|
|
 ألوف ودفوف وسيوف
|
فى عام 2004م قام أعيان من قبيلة البطاحين بدعوة العمدة ودبليلو من منطقة حجر العسل وتمت تلبية الدعوة من قبل العمدة وجماعته وقد تعجب العمدة من الكرم الحاتمي الذي حظي به عند زيارته لقبيلة البطاحين واضمرها في نفسه أن يرد الصاع صاعات وليس صاعين . وفعلا قام بدعوة البطاحين لزيارة منطقته وفعلا لبت قبيلة البطاحين الدعوة وكان العجب العجاب. ولقد صور لنا الشاعر "ابو لكيلك" هذا المشهد وجسده ايما تجسيد حيث قال فى وصف المشهد وفى اولئك النفر الذين آزروا العمدة ودبليلو. وقد حكى لى الذين حضروا ذلك المهرجان انه كان مهيبا.
الوف ودفوف وسيوف
بــنقــول باختــصار قولا بلا تطويــــل
العــمل القبيــــح ما بسـمحـــو التجمــيل
كرهــنا السيــاسة عشــان كــلام القيــل
وتصنيف الرجال ما بين قصير وطويل
**
ولاد بطحان أهل عز قديــم وأصــيل
ما فــيهـم مقيطيعـن سهـيـت وبـخيـــل
عزمــوا العمــدة علقو فى رقبتو جميل
والرد بالجميل فى حد ذاتو ببقى جميل
**
ولاد بطحان جونا فى موكب معزة جليل
وقابلتــم الجموع بالـــفرحــة والتهلـيــل
فــوران الحـشــود تقـول تســاب الـنيـــل
ولمعان السيوف مطرا بروقــــو تشـيـــل
**
انفجرت عواطف الناس وطفح الكيل
ودموع الرجال بالفرحة نزلـت سيـــل
قيادة الرجال كـــــرم ضيافـــة أصـــيل
ونفسا طيبة نفس الناس عليها تميــــــل
**
حضـــر المهرجان رجــال مقامها جليل
أمثال ود عويضة الفـــارس العـنتـــيــل
والصادق مريدة عقيد عواتى الخيـــــل
كباس الكمائن فـــــــى ضـلام الليــــــل
**
ناس عبد الرسول النور معاهو عجيل
ود جودة الله حفظـة محـكــم الـتـنزيـل
اصبحو ذكرى فى وجدان شباب النيــل
بى فضل التواصل وحكمة التأصيــــــل
**
الخير الفهيم اسمو المسمى فضيــــل
داعى الوحدة من قادة شباب الجيــل
ود نافع نفع بى علمو شرق النـــــيل
رفعوا قدرنا فوق نجم المجرة سهيل
**
رجـــال الجهاد القاموا فوق الخــيـــل
فرسان الوغى المابخافوا عزرائــيل
اراضى العرب ما خلوا فيها دخيــل
يعجبوك فى الكبسة ام لهيب وصليل
**
كرم العمدة من اسلافو جيل عن جيل
فوق العوجة والدبرة المدمــة بشيـــل
عندو رجالو فى الواجب يقيفوا عديل
وعند ساعة اللزوم ما بكتروا الملميل
**
خليفة على البجــرد السبــحة آخر الليــــل
ود الأزرق الفــى الجــودة نضــــرو قليــل
وكت جاب الرغيف بالشحنة من دون كيل
نازلــة بركـــتو غالبة علــى البخــم ويشــيل
**
عشــــرات الخراف مضبوحة ديل جم ديل
وجــزرات عدة من نــوع أم سنــامـا هيـل
وعشرة من البقر سـالــت دمــومهن سيل
دافرات بالصــــــــوانى لا هوايــد اللــــيل
**
الناس بى حماسهن وفروا التمويـــل
والمال الكتير كان فى بدايتو قليــــل
الحمل التقيل ما فات رجال الشــــيل
ناس اولاد عكود فزار ضهور الخيل
**
حنيٍن داك مجرب اسمو جمل الشيل
يحمل وطية الروزة التهـــد الحـــــيل
حمد بدفع الجـــزرة ويوفــــى الكيـــل
والعطا يحفظو الجاور جبـــل تـوتــيل
**
الفـــتح العميــد السنجــــــك الرجِيـــــل
خيلك عارضــــة يوم الزينة ليها صهيل
الفرسان تقـلــب والعـجاجــة تـكيـــــــل
والبارود تقول لحظة هجوم روميــــــل
**
نور الهدى الجـــــــعلى الكــــريم واصيل
دارك فاتحة ياك عشاى ضــيــوف اللـــيل
من الحقنـــة جاب قدحــــو المـــوقا تقيــــل
لينا معاهو رجعة ان شاء الله عمرو طويل
**
حجر ود سالم البادر بلا تعطيــــــل
شدَ عزمنا ساعة الرخوة والهلهيـــل
وجبتلو التحية وكلمة التفـــــضيـــــل
وشكرا ليهو من ناس الضيافة جزيل
**
سوراب الكفونجة من جزيرة الفيـــــل
قطعوا الفنقة بالدرب المديد وطويـــــل
اب قيدوم جوهو فى غربيتو هجعة ليل
شايلين السدايس الفيها مافى عجيــــــل
**
ود بلال فى عرضو باقـــى رجيـــــل
نفسو عزيزة قاعدة قعدة المـانـجيـــــل
فوق الكرسى زى صقر العزازة نزيل
كم قدم سوالف وكم زرعلو جميــــــــل
**
ناس عبد الحفــيظ خبيــر ســــرايا الخيل
فى بحـــر الزراف والتونج وكبرى أويل
رجـــاع القرنـــتى فى اواخــــــر الليــــل
بعد كاربينو ما هتفولو بالاسبيل (SPLM)
**
يوم بحر الغزال ضاقت مراير الويل
وكاد العيد يكون حمام دموم وعويــل
هدر بالدوشكا جيش كاربينو فلا فليــل
خلاهم جزاز ما بين جريح وقتيــــــــل
**
ديل الوقفو مع العمدة ياهم ديــل
رجال الواجب الماتعلمو التطبيل
وراهم رجال ميزان حسابا تقيـل
ما بقودوها بالسلفية والموديــــل
**
محمد عبد الحفيظ ابو لكيلك
|
|
 
|
|
|
|
|
|
|
|
Re: ألوف ودفوف وسيوف (Re: على احمد النعيم)
|
الوف من الرجال ودفوف دى فيها النحاس والربابه البتخلى الجعلى اتووح
والسيوف دى تشمل السيوف والكلاشات والسوط
الجعلى حبابو الاصيل عقابو
مرحب بيك ودالنعيم نحن اهلنا بستاهلو واتو مننا وفينا
ومى كتيره عليكم زى دى والله حاجه بسيه خالص عليكم
ربنا يديم المحبه بيناتا
اليله ابقرش وين بلدو مو وارد 0
| |
|
|
|
|
|
|
|
|
|
Re: ألوف ودفوف وسيوف (Re: على احمد النعيم)
|
Quote: عشــــرات الخراف مضبوحة ديل جم ديل
وجــزرات عدة من نــوع أم سنــامـا هيـل
وعشرة من البقر سـالــت دمــومهن سيل
دافرات بالصــــــــوانى لا هوايــد اللــــيل
|
بتعشى الضيوف بعد قطعة الحايمة
وكم فوقو من جاره الوسادة ونايمة
من ضرب السيوف حرم درقتك صايمة
وجدك بركب النيل فى الدميرة القايمة
| |
|
|
|
|
|
|
|
|
|
Re: ألوف ودفوف وسيوف (Re: على احمد النعيم)
|
Quote: عشــــرات الخراف مضبوحة ديل جم ديل
وجــزرات عدة من نــوع أم سنــامـا هيـل
وعشرة من البقر سـالــت دمــومهن سيل
دافرات بالصــــــــوانى لا هوايــد اللــــيل
|
الاترونه يعنى قول سويد:
"جفان مشبعات لم تجع"
| |
|
|
|
|
|
|
| |
على احمد النعيم
ناذر محمد الخليفة
خالد المحرب
فيس بوك
تويتر
انستقرام
يوتيوب
بنتيريست