|
|
 الســـــــــاقطات
|
أحذركم منها في رمضان.. ويلاتها كثيرة.. أقلاها تلبك المعدة والإصابة بالنزلة الشعبية والإنفلونزا والإلتهاب.. وعسر الهضم والقبضة المعوية والمغص المفاجي
.............
نحن في السودان نقول موية ساقطة.. ماعارف كلمة ساقطة. أو صاقطة دي جبناها من وين.. المصرين يقولوا حاجة صاااءه.. صاقعة يعني تصقع في الدماغ.. معظم الصايمين وبالذات الناس اللى صحتهم كويسة تلقاهو خاتى كوز موية بارد مدنكل في الفريزر قريب لحظات الفطور جري قطعوا حتى يجي يشوف الباقي.. ودا أخطر من السرطان على المعدة.. المعدة طول نهارها فاضية ومولعة وساخنة.. تجي تديها حاجة عكس.. يعني زي الزجاجة التي تسخنها على نار وفجأة ترميها في كورية فيها تلج وماء.. ماذا يحدث لها .تتشقق.. كذلك المعدة .بس دى لأنها جبارة الكسور وحمالة التقيلة عيوب الخطأ فيها لاتظهر في اللحظة.. بس هى بالضبط زى الزجاجة الإتكسرت..
..........
كبارنا كان يوصونا بشرب شى دافي فى الأول.شوربة.. وغيرو.. كنا نخلط شوية حرجل مغلى في النار مع شوية تمرات..يصفوا ويوضعوا في براد مثل الشاي وتصب في الكبابي.لونها أحمر خفيف طعمها قريب من الحلو مر.. ويشبه العرق سوس..لازلت أحصد عافية هذا المشروب حتى الآن ولازلت مداوماً عليه..ناس تانيين عندنا تبل ( المحريب أو الحمريب في موية.. وتجي تغليهو وتصفي مويتو وتضيف ليهو السكر.. وتسخنوا عند الفطور تشرب منو قدر فنجان قهوة صغير.قبل كل شى، ثم تبدا في الرزع واللت والعجن بعد داك.. المصريين يسموا الحمريب أو المحريب..( حلفا بر).. ونبات الحلفا شى تاني عندنا في الشمالية وبعض مناطق السودان..
..........
هسه تجد معظم الناس في رمضان عندها نزلة شايلاها وحايمة بيها. وخطرها ماحق على الأطفال اللى بيحوموا بين رجلينا. وكل السبب الموية الباردة وهجمة المعدة في الأول بالشى البارد شديد...
...........
تصدق لو شربت جغمة مشروب ساخن او دافى. بعد شوية كان شربت بارد ما بيعمل ليك حاجة..
..........
الشفقة تطير ياجماعة والأكل ملحوق.سبتوا المعدة بي فنجان شى حار..
........
شوربة الدجاج الخفيفة مناسبة .
أهلنا في المناصير كان يغلوا الحرجل ويعملوا ليهو شوية سكر وقليل من النعناع.. والله الحكاية دي مفيدة جنس فايدة.. هي وصفة لى عجوز حكيييم منصوري قبل مائة سنة.. هسي دي لغاية يوم الليلة شايف ناس من خارج المناصير يعملوا الوصفة دي.. مجربة.. قالوا أقلاه تمنع سرطان المعدة.. وتهدئ الأعصاب، وتخفف صداع رمضان البعد الفطور وتثبت عصارة الأمعاء الدقيقة.. واحد من أولادنا في أمريكا عمل هذه الوصفة وأعطاها معمل متخصص.. قال الكلام ده وقال ما عارف فيها مادة شنو شنو شنو كلام كتير. فنجان موش كتير.ز لأنو الحرجل الكثير بيعمل إمساك .زما تكون مركزة.. بالمناسبة الحرجل علاج ناجع للإسهال حتى ولو تمضغوا مضخ.. ناس العاصمة يضيفوه على مديدة الحلبة بالسمن البلدي
........
لذلك أحذركم من الساقطات..
أنا عارفكم لو ما كتبنا ليكم العنوان دا.. ماكان حاتجوا تقروا الكلام الطبي دا.. عشان تستفيدوا..
عافية لكل أخواني واخواتي
شايفين أعضاء وعضوات وقراء سودانيزأونلاين بيهمونا كيف؟
|
|
 
|
|
|
|
|
|
|
|
Re: الســـــــــاقطات (Re: منصوري)
|
الساقطات عندنا في مائدة الإفطار السودانية.. أهمها..جك الابري الأحمر.. الحلومر وجك الآبري الأبيض. ودا غالباً بيكون عند السحور... وجك العرديب.. وجك القمردين.. وجك الليمون الأخضر...
بالله دي ما تبردوها شديد.. قدر ما لاقني سوداني أو سودانية او بعض العرب في مراكز التسوق أو المول. إلا شايلين نزلات بالكوم وحايمين بيها.. تفسد عليهم بهجة التسوق.. أنا شخصياً أكره النزلة في بلاد الخليج. أخير تتعمل ليك عملية ماتجيك نزلة.. لأنو البلد رطوبة.. والأكسجين الجيد الصافي مافي.. والنزلة تعولق الزول وتطول شهر كامل ماتروح من الزول.. وحكاية..
وكل السبب الساقطات..والواحد مايقدر يمسك نفسو
| |
|
|
|
|
|
|
|
|
|
Re: الســـــــــاقطات (Re: منصوري)
|
معروفة عندي كلمة سقط في اللغة العربية.. وقديماً قال إمرؤ القيس( قفا نبك من ذكرى حبيب بمنزل...بسقط اللوى بين الدخول فحومل)... .. والعبارة الماثورة عربياً( سقطت ركابنا).. ويقال سقطت الإبل أيمن الوادي..اي رتعت..ونزلت بأسفل الوادي... وبعدين برضو درسونا زمان في علم الهندسة الميكانيكية..الرسم الهندسى ..في الأيسومترك والأوبليك.نظام الإسقاط..كل هذا معروف.. لكن أنا أقصد إنو في اللهجة السودانية.اخذت مدلول خاص.. موش بمعني سقط ..وقع أو نزل او تدلى.. عندنا صارت تعنى الشئ الصاقط.الساقط المتلج,, وكما يقول أخوانا ناس كليات الآداب( اللغة وليدة الواقع) والواقع عدنا في السودان مترهل .. ختري ما بيشبهونا فيهو ناس.. كان في السياسة ما خلينا لينا جحر ضب خرب ما دخلنا فيهو أو الإجتماع .. إجتماعياتنا عاد الله لاوراك ..أو الإقتصاد..إقتصادنا بايظ كان على نطاق الأسر أو الوطن..ومعظم سبب بوظان إقتصاد الأسر السودانية هي المرأة السودانية.. جنس هوايل.. جنس هتُك.. لكن في واحدات فالحات والله..( بيرق مرفوع من شدة وقع الخوف.. والخوف ابو الشرور والآفات الاجتماعية كلها)
| |
|
|
|
|
|
|
|
|
|
Re: الســـــــــاقطات (Re: منصوري)
|
كل الفنانين غصباً عنهم ما بيشربوا الموية الباردة.زخاصة قريب موعد الحفلة..
...........
والموية الساقطة شديد تعمل( تهتك في غشاء الحلق) وتهري الحبال الصوتية للفنان
.........
معروف أن محمد وردي لايشرب موية باردة بل يشرب موية دافئة وحارة احياناً.. بالإضافة للملكات المودعة في وردي .. والتمارين .. هذا هو السر في بقاء صوته ردحاً من العمر..
..........
الموية الساقطة والحاجة الحلوة والسكر قريب ساعة الغناء الفنانين ما بيتعاطوهم..
.........
| |
|
|
|
|
|
|
|
|
|
Re: الســـــــــاقطات (Re: منصوري)
|
حمد الريح قال انا غايتو بحب الكيك والجاتو والموية الساقطة ديل كان كتلوني مابخليهم؟
زمان لما الهلتون كان هلتون. جديد بي شرايتو الهلتون.والإدارة كلها إنجليز ورؤساء الأقسام إنجليز وأمريكان واجانب.
اها حمد كان عازمنو ليحيي حفلة العاملين السنوية.. نظمنا كلجنة الحفلة.. بعد ذلك نحنا في الهندسة طبعاً عرفنا نصيبنا في تجهيز الحفلة.. حاجة بيسموها إيفينت أوردار.. وبعد داك طبعاً يستلم التنظيم للإستعدادات كلها.. قسم الفووود آند بيفاريدج.... وقسم الفووود آند بيفاريد يديها قسم الآوت صايد كاترينق..
أها ما كان في مكان يقعدوا فيهو حمد الريح.. قعدوهو في المطبخ الرئيسي في مكتب مدير قسم الإستيواردنق لقيتو ليك اكل ليهو في جاتو وجنبو كيك جابوهو ليهو..
تحدث معاي بكلام كتير عن الفن.. لكن قال لى
| Quote: انا غايتو بحب الكيك والجاتو والموية الساقطة ديل كان كتلوني مابخليهم؟ |
| |
|
|
|
|
|
|
|
|
|
Re: الســـــــــاقطات (Re: سيف النصر محي الدين محمد أحمد)
|
سيف النصر!!!!
يازول نحنا في رمضان؟؟
إنت إسمك سيف النصر..مفروض تنصر أخاك ظالماً أو مظلوما
..........
نحن حا نسميك ( سيف العبور) بدل سيف النصر.. وممكن نضبح ليك خروف تاني عشان الإسم الجديد
..............
تصوم وتفطر على خير يا سيف يانصر..
| |
|
|
|
|
|
|
|
|
|
Re: الســـــــــاقطات (Re: سيف النصر محي الدين محمد أحمد)
|
أخي / منصوري
تحياتي ،
ورمضان كريم ، وتصوم وتفطر على خير
وتقبل الله منا ومنكم الصيام والقيام وصالح الأعمال .
بصراحة لمن قريت العنوان قلت يا ساتر !! ده كلام شنو ده
في هذا الشهر الفضيل ؟ يا ربي تكون رواية أو قصة وأخونا
منصوري عاوز يتحدث عنها أو قد تكون من تأليفه ؟!
ولمن دخلت فوجئت بأنك تعني الحاجات الباردة أو الساعأة
على حسب نطق اخواننا المصريين .
عنوانك جاذب لأنه خادع !؟ وهو نداء قوي منك للقراء للهجوم
وإلتهام السطور المستخبية وراء هذا العنوان المثير ؟!
و .. موضوع جميل وشيق ، وزي ما نصحونا كُبَارنا زمان في
هذا الشهر ، عليك بالحاجات الدافئة أو السخنة في
بداية الافطار حتى تتهيأ المعدة تماماً للمعركة القادمة ،
وتخرج أنت منها سليماً معافى ، لا تشكو مغص أو تخمة .. الخ .
مودتي ،
( ليمو )
| |
|
|
|
|
|
|
|
|
|
Re: الســـــــــاقطات (Re: abdulhalim altilib)
|
عبد الحليم الطيب أما أنك رجل سريع البديهة
بالضبط هو هذا المقصود.. عايزين نقدم ليهم علاج وتجارب. لكن معظمهم ما بيجوا..
وهذا فن الصحافة والإخراج.. ويقول لك( في التعاريض مندوحة عن الكذب) والشيخ فرح ود تكتوك قال( المابيفهم بالتلاويح..لابيريح لابيستريح)
لغاية هسي دي.معظم شركات الأدوية تغلف الدواء بعازل مستصاغ خاصة الحبوب
مافي شي يهلك المعدة غير الموية الساقطة شديد في الفطور..
لازم تحنس المعده شوية شوية شوية
ونحن هنا نسوي موية السكر للقراء يا عبد الحليم
عشان عسى ولعل معلوماتنا هذه يلتقطها واحد ويعمل بها.. فيكتب لنا أجر..
وهذه حمر النعم التي عناها النبي صلى الله عليه وسلم
حيث قال:( لأن يهدي الله بك رجلاً واحداً خير لك من حمر النعم) الهداية موش ضروري تدخلوا الإسلام.. دي معنية برضو.. لكن الداخل الإسلام نفسو لما تقدم ليهم تجاربك.. بتفديهو..
والهداية من الله
( إنك لاتهدي من أحببت، ولكن الله يهدي من يشاء)
........
لاحظت انت يا عبد الحليم قدرة الجذب الصحفي؟؟
والله كم تمنيت أن ادرس صحافة بدل هندسة.. لكن اقدار كتبت علينا نمشيها..
معظم اصدقائي وصديقاتي من الصحفيين..
ما تراهو نحن هنا بالممارسة برضو في سودانيزأون لاين صحافتنا مقبولة.. وتمشي.. موش زمان كان في بوست زي ده هنا.. واحد تحدث عن الكتاب والأدباء والشعراء والفنانيين في سودانيز اون لاين.. وخاصة تحدث البوست عن مهنة الصحافة وتطويع القلم وسيولته..
شكرا استاذ عبد الحليم الطيب
| |
|
|
|
|
|
|
|
|
 Re: الســـــــــاقطات (Re: قلقو)
|
| Quote: يازول نحنا في رمضان؟؟ |
عشان كده يا منصوري لازم نمرق النصيحة,و الجماعة ديل يمكن زي ما قلت ما بيشربوا البارد
قبل الغناء لكن كريستال البلح ده منهم ناس كتار بيضربوا قبل الغنا مباشرة و بين الفواصل
و يمكن اثناء الغناء ظاااتو.
| |
|
|
|
|
|
|
|
|
|
Re: الســـــــــاقطات (Re: منصوري)
|
سيف النصر يا سيف يازول....
البحل أب ضريس من نقارة الناس شنو؟
ده مثل منصوري أحكى ليك قصتو
اللعب مدور والطنبور شغال والحفلة مولعة في المناصير والبنات يرقصن
واحد إسمو أب ضريس
جات بت سمحة كده ترقص . أجادت فن الرقيص خلبت ألباب الناس الواقفين في الدارة كلهم
اها أب ضريس ده زول درويش كدة زي الزين داك الفي فلم عرس الزين بتاع الطيب صالح أها أول ما شافا أب ضريس شالتو الهاشمية
طوالي ختف النقارة البنقز من العازف وقال إلا يرقصا هو ويلا البت رقصت وطلعت واللعب إتفرتك والناس راحو والمكرفونات فرتكوها والدنيا بقت ليل خالص وأب ضريس يدق في النقارة سكران بجمال البت الأخاذ ويدق للصباح واليوم التاني جاء ويدق في النقارة يومين قاعد يدق لا أكل لا شراب.
من هنا جاء المثل المنصوري
( البحل أب ضريس من نقارة الناس شنو؟)
دحين ياخي خلينا من المنجوهة دي ورمضان شغال
.............
اية رايك يا سيف
عندنا فنان الشمال المنصوري بتاع الطنبور المشهور عيسى بروي لا يتعاطى هذه المنجوهة
ومعرف عنو بين الفواصل يقدموا ليهو كورية لبن حليب
أها رأيك شنو
خلينا ياخي في الساقطات
عشان ما تضرر في رمضان
أعصر على الشوربات والحاجات الساخنة
| |
|
|
|
|
|
|
|
|
|
Re: الســـــــــاقطات (Re: حبيب نورة)
|
حبيب نورة قلت لي كيف!!
العصر الحالي عصر مائي
شيئان لايطفى الضلال سواهما... نور مفاض أو دم مسفوح
نسأل الله أن نخلف وراءنا عهد الدم المسفوح
ونجي لى موية الله والرسول زي ما قال حبيب نورة
| |
|
|
|
|
|
|
|
|
|
Re: الســـــــــاقطات (Re: منصوري)
|
البطيخ برضو من الساقطات البي يحبوها السودانيين جداً في رمضان.. وهو مغري وفيهو موديلات كثيرة وغريبة في الخليج..
في ناس يشتروا البطيخة كاملة ياكلوا نص في اليوم الأكل والنص التاني ياكلوه بكرة
أها النص التاني المحفوظ ده في اليوم التاني راح يكون بارد برودة غير طبيعية والبطيخ في الثلاجات معروف أنه يمتص البرودة بسرعة..
يعني أكثر شئ في التلاجة محفوظ يمتص البرودة بسرعة هو البطيخ
طبياً ننصح إذا كان لابد من أكله، يجب إخراجه من الثلاجة قبل مواعيد الغفطار بساعة كاملة
............
إقتصادياً:-
نوصي بشراء نص بطيخة.. المولات الكبيرة في الخليج تبيع نص والنص التاني تلقاهو مغطى بورق حفظ في محلات الخضار داخل المولات الكبيرة
ليه نص
لأنه البطيخ مقارنة بأسعار الفواكه الأخرى يعتبر غالي نسبياً..
ثانياً نص.. عشان تقدر تعرفوا من شكله .. قوة حلاتو
الناس الموفقين في معرفة البطيخة الحلوة ، لمان يلقوها نص.. تزيد معرفتهم بها ولا يختاروها إلا وهي حلوة
ليه لأنو البطيخة وهي مقفولة صعب تحديد حلاوتها، لذلك أحسن ليك نص بدل ما تشتري بطيخة مقفوله وأنت صايم وتمنى نفسك ساعة الغفطار ببطيخة حلوة.. تجي تلقاها ( حنظل القيزان)
والمثل السوداني يقول ليك
( ها آزول هي.. زولك ده بطيخة مقفولة ما بيتعرف)
| |
|
|
|
|
|
|
|
|
|
Re: الســـــــــاقطات (Re: منصوري)
|
يا منصوري
زمان مارلين مونرو عملت فيلم "البعض يفضلونها ساخنة" . فصدقت و هي من الكاذبين.
غايتو لو لقيت ليهو تسجيل يمكن انزلوا هنا ..الا لو اتحججت برمضان بعفيك .
| |
|
|
|
|
|
|
|
|
|
Re: الســـــــــاقطات (Re: سيف النصر محي الدين محمد أحمد)
|
| Quote: الا لو اتحججت برمضان بعفيك |
سيف النصر
إتحججت برمضان
أوعك من فنانين الغرب ديل.. قاعدين يطمموا بطني
وكمان مشاط الرجال زي ما قالت
تيسير عووضه
هوع مشاط الرجال
الراجل مفروض يكون لى مرتو كامل الرجولة
والمرأة لى راجلا مفروض تكون كاملة الأنوثة
ولابد من تصفية الخلط المشوش في الأجساد والعقول
| |
|
|
|
|
|
|
|
|
|
Re: الســـــــــاقطات (Re: منصوري)
|
برضو من الساقطات البي يحبوها السودانيين في رمضان.. البطيخ.. نوصي بأكله بس مايكون بارد شديد وبرودته تفسد المتعة والإستلذاذ بأكله.. يغسل الكلي ويساعد في إدرار البول وبه بعض الألياف تزيل بعض الأشياء الغير مرغوب فيها من جهاز المعدة والجهاز الهضمي..
والبطيخة لما تكون حمراء بس غير( ملقية) ماعارف كلمة ملقية دي نحن السودانيين جبناها من وين.زلهجة خاصة موش.. ملقية يا اولاد الزمن دا ..أي نضجت حتي اضمحلت وصارت مهرودة من الداخل..
والبطيخة لما تكون كاربة وتلقا ليك مرة فنانة تقطعها صاح وتعمل ديسبلي في طريقة عرضها واخراجها لاتبدل بأي أكلة في رمضان أقصد تحلية.. كنا في هندسة هلتون وكان زملانا في المطبخ لهم فنون في تقطيع البطيخ والله يقطع ليك البطيخة دي بصورة غريبة لو ماعندك نفس تاكل تجيك شهية ونفس للأكل..حتي قشرتها الخارجية يعملا ليها اناء ويعمل ليها يد بالقشرة الخارجية من برة يخليها زي سبت حلاوة الماكنتوش.. وعندهم معدات وقوالب يرسموا ليها ويخرطوا قشرا دا بصورة تحير.. أمال هلتون خمسة نجوم ليه...
دا عكس لما يكون بطيخ مكوم في شارع الشنقيطي كبري النص. يا داب نزلو لوري لواحد عريبي. كدة يبيع ومركب سكينو في ضراعو ويقول ليك حرم على السكين اشرطا ليك هسه.. وهو بلطجي وفهلوي لايعرف عن اساس البطيخ شى..
مرة بعد الغداء في الثورة.طلعوا اتنين يجيبوا بطيخة ..واحد مهندس زراعي خريج جامعة الخرطوم.إختار بطيخة وقال البطيخة دي حلوة.شيلوها.. لأنو نسبة الكلورفيل في قشرتها كدة.. ونسبة البياض في خارجها كدة.. وتماسك الصدفة الخارجية كدة. واحد تاني اخونا زول من ناس الجزيرة.. قال ليهو بطيختك دي ما نجيضة؟ المهندس اصرا قال نجيضة.. قال ليهو طيب شيل واحدة وانا بشيل واحدة اذا انت مصر. بتاع الجزيرة الولد الصغير مسك طبطب كدة على البطيخة بي جاي وبي جاي..
جينا البيت لقينا بتاعة المهندس الزراعى مرة ومالحة وغير حلوة. وبتاعة الولد الصغير عسل بس... واحد أخونا قال أها شوفو يا جماعة علم التجربة مفيد كيف؟ موش في الدين بس في اى شى. دا زول قريناهو وتعبنا عليهو والشعب صرف عليهو ودخلناهو جامعة الخرطوم.. ودا زول ساكت جاي من الجزيرة ام بارح؟..
وعندنا في السودان النوع الجيد داك المطاول المستطيل من البطيخ يسموهو الروثمان.. تلقي من جوة لبتو حتي عليها ندي كدة وعليها ذرات حلوية شبيهة بذرات الرمل دريش دريش..ولونه مايل للحمرة الداكنة.. ونسبة الحبوب فيهو ماكتيرة عشان ما كل مرة تتف الحب..هذا الروثمان في رمضان لايقاوم وله سحر خاص.. نوصي بأكله لأنو في الخليج عرق مافي عن طريق الجلد والمسام.. كل الأرض مكيفات.. يعني الحمل كلو والسموم كلها تجي عن طريق الكلى خاصة سموم الأكل المعلب والخضروات التي بها الكيمائيات.. هناك في السودان جرية واحدة وراء بص الحاج يوسف عشان تركب ممكن تشيل ليك كل السموم وتعرق عرق سنة..نوصي باكل هذا النوع من الساقطات بس ما يكون بارد شديد
| |
|
|
|
|
|
|
| |
منصوري
abdulhalim altilib
قلقو
حبيب نورة
فيس بوك
تويتر
انستقرام
يوتيوب
بنتيريست