|
|
 اسايلابي ، لوترابي، مزارعي. الروميتاب
|
اسايلابي ، لوترابي، مزارعي.
الروميتاب
إلى أخوتي
جمال، عوض حبة، الفاضل، أبراهيم السيد، و مجموعة سلاح الطيران.
ما استقر بنا الحال و طاب لنا المآل في بلاد الغربة و الارتحال، إلا وولد لنا أخ لم تلده أمنا، أسميناه ( الروميت)، أحببناه، و رعيناه في سنته الأولى، حتى أذا ما اشتد منه العزم، و بلغ الحلم، و انبنى اللحم وصلد العظم، ابغضنا و ناصبنا العداء، و أعلن علينا الحرب حال استلامه ( القرين)، شنفنا و قنفنا، و شال حالنا، حتى بلغ بنا الرعب مبلغاً جعل فرائصنا ترتعد لمجرد سماع أسمه.
و ( الروميتية) تقليد عريق عرفه إنسان السودان، من السالف في العصر و الأوان، فقد أشار الأثر إلى اختيار الرفيق قبل الطريق، و ( الروميت) قبل ( الديناميت)، كل ذلك شوقاً إلى الأنس و المؤانسة، و التي في حقيقة حقيقتها، رغبة صادقة في خفض تكاليف و نفقات العيش في البلد الجديد. و السكن المشترك أشبه ما يكون بعقد الزواج، للفرد فيه حقوق، و عليه ما عليه من الواجبات، شر لابد منه، ينجح البعض في الوفاء بها، و يقصر الملايين تقصيراً ذريعاً في الالتزام باليسير منها، حتى اتخذ البعض من فرط الإحباط بائية ( ما لك مجافي الناس) شعاراً، و خيارا.
تمر سنه العسل الأولى كما في الزواج، يركز فيها الزوجين على كشف نقاط ضعف بعضهما ، حتى إذا خلت بجاراتها قالت ( طلع هبوب ساى)، ثم تبدأ بذرة الشقاق في الانفلاق، و غالبا ما يتم الإعلان عن موت الهوى، بجملة متضجرة من أحد ( الروميتية)، و هو يفتح باب الثلاجة، و ليس في الغرفة أحد سوى رفيقه التعيس
-انتو البشرب ليترين صودا في اليوم ده منو؟؟؟؟؟
و بظهور هذه ( الأنتو)، يبدأ عصر ( الكجنة)، و ينتهي الأمر بأخلاء الذي تثبت عليه تهمة لحس ( لتري الصودا) لغرفته، ليحل محله ( الروميت ) الجديد، و الذي غالبا ما يكون من فئة الطباخين المهرة، فرفقته مطلوبة، يتنافس عليها المتنافسون، فلا أجمل من أن تهتف من مرقدك ( الحلة مرقت)، فيجيبك بثقة ( خليها تتسبك شوية)، و يا لها من سباكة تلكم.
وقد قدر لي أن أعاني التشرد مرة، بسبب من أن بني كجة الذي ( رامته)، أعجبه مذاق طبيخ ( روميت) متنقل بين الشقق، عرف بين الناس باسم ( الطيار المدني)، فتحايل على بخدعة لترين الصودا، و انطلت الخدعة كعادتها في الانطلاء، فما اصطبر على حتى أكمل نقل أغراضي من شقة السوء، ليمكنه من مكاني، حتى كان الطيار قد نصب الحلل فوق المواقد، وشرع في التفنن في إشعال الفرن، و دعك اللحم و الدجاج بالبهارات، و الجمع ينظرون وجهه القميء بإعجاب و حب.
لم يطل المقام بالرجل حتى مل القوم طبخه، أو لعلهم تعلموا الصنعة منه، فطالبوه بأجر السكنى
( يا حبة عارف الظروف براك اليومين دي، الحجة عاملة عملية في الركبة)
و لما لم يقدر على الوفاء بالمال، آل أمره إلى ما آل إليه أمر الذي قال فيه الشاعر ( يا السكنوك جنوب دارفور)، ذلك موقع يسمى ( جنوب البرونكس)، قال فيه ( ريغان)، أن الحرب فيه اشد قتلاً من حرب فيتنام، يتبادل فيه الناس القصف العشوائي ليل نهار، بسبب و من دون سبب، حتى الأغاني فيه، تطلق الرصاص على مستمعيها، التقيته بعد عام، فلم أجد من الجنريتر شيئا تبقى غير المنفلة.
و برجوعنا إلى أضابير المحنة السودانية، وجدنا أن من تقاليد السودانيين في الخارج، تقليد استقبال القادمين الجدد إلى البلد الذي يعيشون فيه، وقد استقبلني السودانيون بمحبة و شوق في كل بلد زرته في السابق، وجدتهم على أعتاب سلم الطائرة ببذلاتهم ( الكنغولية)، في مطار ( جومو كينياتا)، ورهط من الهيبيين في بناطيل الشارلستون في مطار ( ديغول)، بعثيون في مطار بغداد، خامنئيون في ( طهران) راكاحيون في مطار (اللد)، فيديريكو فلينيون في مطار ( دافنشي)، فيلا كوتيون في ( لاغوس)، شيوعيون و امميون في مطارات و(ارسو) و (صوفيا) و( براغ) و (موسكو)، عندما ركبت ( اللوت) من ( اسينا) كما قال الشاعر، و منفيون في اليمن قبل أن تتوحد.
ينتظرونك في صبر، و يستقبلونك في حفاوة، يشتمون فيك رائحة الوطن، يتنسمون أخباره الطازجة من بين شفاه لم يجف طعم الويكة و العنكوليب عنها، يأخذونك إلى الدور العامرة، يعرفونك و يطبعونك، حتى يستوي عودك فتسبهم جميعا. و تظل ضيفا حتى تنقضي عدة الضيافة الذهبية، فترقي إلى رتبة ( روميت)، و تلك أولى الخطوات في رحلة عكس الريح، تبدأ من ( كيلو سبعه) طريق ( مكة)، و تنتهي في الربع الخالي بأذن الله.
تبدأ دورة حياة ( الروميت)، بالحضانة، يعتمد في غذاءه و مواصلاته و بعض مصاريف الجيب، على (الروميت ) الأب- الأم، و هو مغترب أو مهاجر سابق في الأيمان، تمتد فترة الحضانة مابين سنة إلى سنتين على الأكثر، يعقبها انفصال عنيف يشبه في ارتجاجه، انفصال كبسولة فضائية عن المركبة الأم، شرر و ضرر و دخان، لا يعود بعدها اتفاق أو اتحاد بينهما و إلى الأبد.
اتفقت المذاهب الفلسفية الروميتية الخمسين في أمريكا، على تبني شعار ( تمسكن حتى تتمكن)، و اختيرت أغنية ( قلت ارحل، أسوق خطواتي من زولا نسى الألفة)، سلاما جمهورياً بالإجماع، فأنت و منذ أن تطأ بقدميك ارض البلاد ( بفنيلتك اللاكوست المضروبة) و شريطك الغنائي الذي لا تمل سماعه ( بعيونك تقولي تعال و تعال)، عالة على غيرك، شئت أم شئت، حتى يحين موعد استخراجك الرخصة ، و شراءك الكامري الهكرة الشهيرة من ( الأوكشن)، ثم الدخول في حومة ترافيك البني كجة، تخطط المدينة طولا و عرضا، زقاقا زقاقا، حتى لحظة إعلان تمردك في توريت.
و أس الشقاء في التجربة الروميتية، أن التساكن و التآخي لا يتم بناء على معرفة سابقة معظم الأحيان، أو أنها معرفة منبنية على معارف تمر عبر أناس آخرين، ولا تقرر اعتمادا على استبيان مثلما يحدث في (ماتش دوت كوم)، و لكنه مثله و مثل معظم الزيجات في السودان، يتم نتيجة لاقتراح و موافقة على الاقتراح، و ( الروميتاب) إضافة إلى ذلك يقعون في خطأ تغليب العواطف على المصالح المشتركة، فأن مشاعرهم دائماًً ما تكون ( على الهبشة)، حتى و لو ( مر نسيمك على الف ميل).
و المصالح المشتركة، تتمثل في الأنفاق المتساوي على الإيجار، و منصرف الغاز و الكهرباء، مروراً بالأثاث المستعمل، و أدوات الطبخ، يلي ذلك اللحم الحلال ما أهل و ما لم يهل به، فهو حلال كما تقول اللافته، و المشروبات ما أحل منها و ما حرم.
ويبدأ التباين و الاختلاف عادة في اختيار مواعيد النوم، فهنالك الروميت السقد، و الروميت البطة وهذين لا يتفقان، و يتباين البعض في ( الهايجين)، فبعض الروميتاب لا يعبئون بنظافة المكان، وقد شكى لي أحدهم مرة، بأن زميله يصر على رأيه بأن بشكير الحمام لا يجوز غسله، و أن الرجل واقع تحت طائلة الظن بأن البشكير ينظف نفسه بنفسه كل مرة يجفف فيها الإنسان نفسه عقب الحمام، و تأكد لي زعم الصديق، حينما لمست بشكير الروميت المعني في فترة غيابه، فوجدته لوح ( ابلكاش)، و حينما طرقته بأصابعي كو كو كو، تهيأ لي أنني سمعت صوت إنسان يهتف من مكان ما
منو الفي الباب؟؟ أتفضل اتفضل.
أو لعله تحمحم.
وقد يحتدم الجدل بين الروميتاب، حول من هو أفضل من غني ( جاي تفتش الماضي، محمود أم كمال ترباس؟؟؟)، ويكون هذا الجدل كافيا لانفضاض السامر.
وكان للكرم الحاتمي السوداني غير المقنن، فضل في تكديس الروميتاب في شقق ضاقت عن سعتها بالخلق، و كان أن شهدت في زيارة لمركز تجمع سكاني، امرأة أمريكية ورقية، جاءت في رفقة زوجها الورقي السوداني، شهدت نظرات الدهشة في عينيها، و هي تراقب خروج رجل كل خمس دقائق من غرفة في نهاية الشقة، مودعا في طريقه إلى العمل، و عندما وصل العدد إلى ستة، لم تتمالك نفسها، فصاحت من يأس
Damn, y’all, how do yo’all fit in this (F) little place…Geeeeee.
هززنا رؤوسنا و ابتسمنا في بلاهة نحسد عليها، و لم نحر جواباً !!
ولأن الحديث يجر الحديث، فأن من الروميتاب من يحذره الروميتاب، و أولهم، الروميت الذي ( يلفح) أقرب (جاكيت) تطالها يده، و هو في طريقه إلى الخارج في أيام الشتاء، خاصة، و قد تجده يغط في نومه، مرتدياً بجامتك التي اشتريتها بحر مالك من ( كي مارت)، وهو كما يصفه اسايلي عريق ، وما يفعله خلال اليوم ( عاضي التلفون لبانة)، فهو اشتراكي النزعة، شمولي في آن معا، يستفيد من مبادئ ( الحالة واحدة)، لدرجة يقرأ معك فيها رسائلك الخاصة و ايميلاتك، و قد يجيئك يوما متهللا قائلا ( قبيل ضربت لى أريج في السودان اتونست معاها، الكرت اداني عشرين دقيقة)، و تكون تلك ( الأريج) خطيبتك !! و بينما أنت تتميز غيظا، يأتيك صوته عبر الهاتف:
يا عمر، عربيتك دي بنزينا قطع، و على ما اعتقد، عندك لستك ضارب
طيب خليتا وين
ما بعيد في بلتمور... سوري يا حبة، الحق قبال ما يجروها!!!
أما أحب الروميتاب إلى القلوب ( بعد الطباخ)، فالروميت التكنلوجي، المتخصص في سرقة الكيبل من على سطح العمارة، و خاصة المحطات المهيأة للأنتعاظ، الكافيات لإشباع متاعب الحاجة الشرعية و غير الشرعية، العالم بأسرار الداون لود، ، لا يفتأ يدهشك كل ساعة بفتح جديد، دفع البيلات اونلاين، و تجديد ترخيص السيارة، فارس الحوبة، المندوب ليوم هجوم الفيروس، يظل أثيرا، حتى يفاجأ ه القوم ساعة من نهار بقولهم
حولا.... ده منوده الزعط لترين صودا براهو ده ؟؟
فلا يجد بدا مما ليس منه بد
جنوب دارفور مقاما، و قيل ( ساوث ايست).
|
|
 
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Ahmed musa)
|
مبالغة عديل
Quote: وقد شكى لي أحدهم مرة، بأن زميله يصر على رأيه بأن بشكير الحمام لا يجوز غسله، و أن الرجل واقع تحت طائلة الظن بأن البشكير ينظف نفسه بنفسه كل مرة يجفف فيها الإنسان نفسه عقب الحمام، و تأكد لي زعم الصديق، حينما لمست بشكير الروميت المعني في فترة غيابه، فوجدته لوح ( ابلكاش)، و حينما طرقته بأصابعي كو كو كو، تهيأ لي أنني سمعت صوت إنسان يهتف من مكان ما
منو الفي الباب؟؟ أتفضل اتفضل.
|
Quote: و قد يجيئك يوما متهللا قائلا ( قبيل ضربت لى أريج في السودان اتونست معاها، الكرت اداني عشرين دقيقة)، و تكون تلك ( الأريج) خطيبتك !! و بينما أنت تتميز غيظا، يأتيك صوته عبر الهاتف:
يا عمر، عربيتك دي بنزينا قطع، و على ما اعتقد، عندك لستك ضارب |
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: مرتضى احمد عبد القادر)
|
| Quote: فما اصطبر على حتى أكمل نقل أغراضي من شقة السوء، ليمكنه من مكاني، حتى كان الطيار قد نصب الحلل فوق المواقد، وشرع في التفنن في إشعال الفرن، و دعك اللحم و الدجاج بالبهارات، و الجمع ينظرون وجهه القميء بإعجاب و حب. |
زحلقة مبالغة...
بالغ والله ، ما أداك فرصة..
زي ده بيسموه ساروخ (صاروخ) يا السر
عجبتهم يدو طاعمة دي..
زعلّك الساروخ ، عامل وشو الزي الكبك ده..
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Tagelsir Elmelik)
|
الأخ تاج السر سلامات
ياخى الله ينصر دينك
عليك الله وووووااااااااااصلللللللللل
وعليك الله الف مرة كان ما نقلتو للربع الجاى
ياخى والله قطعت مصارينا عديل
وكلامك ده ينم عن خبرة طويله مع الروميت
دحين ياخوى انت وين هسع بعنى فى ياتو ولاية ؟
| Quote: Damn, y’all, how do yo’all fit in this (F) little place…Geeeeee. |
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: حسن حماد محمد)
|
سلامات يا تاج
وما تنسي إنو الروميت بتاعك دا ذاتو بتدور عليهو دورة حياة الذبابة ..وبيمشي يدور ليهو علي روميت اخر يستنكحو...حتي لو تطلب الامر يقدم ليهو لي زول من أول وجديد...وينتظر لحدي ما يصل ويخلص حقو وحق كل السابقين
واصل ياخ سردك ممتع.....وانا بقرأ علي بعد خطوات منكم
خارج الخط:
ياتاج ممكن اعرف بوستاتك دي بتصل العناوين الرئيسية أسرع من تجنيس الوالي للمحترفين كيف؟؟؟؟
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: yasir Abdelgadir)
|
| Quote: وما تنسي إنو الروميت بتاعك دا ذاتو بتدور عليهو دورة حياة الذبابة ..وبيمشي يدور ليهو علي روميت اخر يستنكحو...حتي لو تطلب الامر يقدم ليهو لي زول من أول وجديد...وينتظر لحدي ما يصل ويخلص حقو وحق كل السابقين |
و الله يا ياسر عملت ( بيبر) عديل في البني كجة الروميتاب ههههه
اجيك لسؤال بره الخط
في اسئلة الزول ما بفهما الا يكون بعاين للزول
دهشة
اعجاب
استنكار
لأنو لو جاوبت خايف من كلمة ( لا لا و الله ما قصدت كده) هههه
شوف بكري غايتو
جوه الخط
شكرا على الحضور و المتابعه و التعليق
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: حسن حماد محمد)
|
حسن حماد بتبالغ
Quote: دحين ياخوى انت وين هسع بعنى فى ياتو ولاية ؟
|
تاج السر الملك بيقولو ليهو انت فى ياتو ولايه
ياخى ده عمدة فرجينيا وتحت تحت بيكون عمدة نيويورك بتاعتكم
ـــــــــــــــــــــــــــــ
كيفك وكيف الاسرة لعلكم بالف خير
ــــــــــــــــــــــــــــــــ
ــــــــــــــــــــــــــــــــ
ربنا يحفظ لى كريم وامو
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: جعفر محي الدين)
|
| Quote: Damn, y’all, how do yo’all fit in this (F) little place…Geeeeee |
True that wallllahi you reminded me with good old days and my 10 roommates in 3 bed room apartment :) lakin still one of my best times in the US
روميتاب ... لوتراب... miss them all
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: جعفر محي الدين)
|
العزيز جعفر محي الدين
الأسايلاب و اللوتراب ممكن تقرا عنهم في مكتبتي في سودانيز
الرميتاب القرية الفي الجزيرة، حدث لى زيارتها و انا طفل ( مناسبة عرس ) على ما اذكر
و قرية جميلة جدا و أظنها مركز من مراكز مشروع الجزيرة
شكري على المرور و المتابعه
الملك
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: سامى عتبانى)
|
استاذ تاج السر
ما سردته حقيقة واقعة في كل مجتمعاتنا خارج السودان وعند العزابة
هنا في السعودية تعاني منها بعض الأسر كمان لكن في بعض القبائل منظمة شديد في السعودية
أما عندما كنا في الهند فحدث ولاحرج
هناك في الهند كن بنسميه "البارتنر"
وياما في بارتنات قالوا ليهم (لا حولااااا دمنو الضرب لترين الصودا دا)
الصادق
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: الصادق صديق سلمان)
|
الصادق صديق العزيز
Quote: ما سردته حقيقة واقعة في كل مجتمعاتنا خارج السودان وعند العزابة
هنا في السعودية تعاني منها بعض الأسر كمان لكن في بعض القبائل منظمة شديد في السعودية
أما عندما كنا في الهند فحدث ولاحرج
هناك في الهند كن بنسميه "البارتنر"
وياما في بارتنات قالوا ليهم (لا حولااااا دمنو الضرب لترين الصودا دا) |
شكرا على حضورك و المشاركة
الملك
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: حسن حماد محمد)
|
أخي حسن حماد
الغريب انو انا ما ( اترمت) كتير، في نيويورك هارلم و ( نورث برونكس)
لمدة سنة تقريبا، يمكن تمانية شهور، بعديها معاي اولادي، لكن صلتي بالعزابة
ما انقطعت، وقد التقيت بكرام الناس الذين صاروا اعماما لأبنائي الى يومنا هذا.
أنا في فيرجينيا ( نورث فيرجينيا)
و لو حصل جيت بى جاي مرحب بيك
تعال زورنا
الملك
| |
|
|
|
|
|
|
|
|
 Re: اسايلابي ، لوترابي، مزارعي. الروميتاب (Re: Tagelsir Elmelik)
|
Quote: أما أحب الروميتاب إلى القلوب ( بعد الطباخ)، فالروميت التكنلوجي، المتخصص في سرقة الكيبل من على سطح العمارة، و خاصة المحطات المهيأة للأنتعاظ، الكافيات لإشباع متاعب الحاجة الشرعية و غير الشرعية، العالم بأسرار الداون لود، ، لا يفتأ يدهشك كل ساعة بفتح جديد، دفع البيلات اونلاين، و تجديد ترخيص السيارة، فارس الحوبة، المندوب ليوم هجوم الفيروس، يظل أثيرا، حتى يفاجأ ه القوم ساعة من نهار بقولهم
حولا.... ده منوده الزعط لترين صودا براهو ده ؟؟
|
والله عذبت بنو كجة عذاب القبور
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Hisham Amin)
|
هشام أمين الوحش شخصيا
سعيد لرؤيتك
لاقيت الوحش الصغير قبل ايام كيف السودان معاك؟؟
Quote: ساب تاج مان
ياخ انت نسيت اهم حاجة
الرومييت يا مان
ما بنظف ورى روحو
ولامن تذكرو
تسمع منو كلام كانك خدامة الاسرة .
ولا لامن يديك الايجار ناقص 20$ ويقول ليك كمل الباقى
غايتو ايام الله لا عادا
انى واى هاو از زا بزنز؟؟ |
من الصمدي قفل القصة باظت ههه
لك شوقي و سلامي
الملك
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Tagelsir Elmelik)
|
يا سلام عليك يا تاج .... تعرف بعيدا عن البوست ده وفي موضوع تاني .. أنا بحييك على HDphotos you captured on Khaled's Wedding ..they are really amazing, live,and show how professional you are.
بوست رائع وواقعي
بعد كلامك ده شكلكم بتقطعو معانا (اللوتراب) لو جينا نكسر بهناك.
أمير
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Ammir Mohamed)
|
أنا خايف بكري يوم يرسل ليك مسينجر
بقول ليك فيه
لا حولاااااا
دة منو اللحس ليك أتنين كيلو بايت براهو!
ويختم جوابوا بمقولة المايركروسوفتاب الشهيرة
اليومين ديل الهكرز معزبنا
و شركات الحماية و السيرفر مصاريفة بقت كتيرة!
وعينك ما تشوف إلا الخور
الخور العين يا عمك!
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Sana Khalid)
|
سلام تاني
Quote: اجيك لسؤال بره الخط
في اسئلة الزول ما بفهما الا يكون بعاين للزول
دهشة
اعجاب
استنكار |
اعجاب ...وحات الله إعجاب
وصدقني لو ماكان البوست دا فوق..الا كان يعتر لينا واحنا بنفتش في بوستات العزاء..و.كان بكري حرمنا من متعة زي دي...شكرا ليك ولي بكري
ياخ ياريت نلاقيك...أنا الان في سلفر سبرنق
تحياتي
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: yasir Abdelgadir)
|
Quote: ما أحب الروميتاب إلى القلوب ( بعد الطباخ)، فالروميت التكنلوجي، المتخصص في سرقة الكيبل من على سطح العمارة، و خاصة المحطات المهيأة للأنتعاظ، الكافيات لإشباع متاعب الحاجة الشرعية و غير الشرعية، العالم بأسرار الداون لود، ، لا يفتأ يدهشك كل ساعة بفتح جديد، دفع البيلات اونلاين، و تجديد ترخيص السيارة، فارس الحوبة، المندوب ليوم هجوم الفيروس، يظل أثيرا، حتى يفاجأ ه القوم ساعة من نهار بقولهم
حولا.... ده منوده الزعط لترين صودا براهو ده ؟؟
فلا يجد بدا مما ليس منه بد
جنوب دارفور مقاما، و قيل ( ساوث ايست). |
الاخ تاج السر
ياخى انت كاتب خرافى
انا كنت جارى طالع الشغل مستعجل فإذا باحد الروميتات اللوتراب الصواريخ الجدد طلب منى ان افتح له الكمبيوتر تبعى قبل ان اخرج
فبمجرد فتح الكمبيوتر فاذا بعنوان مقالك الجميل ظهر لى اعلى السودانيز
واكلتنى يدى بأن انقر عليه
فاجبرتنى روعة كتابتك على القراءة والمتابعة فاتحا لخروجى للعمل
فمكانك دور النشر العربية
بيروت وكدا بس بعد انتهاء مقاطعتنا لها.
برضو بالله كلمنا عن فكاهات اللغة
مثل واحد زولا لينا لوترابى خلاص تم الخمسة سنة وقال داير يقدم للجنسية وانجليزيته مازالت منتهية خالص
وقال لى ياخى فى امتحان الجنسية بسألوا زى شنو كدا؟
قلته من ضمن الاسئلة المعهودة مثلا ح يقولو ليك ماهو ال
Law of the land?
فبعفوية دون ان ينتظر منى التوضيح قال لى: مش الارض النازلة؟
فانفقعت بالضحك
وقبل ان انتهى من هستيرية الضحكة واصل كلامه قائلا والله انا كنت داير اقول ليك فلوريدا !
فاذا بى انفقع فى الضحك زيادة.
فهكذا بعض الروميتات يعزوبنك حتى فى اللغة.
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: محمد النيل)
|
أخي العزيز محمد النيل
شكري الجزيل و العميق على تفضلك بالحضور و التعليق
كان معانا اسايلي بيذاكر للجواز
سالتو السؤال الأول من هو اول رئيس للولايات المتحدة... جاوبني
George Washington bridge.
اها هسع ده كلام ده؟؟
تحياتي ليك و للساروخ
قبال ما تمرق امن على لتيرين الصودا بالضبة و المفتاح
ترجع بعدين في الحراية دي تتعذب
المفتاح
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Ammir Mohamed)
|
اخي أمير محمد
بركة في البوست الجابك .... زمن طويل
انت تعال الباقي هين
الى اليوم بضحك في قصة
Are you Email or Female
Thank you for regarding Khalid's wedding photography as professional
glad you like the pictures, hope to do your wedding if u still out in the green zone
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Yasier Elsayed)
|
Quote: و يتباين البعض في ( الهايجين)، فبعض الروميتاب لا يعبئون بنظافة المكان، وقد شكى لي أحدهم مرة، بأن زميله يصر على رأيه بأن بشكير الحمام لا يجوز غسله، و أن الرجل واقع تحت طائلة الظن بأن البشكير ينظف نفسه بنفسه كل مرة يجفف فيها الإنسان نفسه عقب الحمام، و تأكد لي زعم الصديق، حينما لمست بشكير الروميت المعني في فترة غيابه، فوجدته لوح ( ابلكاش)، و حينما طرقته بأصابعي كو كو كو، تهيأ لي أنني سمعت صوت إنسان يهتف من مكان ما
منو الفي الباب؟؟ أتفضل اتفضل.
أو لعله تحمحم. |
لووووووووووووووووووووووووووول
غايتوا يا تاج السر الحمد لله اني بقرا كتاباتك صباحا بعد
ان يذهب الروميتات الي اعمالهم
والا كانو قالوا لي انت ظعطتي لترين الصودا ديل .
يا اخي قطعت مصاريني بالضحك .
ممتع ممتع كعادتك
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: doma)
|
Quote: لووووووووووووووووووووووووووول
غايتوا يا تاج السر الحمد لله اني بقرا كتاباتك صباحا بعد
ان يذهب الروميتات الي اعمالهم
والا كانو قالوا لي انت ظعطتي لترين الصودا ديل .
يا اخي قطعت مصاريني بالضحك .
ممتع ممتع كعادتك |
اها يا دومة
هدية العدد ليترين ليترين ليترين من كل الأصناف
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Tagelsir Elmelik)
|
| Quote: hope to do your wedding if u still out in the green zone |
المنطقة الخضراء أنت ياخي!! والله أخوك اتجاوز كل الخطوط الحمراء إذا كانت حياة العزوبية دي منطقة خضراء فأنت واهم يا صديقي! مالك ومال البشكير المصوفن والقميص المعلق في باب الشارع.. بالمناسبة انت بتعرف إنو في ريحة اسمها ريحة العزابة!! وبي ريحة ما قاصد عطر أنا.. ريحة مميزة كدة لمن تدخل بيت عزابة... تعرف والله نحن كنا عزابة هنا في الإمارات في بناية مسمينها غوانتنامو المعروف إنو الغرفة بتكون ليك ومعاك اتنين ، بتدخل بالليل تنوم عادي، تصحى الصباح تلقى في خمسة كواكب مرميين في الأرض من وين جو الله أعلم .. تطلع تمشي الشغل وتجي تلقى البيت خلى.. الحمام ده عشان تدخلو إلا تكون قايم سدّاري ... كوكب طالع وكوكب داخل!! مالك علينا ياخي!!
تحياتي وإنشاء الله I will be there mid July and will make sure that we meet
تحياتي
أمير
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: عمر احساس)
|
سميناهم الكواكب
وكنا يا ملكـ بنغني ليهم " الكواكب اجتمعوا "
وكواكبنا أنواع ، فيهم كوكب داخلي ، زمن غربتنا داخل الوطن ، كوكب الخلا وده سمو بسيط ، يقسم معاكـ الموجود وخلصت
والله يكفيكـ كوكب الغربة الحقيقية
ياخي ده وصلنا مرحلة غريبة جداً ، وخليكـ من بشكيرو ، لباسو الداخلي مكشوح عليهو شاي بي لبن ومعلق في الحمام من يناير لي نص مارس
ما عندو حل غير انو صاحبي يشيلو بي " عود " ومع باقي بصل الحلة إلى كيس الزبالة .
ولولا الحياء كان جبت صديقي " البوردابي " شهود 
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: عمران حسن صالح)
|
عمران حسن صالح العزيز
Quote: سميناهم الكواكب
وكنا يا ملكـ بنغني ليهم " الكواكب اجتمعوا "
وكواكبنا أنواع ، فيهم كوكب داخلي ، زمن غربتنا داخل الوطن ، كوكب الخلا وده سمو بسيط ، يقسم معاكـ الموجود وخلصت
والله يكفيكـ كوكب الغربة الحقيقية
ياخي ده وصلنا مرحلة غريبة جداً ، وخليكـ من بشكيرو ، لباسو الداخلي مكشوح عليهو شاي بي لبن ومعلق في الحمام من يناير لي نص مارس
ما عندو حل غير انو صاحبي يشيلو بي " عود " ومع باقي بصل الحلة إلى كيس الزبالة .
ولولا الحياء كان جبت صديقي " البوردابي " شهود |
نحنا ناس الدوحة ما فهمونا كده
الناس دي تحت تحت متهمينك انت زااااتك بالكوكبة
بعدين من صورتك الجنباوية دي الكلام ده ميك سينس
نوع الكوكب البتاوق اول حاجة يشوف كان في زول ( سغيل)
وده الأستكشاف الكوكبي
غير الصورة عشان نعرف ندافع عنك
ملحوظة
اللباس كان مكشوح فيه لبن و قهوة ما في مشكلة
لكن الخوف من الويكي ، القهوة البشربوها باللباس دي وين؟؟؟
تحياتي يا صديقي و في انتظار دفاعك المستميت ضد الأشاعات
الملك
ده ود الصايم القال الكلام ده.
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Tagelsir Elmelik)
|
| Quote: الناس دي تحت تحت متهمينك انت زااااتك بالكوكبة |
تهمة لا ( أضن) بها على العزيزين أبداً .
ناس الدوحة ديل جيران بس يا ملكـ ، نحن ناس صحاري نجد ، شيتنا شيرنغ في حوش تمبس ، وصدقني ود الصايم آخر مرة ما دفع .
على حس الصورة يا ملكـ ، ياخي في زول قدر ده ، عمرو خمسة وستين سنة اسمو عمران
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: عمران حسن صالح)
|
يا عمران
| Quote: وصدقني ود الصايم آخر مرة ما دفع |
ده أهم جزء في الرواية هههههه
البدلة دي لفحا من وين؟؟؟؟؟
| Quote: ياخي في زول قدر ده ، عمرو خمسة وستين سنة اسمو عمران |
و الله ده اخطر سؤال في الدنيا
الدفعة ديك كانوا واقفين في ( سورة طه) انتو حصلتو ( آل عمران) دي كيف؟؟
نحنا دفعتنا ( فيصل) و انت طالع و كمان ازهري و محمد نجيب، عمي (تاج السر) رحمه الله، نسى عمتو في بيتنا يوم ولدوني
سموني عليه، قفزوا بى عشرين سنة لورا، فخلي روحك رياضية، و أجمل ما في اسمك انو ( بني كجة) ما اكتشفوهو
كان لحقو ( هيسم).
أها بعد تمبس يجيب اولادو الشيرينغ تاني الا مع البدو
كبسة سااااكت
تحياتي و مودتي العامرة
تاج السر
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Ammir Mohamed)
|
| Quote: إذا كانت حياة العزوبية دي منطقة خضراء فأنت واهم يا صديقي! مالك ومال البشكير المصوفن والقميص المعلق في باب الشارع.. بالمناسبة انت بتعرف إنو في ريحة اسمها ريحة العزابة!! وبي ريحة ما قاصد عطر أنا.. ريحة مميزة كدة لمن تدخل بيت عزابة... تعرف والله نحن كنا عزابة هنا في الإمارات في بناية مسمينها غوانتنامو المعروف إنو الغرفة بتكون ليك ومعاك اتنين ، بتدخل بالليل تنوم عادي، تصحى الصباح تلقى في خمسة كواكب مرميين في الأرض من وين جو الله أعلم .. تطلع تمشي الشغل وتجي تلقى البيت خلى.. الحمام ده عشان تدخلو إلا تكون قايم سدّاري ... كوكب طالع وكوكب داخل!! مالك علينا ياخي!! |
Ammir Mohamed
ههههههههه
العزابة تعبوك تعب شديد ، قالوا الكواكب احتفلوا بالقمر
ريحة العزابة النحنا سمعنا بيها اسمها ( برووت) ولا القاصدا انت نوع تاني
أنا شخصيا غايتو ما بقدر انوم في أوضة فيها تلاتين محارب، ريحة شرابات
ساى بتوديك ( الحوادس).
على هامش السيرة و كده
واحد من أهلنا الشوايقة روميت، و بعدين ما كان مفيد في أى حاجة في الشقة
أقترحوا عليه الجماعة( طالما انك لا بتعرف تطبخ لا تكنس لا تودي لا تجيب
امشي اشترى القروسري)، اول طلعة ليه لشاء القوسري، جاب ليهم عشرين كيس شعيرية!!!!!
هذه قصة محققة و مثبتة في أضابير البني كجة.
تحياتي و الى أن نلتقي
الملك
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Tagelsir Elmelik)
|
Quote: ( طالما انك لا بتعرف تطبخ لا تكنس لا تودي لا تجيب
امشي اشترى القروسري)، اول طلعة ليه لشاء القوسري، جاب ليهم عشرين كيس شعيرية!!!!! |
هههههه تعرف في واحد فيكم بكون قال ليه قروسري دي يعني شعيرية بالعربي!!
ياخي يا التاج بروت شنو ياخي!! بروت ده عطر أخوي زاعطني بيه في السودان!! أي زول جاي ..رسل لي بروت!! غايتو الأيام دي اترقى شوية بقى يقول جيفانتشي! ريحة العزابة دي يا التاج لمن تدخل البيت تلقاهو معبوق برائحة مزيج من ريحة عرق الشرابات والقمصان المخشبة ووالشورتات بتاعت الفرانة!! أول حاجة بتبدأ تعطّس .. بعديها بتزنقّ بول.. تمشي الحمام تلقاهو طيارة!! تجي عشان تقعد تلقى واحد قعد مكانك!! المهم أقل حاجة بتطلع بيها حساسية مزمنة!!
على قولة الشوايقة أهلك قالو في شايقي مشى السعودية كرت كرتونة ودخل البيت لقاهو عمك كبير كدة قال ليهو يا ولدي تعال نوريك الحاجات الفي البيت عشان تاخد راحتك وما تحتاج لي زول.. وبدا يعرفوا بالمقيمين في السكن ..ده فلان وده فلان .. والتلاجة بشغلوها من هنا والمكيف بشتغل كدة .. المهم لمن انتهى .. الكوكب جاي مسخن للشغل ومصاريف البيت والالتزامات فسأل عمك قال لي كدي أول حاجة قول لي في ديل من الشغال وشغال وين؟؟ عمك ضحك وقال ليه يا ولدي في البيت ده غير المكيف ده ما حاجة شغالة!!
لك التحية وأرجو المواصلة في امتاعنا بسردك الجميل
تحياتي
أمير
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: abedalhamied mamoun)
|
كتاااااااااااب والله............جننت الروم مايد زاتو
بس نسيت روميتات الحريق ولا خايف من بويتات الطريق......طيب ناس الويست كيف
احسن حاجه تعمل ياقلبى يا مكتول كمد..........تفع اجار كلو......وبراى براى يا يمه انا نوم عينى يوم قله.......وتسكن برااااااك يا اوباما
===
تاج السر الملك .........تحياتى ياخ
تحيه ملازم صفوفى.... للواء اركان حرب
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: محمد زكريا)
|
سلام يا تاج السر
يا خي دي كتابه طاعمه لامن غلط والناس المرو بتجربه الروميت في تلك البلاد التي يموت من البرد حيتانها بيحسو بكثافه الكتابه دي حتي يكاد يقطعوها بسكين تماما كبشكير صاحبك الخبطت عليهو.
اذكر في مطلع عام 97 كنا نسكن سته روميت ( لكن في شقه مكونه من سته غرف) بالاضافه الي اثنين او ثلاثه لم يرتقو لمرحله الروميت وكانت الشقه مركز تجمع للعذابه وغير العذابه من ساكني كولمبس اوهاويو. وكعاده السودانيين مافي مواعيد زياره فاصبحت العربات تبركن وتتحرك والناس تدخل وتمرق من الشقه طوال الاربع وعشرين ساعه مما شكك البوليس الاوهايوي بان تلك الشقه مركز مرموق لترويج المخدرات فوضعنا تحت المراقبه. المشكله ان كل سكان الشقه كانو طلبه درسات عليا في جامعه اوهايو وك>لك الزوار بل ان بعض الزوار بروفسيرات في نفس الجامعه. الكلام ده دخل البوليس في حيص بيص. لانو شكل حركه الدخول والخروج بتوحي ليهم بانو المكان ده وكر مخدرات او علي علي الاقل "There is something fishy going on" لكن نوعيه الناس البيدخلو ويمرقو لايمكن ان يكونو بتاعيين مخدرات. ولمن حار دليلهم اتوكل واحد منهم علي الله وطرق باب الشقه وسالني مباشره ياخوي انتو ساكنيين كم في الشقه دي و الناس البيدخلو ويمرقو ديل منو؟ ادخلت البولي جوه الشقه وكلمتو عن الهيستري بتاع العدات والتقاليد السودانيه في الزياارات فخرج الرجل مستغربا وهو يردد " Damn, you guys have no privacy at all"
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Tagelsir Elmelik)
|
| Quote: معظم الزيجات في السودان، يتم نتيجة لاقتراح و موافقة على الاقتراح، و ( الروميتاب) إضافة إلى ذلك يقعون في خطأ تغليب العواطف على المصالح المشتركة، فأن مشاعرهم دائماًً ما تكون ( على الهبشة)، حتى و لو ( مر نسيمك على الف ميل). |
| Quote: يشتمون فيك رائحة الوطن، يتنسمون أخباره الطازجة من بين شفاه لم يجف طعم الويكة و العنكوليب عنها، |
واشتهيت معاك السمك الصير في السوكي (لا ادري ان كان هذا ضد حمايه الحياه البحريه)
تاج السر لكـ كل الاعجاب فان تكتب باسلوب يجعلني احب الجاني والمجني عليه ومكان الجريمه
شكرا واصل دائما ففي ماتكتب لنا سلوى
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: محمد علي شقدي)
|
أخي العزيز
محمد على شقدي
( ناس شقدي من جزيرة الفيل)؟؟؟؟
كان كده اشتهينا الموز
| Quote: واشتهيت معاك السمك الصير في السوكي (لا ادري ان كان هذا ضد حمايه الحياه البحريه) |
في السودان اصغر منك دوسو، الصير بين و بينك مقرشة، و مفيد لصحة الأنسان
السمك يعيش و يلد غيرو.
فصل الأشتهاء لا ينتهي، نتمني لكل الناس عودا ميموناً للبلاد تحت ظروف افضل
و عدل اجتماعي شامل.
الملك
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: Galaleldin Abdalla)
|
مرة جا سكن معاى "روميت" (و جوليو) حبشى يافع ... أول من جا ... دلير يفهّمنا انو نضيف ومنظم ونشيط .... يازووووول ... طلّع العفش والكنب بتاعنا ختاو فى الشمش تلاتة يوم عشان "المرقوت" .... وفكفك البلاط وداهو المكوجى ... وصنفر شاشة التلفزيون بى "حجر نار" ... وعمل حاجات صعبة خالس من اول اسبوع ...
معانا واحد زغاوى بتكّل فى الكرسى الجنبى ... قال لى: "يا زوووول ... زول دا جاى مسخّن .. والله الازيم يا تبارك تدقس، إلاّ كان يبرّدك زول دا" ...
... المهم ....
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: تبارك شيخ الدين جبريل)
|
استاذنا تاج السر
سلامات وعوافي
ياخي شكرا شديد,علي النقل الجميل,السرد الممتع كعادتك.
بعرف لي زول ليه طاااشر سنة كدة
وماسك في (رومبيت) ومُصر عليها(روم) (بيت)
ولله في خلقه شؤن.
روم- بالانجليزي وبيت- بالسوداني
_اما النظافة وتعليق (الاندر وير) و(البشكير),فده عالم تاني ياخي..
بودينا الخور,لو كتبناه هنا..
لووووووووول
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: هواري نمر)
|
تلقيت هذا الصباح هذا الأيميل في فيس بوك
وددت أن أشرككم فيه
Quote:
سلامات استاذ تاج
لظروف صحية لزمت فراش المرض مدة الاربعة ايام الفاتت واثناء تقليب النت للتخلص من الملل قلت ارجع لبوستك المعلقو بكري فووووووووق والرومتاب ومن هناك توجهت لمكتبتك... اقول ليك شنو ولا اوصف ليك كيف ... دة ابداع ما بعدو ابداع..غايتو اقرب شي اوصف بيهو اني ما قادرة انزل السلم لي 4 يوم ومحبوسة فوق بعد كم موضوع من المكتبة نزلت السلم في امانة الله وعملت كباية شاي بمزاج وتاني كمان طلعت السلم... هي كتابتك دي كتابة فقرا يازول ولا شنو
عموما انا مؤمنة ان الحالة النفسية ليها علاقة كبيرة بالحالة العضوية وكتابتك دي مش تبري العيان وشكلها كمان تطب المجنون
عموما خلاصة الرسالة دي بس كل القصد منها اقول ليك
جميلة
شــــــــــكــــــــــــــــــر |
| |
|
|
|
|
|
|
|
|
|
Re: اسايلابي ، لوترابي، مزارعي. الروميتاب (Re: تبارك شيخ الدين جبريل)
|
تبارك شيخ الدين
قلت شنو..... حسن النعول اشترى القندول؟؟؟
ياخي انا كنت متوقع مداخلة من واقع روميتي شهدتك في اتونه، ترتدي ثوب عزوف الخ اخر القصيدة
تمشي تشبكا لى فى الحبشي المسكين ؟؟؟
عينك في الفيل و صاحب الفيل
spill the beans
مافي زول شايفك
أها قول
| Quote: والله الازيم يا تبارك تدقس، إلاّ كان يبرّدك زول دا" ... |
اكتر من كده كيف
المهم
| |
|
|
|
|
|
|
|
|
 Re: اسايلابي ، لوترابي، مزارعي. الروميتاب (Re: Tagelsir Elmelik)
|
Quote: سلامات استاذ تاج
لظروف صحية لزمت فراش المرض مدة الاربعة ايام الفاتت واثناء تقليب النت للتخلص من الملل قلت ارجع لبوستك المعلقو بكري فووووووووق والرومتاب ومن هناك توجهت لمكتبتك... اقول ليك شنو ولا اوصف ليك كيف ... دة ابداع ما بعدو ابداع..غايتو اقرب شي اوصف بيهو اني ما قادرة انزل السلم لي 4 يوم ومحبوسة فوق بعد كم موضوع من المكتبة نزلت السلم في امانة الله وعملت كباية شاي بمزاج وتاني كمان طلعت السلم... هي كتابتك دي كتابة فقرا يازول ولا شنو
عموما انا مؤمنة ان الحالة النفسية ليها علاقة كبيرة بالحالة العضوية وكتابتك دي مش تبري العيان وشكلها كمان تطب المجنون
عموما خلاصة الرسالة دي بس كل القصد منها اقول ليك
جميلة
شــــــــــكــــــــــــــــــر |
حمدلة على سلامتك يا جميلة
ما قلتي الا الحق...انا ليا نص ساعة بضحك في البشكير البيقول مين في الباب :))))
........
سائلين منك و الله يا تي جاي
| |
|
|
|
|
|
|
| |
Tagelsir Elmelik
خضر حسين خليل
حافظ حسن ابراهيم
Ahmed musa
مرتضى احمد عبد القادر
حسن حماد محمد
سامى عتبانى
جعفر محي الدين
Sayed Bekab
الطيب رحمه قريمان
Mohamed Yassin Khalifa
الصادق صديق سلمان
حسين نوباتيا
تيسير عووضة
محمد عبد الماجد الصايم
Hisham Amin
حبيب نورة
محمد النيل
عمر التوم
Yasier Elsayed
doma
خالد العبيد
فيصل عباس
عمر احساس
عمران حسن صالح
محمد زكريا
Omar Bob
محمد علي شقدي
تبارك شيخ الدين جبريل
هواري نمر
mamkouna
فيس بوك
تويتر
انستقرام
يوتيوب
بنتيريست