بحبك بقولها .. بي كل اللغات وأدوزن حروفها .. مواكب زجل أحبك حبيبة رفيقة وأنيس أحبك صديقة قريبة وأهل
حبك تجاوز كل الحدود وزاد عن مجرد شعور يحتمل فيك امتزج جمال الطبيعة وعطر الأزاهر وطعم القبل
____________________________________
تلقائية المفردة واللحن
كثيرا ما استمعت لأغاني الطمبور والتحام الكلمة واللحن والمكان بتلقائية هذه النماذج فيها يلتقي اللحن الصاخب بهدوء الكلمة يتعاركان .. وغالبا ما ينتصر الإحساس بهما
07-22-2010, 01:56 AM
عبير خيرى عبير خيرى
تاريخ التسجيل: 02-12-2004
مجموع المشاركات: 2440
حب نا ليك كان زادي .. وكان جوة الحنايا دفين كنت بضاريهو من الناس .. وخايفة عليهو من العين
عليهو انا كت بصوم وافطر .. عليهو بكابد النارين كت بحسب سنين الغربة .. ولما تعود تجيني بتين كنت برجاك فوق النار .. لما وقت لقانا يحين نونس في براءة أطفال .. في الحب نروى ننهل زين وكل ما يوم يزيد البينا .. لما بقينا قاب قوسين أتاري نا كنت فيك مخدوعة .. وكم من زيي مخدوعين ما قايلاك تلعب بي .. تعيش اللحظة بس والحين وما قايلاك حبيب آلاف .. وقلبك قبلة للضالين وما قايلاك تنسى حبيب .. صبر راجيك ستة سنين كيفن هان عليك تنساهو .. زولا كان عليك حنين وتشغل بالك الشواق .. لمن تسكن الياسمين كت دايراك بسمة عريضة .. في وش الزمان الشين وكت دايراك ساعة الحارة .. تبقى علي دخر خزين كت دايراك مقنع حوبة .. وقتين المضارى يبين وكت دايراك فارس أحلام .. تشاركني ونتم الدين كت دايراك شريك الروح .. أخدمك حافية القدمين وكت بحلمبك انت معاي .. مجرتق بي العديل والزين وجمبك في شمالك قاعدة .. بسمع في قدر يا عين تبشر زين مع الاصحاب .. تتشبل من الوزين وانا الابحرت راكبة الموج .. اكيد مرساي بي موجتين وداعاً يا سراب خداع .. محال ما بيروي عطشانين وداعا يا حلم عابر .. يسعد ويفرح النايمين وداعا يا كلام معسول .. حدو ومكمنو الشفتين وداعا يا سحابة صيف .. شايلة مطر ضليلها رهين تبشر بي خريف جايينا .. ياما الناس رجوهو سنين وكل زول يفكر فيها .. ما معروفة تنزل وين والف سلام عليك يا قلبي .. مسالم وديمة طبعو حنين يتاورو الشوق ويلعب بيهو .. تنحر في حشا السكين تعاودو الذكرى تندر جواه .. وحالو يحنن المسكين واخيرا ليك الف سلام .. قبل ما تجف دموع العين وقبال مني ما تعدي .. وقبال الفراق ما يحين بخيت وسعيد عليك انشاء الله .. يبقالك عمار وبنين وقلبي نا خلي في اناتو .. بعدك ياما راجي أنين لو كان يا قلب حبيت .. بعدو بعد قسمت يمين إنشاء الله ما ينتم ليك مراد .. لا تضوق لا حلو ولا زين وعمرك ما تجيك سعادة .. وما تتهنى قول آمين تاني الحب عليك حرمان .. وعد الحر أمانة ودين
07-22-2010, 03:04 AM
Yasier Elsayed Yasier Elsayed
تاريخ التسجيل: 02-27-2008
مجموع المشاركات: 3401
كثيرا ما استمعت لأغاني الطمبور والتحام الكلمة واللحن والمكان بتلقائية هذه النماذج فيها يلتقي اللحن الصاخب بهدوء الكلمة يتعاركان .. وغالبا ما ينتصر الإحساس بهما
تعبير جميل خصوصا وانه من عبير
لاحظت في الاونه الاخيرة بان فناني الطمبور يسرعون بالايقاع في الغالب الاعم من اغنياتهم ترى هل هذا مجاراة لعصر السرعه ناس الراحل النعام لمن يغنو الزول الوسيم في طبعو دايما هادي يترجمون النص بخلق المعادل الموضوعي كل الود
07-22-2010, 05:10 AM
العوض المسلمي العوض المسلمي
تاريخ التسجيل: 11-27-2007
مجموع المشاركات: 14076
استاذة عبير صباحاتك خير .. اغاني الطنبور لها وقع خاص علي الكثيرين لانها تعبر بواقعية عن حال اهل البلد وخاصة ان كلماتها تجبرك علي التوقف والتامل .. وفي ظني ان اهل هذا الفن لهم من الحنية والحب مما جعلهم صادقين لدرجة الاندهاش وتشعر بان كل كلمة تعنيك وتعبر عما تريد قوله ...
_________________________________ المنبر اليومين ديل شكلو ماشي علي الادب والفن بكري الا يشوف ليه منبر تاني للسياسة
07-22-2010, 12:37 PM
Elmosley Elmosley
تاريخ التسجيل: 03-14-2002
مجموع المشاركات: 34683
Quote: المنبر اليومين ديل شكلو ماشي علي الادب والفن بكري الا يشوف ليه منبر تاني للسياسة
اخي العوض الادب والسياسة لاينفصلان عن الفن الا آن السياسة هذه الايام تنفصل عن (فن الادب) و (ادب السياسة) اذكر عندما كنت صغيرا ان ببيت اسرتي شيوعيان واتحادي وجمهوري ومحايد يدور النقاش الساخن يوميا قبل العشاء ثم يلتقون علي مائدة العشاء في محبة والفة
Quote: لاحظت في الاونه الاخيرة بان فناني الطمبور يسرعون بالايقاع في الغالب الاعم من اغنياتهم ترى هل هذا مجاراة لعصر السرعه ناس الراحل النعام لمن يغنو الزول الوسيم في طبعو دايما هادي يترجمون النص بخلق المعادل الموضوعي
ساهم إعلامنا وأسباب أخرى في عدم انتشار أغنية الطمبور في العهود السابقة مما قصر مستمعيها فقط على المنطقة التي انطلق منها الطمبور (الشمالية) وقليلون هم من اصطحبوها معهم للمركز حيث يبدأ انتشار أي فنان وأية أغنية رغم أنه لا ينقصها شيئا لتدخل طابور المنافسة يبدو أن الشباب من مغنيي الطمبور أدركوا ان هناك مشكلة ومن أدوات المعالجة لهاكان أن عملوا على تسريع الإيقاع وإدخال آلات أخرى مع الطمبور في بعض الأحايين جعلت منه المرتبة الثانية في الأغنية المستحدثة منه ، ويبدو أنهم نجحوا بعض الشيء لجعل نسبة ارتفاع المستمعين تكثر في الآونة الأخيرة وفي فترة كان ألبوم (حبي ليك زادي) للفنان عبد الرحيم أرقي متواجد في كل مكان وحذا حذوه الفنانون محمد جبارة ، محمد النصري ، صديق أحمد ، وحتى المحاولات من الآخرين كحنان النيل وصلاح بن البادية كانت ذا اثر كبير لنقل اغنية الطمبور من المحلي إلى القومي . أطمع في قول الكثير منك في هذا الأمر
باكر بجيك من سكة القلب العشق ذاتك سنين من صرخة الماضي اللى كان قاسى وضنين خايف يكون زيف المدن غير اصالتك والحنين جايكى من ليل العذاب ارجينى بالصبح المبين
فتينى لليل الطويل يرمنى فى حضن الألم فتينى بين شبح الظنون واحزان بتنبع من وهم ارجينى فوق ارض الصبر جايكى من زمناً سجم لا فيهو للأفراح طريق ولا فيهو للأيام طعم
باكر بجيك بى لعنة الريد الملت قلبى الجريح بى حال بيغنى عن السؤال مابيوصفو الخاطر الفصيح خايف يقصر بى العمر تحملنى من الدنيا ريح لو كان مقدر إنى اروح سويلى فى خاطرك ضريح
سافرتى ما خليتى خيط ابراهو للمرسى الجديد سافرتى ما خليتى لى غير ذكرت الزمن البعيد علمتى روحى الإنشراح علمتى قلبى يحن شديد فجأة اختفيتى من الدروب واخفيتى كل زمنى السعيد
لكنى لى احساس يسوق خطواتى لى اجمل عيون باكر بتلقى خطاى معاك تتمشى ما بين الغصون ما تقولى لى وصلت كيف مين دل قلبك يا حنون ان أنا قلبى اصبح ليك مكان يا الناسيه إنى انا ليكى كون
باكر بينكشف الضباب والقاكى فى فرح الشباب تقشى فى دمع الفراق وتزيلى فى ألم العذاب بكره المسافات تجتمع وتلم قلوب يوم عيدا آب ويعود شباب الفى هواك يا حلوة بى احزانو شاب
07-25-2010, 06:13 AM
khaleel khaleel
تاريخ التسجيل: 02-16-2002
مجموع المشاركات: 30134
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبير خيرى
Yasier Elsayed
Afraa Sanad
Elmosley
العوض المسلمي
khaleel
baha eassa
Sinnary
فيس بوك
تويتر
انستقرام
يوتيوب
بنتيريست