الأسلحة الكيميائية وحقيقة استخدامها في السودان في منتدى ميديكس للحوار
|
|
 ديل من ناس البورد النفسي اشوفهم جد جد
|
ShiningStar
لن أقول البت الحديقة
الحديقة زاتها مليانة ناموس
احياناً اتقمصها فأظن بأنني هي أو هي انا- سلبطةوجن رسمي-
في جلسة مراهقية جميلة - من ذاكرة الماضي الجميل- كنت أؤكد بقوة لا تقبل مجالاً للشك أن (يا اخوانا نزار قباني ده لا مبدع لا يحزنون، هسة أنا ببساطة شديدة ممكن ٌأقول كلامه ده، شنو جلست والخوف بعينها تتأمل فنجاني المقلوب، يعني ما صعب، ما زي مثلاً كلام ناس أبو نواس واللا التاني القادينا في حصة العربي ده ما عارفة البحتري واللا منو ده)
فترد أخرى محبة للعربي ، تموت في دباديب العربي (والله ما قادي إلا انت، خليك كده هناي القادينا ده هناي القادينا ده تقدي انتي العربي وتطيري السما الاحمر، بالله انتي تكتبي شعر؟؟! والله تكتبي شعر إلا احلق ده)
ومع علمي أن (ده) ما هو إلا بضعة صوفات لن ينقص حلقهن او يزيد شئ
رغم ذلك يستفزني تحديها، تضايقني شطارتها، تغيظني درجاتها العالية،فأقرر أن اكتب شعراً
وفي الليل البهيم - مع انه حتى نهارنا هناك بهيم بفعل الكهربا- وفي الملاية الباااااااااااردة بفعل النسيم العليل،في الحوش الكبير، اقرر أن اكتب كلمات ليست كالكلمات، فاعصر رأسي عصرة تزيده قوديساً، ولا ينقذه مني إلا نداءات أمي المستمرة (قومي ولعي الكانون، الحاج داير قراصة) فاستغرب ل(العالم دي) قراصة نص الليل؟؟!!!
فاتهادى حافية يلطخ سخم الفحم الأسود يداي بالسواد، فيطير شيطان شعر نزار قباني زاتو بفعل الهبوب البارد وريحة الجاز
الله يحرق أم القراصة زاتها ياخ
وصباحا تسألني صاحبتي أم الصوفات العشرن(اها كتبتي الشعر؟؟)
فأضحك بلا مبرر للضحك، وداخلي يؤكد أن السبب ليس الفحم ولا اشتهاء الحاج للقراصة نص الليل، ربما يكمن السبب في أن لا شيطان شعر لدي، ربما يكمن السبب في الفكي الذي طير الشيطان يوماً بعد أن قرأ علياحسب ما ارشدته أمي التي ما زالت - للآن- تصر أن (في راس البت دي شيطان كلكي)،ربما هو فعلاً السهل الممتنع
هسه مالم كان ومال شيطان شعري، ما كان اكلني عيش؟؟!!
ما علينا
shiningStar
ناعمة، عجونة، ذات شعر خفيف ناعم،ليست منكوشة ولا ترتدي السفنجة
بت ناس، - يعني احنا جايبانا الملايكة سياحة؟؟- اعني حنكوشة او مروقة
صامتة كالنسمة،لماحة وتعاني مشكلة القشرة وسواد الركبة
أقرأها فاحس (ممكن أكتب ذي كلامها ده)
أقرأها فاحس بانتعاش، ويزيد حماسي لرؤياها، بل اؤكد لنفسي أن (والله البت دي دفعتي وبعرفها)
اقرأدوما بوست جبريل وكلي خوف ان يظهر لجبريل فأنا منذ البداية أكيدة بان جبريل مالو ما جا ماقال بجي مالو ما جا.....
هكذا أنا وشايننغ استار
البت المفلكبة
جد جد ، نفسي اشوفها
|
|
 
|
|
|
|
|
|
|
|
Re: ديل من ناس البورد النفسي اشوفهم جد جد (Re: Abd-Elrhman sorkati)
|
عبد الرحمن
انت بتقول فيها
الموضوع فيه باقي؟؟
إحساس؟؟
يا عزيزي الموضوع قدة رسمي
انت لسة يمكن ما عرفت عن بت قضيم النقناقة القدة الكلامها ماينتهي
يا عبد الرحمن انا اطبق المفهوم الأنثوي بكل أبعاده والتي من اهمها .. الثرثرة
الثرثرة في الوقت الما مفروض نثرثر فيه،
إما نثرثر وإما نبكي، وقد فضلت الثرثرة
فقد ، جفت الدموع، وبالمناسبة ده اسم فيلم مصري بايخ
ولماذاالآن؟؟؟ربما السبب ذلك الخطاب، من زمن ما ،حيث وجدته في كرور ما، وود الجيران مسخن شديد
كان لازم اقلب فيه في اللحظةالضيقة دي؟؟!!
وأكتشفت - في نفس اللحظة الضيقة دي- أن ليس معظم الأحلام ضائعة، بل جميع الأحلام ضائعة
إنها ليست ثرثرة في النيل كما يطالعني عنوان كتاب أجاثا كريستي المرمي في مكتبتي منذ زمن المتوسطة لم يتسنى لي بعد أن احكم، هي قصة جميلة أم هي قصة (ساي كده)
كان قد أهداني القصة في كامل وجاهته، وقال (لازم تتثقفي المسلسلات المصرية دي حتدهور مستواك الفني)
!!!
أهداني قصة أجاثا كريستي كي لا تدهور مستواي الفني، وأنا في كامل الدهشة والانبهار من ثقافته الواسعة، طالعت الأهداء في الصفحة الأخيرة، حيث رغب في التأكد هل سأصلها أم لا؟ هو لا يدري أنني في حياتي لم امسك كتاب من البداية، وأنني في امتحان الفيزياء مثلاً، رسبت عن جدارة، لانني درست الفصل العاشر، ولم نكن قد وصلنا للفصل الثامن بعد.
وانا ايش عرفني؟؟؟!!
ومع ذلك يا عبد الرحمن لم تكلل القصة بالنجاح حيث تزوج فيها الأبطال وخلفوا صبيان وبنات وعاشوا في تبات ونبات
بعد كم وعدد سنين، تخيل، اكتشف انه (الزمن تغير) و (الهبوب زاتو بقى كتير)حتى المدار غير مداره، والشتاء في السودان بقى يجي في شهور الصيف، ووفقاً لذلك تغيرنانحن، مع انناما زلنا نحن، او على الأقل انا ما زلت نحن، لم يتغير شئ في رسمي، زدت بعض الكيلوات ربما، لكن لم استطيع التخلص من شامتي التي تستقر فوق حاجبي الشمال كفارس مغوار، ما زال في عيناي بعض الحول، وما زال جرحه غائراً في صباع قدمه الكبير كما هو، ما زال يعرج، وما زلت عويرة ما زال ود القبايل وما زلت -تصدق- للآن بتنورتي الجامعية السوداء لما بنية
!!!
تصدق
!!!
وقد كتب في الإهداء
اقري .. اقري عشان ما اضطر يوم اشوكشك
وشوكشني
وانقر شنو
برضو ما قريتها
وعموماً
سلمت للمرور
بالله نسرين سوركتي المذيعة البنية السكرية حلاوة لبن ديك قريبتك؟؟
سلمي لي عليها لو
وخليك معانا
مش حتقدر تغمض عينيك
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: بت قضيم)
|
تبارك شيخ الدين
تبارك جار جيران جماعة أصحابنا
توطدت العلاقة بين اسرتي واسرتهم فأصبحنا نزورهم كل حين ومين
وامتدت العلاقة قوة بعد زواج أحد أخوتي..الله ،، مالكم أنتم وهذه القصة الطويلة؟؟!!
نهايتها أنني في كل مرة كنت أزور فيها هذه الجماعة مع أهلي، كنت استمع لقصص تبارك ال(حارق جنينة) و (فاطي سطر)ووو
أعجبت به بطريقة عويرة، وهي حقيقي عويرة
لا شفته، ولا لمحته حتى
ولم تكن القصص المجنونة التي تقال عنه ومقالبه وتصرفاته اللامتوقعة دائماً، هي بالقصص التي تعجب الفتيات الصغيرات في سني عادة
لم أكن مثلاً معجبة بابن جيراننا (الكديس) الوجيه جدا صاحب العيون الملونة.
ولم أعجب براغب علامة مثلاً وكان وقتها (وااااااااو) فنان الموسم الوجيه الثري الأمثل
بل أعجبت بصورة في عقلي لتصرفات شخص أقل ما يقال عنها (مسحلبة)
وقبل فترة قصيرة، ولما استمعت لغناء رشا شيخ الدين، ابتسمت بصمت متذكرة قصة إعجابي السرية بجار جار جيران جماعة أصحابنا
وقلت في نفسي لو انني استمعت لهذا الغناء وقتها، لكان إعجابي فات الحد، ولربما - من يدري- كنت تجرأت لفقط معرفة هذا الشخص، او حتى لمددت رأسي لرؤية شكله وهو يجلس في (عتبة الخور) مع أولاد الحلة، حاكين اسرارهم وأمانيهم العجيبة والتي كان يصلنا أن من ضمنها رغبة أحدهم في أن يصبح (سيد دكان)، ولما يسأل لماذا،كان يجيب ببلاهة ، (عشان سيد الدكان عنده طحنية كتيرة وانا بحب الطحنيةما حابيعها حاكلها كلها)
ثم يضيف بعد هنيهة عوارة(غايتو سيد الدكان حيطردني عديل كده)
الله،، هو يعني بعدده كلو طلعت بياع في الدكان ما سيدو؟
يعني حتى صاحب مصنع الطحنية ، هذا كان يعتبر عندهم من الاماني المستحيلة
سبحان الله على براءة القلوب والاماني وقتها
أظن الاغتراب شوهنا عديل كده
ثم غبت عن البورد فترة وإذ به سبحان الله، يظهر هنا، الفارس الملثم
(غايتو بعد ده كله لو ما طلعت وجيه بجضمك عديل)
كل التحية مع اني لم اقرأ لك للأن الكثير الذي يجعلني أكون انطباع محدد عن شخصيتك بعد
للآن - غايتو- مع الردود القليلة التي قرأت لك، عاقل جدا وليس مفلكب جدا كما كان يشاع عنك
تبارك الذي بيده... ونمتنع عن إكمالها تطبيقاً لإجراءات أمنية
يقوموا يطلعونا شعوعيين واللا حاجة
اعتذر عن إدعاء اولاد حلتكم بانك مفلكب وفاطي سطر
وقد ذكر هذا هنامراعاة لتداعيات النص (دي ذي جمل فتحي البحيري كده)
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: Hussein Mallasi)
|
حبيبي فاكرك معاي وييييييين حبيبي فاكرك معاي
تسعد بي سعادتي وتشقى عشان شقاي
هنا في وش زول أصفر بضحك بخبث ما عارفة اجيبه كيف
ما با حسين ملاسي لو كنت معاي تبقى مشكلة رسمي
صورة زول أصفر بضحك بخبث ما عارفة أجيبه كيف
يسلموا الديات على المرور وبالسوداني يسلموا الكرعين على المرور
صورة زول أصفر بضحك بخبث ما عارفة أجيبه كيف
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: بت قضيم)
|
بنت ضيم
لا ادرى ... و لكن يخيل الى انك تكثرين من شيئين:
اما الاول : فهو الاستماع بإنتباهة للاذاعات المسموعة خاصة ام درمان
و اما الثاني : فهو خدمة ال " حبوبات" و هن فى حالة ونسة قهوية.
و أزيد:
ان " الهترشة" دليل صارخ على فن الاستماع و الحكى، و المزج بينهمابصرامة.
| |
|
|
|
|
|
|
|
|
 Re: ديل من ناس البورد النفسي اشوفهم جد جد (Re: تراث)
|
يعني عايزه تشوفي اتنين بس .. في البورد دا شايننغ وتبارك ..؟؟
كشكريهــا شوية .. قولي عايزه اشوف بكري
عندك اعتراض يعني في شوفت بكري أبوبكــر .. والا الفهم شنــو ؟؟
..
.
مشتاقين بالجد .. ومعاها يسلمـــو.
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: tmbis)
|
بت فضيم
خطيرة إنت .. عسل إنت .. بسكويت إنت..فقوس انت .. وحاجات تانية ..
الا المحيرني يا بت قضيم يا اختي شايننغ وتبارك ديل وينهم هسع.. ما يقولوا حاجة... بافين دقيق ..؟
معليش .. شابفك صريت وشك .. ما تنفعلي على بلادتي ... أصلي جديد في البورد.
لكن بيني وبينك كدي .. شايننغ وتبارك ديل بتحسدوا .. شوفي فكي الحاجة الطلع جنك الكلكي يلحقهم قبل ما تواصلي الكتابة في الإتجاه الماشة فيه ده.
أها قلت لي لسه ما قاعدة تقري ... وتبدي الكتاب من الباب العاشر؟؟؟؟
مودتي..
محمدنور
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: بت قضيم)
|
Quote: وصباحا تسألني صاحبتي أم الصوفات العشرن(اها كتبتي الشعر؟؟)
فأضحك بلا مبرر للضحك، وداخلي يؤكد أن السبب ليس الفحم ولا اشتهاء الحاج للقراصة نص الليل، ربما يكمن السبب في أن لا شيطان شعر لدي، ربما يكمن السبب في الفكي الذي طير الشيطان يوماً بعد أن قرأ علياحسب ما ارشدته أمي التي ما زالت - للآن- تصر أن (في راس البت دي شيطان كلكي)،ربما هو فعلاً السهل الممتنع
|
فعلا علي قول والدتك أن (في راس البت دي شيطان كلكي) وليكن في علمك ان هذا الشيطان
ليس شيطان شعر وانما هو مقدرة غير عادية علي الثرد والحكي بموهبة قوامها سخرية زكية
محببة ولغة شعرية سلسة .. وامتلاكك لناصية اللغة يمكنك من وضع الوانك بجراة وثقةعلي جسم النص فتاتي برائحة الصباح الخريفي . اتمني لك التوفيق من كل قلبي
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: ابراهيم برسي)
|
Quote: بت قضيم
تاريخ التسجيل: 05-07-2002
مجموع المشاركات: 1558 |
قدر ما قريت ما فهمت
ملاسى لقطا طايره
المخ تخين
إمكن عشـان ما حضرت أيام رودا مردا
حضرت زماااااان شكلة حريم فى سـوق الشجرة فى أمدرمان
كان فى واحدة بتكورك (يا مريم قدوووووس) السـوق كلو فرتق
قمت جارى . كنت صغير !!
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: رأفت ميلاد)
|
ام قضيم
شايينق ، اتمني اراها تكتب مرة اخرى ، ازكر انني زمان كنت ارسل علي الماسنجر رسائل لها ان تعود للكتابه ، هي وشيري ، واحب كتابة شايينق، تدخل توش في القصة ، بل تجعلك تقول ليها (كدي اصبري شوية)وجري نفس ، بعدين طريقتها كأنها تقص لك انت ، او كأنها امامك تحكى لك انت حكاية مرة بها.
حقيقة لا احب ان افسم البورد علي الناس الجداد والناس القدام ، لكن مثل شايننق لم اري احدا ، والذي اراه معجبا بها بشكل واضح يظهر جليا في كتاباته هو اخونا بناديها ، كان يعشقها ويلهو معها بالكتابة لا مجاراة لها (فرغم امكانية بناديها ) الا انه لايستطيع ان يجاريها، ولكن كان يستفزها .
لك الود وانتي تزكرينا بهذه الشخصية الرائعة
قولي ليها اكتبي ، نحن لازلنا مصبوا الي كتاباتها
| |
|
|
|
|
|
|
|
|
 Re: ديل من ناس البورد النفسي اشوفهم جد جد (Re: بت قضيم)
|
بت قضيم والله و ما طالباني حليفه ..
هذا اليوم لم يكن جميلا بأي قياس قسته .... شربت عليهو مويه ما انجلي شربت عليهو شاي لم ينجلي ..
لكن ..
بعد ان قرأت ما قرأت اعلاه... احسست بلكمبيوتر يهتز ... فتصلبت .... و عندما لم تتكرر الهزه استرخيت....و طشاش طشاش كدا لمحته في الشاشه شئ من الابتسام... شكلو الجهاز لم يحتمل كل هذا الضياء و حسه انو كائن بشري ... فجأة حسيت بلجوع ... لملمت بعض الاوراق و غتيت قلم ال
BIC(ULTRA ROUND STIC GRIP USA)...
و غادرت المكتب ... و قفت متردده امامه ... اردت ان اواصل السير جنوبا بحثا عما يؤكل ... لكن اتذكرته كلام حبوبتي نفيسه الله يرحمها لمن قالت لي محمد ود بتول (بعد تردده الملحوظ في خطوبته لي ست البنات)
يا ولدي... السمح ما بنفات..(بتصرف).. قمته رجعته و كتبت ما هو امامك حسي ...
. حبوبتي نفيسه دي كانت علي اقتناع تاااام انو القمر و النجوم هم اسنان الشمس.... عليه ليتها كانت هنا اليوم لتقراء ما تكتبه الشمس...
و بعد...
Quote: أقرأها فاحس (ممكن أكتب ذي كلامها ده)
أقرأها فاحس بانتعاش، ويزيد حماسي لرؤياها، بل اؤكد لنفسي أن (والله البت دي دفعتي وبعرفها)
اقرأدوما بوست جبريل وكلي خوف ان يظهر لجبريل فأنا منذ البداية أكيدة بان جبريل مالو ما جا ماقال بجي مالو ما جا..... |
يا يا دفعه الله يهديكي بس.... الخرمجه البتشوفيها دي عبارة عن حاجات كده تداخلت في نفسي فلم اكلف نفسي عناء ترتيبها لانو عايزه اخلص من عناء اشياء ترهقني ...
عليه... اي زول زهجان .. يعاني من.. القلق.. و الاهتراء.. محاط بي بشرية لا تطاق و الدنيا مقفله معاهو يكتب ابوه ذاتو ..
جبريل غتس فرد غتسه ... قرر الرحيل الي جزر المالديف .. حيث الدفء ادفاء ...
Quote: ما علينا
shiningStar
تعاني مشكلة القشرة وسواد الركبة |
آآآآح... مالك دايره تتوري علي وجع المسامات...
القشره علي ما هي عليه لا زيت سمسم نفع.. لا خل بي صفار بيض نفع.. لا زبادي نفع.. لا زيت خروع مع ملعقة قرنفل و القليل من ماء الورد نفع... ولا حتي زيت فول الصويا( صنع في الصين) نفع ...الله يكجها كن ما لقت غير نفنوفاتي ديل... (بتصرف شديد و صرة وش)...
بعد سنتين ونيف و خمسة علب فزلين (اصلي) و تلاته برطمانات جرسلين و تسعتاشر ليمونه (خليط بين الاخدر و الاصفر) .. الركب (بضم الراء) مازالن علي ما هن عليه ... القصه شكلها خلقه... لا ليمون لا فزلين و لا سجم...
و عوضنا الله في المني جوب....
بعدين شنو المجمالات دي.. حناكيش و ملايكه و سياحه و ما ادراك ... دا حلقا ما عندي ليهو اضان ...
و بعد مره اخيره...
| Quote: ديل من ناس البورد النفسي اشوفهم جد جد |
تعرفي ... لمن كنت صغيره كنت اري الدنيا كبيره ... و لما كبرت رأيتها صغيره...
عليه ...
اذا الدنيا واصلت في صغرها اعلاه .. اكييييد حنتقابل ... لكن من هنا لي هناك عليك الله صاحبيني و لو بتعرفي ليك واحده عندها خلطه لأزالت القشره و سواد الركب و ضيق الصدر ما تنسينا منها ... الايميل في البروفايل ....
انا لسه جعانه ...
عليه سأخرج الان و اتجه جنوبا...
و حأخد باقي اليوم
OFF...
اصلا يوم تحصل فيهو حاجه سمحه واااحده ما بستاهل اقضيهو في مكتب صغير محاط من كل الاتجاهات بوشوش الهكسوس التي لا تخلو من بلاهه دائمه...
لكن قبلي ما امشي عايزه اشكرك علي وجودك و كتابات غيرة شكل يومي ... و عايزه اشكر من خلالك الوجيه/حسين ملاسي و ناذر خليفه و رقم صفر وكل من جلنا بخاطره... و برضو دايره اشكر صديقي العزيز الي لولاه لما سعدنا بما خطه قلم جنابكم....
عميق مودتي ..
اختك ترتر ...
و مازال المسجل يصدح بي ... جريتي ... جريتي وجعتي كرعيكي ... قطعتي دكتور شول و القسمه عند الله ما عند زول ...
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: khaleel)
|
Quote: بتعرفي ليك واحده عندها خلطه لأزالت القشره و سواد الركب
و ضيق الصدر ما تنسينا منها ... الايميل في البروفايل .... |
لو أن هنالك عداد لإحصاء النقرات على البروفايل
لتعجبتي من كثرة عدد من لديهم خلطات لإزالة القشرة
و سواد الركب و ضيق .. ذات اليد 
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: بت قضيم)
|
ملكة سبا يا رفارف قلبي ...
انت تتعلي ما تتدلي قولي آمييييين...
و بعد ...
Quote: أول :
شفنا المدعو قرض قشّ الساحة (النقدية) ولم يدع صندوق خيري او رسم (مخارجة) وإلا تكالب عليه تكالب الأكلة إلى قصعتها
عليه وللأمانة والتاريخ ومن باب إرجاع الفضل لأهله نعترف يما يأتي سرده ...
ولزاما علينا نجد انه لابد ان نعّرف أولا بما هو سيء الذكر (البايو كلير) ؟!
هل حدث وأن رأي أحدكم/ن قريبة له سمراء غامق لونها تصد الناظرين فجاة تحولت إلى منافسة خطيرة لبقرة بني إسرائيل ؟
لون إيه
وصفار إيه ؟
بدون شك وعلى مسؤليتي انه البايو كلير .. كريم تفتيح (تسليخ) انتشر مؤخرا بالسودان بدرجة مزعجة حتى كادت كل سمراواته ان يتحولن للأصفر البرتقالي ...
وسبب الإزعاج يقال ان هنالك (عنبر) متكامل باحدى المستشفيات خصص لإستقبال حالات البايوكلير ( لوكسيد ار طلع ود حلال قوي معاهو ) ..
اها المهم .. اتت فترة على اختكم الملكة قدر ما تتمسح (وتجبجب) بكركار الرماد دا تلقى نفسها غبشاااااااااا وسط صويحباتها ولولا حُمرة عين شمس بلادنا وإصرارها ان تعيدني إلى صوابي عصر كل دوام لإنزلقت في مهاوي ( الإنسلاخ) ..
لكن ! كان ولابد من وسيله أخرى لمجاراة التلميع والبريق الحاصل دا
ووسط تلال الحيرة هذه لمحت نفاج أمل وكان ذلك إبان فترة بوستات الطيب بشير وعكود الشهيرة (بين عود الطلح .. الخُمرة ومديدة الحلبة) ومن هنا كانت فكرة ابو بشير ون
وابو بشير ون هذا لمن لا يعرفه حتى الآن كانت مكوناته الأولية عبارة عن :
( 1 ) كوب أرز مطحون + ( 1 ) كوب صغير عدس مطحون + ملعقه ترمس مطحون + ملعقه حلبه مطحونه + قشر برتقال مطحون + ملعقه زيت سمسم أو زيتون + حبه بطاطا كبيره مسلوقه وكذ لك جزره مسلوقه .
شجعني جو البوست يومها في البحث عن أشياء مشابهة فقادتني الصدفة إليه ! وكان ان وجدت فيه ضالتي المنشودة ... داومت على خلطه ووضعه بإناء محكم بالثلاجة وإستعماله يوميا - عسى ولعل - بعد أيام فاجأتني زميلتي وهى تقلب شفتيها على ما ذممته سابقا :
- انت جبتي البايو كلير ؟!
دهشت جدا وانا اتطلع إلى غبشتي وقد بدت بفعل الخلطة السحرية تتسلل مخلفة بعض الإشراق الطفيف وبدون وعي كانت ردي المدعم بأغلظ الإيمان :
- لا والله العظيم دا الطيب بشير !!
وكانت هذه المره الدهشة من نصيب زميلتي ! فاستدركت موضحة انه كريم طبيعي جديد ومدحته وعددت مآثره حتى بدأت المح القبول على وجهها . واتفقت معها على ان احضر لها عينه لتجربته .. فأصبحت اول ما تسألني عنه كل صباح وخصوصا ان آثاره اصبحت لا تخفى :
- اها ما جبتي لي الطيب بشير !
فتوكلت على الحي الدائم وعرجت على أقرب خضرجي ومن هناك اقرب عطارة وكانت البداية ..
وبعدها انتشر خبر الطيب بشير بالمصلحة وماجاورها وأصبحت زبونة دائمة لعم عبدو جزرة وعطارة التيمان لتوفيره لمن يطلبنه .. وأصبحت متخصصة في صنعة وأردف لمستعملته بعض النصائح :
- إستعملي مع الطيب بشير زيت زيتون عصر أول بارد حاتشوفي النتيجة الخطيرة براكي ..
- اما الدخان بزيت الزيتون مع الطيب بشير حاجة ما تخلص ..
- البسي شرابات وجونات في الأسبوع الأول لإستعمال الطيب بشير لزيادة مفعوله
ومن يومها أصبحت مداومة على منتديات الوصفات الطبيعية والأعشاب التي أدخل عليها بعض التعديلات بفضل خبرتي التي تكونت فكان الطيب بشير تو لنضارة الوجه وازالة الكلف ، والطيب بشير فور لإزالة سواد الركب والأكواع ، والطيب بشير ثري خلطة متطورة لشعر يجر با
واكتشفت ان خلطاتي اصبحت تشبه تلك التى كنا نحضرها من مدام (سيما) الهندية بالشهداء امدرمان بل وأصبحت اتفوق عليها بحكم احتكاكي الدائم بزبائني وتحسس ما يطلبونه بالإضافة إلى لهثي الدائم خلف منتديات (البرتقالة) العربية للحصول على كل مايستحدث في هذا المجال ...
انا الآن أدرس جادة فكرة التفرغ التام لصناعة الطيب بشير وتطويره والوصول به إلى الطيب بشير مليون بإذن الله
اطرح هذا البوست بغرض الإعلان والبحث عن شريك (يدق صدره) ويوفر اولا (العلب الفارغة) لزوم التعبئة ويكون مكتوب عليها بخط جميل ( الطيب بشير منافس البايو كلير الخطير) ( الطيب بشير ثري لشعر مثل زينب العسكري) ونتباحث في إمكانية شراء عربة أمجاد لزوم اللف والتوصيل السريع وراحة العملاء ..
وقد نحتاج شراء كام فدان زراعي لزوم المواد الخام الطبيعية ... ومبلغ آخر للدعاية والإعلان ... |
اولا بلتبادي ...
ابو بشير دا ... طريقة استعمالو شنو؟ يعني اختو و انوم ولا اختو و اقعد صاحية لمن ينشف؟ و كيف نستعملو للشعر؟ و زينب العسكري دي منو؟؟ و الركب حلها شنو؟؟
اسمعي ردي بي سرعه النبي .. لحسن البرتقال في بلدنا غلا شديد نتيجه للتجمد الذي طرء علي اشجاره في كاليفورنيا....
وبعد مرة اخري ...
كن ابو بشير ما نفع... ياني القاطعه لي تذكره _ون وي_ لي غابات شالي....
شكرا يا غاليه... كلامك و الغنيه فرحوني ...
و عاد يا بركة من صلي و قال يا الله من شدة ما نبقي سمحين اشوفونا من قدام نووور و من ورا زهور .......
_________
و اضيف لي كوم التمنيات الكتيرة اني الاقيكم بي نفس حلاوتكم.. تسارقو من زمن العمل و نتونس عن ساميه سكروته و كل اهل البعد الخامس...
ولي الحين داك و دعتكم الله ..
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: ShiningStar)
|
Quote: بدون شك وعلى مسؤليتي انه البايو كلير .. كريم تفتيح (تسليخ) انتشر مؤخرا بالسودان بدرجة مزعجة حتى كادت كل سمراواته ان يتحولن للأصفر البرتقالي ...
وسبب الإزعاج يقال ان هنالك (عنبر) متكامل باحدى المستشفيات خصص لإستقبال حالات البايوكلير ( لوكسيد ار طلع ود حلال قوي معاهو ) ..
|
استار وبت قضيم صباحكم زين
الموضة دي قديمة حبة
في حاجة ضاربة في البلد
موضوع الركب دا اكيد بتحلوا
اسمها اظن ازاهير ولا غدير حاجة كدة
اصلي اي محل تقشير بس
حكاية بقرة اسرائيل دي ظاهرة بقت
وعندنا نكتة في الجامعة
بروف بتكلم مع التاني قال ليهو
انت يا بروف بنات البلد دي كلهن بصمتن بقن سمحات
نان الشينات مشن وين.....
رد البروف الاخر : نان المعرسنن نحن ديل شنو
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: بت قضيم)
|
كوستاوي العزيز
نعم احب بل اعشق الاستماع للإذاعات، ويشابه عندي حب الإذاعة حبي الرواية المقروءة وكرهي للتفلزيون
ترسم الشخصيات بنفسك، تتخيلها كما تشاء، وتقرأ الرواية سريعاً ، حسب شدها لك، وتنتهي أسرع من المسلسلات المكسيكية، ولو الفضول أكلك، تمشي طوالي الصفحة الأخيرة،(تشوف المجرم منو)، وإن زهجت ترمي الكتاب براحة من يدك
ومن مزايا الرواية إمكانية دسها داخل كتاب رياضيات عوير مع انك ما تقدر تدس التلفزيون داخل كتاب رياضيات عوير
هسة مناسبة الرواية شنو؟!
المهم الإذاعة نفس الشي
يا سلام على من يدمن الإذاعة ومن ثم يتخيل بل و يرسم شكل للصوت، ونصيحة متطرفة (يعني جاية بالطرف ما كوزة)
اوعك يوم راسك يقول ليك امشي ازور الإذاعة دي يوم
جنس شناة، يا لطيف ، يا ستار علي من شوفتك رسمي.
لما مرة اتعاورت ومشيت، سلبطة مع أحدى قريباتي وكانت تعمل هناك قبل الطالح العام، قام المذيع صاحب الصوت الجذاب شاغلني، وزعلت فوق فوق وتحت تحت طبعاً دايرة أموت من النفخة، واخبرتني قريبتي لاحقاً أن الزول ده (أه، سكير ساي على فكرة) وقمت كرهت تاني الخبط صوري الحلوة في راسي المقودس بزيارة للإذاعات الفاضية،
يا اخواني جني وجن المذيع ابو كرافتة تبدأ من الحلقوم وتنتهي في البلعوم
ما يطولوا الكرافتات دي شوية؟!
وفيما يخص خدمة الحبوبات، فيعني صعبة شوية، أنا غايتو بقعد بعيد بنفس ذات كتاب الرياضيات العوير المحشو بالرواية
مع اني تصدق
اتخرجت من سنين وصدق شنو كمان
ما قاعدة احضر ماجستير مثلاً، واكيد ما دكتوارة، لكن تقول شنو في خرف حبوباتي، باقي خرفنا عينة يا ده
ويسلمون
خليك معانا
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: بت قضيم)
|
بت قضيييييييييم
الشوق من هنا لي هنووووووووووك
ملكات الهترشة المكندشة عندي أربعة.. شايننق ، وحضرتك ، وشيري وغتاتة كدا بضيف ليكن ( أنا ) صاحبتنا الزمان . ولكل منكن ماركتها المسجلة التي لا تقلد ولا تستنسخ ، أما البوح فيا حليل سموحة الما بتخبر زعل . لي زمن حردان الهترشة إلا الليلة سحبتي رجلي بالحيل يا بت قضيم .
قرأت هترشتك اليوم فتراقصت البسمات في الدواخل ، وجات أم فيونكة شايننق ستار فعدلت المزاج ومسحت تقطيبات ساس يسوس فهو موسوس التي طغت على البورد ، أم فيونكة دي علي الطناق بالتلاتة مجرد وجودها ضمن المتواجدين أو لاين يبهج النفس ويرسم الابتسامة ، أم فيوكة عليك شيخك الما بتحلفي بيهو في هينة ما تغيبي ، البورد بعدك كوم رماد ، لا فيهو أداب لا اقتصاد ، لا فيهو طب لا صيدلة . يا ام فيونكة لا فايتانا وين مستعجلة.
الأحباب كوستا/ تبلدينا/ملاسي
الشوق والريد
تحياتي
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: بت قضيم)
|
تمبس
الشوف عندنا يتبع القوانين التالية:
واحد الله:
بت سمحة ما عايزة اشوف نوهائي، النبي فوقي كان طلعت شايننغ سمحة عافية لي شوفتها لله والرسول
مالو تاني:
أما لو يعني مثلاً ما ياهو ذي ناس تبارك سمحين نشوفهم مالو شوف العين ما كتلو غزال
تلاتة بركة:
انا بهزر (بالطبع)، وبكري أبو بكر ده بذكرني برئيس الجمهورية، بالله يوم كده فكرت تقابل رئيس الجمهورية؟
نحن ناس "بوسطاء" في الأرض شديد
لكن كان داير يشوفنا هو( اسلو مافئ مانئ)
ومشتاقين
| |
|
|
|
|
|
|
|
|
|
Re: ديل من ناس البورد النفسي اشوفهم جد جد (Re: بت قضيم)
|
شفت يا محمد نور
الناس الجداد في البورد ديل يتعرفوا طوالي
هسة كلامك ده امسكوا وابقى عليه عشرة
بكرة بعد شهرين تلاتة في البورد تصاحب ليك نفرين تطلع ليك ريشات تقوم كان الله فتح علينا بدخولك لبوست يخصناتدخل لي في قصص مثل (كلما كانت الجميعة العمومية المنبثقة من الجمعية الفرعية لجميعة ناس فريدة فالأفضل نستلمها طوالي ونحافظ عليها وما نصرفها في الفارغة)
جنون فقلصة يعني كلام كبار ما بفهموه الناس الصغار
وبعدين يطلع ليك جنون التحليل، وهو جن اشبه بنوع (انا افقر زول في البورد انا افهمها وهي طايرة)
وتبدأ بتحليل الشخصيات فتطلع عنايات أم سنة هي في الأصل عنايات أم سنتين، وعادل بترجي هو في الأصل سميرة دنيا، وسوسو كفتيرا عميلة فدرالية، وبكري أبو بكر زاتو ارستقراطي امفتروقاطي عنده صداع نصفي
وهكذا دواليك
والمرحلة الثالثة تصاب بجنون العظمة فتكتب كلمة تظنها تفعل تأثير قرآني في العالم، وتشب في حلوق الناس، وتغالط الزول في اسمه زاتو، يعني اقول ليك اسمي بت قضيم تقول لي والله حرم انتي ماهيتاب مصطفى
وهكذا دواليك
وعموماً،، نتمنى لك طيب الإقامة في هذه الدار العامرة وأعانك الله وحفظ رأسك من دقشة من هنا ودقشة من هناك وماما بتسلم عليك وبتقول ليك أوعك تمشي الزقاقات
أوعك
سامع
وتحياتي
| |
|
|
|
|
|
|
| |
بت قضيم
Abd-Elrhman sorkati
Hussein Mallasi
KOSTA
ناذر محمد الخليفة
محمد أبوالعزائم أبوالريش
تراث
tmbis
محمد نور أحمد
ابراهيم برسي
رأفت ميلاد
رقم صفر
khaleel
ايهاب
ملكة سبأ
nile1
مهاجر
JAD
عبد المنعم سليمان
فيس بوك
تويتر
انستقرام
يوتيوب
بنتيريست