|
|
 ثــرثــرة فــوق الــبــورض ...
|
إتنين من أهل البُطانة مستعجلين وخابين خبيب شديد جداً شاقين البطانة، ينهبو في
الأرض نهب. في عجلة من امرهم. فجأة شافو شيخ ابسن قاعد تحت ضُل شُدرة.
واحد قال لصاحبو: النغشى شيخ العرب نسلّم عليهو.
التاني مُستعجل جداً، قالوا: الزول دا بمسكنا، ونحن مستعجلين.
صاحبو قال ليهو: أفو، عآد بنفوت شيخ العرب بلآ سلآم كيفِن؟
ردّ عليهو: يا اخي الزول دا لحوّح، وبيمسكنا في الكلآم، ونحن مستعجلين.
ردّ عليو: آزول حرّم مابنفوت شيخ العرب بلآ نطايبو.
قالوا كدي مشو عليهو...
: ســـلآم شيخ العرب.
شيخ العرب: مرحب حبابكم، إنتو منو؟
القال نغشاهو: انا ود فلآن الفِلآني.
شيخ العرب: آآآآ، وإنت؟
المستعجل: انا ود فِلآن الفِلآني.
شيخ العرب: آآآ، دحين إنت واخوانك مالسرقتو جمال ناس فِلآن؟
المستعجل: ابداً يا شيخ العرب، ديّل ما نحن.
شيخ العرب: نآن السرقِن منو؟
المستعجل: ديّل وِلآد أعمّنا.
شيخ العرب: اها، ووِلآد اعمّكن قُدرتُن شنو يسرقوا جُمال الناس؟
المستعجل: والله يا شيخ العرب....
شيخ العرب(مُقاطعاً): الحليفة العليك شنو كمان؟ تسرقو جمال الناس، وتقعدوا
تحلفوا!!!
المستعجل: لكن يا شيخ العرب...
شيخ العرب (مُقاطعاً): لكن شنو كمان؟ السرقة دِي مِي عيّب؟
المستعجل: عيّب يا شيخ العرب. لكن...
شيخ العرب (مُقاطعاً): ماتقول لي لكن، وكت عارفنها عيّب سارقين ليه؟
الجماعة يدورو يتخارجو، وشيخ العرب عاصر عليهُن.
المستعجل: يا شيخ العرب نحن ماشين.
شيخ العرب: تمشو وين؟ كدي في الأوّل وريني ولآد اعمّك ديل سرقو الجمال ليه؟
المستعجل: والله يا شيخ العرب تقول شنو؟ كلوا من إبليس.
شيخ العرب( مُقاطعاً بإستغراب): إبليس!!! والله قال إبليس، قال!!!؟
المستعجل: يا شيخ العرب نحن ماشيّن.
شيخ العرب: ماشين وين؟ كدي في الأوّل وقّع لي حكاية إبليس دي!
المستعجل: يا شيخ العرب نحن مستعجلين.
شيخ العرب: والله قال إبليس قال! إبليس دا مشى لولآد أعمّك في البيت قالهم امشوا
اسرقوا جمال الناس؟
المستعجل: لكنـ....
شيخ العرب (مُقاطعاً): والله حكاية! تسرقوا جُمال الناس، وعُقُب تسووها في إبليس؟!
المستعجل: يا شــ...
شيخ العرب: والله حكاية إبليس دي لكن حكاية! تسوّو سواتكم، وتعلقوها في إبليس
المسكين دا!؟
بعد رجّة ومناتلآ شديدة جداً حتي شيخ العرب اطلق سراحهم.
المستعجل قال لصاحبو: البلآ، شيخ العرب التقوّل إبليس ود اعمّوأ!!!!!!!!
|
|
 
|
|
|
|
|
|
|
 Re: ثــرثــرة فــوق الــبــورض ... (Re: معاوية المدير)
|
الوآطة صباح، قريب مواعيد الفطور كده. مجموعة من الرباطاب قاعدين يتونسوا
تحت تمرهم في جهة ابحما، فجأة ظهر خواجة يمتطي ظهر موتر صحراوي اررررر،
اررررر، ارررر، وقف بالقرب منهم، وطلّع شنطة العِدة بتاعتو، مفكات وزرديات
وغيرو وبدأ يعافر في موترو. الرباطاب مشو عليهو. غايتو من جآي لجآي فهموهو
إنهم عازمنوا فطور. الخواجة جازفها معاهم وفهمهم إنو فاطر، وشكرهم. الجماعة
الرباطاب رجعو لونستهم.
الله يكرمكم، بعد شويّة جا واحد رباطابي راكب حمارو،عر، عر، عر،: سلآم عليكم
يا ناس هوي.
الجماعة: مرحب حبابك، إتفضّل الفطور.
الرباطابي، فنترب، تلّب من الحمار، ربطو في نخلة، ومشى عليم.
وآحد من الرباطاب قالوا: الخواجة دا من لندن جاي فآكِ الريّق. إنت من هنا لهني
جايينا مريوق!؟
| |
|
|
|
|
|
|
|
|
 Re: ثــرثــرة فــوق الــبــورض ... (Re: معاوية المدير)
|
الرئيس عبود عليه رحمة الله، في زيارته للصين اطلّ من شُرفة القصر لقاليك كمية كبيرة
جداً من الصينيين في الخارج، وراح شابكم ليك تحايا، يرفع في يدينو ويلوح ويتبسم
مبسوط. بعد شوية الإشارة فتحت خدرا، الجماعة فووووووو قطعوا الشارع...
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
واحدة إتقدم ليها راجل كبير ووافقت. بس صاحباتها شبكنها ليك: لكن والله بالغت، ياخ ده
هسع ما قدر ابوكِ. بتبالغي لكن دا رضيتي بيهو كيف. هسع الناس يقولوا عليهو راجلك،
واللآ ابوكِ؟!
كرهنا ليك عيشتا. يوم العرس قاعدة مع عريسها في الكوشة وصاحباتا قاعدات جنبها،
الراجل قام مشى يبشر علي اصحابو. واحدة كحلتو ليك، وطوالي قالت ليها: لكن وحات
الرسول بالغت! الراجل ده ضهرو محني عديييييل كده.
قالت لها: يا زولة محني، محني، انا عايزة اسطّرِ بيهو...
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
ود فرح، عربي من سيدون. دايماً يجي الحِلّة جالبلو، يا إمتاً عبور، او نعجة بجناها،
او عتود، وهكذا.
مرّة بيصلي مع الجماعة في صلآة المغرب، وجنبهم حوش فيهو تمُر. اها ود فرح
فجأةً مرق من الصلآة، ومشى إتاوق في الحوش وجا يردد: مِياهآ، مِياهآ، وواصل
الصلآة مع الجماعة.
ابو الجيّب قالوا: يا ود فرح صلآتك دي بآطلة.
ود فرح قالوا: يا زول صلآتي مِي باطلة.
ابو الجيب قالوا: يا زول إنت مرقت، وجيت تقول مِياهآ، مِياهآ. ما بطلت كيفِن؟
ود فرح قالوا: يا زول إنت قايلآ مرا ! الشي مِيِ مرا، نعجة، نعجة..
| |
|
|
|
|
|
|
|
|
 Re: ثــرثــرة فــوق الــبــورض ... (Re: محمد علي شقدي)
|
| Quote: معاوية المدير يازول سلام وربنا يمتعك زي ما متعتنا بالضحك بالله واصل |
ســــــــــلآم يا شقدي، ورمضان كريمـ...
قلنا نرفه شوية، الأيام دي في مدآعاة شديدة والناس
قربت تصل حد المباهلة.
نصيحتي لكلٍ من يدخل البورض ان لاينسى هذا الدعاء:
اللهُمّ إني اعوذ بك من ان أضِل او أُضل،
او اذِل، او أُذل او أظلِم او أُظلم او اجهل
او يُجهل عليَّ...
| |
|
|
|
|
|
|
|
|
 Re: ثــرثــرة فــوق الــبــورض ... (Re: معاوية المدير)
|
Quote: ود فرح، عربي من سيدون. دايماً يجي الحِلّة جالبلو، يا إمتاً عبور، او نعجة بجناها،
او عتود، وهكذا. |
ود فرح بتاع فنيلتك؟ دا صديق مهدى على زاااااتو
مشتاقين يامدير
ــــــــــــــ
انت ضارب ليك كوز طمى ولا شنو؟
| |
|
|
|
|
|
|
|
|
|
Re: ثــرثــرة فــوق الــبــورض ... (Re: طارق جبريل)
|
Quote:
ود فرح بتاع فنيلتك؟ دا صديق مهدى على زاااااتو
مشتاقين يامدير
ــــــــــــــ
انت ضارب ليك كوز طمى ولا شنو؟ |
ســـــــــلآم اخونا طبنجة.
والله مشتاق ليك حد الرصاص زاتو.
عليك الله تعال شوف طارق تنقا عمل شنو!!!
في عطبرة، الواطة سخانة مولعة نار،وعطبرةعدمانة أسم التلجة. الناس يكفحو في الموية زي السليقة. في نسوان في الإسبتالية ينضمن قالن البلد ما فيها تلج، قام سمعن طارق تنقا،قالهن: التلج رااااقد ، هسع أكان دايرتلكن تلج أجيبلكن.
قلن لو: إنت يا يابا تتبارك، بسراعك الحقنا بيهو.
يا زول تنقا مشى جابلهن كمية بتاعت تلج. والنسوان قعدن يبردن في الموية ويشربن، ويدعن لتنقا وتلجن مطفح في المواعين. جا راجل سعلن من وين جابن التلج؟
قالن لو: جابو لينا الولد المبروك داك.
الراجل مشى سأل تنقا، تنقا قال ليهو: تعال معاي التلج راااااقد.
الراجل مشى مع تنقا، تنقا وداهو المشرحة. قالو: التلج ياهو دا!!!
الراجل مشى للنسوان قالهن: الولد دا جابلكن التلج من المشرحة!!!
يازول النسوان قامن يطرشن، ويسبن لتنقا، ويهرجن فوقوا.
طارق تنقا قالهن: هو زاتو الزول ما ميّت، التلج دايربو شنو؟؟؟
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
خدر الحاوي في محطة ابوجنزير فتح باب التكسي الوراء،
وسأل التكاسي: يا ابن العم توديني الشهداء بكم؟
بتاع التكسي اداهو سعر ماوافق معاهو. خدر الحاوي
قفل الباب وفآت. بتاع التكسي قايلوا ركب، فوووووو
راح مارقها في الشهدا، وقبّل وراء داير يحاسب لقاليك
مافي زول.
طوالي راح بنهرة شديدة قايل: والله مُش لو بقيت
حاوي، حاتدفع، يعني حآتدفع...
| |
|
|
|
|
|
|
|
|
|
Re: ثــرثــرة فــوق الــبــورض ... (Re: ود الخليفه)
|
Quote:
الله يصرفك
ماك نصيح شي |
ود جبرين ســـلآم، ورمضان كريم.
اخونا عثمان علي قال: حبوباتو فاطنة وزينب بنات عطا الله كانن
بيغلتن كتير في الكلآم. قامت زينب مشت الحج، بعد جات إتغلتن
هي وزينب أُخُتا في موضوع، قامت زينب دآر تقول لفاطنة،:
وحآت النبي المسكت في شبكو، غلتت قالت لها: حآت النبي
المسكت في شنبو...
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
Quote: الرئيس عبود عليه رحمة الله، في زيارته للصين اطلّ من شُرفة القصر لقاليك كمية كبيرة
جداً من الصينيين في الخارج، وراح شابكم ليك تحايا، يرفع في يدينو ويلوح ويتبسم
مبسوط. بعد شوية الإشارة فتحت خدرا، الجماعة فووووووو قطعوا الشارع... |
مـاعندهم زوق نوووووهائى
مـعاوية سلاااام
| |
|
|
|
|
|
|
|
|
|
Re: ثــرثــرة فــوق الــبــورض ... (Re: جمال محمود)
|
يا معاية رمضان كريم
عمك عابدين ودموسى له الرحمة عندو بابور في السليمانية والبحر كان في حالة شردة(نقصان)
طبعا لازم يحفرو للطرمبة كل ما نزلت منها الموية.
تكررت الحكاية كل يوم ايجار عمال للحفر...حفر... حفر
يوم زهج من الموضوع وقال لولادو:
ادمسوه البابوبر دا نحن هينين ان شاء الله بحر السجم دا يتستر في حوتو.
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
Quote:
مـاعندهم زوق نوووووهائى
مـعاوية سلاااام |
حباب بت الشيخ.
النميري عليه رحمة الله. هسع يجي وآحد يعمل لنا غاغا، يقول إترحمتو عليهو ليه؟
اللهُمّ ارحمه وارحم امواتنا وسآئر اموات المسلمين.
النميري في زيارة لمناطق الشِدّة، بيلقي في خطاب، وبوراهو عريبي نِحيفآن وكملآن
من لحم الدنيا، وكلّ همو في الرغيف. قاعد وراء النميري وكل مرّة يقاطعوا في الخطاب
بتقديم طلبوا في شكل صِيآح: الايش يا ريّس، الايش يا ريس. النميري يسكت يخليهو يتم
كواريكو ويواصل. بعد شويّة العريبي يقاطعو: الايش يا ريّس، الايش يا ريّس. النميري
يسكت يخليهو ينتهي، ويواصل الخطاب، بعد شوية العريبي يقاطعو ليك: الايش ياريش....
النميري طوالي راح ناهرو ليك: يا زول ما تسكُت... إن شاء الله ما تعيش...
العريبي بسرعة ردّ عليهو: إن شاء الله ما تأِيش إنت يا ابفقهة...
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
مباراة هلآل مريخ في الزمن الجميل كان وقتها المذيع علي الريّح.
قبل المباراة بأيام في 10 ألف دولآر يفترض يستلمها الإتحاد عشان
توزع للإعلآميين الرياضيين، والجماعة شغالين بالموضوع ده
اكتر من الكورة.
صاحبنا علي الريّح بزيع في الكورة قال: ضربة حُرة مباشرة
للهلآل، حمد مع الكورة، ولعيبة المريخ يستعدوا لإقامة حائط
صد، والحكم بيعد في الدولآرآت ــــــــــ
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
سلام
كملت المتعة كلها
يا معاوية
رمضان كريم..
***
واحد عسكري من أهلك الشايقيي،،والكلام ده بدري شوية.
فالعسكري ده كل يوم المساء بيمشي للضابط وبتسلف منو 50 قرش،
وبمشي يجيب المعلوم،، وبعد يشرب ويتعشى ،، بيشيل طنبورو
ويقعد يغني في أغنية الحلة تنوري والخدار فايت تشتري ..
آخر الشهر الضابط ما أداهو المرتب ،، فأحتج شديد!!
الضابط قال ليهو : كل يوم الحلة تنوري الحلة تنوري ،،،
الحلة دي بتنور من جنريتر ؟؟ ما من ماهيتك دي!!
| |
|
|
|
|
|
|
|
|
|
Re: ثــرثــرة فــوق الــبــورض ... (Re: أحمد الصديق)
|
| Quote: بوست موبالغة ممتع للغاية |
جمال محمود، متعك الله بالصحة والعآفية يا صاحب
أجمل، وافيد البوستات، ورمضان كريم.
تكاسي بتاع كمنقة، اخدوهو جماعة طلب من المستشفى ومعاهم جنازة.
بعدين لقو إنو العربية ما بتشلهن. واقفين بيتشاوروا المسطول قال
ليهم: اسمعوا، الجنازة دي نربطا ليكم في السبت.
واحد بزعل شديد جداً قال ليهو: نربطا في السبت كيف يعني؟ إنت
بتتمسخر.!!!؟
المسطول قال ليهو: إتمسخر كيف يا ابن العم يعني؟ ما تربطوهو
في السبت يعني حاتجيهو نزلة؟؟؟
| |
|
|
|
|
|
|
|
|
 Re: ثــرثــرة فــوق الــبــورض ... (Re: معاوية المدير)
|
عبد الحفيض ود قوّدر الله يرحمو. اكان زول مستعجل بالحيل.
مرّة قآم من النوم مِتأخِر، وكابس بسراع، بسراع مشى الورشة، وبعدين
جا يحكي للجماعة. قال لهُن: والله الليلة قمت من النوم مِتاخر وقوآم، قوآم،
شربت العجلة، وركبت الشاي، وقُمت طآير طيرآن، الورشة ضربت لي في
الصُفآرة...
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
حبوبة طقشا ليك خرف، بقت كلما تشم ريحة حاجة تقعد تلآهي بيا،
وما تسكت إلا يجيبوها ليها. مثلاً، اكان شمّت ريحة جوآفة تقوم:
في ريحة جوآفة، جيبو لي الجوآفة، هيي الجوآفة دي ما تجيبوها
لي، يا ناس انا ما في زول يجيب لي الجوآفة؟. ما تسكت إلا بعد
الجوآفة تصلا. شمّت ريحة شيّة تقوم: ريحة الشيّة دي وين؟
جيبوها لي، انا بدور الشيّة، يا ناس الشيّة دي ما تلحقوني بيها.
ما تسكت إلا بعد الشيّة تصلا، وهكذا. مرّة واحد مسطول جا
لقاها تنبح في نبق: جيبو النبق، النبق ما جابوـ النبـ.....
قال ليهم: دي مالآ؟
قالوا ليهو: والله طوالي في الحالة دي، ما تشم ريحة حاجة تقعد
تلآهي بيها!!!
قال ليهم بسيطة: ادعكوالآ نخرتها بريحة خُمرة، وحاتكون شامة
ريحة خُمرة طوالي، وتتفكوا من الموضوع دا.
الجماعة راحوا دآعكين ليها نخرتا بالخُمرة، بس الحبوبة
قامت: العريس، جيبو لي العريس. هوي يا ناس، العريس دا
خبرو شنو ما جبتو؟ يا ناس ما تلحقوني بالعريس. جيبو لي
العريس فسرآعكم. قوامك جيبو العريـ...................إلخ
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
احد اجدادنا عندو ولد ولدو محتاج لجنسية راح معاهو لإستخراجها. الضابط طلب من
جدنا بطاقتو. ناولا ليهو، الضابط نظر فيها وقال ليهو: يا حاج بطاقتك دي مدتا منتهية!
جدنا قال ليهو: قلت شنو؟
الضابط: يا حاج قلنالك مدتا منتهية.
جدنا قال ليهو: هسّع البطاقة دي، اكان لقيتا في محل جرية بتقبضني؟
الضابط قال ليهو: طبعاً بقبضك.
جدنا قال ليهو: تقبضني ليه؟ ما مُدتا منتهية!!!
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
مرّة مشيت مع قريبي جامعة القاهرة. كان ساكيلو موضوع تسجيل، وما تسجيل.
مشينا لقينا مكتب التسجيل زحمة شديدة جداً. في واحد كورك للمسجل: اسمع
يا ابن العم، يا اخي انا بس عندي سؤال وماشي، ممكن؟
المسجل قال ليهو: اسأل.
قال ليهو: عندنا واحد مسجّل من سنة 91، تسجيلو بيكون ماشي؟
المسجل قال ليهو: زولك دا مدتو بتكون إنتهت.
الزول ردّ علي المسجل بسرعة: ليّه اصلوا عِلبة صلصة؟؟؟!!!
| |
|
|
|
|
|
|
|
|
|
Re: ثــرثــرة فــوق الــبــورض ... (Re: عثمان محمد كرار)
|
Quote: سلام
كملت المتعة كلها
يا معاوية
رمضان كريم.. |
احمد الصديق يا صديق،
متعك الله بالصحة والعافية، ورمضان كريم.
قال ليك شايقي نطَّ في الإسبتالية. الغفير شافو، وقام منطلق ورآهو.
غفير عِكلِيّته عكلته شديدة، يا زول الشايقي يخش العنبر يخش وراهو،
يطلع برّة وراهو، ساكيهو ليك في الزقاقات والبرندات، لفاليك معاهو
المستشفى كلها.
يا زول الشايقي لمان عِرِف الزول ما كرمان منو، وغِبى معاهو حِيلة،
وقف وقال ليهو: اهآ قوّل نطيت، داير اسرُق لِي موروّد؟؟؟!!!
غايتو اخونا عثمان رغيم كان جا بجاي
بيخلي ريحتي طير، طيرـــــــــ
الله يستر.
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
السلام عليكم
......
بوستك الممتع ده جاي طاشي من أيام الزمن الجميل يا معاوية
...
خالاتنا شايقيات مشن المدينة المنورة
بعد الصلاة .... واحدة فيهن جات لقت نعلينا مافي
ما كضبت
طوالي لفحت ليها نعلين تانيات
الأولى : هي يا فاطني ...كيفن عاد تشيلي حاجتاً ماها هيلك ... وكمان في جامع الرسول !!!
فاطني : نان انا الرسول كُت جاياهو حفياني ؟؟ 
.........
| |
|
|
|
|
|
|
|
|
|
Re: ثــرثــرة فــوق الــبــورض ... (Re: عوض عبدالله طه)
|
Quote:
واحد مسطول قال رمضان 30 يوم بنتخارج منو الكلام المصيبه دي البحلنا منها شنو؟قالو ليه المصبه شنو قال ليهم الصلاة دي |
اهلاً بيك يا عثمان، ورمضان كريم.
إتنين مساطيل بيقعدوا جنب البيت ويضربوا سجارتم.
عمّك راجل عجوز، وضهرو محني بيجي فايت
بالشارع، يسلم علين ويواصل. بمجرد ما يفوت
واحد بشسأل التاني: اسمع، إنت الجُلُك دا التنا
ليهو ضهرو شنو؟. يا زول طواااالي بس الراجل
يفوت، صاحبنا يفكليك لصاحبو السؤال.
قام قال ليهو: يابو الشباب إنت مالك كل يوم فاكيها
لينا بالجُلُك دا، يا زول اسألوا، ما تجننا.
عمّك جا الزول طوالي مشالوا، وسألوا: يا حاج إنت ضهرك دا العوجو ليك شنو؟
قال ليهو: يا ولدي زمان وكتي الصغير شربت لي
فنجان خل بس ضهري إتعوج.
المسطول قال ليهو: طيُب يا عمّك لو شربت قزازة
كان تبقي ترتار واللآ شنو... ؟
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
Quote: يا طبنجة الدنيا رمضان، وما طالبني حليفة،
لكن والله العظيم دي موية المواسير بتاعة
عطبرة.
تقول لي طلعت سمكة وبترقص!!!
يا زول المفروض يطلع ورر كرهان حياتو
زاتو ... |
بالمناسبة دى كنت فاطر مع شباب من زملائنا فى شارع النيل
قبل كم يوم كدا اها لما الآذان قرًب فى مطعم كبير كدا قلت نتوضا منو.
مشيت يازول لقيت ليك الموية قاطعة!! الحاصل شنو ياخوانا؟
قالو والله البلف بتاع الصهريج بى غادى مافى زول قادر يفتحو!!
قلت ليهم ليه؟
قالوا لى: والله فى عدد 8 ورل لابدين تحت البلف
فتأمل
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
Quote: السلام عليكم
......
بوستك الممتع ده جاي طاشي من أيام الزمن الجميل يا معاوية
...
خالاتنا شايقيات مشن المدينة المنورة
بعد الصلاة .... واحدة فيهن جات لقت نعلينا مافي
ما كضبت
طوالي لفحت ليها نعلين تانيات
الأولى : هي يا فاطني ...كيفن عاد تشيلي حاجتاً ماها هيلك ... وكمان في جامع الرسول !!!
فاطني : نان انا الرسول كُت جاياهو حفياني ؟؟ |
عليكم السلآم اخونا عوض، ورمضان كريم.
حبآبك الف.
واحد عمنا مشى الحج، بعدين راح يتوضى. ملص الحزآم بتاعوا وقعد للوضوء.
طبعاً الحُجاج كلهم احزمتهم بتتشابه. اها جا وآحد لطش الحزآم. عمنا عاين لقاليك
يماني شايل نفس الحزآم، وراح منشبك فيهو. اليماني شابكو ليك يا رجآل والله
هذا حقي، وعمنا مُصِر إصرار شديد إنو اليماني سرقو.
اليماني وكت خلآص غبى حِيله،وهم واقفين جنب الكعبة قال للحاج: وحات
الكعبة الشريفة هذا حقي.
عمنا الحاج قال ليهو: يا يماني جيب الحزآم، الكعبة التتكسر فوق رِويسك
المسنوح دا طوبة، طوبة...
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
الفنان احمد عمر الرباطابي عليه رحمة الله. في لقاء تلفزيوني معاهو،
المذيعة سألتو: طبعاً إنت يا استاذ بتكتب اغانيك براك وتلحنها وتغنيها.
ما فكرت تدي قصايد للفنانين الواعدين، اللهم في بداية طريقهم الفني؟
ردّ عليها بسرعة: اوّل قالولك قصايدي ديل فايتاتنيّ!!!
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
إتنين نسابتنا مريخاب. وآحد ما بيقدر ينضم لو ما جاب سيرة المريخ،
والتاني ما بالحيل علي الشغلآنية، عندو تكسي هكرة مكرهو العيشة،
يشتغل تلآت يوم، واربعة يوم في المكنيكي. يوم التكسي طريح الفراش،
والجماعة قاعدين يتونسوا. صاحب التكسي عندو ولدوا صغير إسمو
طارق كورك ليهو: يا طارق، يا طارق،.
مرضان المريخ قال ليهو: إنت ما مريخابي، الولد دا سميتو طارق ليه؟
بسرعة ردّ عليهو: اديني حق السماية، علي الطلآق هسسسسع
إسميهو ليك حامد بريمة...
| |
|
|
|
|
|
|
|
|
|
Re: ثــرثــرة فــوق الــبــورض ... (Re: معاوية المدير)
|
ود المدير
رمضان كريم
عمتنا راحت الحج وجات
الجماعة قاعدين معاها في بيتها واشتغلوا قطيعة وهاك ياحصل وما حصل وفلان فعل وفلانة فعلت
وكل ما تدور تشارك معهن في الحديث يقولوا ليها ياحاجة حجتك بتطير
تقوم تضع يدها على فمها وتسكت
الحكاية راحت ليها لي يومين
اليوم الثالث الموضوع مولع نار شديد في الحاصل ما فاصل وفلانة سوت وسوت
الحاجة طوالي استلمت الدفة
يا حاجة حجتك .. حجتك بتطير
أهة أهة ياناس إنشاء الله تطير مع العصافير
وواصلت في موضوعها
| |
|
|
|
|
|
|
|
|
|
Re: ثــرثــرة فــوق الــبــورض ... (Re: المسافر)
|
في الثانوي العام. استاذ الجغرافيا بتاعنا كان بتاع كمنقة.
ادانا إختبار فيهو سؤال: لماذا سميت افريقيا بالقارة السوداء؟
واحد جاوب: عشان فيها الشمس!
الاستاذ قال ليهو: اقيف، وقالنا: يا جماعة انا اديتكم سؤال،
لماذا سميت افريقيا بالقارة السوداء؟، الشخص الواقف
دا جاوب: عشان فيها الشمس!!، وقال ليهو: اقعد الشمس
تحرقك وتحرق ابوك...
| |
|
|
|
|
|
|
| |
معاوية المدير
محمد علي شقدي
Mohammed Awad
طارق جبريل
ود الخليفه
جمال محمود
MOHAMMED ELSHEIKH
أحمد الصديق
عثمان محمد كرار
عوض عبدالله طه
المسافر
فيس بوك
تويتر
انستقرام
يوتيوب
بنتيريست