سهرة (ليالي) على النيل الأزرق برعاية صندوق دعم الوحدة... ما علاقة مضمون السهرة بدعم (الوحدة)؟؟؟

Quote: كان الاجدر بصندوق دعم الوحدة ان ينتقل بالبرنامج وسط الجنوبيين داخل السودان وخارجه للتقرب منهم (مع انها جات متاخرة) لبث الوعي بينهم بموضوع الاستفتاء وتوضيح ايجابيات وسلبيات اي من الخيارين (الوحدة او الانفصال)

Quote: يامياده بتعرفي العرضه خارج الداره ياهو ده حالهم

Quote: غايظاني القروش المرصودة من قبل صندوق دعم الوحدة والحتندفع للقناة مقابل البرنامج والبرنامج لا يصب في اطار مشروع الوحدة ولا بقطرة ماء ناهيك عن ان يكون شريان بين الشمال والجنوب وكان الاجدر انو الاموال دي يخاطبو بيها المواطن الجنوبي اللي حيمشي لصندوق الاقتراع ويقول كلمته وبالتالي واحد من البتواجدوا في الصالة دي ما معنيين بالوحدة عشان نحن نرفه عنهم بسهرة وضحك ونكات وغناء

Quote: جفت الأقلام ورفعت الصحف

Quote: هيييييييييييييييي إسمها رفعت الاقلام وجفت الصحف ثم ثانيا الاسلام هو دين غالب اهل السودان يعني كيف دايرنا نلغي الشريعة ما بتجي

Quote: وسأحكي ليك قصة حقيقىة حادثة هذه الأيام عندنا في أمريكا، وبتكوني سمعت بيها وهي قصة بناء الجامع في نيويورك، هسة باقي ليك لو أمريكا دي دولة مسيحية كان بترضى إنو يقوم جامع في نيويورك جنب البرج الإتهدم بواسطة مسلمين

Quote: الصادق يا اخوي نحن حنضحك على بعض ولا شنو امريكا دي ما جنة الله في الارض فيها تمييز ضد المسلمين وكون امريكا قبلت بناء مسجد قبالة برجي التجارة اللي شهدت احداث الحادي عشر من سبتمبر دا ما بنفي صفة الدولة المسيحية عنها ولا كتر خيرها كونها وافقت ببناء المسجد كون ان اعداد المسلمين اصبح عددهم كبييييييييير ولا يستهان بيه وبعدين اسع عيد الفطر حيصادف ذكر 11 سبتمبر حتشوف لو سمحوا للمسلمين بالاحتفال باعياد الفطر ولا لا ودا حيثبت ليك امريكا دولة مسيحية ام لا كان خلوكم تقيموا احتفالات

Quote: ميادة في أي حوار يجب الإلتزام بإحترام عقل الطرف الآخر، أنا أعيش في أمريكا والآن في المدينة التى أسكن فيها تدفع لنا البلدية جزء من تكاليف الإحتفال بعيد الفطر، الشئ المهم جداً، وهذا ما لن تفهميه ما لم تعيشي هنا في أمريكا، وهو كالآتي: التمييز جريمة يعاقب عليها القانون، وبالتالي أي تمييز ضد أي من المسلمين "إذا كان ببينة ودليل" سيعاقب عليه القانون. أزيدك من الشعر بيت: في سنة 2007 وفي نيويورك، إكتظ الجامع عن بكرة أبيه بالمصلين لصلاة العيد، وأتت الشرطة والمطافئ لتحل مشكلة الزحام، وبعد إتصالات كثيرة وفرت لنا (الكنيسة) قاعة كبيرة من قاعاتها للصلاة وصلينا فيها والحمد لله. أها طبعاً ممكن تغالطيني لي يوم الدين، لكن وضع المسلم في أمريكا أحسن من وضعو في السودان، التمييز في السودان واضح وما داير ليهو درس عصر، أهلنا زاتم ربونا على كدا وكلمة (عب وخادم) دي بتتقال للمسلمين العاديين على عينك يا تاجر، هنا في أمريكا (يا ويلو وسواد ليلو) لو واحد بس بسبب (الدين) رفض يشغلك أو يقدم ليك خدمة، لأنو طوالي بيتم التعامل معاهو بشكل قانوني بحت وبيتم تعويضك. نزيدك من الشعر بيت برضو المسلم إذا دفع الزكاة في أمريك بتخصم من الضرائب، يعنى لو الواحد عليهو ضرائب 1000 دولار ودفع زكاة 200 دولار وقدم اثبات على كدة الضرائب بتاعتو بتكون 800 دولار، وأنا في السودان كنت بدفع ضرائب وزكاة. وأديك قصيدة كاملة: المسلمين شغالين دعوة عديل كدة للمسيحين وأمريكا بتقدم ليهم الحماية إنو يدعو للإسلام، هل السودان اليوم بيسمح للمبشرين بالعمل وسط المسلمين. الرجاء أخت ميادة التفكير وإستعمال العقل وليس ترديد المقولات الجاهزة عن إضطهاد المسلمين والتمييز ضدهم في أمريكا، انا قابلت 35 تونسي طلبوا لجؤ لأمريكا بسبب أنهم ينتمون لتنظيم النهضة الإسلامي والذي يدعو لتطبيق الشريعة في تونس، أها لأنو الحكومة التونسية عذبتهم، أخدوا لجوء سياسي في امريكا، والآن يحملون الجنسية الأمريكية الآن أنا كمسلم عائش في أمريكا العلمانية في وضع أحسن بمراحل من حياتي في ظل الدولة الإسلامية في السودان، والجنسية الأمريكية تعطيني حقوق للحفاظ على ديني ومعتقداتي أكثر من الجنسية السودانية، بل وهذا هو المضحك الحكومة الإسلامية تحترمني كأمريكي أكثر مما تحترمني إذا لا املك الجنسية الأمريكية. وزي ما قلت ليكم طبقوا الشريعة في الشمال، وخلوا الجنوب ينفصل وأكيد بعد فترة يمكن من خلال الجهاد محاربة الجنوب مرة أخري وقتل الكفار حتي يدفعوا الجزية عن يدٍ وهم صاغرون (لاحظى الجنوب دولة بترولية)، وأسر هؤلاء الكفار وإتخاذهم رقيقاً وعبيداً وإماءاً من أجل نصرة دين الله والفوز العظيم. ونحن كمسلمين أمريكان سنؤيد وندعم العلمانية في امريكا والتى تحفظ لنا حقوقنا، وإذا حاولت دولة السودان الشمالي الإعتداء علينا (هي عارفة كويس البيحصل عشان كدة ما اظنها تفكر زاتو). طيب الكلام الكتير دا ليه، لأنك يا ميادة من خلال (التسريبات) التى وردت إليك قلت أنك تريدين وحدة السودان، أها وحدة السودان (بشريعة المؤتمر الوطني دا (يشموها قدحة).

Quote: مووش زي دولتنا الجنوبية اللي عمرها ما تامي 5 سنين اير تطبق العلمانية من قولة تيييييت وبعدين ربط العلمانية بوحدة الجنوب مرفووووووووض ويتنافي مع اتفاقية نيفاشا اللي وقعت عليه الحركة الشعبية لانو المساءل دي حستمت في نيفاشا وواقفت عليها الحركة يبقى لماذا تريد الحركة الشعبية ان تتنصل الان وتطلب تطبيق العلمانية كما جاء في اخر بينان ليها صدر من اجتماع المكتب السياسي في جوبا ودا ان دل على شئ انما يدل على عدم جدية الحركة الشعبية في اي خطوة تتخذها او تريد ان تفرض علينا حلول بالقوة وبالقانون وهذا ما لانسمح به

Quote: أسمعها من الصادق زي ما قال ليك ... مافي شريعة في وحدة ... شريعة في وحدة مافي.