|
|
|
 Re: قــولوا معـــاي كــلـكم لكــل ســت حبايــب يـاربي خليكي يا امي (Re: Muna Khugali)
|
أخي وصديقي صلاح واسبة
يكفي أن الجنة تحت أقدامهن وكل يوم تشرق شمسه هو عيد للأم .. نبع الحنان والتضحية .. والحب النقي .. نسأل الله تبارك وتعالى أن يديم علهن نعمة الصحة وتاج العافية وأن يرزقنا البر بهن ..
إهداء إلى الأم الرؤوم الحاجة سعيدة وأمي العزيزة الحاجة رضا
شوفي الزمن يايُمه ساقني بعيد خلاص
دردني واتغربت واتبهدلت ورِّيني الخلاص
ساقني القدر منِّك بعيد .. لأذايا كاس .. جرعني كاس
يايمة يافيض الحنان الماكمل
يايمة يابدري البشع دايما يهِل
يايمه يانور الصباح وكتين يطل
واشري يازينوبة
ولدك في دروب الشوق كتل
محروم من الحب والمحنة وراك همِل
يايمه يابحر الموَّدة وكت يفيض
يايمه ياشعلة أمل زادت وميض
يايمه ياعنقود كلام منظوم قريض
يايمه يانغما حنين بالشوق يرن
وافكاري فيهو .. بيرتعن
دمعاتي شانو .. بينزلن
واتذكرك يايمه ..
في الدغش النسايمو يهبهبن
قايمي الصباح متكفلتي وشايلي الحليلي على المراح
والساعة ديك يادوبو ديكنا بدا الصياح
والطير صغارو يغردن .. جبتي اللبن بي إنشراح
واتذكرك يايمه في ساعة الهجير
صالاكي نار الدوكي عُستيلنا الفطير
رشّيتي قلتي أُكلوه .. خير
واتذكرك يابسمة الطفل الغرير
وكت الخلوق ترقد تنوم
واسهر براي أرعى النجوم
والشوق يرف جنحيهو
بي فوق لي .... يحوم
واهتف بإسمك في الخيال
طيفك كمان بي فوقي جال
واتمنى لو لحظات .. يدوم
لكني فجأة القاهو .. زال
واتذكرك يايمه ..
والناس قالوا قايمين البلد
رصُّو الهديمات .. عدلوا
ركبوات اللواري .. وقبَّلوا
خلوني وحدي بلا أنيس
كيف انفرادي .. اتحملوا ؟
شالوا السلام من عندي ليك
وإن شا الله عندِك .. يوصلوا
يايمة ساعة يوصلوا ..
ويقولوا ليك ..
شفناهُ في بلد الأمان
مبسوط ورايق في أمان
انسطي يانبع الحنان
وأنا حالي يشهدبو الزمان
يايمه رسلي لي عفوك ..
ينجيني من جوووور الزمان
| |
 
|
|
|
|
|
| |
Salah Waspa
Raja
محمد المختار الزيادى
bayan
هاشم أحمد خلف الله
Muna Khugali
فيس بوك
تويتر
انستقرام
يوتيوب
بنتيريست