|
|
 دايــرة اتكــل علـي الله وابقـي فنـــانة!!
|
من العيد وانا بوصف نفسي في الحفلات آخرها قعدة البورداب بتاعين الخرطوم وبعض بورداب برة في منتجع أم درمان بعاطلة عن العمل (حاليا)وصحفية(سابقا)..لكن بيتنا ملك..
حايمة الخرطوم برجل كلب بفتش علي شغل وفي النهاية ما بلقي غير عبارة مري علينا مرة تانية..
بديت افتش علي شغل ابتداء من دكتورة مرورا بمحامية انتهاء بصحفية و...و... هلمجرا والحال ياهو نفس الحال.
مسألة انك تكون عاطل عن العمل بعد اكثر من ثمانية اعوام شغل بدون اجازة الا اول يوم في العيد او تانيه مسألة مزعجة جدا جدا..
وحتي أسالوا الصحفيين وخاصة الصحفيين السياسيين..
صحفية وسياسية كمان..صحفية في عيني انشاء الله
هو انا كان مالي ومال مهنة النكد والتعب دي ما كان ابقي حاجة تانية..فنانة مثلا..
في واحدة بعرفا.. فنانة كدة اتعرفت عليها في حفلة ناس واحدة صاحبتي في العشرة(بضم العاء)قبال كم سنة..لاقيتها في حفلة ناس قرايبنا قبل كم يوم.. قالت لي اتكلي علي الله وابقي فنانة..
قلت ليها لكن صوتي ادوب بخليني اتكلم..
قالت لي عادي جدا والمسألة ما محتاجة لي صوت بقدر ما محتاجة لي حفظ اغاني وخاصة الاغاني الهابطة منها..
وفجأة سألتني بتعرفي تجبجبي؟
هزيت راسي .لا .
قالت لي ما مشكلة اترجفي بس ..
اها بعد داك سألتني من كم غنية كدة من الاغاني اياهم لقتني حافظة بعضن والباقي تميتو ليها نحنحة..
اها طوالي سألتني عندك ورق وقلم _طبعن ما بتعرف تقرأ ولا بتكتب_ قلت ليها آآآي
اها بدت تمليني في الاغاني الما حافظاها..
وتوريني اخشش الجبجبة والنبق النبق والصفقة مالة تعبانة وين..
|
|
 
|
|
|
|
|
|
|
 Re: دايــرة اتكــل علـي الله وابقـي فنـــانة!! (Re: صباح احمد)
|
بمناسبة انو الزولة دي ما بتعرف تقرأ دي ..خلوني انتهز الفرصة دي واحكي ليكم حكاية الحمار القرر يتعلم القراية والكتابة..
اها ياجماعة في واحد ...
بسم الله واحد شنو..قصدي في حمار قدر ما يجي ... يلقي ليك حاجة مكتوبة بالخط العريض في الحيط..
وقدر ما شكة ولكة فيها ماعرفها دي شنو..
وفي النهاية يبول ويمشي ونفسوا يعرف المكتوب في الحيطة دة شنو..
لحدي ما يوم لاقي ليك الكلب لابس ليهو نظارة قراية ومتشنط ببنطلون جنز جيفايز وفنيلة كط وشايل ليهو موبايل صفقة في يدو..
اها اتشبك فوقوا وحلفوا الا يمشي معاهو عشان يوريهو الحاجة العجيبة دي..
صاحبنا الكلب ما قدر يزوغ منو بالرغم من انو قال ليهو انا منتظر لي جكس ومواعيدا قربت..
وفي النهاية مشي معاهو..
اها لمن قربوا من الحيطة استأذنوا نوا بالاول داير يبول حتن بعد داك يوريهو الحاجة العجيبة..
اضطر الكلب يقبل بغادي عشان الحمار ما يقول انو(بتصنت عليهو)
وما قبل الا لمن الحمار قال ليهو هدي الحجاة العجيبة..
صاحبنا الكلب اتحرج جدا جدا لانو ما بعرف يقرأ وما قادر يقول للحمار انو راجل..اقصد انو كلب امي(الالف عليها ضمة)..
وفكر يتخارج من الورطة دي كيف وفي النهايةقال ليهو انو الكلام دة مكتوب بالحبر السري عشان كدة ما بقدر يشوفوا وطلب منو يمشي لزول..اقصد حيوان تاني..
بالصدفة جيت مارة بالشارع الفيهو الحيطة اها قام الحمار ناداني باسمي ..
اصلي كنت صحفية مشهورة جدا في البلد..
جيت وسلمت عليهو..قام حكي لي القصة من طق طق للسلام عليكم
وطلب مني أقرأ ليهو المكتوب في الحيطة شنو..
وقريتوا ليهو ممنوع البول ياحمار)..
اها صاحبنا الحمار اتكيف شديد لانو الناس بعرفوا اسموا..
وصاحبنا الكلب اتضايق لانو الحمار طلع مشهور اكتر منو..
فما كان منو الا انو عمل فيها بعاين للساعة وطوالي ضرب تلفون واتخارج عشان يقابل الجكس
| |
|
|
|
|
|
|
|
|
|
Re: دايــرة اتكــل علـي الله وابقـي فنـــانة!! (Re: صباح احمد)
|
هسة لو كان ابوي سماني علي الرئيس الامريكي جورج بوش مش كان اتخارجت من البلد دي بي لوتري وبقيت جارة ناس دينق وكوستاوي وعبد الله وباقي الشلة؟!
علي ذكر الاسامي ياجماعة بتذكر انو قريبنا كان شغال في العراق قامت مرتوا ولدت ليهو ولد سماهو صدام حسين..
تصدقوا انو صدام حسين هدي ليهو (كرسي جابر)دهب..
وليه ماشين بعيد ماكانت السفارة العراقية في الخرطوم بتعمل احتفال للناس المسمينهم علي صدام حسين كل سنة وبدوهم في الاحتفال دة هدايا وحاجات تانية حامياني..
| |
|
|
|
|
|
|
|
|
|
Re: دايــرة اتكــل علـي الله وابقـي فنـــانة!! (Re: SAMIR IBRAHIM)
|
| Quote: كرسي جابر ده شنو يا صباح ؟؟ |
معقولة بس يا SAMIR IBRAHIMما سمعت بكرسي جابر السلسل الكبير؟..
اهاالكرسي دة مسمينوا علي كرسي جابر..
وجابر المقصود هنا هو الشيخ جابر الصباح .يعني الكرسي الضخم الذي كان يجلس عليه الشيخ جابر الصباح..
وعشان ما تسألني اكتر من كدة..
خليني احكي ليك حاكيتي مع ناس الصباح ديل..
الظاهر انو ابوي كان معجب بالجماعة ديل شديد عشان كدة انتهز فرصة زيارة قام بها الشيخ صباح الاحمد الصباح منذ سنوات بعيدة للسودان وسماني عليهو..
يعني هسة انا اسمي صباح الاحمد الصباح.. علي الشيخ الصباح ملك الكويت هسة..
| |
|
|
|
|
|
|
|
|
|
Re: دايــرة اتكــل علـي الله وابقـي فنـــانة!! (Re: صباح احمد)
|
الفكرة حلوة
لكين أصلحها ليك شوية
الفنانات كتار من حلفا لي بورتسودان ( على قولة المرحوم الفكي عبدالرحمن )
الفرق الغنائية ما تديك الدرب لا نفرق بينهم إلا بلبساتهم
الحاجة المفتقدة في الساحة الغنائية هي
فرقة من البنات
ظاهرة لم تتكرر منذ الإختفاء الحزين للبلابل
مع أنها منتشرة في بلاد برة ( الفور كاتس ، والفور إم ---- )
حاجة أوريجنال
العداد سوف يتقسم على أربعة خمسة لكين معليش حيتعوض في زيادة عدد الحفلات
حقي في هذا الإكتشاف الخطير سيكون إحياؤكم لحفلات نجاح / خطوبة / زواج كريماتي
الأولو شرط آخرو نور
كيفك يا صباح
| |
|
|
|
|
|
|
|
|
|
Re: دايــرة اتكــل علـي الله وابقـي فنـــانة!! (Re: saif massad ali)
|
| Quote: شكيتك علي الله يعني الرجال حمير |
وانا اقدر؟؟؟
اجي يا سيف مساعد داير تقولني شيتن ما قلتوا..؟!!
اظرف حاجة واحد اخونا رسل لي رسالة قال لي فيها انتي كنتي وين قبل ما تجي محل النت دة وشاربة شنو..
ايووووووة..يعني قايلني سكرانة ..
وعشان كدة يا سيف داير تقولني حاجة ما قلتها..
| |
|
|
|
|
|
|
|
|
|
Re: دايــرة اتكــل علـي الله وابقـي فنـــانة!! (Re: عاطف عمر)
|
Quote: العداد سوف يتقسم على أربعة خمسة لكين معليش حيتعوض في زيادة عدد الحفلات
حقي في هذا الإكتشاف الخطير سيكون إحياؤكم لحفلات نجاح / خطوبة / زواج كريماتي
الأولو شرط آخرو نور |
لك لك لك(بكسر اللام)وانا عويرة عشان اقسم العداد علي العدد دة..
شوف ياعاطف الفكرة حقتي براي وانا الحأبقي فنانة براي..
ومن هسة بديت اتدرب علي اغاني عشمانة الحنانة.
وقبل ما انسي قصة عشمانة الحنانة دي خليني احكي ليك قصتا .
طبعن الزولة دي في الاساس كانت حنانة بتحنن العرائي والبنات الدايرين ... ولا قاول ليك سيبك من دة..
اها الزلة دي في يوم في عروس عزمتا لعرسها وفجأتن الفنانة ما جات ..
ناس الساون جوا والشيالين جوا..لكن الفنانة باعت الجماعة ديل ومشت تغني في عرس صاحبة رجل اعمال كبير
وصاحبات العروس اتضايقن جدا جدا خاصة وانو عدد كبير منهن كانن قافلات علي الحفلة دي بالذات لانو العروس عندها اخوها جاي من برة وبفتش ليهو في عروس..
اها صاحبتنا العروس عندها صاحبتا مفتحة كدة قالت ليهارائك شنو نخلي عشمانة تغني لينا..
وبعد مناقشات طويلة انبثقت الفكرة عند صاحباتها كلهن..
وكلمن عشمانة
وطوالي وافقت..
اها وهاك يا نهيق في الحفلة وبرطعة
ومن اليوم ديك ضربت شهرتها الافاق كفنانة
| |
|
|
|
|
|
|
|
|
|
Re: دايــرة اتكــل علـي الله وابقـي فنـــانة!! (Re: عاصم ابوبكر حامد)
|
Quote: جربى الغناء ونشوف ....
تسلمى |
انا لسة حأجرب ياعاصم..انا بديت اغني عديل كدة دة..
وبدايتي الحقيقية كانت في حفل تكريم الزميلة عاوطف اسحق كنت بشيل مع الفنانة الما خمض اسرار بابكر..
حتي أسال الجماعة..
بس نوعية الاغاني البتغني فيها اسرار دي ما الاغاني الوصتني عليها الفنانة الحكيت ليكم عنها قبيل..
تعرف انا شكلي كدة حاتجاوز مسألة الغنا دي للتأليف والتلحين برضو..
يعني حأغني أغنية من كلماتي والحاني وغناي..
وهسة دي بألف في أغنية للقوات الدولية والانتخابات وقيادات الاحزاب و..هلمجرا
| |
|
|
|
|
|
|
|
|
|
Re: دايــرة اتكــل علـي الله وابقـي فنـــانة!! (Re: صباح احمد)
|
تتذكروا لمن قلت ليكم قبل كدة اني حلمت انو اختاروني خليفة للفنان عبد الحليم حافظ في حفلة ضخمة شارك فيها ممثلون من كل العالم؟
متذكرين مش؟؟
انا ما متذكرة.
مع اني بحب عبد الحليم حافظ وبحب اغاني سميرة سعيد ونانسي عجرةم وشيرين احمد وبحب كمان محمد الامين وعثمان حسين ,لكن ما حأقلدهم كلو كلو في اغنياتي..
تعرفوا السبب شنو؟
ما عارفين مش(بضم الميم)؟؟
عشان بحبهم وبحبكم كمان..
وبمناسبة الاحلام دي خلوني احكي ليكم الحلم دة مع ملاحظة انو اتكرر اكتر من مرة لكن مع احتلافات بسيطة في الزمان والالوان..
ايام انا في اسمرا حلمت انو انا في حلتنا يعني في اركويت وجاية علي بيتنا بالشارع الرئيسي فجأتن كدي اشوف ليك الرئيس الاريتري اسياس افورقي واقف جنب باب جيرانا..
كان اسياس يومها_في الحلم يعني_طويل القامة يعني اطول من الحقيقة بكتير ..
اطول من باب الجيران وكان لابس بدلة لونا جميل خلاص..
والشارع مليان ناس
اها انا شفتو واتبرجلت..
ما عرفت امشي اسلم عليهو ولا لا..خفت ما يتذكرني واقوم اتحرج مع الناس..
وفي النهاية قررت ما اسلم عليهو وامشي طوالي علي بيتنا..
فجأتن اسمع ليك اسياس بنادي فينييا صباح..ياصباح)
اتخلعت وفرحت في نفس الوقت لانو الزول دة اتذكرني ..
اها جيتوا راجعة. وسلم علي سلام عرفة وبحرارة..
وسألني انت قاعدة معانا ولا في السودان..
قلت ليهو لا انا بمشي وبجي..
حسيت انو الناس كلها بتعاين لينا..
وعشان كدة حبيت اقشر بيهو..
ومسكتوا من يدو وقات ليهو ارح معاي بيتنا..
وبالفعل مشينا بيتنا ..وقعدتوا في الصالون ومشيت عشان اكلم ابوي انو معاي الرئيس الاريتري شخصيا..
لقيت ابوي بسوط ليهو في حلة لبن كبيييييييييييرة ..
قمت كلمتوا انو اسياس معانا في البيت وطلبت منو انو يمشي سيلم عليهو..
الغريبة انو ابوي ما فرح بالخبر وقال لي الزول دة الجابوا هنا شنو؟؟
قلت ليهو جاء معاي ودايراك تمشي تسلم عليهو..
قام ابوي جاء معاي وهو شايل في يدو كورتين لبن اداني واحدة وادي التانية لاسياس
اها اسياس افورقي شرب اللبن واتخارج..
الحلم دة حلمت بيهوا في اسمرا وحكيتو لي اتنين من قيادات دارفور وكمان لواحدة صاحبتي مقاتلة بأحدي حركات دارفور..
ومرة تانية حلمت بيهو في الخرطوم لكن لم احكيه لاحد في وقتها..
وتذكرت هذا الحلم وانا مع احد الاصدقاء فحكيته له..
___________
تخريمة:
تفسيرات الحلم محفوظة لاهلها
| |
|
|
|
|
|
|
| |
صباح احمد
عاطف عمر
saif massad ali
عاصم ابوبكر حامد
خالد المحرب
Moawia Mohammed
فيس بوك
تويتر
انستقرام
يوتيوب
بنتيريست