|
موبايل السرور
|
الموبايل .. هذا الدخيل الجميل تعددت فوائده كما تعدد لصوصه وهناك عدد من الزملاء الصحافيين سرقت موبايلاتهم وأذكر منهم الأستاذ عثمان ميرغني الذي انسرق موبايله وردت له الشريحة فقال ( اللص عبّر عن مستواه الثقافي) والمنسرق الآخر هو الأخ الأستاذ ضياء الدين بلال الذي نُكب في موبايلاً لديه وهو عريس في أحد الفنادق فقال م( ما عرفت أسوي شنو غايتو قطعتها في مصاريني ساي) . الآن نقرأ معاً مجادعات موبايلي العزيز مجادعات بين الزيداني وشخصي السمين .. ومجاهد الزيداني أو ( مسروق ديمة) كل سرقه عنه بقصيدة جديدة والآن ولله الحمد عنده 148 قصيدة سرقة أغلاها فجيعته في الموبايل الرسلو ليهو أخوه (جعفر) من بلاد برّة ، كما لا يفوتني هنا شكر الأخ الحرامي الذي ريحني شديد من _ مسكولات ) الزيداني وبقيت كلما أضرب ليه يجيني الرد أمتع نفسي بالدهشة من (بت الكمبيوتر) قائلة ( عفواً .. هذا المنسرق لا يمكن الوصول إليه حالياً ) . موبايل السرور
مجاهد : موبايل السرور الليلة كيف أحوالك أب كفراً بديع .. كل النفوس تصفالك ياسيد الهواتف .. الجاري يوت أرسالك كلِّمني بصراحة ..وريني مين الشالك
عمدة بن فطوم : ودزيدان صعبان علي فقد جوّالك حليلو ود نوكيا العزيز الكان بجيب أحوالك نشال السجم بالله كيف عرف امثالك حرمك من هاتفك .. وحرمنا من مسكالك
مجاهد : سلام يا عماد سلام جابوا الخبر في الرادي موبايل السرور الليلة راح بي غادي أبو لحناً طروب بلبل يغرد شادي البسمع نغمتو .. فنان تقول في النادي
عمدة بن فطوم : لص الحنوت الفي الغلط متمادي سارق هاتفاً خطير مو عادي ماهو زي الطوبة البشيلا تمادي ولا زي الليلي الارقط متل جدادة الوادي
مجاهد الزيداني : موبايلي العزيز في قلبي ديمة غرامو أب صوتاً جميل عاجباني فيهو أنغامو والعجب العجيب واضح وصافي كلامو الهاتف الأنيق دايماً جميل هندامو
عمدة بن فطوم : موبايلك بديع عاجباني برضو أقيامو دوري أوربا جايب لكل أتيامو الخالو (سمينس) .. و أولاد (سوني) ناس أعمامو غير الثريا محال هاتف يقيف قدامو
مجاهد الزيداني : النوكيا الفريد أمثالو دايماً قِلّة إرسالو المواصل لي كل قبيلة ومِلّة الجايب شمار كل البلد والحِلّة كيفن بلاهو أكون أفتوني عاد يا خِلّة
عمدة بن فطوم : النوكيا النجيض الديمة خاتي العِلّة أُمّك في البنات (عاشقة ) وأبوك (موترلّة) نغماتك في الفريق دايماً حديث الشِلّة السارقك تنكسر كرعينو وإيدو اليمين تنشلّه
مجاهد الزيداني : موبايل السرور يا نوكيا يا موبايل السمح الظريف ، فصيلتك احلى فصايل السبب القبيل عاكسلي حظي المايل نشّالاً خبيث سواها فيك عمايل
عمدة بن فطوم : حال البلد صعبان .. بالسرقة أصبح مايل كل يوم جديد فاجعنا في موبايل حليل ود زيدان العني دايماً سائل اسيلو فد مسكول ... الرد يجيني رسايل
مجاهد الزيداني : موبايل السرور خطّك دوام مشغول من بعد الحصل بالجد غلبني أقول مين البهاتفك يوم ؟ .. مين البدق مسكول ؟ اللص اللعين تحلف تقول مسطول
عمدة بن فطوم : موبايلك أنيق زي بدله المسئول ونشّالنا- يا ربي - يسوبو فد مسكول يقضي باقي حياتو متل التقول مشلول حليل يا زيداني سمرنا معاك بالمحمول
مجاهد الزيداني : سلام يا عماد سلام ، للخير دوام تتمنّى موبايلي العزيز فارقني دون استنّى اللص اللعين حرمني ما أتهنّأ بالهاتف الجميل .. الكابلي بس لو غنّى !
عمدة بن فطوم : ما داب مسكولك زي ناس فلانة أم رنّة ويومنا النهاتفك بتنتظر كتير تتأنّى هاتفك بي نغمتو وهزازو يمرح يميل يتّنى سائل الكريم بيو تكوِّع في نمارق الجنّة
مجاهد الزيداني : في الدنيا أم جضوم ناس بي عمايل سافلة ناس كبار في السن إلا العقول متطافلة حب النفس جوّاهم أضحت في الشرور متكافلة يا رب يا كريم أهدي العقول الغافلة
عمدة بن فطوم : سرقوك نص النهار في الزحمة جوّه الحافلة والسارقك لئيم استغلّ الخلوق الغافلة يعوضك بالخير .. بدعو ليك في الفرض والنافلة والسارق تنفتحلو جهنّم .. ما يلقى طاقةً قافلة
مجاهد الزيداني : موبايل السرور للكل عندو مودّة سِجِل هاتفو الملان .. تحلف تقول سوق جدَّة نشال السجم يا رب قواه تنهدّه ما يلقى البياكلو ..عقباًً لا فطر ، لا اتغدّه
عمدة بن فطوم : فاقدين الرسايل ..سارة، وسماح ومودّة المن كفرو النضيف تحلف تقول اتوضّأ جِدّك مع (اللابتوب) فرضاً علي يتعدّ يا السارقك أكيد من كل الملل ارتدَّ
مجاهد الزيداني : موبايلي الفريد حزنان كتير لي رحولو غالبني الكلام مل لاقي شيتاً أقولو غير ملك الهواتف مافيش جهازاً اطولو أب أجمل رسايل .. الليلة وين مسكولو ؟
عمدة بن فطوم : فريدة رسايلو ديمة والعجب العجيب مسكيلو معروف من زمان في الشبكة عالي اسكيلو يازيداني أب شاشةً ملوّنة وين يا حيلو حزنانة الشبكة الليلة جد لي رحيلو
مجاهد الزيداني : موبايلي الفريد ذكراو جوايا أليمة يوم ما هجرني أعضايا ديمة سقيمة سائل الكريم الرب .. نشالنا ككُو حليمة في مكاناً ينكشف وكل مرّة ياكل نيمة
عمدة بن فطوم : شاحد الكريم قبل ماتنفتحلو رسالة قديمة روح تطلع بجاه من أرضعته حليمة علينا الرسائل الحلوة ربي يديمة وما يشفى الحرامي .. لا بي محاية لا بي عزيمة
مجاهد الزيداني : اللص المعولق إيدينو فيهم خفة عديم الأدب والذوق المابعرف العِفّة الزول اللعين يا ربي نورو انطفّى يلقالو نشالاً يسرقو لامن يبلع السفّة
عمدة بن فطوم : السارق المقطع أهبل طويل التفّة شاحد الإله الرب .. لي عديم الأدب والعِفّة في شارع الكلاكلة قندراني ، يتفو أجمل تفّة يلايقو في مكانو قُبّال يصل للفّة
|
|
|
|
|
|