|
|
 مقال ساخر جدا لخالد عز الدين - خاص بالمريخاب فقط (بطلوا الشمار يا هلالاب)
|
عليكم بالتجميد !!
والله ما شايف ليكم سكة تاني.. حلكم الوحيد تقيفوا مع شداد وتطالبوا بالتجميد !
قولوا للفيفا نحن عايزين نشهد ضد قانون هيئات الشباب والرياضة لعام 2003 .. لاحظوا المريخ من عام 2003 ما ضاق عافية..
ده كلو من القانون ده..
قولوا ليهم المفوضية ظالمة.. زي ظبية المسالمة.. والمريخ أصلاً مولود في المسالمة وتعرض لظلم كبير!!
قولوا.. طير طير يا وزير!! بس أوعى تقولوا ما بنطير برانا..
المرة دي دافعوا عن قضيتكم براكم.. خلوا شداد بس معاكم..
والله إعلام المريخ كلو مع شداد..
كل إعلام المريخ مُجمع على فشل اللاعبين الأجانب..
ما شداد قال ليكم.. تلاتة كفاية.. يعني مصيبتكم يا (همد) كانت حتكون في تلاتة بدل سبعة!!
وشداد قال ليكم ما في داعي للتجنيس.. يعني يا همد (غاسيروكا) في الاحتياطي ما كان بحجز ليكم مقعد!!
همد قال هم على استعداد لإعارة وارغو لو وجدوا العرض المناسب!!
مناسب كيف يا همد!!
يعني يجيكم نادي يقول ليكم ادفعوا لينا خمسمائة ألف دولار وبنشيل منكم الهم ده ! ولا كيف مناسب..
في مباراة في (الغابة) واحد أصيب في راسو.. طلع بره سأل المدرب.. قال ليهو إصابة ده كيف ؟ المدرب قال ليهو.. كده مونااااسب !!
كيف معاك يا همد.. تدفعوا لي صلاح إدريس ده مليون دولار يشوف ليكم إعارة وهمية لي وارغو.. موش برضو كده مونااااسب !!
ما عندكم حل يا همد الا بالتجميد..
مشاكلكم دي كتيرة وما بتحلها إعارة وارغو ولا عقد لاسانا القرب ينتهي ولا حتى طيارة (بابكر سلك).
سلك كتب في صحيفة الزعيم أمس عموداً طريفاً خالص.. قال الطيارة دي حقو تمشي تنزل لاسانا في مالي ووارغو في نيجيريا والنفطي في تونس وغاسيروكا في رواندا وكاربوني في البرازيل وطارق مختار في عطبرة !!
هو طارق مختار قام يا سلك !!
نفسي أعرف طارق ده وقع من (الجبدة) ولا من (المطرة) ولا من الطيارة ذاتها.
ده شنو ده !!
عصام الشوالي مرة بعلق على مباراة للمريخ قال.. مدافع المريخ طارق مختار (برشة) تقيل !!!
والله جنس برشة!!
وأنت يا خالد برشة ثقيل !!
قال طيارة قال !!
وقال نجيب كروجر قال !
ما عندكم حل الا بالتجميد !!
شوفوا ليكم (ديب فريزر كبير)
جمدوا فيهو الحمام الميت.. والمواسير يا خالد المواسير ؟؟؟
المواسير دي عايزة ليها حل (مونااااسب)
ما عندكم حل الا بالتجميد...
اعملوا فيها وطنيين وأصحاب مبادئ وأقيفوا المرة دي مع حرية وديمقراطية الحركة الرياضية..
قولوا نحن ضد الجيش !!
مُش الجيش ضربكم..
جيش النيجر ما تخافوا!!
يعني الجيش غلبكم والشرطة ضربتكم ؟؟
الشرطة في خدمة الشعب..
إن شاء البقت عليكم ما تبقى علينا أصلو !!
والمطرة ما جات؟
والله كورتكم دي كان ناقصة مطرة..
يعني اتخيل طارق مختار ده مع (زلقتو) دي لو لقى الميدان مبلول..
كان وصل محمد كمال !!
ومحمد كمال كان لقى ليهو عذر..
كان قال أنا أمسك الكورة ولا طارق مختار !!
ده شنو ده
شايلنو بالطيارة وبايعنو بالخسارة !!
قال شنو.. قال لو لقينا ليهو عرض مناسب بنعيرو !!
عايرة وأدوها سوط !!
ونحن عندنا مشكلة صغيرة مع سادومبا.. عايزين نعيرو..
رأيكم شنو.. نعير ليكم سادومبا مقابل الإبقاء علي وارغو في الكشوفات !!
والله وارغو ده لو مشى من المريخ حتكون عندنا مشكلة كبيرة نحن..
كل الهلالاب مع وارغو..
كل المريخاب مع التجميد..
مشكلة المريخ أنو ما عندو كفاءات في هذا المجال..
أشهر مهندس تبريد وتكييف في الوسط الرياضي هلالابي وهو عمر البكري أبو حراز..
وأكبر إداري صاحب خبرة في مجال التجميد الرياضي هلالابي وهو صلاح إدريس..
وأفضل من يفك التجميد الرياضي هو كمال شداد.. رأيكم شنو تقيفوا مع شداد!!
رأيكم شنو !! انتو ما عندكم حل أصلاً الا تقيفوا مع شداد..
جمد يا بلاتر..
والله الهلال المسخن ده تفكوا ساكت الا يجيب ليكم مصيبة..
معقولة تقعدوا الستة شهور الجاية دي ما عندكم شغلة غير تتفرجوا فينا !!
ومباراتنا مع الجيش النيجري كيف !!!!!!!!!
تقيفوا معانا ولا مع الجيش ؟
والله موقفكم صعب..
لو وقفتوا معانا بنعذبكم.. ولو وقفتوا مع الجيش تكونوا وقفتوا مع الحمام الطيركم !!
وأنا يا طير.. أنا يا طير بشوفك.. أنا يا طير.. محل ما طير بشوفك..
المريخ طائر وطارق مختار في الواطة!!
ده شنو ده !!
طايرين تحننوا.. راكين تجننوا.
قالوا ليك المريخ طار عشان كلتشي مصاب !!!
طيب رأيكم شنو.. نحن غلبنا تلاتة خارج أرضنا وسامي مصاب وديمبا مطرود وسادومبا مفلس وإمبيلي زعلان وصلاح إدريس مستقيل !!
خلي الثقالة يا خالد عزالدين.. نسيت.. وصدام الدروشاب طرف يمين.. وخليفة طرف شمال والهلال في دوري المجموعات والمريخ طار..
وبشة.. والله برشة (خفيف)
ما عندكم حل الا برشة برشة تجميد !!
طارق برشة
ضد الجيش مع الديمقراطية
برشة تقيل
تخريمة: دي مني أنا
الله يجازيك ياخالد عز الدين ... مصاريني إتقطعت.
|
|
 
|
|
|
|
فيس بوك
تويتر
انستقرام
يوتيوب
بنتيريست