قال السر قدور في حلقة الأمس والتي كانت عن برعي محمد دفع الله، قال - لا فض فوه – بعد سماع أحد درر برعي ( اللحن ده اتعمل سنة 1949م فهل نحن اتقدمنا واللا متأخرين ؟ وأترك الرد للمشاهدين !!! ) .. ترك لنا الرد ، ولن نرد ، لأنه لا توجد مقارنة بين أمس واليوم ، فاليوم لا يوجد لحن أو أغنية ، يمكن مقارنتها مع غنا أمبارح رغم التطور الهائل في كل مناحي الحياة وأشكالها ، والموسيقى بالضرورة مشمولة بهذا التطور ورغم وجود معهد الموسيقى ووجود موسيقيين محترفين ، مهرة ، ومتعلمين ، إلا أن إنتاجهم لا يكاد يقارن ( بجزء ) من إنتاج تلك الحقبة الذهبية النضيرة. وهذا ليس تقليلاً من شأن الإخوة الموسيقيين الأفاضل ( دارسي الموسيقي والكيري ) ولكن هذا واقع الحال ، وما بنقدر نغيرو .. وبسبب زمن الانحطاط الذي نعيشه الآن ، فقد تغيرت معايير ( السمع ) عند الأجيال اللاحقة لجيل العمالقة هؤلاء فاصبح سمعهم يقودهم لتمجيد غناء على الشاكلة التي تهيل أطناناً من الغثاء والأوساخ على طبول آذاننا التي فترت من المقاومة . وليس هنالك من دليل على خواء وفقر ، وإفتقار للموهبة ، وجهل ، وشعبطة في الغناء ، أوضح من ظاهرة ترديد صغار ( المغنواتية ) لغناء جيل ( الفنانين ) الحقيقيين ، للتدليل على أن هؤلاء المغنواتية ومعهم صناع ما يسمى بالغناء ( الآن ) عاطلين عن الموهبة وفاشلين في انتاج غناء مقنع يُبيّن ويُؤكد استحقاقهم للالقاب التي أصبحت تُطلق على كل من هبّ ودبّ. الناس ديل لن يضيفوا للغناء السوداني شئ ، لذلك سيكون مصيرهم النسيان ، وسيذهبوا غير مأسوف عليهم.. ياخ معقول ( مغنواتي ) يمشي ( لسمكرجي غنا ) يطلب منو غنية ، يقوم السمكرجي ينزّل ليهو الفي ( الرف ) عشان يختار واحدة ، ويدفع ويتخارج ؟؟ ولو ما عجبتو البضاعة ، يقول ليهو خلاص مُر علي بكرة أكون جهّزت ليك واحدة بمواصفاتك!!!!! ديل ناس عايشين في ( وهم ) كبير جداً ، وهو أنهم تصوروا فعلاً أنهم فنانين ، وهم أبعد ما يكونوا عن ذلك. وعلى الرغم من ذلك فأن العشم مازال موجود ، طالما أن هناك بعض الاشراقات والفلتات التي تظهر بين الفينة والاخرى تُعيد بعضاً من الأمل في أن الموضوع يمكن أن ( يتلحق ) .. عصام محمد نور ، واحد من تلك الاشراقات التي لا تتجاوز أعداد أصابع اليد ( الواحدة ) نساوين ورجال.. هذا الولد يمتلك خامة صوت ومَلَكْة تطريب مذهلة ، وهو بهذا جاء في ( الزمن الغلط )!! فهو يشبه فناني تلك الفترة المدهشة ، مجانين الغناء الجد ، وهو إمتداد طبيعي لهم ، لأنه مجنون كل مبدعين زمان مجانين ، غنايين – شعراء – ملحنين ، ياخ يخيل لي ناس زمان العاديين ديل ، ما كانوا عاديين..
الكلام ما خلص ، برجع تاني..
08-19-2010, 08:50 PM
حبيب نورة
حبيب نورة
تاريخ التسجيل: 03-02-2004
مجموع المشاركات: 18581
الزول ده بيحرج الجماعة دايماً لاحظت نادر خصر بيعمل في شنو؟؟ عايز يعمل زي عصام ، ولكن هيهات ، هيهات ، ثم هيهات..
أقول ليك حاجة؟؟ فرفور زاااااااتو بيلبد لمن عصام يمسك المايك دخلة فرفور في أغنية المصير بوّظت السمع أسمع المصير تاني وركّز على صوت عصام في الحتات البيدخل فيها فرفور شوف الزول ده بيمارس في الجنون ده كيف ..
Quote: عصام محمد نور ، واحد من تلك الاشراقات التي لا تتجاوز أعداد أصابع اليد (الواحدة) نساوين ورجال.. هذا الولد يمتلك خامة صوت ومَلَكْة تطريب مذهلة ، وهو بهذا جاء في ( الزمن الغلط )!! فهو يشبه فناني تلك الفترة المدهشة ، مجانين الغناء الجد ، وهو إمتداد طبيعي لهم ، لأنه مجنون
صلاح عبدالله سلامات ورمضان كريم
ياخ عصام دا ببالغ عدييييل كدا !! بالله شفتو الليلة في أغاني وأغاني جضم المصير دي كيف!! وشفتو عمل شنو في ود الحاوي؟!! فعلآ فعلآ زول مجنون!
حا أستلف فيديو المصير من بوست ود العباسية وأضعه هنا وأسمح لي أسكن البوست دا بالله .. فأنا من أشد المعجبين بالمجنون عصام!
_
08-19-2010, 09:12 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
عن عصام محمد نور - ود دفعتنا - كان ذاك في 83-84- 1985، والتنافس على أشده بين عملاقي الثانوي في مدني ، مدرسة السني الثانوية (النيل الأزرق سابقاً) ومدني الثانوية - مدرستنا- ظهر معه في نفس الفترة / أمين عمر أمين من مدرسة السني الثانوية .. توقف عن الغنا لأسباب صحية .. المهم .. كان عصام جوهرة المدينة في ذاك الوقت .. وبعد الثانوي ظهر في الحفلات مع مجموعة العازفين بقيادة/قزة .. وعمنا الصول / مليجي (على ماأذكر) والد الملاليج عازفي الإيقاع المشهورين في السودان ... كانت أجمل الحفلات هي التي يغني فيها عصام وأمين ... قمة المتعة مع أغاني الكاشف ... والى الآن نذكر ذاك الزواج الشهير لأحد أصدقائهم في المدينة حين غنى عصام وأمين دويتو ... ... تميز عصام ..بالإلتزام الشديد .. والأدب العالي ... والى الآن ... وكما قلت .. يتميز عصام بمقدرته على إجادة الأغاني الصعبة.. مع رصيد قوي من أغانيه الخاصة ...
سلام عليك يا راقية .. شفتي الزول ده بيجوّد الشغل كيف؟؟ مبالغة .. الزول ده كل مرة بيقنعني إنو دورو جاء في شيل تركة الغنا السمح معظم غنا عصام الخاص من تلحينو هو مشكلة لما ما تلقى زول موسيقي يعرف إمكانيات صوت الفنان عشان يعرف يتعامل معاهو في التلحين ، ودي الواقع فيها عصام (أتصور).. ما لاقي ملحن ( موهوب ) يتعامل مع صوتو ، ويلحن ليهو ..
ثم أن هذا البوست ملك خالص لك ، طالما اتفقنا فيما يتعلق بشأن هذا الشاب بالمجنون ده..
حاتم العبيد ، يا زميل عصام ، ياخي كل سنة وانت طيب وتصوم وتفطر على خير ..
تعرف في تسعينات القرن الماضي ، شرفّنا في الدوحة عصام وأمين ، ومكثوا معنا ستة أشهر كانت أيام لا تشبه الأيام ، غنا وطرب وسمع راقي في سنة 93 أو 94 تقريبا سجلنا مع عصام شريط، كنت أصاحبه بالعزف على العود هذا المجنون بيعمل في صوتو ده عمايل جنونية ، حيّرني والله. أما هذه:
Quote: تميز عصام ..بالإلتزام الشديد .. والأدب العالي
فإني عليها لمن الشاهدين ، التزام ، أدب ، تدين ، وهي أهم ما يميز شخصيته أستغربت من هذه الصفات لمعاشرتي للفنانين ومعرفتي اللصيقة بكثير منهم عصام فنان بيحب الشاي ، والكورة !!!
شكراً على المعلومات القيمة..
08-19-2010, 11:50 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
Quote: شفتي الزول ده بيجوّد الشغل كيف؟؟ مبالغة .. الزول ده كل مرة بيقنعني إنو دورو جاء في شيل تركة الغنا السمح
والله يا صلاح يا أخوي وما طالبني حليفة، بعد سمعت عصام الليلة كنت ناوية أفتح بوست أسميه : لكن ما جننتا الغنا جن يا عصام محمد نور!! والحمدلله الإتريث وفتحت البوست إنت، فإنتو أهل الشي زااتا. عصام هدوء قاتل، وإحساس بالغناء عالي وقاتل!. زول مجنون بالجد!
Quote: معظم غنا عصام الخاص من تلحينو هو. مشكلة لما ما تلقى زول موسيقي يعرف إمكانيات صوت الفنان عشان يعرف يتعامل معاهو في التلحين ، ودي الواقع فيها عصام (أتصور)....
أتفق معاك في دي. بحس بيهو زول رايق و متواضع ، ما زول مقابضة وشو .. ولسه الحا يجي منو كتير ... ويرجى منه الكثير
Quote: ثم أن هذا البوست ملك خالص لك ، طالما اتفقنا فيما يتعلق بشأن هذا الشاب بالمجنون ده..
تشكر يا ملك الذوق .. وإنشاءالله نطلع من بوستيك السمح دا بتكوين رابطة معجبين عصام المجنون
تسلم
__________ في بوست بتاع أخونا عبداللطيف بكري عن عصام ما لاقياه. حتمآ سأجده!
08-19-2010, 09:31 PM
علاء الدين صالح
علاء الدين صالح
تاريخ التسجيل: 08-11-2009
مجموع المشاركات: 1760
Quote: فهو يشبه فناني تلك الفترة المدهشة ، مجانين الغناء الجد ، وهو إمتداد طبيعي لهم ، لأنه مجنون كل مبدعين زمان مجانين ، غنايين – شعراء – ملحنين ، ياخ يخيل لي ناس زمان العاديين ديل ، ما كانوا عاديين..
إن شاء الله يجِن ويزيد في الجِن
الأخ صلاح تحيّاتي وكل سنة وإنتو طيبين كلمات أنيقة خُطَّت بمِداد من ذهب في حق هذا المجنون المدعو عصام محمد نور.. الجِنُّ جميلٌ أعرفُهُ.. من قال الجِنَّ بهِ قُبحُ؟
08-19-2010, 09:50 PM
Amani Al Ajab
Amani Al Ajab
تاريخ التسجيل: 12-18-2009
مجموع المشاركات: 14883
ولاكلمة فى عصام ...(سمح الغنا فى خشم عصام) ..لكن بختلف معاك فى نادر خضر ..نادر ادائه فيه تطريب و(تفرد) ..وخلى بالك فى تفرد دى ..مابتكلم عن ادائه فى البرنامج دا ..لكن بصورة عامة نادر خضر بغنى بطريقتو هو ..ودا البعجب فيهو .. فى كتار بغنوا زى طه وفرفور ..لكن نادر بغنى بطريقتو هو و(براهو) ..
شخصيا بطرب جدا (جدا) لطريقة نادر خضر فى الغناء ...
08-19-2010, 11:02 PM
علاء الدين صالح
علاء الدين صالح
تاريخ التسجيل: 08-11-2009
مجموع المشاركات: 1760
Quote: ..لكن بختلف معاك فى نادر خضر ..نادر ادائه فيه تطريب و(تفرد) ..وخلى بالك فى تفرد دى ..مابتكلم عن ادائه فى البرنامج دا ..لكن بصورة عامة نادر خضر بغنى بطريقتو هو ..ودا البعجب فيهو .. فى كتار بغنوا زى طه وفرفور ..لكن نادر بغنى بطريقتو هو و(براهو) ..
الأخ محمد عبد الرحمن كل سنة وإنتو طيبين والشهر مُبارك عليك نادر خضر مُطرِب له قاعِدة ومُعجبين، دي ما فيها كلام.. لكن بختلف معاك في حكاية التفرُّد دي.. إحتمال يكون مُتفرِّد لأنو إبتدع (حبشنة) أو (أثيبنة) الغِناء السوداني.. في رأيي الشخصي كموسيقي هاوي، نادر لن يبرح مكانه حتّى يستعين في غنائه بفرقة موسيقية مُكتمِلة العناصِر.. وسيظل مكانك سِرْ طالما ارتبط بتلك الآلة الموسيقية الواحدة One-man show musical system عميق إحترامي
08-19-2010, 11:10 PM
محمد عبدالرحمن
محمد عبدالرحمن
تاريخ التسجيل: 03-15-2004
مجموع المشاركات: 9059
طبعا انا مابدعى انو عندى معرفة موسيقية ..او معرفة اكاديمية اطلاقا ..انا مقياسى اضانى .هذا كل مااملك ..قاعد احس بتفرد نادر دا ..ومعجب جدا بطريقتو فى الاداء ..والبتتفق معاى انها مختلفة من غيرها ..عموما بطرب كتير بطريقة الاداء دى .. بدون الدخول فى تعقيدات اكاديمية لاننى لاافقه فيها شيء ..
والله كتبت ليك رد طويل ، لكن اندمجت ( تاني ) مع المصير وجيت لقيت البلد خلا ، راح وين ،، ما عارف.. المهم .. أحترم رأيك جداً في نادر خضر ، رغم إختلافي معك.. في قصة الغناء دي بالذات يا محمد ، صعب جداً الناس يتفقوا على شئ واحد لأنها ببساطة مسألة أذواق ، فما تراه شيناً ، أراه زيناً ، والعكس .. لكن قد يحدث ( شبه ) إجماع أو اتفاق على شئ ، وهو كحالة عصام الماثلة أمامنا الآن تعرف يا ابن خالتي معايير جمال الصوت ، واطلاق لقب فنان على شخص ترجع في نظري ( وسمع أضاني ) لعناصر غاية في البساطة ، أهمها : إختبار صوت المعني ، يعني أسمع الصوت وأشوف هل الصوت ده ح يحدث فارق ، واللا ح يكون زيو وزي صوت أي مغني عادي ، موهموم بأنه فنان، خامة صوتو هل متفردة واللا عادية ، هل أنا الزول العادي ده بقدر أغني زيو؟ وبعده حتماً ستعرف إذا كان الزول ده ح يكون فنان واللا ح يأذينا بصوتو وأوهامو .. برضو عنصري الأمانة والصدق، يعني المغني زاااتو مفروض يكون أمين مع نفسو وصادق ، هل بي صوتو ده وإمكانياتو ح يقدر يعمل حاجة واللا لا؟؟ الإجابة على السؤال ده ح تقود مباشرة على العنصر الأخير وهو ( الشجاعة ) الشجاعة والقوة والمقدرة على اتخاذ قرار الانسحاب ، وترك الشغلة دي والاكتفاء بانو يسمع غناء نضيف ويغني لنفسو وأصحابو .. المشكلة معظم المغنيين الآن صدقوا انو اصواتهم جميلة ، وانهم فنانين فعلاً ولبسوا الجلابية ، ودوّروا عدادات وما يزيد القصة طمبجة ، الالقاب والمعجبين المواهيم ، وكلمات الثناء ( يا أستاذ يا مبدع ، يا فنان ، الله يديك العافية ، أطربتنا ، صوتك مبالغة ، دي نكتها من وين ، ....الخ ) وصاحبك يركب الموجة ، ويركب بعدها مباشرة ( موديل السنة ) !!!
ياخ أقول ليك حاجة ، واحد من المواهيم المشاركين في أغاني وأغاني ده ، ما عندو في الدنيا دي أي موهبة راكب له عربية بمئات الملايين ، وبيتو الاشتراهو مؤخراً يسكن نص سكان الديم !!! تجارة يا ابن خالتي تجارة ، حليل زمن الغناء ..
تعرف ، في قصة الغنا دي بالذات ، كتير بتجنب اني أقول رأي لانها لا تتحمل ( المجاملة ) يا إما تكون بتعرف تغني أو لا !! الى جانب أن مقاييس الناس بتختلف ، فما تراه أنت ليس بالضرورة هو ما أراه أنا لكن زي حالة عصام دي لا تقبل الاختلاف ، الزول ببساطة شديدة غنّااااااااي.. وبعد ده ممكن زول يجي يقول ليك ده ما بيعرف يغني !! عادي ، نحترمو رايو ..
وأدعو معك الله أن يزيد جنونو ، فأنت أدرى منا بجمال الجنون ..
ولاكلمة فى عصام ...(سمح الغنا فى خشم عصام) ..لكن بختلف معاك فى نادر خضر ..نادر ادائه فيه تطريب و(تفرد) ..وخلى بالك فى تفرد دى ..مابتكلم عن ادائه فى البرنامج دا ..لكن بصورة عامة نادر خضر بغنى بطريقتو هو ..ودا البعجب فيهو .. فى كتار بغنوا زى طه وفرفور ..لكن نادر بغنى بطريقتو هو و(براهو) ..
شخصيا بطرب جدا (جدا) لطريقة نادر خضر فى الغناء ...
أبو عبد الله رمضانك كريم العلاقة بين عصام وصلاح عبد الله الاثنين بعقروا الغنا عقر... والاثنين للأسف ما بيحبو يغنو عجبي والطيارات أزيزا خرب اضناينا .. بسمع في المصير دموعي جرت جررررررررررررر بس جررررررررررررر ما بتاعت عماد عبد الله
لا اعتقد ان الكلمة نضبت ولا الالحان الجيدة اختفت ولكن أذن المستمع خرّبت ودهست إذا كان على مستوى الدولة تمنع الأغاني التي بها وصف وخمريات فلماذا لا يظهر مغنواتية موقف الصحافة زلط وموقف بحري الشعبية تسمع الغنية تقول انت في المحطة الوسطى وتختار ياتو حافلة وتركب تصل .. بقدرة قادر
قبل ما نرجع كتابة زمان وألحان زمان تعالو نرجع السمع السمح ونصلح اضنينا
خارج السياق وكدا: الزعلني الليلة عمك أوكل مهمة "راح المعاد وزماني راح" للجكس، عدنها نياصة حتى حسبتها غنية غير! لي كم طاشر سنة متمني الحوت يغنيها إنت وشيخ عصام تصوموا وتفطروا على خير يا بو صلاح
صلاح عبد الله يا فنان يازول رمضان كريم خفت على الشباب من ألحان ود الحاوي وقلت الكلام ده في بوست ود العباسية والمصير واحدة من الأغاني الشلتها من راسي لامن عرفت أغاني الحلقة حا تكون من ألحان ود الحاوي لكن ود مدني ده ريحني في كنكوجي وريح ود الحاوي الزول الجميل
الزول ده متخصص ( صعوبات ) أي حاجة صعبة ، فكها ليهو وأعمل نايم يسلمك ليها زي ما استلمها من سيدا الأصلي (وأحسن).. وبعدين الجماعة المعاهو ديل بنيناً وبناتاً لا مجال للمقارنة بينه وبينهم ، ففي هذا ظلم بيّن لهم ..
Quote: ورغم وجود معهد الموسيقى ووجود موسيقيين محترفين ، مهرة ، ومتعلمين ، إلا أن إنتاجهم لا يكاد يقارن ( بجزء ) من إنتاج تلك الحقبة الذهبية النضيرة.
رغم القناعة بان التلحين موهبه الا انه بنظره بسيطه لكل حملة الدكتوراه والبروفسيرات في الموسيقي وهم حسب علمي بالعشرات... اين هو انتاجهم الموسيقي ؟ ليس "هم" بل اين عطاء أي واحد منهم ولا اود هنا المقارنة مع اميين القرن الماضي مثل الكاشف وغيره. لا ادري هل السبب من عدم وجود مواهب او حواء لم تلد ام ان الشغل صار تجاريا او اندروسي الملامح حتي صرنا لا نحفظ ولا كلمة واحده من كل من غني بعد السبعينيات فهل العيب فينا ام فيهم ام في انتاجهم ام في اذاننا ... افيدني صديقي
08-20-2010, 01:54 AM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
عصام محمد نور .. دفعتي ايضا مع اختلاف المكان ! ايام الديمقراطية كنت ممثلا لاتحاد الشباب السوداني في معسكر الشباب الدولي الذي جرت فعالياته في ارض المعسكرات بسوبا وجاء عصام محمد نور ضمن وفد ودمدني ولحسن حظي كان من ضمن مجموعتي في المعسكر وكان يطربنا في جلسات داخل وخارج المعسكر بصوته الشجي ويغني فقط لابراهيم الكاشف عصام يذكر هذا الحدث جيدا .. لكنه بالقطع لن يتذكرني له التحية من البعد
08-20-2010, 02:10 AM
Mamoun Ahmed
Mamoun Ahmed
تاريخ التسجيل: 11-29-2004
مجموع المشاركات: 922
Quote: عصام محمد نور ، واحد من تلك الاشراقات التي لا تتجاوز أعداد أصابع اليد ( الواحدة ) نساوين ورجال.. هذا الولد يمتلك خامة صوت ومَلَكْة تطريب مذهلة ، وهو بهذا جاء في ( الزمن الغلط )!! فهو يشبه فناني تلك الفترة المدهشة ، مجانين الغناء الجد ، وهو إمتداد طبيعي لهم ، لأنه مجنون
الاخ صلاح عبد الله سلام ورمضان كريم عليك ان شاء الله لاول مره اتابع برنامج اغاني واغاني عبر النت وعبر البوستات نسبة لبعدي الجغرافي من الوطن الحبيب سمعت المصير وغيرها من الاغاني الجميلة الطويلة الصعبة من عصام كثير جدا مثل اغنية الطير المهاجر لوردي و امير الحسن واعز عزيز والسنين وغيرها كتير وكتير كل ما اسمع اغنية اصر انه يكررها تاني وبحكم العلاقة القوية بين الاسرتين ومن حسن حظ كلماتي المتواضعة ان تغني لي عصام بقصيدتين ورغم الاتينين مرثيات لكن كان اللحن والاداء اعمق من كتابة القصيدة نفسها حزني على فراق والدي له الرحمه وحزن عصام على فراق شقيقته وتوأمة روحه في حادث قد تزامن في شهر واحد بل في اسبوع وفقد عصام لشقيقته آمال كان نقطة تحول حتى في حياته العامة والخاصة وبعدها زارنا في مسقط ووجد ملاذه في المرثيتين والذكرى المريرة الواحده وكان ابداعا عميقا كحزنه قرأت كثيرا من بوستات الاعجاب لعصام في عدة منتديات وصحف لكن حقيقي لم اقرأ مثل ما قرأت في هذا البوست ومداخلات الاخوة والاخوات التي اجمعت على ما كتبت ولانني ادري تماما عدم صلته المباشرة بالنت لزحمته واشياء اخري هاتفته بعد قرآتي لكلماتكم الجميلة لكي يعلم هنا وهناك من يعشق فنه بجنون ايضا وكعادته بضحكته وبشاشته وابتسامته التي وصلتني عبر الاثير كالني بعبارات الشكر والتقدير والامتنان لكم فردا فردا والسلام امانة ... السلام لكم جميعا وردد كثيرا يتمني ان يكون عند حسن ظنكم دوما وآخر عباراته يديكم جميعا الف عافية ورمضان كريم وكل سنة وانتم جميعا بالف خير تسلم اخي صلاح والتحية لكل زوار البوست
08-21-2010, 01:55 AM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
Quote: ولانني ادري تماما عدم صلته المباشرة بالنت لزحمته واشياء اخري هاتفته بعد قرآتي لكلماتكم الجميلة لكي يعلم هنا وهناك من يعشق فنه بجنون ايضا وكعادته بضحكته وبشاشته وابتسامته التي وصلتني عبر الاثير كالني بعبارات الشكر والتقدير والامتنان لكم فردا فردا والسلام امانة ... السلام لكم جميعا وردد كثيرا يتمني ان يكون عند حسن ظنكم دوما وآخر عباراته يديكم جميعا الف عافية ورمضان كريم
بت الجنيد العديلة وجميلة يا سلاام عليك إنتي ياخ يا الحنينة! تنعدل عليك دنيا وآخرة ياجميلة ياطيبة الأخلاق .. إنتي زاتك ما هينة والله، ماك هينة آبدآ .. يا حبذا لو أخد عصام (المجنون) عضوية المنبر .. إنشاالله يجي طالي في السنة مرة لإنشغالو كما ذكرتي
وفي البال عمل رابطة معجبين بعصام، برئاسة أخوانا المعجبين الكبار : عبداللطيف بكري وصلاح عبدالله دا كمان .. بإذن الله
شاعرتنا وأديبتنا الجميلة الأستاذة أسماء رمضان كريم عليك وعلى أسرتك الكريمة
تغمد الله والدكم برحمته ، وجعلها آخر أحزانكم ، وكذلك عصام.. الصدفة وأشتراككم وعصام في حزن فقدكم لأعزاء وهذا يعني بالضرورة أبداع حقيقي رغم أني لم أسمع أي من الأغنيتين ولكني متأكد من جمالهما...
عصام شهادتي فيه مجروحة بحكم علاقتي القديمة به ولكنني في الغنا ده يا أستاذة ما بجامل أبوي وما قلته في حق عصام لن تغيره علاقتي به ، أو عدم معرفتي له فأنا هنا أتعامل مع ( حالة ) أمامي ، تستوجب الثناء والإشادة..
أتمنى أن أسمع الاغنيتين.. تحياتي لك وللأستاذ الفاتح وأبناءكم..
08-21-2010, 02:23 AM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
ههههه يا علاء ديش دي أنا بستعملا لحظة الإنفعال الشديد، والجميل فقط لا غير! أوعى تكون كلمة خارجة عن القانون وأنا ما عارفة !!
شايفاك في بوست أغاني وأغاني أديتني ضوء أخدر لإستخدامها، مما يعني إنها في حدود القانون (الحمدلله):
Quote: هدير كل سنة وإنتي طيبة أنا وبإعتباري حلفاوي أصيل ومؤصَّل، أكتر واحِد إتكيَّفتا من الكِلمة دي.. عشان كِدة بسمَح ليكي.. واليومين ديل كمان عندِنا عرض واحدة مجّاناً.. ديشين أبو كِدا زاتو.. عِصام بيستاهل أكتر من كدة ياخ!
يا علاء بمناسبة ديش دي، نهديك أسراب الحسان يغنيها عصام عشان تشوف ديش أبو الغنا زاتو !!
صاحبي الأوركسترا ، طارق ياخي رمضان كريم وتصوم وتفطر على خير
Quote: لا ادري هل السبب من عدم وجود مواهب او حواء لم تلد ام ان الشغل صار تجاريا او اندروسي الملامح حتي صرنا لا نحفظ ولا كلمة واحده من كل من غني بعد السبعينيات فهل العيب فينا ام فيهم ام في انتاجهم ام في اذاننا ... افيدني صديقي
يا ياسر ، تعرف مشكلتنا ، بل مصيبتنا شنو؟ إنو معظم المغنيين عندنا جهلة ، ومحدودي الثقافة قصة الغناء دي فهمهم ليها إنها شهرة شخصية ، وتكسب وأكل عيش ( فقط ) ، وفقط دي المصيبة زاااتا الغنا من أخطر وأهم الأدوات التي يعول عليها في إحداث تغيير ايجابي في أي مجتمع كان ، والتعامل معه بهذا المعنى يتطلب أن يكون المغني على درجة من الوعي والثقافة ، عشان يعرف يتعامل مع ( السلاح )الشايلو ده بمسئولية..
الحاصل يا قريبي إنو القصة بقت هردبيسة..
ثم أن شهادتك فيني ( مضبوحة ) ..
08-21-2010, 02:38 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
صلاح كيفنك ابوي ياخي عصام دة ما فيهو اي كلام غنااااااااااااااااي لكن انت كان منتظر من ناس جيل ((قنبلة)) و((مسدس)) وكركاسة ديل غناء واطاتك اصبحت يمينديل يغنوا في خور جانقي كتير عليهم
Quote: ساجدد البحث عن بعض البوستات التي كتبته حول عصام واحضرها لكم هنا
الأخ أيوب سلام ورمضان كريم أسمح لي أرد عليك ، إذ أنو صاحب البوست (مشكور) مديني نص في البوست دا.
إستخدم قوقل لجلب روابط بوستاتك إلى هنا ، أسهل وأسرع جدآ مقارنة بالبحث عبر المنبر. واجهتني نفس المشكلة حين أردت وضع رابط بوست الأخ الكريم عبداللطيف بكري أعلاه.
غيابي الطويل عن السودان لم يمكنني من معرفة عصام ومتابعة مسيرته الفنية إلا قليلآ عبر النت، وبرنامج أغاني وأغاني الرمضاني أراه للمرة الأولى. لذا شكرآ على الإفادة هذه، وعلى الحرص والنصح الأخوي لعصام، ليته يأخذه بمأخذ الجد وبصدر رحب كمان، لأننا نريده رقمآ صعبآ في خارطة الغناء السوداني، وهو بلا شك قادر على أن يكون.
Quote: عثمان حسين رحمه الله قد سلم عصام محمد نور الراية في لقاء شهير مع المرحوم حسن ساتي
فعلآ .. وكما أكد العملاق الراحل عثمان حسين، عصام زول ما عادي!
إحترامي وتقديري
08-21-2010, 01:52 PM
اسماء الجنيد
اسماء الجنيد
تاريخ التسجيل: 03-31-2010
مجموع المشاركات: 4731
الحبيبة هدير سمحة الاسم والطلة تسلمي انتي يا ست البنيات كلامك المرتب ورقة معانيك لامست وتر حساس وهدهدت الدواخل رغم الغربة البعيدة يديك قدر يرضيك يا بنية من بطن الحنان تعرفي يا هدير رغم المناقرة الداااااااائمة بيني وبين المجنون عصام وفي لا شيء بطبعه كلامه كلو مكاواة ما تشوفي الاحساس الحنين في الغنا لووول اول ما رفع السماعة طوالي هاجمتوا هوي معاي ناس بسمعوا في كلامك ده يلا خليني اقرأ ليك كلامهم حتى اداها صنة اتغير معاي 360 درجة واصبحت المخاطبة ليكم انتو والحق اتقال كلامكم كان ليه صدى من نوع آخر وانتي عارفة شغاف القلوب وصدق الاحساس من المعجبين لاحساسهم وكلامهم رنين آخر في دواخل المبدع يعني امس يا هدير بسببك والاخ صلاح وبقية المتداخلين كانت ونسة بدون شكلة ولا مناقرة ولاول مرة لوووووول تسلمي كتير ويسلم عمرك ان شاء الله ويعلا مقامك وكل سنة وانتي وكل الاسرة بالف خير يا رب رمضان كريم عليكم
08-21-2010, 01:58 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
Quote: شاعرتنا وأديبتنا الجميلة الأستاذة أسماء رمضان كريم عليك وعلى أسرتك الكريمة
تغمد الله والدكم برحمته ، وجعلها آخر أحزانكم ، وكذلك عصام.. الصدفة وأشتراككم وعصام في حزن فقدكم لأعزاء وهذا يعني بالضرورة أبداع حقيقي رغم أني لم أسمع أي من الأغنيتين ولكني متأكد من جمالهما...
عصام شهادتي فيه مجروحة بحكم علاقتي القديمة به ولكنني في الغنا ده يا أستاذة ما بجامل أبوي وما قلته في حق عصام لن تغيره علاقتي به ، أو عدم معرفتي له فأنا هنا أتعامل مع ( حالة ) أمامي ، تستوجب الثناء والإشادة..
أتمنى أن أسمع الاغنيتين.. تحياتي لك وللأستاذ الفاتح وأبناءكم..
اخي العزيز صلاح حبابك من تاني الاجمل في النقد هو المحايدة لذلك قرأت كلامك واحسست بصدق معانيك من عنوان البوست وحقيقي لا اعرف اي سابق معرفة بكما وهنا مربط الفرس كتابتك نابعة من احساس شفيف وعدم مجاملة لذلك اتى السياق سلسا عميقا بالمعاني والمفردات دون رياء وبكل عفوية وصدق لك الشكر مجددا وبالنسبة للاغنيتين اوعدك بانزالهم قريب ان شاء الله تسلم انت اخي العزيز من كل بلا وتسلم اسرتك ورمضان كريم عليكم وكل سنة وانتو بالف خير
08-21-2010, 03:06 PM
اسماء الجنيد
اسماء الجنيد
تاريخ التسجيل: 03-31-2010
مجموع المشاركات: 4731
Quote: وبتقديري الشخصي ان افضل اصدارين له هما عبقرية الكاشف وعتاب ( لان البوم عتاب بالعود وبه ابراز كبير لمقدراته الصوتية وعذوبة الاداء )
اصدر بعد ذلك عصام البوم ومضة هواي وبه اغنية لزميلتنا بالبورد اسماء الجنيد التي تداخلت اعلاه ( ولها مني التقدير والاحترام )والاغنية تبدا بمقطع
( فقدا كبير مو لي براي فقد الاهل كل الاهل لينا كلنا )
اخي الكريم ايوب لك مني الاحترام والتقدير ورمضان كريم عليك ان شاء الله تصوم وتفطر على خير ان شاء الله يا رب
اولا شكرا لكلامك الجميل واحساسك الدافق اوافقك الرأي بان اجمل اصدارت عصام هي عبقرية الكاشف 1و2 وعتاب اما بالنسبة لالحانه صاح توجد بعض منها متشابهه وهي امكن واحدة ولا اتنين في شريطه الاخير ومضة هواي وفعلا هي قصيدتي المرثية التي كتبتها في والدي رحمه الله (مرت سنة) وقصيدة اخري لم اذكرها صراحة وكثيرون من المقربين له قالوا نفس كلامك لكن لعصام الحان شجية جدا وحنينة ومعبرة ولكل لحن طابع مختلف تماما عن الآخر ومثال لذلك قصيدة بقول مطلعها تكلت زرعي على الرذاذ قصيدة جميلة جدا لاحد ابناء مدني اعتقد مذيع في تلفزيون الجزيرة عذرا خانتني الذاكرة في معرفة اسمه . القصيدة دي لحنت دليب ومسجلة في شريطه عتاب علي ما اعتقد والمرثية التانية التي كتبتها في الوالد عليه رحمة الله واسمها ( صدقني يابا ) واسماها عصام في الكاسيت ( ليل الاسى) ايضا لحنها عصام لحن معبر جدا اعطى القصيدة بعد آخر وسجلها بالطمبور مع الفنان جعفر السقيد بحاول جاهدة اجيبها ليكم هنا اكرر شكري اخي ايوب وكل عام وانت والاسرة بالف خير ان شاء الله
08-21-2010, 11:26 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
Quote: الحبيبة هدير سمحة الاسم والطلة تسلمي انتي يا ست البنيات كلامك المرتب ورقة معانيك لامست وتر حساس وهدهدت الدواخل رغم الغربة البعيدة يديك قدر يرضيك يا بنية من بطن الحنان تعرفي يا هدير رغم المناقرة الداااااااائمة بيني وبين المجنون عصام وفي لا شيء .. بطبعه كلامه كلو مكاواة ما تشوفي الاحساس الحنين في الغنا لووول اول ما رفع السماعة طوالي هاجمتوا هوي معاي ناس بسمعوا في كلامك ده يلا خليني اقرأ ليك كلامهم. حتى اداها صنة اتغير معاي 360 درجة واصبحت المخاطبة ليكم انتو والحق اتقال كلامكم كان ليه صدى من نوع آخر وانتي عارفة شغاف القلوب وصدق الاحساس من المعجبين لاحساسهم وكلامهم رنين آخر في دواخل المبدع يعني امس يا هدير بسببك والاخ صلاح وبقية المتداخلين كانت ونسة بدون شكلة ولا مناقرة ولاول مرة لوووووول تسلمي كتير ويسلم عمرك ان شاء الله ويعلا مقامك وكل سنة وانتي وكل الاسرة بالف خير يا رب رمضان كريم عليكم
بت الجنيد سوما الجميلة يا سلام عليك ياخ! كل حرف من كلامك السمح ينقط عسل والله! يا إمراة الجروف والحروف الندية الرويانة والوديان المخضرة ويا إمراة معطونة بالعسل والطيبة، بالحنان والمحنة والتحنان يا سلام عليك ياخ!
أنا النوع الذي يمل سماع الغناء الواحد المتكرر يا سوما، لكن مع عصام لا يحدث لي ذلك أبدآ. غناهو هادئ ومريح للأعصاب خاصة مع ضنك الغربة وهمومها التي تعلمين .. ربنا يحفظه! بلغي عصام تحياتنا وإعجابنا المطلق متى إتصلتي تاني .. وربنا يغطي عليك ويحفظك لأسرتك يا سمحة يا أنيقة أناقتك ما كلموني بيها، شفتها في النيل الأزرق لووول بتاعتك ديك !! تسلمي
عصام فنان مجنهد ويحاول أن يخلق شخصيته المميزة، وله الحق - في سبيل ذلك - أن يعتمد على نفسه طالما أن الساحة الفنية خلواً أوتكاد تكون خالية من الموسيقيين الموهوبين القادرين على التعامل مع صوته ، وعمل ألحان تتناسب معه. لذلك يحاول الاعتماد على نفسه. وسبق أن ذكرت للاخت هدير في بداية البوست الاقتباس أدناه:
Quote: معظم غنا عصام الخاص من تلحينو هو مشكلة لما ما تلقى زول موسيقي يعرف إمكانيات صوت الفنان عشان يعرف يتعامل معاهو في التلحين ، ودي الواقع فيها عصام (أتصور).. ما لاقي ملحن ( موهوب ) يتعامل مع صوتو ، ويلحن ليهو ..
اكيد الفن في مطلقه أداء من أدوات التغيير والأكثر قدرة على التعبير عن الصراع الاجتماعي واداواته كذلك لكن .. في ظل المتغير الموجود حالياً اصحبت المفاهيم والقدرة على هضمها واستيعابها في ظل ثقافة الطافبيع المهيمنة حالياً كما قال د. بشرى الفاضل ببقى كلامنا دي ذي حز المركوب الجديد الهردبيس الحاصل إفراز لواقع الأزمة الحالية في السودان التدهور بشمل كل نواحي الحياة الاقتصادية والاجتماعية .. الخ ولا يستثنى الفن من هذا التدهور الله يكون في عونا.. سلام ياسر حامد
08-21-2010, 07:50 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
أنا غايتو ما عارِف.. لكن في عِرسي الجاي المجنون عِصام محمد نور وحده لا مُنازِع له في صالة المُعلِّم.. شُفتو ليكُم زول بيختار فنّان عِرسو والصالة قبل ما يلقى العروس؟.. عِصام.. إنتا المُهِم والناس جميع ما تهِمَّني (بِما فيهم العروس).. الجِن الكلَكي
08-21-2010, 10:27 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
Quote: أنا غايتو ما عارِف .. لكن في عِرسي الجاي المجنون عِصام محمد نور وحده لا مُنازِع له في صالة المُعلِّم.. شُفتو ليكُم زول بيختار فنّان عِرسو والصالة قبل ما يلقى العروس؟.. عِصام.. إنتا المُهِم والناس جميع ما تهِمَّني (بِما فيهم العروس).. الجِن الكلَكي
هههه .. يا علاء الحلفاوي هسه داير تقنعني إنو بعد صلعتك دي كلها لي يوم الليلة حاييم بدون عرس وعروس؟! ولا قاصد العرس التاني؟
طالما إنت معجب بعصام فإنت شلتنا تب ، وحا نعتبرك من هسه أحد أعضاء رابطة معجبي المجنون عصام وبالتالي حا نجيهك بعروس مجيهة. يا بت الجنيد يا طيبة الأخلاق ما تجي تشوفي زول عصام دا تجيهيهو لينا؟
تصدق أنا وصلتي للسودان (ما معروف متين) حا أعمل لي حفلة بعصام لعدة مناسبات متراكمة .. غايتو ربنا يرفع القدم ويسهل !
_
08-22-2010, 00:09 AM
معتصم عيدروس
معتصم عيدروس
تاريخ التسجيل: 12-06-2005
مجموع المشاركات: 515
الأخوة الكرام .. صدق عدد كبير منكم في ما يميز عصام محمد نور .. وهو الألتزام والاحترام .. عصام فنان ملتزم في كل شئ ، في سلوكه وفي زمنه ، فلم نسمع في يوم من الأيام ونحن الذين بدأنا نسمع عصام وهو في بداياتها عندما كان أصغر فنان في مدني يغني في الحفلات .. وقد بدأ عصام يشق طريقه وهو في فترة المرحلة الثانوية بأغانيه الخاصة الملتزمة ، وهي الأغاني التي اشتهر بها من خلال شريطه الأول والذي ادهش كل السودان الا ابناء مدني لأنهم سمعوا هذه الأغاني كثيراً. بمناسبة عصام فهناك فنان آخر يسلك نفس طريق عصام ، ولو كان السر قدور قد أتى به بدلاً عن أكثر من فنان لكان قد أضاف الكثير للبرنامج ، وهو الفنان ابن مدني أيضاً عمر جعفر الذي يمتاز بخامة صويتة مميزة ، بالاضافة الى انه يشترك مع عصام في الالتزام واحترام الفن.
08-22-2010, 08:13 AM
محمد علي شقدي
محمد علي شقدي
تاريخ التسجيل: 04-25-2010
مجموع المشاركات: 2730
Quote: اخي الكريم ايوب لك مني الاحترام والتقدير ورمضان كريم عليك ان شاء الله تصوم وتفطر على خير ان شاء الله يا رب
اولا شكرا لكلامك الجميل واحساسك الدافق اوافقك الرأي بان اجمل اصدارت عصام هي عبقرية الكاشف 1و2 وعتاب اما بالنسبة لالحانه صاح توجد بعض منها متشابهه وهي امكن واحدة ولا اتنين في شريطه الاخير ومضة هواي وفعلا هي قصيدتي المرثية التي كتبتها في والدي رحمه الله (مرت سنة) وقصيدة اخري لم اذكرها صراحة وكثيرون من المقربين له قالوا نفس كلامك
شكرا اسماء القصيدة الثانية هي كل الكلام القلتي لي يا يمة مابنساهو يوم كيف انسى حنيتك علي يالشلتي من قلبي الهموم
Quote: ومثال لذلك قصيدة بقول مطلعها تكلت زرعي على الرذاذ قصيدة جميلة جدا لاحد ابناء مدني اعتقد مذيع في تلفزيون الجزيرة عذرا خانتني الذاكرة في معرفة اسمه . القصيدة دي لحنت دليب ومسجلة في شريطه عتاب علي ما اعتقد
تكلت زرعي على الرزاز فيها كمية من كلام اهلنا الشوايقة الحنين وهي من الاغاني المفضلة لي بلسان عصام وبها لحن جميل ومبدع وهي من اجمل اغاني البوم عتاب
Quote: والمرثية التانية التي كتبتها في الوالد عليه رحمة الله واسمها ( صدقني يابا ) واسماها عصام في الكاسيت ( ليل الاسى) ايضا لحنها عصام لحن معبر جدا اعطى القصيدة بعد آخر وسجلها بالطمبور مع الفنان جعفر السقيد بحاول جاهدة اجيبها ليكم هنا اكرر شكري اخي ايوب وكل عام وانت والاسرة بالف خير ان شاء الله
بالمناسبة يا اسماء في كثيرين من الناس مابيعرفو انو عصام ليه البوم بالطنبور ومع الفنان جعفر السقيد لدرجة اني عندما قابلت عصام سالته انت شايقي ؟؟ فرد علي لا والله فقلت ليه البيسمع غناك مع جعفر السقيد بيحس انك من اهلنا الشوايقة
وهكذا عصام يجيد اي غناء يقوم به
انا امتلك جميع البومات عصام منذ بداياته ايام مدني ولي بعض التسجيلات القديمة له من حفلات جامعية
وانصح الجميع باقتناء شريط الطنبور مع جعفر السقيد
لانه بصراحة البوم مختلف كثير عن كل انتاجه الفني وبه ابراز كبير لمقدراته الصوتية
عصام محمد نور مشروع غناء كبير وعظيم للفن السوداني
واجزم ان عذوبة صوته لم ولن تتكرر
لاحظو فقط عندما يغنوا مجموعة في اغاني واغاني
صوت عصام مميز من داخل جميع الاصوات
ودائما يكلف بالمهام الصعبة
08-22-2010, 09:08 AM
نور الدين عثمان
نور الدين عثمان
تاريخ التسجيل: 04-30-2010
مجموع المشاركات: 1390
Quote: الأخ أيوب سلام ورمضان كريم أسمح لي أرد عليك ، إذ أنو صاحب البوست (مشكور) مديني نص في البوست دا.
إستخدم قوقل لجلب روابط بوستاتك إلى هنا ، أسهل وأسرع جدآ مقارنة بالبحث عبر المنبر. واجهتني نفس المشكلة حين أردت وضع رابط بوست الأخ الكريم عبداللطيف بكري أعلاه.
شكرا هدير
فعلا معلومة مفيدة لانو دايما كنت بتعب لما افتش اي بوست
كانت الدفعة تتساءل ما الذي يريده هذا الفتى النحيل القادم من مدني تسبقه الشهرة والأضواء من كلية الموسيقى والدراما؟! لم يكن يمضي يوم أو ليلة من ليالي الخرطوم إلا وعصام محمد نور حاضراً فيها بغنائه العذب الغارق في الشجن المليء بعطر الماضي.
إرادة المنهج:
كان عصام يعلم أن الموهبة مهما تمددت طاقتها ستزوى إن لم يعضدها العلم ويرفدها بأسس الاستمرارية وقوانين البقاء والتطور فأخذ نفسه بمشقة الدرس.. كان التوفيق بين كونه مطرباً محترفاً وطالباً نظامياً احدى محطات المعاناة والصراع.. عالم الأضواء والنجومية رشده نحو مداراته وإرادة العلم والتجويد تلزمه مقاعد الدرس.. انتصر عصام محمد نور في نهاية الأمر للعلم مستعيناً بطاقة الصبر التي استمدها من معينه الصوفي العميق الضارب في أغوار شخصيته.
التضحية بالأضواء:
الذين عايشوا تجربة عصام محمد نور طالباً بكلية الموسيقى والدراما يلاحظون أمراً لافتاً خاصة أساتذته فعصام لم يتغيب قط عن محاضرة أو سمنار أو مشاركة أكاديمية وسجله الأكاديمي الناصع يشهد له بهذه الروح المثابرة.
اضطر عصام طالب الموسيقى الى تقليص إطلالته الإعلامية الى أقصى الدرجات الممكنة واقتصر نشاطه تقريباً على الأنشطة الطلابية في الجامعات والمعاهد العليا أسابيع استقبال الطلاب أو وداعهم وتخريجهم أو أنشطة الروابط داخل وخارج العاصمة حتى يكرس أكبر قدر من طاقته ووقته للتحصيل العلمي.
النشأة الفنية:-
في قلب الجزيرة الخضراء وادمدني نشأ متنقلاً بين أحيائها في ذاكرة الصبا الباكر «ود أزرق، حي القبة، البيان، الدباغة، بانت، أركويت»، النشاط المدرسي
بداية الظهور: كانت في العام 1982 - 1983م حيث حصل على الجائزة الأولى على مستوى الجزيرة وعلى مستوى الإقليم الأوسط حيث أدى أغنيتين «الزمان زمانك - اهدي لي من فضلك نظرة من رمانك يا الفريد في عصرك».
وأغنية لإبراهيم الكاشف: «الليلة لاقيتو»:
محطات جماهيرية:
شكلت جامعة الجزيرة في نشأتها الباكرة أولى منصات انطلاق الفنان الصاعد المتأني عصام محمد نور من أولى الدفعات أوائل التسعينات وحتى الآن حاضر في برامجها الثقافية.
كلية الموسيقى والدراما:
التحق عصام بكلية الموسيقى والدراما 1995م وتخرج فيها في العام 2001م تخصص صوت بياني إضافي.
المجموعة الموسيقي:
شملت محترفين وطلاب وقاد الموسيقى ناجي تاج السر تنفيذ كل الألبومات.
1997م:
هو العام الذي شهد تفرغه تماماً واحترافه الغناء، توالت بعد هذا العام رحلة التوثيق لإنتاجه الغنائى على هذا النحو.
إعتذار:
البوم من إنتاج شذروان 1997م سجل عام 1995م وهو الألبوم الأعلى توزيعاً في بورصة المطربين الشباب «نفدت طبعاته العديدة من الأسواق الآن».
ليك زمن 1999 + ليلة صيف 2000 ـ 2001 مهاجر 2002م ما ترحلي - روعة.
طيبة دار الصوفي:
إنتاج من المدائح النبوية بمشاركة عصام درماس «بعض المدائح من نظم عصام محمد نور وألحانه وبعضها ألحانه فقط».
عبقرية الكاشف:
تم امتلاك حقوق المصنف واثبتت الحقوق المجاورة في ديباجة الألبوم وأعيد توزيعها وأداؤها بصوت عصام محمد نور.
«لاحظ تأخر صدور الألبوم الخاص بإبراهيم الكاشف بينما بدأ عصام بأداء أغنيات الكاشف فكأنما أراد عصام عبر خطة إنتاج الألبومات أن يثبت بصمته وشخصيته الفنية وتقديمها للناس أولاً.
دراسة الصوت:
أفادت دراسة الصوت عصام في أن يغني وفق أسس علمية دون أن يتأثر الصوت.
الألحان: أولها ما قدرت أوادعك ويا نسايم.
الاستديوهات: تميز عصام من غيره بالإهتمام بالاستديو فسجل كلاً من «إعتذار، ليك زمن، ليلة صيف، في استديو سميح شقير بسوريا بإشراف مهندس الصوت عاصم البني، طيبة دار الصوفي، عبقرية الكاشف، يا روعة سجلت باستديو العربي بالقاهرة».
ناقد فني
منقول**
المقال من اجمل واعمق ماكتب عن التحليل الفني لعصام وانتاجاته واسلوبه
08-22-2010, 02:03 PM
doma
doma
تاريخ التسجيل: 02-04-2002
مجموع المشاركات: 15970
احححححححي انا من بكين دي يا بورداب الصين انتوا بتشوفوا اليوتيوب هنا كيف ؟؟؟ ويا حبان ما عندكم طريقه تنقلوا بيها غناء عصام دا هنا غير اليوتيوب ؟؟؟!! والله حالي يحنن الطير في سماه
08-22-2010, 02:25 PM
اسماء الجنيد
اسماء الجنيد
تاريخ التسجيل: 03-31-2010
مجموع المشاركات: 4731
Quote: بلغي عصام تحياتنا وإعجابنا المطلق متى إتصلتي تاني .. وربنا يغطي عليك ويحفظك لأسرتك يا سمحة يا أنيقة أناقتك ما كلموني بيها، شفتها في النيل الأزرق لووول بتاعتك ديك !! تسلمي
هدير يا هدير العاطفة تسلمي يا غالية سلامك وصل وعلقت معاه على اسمك بصراحة من اجمل اسماء البنات القابلتني عنده ولدين ربنا يخليهم ليهو ابو مجتبي قال ليك لو جاب بنية بسميها هدير وانا علي الهدية يا هدير ما عليك انتي تسلمي يا حبيبة ويسلم احساسك العالي يا رب الغربة حارة والله يا حنينة ربنا يرجعنا اهلنا سالمين تامين بركة رب العالمين تسلمي يا هدير
دومة الحبيبة ازيك ورمضان كريم عليك يا رب انتي ما عليك يا دومة ياختي الا تتابعي جنس البوستات دي بتلقي فيها كل الجمال لكن ما فهمت يعني اليوتيوب ما بفتح عندك ولا شنو ؟ تبقي دي عوجة كمان نحن كان ختينا اليوتيوب كان رجعنا اهلنا كداري لوولز كل سنة وانتي طيبة يا رب البوست ده حنين جنس محنة يا اخوانا بي لمتكم دي والله كل مره اجي اتاوق فيكم اصبحكم وامسيكم وامشي في حال سبيلي
08-22-2010, 02:33 PM
اسماء الجنيد
اسماء الجنيد
تاريخ التسجيل: 03-31-2010
مجموع المشاركات: 4731
Quote: بالمناسبة يا اسماء في كثيرين من الناس مابيعرفو انو عصام ليه البوم بالطنبور ومع الفنان جعفر السقيد لدرجة اني عندما قابلت عصام سالته انت شايقي ؟؟ فرد علي لا والله فقلت ليه البيسمع غناك مع جعفر السقيد بيحس انك من اهلنا الشوايقة
الاخ ايوب سلامات وتحايا فعلا كلامك صاح بالزات الناس البره السودان وما متابعين المسيرة الفنية لكل المبدعين
طيب ياخوي مدام عندك شريط الطمبور ده ما تنزل لينا القصيدة المرثية هنا في الشريط اسمها ليل الاسى ولو خايف نخرب البوست لاخونا صلاح والبت العسل هدير وبقية المعجبين ممكن نفرد ليها بوست براها لانها مرثية وما دايريين نقلبها ليكم مناحة القصيدة مطلعها بقول صدقني يابا دمعاتي جارية ولسة كابا كاسرة زي سيلا دفر دمر شتول نوارو شابا قطع حشا الفرع الرطب حتحت خضر نديانا دابا شرد عصافيرا بنت اعشاشها من آخر السرابا
وحا انزل القصيدة كاملة بعد تلحقنا بالصوت تحياتي وتقديري لك
08-22-2010, 03:00 PM
doma
doma
تاريخ التسجيل: 02-04-2002
مجموع المشاركات: 15970
سومه ست اللهيج السكري وانت طيبه يا حبيبه وتصومي وتفطري علي خير تصدقي هنا منعوه مننا بي دا كله نقول الله يبارك فيهم ما منعوا المسنجر والاسكايب والا كان متنا شوقا لصوت الزول البقول سلام
08-22-2010, 06:06 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
عزيزنا صلاح عبدالله سلامات ورمضان كريم يا أخى الاستماع زاتو فن . وأنت زول عندك مهارة فى الاستماع . الزول الجبتو ده قبل حوالى 9 شهور من رحيل الفنان عثمان حسين . جلس بجانب عثمان حسين فى التلفزيون . العالم كلو شاف وسمع عثمان حسين اليوم داك قال شنو بعد غناء عصام . فنان جميل وكارب وعارف يرتب حاجاتو كيف . وربنا يديه العوافى . ألف شكر أستاذ صلاح .. تحياتى
08-22-2010, 07:17 PM
الفاتح الجنيد
الفاتح الجنيد
تاريخ التسجيل: 08-19-2007
مجموع المشاركات: 1003
الاخ صلاح هبشت عصب الاحساس ونقرت عليهو بعمق هذا العصام الانسان فلته زمانو حقيقى عصام ما غنى لاحد عمالقة الفن القدامه الا وبزهم (وعفوا لو استعرت الكلمه دى) فى توصيل رهافة الكلمة وعمق الاحساس باللحن كتير من الناس ما استساغوا الاغانى القديمة الا عند هذا الشاب فلك الحق فى ان تصفه بالجنون لانه شااااذ فى موهبته لك التحيه فى ان اوفيت عصام حقه ورمضانك كريم يا حبيب وربنا يتقبل
08-22-2010, 08:44 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
Quote: هدير يا هدير العاطفة تسلمي يا غالية سلامك وصل وعلقت معاه على اسمك بصراحة من اجمل اسماء البنات القابلتني .. عنده ولدين ربنا يخليهم ليهو ابو مجتبي قال ليك لو جاب بنية بسميها هدير وانا علي الهدية يا هدير ما عليك انتي تسلمي يا حبيبة ويسلم احساسك العالي يا رب ربنا يرجعنا اهلنا سالمين تامين بركة رب العالمين تسلمي يا هدير
سوما الأصالة والجمال انتي من ملأتي هذا البوست حنية ومحنة والله ، وجعلتي منه واحة ظليلة للكل بحنيتك وكلامك الطيب، وجبتي محملة بكل ما هو جميل من مبدعنا (المجنون).
ربنا يحفظ لأخونا العزيز عصام وليداتو. وفيما يختص ببت عصام الجاية، أسمحي لي أقول ليك : هييييي يختي الإسم إسمي وما تزاحميني بالله في كرامة الإسم والهدايا الما خمج، وهدايا عيد الميلاد. بالله يا بت الجنيد شوفي ليك مكان تاني زاحمي فيه بهداياك وكراماتك دي .. ههههه
الله يديك على قدر نيتك الطيبة وربنا يتولى الوالد برحمته، ويخلي ليك وليداتك وأبوهم .. وما عدمناك يا جميلة. تسلمي
كلمات: أسماء الجنيد ألحان: عصام محمد نور غناء: عصام محمد نور - جعفر السقيد النوع: طمبور
عبير شكرآ على هذه الدرر ويا لها من مرثية !! وأيم الله قد شقت قلبي لنصفين من الأسى والحزن بت الجنيد أبدعتي والله وربنا يتولى الوالد برحمته وعصام ربنا يديه العافية (كالعادة) ما قصر أبدآ !
تسلمي يا عبير وكل سنة وإنتي طيبة
08-23-2010, 10:07 PM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
Quote: وبسبب زمن الانحطاط الذي نعيشه الآن ، فقد تغيرت معايير ( السمع ) عند الأجيال اللاحقة لجيل العمالقة هؤلاء فاصبح سمعهم يقودهم لتمجيد غناء على الشاكلة التي تهيل أطناناً من الغثاء والأوساخ على طبول آذاننا التي فترت من المقاومة . وليس هنالك من دليل على خواء وفقر ، وإفتقار للموهبة ، وجهل ، وشعبطة في الغناء ، أوضح من ظاهرة ترديد صغار ( المغنواتية ) لغناء جيل ( الفنانين ) الحقيقيين ، للتدليل على أن هؤلاء المغنواتية ومعهم صناع ما يسمى بالغناء ( الآن ) عاطلين عن الموهبة وفاشلين في انتاج غناء مقنع يُبيّن ويُؤكد استحقاقهم للالقاب التي أصبحت تُطلق على كل من هبّ ودبّ.
الكلام الفوق ده ياهو الحاصل بالضبط ، أنا ما قادر اتخيل زول بيقلد يطلقوا عليهو كلمة فنان كبير، كيف دي؟ للأسف كلهم مقلدين وما في مغني فيهم وضع بصمة جديدة ، ربما نطلق عليهم كلمة مواهب ولكن ،مواهب لمتين ؟ الواحد فيهم بيغني عشرين سنة وما عنده اغنية واحدة خاصة معروفة. نحن نعيش الآن في زمن الانحطاط الفني ، كل من هب ودب ممكن يجي يغني في التلفزيون ، زمان المغني كان بيبدا من الحي، ثم مركز شباب ولو نجح شديد كان بيفرض نفسه على المستمع لحد ما يصل التلفزيون ، اليوم المسألة إتقلبت ، يبدا بالتلفزيون ويجي نازل للحي ، حتى عصام محمد النور المذكور في البوست لا يخلو من التقليد والدليل الاغنية اللى في البوست ده اغنية المصير، يمكن الناس تقول صوته جميل ويمكن أداؤه جميل، لكن ويين بصماته ويين غناهو الخاص؟ لابد من ايقاف مسألة التقليد على الاقل في الاجهزة الرسمية حتى يجتهد كل من يجد في نفسه الكفاءة للغناء عشان يورينا شيء حقه
وتصوموا وتفطروا على خير
08-23-2010, 08:53 PM
اسماء الجنيد
اسماء الجنيد
تاريخ التسجيل: 03-31-2010
مجموع المشاركات: 4731
الاخت عبير خيري سلام ورمضان كريم عليك ان شاء الله شكرا ليك بعمق الحزن الجواي لايراد القصيدة واللحن كتر خيرك كتير وما تشوفي يوم حزين يا رب وبالجد غلبني انزلها ليكم ما قصرت اختنا عبير ما يقصرن ايامها ان شاء الله وكل عام وانتي بالف خير
الحبيبة هدير تبري من الالم انتي ان شاء الله يا رب وسلامة قلبك ان شاء الله
وعليكم الله ادعو معاي في الشهر المبارك ده الله يرحم ابوي ويوسده البارده ان شاء الله ويسكنه فسيح الجنان ويرحم جميع موتانا وموتي المسلمين آمين
عذرا الاخ صلاح لو حرفنا مسار البوست
08-23-2010, 10:01 PM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
Quote: بالجد غلبني انزلها ليكم ما قصرت اختنا عبير ما يقصرن ايامها ان شاء الله
الحبيبة هدير تبري من الالم انتي ان شاء الله يا رب وسلامة قلبك ان شاء الله
وعليكم الله ادعو معاي في الشهر المبارك ده الله يرحم ابوي ويوسده البارده ان شاء الله ويسكنه فسيح الجنان ويرحم جميع موتانا وموتي المسلمين آمين
عذرا الاخ صلاح لو حرفنا مسار البوست
الغالية سوما حتمآ لا يموت من ولد مثلك!! .. فهنيئآ للوالد بك سأدعو لوالدكم الكريم بالرحمة والمغفرة طوال الشهر الكريم وبعده. جعله الله من أصحاب اليمين وجبر الله كسركم
البوست دا أديناك فيهو التلت أنا وسيدو صلاح عبدالله (قلعنا من سيدو غايتو!)، أخدي راحتك بالكامل وأتحفينا بحزنك النبيل، ببهجتك ومسرتك .. وبقصائدك الجميلة
دمتي طيبة
08-23-2010, 10:14 PM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
Quote: الاخت عبير خيري سلام ورمضان كريم عليك ان شاء الله شكرا ليك بعمق الحزن الجواي لايراد القصيدة واللحن كتر خيرك كتير وما تشوفي يوم حزين يا رب وبالجد غلبني انزلها ليكم ما قصرت اختنا عبير ما يقصرن ايامها ان شاء الله وكل عام وانتي بالف خير
يا صاحبة الحرف الزاكي
إزيك يا سوما
وإنشاء الله ربنا يجعلها آخر الأحزان
وانا والله عشان الكلام ده وعارفة حتأثر فيك قدر شنو اترددت مليون مرة قبل ما انزلها
لكن في غالب الاحيان يكون الحزن حبر القلم الأنيق
وتبقى هذه الدمعات في كتاب الفن رائعة من الروائع
اللهم أرحم والدك وكل الفقد وادخلهم فسيح الجنات
تسلمي
08-23-2010, 10:23 PM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
كلمات: صلاح أحمد إبراهيم ألحان: محمد وردي غناء: عصام محمد نور النوع: أوركسترا
الطير المهاجر
وحيد فى غربته حيران يكفكف دمعته حزنان يغالب لوعته
ويتمنى بس لعودته طال بيه الحنين فاض به الشجن واقف يردد من زمن
بالله .. بالله يا الطير المهاجر للوطن زمن الخريف تطير بسراع تطير ما تضيع زمن اوعك تقيف وتواصل الليل بالصباح تحت المطر .. وسط الرياح وكان تعب منك جناح فى السرعه زيد فى بلادنا ترتاح ضل الدليب اريح سكن
تفوت بلاد .. وتسيب بلاد وان جيت بلاد وتلقى فيها النيل بيلمع فى الضلام زى سيف مجوهر بالنجوم فى الظلام تنزل هناك وتحى يا طير باحترام
بالله ياطير قبل ما تشرب تمر على بيت صغير من بابه من شباكه بيلمع الف نور تلقى الحبيبه بتشتغل منديل حرير لحبيب بعيد تقيف لديها وتبوس ايديها وانقل اليها وفائى لها وحبى الاكيد
وكان تعب منك جناح فى السرعه زيد فى بلادنا ترتاح ضل الدليب اريح سكن
08-24-2010, 07:12 AM
ترهاقا
ترهاقا
تاريخ التسجيل: 07-04-2003
مجموع المشاركات: 8422
كلمات: صلاح أحمد إبراهيم ألحان: محمد وردي غناء: عصام محمد نور النوع: أوركسترا
رفقا بنا أختنا عبير ، فغناء محمد وردي لا يصلح إلا بأداء محمد وردي نفسه وياريتك تنزلي لينا غناء خاص لهذا العصام عشان نعرف غناهو الخاص بدل ما يقعد يقشر بغنا الفنانين الكبار
وتصومي وتفطري على خير
08-25-2010, 04:42 AM
Hadeer Alzain
Hadeer Alzain
تاريخ التسجيل: 07-13-2008
مجموع المشاركات: 3530
Quote: أنا ما قادر اتخيل زول بيقلد يطلقوا عليهو كلمة فنان كبير، كيف دي؟ للأسف كلهم مقلدين وما في مغني فيهم وضع بصمة جديدة
Quote: الواحد فيهم بيغني عشرين سنة وما عنده اغنية واحدة خاصة معروفة
Quote: نحن نعيش الآن في زمن الانحطاط الفني
Quote: رفقا بنا أختنا عبير ، فغناء محمد وردي لا يصلح إلا بأداء محمد وردي نفسه وياريتك تنزلي لينا غناء خاص لهذا العصام عشان نعرف غناهو الخاص بدل ما يقعد يقشر بغنا الفنانين الكبار
يا ترهاقا جاي مقوم نفسك فينا كدا مالك يا أخوي؟!
فاتح البوست (مشكور) ونحنا أناس موجتنا واحدة، ذوقنا واحد وإيقاعنا واحد. إجتمعنا وجمعنا حب عصام وغناهو. إنت قايلنا ما بنعرف الغناء إلا من خلال رؤيتك ونظرتك ليهو إنت ولا شنو؟!!!!
الناس الفي البوست دا (بالمناسبة) ناس ذواقين أكتر مما تتصور وبفهموا في الغناء السمح أكتر مني ومنك، وبعرفوا وعارفين وردي شنو وعثمان حسين شنو وعصام محمد نور شنو، ولونية عصام المتفردة في الغناء التي يغني بها أغاني الغير جعلتنا نحب تلك الأغاني أكثر وأكثر ونحب هذا العصام أكثر وأكثر. عصام دا (لمعلوميتك) عاجبنا ومالينا بهجة ومسرة وسكون لا يمكنك تصور مداهم. لو ما عاجبك أداء عصام أو تقليدو مافي حاجة أساسآ بتجبرك على الدخول هنا. ولا أمشي أفتح ليك بوست إنتقد فيهو عصام زي ما عايز وفند وأدحض كما تشاء .. شوفنا لو جينا داخلين عليك. هو الرسول (ص) الجاي مرسل من ربنا كان عندو معارضين ومهاجمين لمن عصام!!!
ياخى بصراحة كدا، قفلت نفسنا من البوست بنقتك الكتيرة دي، والناس الهنا دي من شدة إحساسها المرهف ، عشان ما يردوا ليك رد ما ياهو بكونوا مشوا وخلو ليك البوست الجميل دا! ياخ كاتل فرحتنا مالك ؟
الواحد أصلو ما يعشم في لحظات فرح جميلة دون عكننة ولا شنو؟!!
Quote: ونحنا أناس موجتنا واحدة، ذوقنا واحد وإيقاعنا واحد. إجتمعنا وجمعنا حب عصام وغناهو. إنت قايلنا ما بنعرف الغناء إلا من خلال رؤيتك ونظرتك ليهو إنت ولا شنو؟!!!!
الاخت Hadeer Alzain
تحياتي ورمضان كريم
اسمحي لي اختي هدير ومداخلتي ليست للدفاع عن الاستاذ ترهاقاوالتحدث باسمه ولكن احقاق للحق بحق الموسيقار والفنان الاستاذ ترهاقا
الاستاذ ترهاقا من الموسيقين السودانيين الذين لهم اسهامات رائعة وقدموا الكتير في مجال الموسيقى وله باع طويل في الموسيقى والفن السوداني ، على يده وايدي زملائه جاءت الى الحياة الكثير من الحان الاستاذ وردي والكثير من رموز الغناء السوداني ثقتي انه كتب مداخلته من وحي غيرته وخاصة لما جاء الحديث عن اغنية الطير المهاجر وهي واحدة من الاغنيات التي قدمها ترهاقا برفقة زملائه مع الاستاذ وردي واحباطه من الحاصل الان في الساحة باعتباره واحد من اهل الموسيقى العاشوا في السودان وعاشوا زمن الفن الجميل الاصيل عشان كدا بيكون محبط لما بيشوف ويقارن ما بين الان وزمان هو تحدث عن التقليد ووضع بصمة خاصة للفنان من خلال اغانيه الخاصة وليس اغاني الغير اكتر من الحديث عن امكانيات الصوت و حنلقا انه مسالة فيها اهتمام حقيقي بالفن السوداني وليس تقليلا من شأن احد
ولكي شكري تقديري
(عدل بواسطة maia on 08-25-2010, 07:59 AM) (عدل بواسطة maia on 08-25-2010, 11:47 AM)
Quote: وياريتك تنزلي لينا غناء خاص لهذا العصام عشان نعرف غناهو الخاص بدل ما يقعد يقشر بغنا الفنانين الكبار
يعني دا برضو Maia كلام زول دارس موسيقى ولا خبير موسيقي يتكلم في زميله بالشكل دا؟
يعني (هذا العصام) تقال بهذه الشاكلة المستفزة بحق إنسان واضح أنو فارض نفسه بقوة بصوته الجميل وتمكنه في الأداء؟؟
يعني الآن زي أغنية (جانا الهوى) التي نسمعها كل يوم تقريباً ، هل جاء أحدهم وقال إنها لا تصلح إلا لعبد الحليم؟؟ بل العكس يطرب لها كل من يسمعها في كل حين وتصبح جواز مرور للفنانين لقلوب المستمعين،،
غنى محمد الأمين (نور العين) فقلنا ياليته وهبها له،،
اغنية الطير المهاجر أغنية خالدة ، ونجاح عصام في أدائها إحتفاء مستمر بالشاعر والملحن والفنان،،
ومن لا يعرف أن لعصام محمد نور أغنياته الخاصة لا بد أنه بعيد عن هذا الوسط!!
Quote: يعني دا برضو Maia كلام زول دارس موسيقى ولا خبير موسيقي يتكلم في زميله بالشكل دا؟ يعني (هذا العصام) تقال بهذه الشاكلة المستفزة بحق إنسان واضح أنو فارض نفسه بقوة بصوته الجميل وتمكنه في الأداء؟؟ يعني الآن زي أغنية (جانا الهوى) التي نسمعها كل يوم تقريباً ، هل جاء أحدهم وقال إنها لا تصلح إلا لعبد الحليم؟؟ بل العكس يطرب لها كل من يسمعها في كل حين وتصبح جواز مرور للفنانين لقلوب المستمعين،، غنى محمد الأمين (نور العين) فقلنا ياليته وهبها له،، اغنية الطير المهاجر أغنية خالدة ، ونجاح عصام في أدائها إحتفاء مستمر بالشاعر والملحن والفنان،، ومن لا يعرف أن لعصام محمد نور أغنياته الخاصة لا بد أنه بعيد عن هذا الوسط!!
هدير وعبداللطيف كفيتو ووفيتو ..
كل سنة وانتو كلكم طيبين..
08-30-2010, 02:11 AM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة