زمان لما كان خور ابوعنجة بيتملي بالموية كاحد الروافد التي يتنفس من خلاله النيل .. كان لما البحر يرجع .. الخور بيتحول لي مساحة خضــراء .. كنا بنحتل مساحة كبيرة جدا ونستخدمه عدة استخدامات .. الفترة الصباحية: بتبتدي من ستة صباحا غالبا نشرب شاي الصباح في الخور .. الفترة ما بين الساعة عشرة لحدت الضهرية .. (بنشرك طير) من ضمن الطيور المستهدفة .. طائر (الهدهد) بتاجه الجميل الذي (يفره) حال الإحساس بالخطر .. الشديد. فترة الضهرية: زي ما قلت بنشرك للطير .. والشرك للطير دا زاتو بي فهم .. ما ساااي .. أنا وأحمد كنا مسئولين من استجلاب (الهداهد) وفق الخبرة في التعامل مع الحساسية العالية للهدهد .. حيث أنه يحتاج إلى طول بال وتمويه حتى تنقلو من مساحة إلى أخرى ومن شجرة إلى رقعة أرض .. حتى أخيرا يحط أمام (القلوبية) .. حتى (القلوبية) نفسها في طريقة تشريكها للهدهد تحتاج إلى مهارة وطريقة تمويه في وضع الشرك بي زوايا هندسية وتغطية بالحشائش الصغيرة .. فطائر الهدهد من أذكى الطيور ولا يتسجيب للاستفزاز ولا يتدردق بي اشاعاتنا التي كنا نروجها من خلال الحان تمجيديه معدة تشبه في طريقتها الميلودية المارشات العسكرية التي يتحرك الجنود فيها بالخطوة المارش .. أنا واحمد بندردق الهدهد بي صفارة احيانا أو بي الدق على الصدر مع تطوير النغمات التي يفهمها الهدهد .. وعندما يفر الهدهد تاجـه .. إيذانا بالخطر .. نتصلب في مكاننا ونكف عن الغناء .. حتى لا نفقد السيطرة الحسية على الهدهد المعني ويطير في تجاه مدرسة المؤتمر مرة أخرى .. حيث أننا نتحايل عليه من تحت كبري ابريش الذي هو يقع في المنطقة الوسطية ما بين عوضية سمك .. ومدرسة المؤتمر .. أحيانا: اليوم كلو ما ننجح في إننا ندردق لينا هدهد واحد .. نمشي ليهو من الكبري .. ويكتشف إنو دا حنك مننا ساي جمب بيت ناس (طراوة) والسبب في ذلك إرتفاع الصوت أو الصولفيج اللحني غير جاذب أو مزاج الهدهد لا يتوافق مع تلك الأغنية المملة جدا.. والتي نحس بمللها نحن المغنون وعندما ننجح في وصول الهدف إلى حيث نقطة النهاية .. نحتاج وقتها إلى وقت طويل وممل ننتظر فيه أن يستجيب الهدهد إلى استفزاز الطعم والذي يتكون من (دودة) صغيرة تربط من مؤخرتها بالخيط لتتارجح جاذبة للهدهد .. يستمر وقوف الهدهد مسافة طويلة أمام (القلوبية) يدرس كل الزوايا التي يمكن أن يداهم بها الطعم من دون أن تنال منه (القلوبية) .. في وقفه الهدهد أمام القلبية معرفة تامة بحقيقة هذا الشرك وقفة تؤكد أحقية ما ذكر عن الهدهد في القرآن .. لكن في نفس الوقت منظر (الدوسة) الدسم وهي تتأرجح تجبره على المجازفة احيانا ننتظر مدة تتجاوز الساعة نلاحظ دراسة الهدهد لاحداثيات (الشرك) وقياس الزوايا أو البحث عن فريسة طفيلية يقدمها (قربان) للقلوبية ويحظى (بالدوسة) ويطير .. الإثارة تكمن هنا في متابعتنا للهدهد القناص .. وتوجسنا من طائر طفيلي يفسد علينا متعة أسرنا لي هدهد نودعه في أحد الأقفاص في دكان (عبدالمهيمن) حيث يبيع الطيور والزهور وأشجار الزينة. حيث بالإمكان أن تبدل الهدهد بعدد من شتلات (الكلوكازيا) أو الورد شتلات الورد الانقليزي التي يعقلها بالمحل .. أو أن تحصل على جوزين من عصافير الكناريا داخل قفص حديدي صغير . قمة الإثارة هي المسافة الفاصلة بينا والقلوبية حال ان (انفجرت) أمام (بطينية) الهدهد حيث نسرع بالجري وإلا فقدنا هدهدنا المدلل .. وقلوبيتنا التي عادي يطير بها .. حال أن لم تتمكن منه بشكل غير جيد وفي هذه الحالة يرتفع بها بالرغم من حجمها وكتلتها إلى مسافة مرتفعة جدا تجاه الشرق عائدا إلى حيث أتى .. واحيانا تقع القلوبية من على .. وأحيانا يتارجح الهدهد من السماء الصافية .. لكن قبل ان يصل الأرض يعاود مرة أخرى مرحلة الطيران الغير مستقر وهذه الحكمة في كونه يرتفع إلى أعلى فيزيائياً .. وهو يقيس المسافة رياضياً التي يمكن أن يصحو فيها من غيبوبتة اللحظية. عندما يتجه الهدهد بمنقاره ناحية بيت ناس (فــرح) ويفر تاجه بشكل نصف قطر دائرة نعرفه جيدا، هنا نتحفز للجري والمباغته ونكون تحت رحمة ان تكون احداثياته الهندسية المساحية غير دقيقة .. وأن تتمكن منه القلوبية بشكل جيد .. وتطلبق فكها على أحدى جناحية متجاوزه منقاره الطويل .. ويمكن أن تتكرر مسالة فرد التاج أكثر من مرة كأنما الهدهد يستعمل ميزان موية أو نضارة مساحة تبين له الاحداثيات .. لكن نكتشف أن كل ما يقوم به عبارة عن تمويه يؤكد شكوكه تجاه توجسه من (الدوسة) التي طالت تتأرجح حول نفسها بشكل راسي (لا منطقي) بالعكس من حركتها الأفقية وهي تسعى .. في هذه الحالة يستخدم الهدهد .. حيلة (القربان) أو الضحية حيث يعمد إلى دردقة .. اي طيرة قريبة ليهو .. وغالبا بتكون (ودابرق) .. والشائع عن (ودابرق) إنو شليق ومتلقي حجج .. وبتاع (صواطه) حيث أنه ممكن عادي جدا يخلق فوضى يخارج ليك بيها كل الطيور الحوالينك .. يتقدم الهدهد خطوات .. ويقنع أحد (الودابارق) القريبين منو .. ويختال .. ويتبعه الود ابرق حتى يصل به إلى مكان الشرك .. فما يتبقى للود ابرق إلا وأن يستجيب للاستفزاز ويهاجم القلوبية في (بلادة) عجيبة .. ويدخل بكلتا قدميه ومنقاره المدبب .. في عملية انتحارية ومجازفة عجيبة .. تكلفه حياته وبعض الريش المتنتف .. نتيجة الاستجابة لي شائعة الهدهد .. بمجرد ان تطبق القلوبية على ود ابرق .. يستخلص الهدهد الدوسة بسرعة فائقة ويطير .. ونبدأ رحلة البحث عن شهيد جديد من تحت كبري ابريش لا تتوفر فيه المواصفات السابقة ..
05-22-2010, 09:14 AM
saif massad ali saif massad ali
تاريخ التسجيل: 08-10-2004
مجموع المشاركات: 19127
.. أهلين يا سيف .. دا ما ادب رفيع .. دي عبارة عن حكاوي قديمة .. إنت ذاتك احسن ليك تفتش عن الحاجات دي وتقراها براحة كدا .. أخير ليك .. في الفترة دي بالذات ..
05-22-2010, 09:33 AM
السيد المسلمي السيد المسلمي
تاريخ التسجيل: 11-27-2008
مجموع المشاركات: 4954
Quote: ما يتبقى للود ابرق إلا وأن يستجيب للاستفزاز ويهاجم القلوبية في (بلادة) عجيبة .. ويدخل بكلتا قدميه ومنقاره المدبب .. في عملية انتحارية ومجازفة عجيبة .. تكلفه حياته وبعض الريش المتنتف .
Quote: يا علاء سلامات دا حنين للبلد ولا اشاعات ساى واللة حوشكن بارد بشكل وهواء ظريف كنت هناك لكن تعال السودان اليومين دى بقا ظريف ومناسب سلام
والله يا توتا ما حنين (كشكرة) ساي شوق بالجد .. عارفه اكتشفتو متين ..؟ في سلم الطيارة لما عاينته على يدي الشمال والعربات ماشة وجاية من تجاه الجريف واللفه بتاعت الطايف قدام هناك .. بالأمارة كمان في بتاع فول (مسلوق) في الجهات ديك .. تخيلي الطاقم بتاع الخطوط كان بيفتش في الشنطة ويبحت .. وما عارفو قاعد يقول في شنو .. في اللحظة ديك حسيت بي إحباط السنين .. على كل .. وفي كل الأحوال ظريف ومناسب .. والحوش داك كان فيهو مغربيات كدا عجيبه خلاص الواحد حقو كان يشيل منها شوية .. طبعا قاعدين تضربو اللقيمات بالشاي .. في الحتات ديك .. وبتاع البقالة داك لسة ماسكاهو أم فريحانة بي سبب وبدون سبب .. المهم طلعو لي حقي في صحن براووي ..
05-22-2010, 09:54 AM
فيصل عباس فيصل عباس
تاريخ التسجيل: 03-08-2004
مجموع المشاركات: 1345
ولع لي سيجارة باللااااااااااااااهي لاحبس هذي المتعه لحين واخرجها كلما اجتاحني الحنين الهدهدي وشراكك التي تؤل الي بلاد (ما معروفة وين ) تمبس علي الطلاق لمن تقصد الكتابة بالجد الهدهد بذات نفسة يجي (يصنقر ليك هنا ويقراك ويولع اربعه سيجارات متتابعات ولا يأبه بدخانها الذي يهري رئتية الصغيراتان ) تمبس ربما تسميها انت كتابة (عادية) بتواضعك القبيح داك لكنها حقا يفترض ان يدرس في جهات لها علاقة بتدريس الادب ياخي (حشيت السهل الممتنع دا حش الجن ) ياخي كثفت الرمز كثيف الضباب في صباح ممحن ياخي طلعت ميتين ابو اهلنا واعدتنا اليك (نطلب القرب ) سحقا ايها الجميل .
05-22-2010, 09:59 AM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
لو كنت اعير مثل هذه ( الترهات ) ادني اهتمام يا ود الصايم لاصبحت مثلك يا ود الصايم ( ضحكونجي ) يضرب بي الامثلة , اما تمبس منذ ان وجد في نفسه الكفاءة لان يكون ( براية ) تجتر الترهات توقفت عن القراءة له فالانسان علي نفسه بصيرا وانا ابصر من ان اعطي وقتي لمن يساهم في ( قدي) دون ان اجني فائدة من وراء الكتابات المطولة الغير محفوفة سوى باللا شيئ , واصبحت اتعامل مع كتاباته مثل تعااملي مع اي سواق تاكسي لديه احساس بالعزلة يريد ان يتحدث والسلام فهو يتحدث وانا لا اسمع وحفاظا علي ماء وجهه امنحه بعض الهمهمات التي تبقي يديه علي المقود وتكفينا شر التفاتاته التي يحاول فيها استنباط انفعالات وجهي وحديثه في اللاشي خوف الحوادث . فانا يا صديقي ود الصايم لو كنت اقرا واتابع ما يكتبه تمبس لاضحي ابوبكر وزيري كاتبي المفضل .
05-22-2010, 10:30 AM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
يا عالم خلو البوست خلو البوست يمشئ لينا في كتابة (انعدمت )
اعنيكم بالقول يا داليا،، وود الصايم،، ويااااا عمران سلام
تمبس للهدهد وعي آخر عندك تعال لتكتبة تعال لتوضح الحوار النغمي في النداء الذي تنادونة به انت واحمد تعال لتفصح عن الايقاع حينما الضرب في الصدر وتعال لتبرز انتماء تلك الصافرة تعال لترسم المكان وتبن ماهية الشراك اكثر تعال لتكثف الرمز (وتعلن ان الهدهد انثى يحركها جمال ما ويسكنها نداء يصعب الافصاح عنه،،) الهدهد ليس هو بذاك الطير الذي نهاب جمالة الفادح الهدهد عندك كائنات تمشئ على احتمالات مفتوحة .... تعال ياخ وليخلد ذاك الهدهد للراحة بعد فراغك منه .....
ياتمبس عندك لغة سمحة وانا بريدها خالص (عوجة معطونة وين ما عارف ؟) تعال واكتب هنا واعلم اننا معنين فقط بكاتبتك وما برز منها من لغة بصرية ترتب جفاف شوفنا ... ممكن تجي ولا ح تتتت
05-25-2010, 10:08 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: تمبس للهدهد وعي آخر عندك تعال لتكتبة تعال لتوضح الحوار النغمي في النداء الذي تنادونة به انت واحمد تعال لتفصح عن الايقاع حينما الضرب في الصدر وتعال لتبرز انتماء تلك الصافرة تعال لترسم المكان وتبن ماهية الشراك اكثر تعال لتكثف الرمز (وتعلن ان الهدهد انثى يحركها جمال ما ويسكنها نداء يصعب الافصاح عنه،،) الهدهد ليس هو بذاك الطير الذي نهاب جمالة الفادح
العزيز فيصل .. شكرا تاني لزاوية الشوف المشتركة .. شكلك كنت بتشرك طير في حتات تانية .. فعلا يا فيصل الهدهد كان وقتها يشكل أكبر قيمة جمالية لذلك كانت صعوبة الحصول عليه .. وكان يشكل ايضا المقدرة على التغلب على الصعاب .. والتحايل على الحيل .. أول الصعاب هي كيف أن تتحصل على طائر هدهد واحد من بين كل الطيور الموسمية .. كيف أن تفرزه بحساسيته العالية واستشعاره من بين الطيور التي تتواجد من حوله .. ويتاثر بحركة طيرانها .. حتى الأصوات البعيدة جدا التي يتعامل معها بفر تاجه الجميل .. كانت الاسطورة التي سيطرت علينا وقتها عن تاج الهدهد .. كاسطورة السحلية ومفتاح الجنة الذي بحثنا عنه طويلا وقرضنا من خلفه العديد من السحالي وبعض الزواحف الذي اعتقدنا أنها في تأمر مع السحلية .. تاج الهدهد كانت الاسطورة الجمالية بأن بعض (الصلاح) من الهداهد ما ذالت تحتفظ بتاجها الذهبي .. أو هكذا كنا نحسه عندما يفرده بكامله .. لذلك كان الهدهد يكلفنا كم هائل من الالحان تتماشى مع مزاجه .. نكثفها حال أن نستشعر ارتياحه لها .. ونسوقه لمسافات ونتحمل كل (دلاله وغنجه).. من ناحية الأخرى .. كانت لنا أنثى هدهد .. صعب الافصاح عنها الآن .. لكن كانت تحمل كل صفات الهدهد وكم صغنا لها الالحان الطفولية .. وضربنا على صدورنا .. والبسناها تيجان الذهب ..
Quote: ياتمبس عندك لغة سمحة وانا بريدها خالص (عوجة معطونة وين ما عارف ؟) تعال واكتب هنا واعلم اننا معنين فقط بكاتبتك وما برز منها من لغة بصرية ترتب جفاف شوفنا ... ممكن تجي ولا ح تتتت
.. ما يسرني يا فيصل أنك ترى الآن أو رايت بعض التفاصيل التي صورتها بصرياً والتقطتها بمرورك بالخور الفسيح ذات حوامه .. حاول انك تتذكر وأنا بتذكر ليك معاي .. وما تضغط على حتة اللغة دي .. دي لغة الطير في الباقير سااي ..
05-22-2010, 10:53 AM
داليا الكباشى داليا الكباشى
تاريخ التسجيل: 07-23-2009
مجموع المشاركات: 4105
Quote: اما تمبس منذ ان وجد في نفسه الكفاءة لان يكون ( براية ) تجتر الترهات توقفت عن القراءة له فالانسان علي نفسه بصيرا وانا ابصر من ان اعطي وقتي لمن يساهم في ( قدي) دون ان اجني فائدة من وراء
.. ضريبة الشهرة يا صديقي اساسي .. جل كتاباتك يا صديقي في الفترة الاخيرة اصبحت تحفذني لشحذ الذاكرة القديمة .. تلقاك إنت من النوع الكنت بتدق الزول البجي الأول في الفصل .. كنوع من الحقد الطبقي .. أو تفاوت المراكز ..
Quote: الكتابات المطولة الغير محفوفة سوى باللا شيئ , واصبحت اتعامل مع كتاباته مثل تعااملي مع اي سواق تاكسي لديه احساس بالعزلة يريد ان يتحدث والسلام فهو يتحدث وانا لا اسمع وحفاظا علي ماء وجهه
.. إنت اقرا قدر .. قدرتك .. أكيد ح تلقى لي العذر .. بس تاني لو غبت من المكان دا اووعك تروج الاشاعات .. عارفه القانون الجديد دا ترويج الاشاعة فوقو غرامة ماليه .. وجلد .. يعني حسع عادي جدا ممكن اعمل ليك (إلكترونك كيس ) نبقى في خليهو ياخ الزول دا صاحبك وبقرا ليك .. والحركات البيض دي ..
Quote: فانا يا صديقي ود الصايم لو كنت اقرا واتابع ما يكتبه تمبس لاضحي ابوبكر وزيري كاتبي المفضل .
.. أبوبكر وزيري دا منو يا زول ؟؟ من الفترة الوقفوق فيها ديك بقيت ما بقدر اتعامل مع كتاباتك ما بقدر احسها كدا زي أول .. ما عارف ليهه ..؟!
05-25-2010, 08:28 AM
اساسي اساسي
تاريخ التسجيل: 07-20-2002
مجموع المشاركات: 16468
دا شنو يا اساسي .. ياخ ليك مية سنة في البورد دا .. غالبك تقفل ليك كود اقتباس مفتوح ..؟ عليك الله يا ود الصايم عاين صاحبك دا .. حسع فرقو شنو من الناس البتفتل البوستات إذن .. .. تعال اعمل تعديل .. واقفل الكود دا .. حسع انا اقول شنو لي اصحابي ... الكانو بيتابعو كتاباتك .. اقوليهم والله اساسي بقى ما بيعرف يقفل أكواد ..
05-25-2010, 10:43 AM
tmbis tmbis
تاريخ التسجيل: 10-19-2002
مجموع المشاركات: 24862
.. والله بعد كدا إلا تدي الباص وورد حقك دا لي الزول البكتب لي سيف مساعد دا عشان يعمل ليك التعديلات .. يا كمان اديهو لي صديق الكلمتك بيهو داك .. وليك علي أعمل ليك مهرجان اعتزال رسمي وشعبي ..
05-23-2010, 01:48 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: ربما تسميها انت كتابة (عادية) بتواضعك القبيح داك لكنها حقا يفترض ان يدرس في جهات لها علاقة بتدريس الادب ياخي (حشيت السهل الممتنع دا حش الجن ) ياخي كثفت الرمز كثيف الضباب في صباح ممحن ياخي طلعت ميتين ابو اهلنا واعدتنا اليك (نطلب القرب ) سحقا ايها الجميل .
. دقيقة يا فيصل عشان ما تخمني .. ياخ أول حاجة دي ما كتابة مدنكلة بمعنى الكتابة .. لكن احتمال يكون رايح ليك هدهد والكتابة دي وقعت ليك في (قلوبية) على العموم يا شيخي فيصل .. لو الهدهد دا برجعك بعد سنين وحابس بي سجارة كمان ، ابشر بي كمية كبيرة خلاص من الهداهد .. كدي بالمناسبة دي ابدا شررح لي في الهدهد دا .. من زاوية شوفك لانو ح نتلاقى في حتات كتيرة جدا ..
05-22-2010, 12:13 PM
tmbis tmbis
تاريخ التسجيل: 10-19-2002
مجموع المشاركات: 24862
.. والله يا المسلمي أنا كنت قايل (ابوالدقيق) هو براهو الوهم .. لكن اكتشفت ليك إنو ود ابرق .. اسهل زول ممكن يديدقو الهدهد .. ياخ دا عينو للشرك عديل يجيك طاير بي (شدو ومنعو) بعد شوية تشوف التراب قام .. لما تجي جاري .. تلقاهو بتشهد ..
Quote: سيف دا ياعمك بكون ماقراها زاتو .. قال أدبية قال ..
.. .. مسكين ياخ سيف معذور .. هو حسع راكب في المتحرك دا ما اظنو يكون لقى ليهو طريقة يقرا بيها .. خليهو يرتكز بيجي يديك النجيضة ..
05-25-2010, 10:30 AM
saif massad ali saif massad ali
تاريخ التسجيل: 08-10-2004
مجموع المشاركات: 19127
Quote: عايز تقولي يا شيخ رميتو شركم لهدهد دكتور خليل وسيف ود ابرق هبر ليكم الشرك لا لميتو في خليل لا سيف
هووي يا الوهم البتكتب بالباص حق سيف مساعد المسكين .. العوارة حقتك دي امشي اعمله في بوستاتك القاعد تفتحه وتنقطه دي .. والله البورد دا لو عندي فوقو شوية كدا بتاعت سلطة .. تاني تفتح الرشاش الـ إتش بي حقك دا من الكرسي حقي دا ..
Quote: لو كنت اعير مثل هذه ( الترهات ) ادني اهتمام يا ود الصايم لاصبحت مثلك يا ود الصايم ( ضحكونجي ) يضرب بي الامثلة
ــــــــــ
فانا يا صديقي ود الصايم ـــــــــــ
فتــأمل !!
(ضحكونجية ) ود الصايم لا تمنع او تساهم في الحد من ان يكون صديقي بل ومن اصدقائي المقربين , كما وان تمبس صديقي بل وصديق شخصي رغم انه بقي زول (قداد) . لو كانت العلائق الشخصية تبني علي مهارات الافراد الفردية لتبرأ الاهل من ابنائهم وتبرأ الابناء من ابائهم .
05-23-2010, 11:17 AM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
انت عارف ياتمبس ما كتبته ده لوحة جميلة من زمن اجمل
اهه عايزين لوحة اخرى العوم في الخور التحدي مع الرفاق منو البقطع لحدي بيت ناس الوزير وبرجع والنفسو طويل في الغطس منو انت بتشوف دي زي الذكريات الخاصة لكن الكتابة بتبدا كدا واصل وبتلقى عندك كتاب
اخر حاجة
الايام دي شايف حنينك زاد وفاض للبلد انا مش قلت ليك (المطار ما بحلك) غايتو انت حالتك احسن من عبدالله داش
شكر ياعزيزي للدعم المقدر في استعادة الباسوورد
05-23-2010, 11:16 AM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
واصل ياتامبا بعد ماجاك الهدهد من خور ابو عنجة بنبا يقين
تصدق يمكن في نفس زمنك ده انا مترصد لي سمبيرية اربعة اسابيع متتاليات دون جدوى في النهاية فكرنا
انا واخوي الكبير انو اتجاه الهواء هو سر كشف مخططنا فغيرنا الخطة وشلنا معانا النبل المدرسة
واتينا للسمبيرية من مكان ليس في الحسبان واخدنا ساتر وبالرغم من محاولة طيرانها الا ان نبلة اخي كانت اسرع وسقطت بين ايدينا ولكن للاسف عاشت معنا لفترة ثلاثة ايام فقط وفارقت الحياة بعد ضربة نبلة لم تمهلها الا قليا
خليك من اساسي ده اليومين ضاربو هواء المكيف بيشوف بي اتجاه واحد بس
تحياتي
زاتوووو
05-25-2010, 01:04 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: تصدق يمكن في نفس زمنك ده انا مترصد لي سمبيرية اربعة اسابيع متتاليات دون جدوى في النهاية فكرنا انا واخوي الكبير انو اتجاه الهواء هو سر كشف مخططنا فغيرنا الخطة وشلنا معانا النبل المدرسة واتينا للسمبيرية من مكان ليس في الحسبان واخدنا ساتر وبالرغم من محاولة طيرانها الا ان نبلة اخي كانت اسرع وسقطت بين ايدينا ولكن للاسف عاشت معنا لفترة ثلاثة ايام فقط وفارقت الحياة بعد ضربة نبلة لم تمهلها الا قليا
.. مفروض كان تعملو ليها شوية صاعود وتعملو ليها جبيرة .. إنتو ما كان عندكم متخصص بتاع جراحة وعظام للحالات دي ..؟ طيب ما كان تكلمونا غايتو سمبريتكم دي راحت في حق الله ساااي يا زوول تعرف معظم الطير دا بيعتمد فعلا على حاسة الشم والصيد كمان .. الحاجات دي بيعرفوها الصيادين .. عندي ود خالتي كنا بنمشي نصطاد الوزين في الترع الطالعة من خزان الروصيرص .. اشيل البندقية امشي اصطاد براي .. الطير دا كلو من ما يشوفني يفرتق .. التقول بيعرفني .. وانا عامل ليك فيها بتاع (قيامات) دردقة وراقدا ومنعكسا .. إلخ .. قام ود خالتي دا قالي دائما امشي عكس تجاه الهواء لانو الطير بيشم ريحتك .. ومن يومه جننتو ليك جن .. الواحد الايامات دي بقى يتذكر في الطير ساااي التقول حمد الريح
05-25-2010, 11:42 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: انت عارف ياتمبس ما كتبته ده لوحة جميلة من زمن اجمل اهه عايزين لوحة اخرى العوم في الخور التحدي مع الرفاق منو البقطع لحدي بيت ناس الوزير وبرجع والنفسو طويل في الغطس منو انت بتشوف دي زي الذكريات الخاصة لكن الكتابة بتبدا كدا واصل وبتلقى عندك كتاب
... والله يا استاذ محمود .. الحاجات القديمة دي لو كل زول ساهم بي سطر واحد بتلقاها كلها مشتركة ومكملة لي بعض .. الذكريات دي بتطلع بي شكل عفوي جدا لكن الحرفنة إنك تقدر تتمكن منها في اللحظة البتطلع وصدقني اي كتابه فيها بي اي صياغة بتكون أجمل .. لانها كانت فعلا جميلة وبسيطة .. الخور الفوقو الغباشي دا فعلا جر لي معاهو السيل البجي من فوق .. والغطس .. والعوم .. والنط من بيت ناس الوزير وحاجات تانية كتيرة .. الله يقدرنا ونطلعه ..
Quote: الايام دي شايف حنينك زاد وفاض للبلد انا مش قلت ليك (المطار ما بحلك) غايتو انت حالتك احسن من عبدالله داش
.. الله يقطع طاري المطار .. غايتو كان لحقت وصلتو .. يحلو مني الحلة بله بي طيارتو الايرباص .. عبد الله داش . دا التقول مأجر مني مرات كدا يومين ما بشوفو .. بجي بلقاني نايم يا لقيتو نايم
Quote: شكر ياعزيزي للدعم المقدر في استعادة الباسوورد
.. وشكرا لي بكري بسرعة الاستجابة .. وبي عرق العافية
05-25-2010, 11:26 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: كدى الحتة دى فيها مليون استفهام تمبس واصل مستمتعين داليا ...............اولا ود الصائم ............ثانيا عمران ................ثالثا
.. البيت فوقو همبريب يا يوسف .. ودي قمة المتعة .. وضربت لي فوقو نومات بالنهارية ما بتتعوض تاني .. عمران متضامن معاي كشريك اصيل في البوست دا .. .. ثانيا ود الصايم شايفو استجاب لي دردقة داليا .. واساسي ولو كان بستفيد من التجارب كان شاف حالة ود ابرق دي .. لكن القراية بي اضنينو عملت ليهو التهاب في الاضن الوسطى .. وما استبعد إنو تطبق فيه المادة مية وخمسين معدلة لي الفين وعشرة ..
05-25-2010, 10:53 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: تمبس الصديق المختفي صباحك ورد والله رجعتنا للزمن الجميل أيام الصبا واللهو البريئ وصيد القماري في الحقول والسمك أيام الدميرة. مودتي بلا حدود
العزيز وليد .. إنت الوين الحي بيك .. بقيت تكتب في المواسم .. يحليلك والله الحاجات القلتها فوق دي يا وليد .. من أهم اسباب ارتباط الناس بالسودان .. تعرف انا كان لقيت لي بحر هنا .. رجعتي قاسية خلاص .. طيرم دا ما واقع لي في راسي لحدت الآن ..
05-25-2010, 10:22 AM
tmbis tmbis
تاريخ التسجيل: 10-19-2002
مجموع المشاركات: 24862
الأمين .. والله صورة الهدهد دي .. ريحتني بشكل .. عليك الله عاين الزول دا انيق كيف .. ومحترم ؟؟ عارفه اللحظة دي هي بالضبط البقصده انا .. دي بعد الدردقه طوالي خطف الفريسة .. واستعد للانطلاق .. دي أهم لحظة في القصة دي ..
05-23-2010, 12:44 PM
Azhari Nurelhuda Azhari Nurelhuda
تاريخ التسجيل: 03-01-2007
مجموع المشاركات: 1958
أنا من زمان بسأل نفسي عن سر (الكرو) الفي كراعك اليمين ده شنو...؟؟؟ و كنت بشوفك في الحراية ديك و أنا طالع من المؤتمر تتجارى في الخور و تحت كبري أبريش و كنت بقول في نفسي و بتسأل: ياربي الود علاء أخو عمر ده بعمل شنو هنا في النطار ده و النهار واقف علي طوله؟؟؟؟؟
أتاريهو ده كان من دردقتك ليهم الإتنين ود أبرق و الهدهد زاتو... أتاريك كنت مدقسهم الإتنين...... و وديتهم الخور.........
غايتو إنت........!!!!!!!!!!!
ـــــــــــــــ شنو ياخ من العرضة القوية ديك مع عم منصور الشيخ في الصيوان الفي الجريف شرق داك و تاني ما نشوفك و لا نسمع منك؟؟؟؟؟ و الله غايتو عالم عجيبة
05-24-2010, 02:59 PM
Mohamed Abdelgaleel Mohamed Abdelgaleel
تاريخ التسجيل: 07-05-2005
مجموع المشاركات: 10415
Quote: عندما يتجه الهدهد بمنقاره ناحية بيت ناس (فــرح) ويفر تاجه بشكل نصف قطر دائرة نعرفه جيدا، هنا نتحفز للجري والمباغته ونكون تحت رحمة ان تكون احداثياته الهندسية المساحية غير دقيقة .. وأن تتمكن منه القلوبية بشكل جيد .. وتطلبق فكها على أحدى جناحية متجاوزه منقاره الطويل ..
تعرف يا تمبس انا ما كنتا قايل أولاد أمدرمان بعرفو ثقافة شريك الطير لكين قطعت قصتك أي حاجة ..
الله يقطع طاري الطير .. كان مزعل مني ناس بيتنا كلهم .. عندما فرغت لأجله أحسن غرفة في بيتنا وجنحتو وبقيت أفتشلو لبن الطير أجيبو ليهو وشغلني من المدرسة ومن مساعدة أبوي وكبر طيري في سجنه حتى كان ذلك النهار الذي فتحت فيه الغرفة كما أفعل كل يوم وتفاجأت ببعضه يطير لخارج الغرفة وتحت ضغط دردقة هذا الطيران المفاجيء طار كلو وظللت يوماً كاملاً أطارده من شدره لشدره
يا ريت تواصل
05-24-2010, 06:25 PM
nile1 nile1
تاريخ التسجيل: 05-11-2002
مجموع المشاركات: 2749
يا راجل إنت مضيع زمنك فى السياسة والكلام الفاضى من زمان عشان شنو وأوعى تقول لى السياسة والأدب صنوان ... إنت من اليوم دا مشروع روائى جاهز ، لا كمان روائى عديل، كان حالك الآن على صفحات الصحف الكبيرة ورحلات عالمية وجوائز وشي من دا .
يعنى شوقت الواحد لأيام الهدهد واللعب فى الضهرية والشرك وفن ومهارة الصيد وكلها (ختيتا) فى سياق يشد الواحد لمعرفة الحيلة وتصرف الهدهد مع الخيال والتذكار والرجوع الى أيام الصبا ... حقيقه يا تمبس روائى تقديرى الفاتح
05-25-2010, 11:18 AM
saif massad ali saif massad ali
تاريخ التسجيل: 08-10-2004
مجموع المشاركات: 19127
Quote: الله يخيبك ياتمبس هو دا الهدهد الفي الصورة ده نحن بنمسيهو عاشة ام ماقرين بنشرك له بشرك السبيب لانو القلوبية ما تقدر عليه الطير الصغير بصل اليها قبلو
.. عشة أم قرين ..؟ غايتو الله يسامحك يا البتكتب بي باص وورد سيف مساعد .. الله يسامحك شديد ..
05-25-2010, 11:47 AM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
Quote: زمان لما كان خور ابوعنجة بيتملي بالموية كاحد الروافد التي يتنفس من خلاله النيل .. كان لما البحر يرجع .. الخور بيتحول لي مساحة خضــراء .. كنا بنحتل مساحة كبيرة جدا ونستخدمه عدة استخدامات
بالله يا تمبس طلعت منمستخدمى خور الوعنجه........عشان كده بوستاتك بقت كلو كلو ما بتمشى الخور وانا الوقت ده كلو فاكرك من برى.......ليه ما عارف
==== هسه بس عرفت انك راجل كتاب حكاوى ولا انا زاتو........ههه هسه اجيب ليك ياتو وش
05-26-2010, 11:11 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: بالله يا تمبس طلعت منمستخدمى خور الوعنجه........عشان كده بوستاتك بقت كلو كلو ما بتمشى الخور وانا الوقت ده كلو فاكرك من برى.......ليه ما عارف
.. فاكرني من بري يا محمد زكريا .. الله يسامحك .. يعني عايز تطلعني أنا واساسي من حلة واحدة ..؟ ياخ اساسي بي (عضمة لسانو) قال كان عندو رقشة بجي بتفسح بيها في أمدرمان ويدفع غرامتو لي بواليص الحركة زي ما حصلت حاجة ..
Quote: هسه بس عرفت انك راجل كتاب حكاوى ولا انا زاتو........ههه هسه اجيب ليك ياتو وش
غايتو حظك كعب يا زكريا .. لانو لو لاقيتك في الخور كان الحكاوي دي بتكون فريش .. يعني بيان بالعمل
05-25-2010, 02:43 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: الأخ تمبس لك التحية لم أتداخل فى بوستاتك من قبل ، لكنى أتابعها.
العزيز الفاتح الرشيد .. سلامات ياخ مرحب بيك متابع ومتداخل وزميل واي حاجة .. ودي حاجة كويسة انو الواحد بوستاتو متابعة وبتلقى حظها من القراية بكل ما فيها .. الحمد لله .
Quote: يا راجل إنت مضيع زمنك فى السياسة والكلام الفاضى من زمان عشان شنو وأوعى تقول لى السياسة والأدب صنوان ... إنت من اليوم دا مشروع روائى جاهز ، لا كمان روائى عديل، كان حالك الآن على صفحات الصحف الكبيرة ورحلات عالمية وجوائز وشي من دا .
.. شكرا شديد يا الفاتح .. بالمناسبة انا قاعد اكتب كتير جدا .. لكن عندي مشكلة انو البكتبو بحس انو بيخصني براي .. لانو معظم البكتبو محيط بي الحاجات الحاصلة حواليني .. بكتب وبجدع وما بهتم بالمسالة دي شديد .. في المكان دا قبل فترة كنت بكتب بي طريقة منظمة .. كلما اشعر إنو في احساس بالكتابة وللكتابة .. ولا كان المكان دا فعلا بيحتمل الكتابة بي اي شكل فيها .. ولما كان في ناس بتشجعك علي انك تكتب وتعمل ليك هاي لايت على الحاجات الممكن تستفيد منها فجأة هجمت مجموعة هنا .. ووجهت المكان دا لي حتات عجيبة .. اصبحت مسالة الكتابة فوقو ولو خاطرة صغيرة مسالة صعبة .. ومن غير ما تشعر بتلقى نفسك بتدافع عن نفسك .. تجاه سيل الكلام الفارغ البتكتب ليك .. ولا عاجبم فن ولا مزيكا ولا قصة ولا شعر .. داخلين السياسة من الشباك .. وعايزين يدخلوك بي الحيطة .. يللا بقت المسالة ما هي سياسة ولا حاجة بقدرما هي (عـك) .. وطبعا البيعمل فيها حافظه .. بيلقى قدر مقدار الحفظ الفوق لي حفظو .. لانو اساسا ماف حفظ بس ربنا سخر لينا ناس كدا ,, يشيلوك من محل لي محل حسب البجي في راسم ..
Quote: يعنى شوقت الواحد لأيام الهدهد واللعب فى الضهرية والشرك وفن ومهارة الصيد وكلها (ختيتا) فى سياق يشد الواحد لمعرفة الحيلة وتصرف الهدهد مع الخيال والتذكار والرجوع الى أيام الصبا ... حقيقه يا تمبس روائى تقديرى الفاتح
. ياريت يا الفاتح اقدر اوصل الفكرة الجواي بي شكل يحسو اي زول .. ودي سماحة الكتابة .. شكرا تاني وتالت .. بس كدي عليك الله حتت روائي دي ما تكهربني بيها
05-25-2010, 02:28 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: الأخ عـــلاء مساء الخيـــر والله ليك وحشه....أنا بالسودان من أغسطس 2008 أرسل لي رقم تلفونك على المسنجر
سلامات يا نايل .. كيفنك ..؟ من الفين وتمنية ..؟ ياخ انا اخدت شهرين يف السودان وما عارف عنك اي تفاصيل .. شكلك خليت البلد الطيرة عجم دي .. تابع الماسينجر .. تحياتي للعيال شديد ..
05-25-2010, 02:17 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: تامبا - تحياتي، كتابة سمحة صراحة وتنبي عن من دقه صدره طويلا يدودر يا حليل ود أبرق والهدهد وطير الجنة وحاج بلوم والدباس والقطا والسمبر والسقد
.. الجنرال محمد . والله الخبرة ظاهرة في كلامك .. انا قلت في نص الحكي دا اقوم اجيب مصطلح الدودرة .. لكن قلت ماف زول ح ينقشه طايره .. طبعا يا محمد دودرة الهدهد .. بتفرق من دودرة الغباشي .. الغباشي اغشم من ود ابرق .. تسوقو قدامك زي الغنماية واحد .. لحدت ما توصلو الشرك .. كنا بنستخدم الغباشي في حال بحثنا عن الكمية .. ما النوعية .. وفي حال ينعدم الهدهد أو الموسم يكون مخستك شوية .. طير الجنة كنا بنخاف نمسكو .. يموت في يدنا ونغضب الرب .. ود ابرق والعشوشة والدباس وحاجة بلوم .. ديل بندخل معاهم في اضيق حتة ممكنة .. بالرغم من ندرة الدباس .. السمبر يا محمد قالو لينا بجيب الفقر كان جبتو البيت .. ما عارف فقر اكتر من الوكت داك كيفنهو ..
Quote: تعرف يا تمبس انا ما كنتا قايل أولاد أمدرمان بعرفو ثقافة شريك الطير لكين قطعت قصتك أي حاجة ..
. بالعكس يا محمد بالذات الناس القريبه من البحر بالرغم من الحرفنة الشديدة بعلوم صيد السمك .. بنشرك للطير برضو لكن بطريقة مختلفة من الشرك حقكم لانو عندكم المزارع .. والجروف .. نحن عندنا ثقافة النبلة .. والقلوبيات موسمية طبعا ..
Quote: الله يقطع طاري الطير .. كان مزعل مني ناس بيتنا كلهم .. عندما فرغت لأجله أحسن غرفة في بيتنا وجنحتو وبقيت أفتشلو لبن الطير أجيبو ليهو وشغلني من المدرسة ومن مساعدة أبوي وكبر طيري في سجنه حتى كان ذلك النهار الذي فتحت فيه الغرفة كما أفعل كل يوم وتفاجأت ببعضه يطير لخارج الغرفة وتحت ضغط دردقة هذا الطيران المفاجيء طار كلو وظللت يوماً كاملاً أطارده من شدره لشدره
ههههه .. طيب دي قصة ذاته .. عندنا في البلد موسم الطير وموسم القمري .. موسم الطير دا بيجيب انواع عجيبة جدا ملونة بي ريش عجيب .. لكن طير خلا ساااي .. ما طير مدينة .. ود اختي الصغير كان بيرسل لي الانواع الجميلة جدا ونادرة .. بتقعد في القفص عندي زي كم يوم كدي .. بحسن وفادتها واطعامها .. وتكون مفرفشة .. بعد شوية احس ليك بيها دخلت في مود دبرسة .. والناس الحوالينا والغرف ما بيسروها .. بيموت البيموت فيها .. الباقي البطلقو .. بلقاهو ليك حايم في شجر الحلة كئيب جدا ومسجون بالرغم من المساحة الواسعة ..
Quote: يا ريت تواصل
.. ياريت كمان تساعدني يا محمد .. اديني من الحاجات البتشبه .. (ماشي ناس العمارة) ياخ دي براها بترد الروح وخيرو من ألف طائر
05-25-2010, 01:59 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: يا تمبسكتو سلامات يا.... أنا من زمان بسأل نفسي عن سر (الكرو) الفي كراعك اليمين ده شنو...؟؟؟ و كنت بشوفك في الحراية ديك و أنا طالع من المؤتمر تتجارى في الخور و تحت كبري أبريش و كنت بقول في نفسي و بتسأل: ياربي الود علاء أخو عمر ده بعمل شنو هنا في النطار ده و النهار واقف علي طوله؟؟؟؟؟
يا ابو الزهور يا حلو .. ياخ الكرو دا بالذات كان ماركة مسجلة لي أخونا وصديقنا (النقادي) نحن كل يومين عاملين ليهو عملية جراحية مستعجلة .. تحت الشجرة .. يوم رابطنها ليهو بي كيس .. يوم كابين ليهو رماد .. يوم صاعوط .. غايتو الله بس ما بكتل غير اليوم .. تعرف كمية الجري الجريناها وراء الزول الاسمو الهدهد دا لو .. مطوها كدا احتمال توصل من هنا لحدت نادي الفنانين .. تسكو يطلع ليك في الشجرة الكبيرة القدام المؤتمر ديك .. تطقعو .. يطير ليك في الشجرة الجوه مدرسة سوميت .. تنتظرو ياخد ريست ويطير تاني تلقاهو دخل بيك تحت الكبري وطلع جمب الغابة الصغيرة التحت نادي الفنانين ديك .. عمل لينا نفسيات عديل كدا .. تخيل بالرغم من ذلك .. وطول حياتي الطيرية دي وخبرتي .. قبضت لي هدهد واحد بس .. كل البقيات ديل بيطيرو ليك بالشرك عادي .. ويملصو ليك في نص الخور ..
Quote: شنو ياخ من العرضة القوية ديك مع عم منصور الشيخ في الصيوان الفي الجريف شرق داك وتاني ما نشوفك و لا نسمع منك؟؟؟؟؟ والله غايتو عالم عجيبة
والله يا ابوالزهور العرضة ديك كانت عبارة عن تسخينة .. بعديها تعال شوف ليك جري .. وطيران .. عمر دا زاتو ما لحقت بليت منو شوقي الايامات الأخيرة .. إنت جوه واللا بره ..؟ حدد موقعك .. عندنا نية نكرر الحركة اللذيذة دي تاني ياخ ..
05-25-2010, 03:32 PM
Yousif A Abusinina Yousif A Abusinina
تاريخ التسجيل: 11-12-2008
مجموع المشاركات: 2003
Quote: البيت فوقو همبريب يا يوسف .. ودي قمة المتعة .. وضربت لي فوقو نومات بالنهارية ما بتتعوض تاني .. عمران متضامن معاي كشريك اصيل في البوست دا .. .. ثانيا ود الصايم شايفو استجاب لي دردقة داليا .. واساسي ولو كان بستفيد من التجارب كان شاف حالة ود ابرق دي .. لكن القراية بي اضنينو عملت ليهو التهاب في الاضن الوسطى .. وما استبعد إنو تطبق فيه المادة مية وخمسين معدلة لي الفين وعشرة ..
ود الصائم معاه حق يقرا بى اضنية كانت الكلام بقى مو معرف عربى او اوردوا
عمران اشرشح واجدع اعطوك الضو الاخضر
اهاااااا البهناك ديك الكلام وقف خليناك مع البيتو حقك
وسيف مساعد ورية قلابية الخرطوم غير حقاتكم بهناك بدل الخيبة الجاب معاه
قول ابو سبيب طويل مع الدبارة بنسمية الداندرس يقبض اسد ما هدهد
بوست جميل ورائع خلونا نستمتع يا حلوين
بالله تمبس عرج لينا على العربات بتاعت الطوبة البنجرها بالحبل ثمانية واربعون ساعة فى اليوم .
05-26-2010, 11:45 AM
غباشي غباشي
تاريخ التسجيل: 01-19-2007
مجموع المشاركات: 1729
والله يا عمك انا من زمان كنت عايز اسالك السؤال دا .. لكن كنت متحسس .. لانو بي صراحة كدا كلما اللقاك رادي ليك لي زول .. اتذكر القلوبية والنبلة غايتو اتحملنا كان ضغطنا عليك شديد
05-26-2010, 12:18 PM
عمر التاج عمر التاج
تاريخ التسجيل: 02-08-2008
مجموع المشاركات: 3422
علاء يا صاحب الظاهر مازالت فيك مروة السرد السياسي في اطار أدبي فخيم والعرس لسه ما جاب آخرك السياسي ، والحمد لله مازالت فيك .. بقايا امتاع بالنص .. أها ... الدبارة شنو : نفتح بوست جديد نسميه ودابرق البورد ولا .. ندودر ود أبرق عشان يجي فوق البوست ده ؟ *
** دودر الطيرة يعني دردقها نحو الشرك..
05-26-2010, 11:50 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: قول ابو سبيب طويل مع الدبارة بنسمية الداندرس يقبض اسد ما هدهد بوست جميل ورائع خلونا نستمتع يا حلوين بالله تمبس عرج لينا على العربات بتاعت الطوبة البنجرها بالحبل ثمانية واربعون ساعة فى اليوم .
.. والله يا يوسف الشرك بتاع السبيب دا ما جربتو لانو ما كنت مقتنع بيهو شديد .. مستهون بيهو .. بعدين القلوبية دي كانت اختيار تقني خالص .. خاصة لما تكون مقاساته مظبوطة .. وهي طبعا احجامه متعددة .. يعني الحتة البتكون متوقع فيها طير قوي بتستعمل مقاس اكبر شوية من المقاس بتاع الطير الصغير .. علشان كدا بتلقى الواحد راصي ليهو تلاتة أربعة خمسة قلوبيات ومتدلدلات منو زي العدة بتاعت الكهربجية .. عربات الطوب دي برضك مرت عليكم بي هناك ..؟ الحاجة أم الاقتراع ياخ .. تخيل يا يوسف في شفع صغار كدا كنت بلقاهم قدام منظمة من المنظمات الشغالة في البلد هناك قبال المسالة بتاعت الانترنت دي وقبال ما الواحد يطلع من هناك الشفع ديل قاعدين يعملو طيارات بتاعت صفيح .. بي طريقة عجيبة جدا .. اعتقد إنو اخطر زظول بتاع تصميم صناعي ما بيقدر يعمل نماذج زي دي .. وبيجو يبيعوها بي تراب القروش للخواجات كنت مهتم بيهم خالص بس المشكلة قروش ماف والواحد كان طالب ومقطع الخواجية تجي تشتري ليك الطيارات الميج والهيلكوبترات والبوينج .. وتدفع حق مية طيارة لي قدام.. بعد فترة .. خمو ليك الشفع ديل سفروهم عينك يا تاجر .. إنتو تامنها لي عربات طوووب وعجلات سلوك .. ولواري علب لبن
05-26-2010, 12:31 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22492
احيانا ننتظر مدة تتجاوز الساعة نلاحظ دراسة الهدهد لاحداثيات (الشرك) وقياس الزوايا أو البحث عن فريسة طفيلية يقدمها (قربان) للقلوبية ويحظى (بالدوسة) ويطير ..
غايتو الحتة دي فيها مشهد من فصول مسرح السياسة
05-26-2010, 12:32 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
تامبا - تحياتي ، طلما اتخذنا من دردقة الهدهد لود أبرق مقيلا من وعثاء الحاجات التانية .. وطالما عربيتي سخنت في طريقي للعمل صباح اليوم فقلت لمن ذهب لجرها اشتريها بالعندك فلا أقل من أجي أفك الزهجة تحت ضل شدرة الدردقة دي .. وكما ليس في الدين من حرج، فكذا .. ليس في البوح المباح من حرج حتى إن صرحت أننا كنا نأكل رأس كل طائر نصطاده (نياً) وقبل أن تهدأ ضربات قلبه من هبرت القلوبية أو صقعة النبله أو خلعة الشرك بسبيب خيل أو خلافو كما كنا نعمل مع القطا .. فأكل رأس الطير نيئا يجلب الحظ (تصبح مرغوم) كما يقول العافون
كنا نحرص على عدم الإكثار من أصطياد القطا لأنو (ثقيل) ولا يمكن ان تشرك له إلا في المغارب لتعود صباح اليوم التالي لترى النتيجة وغالباً ما تجد أن أصحابك جو ولقوهو موكر في سبيبك وشالوهو بشركو (يعني راس المال والربح). في أيام الجمع يأتي الخواجات الملس من أمدرمان بالعربيات السمحات ومعاهن نسوانن ومعاهن خراطيش يضربوا القطا فنهرع لالتقاطه كما كلاب الصيد ونأتيهم به سالما فيدخلون أيديهم في جيوبهم العامرة ويملئون أكفنا بالقروش التي تفرحنا أكثر من الطير .. كيف لا ولم نعرف قروش في الصغره إلا من الخواجات (الله يصرف الخواجات) .. كان حسن عبدالفضيل الوحيد الذي يحصل على قروش أكتر مننا رغم أنو ما بجري معانا لما يضربوا تلقى قاعد مع الخواجات ينضم معاهن لانو الوحيد البعرف انجليزي هو أكبر مننا (في الوسطى وشاطر كمان) .. أصبح معلماً وعمل لعشرين سنة ويعمل الآن عامل زراعي (عامل واسوق باليومية) يا خسارة الشطارة الما لقت زول ينتبه ليها.. خلينا من الكلام ده هسع نرجع للطير القلتا ما بجيبوه البيت لانه يجلب الفقر .. تعرف بقولو كده ليه؟ لأنه في ثقافتهم لا يؤكل .. لكين كنا بناكل أي طيره نقبضه الحطب راقد والاكل مشوي بس ولا بد من عوده لحكي مرتب مش زي المستعجل ده.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
tmbis
saif massad ali
داليا الكباشى
فيصل عباس
محمد عبد الماجد الصايم
اساسي
عمران حسن صالح
البدري عبد الله
Habib_bldo
Yousif A Abusinina
ALZOLZATOO
Azhari Nurelhuda
Mohamed Abdelgaleel
nile1
محمد زكريا
غباشي
عمر التاج
ابو جهينة
طارق جبريل
فيس بوك
تويتر
انستقرام
يوتيوب
بنتيريست