لو كان مكتوب في اللوح ..... إهداء . إلى أمي آمنة عبد الله ، حلفاية الملوك ، اللاسلكي ....

Quote: أمي آمنة أو في الحقيقة " حبوبتي" أم أمي ... أدردش معها كل جمعة بعد صلاة الصبح أو قبيل الفطور في مواضيع شتى منها ما هو عائلي ومنها ما هو عام ومنها ما هو خاص بي وما يخصني يكون بوحا خاصا لها لا أستطيع أن أبوح به لآخر غيرها لأنها عودتني منذ طفولتي الباكرة أن تستمع إلى مشاكلي وخواطري وتحاورني بنفس النفس الذي اعتادته معي ومع جل أبناء بناتها منذ زمن بعيد .. وأنا طفل صغير تحب أن تسمع مني القرآن وكذلك في لحظات أخرى أسمعها أغاني لمحمد ميرغني وضمتنا " جلسة ريد " فكانت من المعجبات بصوتي وبقدراتي ولكن دائما أقول لها : " القرد في عين أمو غزال " وترد هي مباشرة دون تردد ... والغزال في عين" أمو "غزال .... على العموم في الآونة الآخيرة بدأت تتخوف أمي آمنة من أنني ربما أفتن بإمرأة غير زوجتي وأتزوجها وبدأت الظنون تساورها لا من شيء رأته وإنما من القصص التي أحكيها لها ومررت بها وتسألني عن الجديد في الدنيا وذات مرة حدثتها عن البريد الإلكتروني " الإيميل" وبدأت تستفسر عنه وشرحته لها ببساطة أنه بريد عادي ولكن بدلا من أن يأتي بالبوستة التي تعرفينها في الحلفاية فهو يأتي عن طريق الكمبيوتر والتلفون وبدأت تسأل : أها منو البرسل ليك فيهو ، وذكرت لها أسماء كثيرة ، قالت فيهم بنات ، قلت لها كثر مثل ،أمل ، سمية ، فاطمة ، علوية ، نورة ، سلوى ، كوثر ، وأسماء كلها عتيقة وجميلة ، ردت بعد تفكير أها يا أنور يا ولدي ديل بنات عايزات عرس ، ، قلت لا تعدي ، أها الرسول فوقك منو آخر واحدة رسلت ليك قلت ليها " اسم افتراضي " وأها بتقول ليك شنو قلت ليها بتقول مشتاقييييييين .... فردت مسرعة يشقشق قلبها إن شاء الله ... فضحكت كثيرا على هذه الدعوة وقلت لها ياحاجة بدل تدعي بنات الناس أهدي ولدك ما يراسلن ، وبدأت كل مرة تستفسر عن بريدي الإلكتروني وعن من يراسلني فيه .... وفي جمعة مباركة أخرى جلست أشرب معها الشاي ، وكعادتها تشرب الشاي بنصف رغيفة منذ زمن بعيد لأنها تكون قبلها بنصف ساعة قد أخذت جرعة الأنسولين ونصف الرغيفة يسندها جيدا حتى لا تشعر بالجوع وبكرمها الطائي تقسم لي ما أمتلكته من أرغفة وتصر تحلف على أن أأخذ المزيد ولا أستطيع مقاومتها فآخذ ما تفضلت به عليّ ، وبعدها مباشرة أتوقع سؤالها أها الخطيبة كيف ؟ أقول لها يا حاجة خطيبتي أنت ولا يوجد سواك ، تضحك وتقول الحمد لله الله هداك ، وبعدها مرة ثانية تقول صحي الكلام دة والله هزار يعني ما في بت بتراسلك والله بتتكلم معاك ، أقول لها يا أمي أنا خلاص اتزوجت البيت والبلاط والأبواب والمسؤولية تاني ما في خطيبة ، فتقول : والله " مرتك" سمحة وما بيعرسوا فيها ودة أسمح كلام أسمعوا منك الليلة وهي تريد أن تتأكد من الحقيقة ... وفي مرة من المرات سألتني فقلت لها : العفو والعافية أنا خلاص لقيت عروس وعايزك تمشي معاي .... فتضع يدها في رأسها وتقول : يا هو دة أنا الخايفة منو تشلهت والبنات ديل يغشوك ويخدعوك ، أقول ليها ياحاجة في الشريعة الواحد محلل ليهو أربعة تضحك وتقول : أها الشريعة دي إلا في العرس ما في حاجات كثيرة الرجال ديل ممكن يعملوها وشريعة برضو ، يقوموا الليل ، يكرموا الضيف ، يغيثوا الملهوف ، أها يجاهدوا ويستشهدوا أها يا ولدي دة كلو ما شريعة ..... أقول ليها والله غلبتيني ، لكن النفس دي الواحد يعمل معاها شنو .. تقول نفس شنو يا ولدي ، أقول ليها نفسي والله عايزة البت دي .... تنتبه أمي آمنة وتقول : الكلام دخل الحوش ودة الخايفين منو .... أها من آسة أنا ما ماشة معاك والله مباركة الموضوع دة ... أقول ليها ياحاجة باركيها ولسة العملية مافيها مشي ، العملية خاصة بي أنا إنتو لسة دوركم ما جاء ، ترد : إن شاء الله ما يجي وأها والله يا أنور في كل صلاة أدعوا إنو ربنا ما يوفقك ... أقول ليها ياحاجة الكلام دة كيف ، كيف تدعي ما يوفقني ، تقول لي إن شاء الله موفق في كل خطوة إلا العرسة التانية ... أطيب خاطرها وأستودعها لجمعة قادمة .... بعد جمعة تسأل أها أخبارك كيف ، أقول ليها والله ياأمي البت دي قدر ما شلتها من رأسي أبت عشان كدة أنا خلاص باقي عليها ومنتظر موافقتها عشان أكلم أبوها ... ترد قائلة عليك الله البت دي مامسخوتة ... أقول ليها كيف ،،، أها عارفة إنك متزوج ، أها عارفة عندك بت ماشة الجامعة ... أقول ليها عارفة وعارفة ولدك في الثانوي ... أقول ليها أيوة عارفة أها تقول لي والسختة دي كيف أصلوا والله غبيانة البتعرسك دي .... يا ولد شوف ليك شغلة ... أها اسمها منو قلت لها اسما من عندي وكلما مرت جمعة أقول لها نفس الاسم ونفس القصة فبدأت تتخوف ربما أتزوج فعلا وجندت نفسها للدعاء حتى لا تتم هذه الزيجة فقلت لها يا حاجة بعد دعواتك دي كلها لوكان مكتوب في اللوح أتزوج تاني وتالت بتزوج فردت قائلة لو مكتوب في اللوح بنقول قسمة ونصيب ... وغازلتها بهذه القصيدة التي أهديها الآن لها تعبيرا عن حبي الشديد لها ولشخصيتي الافتراضية ولن أكف عن مغازلتها كل جمعة بهذه القصة فإلى القصيدة .... لو كان مكتوب في اللوح .... لو كان مكتوب في اللوح إني أجيلك كنت بجيلك ... أو مرسوم في القدر الأزلي إني أشيلك كنت بشيلك .. ما إنت سحابة هتون الكل راجيها .... رافع أيدوا يعاين ليها .. الولد الزرع القمحة ... الأم والبت السمحة ... الأرض اليبست عايزة تشوف الفرحة .... ما أصلوا الفرحة زهرة بتنبت في واديها ... ويجي عصفور يغازل في عصفورة ويرسم صورة .. صورة العش النادي فوق الشجرة .. ويرجى المطرة ... وأصلوا المطرة .. في جواي أمل مزروع سحاب دموع ... ما بيتطهر من أدرانو ولا بتفكفك من أحزانوا إلا تزورو سحابة هتون متلك إنت زمن راجيها ... وبيسأل الله عشان القمحة والبت السمحة تطلي علينا تجيبي الفرحة لعينينا ولو مكتوب في اللوح تهلي علينا بتهلي علينا وتنبتي زهرة في وادينا .... ........ ترد أمي آمنة بعد سماع القصيدة قائلة والله دة ما هزار دة كلام جد وأنا بسأل الله عشان القمحة والبت السمحة ما تهل عليك البت دي ولا تتوفق .... أضحك وأقول ربما استجاب الله لدعائك ..... ولكن أقول لها أنا أسأل الله أن يطيل في عمرك وفي جلسة الجمعة الصباحية ..

Quote: العزيز انور صدقني اخوى انور مجرد ما اشوفك فاتح بوست عن الحلفاية قبل ما افتحه يكون عندي يقين وكاني فتحت كنزاً لا يصدأ وتفوح منه رائحة الاصالة والطيبة تحسرت كثيراً ان مرت اجازتي سريعاً دون ان اتشرف بمقابلتك ، سألت عنك الاخ مصطفى دوليب وارسلت لك معه التحايا متابعين بشغف ولك خالص مودتي

Quote: الأخ الأستاذ عبد الرحمن الحلاوي أولا أشكر تواجدك ومرورك ولك مكان خاص هنا فنحن صلتنا بالحلاوين ممتدة فهي صلة قربى ونسب ولأقرب لك الصورة فإن شيخ حسن حاج الأمين متزوج عمتنا النخيل بنت زهراء بنت فكي أحمد قنات وأولادها الأستاذ المدير المالي رحمة حسن حاج الأمين والأخت مكة حسن حاج الأمين شوفت كيف الدنيا دي ضيقة يا أستاذ عبد الرحمن ...

Quote: سلامات يا أنور كيف حالك والأسرة الكلام دخل الحوش، والجني عم في زمنا دا، ولا موكده؟؟؟ نحنا عارفين الحكومة عسكرية و قانون الطواري ما زال قائما،، بس عرس قنات الجماعي قرب، والشنط المرة دي مدنكلة وكمان فيها ظروف وحاجات تانية حامياني، لكن قانون الطواري كيفك معاهو؟؟ محمد زين الشفيع وينك يا أستاذ؟ يديكم دوام الصحة والعافية