|
|
 بمناسبة تمانية مارس...شَعَرْكَن شعورو كيف؟!
|
عشان بنَْعِزَّكَن وبِنْعِز شَعَرْكَن ذاتو (أسلافنا كانوا يدوبو فوقو ساااااي ليل نهار) وعشان تتفرّغَن للاحتفال بتمانية مارس أدباً وفنّاً وشِعْراً، قُلنا بدل ما نتوِّهْكَن في جخانيناً ماكَن فايقات ليها...نترجم ونلخّص ليكَن، بتصرّف شديد جداً وبدون أي مصاريف، مقال عن رجيم الشَعَر أبو أربعة كُرْعين وكُرْ عاد علي البِنَلْقاها، بعد دا كُلّو، مَنَكّشة:
1. قَدُر ما عينِك تَقَع على البروتينات الغنية بالحديد ما تَرْفَعيها تَبْ. أبقي مَرْفَعين راسو عدييييل وأقعي أي عَضّة تلقيها ابتداءً باللحم العجّالي ولحم الضأن اللي تستاهلو الفي بالي، عرِّجي على البِيَجْرِي وهو فرحانُ (الجِداد) وجَنَاهو (آآآآخ من بيض عيون طااااازج وحااااار في فكّة ريق فجريّة وفنجريّة) ومن البروتينات النباتية صاحبي أبو عديس (لا هوّ صاحبي ولا أنا أعرفو قصدي صاحبيهو...صاحبيهو إنتي دي يا اختي نَعَمِنِّك مجبورة عليهو لكين لو عاوزة تَظْبُطي حَلَّة أبو عديس ظبطة ما أنزل الله بِها من سلطان بِنَدّيك الوصفة (على مسئوليتك): فوّري العدس إلى درجة الذوبان، براااااهو شُفْتي كيف...المِلِح دا ما معاهو، وفي حَلَّة منفصلة حمّري البصلة وأطفيها بطماطم وأكتليهم الاتنين لحّقيهم الرّقدو وطعّمي طعَامِك...بعد داك كُبّي دا فوق دا (يا، كمان، كُبّي دا فوق دا) وألحقي الخليط بقدحة التوم وبقرنين تلاتة حقّين شطة خضراء و على بال ما اللّخو أبو عديس يكون برّد دَمّو شوية وجَبَد نَفَسو من قدحة التوم ونزَّ الشطة الخضراء، يكون اللّخو أبو الوليدات إتبرّد ودخل في عرّاقيهو، وبالهناء والشفاء)، وإن تَنْسِي لا تَنْسِي حبيب الشعب الفول (من كانت مِنْكُنّ زارها في الفول وزايرة الخليج فلتجرّب فول هذا الأخير برغيف أفغاني بِقولولو التميس) ومن كانت منكنّ في قاهرة المُعز أو لديها أكسس لأي قاهرة أخرى من القاهرات التي يخلقها المصريون أينما حلّوا، فلتعقد العزم على الكُشَري (قد تقول قائلة: حرّم الكشري دا ما في المقال بَهَتُّو بيهو سااااي).
2. ما تَعْتِقِي أي حاجة فيها فايتامين سي (يو سي؟!) زي الجوافة مثلاً (المِنّكَن في الخرطوم جناين شمبات والكدرو والجيلي على مرمى أتوس وخط خطين ألاّت بنزين)، والفلفلية (عشان، يا حرام، الما شرّانيّات مِنّكَن وما بياكْلَن الشطّة ما يتضيّمَن)، البرتقال والقريبفروت (هوي آبنات أهل العوض دي حمضيّات بالكوم عندكَن وحكمة الله قالوا بِتْزيل النَّكَد)، الفراولة (رااااقدة علي قفاها وحاضنة نواها هسّع دي في الخرطوم)، البابايا والأناناس (يا ناس)، الليمون (سقايتو، جَزَم، عليّ...بَسْ الفي الخرطوم مِنَّكَن يِسْقَن لَـيْ رَقَبَتِن شربات ليمون في قسم "البزنس" في جامعة الخرطوم لو لسّع محافظين على جودة صناعتو..). قال ليك برضو البروكلي (ما بَعَرْفو لكين بِكون ودّ أعم بروس لي لزم) ودا للبرّة السودان بَسْ مع إنّو ما بعيد علي التلاجات البِقَت تقوم من لبنان لاااا عِنْد أم درمان والخبر جابَنّو الدلاليّات، قالوا التلاجيّات دي كمّلت موزنا ذاتو.
3. بطّلَن زَنْ وركّزَن برضو على مجموعة فايتامين بي ومادّة اسمها الفولي (أظِن اسمها كَدي، أكان مو كَدي...يا أعَفَن لَـيْ يا كمان عفِّنَنّها ساي). فايتامين بي-6 قالوا موجود في حبوب الإفطار (الكورن فليكس) المعمولة من الحبوب الكاملة (غايتو الباكلو أنا الأيام دي، عشان عندي بعيد عنّكَن عكننة المصران، انتاج نستلة فيهو تشكيلة دويريّات دويريّات معمولة من أربعة حبوب كاملة: القمح والأرز والشعير والذرة الشامية...غايتو، لذيذ جِنِس لذاذة يشهّي الزول المصران)، البطاطس (قالوا البيضاء غايتو وبقشرتها)، أبو عديس، الموز (زاد الفلاسفة وزاد شجونهم وجنونهم...حيث أنّه مُثبَتٌ أثره في تغذية الرأس برّة، الشَعَر يعني، وجوّة، المخ يعني، وقيل أيضاً أنّه المذكور في القرآن في قوله تعالي "وطلحٍ منضود" مع إنّو ناس "شَمْلَتِي" راحت قايلِنّو الطّلح شقيق كلٍّ من الشاف والما شاف والنّطُع وابن عم كلٍّ من الحِنّة والدِّلكة وعموم آل الـحُنَان بحفرة الدخّان وما جاورها)، أها، الوصيّة بالمهلة: العجّالي وصدر الجِداد وسمك السالمون البرّي (كان أقرب يقولو البرمائي لكين سيد السمك كان قال أشووهو أمانة ما نحرقو ليهو حريقة). فايتمين بي-12 تَلْقَنّوا في حبوب الإفطار (الكورن فليكس) المعمولة من الحبوب الكاملة، العجّالي، الجِداد وسمك السالمون والأجبان قليلة الدسم (آآآآخ من لُواكة الجبنة المضفّرة، علي الدسم الفيها دا، بين الوجبات...دي كمان بِتْفيدكَن قِدّام أيّام خطر هشاشة العظام). مادة الفولي توجد في حبوب الإفطار (الكورن فليكس) المعمولة من الحبوب الكاملة، العدس، الفول، البسكويت والكوكيز الداخل فيهم الشعير، الجرجير (سمعنا مستجيراً يستجير: أرروووووك...لو عَلِمْنَ ما في الجرجير لزَرَعْنَه تحت السرير، وما عرفناهو بيهو البيهو وألا بيهو شَعَر البِهاتي بيها وتهاتي بيهو)، السبانخ وربّما الملوخية الخضراء وكلوروفيلية (أموووووت أنا في اللغاويس الزي ملاح الورق والسّلِج والملوخية والما لغاويس الزي فطاير السبانخ التركيّة)، وما تَنْسَن غَرامي الأوّل (إذا سُبِّكَت حتى بَكَت): أختنا في اللايوق البامية (وربّما بِتّها الكبيرة الويكة وفي كلٍّ خير وكمان كالسيوم زي حقّ اللبن، تصدّقَن!!!، بَسْ ما تنسَن تغسّلَن إيديكن بي سِنَر أكان أكلتَن ليكَن ملاح ورق وألاّ سَلِج ملايق بي ويكة جديدة...تراني النصيحة ما دسّيتا مِنّكَن).
4. وخلَّن الزِنْكي دايماً في بالكَن (ما زِنْكي الخدار ها...وإن كان الكلام الفوق دا مفروض يخلّيكَن تَزوُرَن زِنْكي الخدار وزنكي اللحمة وزناكي كلّ الأسواق المركزية مثنى وثلاث ورباع) والزِنْكي (المادة) يوجد في: هممممم، العجّالي...العجّالي يا ناس...العجّالي (عليمُن الله غايتو أكان قالوا أقعوا السنكيت وألاّ ما قالوا...لكين ما أظنّهم فكّوا المراقبة للدرجة دي)، والدكوة (صحي يضع سِرّو في أضعف خَلْقو...أي والله دكوة الله والرسول دي، طبعاً لأنّي بموووووت في سلطات الأسود بجميع أنواعها بَنْصَحْكَن بتلك المعمولة بالدكوة)، وبذور القَرَع (اتلوّم لوماً زَرَعو براهو النبّذ قرع ودّ العبّاس رجماً بالغيب...)، والجِداد والحُمُّص (دا طال عُمُرْكَن الكبكبيك...يعني لو كِسِلْتَن تفرُمَن ليكَن كبكبيك طازج لطعمية البيت الحااااارة صباح الجمعة، شُوفَن (شُو فَنْ ما فَنْ!!) أقرب واحد بتاع تُرمُس...تُرمُس كبكيك عشان تَعَطْنَن مصايب شَعَركَن كلّها في جَرْدَلو بَسْ أعملَن حسابكَن ما تَعَطْنَنّها في الجردل الغَلَط يقوم بَدَل ما ينصلح حالو، شَعَرْكَن ها ما الجردل، ينْمَعِط فَدْ مرّة وتقوم ليكَن قرون مَسَاخَة تنطحَنّنا تلحِقنّنا اللِّمْبِي لا نلِم جاي ولا نلِم جاي.
هذا، وسمِّعَنّنا الصلاتو على النبي وأبقَن، أكان ما غلّطنا عليكَن، أدْعَنْلَنا.
أدِس كليمة: جِدّي كان عِندو قُرْحة ودّيناهو لدكتور قال ليهو، ناسياً حُرمة تحريم طيّبات ما أحلّ الله لنا: يا حاج، من يوم الليلة دا جِداد وسمك وجميع المحمّر والمشمّر إحَرَم عليك حُرمة النفس ذاتا...جِدّنا قال ليهو: هَيْ نان آولدي هسّع خلّيت لَـيْ شنو آكلو!! دحين بقول، للما بِلْقوا الكلام المكتوب فوق دا، لا تلوموني ولوموا انفسكم ما انا بمصرخكم وما انتم بمصرخي وما أنا بِشرّير ولا مصدر غواية وضلال لبنات حواء وإنّما أريد الاصلاح ما استطعت ودُمْتَن...ما مَنَكّشات.
|
|
 
|
|
|
|
فيس بوك
تويتر
انستقرام
يوتيوب
بنتيريست