|
|
|
 Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
فيبدو ان الجابرى لايسعه بوست واحد ..اذا تركتوه يتمدد
فى كل باندويث بكرى لن يحتوى الا القليل من جماله..الجابرى
ويتبعه احمد الامين بتوثيقه الدقيق الذى يجعلك تحتار ..فاى
المصادر هذه التى توفر كل هذا الكم الهائل من المعلومات
حول الفنانيين السودانيين ...لو ملكت امر الثقافة فى بلادى
لفرغت احمد الامين ليقوم بمهمة التوثيق للاغنية السودانية
والشعر السودانى (كمان) ..كما فعلت جامعة الخرطوم يوما ما ..
حين فرغت الاستاذ الراحل الطيب محمد الطيب لجمع الفلكور
السودنى ..فطاف انحاء السودان شمالها وغربها وجنوبها وشرقها
بعربة نصف عمر وجهاز تسجيل بالى ..لكنه خرج بالكثير
والمثير ووثق لاجيال قادمة ...لكن كما تعلمون سادتى ان الثقافة
فى بلادى من اخر اهتمامات دولة المشروع الحضارى والله المستعان ...
| |
 
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
يخيل لى ان الصادق الياس حينما كتب (الجريف واللوبيا) ..
كتبها غند مغرب يوما ما من ايام اربجى ..وحينها كان خارجا
فى الشارع الفاصل بين (جنينة الوزير) و(جنينة السنى ) ..او قادما
من اقصى شمال اربجى من عند الغابة كما يسميها اهل اربجى ...
فهذه الكلمات تشبه (اربجى ) تماما ...كلما سمعتها تحركت
(النستلوجيا) من مكامنها و(الشكر لمها زكريا على المصطلح) ..
اغنيه تشبه انحناء النيل عند اربجى ..تشبه رقصة الموج فى
شواطئها ..اغنية كريحة الدعاش فى يوم (اربجاوى) خريفى ماطر ...
اغنية حنينة ولوفة كاهلى ..وماهلة وسمحة كديارهم ...
***
فالحقونا بكلماتها ولحنها ..وليكن اسبوع الجابرى فى المنبر ..
ولااربجى مليار بطاقة حب ....
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
خليل اليومين دي لاعب ماتشات كبيرة وغاطس غطس في بحور الاغنية السودانية المدهشة..
وسياحته صوب الجابري والدرر التي اتي بها تحتاج فعلا الي تسليط اضواء كثيفة نتمني ان تطول وتدوم طويلا في ارض هذا المنبر
ونتمني ان يواصل الاخ احمد الامين اتحافنا بالدرر الموسوعية غن الغناء السوداني ودردقو الزول ده يا محمد عبدالرحمن فان جرابه لايزال يحمل الكثير المثير الخطر
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
Quote: لو ملكت امر الثقافة فى بلادى
لفرغت احمد الامين ليقوم بمهمة التوثيق للاغنية السودانية
والشعر السودانى (كمان) ..كما فعلت جامعة الخرطوم يوما ما ..
حين فرغت الاستاذ الراحل الطيب محمد الطيب لجمع الفلكور
السودنى ..فطاف انحاء السودان شمالها وغربها وجنوبها وشرقها
بعربة نصف عمر وجهاز تسجيل بالى ..لكنه خرج بالكثير
والمثير ووثق لاجيال قادمة ...لكن كما تعلمون سادتى ان الثقافة
فى بلادى من اخر اهتمامات دولة المشروع الحضارى والله المستعان |
تحية وإحترام اخ محمد عبدالرحمن وهذه شهادة لا تقدر عندى بالدنيا ومافيها او كما غنى سيد خليفة واشكر الاسافير التى هيأت لى فرص التعرف على إخوة واصدقاء تعرفنا فقط عبر الطرح والجدل وربما النزاع بهذا المنبر المحترم الذى يمثل صورة مصغرة للوطن السودان بكل تعقيداته وقد تعرفت عليك وبدر الدين وودرملية وعمر بوب وهجو والقريش وابراهيم النعمة وأخرين كثر عبر الهاتف والبريد الالكترونى كما هيأ المنبر فرصة طيبه لإعادة إكتشاف اشياء كثيرة داخلى كنت لا أضع لها قيمة لكن يبدو ان الحوار المتعدد يسهم فى تنظيم المعرفة ويحفز على المزيد منها فلك الود والاحترام واشكرك على شهادتك الطيبة ....
** سوف أزودك قبل خروجى من الدوحة ان شاء الله بنسخة الكترونية بها كل مداخلاتى بهذا المنبر قمت بتوبيها وترتيبها وإعادة صياغتها من جديد بها أكثر من باب عن الفن والشعر السودانى كمايشرفنى كثيرا أن مركز ثقافى بام درمان قد اخذ النسخة الكاملة من المداخلات بعد تعديلها وحذف مالايصلح للنشر بها وما اكثره بصدد طبعها فى كتيب على شكل كشكول فلك التحية وللاخ خليل ...
ملحوظة :
اكثر مايحرضنى على التداخل فى البوستات قريبك بدر الدين الامير الذى أختلف معه كثيرا فى الطرح والاراء لكنه يظل ضمن ثلة احترمهم كثيرا لصدقه وجمال تعامله مع الاخرين على المستوى الحياتى اليومى التحية مرة اخرى.
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: Ashraf el-Halabi)
|
Quote: صراحة الزول دا جضم الون تو مع خليل في ماتش الجابري داك لمن تفوق على ون توهات كيكي السابقة مع خليل
احتمال كبير لي قدام يخت كيكي كنب.. دا لو ما وصلوا مرحلة الإعارة للإتحاد الليبي |
اوووووووه ابو الشوش ياخي..
ومشتاقين ياخي لدرجة انا والاشواق بقينا اكثر من شنو كده ماعارف.؟؟
الزول ده فعلا يا اشرف اصبح يشكل علي خالك خطورة اسفيرية وبقي يكابسني في (ون توووويي مع الفردة ابوخليل)..
وده كلام خطير وغير مبلوع علي الاطلاق
فعشان كده اتوقع في اي لحظة اني اكبعلو واعمل معاه كركبة اسفيرية ودشمان وسجن سجن وغرامة غرامة يازول
ولو عزت الكركبة معاه لاسباب (جيو اسرية) فلك ان تتوقع مني كركبة ودشمان في اي لحظة مع الود ابو خليل
لانو خان قضايا (الون تو) واصبح يلاعب اخريين بتاعين مداخلات شاعرية ون تو وعاوز يلحقني غنم زهرة ويوديني الارشيف واللقيط لووووول
ولكن نردد دوما
الله في
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: عبدالكريم الامين احمد)
|
| Quote: لانو خان قضايا (الون تو) واصبح يلاعب اخريين بتاعين مداخلات شاعرية ون تو وعاوز يلحقني غنم زهرة ويوديني الارشيف واللقيط لووووول |
غنم زهرا بنات الناس ديلاك!
يا كبتن صراحة خانتك مهددة بعد (المردود الطيب) لأحمد المدينة ههههه
ما عندك حل غير تعمل واجب مع فردتك خليل في موضوع حمار جدو داك..
وبعد توجب مع الفردة تقول ليه أشبك الكبتن الجديد دا باصات جبص بس
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: Ashraf el-Halabi)
|
| Quote: وبعد توجب مع الفردة تقول ليه أشبك الكبتن الجديد دا باصات جبص بس |
غايتو عزائي الوحيد والبخليني اخد في بطني بطيخ صيفي هو ان ابو خليل في قضايا الكراكير والجخانين والون تو المبني علي قضايا قاع المدينة لو فتش الكون الاسفيري ده بجبادة ما بلقي ليهو زول زي خالك يخش معاه الكراكير دي ويلعب ون تو عن ناس ود ماكردة وعلوية عفش
وفلانة شرغرغ ست العرقي المسخوتة ديك..!!
احمد زول غناء وكلام مثقفاتية وشاعرية واركلوجيا وابو صلاح وعلي المك
وابو خليل انا عارفو حيلعب باص باصين مع احمد في المربع ده ويعود الي قواعدي سالما
ولكن المرة دي لو شرك لي بششششششششششية ومرارة نييييييية ما عندي معاه شغلة فلقد خان ابو خليل القضية الاساسية
وعليه يان ياكل نارو ويضاير موضوع حمارة جدو لوحده...او اليمشي لاحمد الامين يساهم عبر بحث تاريخي يشوفو الموضوع ده مع الانصار بهنااك...!!
والمهم
علي قولة الزول اليومين دي ملاهت بحسبو الشتت قصبو الاسمو تبارك شيخ الدين دااك
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: khaleel)
|
حبابكم ..حبابكم والله ..
عهدنا فى هذا المنبر ان (بوست الشكلة) ينبثق عنه
اكثر من بوست وكلها تصب مزيدا من (الزيت على النار) ..
لكن يبدو اننا فى عهد (الانبثاق الحميد) حيث ان كل
بوست جميل تنبثق منه اخريات بنفس جماله...
بجيكم ..بس ماالليلة ..بكرة ان شاء المولى ..
وقبل ماامشى بجيب ليكم الجريف واللوبيا مكتوبة
اقروا واسمعوا وادعو للجابرى بالرحمه وادعو كمان
لخالكم خليل ولاحمد الامين ولطارق جبريل ولزرياب
صاحبى (ذاتو) ....
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
واربجى لاتنسوها من صالح دعواتكم ..اسالوا لها
الله ان يديم عليها الحسن والجمال ..وان يديم
على اهلها الطيبة والمحنة والمودة ..واسالوا الله
ان يرسل لها فى امسياتها شعاع قمره لتكتمل
الصورة وتكون اكثر ضياء ..وان يخفى عنها فى ليالى
اخريات قمره لنميز جمالها من جمال القمر ..اسالوا
الله ان يديم على شواطئها نعمة الهدوء ..وان يرسل
الله موجه فى كل يوم ليغسل رمالها ويجدد شبابها ..
اسالوا الله ان يديم عليها الخضرة ..وان يرسل الغيث
كل عام ليجدد نضارها واخضرارها ...ويغير كسائها الاخضر
بكساء جديد ...
اللهم ادم علينا اربجى فانها من نعمك علينا ..واجعل
محبتنا لاهلها محبة لاتنتهى ولاتنضب ولاتموت ..امين يارب
العالمين ...
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
عندى شوق لى نيلنا
والاهل والطيبة
الجريف واللوبيا
وباقى ذكرى حبيبة
غشة الصفصاف
القايمة عاملة الزريبة
هو المغطى القيف
فوقه روووووووعة عجيبة
ياسواقى بلدنا
وينو صوتك مالو
وينو قارع مويتك
غنى باسم حالــــــــــــــــو
وين غسيل النيل
و شر هدومو فى رمالو
وينو ماضى الحله
وين ومين الشالو
كان زمان ندلى
لما كنا صغار
من فريع لى فريع
نقطع الاثمار
كان بحرنا نعومو
ناس كبار و صغار
فينا طيبة القرية
ومافى كان اسرار
وينو صوت الساقية
الكان يشق الليل
وين نخيلنا الرامى
الظلال فى النيل
وين وين دفيقا
الكنا منه مشيل
وين جداول الموية
الجارية زى السيل
يا بحر حلتنا
فى رمالك ذكرى
لابتشيل الموجه
ولا بتفارق الفكـره
الجريـف و اللوبيـا
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
Quote: تحية وإحترام اخ محمد عبدالرحمن وهذه شهادة لا تقدر عندى بالدنيا ومافيها او كما غنى سيد خليفة واشكر الاسافير التى هيأت لى فرص التعرف على إخوة واصدقاء تعرفنا فقط عبر الطرح والجدل وربما النزاع بهذا المنبر المحترم الذى يمثل صورة مصغرة للوطن السودان بكل تعقيداته وقد تعرفت عليك وبدر الدين وودرملية وعمر بوب وهجو والقريش وابراهيم النعمة وأخرين كثر عبر الهاتف والبريد الالكترونى كما هيأ المنبر فرصة طيبه لإعادة إكتشاف اشياء كثيرة داخلى كنت لا أضع لها قيمة لكن يبدو ان الحوار المتعدد يسهم فى تنظيم المعرفة ويحفز على المزيد منها فلك الود والاحترام واشكرك على شهادتك الطيبة ....
** سوف أزودك قبل خروجى من الدوحة ان شاء الله بنسخة الكترونية بها كل مداخلاتى بهذا المنبر قمت بتوبيها وترتيبها وإعادة صياغتها من جديد بها أكثر من باب عن الفن والشعر السودانى كمايشرفنى كثيرا أن مركز ثقافى بام درمان قد اخذ النسخة الكاملة من المداخلات بعد تعديلها وحذف مالايصلح للنشر بها وما اكثره بصدد طبعها فى كتيب على شكل كشكول فلك التحية وللاخ خليل ...
ملحوظة :
اكثر مايحرضنى على التداخل فى البوستات قريبك بدر الدين الامير الذى أختلف معه كثيرا فى الطرح والاراء لكنه يظل ضمن ثلة احترمهم كثيرا لصدقه وجمال تعامله مع الاخرين على المستوى الحياتى اليومى التحية مرة اخرى. |
بالله يا احمد الامين انت اخو كيكي كيف (او فلنقل كيكي اخوك كيف) لو ما صحي البطن بطرانه؟
والله من يوم ان التقيتك والدهشه تملاني كيف لموسعه مثلك ان يكون بذلك التواضع والاندهاش لكل شئ وكانه لايعرف في هذه الدنيا شيئا وهو بحر من المعرفه.
واخوك ده حافظ ليه كلمتين هي مدارات, وموغل في الدهشه وقادينا بيها قد. تعرف انا من لاقيتك يا احمد اصبحت لا اخجل كما كنت من قبل ان اعلن للناس ان هذا اللعين كيكي صديقي لا لشئ الا لانه اخوك
___________________________________________
معليش يا محمد طلعنا ليك بره الموضوع
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: Omar Bob)
|
| Quote: معليش يا محمد طلعنا ليك بره الموضوع |
ياعمر بوب ..
هو دا جزء اساسى من الموضوع ..مقدرة احمد الامين على الكتابة
والتوثيق لكل فنانى وشعراء بلادنا ..مقدرة على الكتابة بكم
هائل من المعلومات الغير متاحة الا عند احمد الامين ..وهنا تتبين
مقدرة احمد الامين الباحث المجتهد والموثق الجيد ...وقصة المعلومات
دى اكتر حاجة بتحيرنى فى كتابة احمد الامين ..معلومات مابتكون
سمعتها لا فى اذاعه لا فى تلفزيون ولاطالعتها فى كتاب او جريدة..
والشيء الثانى المهم تقديم احمد للمعلومة من خلال لغة جميلة
وتحليل وتسلسل ...وانا بقرا فى مدونة لاحمد الامين عن عثمان
حسين خيل لى لحظتها ان عثمان حسين قد يكون احد سكان
(ودهاشم) لغزارة المعلومات المتاحة عنه ...
(هوووى )احمد الامين ..مفروض على الاقل يطبع توثيقو دا ..حفظا
لحقوقو ...وحفظا للتاريخ هذا من الضياع ..شخصيا بعتبر ان
اهم مايميز كتابات منصور خالد غزارة المعلومات ..ولاانكر
مقدرات منصور خالد فى الصياغة والتحليل ...واحمد لاتنقصه المعلومات
ومقدراته فى الصياغه والتحليل متفق عليها ..فماذا ينتظر احمد
الامين ؟
شكرا ياعمر ...
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
Quote: بالله يا احمد الامين انت اخو كيكي كيف (او فلنقل كيكي اخوك كيف) لو ما صحي البطن بطرانه؟
والله من يوم ان التقيتك والدهشه تملاني كيف لموسعه مثلك ان يكون بذلك التواضع والاندهاش لكل شئ وكانه لايعرف في هذه الدنيا شيئا وهو بحر من المعرفه.
واخوك ده حافظ ليه كلمتين هي مدارات, وموغل في الدهشه وقادينا بيها قد. تعرف انا من لاقيتك يا احمد اصبحت لا اخجل كما كنت من قبل ان اعلن للناس ان هذا اللعين كيكي صديقي لا لشئ الا لانه اخوك |
اووووه صديقي السابق عمر بوب هههههه
وغايتو الزول المدعو احمد الامين ده شكلو كده وزي ماقال اشرف حيهدد مستقبلي الاسفيري الذي شيدته بطرق موغلة في الدهشة والاندياح
ولكن دوما نردد
الله في ونحاول انة نضخ مصطلحات جديدة في العمل الاسفيري بتاعنا عسي ولعل ان تاتي لنا مريسة تام زين ونحافظ علي القاغدة الجماهيرية
في حضور لاعب جديد زي اخونا احمد ده
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: عبدالكريم الامين احمد)
|
أكرر شكرى وتقديرى للاخ محمد عبدالرحمن على حسن الظن وكذلك أرفع القبعة تحية وإحترام للأخ/ المهندس/ عمر بوب وعسى ان اكون كما ظننت بذلك التواضع و أهدى زوار البوست من أرشيف مداخلاتى هذه المداخلة عن استاذنا الشاعر الكبير محمد الواثق تليها كذلك مداخلتان من الأرشيف إن طال العمر وتقادم كعمر لبيد بن ربيعه
باب الفارس الاعزل :
محمد الواثق
* قال :
لو فاح من جسمها الصندل
يخالطه العود والمندل
وقال:
لو زانها ادب
او لونها الذهب
ما نفع مظهرهالو قلبها خشب!!
قلت:
ام درمان التى تحتضر فى شعر الواثق ليست هى ام درمان المدينه التى نعرفها جميعا بل هى حاله حضاريه فى ذهن الشاعر الذى يندرج شعره عموما فى هدم الحاضر البائس لاجل تشييد المستقبل الزاهر وقد قال الشاعر عبدالحى 1944--1989 ما يشبه ذلك فى حواره حول ثنائيه الفكر والوجود ووحدتهما بجريده السياسه السودانيه تموز 1987 ...
شعر الواثق يخدع القارى كثيرا ورغم تشابهه فى المبنى مع شعر السياب وبعض احتشادات وتضمينات اليوت الاانه اقرب الى شعر خليل حاوى الشاعر اللبنانى الذى انتحر لاسباب غامضه 1982 تقريبا علما ان هجاء المدن كحاله شعريه امرا سائدا فى شعر الواثق الذى هجا كسلا الوريفه وتوتى الساحره وكوستى الجميله ومدنى السنى الامر الذى اوقعه فى مشاكل وسباب مضاد من بعض الذين لابفهمون الشعر او شعره تحديدا كزابط الشرطه الكبير الراحل ابراهيم احمد عبدالكريم صاحب برنامج نسايم الليل الذى اشتهر جراء المكانه الرفيعه لصاحبه وليس لجوهره !!!فكال السباب البذى لشخص الواثق وليسس شعره وهذا مقام اخر
اما الذين تفهموا مقاصد شعر الواثق الرفيع جدا فردوا عليه بشعر مضاد شبيه فى جودته ومنهم الدكتور" لغه عربيه" الحسين النور ابن ود مدنى السنى الذى ثار لاسم مدينته شعرا وكذلك شاعر اخر لعله السمانى الحفيان صاحب ديوان ام درمان الحياه الذى يقابل ام درمان تتحتضر فى المبنى ويعاكسها فى المعنى ولقد سعدت ايما سعاده بالاستماع الى الشاعرين العام 1986 فى احدى الليالى الرائعه بالقاعه 102 " الان قاعه عبدالله الطيب" باداب جامعه الخرطوم فى قراءه رمزيه لخريدتيهما ولقد نوه السمانى فى تلك الجلسه بمكانه الواثقوجوده ونبل شعره وصفائه البديع علما ان الواثق قد رثى السمانى الحفيان عند تحديقه ف الموت بابيات جياد لعلها من بحر الرمل!!
نتفا من سيره وخلفيه الواثق فهو عهد مايو كان اقرب الى الاتحادى جناح الهندى حسين المصادم وليس جناح زين العابدين المهادن ولقد اعتقل الواثق عهد مايو بسجنى كوبر وبورتسودان فى النصف الاول من السبعين لمركزه القوى وقتها فى نقابه اساتذه جامعه الخرطوم علما انه من صاغ البيان الشهير لهم فى عداء نميرى وديوانه الفارس الاعزل من وحى تلك المرحله وجله مكتوب بالسجن ولعل منه خريدته الشهيره فى رثاء صديقه الراحل الذى اعدمه نميرى فى اسبوع الاحزان كما يحلو للشيوعين وصفه بعد ان عجزوا من اخفاء كبيرهم عبدالخالق محجوب!!!صديقه جوزيف قرنق الذى ذهب فهل على روحه يقرا الفاتحه او كما قال شعرا ثم ان الواثق جغرافيا من ضواحى ام درمان " قريه النيه" ودرس بمداس ام درمان الاسطوريه كوادى سيدنا لذا شعره يصعب تصنيفه فى عداء ام درمان..
عىل المستوى الخاص سعدت بالجلوس قديما فى مجالس درس الواثق وقرات عليه العروض والمفضليات بروايه ابن الاعرابى تلميذ المفضل الاثير واشهد فى هذا المقام له بعلو الكعب وغزاره العلم وكثره الاحالات وخفه الروح وجمالها رغم ما يبدو للناظر من تجهم واكتئاب فى محياه واذكر رغم انه ضنين جدا بالحديث خارج محور الدرس مع تلاميذه انه دعانى لحضور منتدى ادبى اسبوعى يقيمونه مع بعض اخدانه اثر نقاش جانبى وحديث بيننا على هامش المحاضره عن ملحمه جلجامش لكنى لم البى دعوته تلك ربما لعلو مقامه وتهيبى ابداء جهلى بذلك المنتدى لكنى اتحسر اليوم عىل ضياع ذلك فقد كان من المامول ان انعم بمعرفه وثقافه ان زرت ذلك المنتدى الخاص للشاعر الضخم محمد الواثق حيته الرياح
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: احمد الامين احمد)
|
أحمدالأمين
كنا في يوم من أيام "أسمرا" الجميلة نجلس في دار منصور خالد العامرة في أسمرا مع أحمد الأمين، تحديداً كنا في مكتبته في ذلك البيت، أذهلني أحمد الأمين وهو يتحدث عن الكتب وكتابها بمعرفة دقيقة، تذكرت أن ماركيز وصف صاحب المكتب الكاتلاني - وأنا أكتب من الذاكرة- "كان يتحدث عن الفلاسفة والكتاب العظام كانه كان رفيق دربهم يوماً ما"، وكذلك احمد الأمين في ذلك اليوم.
سعدت بمعرفته وتناقشنا في أشياء كثيرة ثم تفرقنا أيدي بلاد.
أتمنى أن يواصل أحمد الكتابة والتوثيق والنشر، فمثله من يفيد هذه الأمة.
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: الصادق اسماعيل)
|
يااهلنا ..
كيكى الموغل فى الدهشة
وطارق جبريل ..الذى اقرا له كل مايكتب عدا (النخجيات) ..والتى لااحتمل
حزنها...(فبكبر منها اللفة وكدا)..
الخال خليل ...
واشرف الحلبى (ود ام نخيل) ..
والصادق اسماعيل ..الذى استمعت اليه كثيرا كثيرا ..فى الخرطوم
وفى الجزيرة وفى الاهلية ...
يبدو ان اللعبة (احلوت) ..تعالوا نسيح معا فى عالم احمد الامين ...
حبابكم ...
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
الاستاذ الدكتور محمد الواثق
ولد بقرية النية بمديرية الخرطوم في ديسمبر 1936م .
تخرج في مدرسة وادي سيدنا الثانوية .
ثم جامعة الخرطوم كلية الآداب قسم اللغة العربية
بدرجة الشرف المرتبة الأول عام 1962م .
إلتحق بجامعة كامبردج وتخرج (M.lit) ببحث أعده عن
المسرح العربي القديم 1967م .
عمل محاضرا بكلية الآداب جامعة الخرطوم .
ثم أستاذا مشاركا .
ثم رئيسا لقسم اللغة العربية .
عمل عميدا للمعهد العالي للموسيقى والمسرح .
له ديوان شعر ( الفارس الأعزل ) .
وديوان شعر ( أم درمان تحتضر ) .
له كتاب باللغة الإنجليزية صدر من دار جامعة الخرطوم للنشر
يحت عنوان ( تاريخ المسرح العربي 1310 - 1914 )
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: احمد الامين احمد)
|
Quote: كيكى الموغل فى الدهشة
وطارق جبريل ..الذى اقرا له كل مايكتب عدا (النخجيات) ..والتى لااحتمل
حزنها...(فبكبر منها اللفة وكدا)..
الخال خليل ...
واشرف الحلبى (ود ام نخيل) ..
والصادق اسماعيل ..الذى استمعت اليه كثيرا كثيرا ..فى الخرطوم
وفى الجزيرة وفى الاهلية ...
يبدو ان اللعبة (احلوت) ..تعالوا نسيح معا فى عالم احمد الامين ... |
عزيزي محمد عبد الرحمن وكل هذا الجمع الكريم لكم من الود أصدقه ...
جلست أرقب كل هذا الجمال، وغالبت نفسي حتى في إهداء التحية فربحت الرهان ،
كنت جلوساً أستمتع بكل حرف في صمت شقّه إنسكاب الإبداع فجئت أزجيكم التهنئة فهنيئاً ...
كامل المودة وعظيم الإمتنان لكم جميعاً
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
اسميهم بينى وبين نفسى ادباء جامعة الخرطوم ..محمد عبدالحى وعلى المك ومحمد الواثق ..
يشترك محمد الواثق مع على المك فى النشاة الامدرمانية حيث تقول السيرة الذاتية لعلى المك
انه من مواليد 1937 بامدرمان ..وتخرج من كلية الاداب جامعة الخرطوم ...واكمل دراسات
عليا بامريكا ..محمد الواثق شغل الوسط الثقافى فترة ليست بالقصيرة بقصيدته
(امدرمان تحضتر) ..وعلى المك شغال الناس زمنا طويلا بحبه لامدرمان وكتاباته عنها ..
اعتقد ان على المك اقرب للوجدان الشعبى من محمد الواثق الذى عرف فى الاوساط الاكاديمية
فقط ..او قد يكون ظهور على المك فى الاذاعة السودانية هو سبب انتشاره وشهرته لدى العامة بينما
ظل محمد الواثق حبيس المنابر الاكاديمية ...
| |
|
|
|
|
|
|
|
|
|
Re: خالكم خليل ماليهو حق فى موضوع الجابرى دا ... (Re: محمد عبدالرحمن)
|
شكرا محمد عبدالرحمن على الإضاءة أعلاه مايلى نتفا من أرشيفى مداخلاتى بمنبر sudanray.com أعتز به كثيراعسى ان ابلغ عنه ولو باية او كماقال:
على أبواب القراء السبعه !!!
* روى البخاري الإمام في كتاب " فضائل القرآن" باب " انزل القرآن على سبعه أحرف" أن النبي صلى الله عليه وسلم قال:
" إن هذا القرآن انزل على سبعه فاقرؤوا ما تيسر منه ".............او كماقال
ويقول ابن خلدون في صفحه 407 من "مقدمته":
" القران الكريم هو كلام الله المنزل على نبيه المكتوب بين دفتي المصحف وهو المتواتر بين الامه إلا أن الصحابة روه عن رسول الله صلى الله عليه وسلم على طرق مختلف في بعض ألفاظه" وليست معانيه" وكيفيات الحروف في أدائها وتنوقل ذلك إلى أن استقرت منها سبع طرق معينه توتر نقلها بطرق أدائها وربما زيد بعد ذلك قراءات أخر لحقت بالسبع إلا أنها عند ائمه القراءة لا تقوى قوتها في النقل" انتهى كلام ابن خلدون رحمه الله............
ولابد أن نفرق بين القارئ وصاحب الرواية فحفص مثلا راوي وعاصم ابن أبى النجود الكوفي قارئ وورش راوي ونافع المدني " تنسبه إلى المدينة المنورة شرفها الله " قارئ ولابد للقارئ أن يكون متصلا اتصالا مباشرا بالصحابة وكلهم عدول لقول المصطفى صلى الله عليه وسلم " اصحابى كالنجم بأيهم تقتدوا تهتدوا" الذي سمع القراءة كما لايخفى من فم سيد البشر سيدنا محمد صلى الله عليه وسلم كالصحابة الأجلاء عثمان بن عفان وعلى بن أبى طالب وزيد بن ثابت وأبى بن كعب شيخ القراء في حاله رواية حفص عن عاصم عن شيخه عبد الرحمن السلمي أو كتاج السنة أبو عبد الرحمن عبد الله بن عمر بن الخطاب في حاله رواية ورش عن نافع عن ابن عمر وغيره كابن أم معبد وهو سيدي راعى الغنم لأهل مكة عبد الله ابن مسعود الذي قال عنه سيد البشر صلى الله عليه وسلم من سره أن يسمع القران غضا كما نزل فليسمعه من فم ابن مسعود " والذي شهد هو لنفسه بقوله " أخذت سبعين سوره من فم رسول الله صلى الله عليه وسلم لاينازعنى فيها احد "عليه فان القراء السبعة هم :
نافع وعبد الله بن كثير وهو غير المفسر الدمشقي المعروف وأبى عمرو وابن عامر قارئ الشام وعاصم الكوفي وحمزة والكسائى الأمام وقد قال عنهم الراجز:
جزي الله بالخيرات عنا أئمة لنا نقلوا القران عذبا وسلسلا
فمنهم بدور سبعه قد توسطت سماء العلى والعدل زهرا وكملا
لها شهب عنها استنارت فنورت سواد الدجى حتى تفرق وانجلى
وسوف تراهم واحدا بعد واحدا مع اثنين من أصحابه متمثلا...ةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةة......
كما قال عنهم صاحب "ألشاطبيه" رحمه الله:
فأما الكريم السرفى الطيب " نافع" فذاك الذي اختار المدينة منزلا
ومكة عبد الله فيها مقامه هو "ابن كثير" كأثر القدم معتلي
وأما الإمام المازني صريخهم " ابوعمرو" البصري فوالده العلا
وأما دمشق الشام دار " ابن عامر" فتلك بعبد الله طابت محللا
فإما ابوبكر " فعاصم " اسمه فشعبه راويه المبرز فضلا
و " حمزة" ما أزكاه من متورع إماما صبورا للقران مرتلا
وأما على ف" الكسائى" نعته لما كان للإحرام منه تسربلا
نافع " 70—169 هجريه" هو عبد الرحمن بن أبى نعيم أصله من أصفهان وتشتهر بجوده حريرها ولعلها من أعمال فارس قديما ..... كان عالما بوجوه القراءات والعربية وإماما لدار الهجرة " المدينة المنورة على صاحبها أفضل السلام " ...
كان إذا تكلم يشم من فيه " فمه " المسك فقيل له :
أتتطيب كلما جلست للإقراء؟
فقال:
لا أمس الطيب ولكنى رأيت رسول الله صلى الله عليه وسلم في المنام يقرأ في " في " أى في فمه ....!!!!
أشهر رواته قالون وورش وتسود رواية قالون في غرب ليبيا وتونس أما رواية ورش فتسود في صعيد مصر والجزائر والمغرب ا ...
يعد الإمام نافع مولى الصحابي عبد الله بن عمر رضي الله عنهم وابرز تلاميذه إمام دار الهجرة مالك بن انس الاصبحى وقد جلس في مجلسه للافتاءعقب رحيله في الروضة الشريفة بمسجد المصطفى صلى الله عليه وسلم كما يعد الإمام نافع التابعي الجليل ثاني أشهر سند شرعي ثقة وثبت وغير مجروح في الفقه والحديث وهو السند الذي " عن ابن عمر عن نافع عن مالك ",,,,,,,,,,,,,,,,,,,
** قيل عن الإمام نافع:
* قال عنه ا الراوي أبى عمر بن العلاء الدوري:
قرأت على إسماعيل بن جعفر ختمه بقراءة أهل المدينة وأدركت حياة نافع ولو كان عندي عشرة دراهم لرحلت إليه!!!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟؟
** تخيلوا الراوي الأشهر الدوري لم يكن يملك عشره دراهم في عصره!!!!!!!!!!!!!!!
* حاشية:
قراءه أهل المدينة المقصودة وقتها هي رواية ورش عن نافع وظلت يقرأ بها المسجد النبوي إلى حين بزوغ حركه محمد بن عبد الوهاب المستندة فقهيا على تغليب مذهب ابن حنبل " إمام أهل السنة " وفتاوى ابن تيميه فحلت محلها رواية حفص عن عاصم التي ظلت تعطر فضاء الحرمين إلى يومنا وتطبع بها جل المصاحف الآن في الأمصار الاسلاميه وغيرها ومن نعم المولى على شخصي الفقير أنى شهدت خمس ختمات بهذه الرواية ببكة والمدينة في شهر رمضان المعظم خلف الحذيفى والشريم والسد يس والثبيتى ومن أجمل المشاهد في حياتي حتى الراهن صلاه فجر حاضرا بمسجد النبي صلى الله عليه وسلم خلف الأخير أعنى الشيخ عبد الباري الثبيتى حفظه الله بدأ ركعتها الأولى ب " والنجم إذا هوى ما ضل صاحبكم وما غوى وما ينطق عن الهوى إن هو إلا وحى يوحى علمه شديد القوه ذو مرة فاستوي" ....وعندما أوشك على خاتمتها أوشك مسجد النبي صلى الله عليه وسلم ذاك الفجر المسحور أن يطير أو يذوب أو يتفتت وجدا وطربا وحبا وهياما وعشقا وصبابة من فرط رهافة هذه السورة وجمال وخشوع صوت الشيخ الثبيتى تلك اللحظة حفظه الله !!!!!!!!!!!!!!* قبر الإمام نافع ببقيع الغر قد بالمدينة المنورة على ساكنها أفضل التسليم .................
| |
|
|
|
|
|
|
| |
محمد عبدالرحمن
عبدالكريم الامين احمد
احمد الامين احمد
Ashraf el-Halabi
طارق جبريل
khaleel
Omar Bob
الصادق اسماعيل
أمين يحيى
فيس بوك
تويتر
انستقرام
يوتيوب
بنتيريست