ما آل إليه حال عمود عبد الله علي إبراهيم!!

Quote: فتأمل!!

Quote: سوف ترى والسلام

Quote: عودا حميدا

Quote: لو لا حظتم خلو الصفحة الأخيرة من هذه الجريدة (الأحداث) من البنات البٌيض بٌيض "الحلوين حلاوة" فالفضل في ذلك لعودة دي جانقو عادل الباز من القاهرة. فالبنات ديل زاحمنني في عمودي المتواضع بالصفحة حتى سخر مني الأستاذ حسين ملاسي حيث لا ينبغي أن يسخر مني: سودانيزأونلاين. وتحدثت إلى الباز مراراً في القاهرة وقلت ليهو ياعادل بناتك البيض البيض ديل أَسهَرنا بمنامنا. نانسي عجرم وهلمجرا والمستبيضات في تلفزيون السودان ناس رويدا ورهام وبتاعة إيقاع الظهيرة. قت ليهو إنت ما عاقل ياالباز ولا شنو. أنا فعلاً شيوعي ولو صح حديث أهلو الإخوانجية (لما كان في إخوان) عن شيوعية النساء الموضوع حيتلكه شديد. ياخي في طولك في عرضك أمسك بناتك البيض البيض ديل منى. يا خي نحن شيبة إسلام لكن النفس ما باليد. ويمكن يحصل مننا المحصول الحذر منو واحد أخونا. جانا مرة سوداني جديد في امريكا وعرف درب حوض السباحة وما مرق منو تاني. وسباحها ذاتها ما بعرفها. فقال صاحبو: "والله فلان دا إلا يوم يعمليهو عاضرة في الحوض دا". ياالباز يعني نعيب واللا فكرك شنو؟ قالو الخبر هو أن يعض إنسان كـلباً وليس العكس. وخبر البنات كلو عضيض إنسان لولاد كـلب زينا. شوف قالو غادة عبد الرازق ما منعوها من دخول لندن. التَقَدِرٌم؟ وناقشت ريم عبد الله تعدد الزوجات في "طاش". غايتو عندها حلاة ساعة في إيدها. أما إيمان العاصي فأتهمت زوجها بخطفها وتعذيبها والنيابة أخلت سبيل الراجل للمرة الثانية. أنا عارف قال شنو ونفد. وبكدس ما بحدث. وسيلين ديون حامل بتوأم والسمع يحدث الما سمع. وقالت ذات الحمل إن تلك هبة مزدوجة. من منو يا ربي ياسيدي؟ أما أنجلينا جولي فستترك لأطفالها حرية إختيار ملابسهم ودينهم. إلا التاني والله يسمعك المكاشفي إلا يوريك إياه. والعض على ودنو. وأماني يا تنزانينا ما اتلومت في شيرل كول. جات منها مصابة بالملاريا فدخلت في طور نقاهة ألغت معها التزامات فنية كثيرة. لكن ما واضح من الخبر إنو حمتها من ملاريا أو من طلاق زوجها الكورنجي منذ 2006. التقع من الشوت الضفاري تتحملها تنزانيا. أما وعد فقد وصفت جمهور صلالة ب"التعصب". ناس أبو يمن غلّطوا عليها ولا شنو؟ أما مهووس ساندرا بلوك فهو ممنوع من الاقتراب منها أو التصوير. كان الغاوين زمان يصفوا خطورة سماحة البت ب "جيوش المانيا". دا سبب منع التصوير افتكر، منطقة عسكرية. أما سلافة معمار فختتيتلها الختة. لعبت دور بدوية شاعرة مع أنها لا بدوية وجنها وجن الشعر. وبلغ بها تمثل الدور أنها اصبحت تحلم بدوي وتتحدث فى أحلامها بالبدوي. يا مكارة يا سلافة . . . الفن. وواحدة سعودية لا محجبة ولا الله قال. ديل الشنن بناتنا وسمحن. واصبر لي لي بتاعة البنقو ليدي غانما المسطولة الحيرانة باعترافها. هي قائلة كمال بخيت بنط منها: أليس هو القائل "أتركوا كل شيء وحاربوا المخدرات". ورمضان الفضيل ذاتو ما مسك الشقيات ديل مننا. وطلعن شياطين مسلمة. فأحلام مستغانمي ستتفرغ للعبادة في رمضان و لا تنتظر "ذاكرة الجسد" النجس. .ومريام ستقدم فوازير رمضان. ودينا سمير رفعت أجرها ل 30 ألف جنيه للحلقة في برامج رمضان. وديانا حداد طمأنتنا أنها لم ترتد بعد طلاقها من زوجها المسلم مفروض. وأنها تقوم بكل فروضها وتقرأ القرآن . . . وتجنن بوبي. ينصر دينك. ولطيفة التونسية سترتدي الحجاب في رمضان. وبعد رمضان حنركب معشر المسلمين التونسية. صلى وصام لأمر. يا غيتونية يا. عاش الباز "محرر" الصفحة الأخيرة.