|
|
 ثقالات خالد عزالدين
|
يا جماعة في زول اثقل من الزول الكتب الكلام التحت ده؟؟؟؟؟؟؟؟
بدون حجاب : حمام ميت في ميت عقبة !
اوعه يكون التلتمية مليون دي ساهمتو فيها !! تكونو بالغتو عديل كده .. نحن مش كنا صريحين خالص خالص معاكم وقلنا ليكم الهلال في استادو ما بتغلب .. ياخي انتو ما بتتوبو ؟ عرفناكم في فريقكم البتغلب كل مرة ده ما بتتوبو..
في الهلال الما بتغلب في استادو ده برضو ما بتتوبو ! الدخلكم شنو ؟ عايزين تشوفو الهلال مغلوب ! معقولة بس ! الاهلي ذاتو البغلب الزمالك ما غلبنا .. الاسماعيلي الجبتو بقروشكم واكرمتو ونزلتو في قصر الصداقة برضو ما غلبنا معقولة تنتظرو الزمالك ! انتو ما واعين ولا القطن مسخن بيكم .. هالك مع الزمالك ولا سخن مع القطن !!
الناس ديل تعبوا مع المصريين تعب شديد .. قالو المحلة غلبت الهلال في المحلة اربعة ندخل نشوف المحلة دي بتغلب لينا الناس الما بتغلبو ديل في استادهم الثقيل ده ؟ المحلة ما غلبتنا .. قالو معليش البركة في الدرون اقل حاجة الهلال ما غلب المحلة ! قام كده الاهلي جا وكمان زعلان ما الهلال غلبو في استاد القاهرة .. الجماعة فرحانين الاعمي شايل المكسر .. ماشين وين يا جماعة الخير ؟ ماشين نلقط قطن يعني ؟! ما ماشين نشوف ناس الاهلي ديل بعملو شنو الليلة في الهلال ده ؟ قام الهلال درن ليهم تاني ! والدرون المرة دي معاه فرح الجماعة ما عرفو يطلعو من استاد الهلال قالو نحن ذاتنا غلطانين فريق في بلدو غلبو يفوز يجي يفوز في ام درمان والله الاهلي ده سجمان !! وقام الهلال جاب انبي .. قالو الهلال ده مجنون ولا شنو في نادي بجيب ليهو نادي يغلبو في استادو !! جري جرو استاد الهلال .. ما مشتاقين يشوفو الهلال مغلوب ! انقرو انبي ما اتعادل مع الهلال .. الجماعة قالو الله يكره الهلال ودروناتو !! وجات البطولة العربية .. طبعا بدري بدري بطلعو وبتفرغو لمباريات الهلال كان الله يديهم الفي مرادهم .. ما ساقطين عربي من الله خلقهم .. ياخي ديل مرة مشو البطولة العربية جو بي نقطة سموهم الموز ابو نقطة زعلو .. زعلانين لييه يا جماعة ؟ قالو الموز ابو نقطة الاصفر فيهو ما كتير نحن عايزين الموز السادة عشان الشعار !! والسادة ده بخليكم بدون نقطة !! قالو النقطة الجبناها من الفلسطينيين دي ذاتها نحن متبرعين بيها للانتفاضة !! المهم شافو حرس الحدود مع الزمالك .. فرحوا فرح شديد ما حرس الحدود غلب الزمالك .. قلنا ليهم التوم مغلوب وانتو فرحانين !! قالو ايوه .. ان شاء الله التوم يطير في السماء المهم الفريق الغلب التوم ده مش لاعب معاكم نحن بنشجعوا .. وجو استاد الهلال .. كلهم .. الصغير والشاب وحتي الجدود مش جايين يحرسو الحدود !! يمين شمال وقنبلة من مهند الجماعة راسهم طار .. تطير عيشتنا مع الهلال الما بتغلب ده ..! ايوه جاتنا فكرة في الهلال.. نكلم جمال يعزم لينا الاسماعيلي اصلو اليومين ديل مولع نار .. نلعب معاها في الاول نقول ليهو العب براحة وبعدين نقول ليهو بصراحة العب لينا شديد مع الجماعة !! وقبال نحن ندخل الاستاد دخلو قدامنا .. مساكين مشتهين يشوفوا الهلال مغلوب .. وهجمة هنا وهجمة هنا وكلتشي طلع بي هنا انقروا ما جاب قونين طوالي قاموا ضربو لي جمعة الوكيل .. يا جمعة انت نسيت موضوع كلتشي ده ولا شنو ؟ جمعة قال ليهم وانتو نسيتو موضوع علاء الدين بصمة ده ولا شنو ؟ نحن مش متفقين ترسلوا امين عشان نمشي الفيفا سوي .. جمعة ما (شفت) ما عايز يخسر حق مواصلات عايز الملح بتاع المريخ ده يركب فيهو !! الاسماعيلي راح مع الرايحين والجماعة منتظرين .. ما صبورين .. الصبر نعمة من رب العالمين .. يا خي ديل صبرو سنتين قالو ببنو في فريق .. في السنه التالتة قالو ببنو في المقصورة !! السنة الرابعة قالو بعيدو في بناء جسور الثقة مع جمال بعد استقال !!السنة دي طبعا يبنو في الطابق الثاني. اه ياني .. انتو بتجيبو الاسمنت ده من وين الله لا شكركم !.. طولة بال كده غريبة .. فرحانين بزيارة الزمالك اكتر من الجالية المصرية .. دخلو الاستاد قبال جمهور الهلال يدخل .. ما الليلة الهلال الما اتغلب من 2001 في استادو ده نشوفو مغلوب من الزمالك .. اصلو ده الجوكر بتاعنا .. ما دسوها .. عديل كده قالو بشجعو الزمالك .. مش تومنا وآخر فريق غلب الهلال وبعدين وصل لنصف النهائي العربي معناه ده فريق معجزة .. ما هم عندهم عقدة عربي .. اي زول بعرف اتكلم عربي كويس ساي بشوفوا انسان خارق .. الله حي والزمالك جي .. فتحو استادهم واكرموا الزمالك ولفوا العمة وشالو الشالات وغسلو العربات ومشو استاد الهلال .. من بدري خالص .. ما صبورين .. وتاني جا الهلال غلب الزمالك !! معقولة بس !! ده حمام ميت ساكت .. يا اخوانا ده الزمالك .. ده حمام ميت ساكت .. يا اخوانا ده اكتر فريق عندو بطولات افريقية !! ياخي ده حمام ميت ساكت .. يا اخوانا ده الصفدي .. قوم بلا صفدي بلا وردي .. يا اخوانا ده عبد الحليم علي ! ياخ خلينا بلا عبد الحليم علي بلا قالب جلي !! يا شباب ده حازم امام !! برضو حمام .. ما تقولو حمام ما الكلام بجيب الكلام .. حمام !! حمام !! طيب حمام الزمالك ولا القطن ؟ صاحبنا احتار ما عرف روحو هالك مع الزمالك ولا سخن مع القطن !
كده كويس !! اهو جبت الكلام لي روحك براك .. شابكننا الهلال بغلب الحمام الميت الهلال بغلب الحمام الميت لمن غلب ليكم ميت عقبة ذاتو .. وا حلاتو !! الهلال بغلب الحمام الميت رايكم شنو في فريق ما قادر يغلب القطن الميت .. والله القطن ده تلاتة من النجادين القاعدين محتارين ما لاقين شغل في السوق الشعبي ديل ممكن يغلبو .. ما عايزين واحد ذاتو يتكلم فرنساوي .. اتخليو لو ما ابالو ده كان كابتن وبتكلم فرنسي واتفاهم مع الحكم .. المريخ ده كان اتغلب كم ؟ انت قلت لي اتوفيستر اختار ابالو كابتن عشان بتكلم فرنسي والحكم بتكلم فرنسي ! حلوه دي !! يعني كورة المريخ الجاية مع جوفنيتوس كابتن المريخ حيكون عدنان الطلياني !! بالمناسبة المريخ لو غلب القطن احتمال كبير يقابل انبي المصري رايكم شنو نكلم ليكم حسن المصري يشرف علي الفريق !! والمحيرني انا انو الهلال لعب مع حكام كتيرين بتكملو فرنسي وطلع غالب .. يكون علاء الدين جبرئيل ( الشفت ) ده بتكلم فرنسي
قال حمام ميت قال .. ياخي مدرب القطن ده عمل المؤتمر الصحفي في المؤتمر .. قالو ليهو نمشي النادي يا كوتش .. قال ليهم والله الا نمشي المزرعة ..
الهنري ميشيل قال الزمالك فريق كبير خالص لكنو امام الهلال كان صغير خالص .. شفتو الفرق؟ الزول ده قال نفس كلام ناس المريخ لكن مع اختلاف كبير .. هنري قال اي فريق كبير بكون قدام الهلال صغير .. يعني لو جا فريق نسور ممكن يبقي عصفور تغني لينا يا فرفور .. في الجزيرة بنزرع قطنا نزرع .. ها ها هاي .. اولاد عمنا ديل بفتكرو انو الاندية البتجينا دي نحن بنختارها مع الاتحاد الافريقي وهي اصلا حمام ميت !!
اقول ليكم اقتراح .. الموسم ده قضو نفرات !! وشيلو قروش النفرات دي اشترو بيها تذاكر في المباريات عشان الرقم القياسي ده ..
294 مليون .. نفسي اعرف السرق الستة مليون دي منو ؟
في رقم قياسي تاني .. التلفزيون دفع مية مليونه في شوط !! والله شوية .. حقو تاني الدفع يكون بعد الكورة .. عشان قون مهند ده براهو بي مية مليون .. طبعا في ناس بطلعو مطلوبين لو طبقنا النظام ده !!
كلو ما يجي فريق يلعب مع الهلال يقولو عايزين مباراة ودية .. تومكم ده ما طلبتو معاه مباراة ليييه ؟
كرنقو وعلاء الدين بصمة وقودوين .. ده الاحتياطي ولا الاساسي بس نزل الشوط التاني ساكت !
قال ليك مازدا كترت ما عاجبو الهلال كتب اسم ريكاردو في اللاعبين المختارين ..
والله يا مازدا انت بتلخبط لينا في الاعداد نحن انتهينا من قصة شرق افريقيا دي في الدور التمهيدي ومشينا علي شمال افريقيا خلاص .. تاني ترجعنا نلعب مع تنزانيا ..
الهلال غلب الزمالك والموسم مقلوب ! تكون القلبة جابت الغلبة يا شداد !!
شكوي ..
قالو المريخ اشتكي !! في شنو ؟ مش القطن طلع ما طبي !!!!!
واحد ثقيل تلفونو 0912282448 اسمو فائز قال عندهم فريق في واحده من قري الجزيرة دي وفي فترة اعداد عايزين يلعبو مباراة ودية مع القطن ومتنازلين من دخلها لصالح مشروع الجزيرة ..
0922289033 ده ثقيل تاني قال الاتحاد السوداني اصدر منشور بعدم بيع المياه الغازية في الملاعب مع اضافة حلاوة قطن لملعب المريخ !
0912203452 والله يا خالد كترت ما فرحانين لمن غالبنا ننوم .. عارف غير النوم ما في شيء بغلبنا اليومين دي .. اعمل حسابك ناس الزمالك ديل ما يسمو فريقهم النوم !
0912367927 ياخي ديل في انجمينا ما انجمو عايزين ينجمو ويييين ؟!
0912309552 بالمناسبة في اكتشاف طبي خطير .. فقد تاكد انو الملص مرض معدي وبسرعة كمان .. ياخي رئيس برشلونه ده اتلكم مع رئيس المريخ بالتلفون ساكت .. الحارس فالديز ماسكاه حمة ملص لمن برشلونه ودع الصدارة
|
|
 
|
|
|
|
abdulgafar mohd saeed
فيس بوك
تويتر
انستقرام
يوتيوب
بنتيريست