرا على هذه اللفتة الانسانية المتعددة الالوان والابعاد
اغلبهن ارامل كافحن رغم المضايقات واستطعن التغلب على التحديات فربين وعلمن واستطعن تخريج علماء اسهموا في تطور الحياة الانسانية .
وكلوا بكباية الشاى وفنجان القهوة يا نجلاء
التحية لك ولحواء بلادي المكافحة |
التحية استاذ الطيب شيقوق وشرفنى ان التقيك واسعدنى مرورك تسلم
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: اشرف السر)
|
الاستاذة نجلاء التحية و التقدير على هذا المجهود
اذا كان
النطيط بالكاميرة بجيب عمل رائع زي ده
النطيط بيخليك تقيف مع الشعب
النطيط بيخليك تتعاطف و تقف مع هولاء الشرفاء الذين
جنى عليهم سلطة فاسدة مفسدة
فمرحبا بالنطيط
فما اجمل النطيط و بل فلنتنافس في مسابقة النطيط بالكاميرة
مجدد التحية و التقدير و الاحترام و الاجلال للاستاذة نجلاء
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: محمد على حسن)
|
يا سلام عليك يا نجلاء كل مرة بتكبري في نظري اكتر واكتر
ربنا يحفظكم انتي والاخ العزيز بخاري
ويخلي ليكم وليداتكم وفي ميزان حسناتكم كل جهودكم الجبارة المقدرة
لعكس صور حية من واقع ملموس ومرير. واهتمامكم بشريحة مهمة في المجتمع
كل سنة وانتو طيبين بمناسبة العيد مقدما
والتحية والتقدير لنساء بلادي الصامدات ومكافحات بعرق جبينهن
لهن ننحني تحية واعزاز
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: اسماء الجنيد)
|
Quote: يا سلام عليك يا نجلاء كل مرة بتكبري في نظري اكتر واكتر
ربنا يحفظكم انتي والاخ العزيز بخاري
ويخلي ليكم وليداتكم وفي ميزان حسناتكم كل جهودكم الجبارة المقدرة
لعكس صور حية من واقع ملموس ومرير. واهتمامكم بشريحة مهمة في المجتمع
كل سنة وانتو طيبين بمناسبة العيد مقدما
والتحية والتقدير لنساء بلادي الصامدات ومكافحات بعرق جبينهن
لهن ننحني تحية واعزاز |
اسماء الحبيبة تحياتى واحترامى
دى شهادة من انسانه جعلت قامتى تزداد طولا شكرا لك
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: محمد على حسن)
|
Quote:
الاستاذة نجلاء التحية و التقدير على هذا المجهود
اذا كان
النطيط بالكاميرة بجيب عمل رائع زي ده
النطيط بيخليك تقيف مع الشعب
النطيط بيخليك تتعاطف و تقف مع هولاء الشرفاء الذين
جنى عليهم سلطة فاسدة مفسدة
فمرحبا بالنطيط
فما اجمل النطيط و بل فلنتنافس في مسابقة النطيط بالكاميرة
مجدد التحية و التقدير و الاحترام و الاجلال للاستاذة نجلاء |
شكرا استاذ محمد على حسن على الدعم التحريضى
فلنتنافس في مسابقة النطيط بالكاميرة
| |
|
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: نجلاء سيد أحمد)
|
ضمن فعاليّات مونديال المحبّة ببيت الفنون
مهرجانٌ إنساني لمناصرة سِت الشّاي
أُمسيّة الأربعاء 22 رمضان، بيت الفنون بالخرطوم بحري، هذه المرّة الاحتفاليّة مختلفةً عن سابقاتها، فالمُحتفى بهنّ نساءً سامقات في عظمتهن، يعملن ليل نهار، وفي أحلك الظروف وأقساها، يوقدن نيرانهن في الشوارع، فيدفئون بها أحشاء الجميع؛ عبر كُبايّة "الشيريا" ، أو فنجان "الجَبنة"، الذي يُعيد إليك هدوءك وصفاءك، وبالرُغم من أنّ طاقم بيت الفنون قد درج على إقامة المهرجانات الإنسانيّة باستمرار إلا أنّ هذه الأمسيّة كانت مختلفةً تماماً، فقد تجلّت فيها معانٍ إنسانيّة نبيلة. فما أنّ ذُكر فيها اسم الشهيدة ناديّة صابون التي استشهدت قبل وقتٍ من الآن -حينما تعرضت لهجمة من قبل قوات النظام العام- حتى زرفت الدموع وتسارع الحضور لمسح دموع أبنائها الأربعة عبر جمع التبرعات لهم، ببادرة من الأستاذة نجلاء سيد أحمد.
جاءت تذكرة كمساهمات عينيّة مباشرة، ذلك بدلاً عن الفئات النقديّة، ليجيء الحضور وهم محمّلون بالسُكر والشاي والكوانين والأكواب و فنجاين القهوّة وكل مستلزمات مهنة صناعة الشاي.
حليوة وعدد من ستّات الشّاي، كانوا حاضرين في بيت الفنون، ولمن لا يعرف حليوة فهي امرأةٌ مكافحة، تعمل كبائعة شاي لأكثر من أربعة عشر عاماً، اتخذت من شجرةٍ بالقرب من مبنى صحيفة قوون مكاناً لمزاولة مهنتها، فأصبحت باحتها معلماً بارزاً من معالم مدينة الخرطوم، ومكاناً يشبه المُنتدى تماماً؛ لما فيه من نقاشات وحوارات مستمرّة.
حليوة تحدّثت عن قصّص "الكشّة" التي واجهتها من قبل النظام العام، وقالت أنها كانت بالتايفود قبل وقتٍ من الآن حينما هاجمها دفّار الكشّة أثناء عملها، وصادر كل مستلزمات مهنتها، وقالت أنّها توجّهت بعد تلك الحادثة إلى المستشفى مباشرةً تاركةً خلفها أواني العمل في دفّار الشُرطة، وتعرض أبنائها بسبب ذلك للطرد من قبل المدرسة بسبب عدم إكمالهم لرسومهم الدراسيّة.
كما تخلل برنامج الحفل مزادات لبيع أكواب الشاي والقهوّة على المتواجدين، إذ حصلت عدد من كبابي الشاي والقهوة على أسعارٍ عاليّة؛ عكست اهتمام الحضور وتقديره لهذه المهنة النبيلة.
جاءت الأمسيّة بمشاركة عددٍ من الفنانين من بينهم زكيّة محمد عبد الله التي حلّت مكان حيلوة وقامت بإعداد الشاي، كما شارك الفنان عبد اللطيف عبد الغني الذي تغنّى بـ "راكوبة" كلمات شاعر الشعب محجوب شريف، وتفاعل معها الحضور والتي يقول فيها:
راكوبة واسمها منزل
الريح بتهد من حيلا
بتقلق ليلا مطيرة
أمك والصحة بتنزل
بتمغرب قبل عصيرا
يا حليلا العرق اتصبب
فصد والله جبينا
أدني همقلوبينا
أخوانك شفع قصر
لسع ما بفشو غبينة
والحيلة قليلة بليلة
مرات بي موية كسيرة
روشتة تخلي الحتة
أضيق من ثقب إبيرة
وبعدها غنى عبد اللطيف أغنيته المشهورة "الشعب حبيبي وشرياني"، كما شاركت الفنانة نهلة حسين بأغنيّة لخليل فرح، وشاركت فرقة الهيلاهوب بعرضٍ لأغنيّة ست الشاي التي تقول كلماتها:
البتهمس من صباح اليوم
سُكرك كيفن يابا خاتي اللوم
البتوقد ايدا في النيران
شان تطارد فينا باقي النوم
البتدي القامه للأيتام
تلحقن فسرع بي رصيد اليوم
والبتدي اليوم نكهة النعناع
يسري في الوجدان عطر الحلقو
إلا ست الشاي
ياكبار القوم
وفي أثناء ذلك جُمعت تبرعات عديدة، لصالح كسوّة وكفالة أبناء الشهيدة ناديّة صابون، كما تم توزيع جزء كبير من الأواني الموجودة على الحضور بغرض توزيعها على كل من يعرف أو يتذكّر ست شاي تحتاج إلى هذا الدعم.
ــــــــــــــــــــــــــ
* نقلاً عن صحيفة أجراس الحريّة
| |
|
|
|
|
|
|
|
|
|
Re: ماأشرف الدمع الجسور اذا جرى (مهرجان ست الشاى فيديو وصور) (Re: هشام الطيب)
|
فشِّي الفي قلبك ... وأمرُقي
الخرطوم: وفاء أحمد
زبائنها المُداومون يتحلقون حولها يتبادلون التحايا وهموم الصباح.. هموم البحث عن حلول لمشكلاتهم الحياتية.. التي غالباً ما تعجزهم ولكنهم يهزمونها بالضحك منها؛ ربما لثقتهم بأنها ستمضي كيفما أتفق..تشاركهم خالتو التومة بعض مداخل الحوار أحياناً وأحيانا أخري تطبطب علي هموهم.. غير أنها تنصرف عنهم في نهاية الأمر عندما يداهمهما أحد الزبائن، أو حينما تخبرها الكفتيره بان الشاي قد (فار).
قابلتها (هاشة باشة)، فالابتسامة لا تفارقها مطلقاً.. لكأنها تتحدى بها ما تعاني من قسوة الظروف، جلسنا بجوارها بعد أن اختارت لنا أفضل البنابر لديها.. فعلت ذلك وانهمكت في تقديم الشاي لأحد زبائنها.
كيف يا بتي أنشاء الله كويسة، قالتها الخالة (التومه)؛ وهي تمد لي بيدها كوب من الماء البارد، وظلت الخاله تبادرني في كل مرة تبادر بابتسامه وترحيب.. وما أن عرفت بمهمتنا الصحفية، حتى بدت أكثر ترحيبا وخاصة بعد أن قدمت لي الشاي، وقالت: (والله يا بتي ظروفنا صعبة..والظروف دي هي الجبرتنا على الشغلة دي.. أنا هسي لي سبعة سنين في الشغلانه دي)، وأضافت وهي تمسح تلك الكباية بفوطتها: ( عندي عيال بربي فيهم.. و زي ما إنتي عارفه طلباتم كتيرة، والزمن دا لا في أخو ولا أخت بيساعد)، وما أن أكملت جملتها حتى جاءت جارتها وصاحبتها خالتو سعدية بت جمعة وكأنها تود أن تلفت انتباهها بأنها بمثابة الأخت وأكثر، يبدو أنها التقطت بعض الحديث وقالت مداعبة :( والله يا بت أمي كلامك صاح لكن ما أهندا نحن أخوات وبنساعد بعض واللا شنو)، وأكملت خالتو سعدية حديثها بعد أن أخذت ملامحها تكتسي بالجدية قائلة: (أنا أصلاً من قرية اسمها ديم زبير في واو.. جينا الخرطوم دا من زماااان لكن لي هسي ما أدونا بيت، بس قاعدين من بيت إيجار لي بيت إيجار)، وتواصل خالتو سعدية في سرد ما تختزنه من هموم تثير أحزانها قائلة:( أنا براي الشغالة، وبصرف علي عيالي، وأكلنا وشرابنا كله واقف على الكفتيره الشايفاها عينك دي، لكن يا بتي لمن يجو ناس الكشة ديل؛ حالتنا ما بتسر لا عدو لا صديق والله بزلُّونا جنس زلة .. يكشحوا لينا حاجاتنا ويشيلو عدتنا، وما بنعرف نسوي شنو .. يقولو لينا أمشو للراجل الكبير رئيس المحلية وأدفعو قروش عشان يخلوكم سمح أنحنا وكت تشيلو عدتنا دي ناكل من وين؟ وعيالنا يقروا كيف ؟ هسي عيالنا ذاتم خلو القراية يقرو شنو وهم ما لاقين ياكلو).
قاطعتها خالتو التومة قائلة بحرقة:(والله يا بتي وكت الكشة دي تجي منظرنا بكون شين وكعب، أتقول أنحنا ما سودانيين وأنحنا ما ناس البلد، زي الجايين من حتة تانية .. أنحنا نسوان كبار قدر أماتم، بس بنكوس لي عيشة وليداتنا ورزقم، و هم وكت ما عملوا لينا كشك ولا أى حاجة نقعد تحتها، حقو يخلونا نشتغل بي حالتنا دي، قبال كدا شالو مننا قروش وما شفنا منهم أي حاجة)، وتواصل خالتو سعدية قائلة :( يوم الكشة دي تجي تعالي شوفي الجري بس نلملم حاجاتنا دي ونقوم جارين لكن هسي ليهم مده ما جو وأنحنا بعد الإنتخابات دي والحكم الجديد دا خايفيين هسي جايبين معانا عده بسيطة وبنخت كبابي حبة وياهونا قاعدين وما عارفين حا يسوا لينا شنو).
سألتها عن معاملة الزبائن معها وما تكسبه خلال اليوم فردت قائلة:(في اليوم بنطلع أكان 10 ومرات 15كان السوق سمح ناكلو منها والباقي نجيب بيهو فحم وسكر وشاي وبن وكان بقت ناقصة بنشيل من بتاع البقالة بتعامل معانا وبس عايشين الله والجلالة من الشارع ده زي ما شايفننا تعبانين والله تعب شديد خلاس تقوم من الصباح تخلي جناك بي وراك وما بتعرف البحصل ليهو شنو ما في زول برعاه وما في قروش لي مدرسة وقروش إيجار البيت إلا بندخل الصندوق مع النسوان في الحلة حتان نقدر ندفعا ولو في قروش ما بتم البيت داير والشفع دايرين أكلم وشرابم وكسوتم ولو واحد مرض.. المعيشة بقت صعبة شديد.. شغلتنا دي صعبة شديد لكن الجبُر بنقعد من ستة صباحاً لحدي سبعة مساء وناس المحلية معذبننا شديد هسي الأيامات دي في حاجه إسمها الصندوق لسه ما عرفناه شنو لكن سمعنا الكلام ده من أخواتنا في بحري وجايين علينا والصندوق ده تابع لي ناس المحلية ندفعو ليهم 140 جنيه وبدورو منك شهادة سكن وصورتين وما عارفنو ده تصديق والا عشان ما يكشونا وهسي ده المحيرنا نلقط لي عيالنا والا لي صندوقم دا حكاية عجيبة الله يلزمنا الصبر).
قالت لها خالتو التومة مداعبة:( الليلة يا سعدية فشي الفي قلبك ده كلوا وأمرقي) وبسؤالها عن معاملة الزبائن والفهم الخاطئ و الجائر لبائعات الشاي قالت بعد أن اكتسى وجهها بلمحة من الحزن الذي جاهدت لتخفيه وهي تمسح وجهها بظهر يدها بذريعة العرق :( والله زباينّا البجو معاملتم كويسة شديد وانحنا بنعاملم زي عيالنا واحدين بجو من بيوتم ما شاربين الشاي وواحدين متعودين على الجبنة وواحدين بكون ما عندهم حق كباية الشاي والناس ظروفا صعبة بنديهم ونقول ليهم ما مشكلة نكب ليهم يشربو وكان عندهم بدونا والعندو بنزقيهو والما عندو برضو يشرب.. بنتعامل مع الناس في الشارع كويسين ومحترمين وستات الشاي في ناس بقولو كعبين والكعب دا في أي حتة في.. وست الشاي البقولو كعبه دي في ظروف جبرتا تشتغل شاي كان ما الظروف دي بتمرق من بيتا..؟ لكن الظروف بتجبر الناس بنقعد في ضل شجرة عشان نعيش أولادنا وده ظلم والله الكلام البقولو ده وست الشاي يمكن تكون أمك أو أختك أو مرتك أو بتك ليه تقول عليها الكلام الكعب الما بترضا لي أهلك؟...لكن بعد ده أنحنا متحملين وصابرين عشان عيالنا وموكلين رب العالمين بس الحمد لله نسوي شنو؟ وأنحنا هسي بس الدايرنو يخلونا نشتغل ما يعزبونا ويزيدو علينا بالقروش الكتيرة والكشة)..
هذا هو حالهن وما يعانين من ويلات وعذابات تتمثل في المجتمع والسياسات القميئة الجائرة فما هو حالهن في ظل التجاهل التام لهن في كل القضايا ذات الصلة بالتنمية والعيش الكريم..
____________
* نقلاً عن صحيفة أجراس الحريّة.
| |
|
|
|
|
|
|
|
| |
نجلاء سيد أحمد
بخاري عثمان الامين
cantona_1
khaleel
فتحي الصديق
osman righeem
اشرف السر
وليد محمد المبارك
احمد محمد بشير
الامين موسى البشاري
الطيب شيقوق
محمد على حسن
اسماء الجنيد
الفاضل يسن عثمان
عبدالوهاب علي الحاج
المكاشفي الخضر الطاهر
نجلاء قرافي
انعام حيمورة
Elawad
فيس بوك
تويتر
انستقرام
يوتيوب
بنتيريست