انا نادم على يوم امبارح واول امبارح لانو قررت احضر حاجة غير الجزيرة الرياضية اول امبارح فى قناة النيل الازرق كانت السهرة مع الفنان طه سليمان وكانت عن الغنا الهابط وغنا الشباب وعلى الاقل استمتعت باغنيات هذا الزول الفنان بغض النظرعن الحوار وتثبيت فكرة ان هذا الجيل طريقته فى التعبير هو على شاكلة (دقيت لى تلفون حبيبى ما ردا..) الغنا ممتاز والبطن طامه من فكرة انو دى لغة الجيل ده اليوم التانى قناة زول برنامج TOP 1 البرنامج لمن لا يعلم هو برنامج مسابقات على شاكلة American Idol يقدم فيه المتسابقون اغنيات مختلفة تخضع للتقييم من قبل لجنه ويتم تصعيد الحائز على اكبر عدد للاصوات .... الخ على قناة زول امبارح شفت حلقة من الحلقات دى شباب بغنوا غنا اجنبى ومن لم يأنس فى نفسه الكفاءة يشارك بالرقص وهو رقص لو تعلمون عظيم البرنامج مضحك لحد بعيد والاساس فى هذه البرامج هو ان تكون ممتعه وليست مضحكه البرنامج اعتقد انو يومى وببداء الساعة 10:30 الكتابة عن هذا الشئ توترنى لانو بحصل لى Flash back لحلقة امبارح التصوير للمشاركات الصوت غير مضبوط وانا هنا اتحدث عن الالات الموسيقية وضبطها و الout put المشاركين الزحمة الكبيرة فى مكان العرض البت والولد الحكام دى حكاية براااااها
البرنامج كما ذكرت هو محاولة لتقليد برامج ِتلفزيون الواقع وله نفس الهدف مسابقة الغرض الاساسى هو اكتشاف موهبة غنائيه بعيداً عن الغرض الاساسى للبرنامج والاستلاب الثقافى المسيطر على المشاركين هناك نقاط كثيره كسودانويون يجب ان نقف عندها التساؤل الاول هو لماذا انشئت القناة فى المقام الاول هل هى محاكاة, ربح مادى, عكس الثقافة الاثيوبية ومن هو المستهدف باطلاق هذة البرامج الاقرب الى الغازات المسيله للدموع وانا لا اعلم هل ابكى الى ماال اليه حال الشباب السودانى المشارك فى هذا البرنامج ام ابكى على مستوى ثقافة القائمين على امر القناة كل هذة الاسئلة تساهم فى حرير البكا وزيادة الاسئلة من هو المستهدف باطلاق هذة البرامج نحن, السودانيون العاملين بالخارج, العرب ولا الصينيون استلاب ثقافى يثير اشمئزازك ويؤسس لفكرة اننا مقلدين وقرود ويؤسس ايضاً لرقصة القرد I am walking away تم ادائها بواسطة مشتركين وهم احسنوا اختيار الاغنية لانهم فعلاً كانوا يسيرون بعيداً عن اللحن طوال الحلقة ظللت احاول ان اجد سبباً مقنعاً لماذا يغنى المشاركين اغانى اجنبية يعنى برنامج يقدم فى تلفزيون سودانى اسمو زول الشباب المشاركين يغنوا غنية اجنبية دون الالتزام بالـlevel بين الموسيقى واصواتهم اللهم الا بت مشاركة اسمها ايات هرج وصخب وعازف الباص يصرخ محدثاً عازف الاورغ والمسئولين عن اجهزة الصوت خلف عازف الاورغ الذى يجلس هو وصديقة البيازى خلف المغنيين وشاب يلبس بدلة سوداء يتعامل بحس منظم حفل تخريج احدى الكليات الجامعية الذى يحاول اقناع واحده من برالمتوا انو خطير وله علاقة خاصة مع الفنان الذى سيحى حفل التخرج فهو يبشر له بصورة شخصية وينظر الى داخل عينيه واحياناً ينظم صفوف اهل الخريجين ويزجرهم العمل الذى قدم بعد اغنية Craig David (فى اللجج) اغنية راب وموسيقى الراب لمن لا يعلم هى نوع من الموسيقى تتميز عن الشعر العادى المنطوق انها تؤدى بمصاحبة ايقاع ويفضل ان تكون Free Style ويعتمد على الارتجال ُEminem فيلم 8 اميال مثالاً الجوطة التى كانت تصاحب الاعمال التى ذكرتها تم تصويرها بكاميرات تذكر تماماً بالقيدومات فى بيوتنا والانتقال غير المبرر من المصور بين خالتى المشلخة وسيد الدكان الفى الحلة الجاى يجامل ناس البيت انا تقنياً ما عارف الحاجة دى اسمها شنو طريقة التصوير زى الـVHS وتحديداً لما المشاهد المصورة تكون Outdoor وتتم بصوره جميلة فى تلفزيونات بلاد بره لكن فى البرنامج كانت مامضبوطه يعنى ماممكن تجيب صورة نضيفة فى الاستديو ولما تطلع برة تكون بهذا الوسخ
لجنة التحكيم فى البرنامج الكانت امبارح عبارة عن شاب وشابة عندهم طواقى واستايل خالص كما فهمت هم المنتجين للبرنامج لكن ما عندهم اى علاقة بالمزيكا اللهم الا عن طريق السمع لان تعليقاتهم كانت على شاكلة * انت بتتحرك كتير * ده شنو يا عبد الجبار انت ما حافظ اى شى ! *(الدقة بتاعت الغنية دى ظريفة) الدقة هى اللحن * السلالم بتاعتك ما مضبوطه بتطلع وتنزل كتير * ويا ابوعبيدة انت بتطرب كتير يا اهل الموسيقى بهذا المنتدى افيدونا ان كانت هذة مصطلحات ترقى الى ان تكون تقييماً لموسيقى او غناء يعنى الشباب المنتجين ديل اذا استعانوا بناس عندهم علاقة بالمزيكا مش كان المشاركين استفادوا وتم تقييمهم تقييم كويس وتم تعريفهم بالمصطلحات السليمه باعتبار انو الكلام ده حيخدم ال Career بتاعهم ولا لازم لما انا اكون المنتج معناها اكون الحكم فى مليون فرق بين العرض الحى واشكال العروض التانيه يعنى لما يكون المسرح فيهو جمهور اذا ما اتحرك المغنى كتير ممكن العرض بتاعو يبوظ *اللحن هو اللحن والدقة هى الدقة وليس بينهما امور متشابهات كرهتونا البلى زاتو * السلالم بتاعتك ما مضبوطة والله ده اكعب تعليق يمكن ان يسمعه اى كائن حى عندو علاقة بالمزيكا لعناية السادة الموسيقيين بالمنبر الاغنية التى سلالم المغنى فيها غير مضبوطة كانت اغنية فى سلم رى الصغير مثلاً ولا يوجد Modulation فى الغنية انقروا لى السلالم دى شنو؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ السلالم هى حق شرعى للاغنية لاشريك لها لكن الزول يكون عندو سلم وكمان ما مضبوط فدى جديده على غداً اواصل بمزيد من الحزن والاسى
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
omer osman
EMU إيمو
فيس بوك
تويتر
انستقرام
يوتيوب
بنتيريست