نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 ورقة وقلم......
|
مرة من المرات التي زرت فيها الشمالية مرافقا لسياح اوربيين – و كان هذا هوعملي – توقفنا في احدى قرى المحس وتدعى (نوري) وهي غير (نوري) الشايقية ، وتنطق ناوري . وهي احدى المواقع الأثرية فضلاً عن طبيعتها المميزة ،فبها جبيلين صغيرين يكادا يكونان متطابقين في الشكل والحجم ، ولأننا لا يمكن ان نفوت مثل هذه الفرصة فقد نسجت على مر الازمان الاقاصيص حولهما مثل انهما كانا متلاصقين وفي يوم استيقظ الناس ووجدوهما مفصولين ! او ان النهر قسم هذه الصخرة العملاقة ، المهم ..، للبلد هذه الطبيعة والسكان السودانيين اللطفاء.
في تلك المرة ولأن الخواجات ينفقون المال لرؤية هذه الاشياء صعدنا الي احد الجبلين الصغيرين وهو وسط القرية و للنيل منظر فريد من اعلى وهو يقاوم الطبيعة الصخرية وينتهز النخيل شوية الارض الصالحة للحياة ، اما المآذن فتنبت هكذا !
و اما سبب صعودنا فقد كان رؤية كتابة منحوتة اعلى الجبل
ومثل هذه الكتابة يسمونها مسلة وهي كثيرة في مناطق المحس وتعود هذه الكتابة تقريباً لنحو الف وخمسمائة عام قبل مولد السيد المسيح . وهي مسألة بالغة الصعوبة ان تهيئ الصخرة وتملسها ثم تكتب عليها لكن ملوك ذلك الزمان لم يكونوا سهلي الاقناع بأنهم لو صبروا شوية ممكن يؤرخوا للأحداث الهامة والمعارك بوسائل أكثر بساطة وأن مؤرخ البلاط ممكن يكتب الكلام ده كلو على " كي بورد " ولا ازميل ولا حاجة !
لكن ربما احتاجوا ان يعصرو على مصمم البرامج لوضع "اوفيس" بالهيروقليفية
اها ونحن نازلين من على الجبل وجدنا مجموعة مقدرة من نساء الحلة ينتظرن نزولنا ، بادرنني التحية قبل ان اصل الارض وبعد عبارتين او اقل انفضح جهلي بالنوبية ، فانا عادة ما استهبل بشوية الكلمتين العارفنهم كل السودانيين وبعدها لا احتاج للاعتراف . نقلن انتباههن الي المرأة الخواجية التي تلبس البنتلون و تتلع الجبل زي الرجال ! و يبدين مرة اعجابهن ومرة سخطهن ويتندرن على بعضهن من الرطوبة والآم المفاصل ، الغريب فعلاً عن النساء ان هؤلاء المحسيات يتحدثن النوبية بلهجة المحس والعربية السودانية بصعوبة بالغة ، والخواجية من ما قامت لا تتحدث سوى الاسبانية الكاتالانية و الانكليزية يااا الله يا الله لكن ما ادهشني انهن بدأن في الحديث بكل هذه اللغات وهاك يا ضحك وقرقرة . بقولو في شنو ؟ بفهمو بعض كيف ؟ الله اعلم !
اها بعد شوية سألتني احدى الخالات عما اذا كنت سوداني ام لا . فأكدت لها انني لست خواجياً فطلبت مني ان ما يثبت سودانيتي هو ان افيد ناس البلد ! ذلك بأن افتح تلك الخزنة !!
: لكن يا خالة دي كتابة ساكت دي ما خزنة !!
: ده الباب بتاعو وهو مليان دهب
: ابداً .. دي مرة كان الناس ديل متحاربين بعدين لما فازو قامو كتبو الكلام ده هنا
: اسمع يا ولد نحنا مولودين هنا والكلام ده عارفنو كويس والباب ده بيفتح لو الزول قرا السر المكتوب فيهو
: يا خالة ...
: انتو لما يوروكم الكلام ده في الجامعة مش عشان تفتحو بيهو الخزن ؟؟
: يا خالة انا ما قريت آثار و لا بعرف الكلام دة
: كويس اقعدو كدة لحدي ما الخواجات ديل يفتحو كلو
: والله دي ما خز...
: نحن ما بنعرف نقرا لكن ممكن نكسرو ونتلع الدهب ده
لم احاول اكثر ان اشرح ان هذه الصخرة كانت تقوم مقام الورقة ليس الا
وسألني الخواجات عن الحوار الذي دار بالعربي فقلت :
ابداً ما في حاجة !! وواصلنا رحلتنا.......
|
|
 
|
|
|
|
|
|
|
|
Re: ورقة وقلم...... (Re: Ibrahim Algrefwi)
|
عزيزي ابراهيم الجريفاوي
سعيد بجيتك لكن القصة ما كتابة حيط وان كان انتباهك لطيف لثقافة الرفض البنتجها اولئك الذين يقطنون الشوارع والانفاق وذلك فن يتأسس وفق شروط اجتماعية ونفسية مختلفة والكتابة المنحوتة على الصخر ما كانت مقصود منها ان تلعب دور فني انما مجرد وظيفة التدوين اي الورقة والقلم او الword file مرورا بورق البردي وما الي ذلك . واحب اهني خيالك يا قرمبوز في مسألة الحيطة دي , فكرت فيها كيف ؟ ياخ دة صخر قرانيت !
اما موضوع التدوين والتوثيق فده وعي مختلف للاسلاف اللي نحن ما احفادهم وشايف في صور ما عاوزة تظهر ما عارف ليه لكن الصور في البوست ده من القرية المذكورة اعلاه ومعاك هنا صور لكتابة من منطقة تانية اسمها تمبس وهي قرية صغيرة تتقاسم رقعة ارض موزعة بين صخور قرانيتية رمادية ونيل وشوية نخيل ومحس طيبين وفيها اجمل مركب شراعي يقطع النيل باستمرار من والي الجزيرة وفيها كتابة من حوالي الف واربعمائة ق. م يعني ما قبل نبتا وفيها برضو كتابات متأخرة نبتية او نبتاوية المهم كلها نوبية
| |
|
|
|
|
|
|
|
|
|
Re: ورقة وقلم...... (Re: Ibrahim Algrefwi)
|
كابو
عيد سعيد أول حاجة
تاني شئ شغل سمح (والخواجة يصور ساي) . حوار الطرشان الذي دار بينك وتلك المرأة صدقني
لقناعتها التامة بأن هناك ذهب خلف الكتابة .
عربات الخواجات كانو يزورون مناطقنا منذ أمد بعيد ياكابو أذكر جيداً كيف كان الشباب يهرعون
كعمال يومية وهم يقومون بحفرياتهم كان يقدمون لنا الكساء والدواء أحيانا كنا ننتظرهم ياكابوا
كإنتظارنا للغد فقط لأنهم كانو يقدمون لنا القليل مما عجزت عنه حكوماتنا الوطنية وعاش كفاح الطبقة العاملة .
بالله واصل في هذه الحفريات ياصاحب .
| |
|
|
|
|
|
|
|
|
|
Re: ورقة وقلم...... (Re: عبد المنعم سليمان)
|
عزيزى محمد حنفي
تحياتى
عمل جميل وحقائق غائبة من حضارة
للأسف قد لا نستحقها يأتى (الخواجات) لتوثيقها
ونحن لا نملك إلا أن نهاتر
بعض الصور قد ضاعت أرجو إعادتها
ولك كل الإحترام
رأفت ميلاد
| |
|
|
|
|
|
|
|
|
|
Re: ورقة وقلم...... (Re: رأفت ميلاد)
|
شكرا كتير ياحسين على المرور والدعم الجميل.....
كل سنة وانت طيب ياخضر وشكرا لوقفتك هناوالاشادة . اوعدك بالعديد من الصور والكتابات عن المنطقة واتمنى لو شرفنا هنا بعض ممن يفقهون بالاثار والتاريخ بتخصصية اكثر، هذا البلد الفقير غني جدا بالقصص والتاريخ والاسفار وقد لا يكفي عمر للسفر في السودان الكبيييير ده
العزيز منعم اشكرك كتير وجيتك علينا ما ساهلة اما اخونا ابراهيم فما دخل في حته الا وترك فيها نكهة خاصة وبيعمل مشاكل برضو ! عاوز يدخلنا في كتابة حيط وما الي ذلك
العزيز رأفت سعدت جدا بمشاركتك وليك علي محاولة اعادة الصور المفقودة وصور غيرها كمان .. وللخواجات قصة لا ادري هل سأكتب عنها في نفس البوست ام افرد لها آخر , لكن عموما لهم سلبيات كما لهم ايجابيات ايضا
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
اعزائي عابري هذا البوست موضوع الورقة والقلم انتهى لكن ادعوكم لرؤية حال رجل عظيم عمل به الزمن العمايل ولأننا مرينا في تمبس آخر مرة لمششاهدة كتابة على صخورها قرب النيل وشلال تمبس الذي لم يعتبره الانجليز شلالا محترما وهو شلال بديع جدا حوالي الستين كيلومتر جنوب الشلال الثالث او كجبار كما يسمونه
ودة الشلال التالت برضو
اما صديقنا العاوز اوريكم ليهو ففي نص حلة تمبس
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
والراحل دة في روايتين عنو اما اولا هو تود موس اي الولد الوسيم بالنوبية وهو لا ينطق تحتمس كما يرد في المصريات (ساعدونا بتصحيح الترجمة يا خضر واولاد النوبة)وهو من اواخر ملوك فترة كرمة حوالي الف واربعمئة ق . م يعني كدة بكون راقد رقدتو دي زي تلاتة الف واربعمائة سنة ! شوف ليك جنس نوم !
والرواية التانية بتقول انو تمثال لتهارقا العظيم وفي الحالة دي بيكون نايم ليهوالفين وتمنمية سنة ! برضو ما حبة.
ما يدعم تودمس قرب المنطقة لكرمة او البرقيق حاليا عاصمة دولته آنذاك والشي التاني انو يعتقد بان قرية تمبس ما هي الا تودموس نفسها وقد صيرها الزمن تمبس ! ولكن تهارقا العظيم كان يحكم كل وادي النيل واتسعت حدود امبراطوريته حتى اجزاء من ليبياغربا والشام والعراق القديم شرقا وجنوبا فرض سيطرته على اجزاء من حوضي النيل الازرق والابيض . ورجل بهذه السلطة (تم ذكره في الكتاب المقدس) لو عاوز يعملو ليهو تمثال في اي مكان ممكن يتعمل ولحدي ما ناس الاثار يؤكدو اوينفو هو راقد هناك !
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
والراحل دة في روايتين عنو اما اولا هو تود موس اي الولد الوسيم بالنوبية وهو لا ينطق تحتمس كما يرد في المصريات (ساعدونا بتصحيح الترجمة يا خضر واولاد النوبة)وهو من اواخر ملوك فترة كرمة حوالي الف واربعمئة ق . م يعني كدة بكون راقد رقدتو دي زي تلاتة الف واربعمائة سنة ! شوف ليك جنس نوم !
والرواية التانية بتقول انو تمثال لتهارقا العظيم وفي الحالة دي بيكون نايم ليهوالفين وتمنمية سنة ! برضو ما حبة.
ما يدعم تودمس قرب المنطقة لكرمة او البرقيق حاليا عاصمة دولته آنذاك والشي التاني انو يعتقد بان قرية تمبس ما هي الا تودموس نفسها وقد صيرها الزمن تمبس ! ولكن تهارقا العظيم كان يحكم كل وادي النيل واتسعت حدود امبراطوريته حتى اجزاء من ليبياغربا والشام والعراق القديم شرقا وجنوبا فرض سيطرته على اجزاء من حوضي النيل الازرق والابيض . ورجل بهذه السلطة (تم ذكره في الكتاب المقدس) لو عاوز يعملو ليهو تمثال في اي مكان ممكن يتعمل ولحدي ما ناس الاثار يؤكدو اوينفو هو راقد هناك !
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
عموما الراجل راقد في نص الحلة والاهالي يسمونه (اقجنوندي) والاسم بالنوبية يحمل معناه دلالات (الخصوبة) وهي من ركائز ديانات النوبة القديمة وقد توارث هذا التأثير حتى يومنا هذا ! مش كدة ياخضر؟ كما ورثنا الكثير من طقوس ديانة آمون او أمن مثل التبرك بماء النيل وغيرها من العادات.. المهم ان اقجنوندي تهارقا كان او تودموس يرقد في حالة مزرية
تبول عليه الكلاب وعابري الطريق ويتقافز فوقه الصبية جيئة وذهاب و ليس سوى العم رضوان داؤد ينظفه ويهش الناس منه ويلح على ناس الاثار في الخرطوم ان يجودو عليه ولو بسلك شائك
وقد قالو ان راس اقجنوندي قد انفصل عنه في محاولة فاشلة لايقاظه وعندما سقط طارت شظية من راس التمثال وعبرت النهر لتسقط في الجزيرة ! كما يحلو لاهل تمبس ان يرووا
المنطقة احدى محجرين هامين لمنحوتات الفترات الكوشية كلهامنذ كرمة مرورا بنبتة ثم مروي والثانية هي تبو التي جاء منها التمثالان العظيمان لنتك امني وتماثيل الكبش امن بالمتحف القومي وقد اشبعهما الصديق طلال عفيفي تصويرا
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
والله يا محمد حنفي بقدر ما هو مؤلم حال الناس
وفقرهم في هذه المناطق وبقدر ما هو محزن مآل
هذا التاريخ ، فإن في كتابتك حكاية جميلة ..
أتمنى إنك تكتب وتحكي بإتصال وإستمرار عن مشاهداتك
خلال ترحالك عبر الأرض السودانية ، حتى لا تنسى ،
ونتعرف نحن على المسائل دي من حتة أقرب ..
أنا مأخوذ بالحكايات دي وبالمنطقة دي من العالم ،
لولا حاجات معينة كنت مشيت أعيش هناك ..
المهم يا صديقي ، ما نطول في الكلام ، زي ما قال عمك
الحاج حسين ده يوست جميل ..
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
توثيق مهم وكتابة متميزة. كأنها رواية او مشروع رواية.
ما هو المكتوب فى هذه الصخور يا محمد حنفى؟
وبأى لغة؟ هل هى الهيروغلوفية؟
هل لك ان تنشر خريطة لهذا المكان وموقعه فى السودان الشمالى؟
مع فائق الشكر والتقدير لمجهوداتك ومجهودات الخواجات التى لم تعجب الشاعر حميد فى زمن ماضى ملتبس!
| |
|
|
|
|
|
|
|
|
|
Re: ورقة وقلم...... (Re: Adil Osman)
|
العزيز طلال .. سعادتي كبيرة بمرورك هنا وكنت عاوزك كخبير كدة تعلق على التصوير ! عندي فيهو مستقبل ولا لأ .. ولو كان في طريقة يا طلال كان يا اما نعيش في كل حتة في العالم او لا نستقر ابدا من التجول فيه .. حقيقة للحكايا طعم مميز في خشم اسيادها وبيئتها..
العزيز الملك .. شوفتك هنا تفرح بالجد .. انا لي زمن بحاول انزل البوست ده وغالباني ليك القصة ولولا مساعدة فريق الاصدقاء خبراء التكنولوجيا سفيان نابري ووديدي وقرمبوز كان لهسي مانزل .. تجي ببساطة كدة تقلع الصورة وتركبها لي في الرد؟؟!! سبحان الله
العزيز عادل سعيد جدا بمرورك وطمنتني على قيمة ما كتبت وصورت . اما الكتابة فهي بالهيروقليفية وفي كثير من المواقع النوبية لوحظت بعض الاختلافات بينها وتلك المصرية ولكنها ليست اختلافات جوهرية وكأنما فقطmodification وهي غالبا تؤرخ لمعارك واحداث هامة. كان معروفا ان ان الملك تودموس خاض حرب شرسة ضد حتشبسوت المصرية وقام بازالة رسوماتها عن المعابد واستبدالها برسوماته هومما يدعم فرضية انه نوبي وان بعض الكتابات من منطقة توبس لها علاقة بتلك المعارك . طبعا ده كلو سمعتو سمع وقريتو في بعض الكتب والمنشورات او من الحوار مع البعثات الاثارية في الشمالية لكني لست مختصا لذا فانا احكي وللاثاريين ان يصوبو حكاياتي ويفيدونا اكثر . اشكرك كتير وكل الاعزاء الذين توقفوا هنا...
| |
|
|
|
|
|
|
|
|
|
Re: ورقة وقلم...... (Re: mazin mustafa)
|
العزيز مازن يا ود يا مشاغب اضافتك غنية وممتعة
بخصوص الاخت غير الشقيقة كانت العادة ان ينزوج الاخ اخته من الاسرة الملكية لضمان ورثة الابن للعرش لانو بيورث لابن اخت الملك ، وحتشبسوت يقال انو ما كان عندها اخ لذا لم تزوج من الاسرة الملكيةوالا لكان حارب تحمتس بدلا عنها ودة زي ما حصل بين نتك امني و امني توري وناس الاثار اعلم
اما بخصوص كشتا وبعانخي فهم اسرة واحدة حكمت مصر والسودان معا منذ جدهم الاكبر الارا حوالي المائة عام وحتى نجل تهارقا انلا ماني الذي قهقره الاشوريون الي نبتا ويسمون وفق للمصريات الفراعنة السود او الاسرة 25 ودة كلو تلفيق لانو الجد غزا مصر واخضعها لسلطته ومن هذه الاسرة من اتخذ نبتا عاصمة للامبراطورية ومنهم من اتخذ غيرها لكن بعانخي او بيي حارب المصرين حرب تأديبية لسؤ معاملتهم للخيل وهو من اسس مدافن للخيل بالمقبرة الملكية للاسرة بالكرو والتي كانت تسمى كري في ايامها وتدفن واقفة محلاة بالجواهر تنظر في اتجاه الشمال وجدت 26 مقبرة من هذا النوع . اما المتعبدة الالهية وبصراحة الترجمة اسمها محبوبة آمون زي لقب البغي المقدسة (عشتار) وهي الملكة الام بالنوبية كنداكا ولازم تكون ملكة ام ملك لتنال هذا اللقب ولو هي اخت بعانخي معناها زوجته وفق العرف و بالتالي تقاسمه العرش - ملكة - اذن ام ملك وهي كنداكا ودة كان النظام الاجتماعي الديني لاسرة الملكية وقتذاك وناس الاثار اعلم
| |
|
|
|
|
|
|
|
|
|
Re: ورقة وقلم...... (Re: الملك)
|
خبرني احد اعمامنا وهو من مواطني كريمة . اسمو عم عوض وهو رجل تقدم بالسن الا ان له تهذيب وتواضع عظيمين ويستمتع بالحكي قبل ان يمتع محدثه..يحكي انه عندما كان صغيرا وكان جبل البركل المقدس -وموطن آلهة النوبة منذ ان كان آمون روح مجردة داخل الصخر قبل خروجه في هيئة الكبش- يتراءى من البعد وهم يقصدون الاعشاب الجافة لاغنامهم ويقصدون المغامرة , وجدوا فتحة في الارض قرب الطرابيل وهي الاهرامات باللغة الوطنية , فبدأوا يستكشفون الحفرة فأفضت الي ممر قادهم لغرفة كاملة تحت الارض وحالكة الظلمة وفارغة الا من علب سجائر (كنت) الفارغة!! ولا يدري كم امضوا من الوقت هناك الا وقد تفاجأوا بالظلام في الخارج ايضا قد حل فهربوا الي بيوتهم ويذكر عم عوض ان احد رفاقه قد اصابه التعب من المغامرة فنام مكانه قرب الجبل مما اضطر الاهل ان ينفروا بحثا عنه بالفوانيس وحمله نائما الي البيت وقد اقسم الصغار الايبوحوا بسرهم لاحد الكبار حتى لا يتعرضوا لتوبيخ اوالجلد ! فقد اذهبت خراقة الكبار العديد من الفرص لعدم احترام اي صنف من الحياة غير المتعلق بالاكل والشراب . هل نتوقف قليلا عن ارهاب الصغار بالجلد؟ هل نبحث عن معنى بين الانقاض والاوساخ والمخاطر؟
نرجع لموضوعنا ومزيد من الصور لقلع يا ناجي
بمناسبة الاسرة 25 اوريكم طرابيل الكرو
ده هرم ما معرف صاحبو او صحبتووبيظهر النفق المؤدي لغرفة الدفن وهي للأسف دمرها الزمن وفيضانات النيل لانو ببساطة زمااان الزول الاكتشفها بعد ما افرغها - ودخن جوة بمزاج_ لم يغلقها وتركها هكذا
عدا مقبرتين وجدت غف دفنهما بحالة تقريبا جيدة هما للملك تاونت امون وينطق برضو تانوت امني ومن يشك في انها امه الملكة كالاهاتا وكلاهما من الاسرة 25 حوالي القرن السابع ق.م
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
الملكة هنا في الغرفة الخارجية قبل غرفة الدفن ويحميها الاهان ودة الحائط الايمن وهو حائط الخروج للحياة الأخرى وليست الآخرة حيث الحائط الايسر للدخول لغرفة الدفن وفيها الحساب والشاطر بيطلع
المومياء في حائط غرفة الدفن الايسر وبعد مايجي اله الحياة ويلمس انف المرحومة بغصن الجريد فتظهر حية مرة اخرى على الحائط الايمن
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
جدران غرفة الدفن والغرفة الخارجية كلها مليئة بالرسومات والاسقف باللون الازرق السماوي وبها نجوم حمراء وصفراء بالاضافة للادعية والصلوات والرسومات العديدة للآلهة الحافظة
والكرو بها ايضا آثار طبيعية مثل الغابة المتحجرة وهي بضع كيلومترات من القرية
والاشجار دي اتحجرت من حوالي مية وعشرين مليون سنة !!!
وشكرا مرة تانية للطفكم
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
حبيبنا كابو:
الكلام الفات كان من الراس ما من الكراس... والراس انت عارفو خربان..المهم..الواحد مشى راجع معلوماتو... و وجدد أخطاء في كلامو تستوجب المراجعة:
"شبنو بت" الأولى ابنة الملك "أوسركون الثالث" شاغلة وظيفة المتعبدة الالهية و الأعنف بهذه الوظيفة الي أن غزا الملك "كشتا" الكوشي مصر العليا و أخذ بزمام الأمور منصبا ابنته "امنردس" وريثة ل"شبنوبت" و ابنة متباة لها (بالاكراه طبعا)...
و الراجح أن بيعانخي قد ورث الحكم بعدها و تزوج من الاستاذة "امنردس".. و باقي القصة الانت حكيتها.....
| |
|
|
|
|
|
|
|
|
|
Re: ورقة وقلم...... (Re: Adil Osman)
|
العزيز عادل وجودك مهم جدا في البوست واضافاتك مهمة وممتعة الخريطة لو ملاحظ مكتوب عليها نوبيا مش السودان وقصة ارتباط الحضارتين المصرية والنوبية او انطلاقهم من نقطة واحدة هي مسألة محتاجة لبحث متخصص . الصورة لكريمة واوليمب النوبا (البركل) جميلة وانا ماشفتها في البوست داك اما الصور فانا متخيل اني اعدت نشرها لكن حأتاكد برضو
مودتي
حنفي
| |
|
|
|
|
|
|
|
|
|
Re: ورقة وقلم...... (Re: محمد حنفي)
|
الاعزاء عابري ا لبوست حبيت انزل مزيد من الصور بعد المدافن الملكية في الكرو وهي اول موقع لاهرامات نوبية والموقع فيهو مدافن ما عندها اهرامات ولكن لها ما يعرف بالمسطبة و التدمير الحصل بواسطة الطبيعة والانسان واضح جدا لانها اتبنت بالحجر الرمليsandstone وهو هش جدا ولا يصمد كثير في مواجهة الطبيعة وفعل الفاعلين , الحصل انو تهارقا العظيم قرر نقل المدافن الملكية من الكرو الي نوري والمرة دي نوري الشايقية وكان هو اول من دفن فيهاوباكبر هرم - من حيث النسب بين القاهدة والارتفاع تشبه اهرامات نوري الاهرامات المصرية الي حد ما - الجميل في الامر ان المدفن كان لنفس الاسرة 25 لكن بين الكم وخمسين هرم اربعة فقط لملوك ذكور احدهم آسبلتا او اسبلطا والبقية لكنداكات يامازن وملكات اناث!!
مودتي
| |
|
|
|
|
|
|
| |
Ibrahim Algrefwi
Hussein Mallasi
خضر حسين خليل
عبد المنعم سليمان
رأفت ميلاد
mazin mustafa
طلال عفيفي
الملك
Adil Osman
"الله يستر"
فيس بوك
تويتر
انستقرام
يوتيوب
بنتيريست