|
بورداب جدة : طلب مساعدة عاجلة
|
اعزائي، اخوكم تلقى عرض وظيفي جيد في جدة، وارغب في كريم مساعدتكم في إيجاد سكن (3 غرف) ومدرسة للاولاد وخلونا واضحين، بفتش في مدرسة تكون مصاريفها خفيفة على المعدة، السكن يكون سهل البلع كبوستات اخوانا محمد عادل ومحمد الحبر. العمل في سوق الكورنيش بجدة وانا جدة ما بعرفها كويس وفي المرحلة دي عربية ما عندي، ربنا يجعل فيكم البركة يكون الحي اما قريب من الشغل او على خط مواصلات واهم حاجة عليكم الله مويته تكون كويسة لانه الموية في جدة دي مشكلة. ثم عاد واوصي الا تكون الاسعار من النوع البخليك تشوف لك نجوم تزازي قدام عيونك نص النهار.
|
|
|
|
|
|
|
|
Re: بورداب جدة : طلب مساعدة عاجلة (Re: محمد عمر الفكي)
|
انسب حاجة يا عمك بالنسبة لمقر عملك انك تسكن في البغدادية الغربية وبالذات شارع المدارس السكن ثلاثة غرف من 15 الف ريال وانت طالع للسنة والمدارس داك شارعها وبالنسبة للشغل حاجة بتاعة 10 دقايق برجولك و الحافلات بتمر بالطريق داك الاخوة الذين يمكنهم مساعدتك من عضوية البورد بي جدة الاخ الشفيع رمزي او الاخ الكنزي او الاخ الرفاعي او الاخ مجدي ابو قصي لانه دي منطقة البلد او وسط المدينة والشباب الفوق ديل عمد المنطقة دي , اخوك ساكن بعيد من وسط البلد واقرب للمطار عشان كدا مساعدتنا ليك ضررها اكبر من نفعها
| |
|
|
|
|
|
|
Re: بورداب جدة : طلب مساعدة عاجلة (Re: Asim Fageary)
|
مرحبابك يا محمد عمر في جدة غير .. و أقول ليك بكل صراحة بدون عربية حتتعب كتير كتير في جدة خاصة و معك عائلة .. فأول حاجة و قبل ما تفكر تسكن وين و العيال يدرسوا لازم تعمل ليك عربية عشان يكون عندك ( خيارات ) لعدة أمكنة للسكن و المدارس .. و إذا لم توفر لك جهة العمل عربية للتنقل فبإمكانك الإستعانة ببعض البورداب من العاملين في شركات و معارض العربيات و ممكن تلاقي عربية كرت بقسط شهري لا يتجاوز الألف ريال ..
إمنياتي لك بالتوفيق و بإقامة طيبة في جدة ..
ـ
رغم إنو كلمة ( عربية ) دي تعبتني شديد خلاص .. لكني مصر أكتبها .. عشان ما أدي أي زول فرصة يقول ليك دي حركات مغتربين .. و الما عارف يقول عدس ..
| |
|
|
|
|
|
|
Re: بورداب جدة : طلب مساعدة عاجلة (Re: جعفر محي الدين)
|
Quote: أخوي ما تلحقني أنا ذاتي زول جدة إذا كانت البغدادية الغربية فيها سكن في حدود 15 ألف دي نعمة أخوك ساكن في حي النسيم |
عاصم .. معقولة بس ..
مفارق كيف تخلينا ؟؟
و اللا .. العُشرة و الأيام عليك هانوا ؟؟
ـ
ياخي الواحد ما صدق لقى ليهو زول يكورك ليهو تقول لي مشتت ؟؟
| |
|
|
|
|
|
|
Re: بورداب جدة : طلب مساعدة عاجلة (Re: عصام دهب)
|
Quote: و الما عارف يقول عدس .. |
الما عارف يقول سيارة يا دهب
ياود الفكي خد هذا الرقم واتصل علي عماد البحر من اولاد بورتسودان النجاض
وساكن في البغدادية وعارف كل الدريبات 0556428492
نسأل الله لك مقاماً طيباً بين احضان العروس
| |
|
|
|
|
|
|
بورداب جدة : طلب مساعدة عاجلة (Re: عبد اللطيف السيدح)
|
الاخ اساسي مشكور وماقصرت
الاخ عاصم اولاً مشكور وثانياً المدارس اجنبية ومؤكد بينا تلفون (بالمناسبة شعبي ما فينا وناس عشرينات ما فينا).
مولانا انا عندي رخصة سودانية منتهية ليها سنتين، عندك فكرة وضعها شنوبالنسبة لاستخراج رخصة سعودية؟ اما التقسيط فما بعرفه ، بشوف لي عربية رخيصة تمشي الحال.
ود القاضي مشكور على الترحيب وياها المحرية في ناس جدة، اما بخصوص السعر فانا لو لقيت حاجة بين العشرة والخمستاشر بتكون مناسبة معاي اما مازاد عن ذلك حتى 18 فالا يكون معاها مسهل بلع اما المدارس فالمناسب معاي (شامل الترحيل) بين 300الى 500. الاخ جعفر مشكور واكيد حنتزاور
ود السيدح اكيد سوف اتصل ابه ومشكور لمساعدتك القيمة
يا اخوان شايف اغلب الناس بينصحوني بالبغدادية وبقينا عليها اها همتكم معانايا الناس الجنبها.
| |
|
|
|
|
|
|
Re: بورداب جدة : طلب مساعدة عاجلة (Re: Asim Fageary)
|
محمد .. ألف مرحب بك في جدة بالنسبة للمدارس في مدرسة كويسة اسمها (مدرسة الموارد العالمية) وتقع جوار مركز الشعلة التجاري بقرب السفارة الباكستانية .. وهي أيضاً تدرس المنهج البريطاني إضافة إلى اللغة العربية ورسومها (275) ريال شهرياً شاملة للترحيل.. تلفوني: 0569291330
| |
|
|
|
|
|
|
Re: بورداب جدة : طلب مساعدة عاجلة (Re: نصر الدين عثمان)
|
دكتور بشير، مشكور يا حبيب على الترحيب
نصر الدين جزاك الله خير، اها لمينا في المدرسة الله يسهل امر السكن.
فقيري،
Quote: لكن السكن في حدود 10 إلى 15 أنا ذاتي قانص ليهو معاك لو لقيتو خليهم شقتين |
بتذكر مرة ود الصائم فتح موضوع مساعدة عن مشكلة في الكمبيوتر، جات خالتنا دومة (على ما اعتقد) في بوست ود الصائم وطرحت مشكلة بتخص الجهاز حقها برضو، فود الصائم قال لها عليك الله يا خالة خليني اقضي انا الاول وتاني بنشوف امرك. انا ما بقول لك قول اللئيم داك وبقول لك ايد على ايد تجدع بعيد، انت فتش وانا بفتش وتلفونك معاي ومتمنين جيرتك. بالمناسبة انت اسرة حسن فقيري في الختمية بحري بيقربوا ليك؟
| |
|
|
|
|
|
|
Re: بورداب جدة : طلب مساعدة عاجلة (Re: نصر الدين عثمان)
|
Quote: انا عندي رخصة سودانية منتهية ليها سنتين، عندك فكرة وضعها شنوبالنسبة لاستخراج رخصة سعودية؟ اما التقسيط فما بعرفه ، بشوف لي عربية رخيصة تمشي الحال. |
أعتقد ـ يعني ما متأكد خالص ـ يامحمد إنو الرخصة السودانية حتساعدك في عدم دخول مدرسة تعليم القيادة يعني لو عندك رخصة غير سعودية و بتسوق كويس و نجحت في إختبار تحديد المستوى .. حيقرروا ليك يوم دراسي واحد في المدرسة لزوم تعرف الأشاير ( الإشارات ) و اللوحات الإرشادية و أسماء قطع غيار ميكانيكا و كهربة السيارات .. ومنو على الإختبار على طول .. نصيحة تاني خلص موضوع الرخصة و العربية و أسكن محل ما عايز ..
| |
|
|
|
|
|
|
Re: بورداب جدة : طلب مساعدة عاجلة (Re: عصام دهب)
|
Quote: نصيحة تاني خلص موضوع الرخصة و العربية و أسكن محل ما عايز .. |
ده الكلام النجيض
والله يعينك علي اسعار الايجار في جده هذه الأيام !!
انا ساكن مشرفه وبعيد من المطلوب !!
لكن بوصيك فتش الشقه الصالونها كــــــــــــــــــــــــبير و منافعها لبره !! للعمره والحج !!
| |
|
|
|
|
|
|
Re: بورداب جدة : طلب مساعدة عاجلة (Re: عصام دهب)
|
الاخ/ محمدعمر التحايا الف مرحب بيكم في جده بخصوص السكن خليك مع أقتراح الاخ /أساسي بالنسبه لمدارس الابناء العام الدراسي الجديد غلي ما أظن سيبدأ في منتصف رمضان وهذه فترة كافيه لاختيار المدارس ولكن نصيحة الاخ/ نصر الدين أبقي عليها عشره (مدرسة الموارد العالمية)
| |
|
|
|
|
|
|
Re: بورداب جدة : طلب مساعدة عاجلة (Re: عبدالرحيم أبراهيم العبيد)
|
ياسيدي مرحب بيك في جدة كتير ونرجوا ان يطيب لك المقام فيها المنطقة التي تفضل بذكرها الاخوه هي الاقرب لاسواق الكرنيش كما انها منطقة نسبياً نظيفة وآمنة ولاتوجد بها مشاكل موية على العموم سوف نسعى لايجاد المطلوب لكن ياسيدي نرجوا ان يكون هناك متسع من الوقت لان ايجاد سكن في جدة من الامور الصعبة وخصوصاً لو كانت دائرة البحث ضمن نطاق وسط البلد
تحياتي
| |
|
|
|
|
|
|
Re: بورداب جدة : طلب مساعدة عاجلة (Re: الشفيع رمزي)
|
الأخ محمد عمر الفكي
تحية وتقدير
الامور في البداية بتكون غامضة , ولكن بمجرد وصولك لجده كل الامور بتتحلحل وبتكون عادية جدا
أنا كنت شايل هموم الدنيا كلها لما جيت منقول لجده قبل عام ونصف , ولكن بقدرة قادر بقيت
من ناس جده والامور مشت تمام .
أنا ساكن السليمانية جوار كارفور حاضر لأي خدمة جوالي 0596218431
حبابك في جده
| |
|
|
|
|
|
|
Re: بورداب جدة : طلب مساعدة عاجلة (Re: البشير دفع الله)
|
الأخ محمد عمر الفكى الف مرحب بيك فى جدة وان شاء الله يطيب لك المقام بهابخصوص السكن الاخوان ماقصروا أدوك المفيد الأنسب هو فعلا السكن فى مناطق البغدادية والى حد ما الشرفية والنسيم كويس لكن الايجارات مرتفعة وانامن سكانه بخصوص المدارس فى مدرسة الورود العالمية جيدة ومنهجها هندى -بريطانى ومستعدين لاى خدمة والف مرحب بيك فى جدة جوالى 0500052856.
| |
|
|
|
|
|
|
Re: بورداب جدة : طلب مساعدة عاجلة (Re: محمد عمر الفكي)
|
ود الفكي تحياتي
سكن على مستوى بوستاتي يا جميل
انت قول جاي متين وماعندك مشكلة
المدارس هنا يعني لكن السكن الان ممكن
البغدادية وزي ما قال ليك اساسي 10 دقائق
كداري رايح جاي والعربية زاتا بنسلف هكرة لحدي
ما تتيسر امورك اها قصرنا معاك لم هزالك وتعال
بس فكنا بلا رياض بلا صحاري هنا الكورنيش والبيك .
..............................................حجر.
| |
|
|
|
|
|
|
Re: بورداب جدة : طلب مساعدة عاجلة (Re: Asim Fageary)
|
مولانا ربنا يسهل، انا اموري متلخبطة شوية، هسي شغال مشوار كل يوم مكة جدة لانه الاولاد باقي شهر وشوية بيمتحنواومنها على السودان وانا حا اسكن عزابي في جدة عشان اشوف موضوع السكن دا براحتي.
ابو عثمان مشكور يا سيدي على النصيحة وربنا يهون القواسي
الاخ عبد الرحيم والله نصيحتك ما وقعتها الواطة، اتصلت على الاخ نصر الدين ونسقت معاه وموارد موارد.
الاخ الشفيع مشكور وسوف اركز عليها ولسه عندي مهلة من الزمن.
ود العم ود الكبابيش
والله يا البشير انا كان فارقة معاي مكة بس، البيسكن فيها بتكون مشكلته مشكلة لما يفوتها، لكن نقول شنو، المعايش جبارة.
اكيد بينا تلفون يا مك.
الاخ طارق شكراً جزيلا ليك وغالباً حا اركز على البغدادية.
استاذنا الرفاعي،
يا اخي يقصر الملح، انت شبه التقصير؟ وكتر خيرك على العربية بس اخوك اول حاجة عاوز يشوف موضوع الرخصة دا. كدي بس خليني اسفر الاولاد ديل بعد يمتحنوا واجي جدة وارتاح من مشوار مكة جدة كل يوم.
Quote: يا محمد عمر في بيت لصق القنصلية الايرانية و بالمرة تودي الاولاد المدرسة الايرانية العالمية لأنها قريبة و فيها خصم خاص للجيران و المسافة ما بعيدة من مركز الكورنيش. كيف معاك |
انتوا يا جماعة هسي دكتورنا دا فرقو من الكيزان شنو؟ يا دكتور ما عندي مانع بس بشرط واحد انه مدير المدرسة ما يكون اسمه حسن!!!!
| |
|
|
|
|
|
|
Re: بورداب جدة : طلب مساعدة عاجلة (Re: محمد عمر الفكي)
|
والله كتر خيرك يا محمد عمر الفكي لميت ناس جدة بربطة معلم وبعد إذن كل المتداخلين حنلقط التلفونات يمكن نحتاجها فيما بعد
الأخ د. بشير أحمد
Quote: اخونا جعفر محي الدين
وين ساكن في شمال جدة ؟
|
أنا ساكن الصفا شارع الأربعين خلف الطازج مباشرة
| |
|
|
|
|
|
|
|