|
|
 توقعاتكم شنو لاسعار الاراضى فى حالة الوحدة او الانفصال ؟؟؟
|
طبعا انتو عارفين الاحتمالين بقو واردين وهنالك من يرجح احتمال الانفصال بناء على الشواهد والقرائن الباينة للعيان .
طيب نحن عاوزين نكون عمليين كمغتربين ونعرف مصير الاراضى والاستثمار فيها هل فيه مخاطرة فى حالة الوحدة او الانفصال ام ما زال هو القطاع الامثل للادخار بالنسبة لنا فى الحالتين .
ما يجينى واحد يقول لى انت بس ده الهاميك ؟
الهامينى كتير فى الموضوع بتاع الوحدة والانفصال وكتبت فيه كتير هنا
لكن برضو مستقبل اولادى بيهمنى اكتر عشان كده عاوزين نطمن عليه
|
|
 
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: عادل عبدالعزيز عبد الرحيم)
|
الاخ عادل
تحياتى
فى راى انو قيمة الاراضى حتنخفض وكل هذه الرواجه والارقام الفلكية
فى اسعار الاراضى سوف تخبو ... لان الاسعار السائدة حاليا هى اسعار
وهمية متسببه وفيها شبهة غسيل اموال وبعض الانشطة المخالفه والغير
مشروعة... ثانيا يكثر المعروض بعد الانفصال ويقل الطلب خاصة اذا عرض
الاخوة الجنوبيين ممتلكاتهم للبيع .. انكماش الاستثمار فى هذا القطاع
بسبب المخاوف من سياسة الدولة بعد الانفصال مع انخفاض حاد لسعر العملة
اى الدينار
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: عادل عبدالعزيز عبد الرحيم)
|
الاخ عادل
تحية واحترام
اسعار الاراضي في حالة الوحدة او الانفصال
تخضع لقانون العرض والطلب
اعتقد انه في حالة الوحدة سيزيد الطلب
اكثر من العرض وبالتالي سترتفع الاسعار
امافي حالة الانفصال فالامر لا يخضع لقانون العرض
والطلب فقط ، فهناك عوامل سياسية وقانونية تؤثر
بصورة مباشرة في العرض والطلب
مثل امكانية التملك في دولة شمال السودان او جنوب السودان
وامكانية اقامة المواطن الشمالي في الجنوب او العكس
وغيرها من العوامل
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: عبدالله ابوشوارب)
|
الاستاذ عبدالله ابو شوارب
التحية ليك
Quote:
مثل امكانية التملك في دولة شمال السودان او جنوب السودان
وامكانية اقامة المواطن الشمالي في الجنوب او العكس
وغيرها من العوامل |
انا سمعت انو حاكمنا الجيد غريشن فرض على ناس الحكومة النظرية الاتية
فى حالى الانفصال يحق للجنوبيون فى الشمال ان يبقوا لمدة عامين يقيموا فيها الوضع ومن بعدها يقرروا هل يريدون الانضمام الى الدولة الجديدة ام يريدون البقاء فى شمال السودان ( الدولة القديمة ) كاجانب وبجوازات بلدهم الجديد .
ام يريدون ان ياخذو الجنسية لدولة الشمال
وفى الحالة الاولى ان يمهلو عامين اخرى للمغادرة
وهنالك الكثير الذى يقال فى دهاليز السياسة عن نظرية البقاء والرحيل فى حالة الانفصال الذى اتفق مع الكثيرين انه قد صار هو الاحتمال الارجح .
غايتو جهجهة شديدة . ربك يسهل
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: Moneim Malik)
|
Quote: وهمية متسببه وفيها شبهة غسيل اموال وبعض الانشطة المخالفه والغير
مشروعة... |
لحبيب منعم مالك
كلامك ده مظبوط مية المية
لكن لللاسف اصبح هو الواقع الذى لامفر منه
ونحنا المغتربين بالذات دخلنا فى هذه الحلقة المفرغة
اها دايرين نعرف فى حالة الوحدة ام الانفصال البيحصل شنو
لانو السودان ده بوضعه الاقتصادى الحالى
زى الغول الذى على استعداد لاكل الجميع وقرمشتهم كمان
خايفين يقرمشونا زى البطاطس المقلية يا عمك
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: بكري عباس علي)
|
قبل الإجابة على السؤال، هنالك سؤال يفرض نفسه قانونياً، الإجابة عليه هي التي تحدد إرتفاع أو إنخفاض قيمة الأراضي بالخرطوم. الإجابة لا علاقة لها بالعواطف. والسؤال هو:
هل سيظل الجنوبيون بالشمال أم يرتحلوا جنوباً؟ والجزء الثاني من السؤال هو: هل سيرحلون – لو كان الرحيل هو الإجابة على السؤال- قانونياً أي بالأمر أم إختيارياً؟ هل سيسمح لهم التملك كسودانيين أم سيكونون أجانب ولا يسمح لهم بالتملك وعليهم بيع ممتلكاتهم ومغادرة السودان الشمالي إلى الدولة الجديدة؟
قبل معرفة الإجابة التفصيلية على هذه الأسئلة فلن يقدر شخص أن يحدد إتجاه سعر الأراضي في الخرطوم. بالرغم من ذلك فالجنوبيون – نقصد الغالبية- تملك أراضي في أطراف المدن وليست في قلبها ما عدا قلّة قليلة، فلو حدث إنخفاض في سعر الأراضي فسيكون في أطراف المدن وليس في قلبها. والله أعلم.
كبـّـاشي الصـّـافي
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: بكري عباس علي)
|
Quote: ونحنا المغتربين بالذات دخلنا فى هذه الحلقة المفرغة
اها دايرين نعرف فى حالة الوحدة ام الانفصال البيحصل شنو
لانو السودان ده بوضعه الاقتصادى الحالى
زى الغول الذى على استعداد لاكل الجميع وقرمشتهم كمان
خايفين يقرمشونا زى البطاطس المقلية يا عمك |
الاخ عادل
الانفصال احتماله اقوى من الوحدة وانا بنيت ردى ليك على هذا الاساس ولكن برضو مسالة الاسعار كما ذكرت لك فى مداخلتى السابقه
سوف تنخفض يوما لو كانت وحدة او انفصال لان الاسعار ليست حقيقة كما ذكرت لانه ليس من المنطق ان تشترى قطعة ارض بمساحة محدودة فى اماكن مثل الرياض ولا الطائف ولا المنشية
او العمارات وهى بالقياس مناطق متدنية الخدمات مشاكل مياه ومجاري وايضا كهرباء باسعار خرافية تتراوح بين المليار ونصف المليار اى ما يعادل 450 الف دولار فقط لقطعة الارض زائدا
تكاليف البنيان التى لاتقل كثيرا عن قيمة الارض اذن المنزل يكلفك 750 الف دولار ودى الناس فى السودان بيدفعوها كاش طيب مين المشترى ومنو البايع وماهى مصادر الدخل ومن هم الذين يسكنون
فى هذه المنازل صاح فى ناس استفادة من ارتفاع الاسعار فى بيع منازلهم وشراء منازل بفروقات معقولة ولكن هذه فئة بسيطة ولايمكن
ان يكون التدوير بهذا الحجم والمبالغ الخرافية والحكومة عاملة طرشة
كأن الامر لايخصها ياخ دا لعب على الدقون والمهم دا ما موضوعنا
لكن نصيحتى ليك عشان تحافظ على قيمة قروشك شوف ليك دولة تانية فيها استقرار اقتصادى استثمر قريشاتك اشترى فى مصر اشترى فى امريكا اشترى فى كندا او حتى دول الاتحاد الاوربى لان لايعقل 750000دولار قيمة بيت فى بلد تفتقد ابسط الخدمات.. والله حرام
دى تجيب ليك منزلين ممتازين فى ارقى الاحياء فى امريكا وكندا وكم بيت فى اوربا وحلة كاملة فى دول الجوار الافريقى ياخ خت قريشاتك فى بنوك ولا اشترى اسهم فى شركات مضمونة بس تكون بعيد من البلد لحدى ما ترسى على بر
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: Moneim Malik)
|
اتفق مع الأخ كانتونا... فقد سمعت أن الإخوة الجنوبيين لا يمتلكون من المنازل والأراضي في العاصمة المثلثة إلا القليل الذي قد لا يؤثر تأثيرا كبيرا في أسعار الأراضي. أتوقع أن تتأثر أسعار العقارات سلبا بصورة كبيرة في حالة أصبحت العاصمة أكثر طردا لساكنيها بسبب الاحتراب - لا قدر الله - عندها قد يفر الكثير ممن لديهم إمكانية العيش خارج السودان، وسوف يقلع المضاربون في العقارات عن الإتجار فيها، بمعنى آخر: سيصبح العرض أكثر من الطلب.
لقد شهدت مدينة الأبيض في تسعينات القرن الماضي انخفاضا نسبيا في أسعار العقارات بسبب العطش واضطرار العديد من المقتدرين لترك البلد والاتجاه صوب العاصمة، ولكنها عادت من الجديد للانتعاش بسبب تواجد المنظمات الأجنبية التي ساهمت في رفع أسعار الإيجارات، فضلا عن تحسن مياه الشرب.
وعلينا ألا ننسى مفعول التضخم وانخفاض قيمة الجنيه التي قد تحول دون انخفاض الأسعار.
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: محمد الأمين موسى)
|
الإرتفاع غير المقنن في اسعار العقارات في السودان والمعروف ب Gazumping سببه أن معظم الدخول في السودان دخول طفيلية وليست دخول إنتاجية. الدخول الطفيلية تنتج أساساً من العمولات والسمسرة. والعمولات والسمسرة لا تأتي من إنتاج عليه تكلفة من أي نوع. وتتبعها أرباح معقولة. كما أن السمسار أو متقاضي العملات لا يتعرّض لأي نوع من الخسارة. سيُدفع له لو تمت العملية وإذا لم تتم فربما خسارته لا تتعدي محادثة تلفونية وجالون بنزين.
عدم وجود خطة لبناء مساكن متعددة الطوابق وتوزيعها على الراغبين بطريقة التمليك لم تنتشر بعد في السودان. وبكل أسف عندما بدأت العملية بدأت بالأشخاص الخطأ. استلموا مقدمات وعرابين. ومارسوا عملية (طاقية دا في راس دا). لكن حبل الكذب قصير ووقعوا في المحظور وأغلبيتهم في السجون الآن بعد أن أضاعوا على الكثيرين تحويشة العمر.
الشركات الواصلة المملوكة لناس هناي وعلان.. عندما منحوا أراضي لتشييد مساكن عليها بنوها كلها على طريقة الفلل والبيوت الكبيرة. لم يهد الله أحدهم ليبني شقق تمليك. وأغلبها بائر لا مشتري له لأن أسعارها تتراوح بين ربع مليون دولار ومليون دولار. حل أزمة الأسكان وبالتالي إنخفاض اسعار الأراضي في بلد المليون ميل مربع، هو بناء عمارات متعددة الطوابق توفر السكن للأزواج الجدد وذوي الدخل المحدود (المهدود). وفي نفس الوقت تساهم في توفير الخدمات كالمياه والكهرباء بالإنتشار رأسياً حيث تكلفة الخدمات أقل من الإنتشار أفقياً. تحياتي.
كبـّـاشي الصـّـافي
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: cantona_1)
|
كباشى الصافي والله كلامك عن الاقتصاد الطفيلي عجبني بالحيل لانه بالفعل لا يكمن ان يقاس مثل هذا الاقتصاد باي نظريه سياسيه او اقتصاديه منطقيه فالفعل المعوج كارثي ولا يمكن التنبوء به وباثارة المباشر الا بعد حدوثها
----------------------------------------
لو لقيت طريقه يا عمنا عادل استثمرت قريشاتك في الارض التي انت فيها الا ان يقضى الله امرا كان مفعولا بكون احسن
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: محمد علي شقدي)
|
الأخ عادل
تحية طيبة
أسعار الأراضي ستنخفض إلي أقل من النصف بسبب الإنفصال
والعاقل أحسن يتريث
والدلالة على كدا، يوم استشهاد الشهيد الدكتور جون قرنق
إنخفض سعر الأراضي إلى النصف
والسبب هو أن في إتفاقية نيفاشا سنة 2005 قد سُميت بسنة
ألفين وخمشة، الكيزان والحركة الشعبية قعدوا يخمشوا في
أموال الدولة، ووضعها في شكل عقارات (أراضي وبيوت)
وعند الإنفصال سيكثر العرض، لأن كل قيادات الحركة الشعبية
سيبيعون أراضيهم وممتلكاتهم في الشمال.
تحياتي
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: النذير حجازي)
|
النذير حجازى سلامات
اعتقد التحليل بتاعك ده جانبه الصواب اقوليك ليه
لانو ناس الحركة ما ممكن يكونو بالغباء ده يرمو قروشهم فى بيوت فى بلد عم عارفين سلفا انهم حينفصلو منها او على الاقل هنالك احتمال ان ينفصلو منها مما يؤدى الى نزول اسعار الاراضى والعقارات فيها .
بالتالى هم اكثر الظن اشترو بره وليست لديهم اصول عقارية فى الخرطوم مما يساعد على استقرار الاسعار فى حالة الانفصال .
انا كايس لى طريقة اطمن بيها نفسى انو سعر قطتى ده ما ينقص
كما ن لو لقيت لى زول جاب لى تحليل انها حتزيد اوووووووف ده بيكون عدله معاى 100%
يديك العافية يا نذير
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: Moneim Malik)
|
شكرا اخوى منعم مالك نصيحتك مفيدة وقيمة شديد
انت عارف اصلا هو قريشات يشترو بيها مافى
ديك الاشترينا بيها القطعة الاولى يالتلتلة ويالا يالا جمعناها
لكن عجبتنى حكاية بيتين فى اورباء دى
حقو الواحد يبيع فى الخرطوم ويشترى هنالك
ويقشر بالجماعة فى السودان يخليهم يندمو على يوم الخلاهم يسكنو فى الرياض ولا المنشية زاتو
ياخى ليك التحية والتقدير تانى على النصائح المفيدة دى
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: Ahmed musa)
|
سلام لصاحب البوست
وتحياتي للجميع
كلام اخونا كانتونا في ملحه، من الصعب معرفة مصير الاسعار لان العوامل
التي تحدد سعر الارض نفسها مجهولة، اهما، هل يبقى الجنوبيين ام يرحلوا
في حال الانفصال:
والاهم، هل يسكون الترحيل اجباري ام اختياري
اجباري ام اختياري دي مهمه في شنو؟؟
لو الترحيل اجباري (كما توعد الكيزان) سيغل السماسره وضعاف النفوس الموقف
ويبخسوا الناس اشاءهم. لان الجنوبي مضطر يبيع، عكس لو كان الخيار اختياري
او فيهو مهلة سنتين كما قرانا فوق. عندي كلام كتبته قبل فترة اقتبس منه
8Quote: - لا يسمح لحكومة الشمال باجبار شخص جنوبي للعودة للجنوب، حق العودة الطوعية.
ويا سماسرة الاراضي والبيوت بالله لو في جنوبي داير يبيع عقاره في الشمال
رجاءا لا تبخسوا الناس اشياءهمن وحاسبوهم بما يرضي الله |
في هذا البوست دعونا من البكاء ... هذه مطالبي لاستحقاقات الانفصال .. كشمالي طبعا
اتوقع انخفاض بسيط في اسعار الاراضي والبيوت بعد الاستفتاء لرغبة البعض
في العودة نهائيا الى الجنوب وبيع ممتلكاتهم في الشمال.
لكن البهمني انا حاجة تانية خالص، ليس اسعار الاراضي في الخرطوم
بل اسعار الاراضي في الجنوب، خلوكم صاحين يا معلمين، لو عندي قروش بشتري هسه في الجنوب
وهو رخيص، ومية المية، انفصال او وحدة الاسعار ح ترتفع في الجنوب شايفين كيف؟؟ انفصال او وحدة
انت كسبان
وبرضو كتبنا في نفس البوست
Quote: عملة شمال السودان (على تعاستها) ستكون قوية كقوة شرائية في الجنوب
ماذا يعني هذا الكلام.
القروش البتجيب ليك 500 متر في الشمال ممكن تجيب ليك فدان في الجنوب
وهذا ما قد يغري الشماليين بشراء اراضي ومساحات كبيرة في الجنوب (ساكت كده بس)
جوبا غالية، وقد يختاروا اي مدن اخرى وذلك باغراء السلاطين بالاموال
الحركة الشعبية والسياسيين في الجنوب قد يحسبون الف حساب لخطوة كهذه
وسيعاندون بيع الاراضي للشماليين، لذلك قد يرفضوا توقيع اتفاقية الحقوق الاربعة
كالتي مع المصريين واهما (حق التملك)
غايتو يا الجلابة، مع الانفصال برضو ما دايرين تخلوهم |
تحياتي
| |
|
|
|
|
|
|
|
|
|
Re: توقعاتكم شنو لاسعار الاراضى فى حالة الوحدة او الانفصال ؟؟؟ (Re: أحمد ابن عوف)
|
في راي
اسعار الاراضي لن تنخفض ابدا بل ستزيد
واسبابي:
الاراضي هي الضامن الوحيد للمال في السودان
وهي التجارة الرائجة
الناس لا تثق بالبنوك والسياسات المتقلبة
وكل اموال السودنيين يكبونها في الاراضي
ولن يسمح سماسرة الاراضي بنزول اسعارها فهذا ميدان تحكمهم
كذلك الحوجة للمساكن ستظل قائمة وهو مما يساعد في كون الاراضي
هي التجارة الحقيقة في السودان ويالبؤس التجارة غير الانتاجية
والله اعلم
| |
|
|
|
|
|
|
| |
عادل عبدالعزيز عبد الرحيم
Moneim Malik
يسرى معتصم
بكري عباس علي
cantona_1
محمد الأمين موسى
محمد علي شقدي
النذير حجازي
Ahmed musa
أحمد ابن عوف
Mamoun Ahmed
فيس بوك
تويتر
انستقرام
يوتيوب
بنتيريست