|
|
 جهاز موبايل يعمل بدون بطارية
|
بشري ساره إلى كل الذين يدقسون وينسون وبالتالي يعانون وبخاصة في شحن الموبايل بالقدر الذي تجي للواحد مكالمة مهمة جداً وتحدد مسيرة ومصير حاجات كتيرة ........ أها وبي فرح السنين تقوم ترد "ألو" وطررررراخ يقوم يقطع الخط والشاشة تطفئ ويطفئ التلفون ويكون في حاجة إلى شحن البطارية والفي الطرف الآخر "المتصل" يحاول مرة ومرتين وتلات مرات فتأتيه إجابة الرد الآلي "هذا الرقم لا يمكن الإتصال به الآن يرجى معاودة الإتصال لاحقاً" والمتصل كيد يزعل ويأخذ موقف ويسب ليك ولي MTN أو سوداني إن شاء الله يكون سوداني ون.
المهم في شركة سويسرية قامت مشكورة بصناعة جهاز موبايل يعمل بدون بطارية يعني زيو وزي الساعة تماماً في الفكرة أى يعمل بحركة اليد أها الموبايل دا متوفر الآن في الأسواق بس ما بي كتره . وقبل ما تفكر في رمي موبايلك القديم وشراء موبايل جديد لابد أن تكون ملماً بالحقائق التالية:
-الموبايل ذهب خالص عيار 24 هكتار
-القيمة بالتقريب كده حوالي 17 ألف يورو وكل واحد يجيب الـ calculator خاصته ويضرب بالعملة التي يتعامل من خلالها أنا عن نفسي لا نفعت بالجنيه لا لفقت بالدينار فقلت أجرب البر الأثيوبي
أكتر حاجه عــــــــاجبـــــــاني في الموبايل دا إنه الساعة ممكن تكون digital أو analoge وطبعاً العبد لله قايل نفسه إكتشف خميرة البيرة نط واحد من ألد أصدقائي وقال لي يا وهم النوكيا تلاتين عشرة فيهو الكلام دا وما زلت أبحث في النت عن النوكيا تلاتين عشرة وظهرت أقرب نتيجة مطابقة في موقع قرية الدبيبة عبد الله أونلاين طبعاً.
طبعاً الموبايل دا لو بقي شرط من شروط الزواج في الشيله وكده الناس الما عرسو ما بيكونو أكل نيم ونيم ناشف كمان ، لكين أكيد كل مشكلة وليها حل الصينيين كان حا يعملو ليك موبايل مقلد يعني إلا توديهو محلات تبيدي عشان تعرف إنه دا دهب ولا فالصو .
|
|
 
|
|
|
|
almulaomar
فيس بوك
تويتر
انستقرام
يوتيوب
بنتيريست