الأسلحة الكيميائية وحقيقة استخدامها في السودان في منتدى ميديكس للحوار
|
|
 شاي الصباح ,صينية الغداء وترابط الاسرة...هل في علاقة؟؟؟؟!!!
|
الجميع ملتفون حول المنقد القديم
الجمر وبوخ الكفتيرة
وصوت الام تنادي صحوا اخوكم...النائم دة
ويابت جيبي المصفاة من جوه
وصوت آخر ياخي الزول ح يأخرنا
اصلو ست اللقيمات دي في سقط..لقط؟!!
يجلس الجميع يتدفون وقد تقاسموا نصيبهم من"الثروة" الزلابية
في انتظار احلي شاي
والام تنادي الاخ الاكبر وهو يهم بالخروج متزمرا ..يا امي البص بفوتني
متيمنة مابتمرق علي لحم بطنك ..الدرس دة بتفهمو كيفن؟ كان ماشربت الشاي؟
رضاي بوصلك..وخاتري بيغطيك
يجلس وينال اول كباية
ثم يبدا التوزيع حسب الاقدمية
وهنا تبدا مداولات المجلس ...حيث يحضر حتي اللذين علي اعتاب المدرسة وهم احرص الناس علي الحضور
يحضر جميع الاعضاء ماعدأ الرئيس "الاب"..للمشغوليات
يستمر المجلس في انعقاد ..وحديث علني واكثره جانبي
والكثير من الهمس
يبدأ الانفضاض متلازماً ...مع الدعاء من الام الي تسمع باقية وانت خارج الدار
هكذا والصورة يومية
وعادية
هكذا قام الكبار
ونشأ الصغار
وعرف الصغير ان هناك كبير..واحترم
والكبير رعي الصغير وحمي
وعرفت البنت الولد..واطمأنت
وعرف الولد الاخت ..فراعي ورعي
هذة المتوالية ...تتوالي ..تتوالي
......
بعدين نجيء للغداء
|
|
 
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
الغداء والصينية الموعودة
يبدأ التوافد الي المنزل بنظرية آخر الخارجيين اول الداخليين
وهو صاحب الحظ الاوفر من غنائم الفطور
ودائما مايكون الاصغر وصاحب حظوة...
تدب الحياة في اروقة الحوش
الراديو اشتغل
والكبكابات طلعوا كتبهم لحل الواجبات بدري بدري
والبنات ..استلموا الراية.. في الخدمة
وهناك من وضع اغراضة وجري للشارع وصوت امه خلفه منادية
حركة ...حركة دخول ومرووق ...وجوطه معتادة يومية
وصوت الام يتوعد ...هسة ..ابوكم بيجئ...روقووا ساكت
البطون تبدأ في الهيجان و السؤال يكتر..بمة يمكن ابوي ماجاي اليوم؟؟
يا ولد كان ماجاي كان قال...انت الزلعة ليك شنو؟شيل ال..قرضها
الكل في انتظار وترقب..
.....
يبدأ دخول ناس البيلي وام الحفر والدقل بالكره ...مهروليين متصايحيين
ابوي ..هوي ..ابوي جاء
هدوء مابعد العاصفة ...يلف المكان
الكل يراقب..هيئة القادم المنتظر
غاضب,هادي....واهم شيء الحوافز المحمولة كيساًاو كتفاٍ
علي ذلك تكون جلسة البرلمان الثانية لذلك اليوم
يتحلق الجميع هذه المرة بوجود الرئيس وحضور جوهري لرئيس الوزراء
الذي برفع التقارير حسب الحالات واهمياتها..وفي اكثر الاحيان مدافعاً
سريعا ماينتظم المكان..ويهداء الجوء ويصفوء
ويدخل المنتظر ومعه تدخل البهجة نفوس الصغار مرحبيين مهلليين
متدافعيين
ويظهر صوت الاب ..ذلك الصوت ...المألوف ..المعروف..المحبوب
الاولاد ...جو كلهم.. نخت الغداء ؟ الام سائلة
قبل الاجابة
يلا ياولاد .. جهزوا الموية ...ياولد جيب الابريق لابوك ...يابت ..انت سوي كدة ..ويابت انتي...
لحظات وينتظم وتنتظم ..أجمل اسرة ..في مشهد نادر مايحدث الآن....
--------------------------------------------
لكم ان تضيفوا أحبتي....فكلنا من تلك.
ويظل السؤال مشـــروع.... هل شاي الصباح وصينية الغداء لهم دور في ترابط الاسرة؟؟!!
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
كدي النبدا معاك من الصياح ونشرة سته ونصف تقرا فوق راسك مخصوووص!
صوت الراديو عال والحركة والشمس..
تقوم وتنزل رجليك للسفنجة يالقيتها يامالقيتها..واحتمال تلقي فردة والتانية كانت بتلعب بيها الكديسة ودخلت بيها تحت أي سرير تاني..
الجماعة يكوركو...الوقت اتأخر يللا علي الحمام..تمشي علي دولابك تشيل بشكيرك وتمشي علي
الحمام..تصل بالعافية عين مفتحة وعين مغمضة..
الباب مقفول..تسأل
في زول?
يرد غليك صوت من جوه..
ايوه
نفوم نسأل يثقاله..
منو؟
طبعا الناس مقسمة ومعروفة..البيطلعوا من الحمام بدري والبيسكنوا فيه!
الكويس اننا من بليل حاجتنا مجهزنها..ملابسنا وشنطنا واحذيتنا
نلبس ونجي علي الصينية..أغلبنا مابيشرب شاي..هم يشربوا شايهم واحنا نشرب العصير..
وناكل الموجود منين ولا لقيمات ولا اي حاجه..
ومن نفس الصينية نشيل مصاريفنا...وبين ده وده يكون المذيع جاب ليه خبر موت..
ونسمع الهجمه والاستغفار , نطلع نركب بص المدرسة ولا العربية..
وبجيك للظهر لو عايزني اجي..
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
الاخت مني .. مرورك بالتاكيد اضافة للبوست
مشكوره عليه وانت السباقة في البوستات التوثيقيه
فعلاً شاي الصباح ..قبله احداث ماخلف الكواليس
وهي كثيرة ..ولذيذة في تفاصيلها.. نريد المزيد من الاضافة
خصوصاً ..تصحي الصباح ... وتلقي بعض الاشياء ناقصة او اختفت كما في حالة السفنجة
وهناك..فرشاة التسريحة,الشنطة زاتها مرات ,الكبك,او الشّدة,كراس الحساب, والكثير....وهاك يا فتيش واتهامات جزافية.
ماتنسي كمان في حكاية الراديو ..نفحات الصباح والراحلة المقيمة ليلي المغربي
نحن في انتظارك علي الغدا ...ما تتأخري
لكن السؤال مازال باقي ؟؟
معتصم العربي
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
العلاقة أقتصادية بحته لية؟
في ذاك الزمن الجميل زمن كفتيرة الشاي
وسندوتش الفطور وصينية الغداء مدوره
زول واحد رب الأسرة والزمن كان زين والقفه
أم أضنين ما بيشيلوها نفرين !الآن الحال أختلف
البيت كلو مدور وناس بترجع وناس تاني لع
وده كلو عشان القفه أم أضنين وتقولي علاقه
هس الشاي تشربوا تحت شجرة مع ست شاي في المصلحه
أو في الصناعية أو في المكتب ودائما بيكون ملح
الله يعيد آيام زمان وعلايق زمان في الترابط والموده
ولمة الحبان والجيران وعصرية الكوره ومغربية النادي
وووو والأجيال الحالية ده يمكن ما بيعرفوا الكفتيرا
ولا الزلابية ولا حتي صينية ديل ناس مأكولات سريعه
وصفرة وكده الله يخليق يانسمة من الزمن الجميل وبرجع ليك
في شاي مغرب تحت نيماتكم الظليلات ديك وكباية شاي بس ببسكويت
كرم أبو قرش ولا تعريفه وما تنسي تتطلع الكراسي من بدري
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
يا سلام يا أخوانا والله الواحد رجع لى أيام جميلة بشكل ما معقول، وعملاً بنصيحتك يا أخونا معتصم نرجع للزمن السمح ونسرد:
نحن طبعاً ناس أقاليم يومنا يبدأ باكراً مع قيام الوالدين لصلاة الفجر (نشعر بحركتهما) وأبوى دائماً يتعمد أن يصحينا بطريقة غير مباشرة (يستغفر بصوت مسموع ثم الوضوء وما يصاحبه من دعاء ثم يسحب الباب وهو خارج للمسجد) (ونحن مطنشين) فى هذه الأثناء تكون الوالدة أكملت وضوءها وشرعت فى الصلاة ونحن قد دخلنا فى جولة جديدة من النوم الخفيف .
يعود الوالد ونصحى على صوته متلازماً مع إلقاء عكازه على الأرض فتكون -دى الإشارة الحمراء - لنجد الوالدة وقد أوقدت النار وصوت موسيقى الإفتتاح للإذاعة – عازة فى هواك – متناغماً مع صوت البهيمات وكل الطيور الأليفة والبرية. وبعد أن (نتشطف) (لا فى بشاكير ولا غيره يا أستاذة منى) نتحلق حول الكانون لنتدفأ. ونحن نرمق اللبن وهو على النار (يمه اللبن طمح ) فتنزله الوالدة مع تطلع منا للظفر (بالجٌمادة) وحلة اللبن ذاتها برنامج لحاله تدور بيننا المعارك لأجلها حيث تقوم الوالدة بفض النزاع (إت شلتها أمس) - الليلة حقت عائدة – وهى ممسكة بالحلة بيدها الشمال وتقوم بنثر قليل من السكر بيدها اليمنى لتسلمها لعائدة بينما أنا زعلان ودائر أطرشق لكن مافى مجال للجور والتعدى. (بالمناسبة لم أذق طعم يعادل نكهة (جُمادة اللبن) وما علق بالحلة مع السكر – لا فى القشطة ولا فى اللبنة ولا غيره –
ويتناول كل منا كبايته والمحظوظ هو الذى تسمح له الوالدة بأن يستخدم (القُبرة) – برطمان المربى – فسعته بالتأكيد أكبر من الكباية العادية واللقيمات حسب الحالة المادية يعنى يوم فى وكم يوم مافى.
أما الترابط الأسرى فأساسه شاى الصباح حيث يعتبر شاى الصباح بمثابة دفتر التوقيع أو كرت الدوام أو أى مصطلح آخر، والغائب (مالو نائم لى هسع؟ قطع شك عيان).
وحتماً سنعود، بعدين وكت الغداء كان بقينا طيبين باذن الله.
| |
|
|
|
|
|
|
|
|
 Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
والله كأني شامة ريحة الشاي المقنن - اجمل ايام واجمل جلسات في الصباح الباكر في الحوش وكفتيرة الشاي في النص وشراب الشاي مع الونسة وده عايز لقيمات والتاني ما بريدها عايز رغيف ساي وأبوي خاتي الرادي جنبه يسمع في الاخبار وأمي تسأل فينا بالدور أجيب ليكم شنو لملاح الغدا الليلة ؟ وكل زول يدي اقتراح والظريفة انها في النهاية بتجيب بي رايها هي بس أو حسب الموجود في السوق .
والجمادة دي قصتها قصة معانا لأننا ساكنين جنب السوق والمطاعم المغربية بيعملوا الشاي بالقيزان الكبير والتحلية لتاني يوم يعني جمادة بكميات تجارية وكنا نشيل مواعينا ونمشي نشتري جمادة منهم ونجي نكب فيها السكر ونتلذذ بأكلها وهي فعلا يا ابو عبيدة احلى من القشطة ومن أي شيء تاني .
أما الغدا فهو الاجتماع الكبير فعلا وكل زول حريص على الحضور عندنا بسبب انه امي شغالة بالمثل البيقول ( الغايب حقه في كرعيه) يعني البيفوت صينية الغدا بيجي يلقى البواقي بس أو يعمل بنفسه غداه .
ايام حلوة وجميلة يا ريت نعيشا تاني ونرجع ليها بعد ما شاي الغربة البيلخبطوه في الكباية ده ضيع طعم الشاي من ذاكرتنا
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: Nasruddin Al Basheer)
|
Quote: أما في بلاد الغربة (قاتل الله الغربة)، فقد تعودنا فيها أن
نأكل راس ونشرب راس ، كأننا بنلعب ضمنة..
لا شاي صباح ولا لمة غداء.. حتى شاي الصباح في يوم الجمعة
نشربو بعد صلاة الجمعة (يعني قضاء)
والغداء عندنا بقى مع المغرب وبرضو قضاء.. |
عزيزي نصرالدين
عارفك حَنين ...ورهيف..ومّعزة الوالدة عندك
كذلك اخوانك...في دمك ..وفي الغربه كمان
حاشا لله لم اقصد ان اقلب المواجع...ولكن وقفه مع النفس
واردت حقيقية من طرح هذا البوست , ان يلتقي كل من عاش ذلك الزمن السمح
ويدلي كلٍ منا بدلوهَ ,بزكرياته , وهي حتماً موجوده في دواخلنا ونحّن اليها.
كما اردت وهذا بيت القصيد ,اردت ان نربط كل ذلك بألاسرة ونقارن حالها أمس واليوم.
الغربة ..الغربة
أُخد ليك صّنه ...وتأمل الكلمة...المعني
لن تجد والله لابداية ولا نهاية ..بل تتوه ...في عالم غريب
اشوفك علي الغداء...بس الدور ده مارأس...الحكاية فيها لّمه وبيتحليتها كمان
ما تنسي جيب معاك ...جوطات
تسلم
العربي معتصم
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: شادية الطيب)
|
| Quote: والله كأني شامة ريحة الشاي المقنن |
ليت الخيال يبقي واقع ياأخت شادية
وياليت نقدر نقنن اللبن المامعروف اصلوا من فصلوا
وياليت نلقي ...ونلقي لمّة زمان...ولو مرة في الشهر ...مش كده وبس يارييييت نشوفها في اجيال اليوم ....بحلم مش كده؟؟
مشكوره علي الاضافة ونشوفك علي الغداء...ما تتأخري ...وتزكري نصيحة الوالده
الاخ ابوعبيدة جايب معاهو التحلية
تسلمي
العربي معتصم
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
,,,,,,,,,,,,,
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
معتصم رائحه من كانونكم الوسط الحوش والهبابه الرهيفه
ديك وشية الجمر الفائحه وسط المربع وكلب ناس الصيني
تحت الميزره لاقيلوا نقاط بارد والعيش المحمص بتاع فرن
11 وعبدالعزيز يتلقاك ببسمه الظريفه ديك واللحمه الضان
النضيفه دي بتاعت صلاح قناوي ولا فتاح أكيد من سوق العشرة
وكمان لو معاه كمونية وأم فتفت شطته وبصلته بدكوه من الحاجه
الفي ناصية السوق وانت خارج من دكان عمك الخير محمد طه أشتريت
ليك دمور وأخته ليك قعده مع محمد الترزي وأخد ليك المقاس دايره
بعمود وبدون والا أنصارية جناح أم جكو وفي كمان سبعه شنو يازول
ما تنادي شمس ده خلي يجيب الصلطه دي كوام الشية دي لو بردت ما
بتبلع ومونيه والصيني دايرين نطلع ليهم صينه بره تحت الشجره
عشان الماري كمان يدخل يدوا معانه صينية دايمه ياعربي بعد الغدوه
الكاربه دي ما بنقدر نتمرن أحسن أجر لي بنبر وأقعد أتفرج في التمرين
بعد الصلاة في الزاوية وبجيك علي المغربية كده عشان نغشي النادي ونشرب
شيشه عند جمال تلج ونديها عشرة ضمنه مع ناس الباقر أو وست مع ناس أحمد محمد
وكمان لو ختمناه بقيم تنس مطرب كده مع ود الثمينه(ياسر) الحريف ده يكون ما قصرت
بجيك صادي .
أبوقصي
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
خلاص ماما جاره عرفت من بياكل شنو ومابيحب ياكل شنو..يعني طريقة نقه مافي..النقه هاتكون
في الوضع في البلد..الكورة.. وغالبا ماينتهي الوضع بمكاواه هلاليه للمريخ.. والذي يمثل جناحه
(المريخ) الخليفه ذو البال الطويل..طيب الله ثراه..محمـد الهادي بس احمق لما يتغاظ..وغلب المريخ كان بيغيظه شديد..ثم الشهيد وما أجمل ذكراه..ومجدي شقيق أختي الكبيره..وماما جاره كانت بتشعلل الموقف بإظهار دعمها للمريخ المهزوم كثيرا في ذلك الوقت..
والجناح الآخـر يضم معتصم ..عصام زوج منال..مديحة ..ماجـده..أنا..منال وماما عاشة..
ينتهي الغداء ولا ينتهي النقاش ولا تنتهي المكاواه!
الشاي علي الليلة ..لازم أعمله بمزاج مستكة وهبهان..أنا مابحب النعناع ولا الشاي وعلي الرغم من
كده كنت بصر علي الهبهان!
وطقوس الشاي عندي تقابلها طقوس أخري في امتدادالمكاواه التي بدأت مع الغداء..
هنا تنضم ماما عاشه بوبتي لطاقمنا.. وتزداد المكاواه..وتعلو الأصوات أكثر..وتسمع باب الشارع
وقد قفل بعنف فجأة وسط اصواتنا العالية
ده كان محمد ومعاه مصطفي زهجوا شـديد وغلبهم يقعدوا معانا ..
نسمع الخليفة يقول في صوت حاول ان يجعله رقيقا..خوفا من ماما عاشة شريكتنا في حب الهلال ..
ياجماعة خلاص بقي خلونا نشرب الشاي..راسنا وجعنا!
يكثر الذباب...وينضم للزحمه..
إخيييي الشاي في كبايتك يا مديحة اصطاد..
خـدي غيره...أوف..الشاي خلص الا أعمل ليك شاي تاني وبالمرة نولع عود شاف للضبان ده..
يرجع محمـد من بره..نقول بصوت واحـد..
شنو المريخ غلب ولا شنو?
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: Muna Khugali)
|
| Quote: ثم الشهيد وما أجمل ذكراه |
الاخت مني
نحي الشهيد مصطفي ونترحم علي روحه
كان رياضياً مطبوعاً ...عرفناه ..لاعب حريف في فريق الجزائر.
الف رحمة ونور علي روحه ...عوضّ شبابه الجنة ...آميين.
كل مازكرتيه ياخت مني ...جزئية من الزمن السمح
تخيلي وتزكري تلك الجلسة ..وبتلك الروح من الالفة والمودة
اليس هو ذلك الترابط الذي فقدناه
تسلمي
معتصم العربي
| |
|
|
|
|
|
|
|
|
|
Re: شاي الصباح ,صينية الغداء وترابط الاسرة...هل في علاقة؟؟؟؟!!! (Re: معتصم عبدالرحيم)
|
الكلام جميل والسرد رائع
وبلا شك كان ذلك السبب الرئيسى فى الترابط الاجتماعى الذى نشأت عليه الاجيال السابقه
والان مع جيل البيرقر والبيبسى والفاست فودز والمسكول والمسجات بالتاكيد لن نجنى علائق
اجتماعيه وترابط مثل الذى عشناه وتوارثناه من الاباء والجدود ..
لا شك ان هنالك بعض اللفتات التى لا زالت تنثر عطرها فى الساحه , ولكن بعد عقدين ربما
لا نرى اى من هذه المظاهر الطيبه ..
أن عدنا لشاى الصباح وصينية الغداء .. ربما يبقى الامل موجودا على الرغم من الضغوط
الاقتصاديه وغيرها .
| |
|
|
|
|
|
|
| |
معتصم عبدالرحيم
Muna Khugali
مجدي عبدالرحيم فضل
أبوعبيدة محمد الأمين
Nasruddin Al Basheer
طارق جبريل
ناجى أحمد البشير
فيس بوك
تويتر
انستقرام
يوتيوب
بنتيريست