|
مَا عَدِمْناكُمْ
|
بورداب الخُرْطوم عُموم و (شُلّة العَوضْ) على وجْه الخُصوص ديل ناس من دَهَبْ تعرّضتُّ اليوم لحادث سير بشِع مع ركشة في مِنْطقة الدُّروشاب و أنا أتّجِه صوب منزل صديقي البوردابي مكِّي الأحْمدي إنْقلبت الرّكشة رأساً على عقب و بها امْرأة و ثلاثة أطْفال أحدهم رضيع زائداً سائق الرّكشة أُصيبوا بخُدوشٍ طفيفة و أنا غير مُصدِّق بل كُل من شاهد الحادث لم يُصدِّق سائق الرّكشة بحمد الله (برضو طفل) لم يُصب حتّى بخدوش الرّكشة بعد انكِفاءتها حالها يُغْني عن سُؤالها دابّتي تضرّرت كثيراً أيضا قضيت اليوم ما بين أرانيك (8) و حوادِث بحري من أشِعة و موْجاتٍ صوْتِيّة و ما بين قِسْم مرور بحري
حبيبنا وهْبة – شيخ العَوَضْ كانوا مكان الحَدَثْ وليد الشِّفِت يتململ في كُرسيه بالعَمَلْ و أنا أرجوه ألا يأتي فالأمر بسيط بدْر الدِّين إسحق إتّصل ليصِل فمنعْناه لأن الأمر قد تم احْتِواءه د.داليا الكبّاشي صديقتنا و حَرَم صديقنا الجّميل تامبا إتّصلت مُشاغِبة لِتخُفِّف علينا هول ما حَدَثْ مكِّي الأحمدي بِسيّارته قام بإيصال المرأة و أطْفالها إلى منزِلهم
شُكْراً يا شباب ولا أراكم الله مكْروهاً في أنْفِسِكم أو في عزيزٍ لديكم و دامت شُلّة العَوضْ و ما عَدِمْناكُمْ
|
|
|
|
|
|
|
|
Re: مَا عَدِمْناكُمْ (Re: علاء الدين يوسف علي محمد)
|
الف الف حمدلله على سلامتك يا علاء, وقدر ولطف يا اخوي .. ربنا يعوضك كل خير انشالله , وبركه الجات في الحديد ..
---------- Quote: د.داليا الكبّاشي صديقتنا و حَرَم صديقنا الجّميل تامبا إتّصلت مُشاغِبة لِتخُفِّف علينا هول ما حَدَثْ
|
الخير تجقلب والشكل لي حماد , اسي تامبا دا ضرب ليك ولا جاك ولا اخد خبرك .. بس كتابه تشريفيه يعني في جاه الملوك نلوووك
| |
|
|
|
|
|
|
Re: مَا عَدِمْناكُمْ (Re: بابكر التوم)
|
لا حَول ولا قُوة إلا بِالله ... يا ناس في شنو ... أُمْبارِح محمد عادِل وإنت الليلة ... يا ناس إتْجمعو في بيت وأخْتِموا القُرآن ... والله حمدلله على السلامة يا زول ... كرامة وسلامة ...
| |
|
|
|
|
|
|
Re: مَا عَدِمْناكُمْ (Re: Hassan Makkawi)
|
فاعِل الخير صاحِب القلب الطيِّب مكّاوي سلّمك الله يا حبيب و ناس الرّكشة بِحمْد الله ما تركنا وسيلة للتّأكُّد من أنّهم أصِحّاء إلا و قُمْنا بها و ما ذهبوا إلاّ وُهمْ في أحْسنِ حال بعد تبادل أرقام الهواتِف لتوطيد المعْرِفة في قادمات الأيّام دة الشّعب السُّوداني كِدة لا يزال بخير
| |
|
|
|
|
|
|
Re: مَا عَدِمْناكُمْ (Re: علاء الدين يوسف علي محمد)
|
الأخ علاء الدين
ألف حمداً لله على سلامتك وسلامة ركاب الركشة.
مررت بموقف مماثل من قبل حيث صدمت إمرأة وأطفالها وربنا سلم ولم يصابوا بشئ ولكن أثناء إجراءات الاطمئنان عليهم طبياً جاء زوجها واخوانه ومن طريقة تعاملهم معي، شعرت أن زوجته وأطفاله هم من صدموني وليس العكس. كان همهم الأول والأخير أن لا يتم حجز الزوجة في المستشفى بسب الرضوض البسيطة التي تعرضت لها وبالتالي احتجازي في القسم لجين خروجها. وبعد أن أكد الأطباء سلامتها، أصروا على احضارها شخصياً للقسم للتنازل والسماح لي بالذهاب للمنزل. وددت أن أكتب شاكراً الرجل وأفراد عائلته على موقفهم الذي جعلني أصغر من السمسمة، ولكنني شعرت ان ذلك لن يعجبهم وأنه يتعارض مع تواضعهم وإيمانهم القوي.
عموماً ألف حمداً لله على سلامتكم جميعاً.
| |
|
|
|
|
|
|
Re: مَا عَدِمْناكُمْ (Re: سارة علي)
|
سلام يا علاء
مشكلتكم يا علاء الواحد لما يجيب عربية بيمشي يكرم ليها بي جدادة هههههههههههه ياخي سيبو الجلدنة دي وكرمو لدوابكم كرامة تليق بي فخامتها, تكف عنها العين وتبعد عنها وعنكم الاذي
سلامة يا رجل والجاتك في مالك سامحتك.
| |
|
|
|
|
|
|
Re: مَا عَدِمْناكُمْ (Re: hassan bashir)
|
الأخ حسن بشير زوج المرأة في قِصّتي لمن جا لِقانا ما خلِّينا فحص أو إجْراء طِبِّي وِقائي و إلاّ قُمْنا به بقى في إنُّو يُنْهي المسْألة قبلنا و المواقف دي بتخلِّيك تِتعرّف على معادِن الرِّجال
شعبنا لا يزال بخير
| |
|
|
|
|
|
|
Re: مَا عَدِمْناكُمْ (Re: علاء الدين يوسف علي محمد)
|
كُر علي يا علاء الدين يوسف يازول يا قيمة إن شاء الله عدوييييييييينك... والما بشبهوك وحمد الله الف على السلااااااااامة .... وإن شاء الله المنبر كله كرامتك
معقوووووووووولة يا علاء انا اعرف من البورد واخر من يعلم
| |
|
|
|
|
|
|
Re: مَا عَدِمْناكُمْ (Re: mayada kamal)
|
ميّأدة يا غالية والله كُل الكلام دة من السّاعة واحدة ضُهُر ما إنتهى إلا قبايل المغْرِب و لحدي ما جيت البيت و إتروّشنا (على قول الخلايجة) و جينا نشْكُر حبايبنا عارفِك ما بِتقصِّري يا بِت ملوك النِّيل
| |
|
|
|
|
|
|
Re: مَا عَدِمْناكُمْ (Re: حامد محمد حامد)
|
يا علاء ياخي سلامات والله..دي تكون دعواتي حقت امبارح ولا شنو ؟هههههههه
بهزر معاك والله..شرك مقسم فوق الدقشم..
والعربات دي ما تسوقوها قبل ما تتحصنوا من شر الطريق..
واهل الرقشة ديل ما بتتوصي ..خليك متابع اخبارهم وربنا يغطي عليهم
وعليك..
تسوي كرامتك بكرة مع ناس بيت الفنون..
| |
|
|
|
|
|
|
Re: مَا عَدِمْناكُمْ (Re: محمد المرتضى حامد)
|
الف سلامة ياعلاء ... قدر ولطف .. الغريبة كنت فى أستقبال أمين فى المطار وكل الذكرتهم كانوا حضور بس مافى زووول فيهم جاب سيرة .!!!!!
الف مليون سلامة ... والحمدلله جات فى الحديد زى مابيقولوا .!
| |
|
|
|
|
|
|
Re: مَا عَدِمْناكُمْ (Re: Nazik Eltayeb)
|
لا والله .. بالطريقة بتاعت سواقتك دى ح تعدمنا كلنا !!! علتى ؟ هسه داخل فى ناس الرقشة ديل مالك ؟ كنت مالك يعنى ؟ قلت لى راجلها قال ليك بلا صوور معاك ؟؟ لوووووووووووب ماااا ضربتها لى كويس .. هسه الراجل مننى نفسه بواحده جديدة فى عيد الفطر تقوم تفسد لى احلامو بالغت والله !!
ــــــــــــــــــ Quote: وليد الشِّفِت يتململ في كُرسيه بالعَمَلْ |
بالله وليد صاحبى دا خلاص اشتهر بى قصة الكرسى دا ؟؟؟
| |
|
|
|
|
|
|
|