|
|
 قالها: يا أبوي أنت ممل وخارج الشبكة.. (صحي يا عواطف إدريس)
|
صعقت عندما ابتدرني ابني قبل الأخير (معاذ) وأنا أداعب الريموت كنترول بعد عناء يوم عمل طويل وشاق.. قائلا : والله يا أبوي أنت ممل)..
اعتدلت من استرخائي مهجوما مفزوعا.. وسألته: ليه يا معاذ يا ولدي..
فكانت إجابته : إنت يا أبوي غير الجزيرة والببي سي وال سي إن إن ما عندك متعة.. لا بتخلينا نحضر (ستار أكاديمي) ولا العندليب الأسمر ولا أمريكان أيدول(American Idol)..ولا الدوري الأوربي... أنت يا أبوي مأساوي.. كل الأخبار البتشوفا ضرب وقتل.. واختطاف.. أنت يا أبوي إرهابي الهوى..وأنا غير مصدق.. وأتطلع لإبني معاذ ذو الأثيني عشر ربيعا وهو الرابع بين إبنائي وقبل الأخير في الأسرة.. وقد ربيت قبله ثلاثة لا زال اثنان منهم في الدراسة الجامعية.. ولم يجرؤ أحد منهم أن يهدي لي فيما بدا أنها عيوب.. وفي محاولة يائسة قلت ليهو: يا معاذ أيوه أنا بشوف الجزيرة والعربية.. وبرضو مرات بشوف ال.....
هنا قاطعني معاذ وقال: أنت لمن خلاص عايز تغير تجيب لينا سهرة مراسي الشوق..أو دكتور فل (Phil) وبرضو ده برنامج مشاكل.. وحاجات غريبة كده.. والله يا أبوي أنت خارج الزمن...
يا ولد.. خلي عندك..........
يا أبوي أنا آسف.. لكن..
لكن شنو يا ولد أنت مش عندك مذاكرة وامتحانات التلفزيون ليك شنو كمان..
وكان رده.. أها يا أبوي مش قلت ليك إنك ممل أي حاجة تدخل فيها الدراسة كأنو الدراسة دي أهم شي.. أنت يا أبوي قايل المذاكرة زي ما أنت بتقول لازم يوميا.. يا أبوي أنا أصحابي يقروا يوم بعد يوم.. أنا الوحيد الممل لأني إبن الممل لازم أقرأ يوميا.. وأذاكر.. وأكون هامي لو ما قفلت درجات المادة.. لأنو أنت حتقول لي ده عشان أمبارح ساهرت في فيلم قناة (ONE).. ولأنو غير الغناء وقنوات دريم وروتانا ما عندك شغلة.. تعرف يا أبوي أكثر حاجة مملة هي الدراسة.. مش لأنو ما عايزين نتعلم.. لكن لأنك جننت أخواني الكبار بيها.. وأنا ما عايز اتجنن زيهم.. أنا عايز أبقى رجل أعمال..
طيب منو القال ليك رجال الأعمال ما درسوا؟!...
يمكن درسوا أنا برضو حادرس.. بس خليني براحتي وخليني أحضر الأمريكان أيدول.. ومش كل حاجة تقول لي عيب وحرام.. بعدين كل أصحابي في الصباح في البريك.. بتونسوا بالاميركان ايدول وبرنامج الدانس.. البتجي فيه بولا عبدول..
يا ولد بولا عبدول.. دي منو؟
ما قلت ليك يا أبوي أنت خارج الزمن وخارج الشبكة ذاتها.. معقول ما بتعرف بولا عبدول.. دي في لجنة إختيار الراقصين.!!! واليوم ديك قالوا كانت سكرانة في اللجنة...
يا ولد..
يا أبوي خليك مع الزمن...
طيب يا معاذ.. خلينا نصل لحلول.. أولا أنت لا زم تجتهد وتذاكر عشان تدخل الجامعة زى أخوانك ..
أها.. قمنا يا أبوي..
ما أنت لازم تقتنع بأنو المذاكرة دي شي مهم..
أنا مقتنع بس ما كل كلمة والتانية تقول لي ذاكر.. ذاكر... وتكرهني اللحظات البسيطة البقعدها قدام التلفزيون...
وبعدين يا أبوي أنت تقول لي ما تشوف الأغاني.. وتقول لي الغناء ما كويس.. واليوم داك وأنت ما شايفني شفتك بتحضر في فنان كده في السودان بيغني غنية بيقول فيها : أربعة سنين عاشهم الحب. مش ده برضو غناء وحرام..
طيب... كده خلينا نحل المشكلة...
مشكلة شنو يا أبوي أنت خارج الشبكة..
وإلى هنا وقف الحوار والهجوم الكاسح من ابني الصريح معاذ..
أما أنا فصرت أتمم هاذئا معقول أنا خارج الزمن.. يمكن والله وبدأت أقتنع بأنني ربما كنت خارج الشبكة ولازم تركب أنتينا وبرج تقوية يعينني على فهم الزمن الذي أصبح فيه معرفة بولا عبدول أهم من معرفة يوم عيد الاستقلال.............
يا أيها الملأ أفتوني...هل فعلا أنا والكثير من الآباء مثلي مملين وخارج الشبكة..هل نحن نبالغ في أهمية التعليم وفي توجيه أبناءنا في أي البرامج يشاهدون.. هل لا بد أن نعيش معهم رؤاهم وأفكارهم دون أية تعديل .. هل لا بد أن نصفق لبولا عبدول ... ونطرب لنانسي عجرم.. ونتمايل يمنة ويسارا مع إيقاعات الراب..
أختي عواطف إدريس وينك ألحقيني!!!
|
|
 
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: Kamal Karrar)
|
الأخ كمال
أولا ما تندهش كتير ... دة جيل عجيب (بالنسبة) لينا نحن ... طفل زي دة لازم تتحاور معه بالمنطق المقنع جدا ، هو يعرف أدواته جيدا ، ويعرف كيف يهزمك هزيمة نكراء... الحال يا هو نفس الحال... والله أنا في شد وجذب خاصة من ناحية الحلال والحرام ،،، التناقضات الموجودة تجعلهم يشكون فينا وفي ما نحلله لهم أو نحرمه....
| Quote: لكن لأنك جننت أخواني الكبار بيها.. وأنا ما عايز اتجنن زيهم.. أنا عايز أبقى رجل أعمال |
كلامو صاح 100% لأنو نحن مصنوعين وقرينا عشان نشتغل ونتخرج من الجامعة ,,, وريهو بس كيف يتعود على حب الإطلاع وخليهو يتعود يقرأ (أي شئ) وبعدين هو براهو بعرف طريقو ... | Quote: هل فعلا أنا والكثير من الآباء مثلي مملين وخارج الشبكة |
دة كلام صحيح ... لكن لا بد من التوجيه من هنا وهناك لكن على الطريقة التي يريدونها هم ... دة لو كان نحن قدرنا نعرف أصلاً هم عايزين شنو...
لك الود
| |
|
|
|
|
|
|
|
|
 Re: قالها: يا أبوي أنت ممل وخارج الشبكة.. (صحي يا عواطف إدريس) (Re: Kamal Karrar)
|
أخي الممل جدا كمال
تحية غاية في الملل
أسفة لأني نجدتك متأخر جدا حيث كنت خارج مدينة أبوظبي لتغطية سباق القدرة وإجراء حوار مع
الأميرة علياء بنت الحسين وأول ما دخلت المكتب لقيت نداء الإستغاثة بتاعك الحمدلله وصلت قبل الطيارة
ما تقع في مياه الخليج . قرأت بوستك جيدا وأعجبت بشجاعة إبنك الأدبية وبناء على حوارك معه أقول
وبصدق إنك فعلا خارج الشبكة وخارج رزنامةالعصر لأنك ما بتشوف big brother ولا أوبرا وما ليك علاقة
بال M.B .C تو وثري وفور وما بتسمع بيونسيه ولا كريج ديفيد ولا حتى موسيقى الراي وجنك وجن الجنك
فود بتفطر فول مصري وتتغدى كسرة بملاح بامية وتتعشى فول مصري والتاريخ الغذائي عندك يعيد نفسه
من الله ما خلقك . لكن تعال شوف ناس الفاست فود , يوم بيتزا , ويوم ماكدونالد ويو كنتاكي ويوم بيتزا
هت ويوم إن واليوم البعده صب واي وإنت قاعد في محلك تشوف قناة الجزيرة ولما تخلص تمشي النيل الأزرق
أو محطة إقرأ وعايز ما تكون ممل وبرة الشبكة والله يا كما ياأخوي بيني وبينك بعد شوية حيقول عليك
إرهابي أو دموي عشان ما بتشوف ستار أكاديمي ولا مسلسل فرندز البخليهم يموتو من الضحك وإنت قاعد
معاهم زي الأبله وما عارف البضحكهم شنو عشان هم ناقشين وإنت مسطح وبعدين مذاكرة شنو يا راجل ؟
خليك مع الزمن وولدك دا البذاكر يوم بعد يوم دا كويس جدا لسة ما وصل مرحلة اسبوع بعد أسبوع
يعني لمن يكون في QUIZ ولما تصرخ فيهم يقولو ليك ديفيد بيكهام لو كان بيذاكر ما كان بقى كابتن
الفريق ورونالدو لو قرا ما كان بقى أفضل لاعب و الأمثلة لأشخاص نموذجيين في نظرهم كتيرة لا تحصى ولا
تعد وبعدين يقولو ليك إنتو قريتو عملتو شنو ؟ أضفتو إيه للحاصل ؟ إكتشفتو شنو؟ تصدق رغم إنك
بتتفرس من إجابتهم وكلامهم لكن بيني وبينك كلام مقنع لا عملنا حاجة ولا محتاجة .. مرة مجلة صباح
الخير عملت لقاء مع المراهقين وكان العنوان كبير وعريض بناء على ما خرجت به المجلة وهو كالتالي
( مش إحنا أبواتنا اللي مفروض يتربو) يعني يتربو على طريقتهم وهواهم وعصرهم عشان كدا يا سي كمال
إنت المفروض برضك تتربى من أول وجديد وتبطل تشوف قنوات مملة لأنك لم تخلص الجزيرة يا مشيت قناة
النيل الأزرق يا إقرأ ولو بالغت بتمشي المنار وعشان ما تكون إرهابي ودموي بدل ممل لازم يا كمال
ياأخوي تكون ستايل بمعنى آخر تكون واو بدل ياياي وإبنك معاذ مازال في بداية الطريق يعني لسة
مؤدب ومهذ1ب وبسمع الكلام أديه سنتين وبعد كدا الحوار بياخد أبعاد أخرى تؤكد إنك من العصر الحجري
وإنك ما ناقش , وإنك خارج الكرة الأرضية وليس الشبكة فقط .... مودتي
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: عواطف ادريس اسماعيل)
|
المتداخلون المملون
شكراً مملاً على هذا الملل الممل
الحمد لله نحن يا دوبك في بداية الممل
ومحمود يعني تخطى اربع سنوات (شمال)
وبقى متمرد على (اسبيستون) آي والله
يعني عايز يشوف المسلسلات والأفلام خصوصاً افلام العنف والمسلسل المكسيكي الممل (اخواتي الثلاث ام الاخوات الثلاثة..ما عارف)
واليومين ديل بقى مركب مكنة زول كبير جداً وعندو كلمات بقى يكررا من وقت لآخر كلمات من شاكلة (تفتكر..على فكرة..عندي فكرة..وحاجات كدا اعاين ليها واكتم الضحكة..)
وقبل يومين قال لي بي همس كدا
يا بابا انا عندي فكرة..
قلت ليهو :خير.. قوول انا سامعك
قال لي - والله على ما اقول شهيد- ايه رأيك يا بابا تمشي الروضة وانا امشي الشغل..؟!!
وكان في منتهى الجدية!!
.....
...
..
اها راجيييييييين باقي الحكاية..؟
ما بكملا
بس لبسة الروضة طلعت اصغر مني شوية!!
معليش يا كيمو قنوات الولد طلعت اصغر منك شوية
...
بي جنبة كدا
الاخت عواطف
ليس المهم الحضور داخل الشبكة بل المهم وجود(الرصيد)
| |
|
|
|
|
|
|
|
|
 Re: قالها: يا أبوي أنت ممل وخارج الشبكة.. (صحي يا عواطف إدريس) (Re: عادل فضل المولى)
|
الاخ اعزيز عادل
مودتي
عارف يا عدولي ولدك دا طلع أعقل منك لأنه شايف نفسه افهم كتير وبعرف
حاجات انت ما عارفها ولا حتعرفهاعشان كدا صعبت عليه نفسه ليه هو الفاهم والناقش يمشي
الروضة وانت المسطح المسكين الغلبان تمشي الشغل لازم تعرف ليك طريقة تلبس بيها المريول
وتنفذ الاوامر عشان الوضع الطبيعي اللي هوشايفه انت في الروضة وهو في الشغل والفهم
اقسام يا عادل ورحم الله امريء عرف قدر نفسه أما حكاية الرصيد خليها ساكت الماعنده
رصيد في الموبايل ما يسوى مس كول والماعنده رصيد في البنك ما يسوى تعريفة وكله
بتمنه يا عدولي ... يلا يا أخوي حصل بص الروضة وماتنسى تشيل الساندوتش والعصير وخليك
مؤدب ما تعمل مشاكل سمعت يا الفالح؟؟؟؟
ويجعله عامر .
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: عواطف ادريس اسماعيل)
|
أووك يا عواطف..
يعني ما عندي وجيع أصلا.. لكن بصراحة أصلا أنا تراجعت كثير كثير والكبار ربنا يعفي لي من حقهم..
وأمهم السمحة والله كانت نظرتها بعيدة وقالت لي يا كمال يا أخي ما هكذا تورد الأبل من زمان بس أنا ما صدقتها.. وبالجد كانت ولا زالت مرة حكيمة تهدي السر.. وتبسط الأمور.. ولمن يطفح الكيل لو ما هي ما عارف كان يحصل بيني وبين أولادي شنو.. لا أملك الا أن ابثها المزيد من المحبة والمودة وأن اضرع لله أن يجزيها عني خير الجزاء
أما مسألة الجنك فوود قهذا مبحث آخر.. يعني ياجنك فوود ولا الواحد يقول ليك شبعان.. وتكون أنت دخلت في وخز ضمير..
ولكن معاذ.. صريح صراحة محببة لنفسي.. يقول لي يا أبوي أنت مش وضحت لي ضرر الفاست فوود.. لكن أنا برضو عايزو .. ولمن أقول ليه ليه يامعاذ.. يقول لي من غير ليه.. لكن مرات بيقول خلاص الليلة شاورما ما بطال.. لووول..
نرجع لموضوع الدروس.. والمدرسة عملت ليهم نظام CONTINOUS CLASS EVALUATION وجاء محذرا وقال لي شوف يا أبوي أنا نظام ال CCE تمام معاي لأنو حيرويك أنو أنا دائما بركز في الصف وما زي ما بتتخيل مشاغب.. وأها ده الجدول عندك وكل يوم حأوريك درجتي.. بس لازم تفهم أنو ما لازم أقفل الدرجات.. يعني بس أوعدك تكون الدرجات كويسة وتوري إني فاهم ومرات كدة بقفل الدرجات.. وأنا والله يا أبوي ممكن أقفل الدرجات.. بس يعني طالما ما أنا فاهم وبجيب درجة ممتازة أو جيدة جدا.. خلاص تاني شنو..
يعني هذا المعاذ اللميض في غير ما قلة أدب.. حيرني.. قبله ثلاثة مروا مرور الكرام.. اما هو لم.. ولن وخلاني أفتش في الحاجات التي لا أؤمن بها عسى ولعلي أفهم لماذا هو غير الآخرين.. ووجدت أنه من مواليد برج العقرب...وأن كنت لا أؤمن بذلك.. ولكن سيد الرايحة!!!
عموما أنا قررت من اليوم أركب ماكينة 2007 بأريال millienum والزارعها الله تقوم في الحجر.. أو في نص رأس أوبرا وينفري..
| |
|
|
|
|
|
|
|
|
 Re: قالها: يا أبوي أنت ممل وخارج الشبكة.. (صحي يا عواطف إدريس) (Re: Kamal Karrar)
|
عارف ياكيمو بمناسبة قناة الجزيرة وغيرها عندي ولد اسمه مازن كان عمره 4 سنوات لما
يكون عايز يشوف افلام كارتون بيلقى ابوه فاتح قناة السودان قام مرة زهج وقل ليه انت
كله مرة بتشوف السودان السودان ليه ؟ قال ليه عشان بحبه قال ليه لما بتحبه كدا ما
تمشي ليه قاعد هنا تعمل شنو؟ طبعا اسقط في بده ولم يستطع الاجابة ... تقول لي اطفال
ديل يا كيمو مولودين بسنونهم ... دروس وعبر ...
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: عاطف عمر)
|
أخي عاطف شكرا على مرورك..
فعلا الأطفال عندهم ذكاء من نوع ثاني..
وهم أكثر من يعقد المقارنات والمقاربات
وتعليقاتهم لا تخلو من سخرية تبطن رأي مخالف
وفي أحايين يكونوا حاديين ولاذعين في التعبير عن آرائهم
المهم إننا لا نكبحهم وننهرهم.. إنما نحاول أن نبين لهم خطأ رأيهم في غير ماإستفزار ونظرة دونية
أما نحن فعلا من جيل أستثنائي لم تقتصر تربيتنا على الأب والعم والخال.. إنما تعدتها للمعلم في المدرسة والجار في الحلة والشيخ في السوق.. ولكن ايضا لتلك الحالة سلبياتها التي لا مجال لذكرها الآن..
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: Kamal Karrar)
|
أختي عواطف..
صباح أرجو ألا يكون مملا..
مازن.. خطير.. عمل فاول لأبو العيال.. يخرجه من دائرة الملل..
بالأمس قلت لمعاذ يا معاذ أنا كتبت في البورد عن إتهامك لي بأني ممل..
أنتفض وقال لي يا أبوي ده كلام بيني وبينك في داعي تقولوا للناس.. يعني أنت يا أبوي تاني ما أقول ليك اية حاجة.. هسع الناس يقولوا على شنو؟؟ أكيد حيقولوا أنو أنا ما عندي أدب.. لكن دقست والله يا أبوي (دي عبارة جابها معاه من السودان).. ولكن أستدرك وقال والله يا أبوي أنا لازم أتكلم معاك ولازم نتفق..
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: Kamal Karrar)
|
حكاوي للكبار..
في فترة من الفترات كنت شديدة الولع بتجميع الاحاجي السودانية وتلقينها للاطفال.. واذكر انه في مطلع التسعينات، جلست في المساء احكي لابنتيى اخوي اللتين لم تتجاوزا السابعة والسادسة.. ذات السبع سنوات واسمها سارة وهي الان طالبة جامعية وذات الست سنوات واسمها عزة وهي الاخرى طالبة في بداية حياتها الجامعية..
جلست احكي حكاية قراتها في كتاب الاحاجي السودانية للبروفيسور عبد الله الطيب عليه الرحمة، وكان اسمها مريمية بنت الحرام.. حينما نطق بعنوان الحكاية، جال في خاطري : ماذا لو سالتني هاتين البنتين عن معنى بنت "الحرام".
وفعلا كان السؤال الاول الذي سالتني اياه عزة والتي كانت تعيش في السعودية.. عمتو بنت الحرام يعني شنو؟... اسقط في يدى.. ماذا اقول وكيف افسر معنى الكلمة دون الانزال الى ابوها لم يتزوج امها وربما الاطفال نتاج طبيعي للزواج و..و.. المهم.. قررت ان اعهد الى الجالسة في السودان شرح المعنى.. واري كيف تشرحه لها..
وفعلا قلت يلا يا سارة وري عزة معنى كلمة بنت الحرام.. لدهشتي الشديدة اعتدلت سارة في جلستها واتخذت سمت الشخص الجاد جدا.. وقالت: اسمعي يا عزة هسع انتي كان كنتى ماشة في الشارع ولقيتي ليكي سفنجة واقعة بتعرفي سيدا منو؟
ردت عزة بالنفي..
فقالت سارة : شفتي بس دي بت الحرام كدا ..زي السفنجة دي..
كانت الاجابة اقوى واروع مما تصورت..من نفس البيئة استقت التعريف القصير والمفيد ونجدتني .. واقسم بالله لو طلب منى التفكير في مثل هذه الاجابة لفترة طويلة.. لما نجحت..
طبعا تاهت القصة في ثنايا الشرح الرائع.. وجعلت منها يومذاك حكاية نشرتها في احدى الصحف اطلقت عليها عنوان: حكاوي للكبار..
خلي بالك يا كمال .. الكلام دا كان في مطلع التسعينات .. يعني الوقت داك ولا كان في ستالايتس ولا في انترنيت..
ولدك دا مهذب جداَ.. وانت فعلا دقة قديمة.. ما تزعل..يعني معقول ولا تحضر سوبر ستار ولا so you think you can dance ولا er ولا days of ourlives ولا boston public ولا american idol ولا the bold and the beautiful ولا the biggest loser ولا الام بي سيهات الاربعة.. غايتو دا السيناريو الاول..
نحن الفلم دا دخلناهو كلنا وقررنا نحضر الام بي سي كلها وخاصة الثالثة.. وعملنا برامج اسرية نقعد كلنا نحضرها وفي النهاية لقينا اننا تم تحويلنا كليا الى برامج الاطفال، فقررنا شراء تلفزيون ثاني.. والمسالة ساهلة مقسم بستين ريال ويخلي لاقط واحد يشغل ليك كم تلفزيون.. بس خطورته انك لن تستطيع في اغلب الاحيان معرفة ماذا يشاهدون..
وبعدين اظنك لهسع ما دخلت زمن القنوات "المكرتة" ودا نوع تاني من البرمجة القنواتية..اللي مش مجان..
تحياتي ايها الممكون..
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: حليمة محمد عبد الرحمن)
|
| Quote: والله أنا في شد وجذب خاصة من ناحية الحلال والحرام |
الاخ الفاضل/ كمال محجوب
لو نظرنا للأمر من هذه الناحية نسلم من كل بلوى
تألمت جداً ذات مرة وأنا أشاهد إبنتي ذات الخمس أعوام تداري عيونها خجلاً من رؤية مشهد تقبيل بين
فتاة وولد في فيلم أجنبي .. (ناهيك عن نوعية الملابس التي تظهر كل شيئ)
صدَقني ذهبت اليوم التالي لشركة الكيبل وطلبت منهم عمل (إعادة برمجة) للقنوات
فقط تركت قنوات الكرتون والاخبار والرياضة ... وباقي القنوات أرسلتها لجنهم
كل ما في الامر لانريد أن نكون محاسبين امام الله عما يجنيه (عيالنا) من هذه المشاهد
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: حليمة محمد عبد الرحمن)
|
الاخ كمال
استاذة عواطف
وبقية الحضور..
موضوع فى غاية الاهمية...
كنت بصدد فتح بوست يحمل هذا المعنى لكن كنت محتار فى اسم البوست...
طبعا انا ليست لى تجربة اطفالية ..لانى اسرتى جديدة لكن لى اقارب..لهم اطفال..تربو فى الغربة
فطفل الاغتراب يختلف عن طفل السودان..لان الاخير قليل الاحتكاك بوالده..فتربيته اغلبها من الشارع
الطفل فى الغربة..يحرس اباه ليلا وامه صباحا..
ومتابع لوالده فى كل شىء..هذا بخصوص الطفل الكبير..وقارن اخى كمال بطفلك الكبير اذا كان ذكر اما حاير بيه الدليل او يشبك تماما..اما الثانى والثالث يمتلك خاصية التمرد..
*احد اقاربى اهتماماته كروية..فابنه شب على حب الكرة واسى هو لاعب فى الجالية وتلقاه يوم الخميس والجمعة مصاقر الميدان قبل بداية المبارة.ويحب ان يسمع اشادة الحضور بابنه وكيف انه حريف وله مستقبل واعد..وهو يزهو ويتبختر عندما يحرز ابنه هدف...اما ابنه الصغير بارع فى ركوب العجلة
وكيف انه بقطع الشارع السريع فى قمة زحمته ..يراه قليل ادب ومضيع وقته وهو شبه خاله المشاغب وممكن ان يموت يوما..
* اما جارى الحبيب فهو متدين مطوع سنى و بنى وقليل التجنى..وما بعرف يغنى ولا يعزف على الدن..
اذا شاهد الاغناى استعاذ واذا شاهد نشرة الاخبارة بصوت زينب الشائب غطى وجهه ..ودعى عليها
لكن خديجة بن قنة بحضر ليها لانها محجبة ومهذبة..على هذه الشاكلة تربى ابنه الكبير..فنشاء ليس له نصيب من اللعب والضحك والفرفشة يلبس قطرة وثوب خليجى لهجته طريقته فى المشى..كلها مستمدة من المطاوعة او من ابيه..ويوما اتى للصلاة متاخرا فقدمه المتاخرين للصلاة التانية..فحين راه اباه انبسط 24 قيراط...فالان ابنه متابع المطاوعة الخليجين وما ادرى ماذا فعل بالدراسة الاكاديمية..
اما ابنه الثانى كثير اللعب والضحك والجرى مع اقرانه لكنه مجد فى دراسته الاكاديمية
وربما يدخل جامعة مرموقة ..نظرة والده اليه استحقاريه لانه يصلى صلاة عادية ولا يحفظ من القران الا القليل...
لماذا نحن هكذا نريد ابنائنا ان يقلدونا..؟؟؟
اخى كمال اشكرك على هذا الطرح الجميل..ربما يساعد بعد الاخوة فى دول المهجر
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: حليمة محمد عبد الرحمن)
|
والله يا حليمة.. ده جيل صعب وواعي.. وفعلا تناولهم للمواضيع يبدأ من النقطة وصلنا لها نحن..يعني )They are far ahead وطبعا الزخم المعرفي المحيط بيهم أضاف وأثرى لمعارفهم.. ووسع من مداركهم.. حتى صرنا نحن أمامهم نتضاءل من الفيض المعلوماتي اللذي تزخر به عقولهم الغضة..ولكن.. المعضلة في مداخل التوجيه.. وقصة السفنجة المرمية هي المطلوبة مننا عشان نقدر نوصل ليهم المعلومة بدون أن نضطر لأن نكذب.. وطبعا نحن ياما كذبوا علينا وتشونا في ألسنتنا عندما نكذب.. يعني المرأة زمان عندما يسألها أبنها من أين آتي تقول ليهو قلت عوع وطرشتك..!!! ويعدها الواحد يصبح جاهل وقرفان كمان من حكاية الطراش.. وما يفكر يجيب أولاد بيطرشوهم.. يعني أهلنا زمان كان تعوزهم كياسة بنت أخوك.. صاحبة السفنجة المرمية..
أما أنا فلست متحجرا لتلك الدرجة ولكن.. حقيقة أنا ما قادر أواكب وأشوف البشوفوه.. يعني أنا أحب المتعة العقلية المثملة في الحوار المعمق والمعلومة المفيدة في الوثائقيات.. وبرامج التحليل الساسية وغيرها.. فالمعتة عندي فكرية.. والكلام ده من زمان.. والجيل ده كلو.. ما عندو هم غير ترن ترن.. وكل المتع الحسية.. وبعدين أنا لا تأسرني المسلسلات المصرية التي يستطيع أيا منا أن يكتب العشرات منها..تلك التفاهات المكررة والسخف المتهاني في السرد الدرامي الفج.. لا تحرك في ساكنا.. وفعلا مسألة المقسم والتلفزيون الثاني حل.. لكن لابد من الصدام وإن أختلفت الشاشات..
عموما الحديث في هذا الموضوع متشعب وذو شجون
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: حليمة محمد عبد الرحمن)
|
والله يا حليمة.. ده جيل صعب وواعي.. وفعلا تناولهم للمواضيع يبدأ من النقطة وصلنا لها نحن..يعني )They are far ahead وطبعا الزخم المعرفي المحيط بيهم أضاف وأثرى لمعارفهم.. ووسع من مداركهم.. حتى صرنا نحن أمامهم نتضاءل من الفيض المعلوماتي الذي تزخر به عقولهم الغضة..ولكن.. المعضلة في مداخل التوجيه.. وقصة السفنجة المرمية هي المطلوبة مننا عشان نقدر نوصل ليهم المعلومة بدون أن نضطر لأن نكذب.. وطبعا نحن ياما كذبوا علينا وتشونا في ألسنتنا عندما نكذب.. يعني المرأة زمان عندما يسألها أبنها من أين آتي تقول ليهو قلت عوع وطرشتك..!!! ويعدها الواحد يصبح جاهل وقرفان كمان من حكاية الطراش.. وما يفكر يجيب أولاد بيطرشوهم.. يعني أهلنا زمان كان تعوزهم كياسة بنت أخوك.. صاحبة السفنجة المرمية..
أما أنا فلست متحجرا لتلك الدرجة ولكن.. حقيقة أنا ما قادر أواكب وأشوف البشوفوه.. يعني أنا أحب المتعة العقلية المثملة في الحوار المعمق والمعلومة المفيدة في الوثائقيات.. وبرامج التحليل الساسية وغيرها.. فالمعتة عندي فكرية.. والكلام ده من زمان.. والجيل ده كلو.. ما عندو هم غير ترن ترن.. وكل المتع الحسية.. وبعدين أنا لا تأسرني المسلسلات المصرية التي يستطيع أيا منا أن يكتب العشرات منها..تلك التفاهات المكررة والسخف المتهاني في السرد الدرامي الفج.. لا تحرك في ساكنا.. وفعلا مسألة المقسم والتلفزيون الثاني حل.. لكن لابد من الصدام وإن أختلفت الشاشات..
عموما الحديث في هذا الموضوع متشعب وذو شجون
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: Kamal Karrar)
|
تعرف يا كمال تربية الاولاد دى مساله ما ساهله ... انا عندى ولد واحد وبنتين ... عمرو 6 سنوات لكن والله بديت اعانى معاناه عجيبه ... قمة التمرد ورغبه عجيبة فى السيطره .. طبعا هسى برضو انتقلنا من مرحلة اسبيستون لمرحلة الافلام ... تلقاهو مندمج ومركز .. ولما اقول ليهو حاتم يللا المذاكره يرد "انا جيت هسى من المدرسه الواحد ما يرتاح خمسه دقايق يعنى .. ليه كدا" والكلام دا بيكون قريب المغرب يعنى ما عارفه مقياسو للخمسه دقايق شنو؟؟ المهم ... الشابه الوسطانيه ريما عمرها اربعه سنوات ونص لكن والله بقت برضو بتحيرنى ... تقيف تكاوى اخوها تصفق بى ايديها وترقص وتقول "يا حبيييبتى يا حبييبتى" (بفتح الباء الاخيره على وزن ناس طاش ما طاش) .... ولما تطلب حاجه واقول ليها اوكى تقول لى "ماما اوع تكونى بتكذبى على انا بكلم ليك الله يوديك النار انتى ما عارفه انو الكذاب بحرقو بالنار فى لسانو" ... والاتنين طبعا جنهم رقيص وغنا مع انو والله القنوات دى ما بنفتحا كتير لكن حاجة كدا يمكن فى دمهم .....
مره ريما دى وفى محاوله منى لتنويمها لانو ميعاد النوم جاء ... وهى مدوره نقه ونضمى وما دايره تسكت لما خلاص زهجت منها قلت ليها "والله يا ريما ويمين بالله ما تصمى خشمك دا وتنومى الا اضربك " قامت سكتت بعد مسافه يمكن 10 دقايق اسمعا ليك "والله يا ماما والله .. وعلى الطلاق ما تسكتى يا ماما اضربك ضرب" طبعا اختك زى الهبله انفجرت فى الضحك واتحول الموقف من تاديبى الى كوميدى ....
| |
|
|
|
|
|
|
|
|
|
Re: قالها: يا أبوي أنت ممل وخارج الشبكة.. (صحي يا عواطف إدريس) (Re: Randa Hatim)
|
شكرا أختي رندا
صحيح التربية مش شيء ساهل خاصة تربية الأولاد.. لأنو أنا يا أختي عندي وبحمد الله 4 أولاد وبنت واحدة.. لكن.. ودائما أغبط العندهم العكس.. يعني البنات مهما كان اسهل من البنات.. بعكس ما كان يعتقد آباؤنا..
ولفت نظري في طرحك مسألة إدارة الوقت.. وبقى دي مسألة مفقودة في الجنسين.. وإن كان البنات أكثر تقديرا للوقت.. يعني أنا عندي واحد من أولادي يقول لي يا أبوي نازل تحت أدي الديسك ده لأشرف وأجي هسسسسسسع.. تصوري هسع دي في بعض الأحيان تأخذ زهاء الساعة.. وهو ما بيكون قاصد.. لكن تقدير سليم للوقت ما عندهم.. وعندهم الوقت طويل وكأنه ما حينتهي أبدا.. وبرضو عندهم إشكالية في الأولويات.. أنا أذكر في زمنا كان وسيلة الترفيه الوحيدة هي السينما.. لكن كنا نبدي الأشياء الأهم فالمهمة عشان نقدر يوم الخميس نشوف واسطة حتى يوافق الوالد على الذهاب للسينما والوقت من السينما للبيت كان محسوب حساب دقيق,, ويا ويلك إن تأخرت عن الوقت المعلوم.. طبعا علقة.. وحرمان فترة طويلة من السينما.. أنا لست من أنصار العلقة.. لكن لابد من إيجاد وسيلة للعقاب والثواب بطريقة حضارية.. وإلا ضاعت حدود الأشياء...
والمذاكرة دي شيء ثاني الكتاب مفتوح ومرمي في الكنبة واللأب توب على الحجر وعين عبر الأبواب لمطالعة ما يجري في التلفزيون والتلفون ..والآي بود.. ويا حليلنا فيها..
والله قدر ما الواحد ينزل ويتنازل عن كثير من المسلمات عشان يجدبينه وبين هذا الجيل ارضية للتفاهم.. يطلع كأنو بينفخ في قربة مقدودة.. نجيهم بخوجلي يطلعوا لينا بحمد وغايتو ربنا يستر..
| |
|
|
|
|
|
|
| |
Kamal Karrar
ALGARADABI
فيصل محمد خليل
عواطف ادريس اسماعيل
عادل فضل المولى
هاشم أحمد خلف الله
عاطف عمر
حليمة محمد عبد الرحمن
حيدر حسن ميرغني
abuguta
فيس بوك
تويتر
انستقرام
يوتيوب
بنتيريست