|
|
 صباح أخر منزوع الديوك !!!!!!!!!!!!!!!!
|
كلام عفو الخاطر للصاحب الرسل لى يتكلم عن الاختراب وحالوا ( الايميل الافي اليومين ديل ).......بدي في خلائق الله نصائح
وكانو المختربين في الارض ديل كلهم من عينه السمّبر الفرحان ... يا فرده سيبوهم في حالهم
كدي قوم أتخيل حال السودانيين بدون سعودية وبدون خليج ... بدون سفر كلو كلو كلهم قاعدين في بلد على بابا ...
وبحاولوا يعيشوا حسب شروطه أها شروطه دي تلتاشر سنة في عهد على بابا السعيد ما قدرنا نفهمه كل شي تحسوا جائط ...
والكلام أكتر من الشغل والوقت ما راكب عدلوا وعلى العليهو حتى الوقت عدّلو ...
عشان تعمل أبسط شي تحس أنو محتاج منك مجهود وصرف ما عادي تحس أنو الرهّق مباريك
مهما عملته وإجتهدته والماهية ما فيته البخليك ساتر حالك وبمجابدة ...
وبعد ده تلقي الحال حوالك ما حال سترة والناس صارفة صرف من أمن الفقر وأنت بينك وبينو ماهية شهر ...
وسنينك كاسحة ... أها حتعمل شنو ؟؟؟ وده أخروا متين !!! عشان كده الواحد أحترم نفسوا وغادر في هدؤ ......
مافي زول بشيل شنطوا ويمش بخاتروا ... لو ماظروفك قالت ليك امش ما بتمش في كل سوداني في شي من أدروب
بقتلنا الولف لبلدنا ولحاجاتنا عشان كده بنخت هديماتنا في الشنط وجوازتنا في جيوبينا وبلدنا وناسه العزاز في قلوبنا حتى نمش ...
لرحلة قبل ما تبدي بنكون عارفنها خسرانه الله غالب بس الأمّرة من المرّ هو البجبر على المّر ...
ومهما حسيت أنك كسبان برضوا ما بتغطي خسارة عمرك البضيع في الغياب ...أو على الأقل سنينو المابتتعوض ...
الغياب بمحاك حبه حبه لحدي ما تلقي نفسك ما عندك أي صلة بالزول الكان قبل غربتو ...... دي حقيقة
حاجات كتيره حّد شوفك ليها ببتدي يختلف زمان
في جدة بتلاقيني عربية دينا بتاعت سوداني مكتوب فيها مسكين القيل الغربة ستره حال ...
لكين كمان لصاحبي الميكانيكي الفي جدة برضوا حكمه بالغة في المسالة لما قال في الونسة
الغربة دي زي طربيزة الربحان عوزا يزيد ربحوا والخسران عوز يعوض خسارتوا وفي الأخر ده وده قاعدين ......
وهو بختصر لى السوال لمتين !!!! كابيخ سؤال ممكن تسألوا لزول قاعد في ورشتو العتيقة
دي من زمن الكوريلا الـ80 أم أنوار مدورة وكلتش سلك كانت موديل سنته...
يوم كانت موديل سنته كان بشتروها من كرين بحرى جديدة باكياسه بـ 5 الف جنيه سوداني ورق عشرات زمن العشرة جنيه
مرسومه فيها ميناء بورسودان .... كانت شي كتير خلاس تمش *الفّراشة في المحطة الوسطي امدرمان وحول البوسته
تكمل الكتب والمجلات والالغاز وحتى الشياطين الـ13 وما تكون برضوا صرفته منها كتير .....
موديل سنته دي العشرة جنيه تشتري ليك لعب وحاجت للمدرسة من الـ KGS مخازن الخرطوم العمومية في شارع البلدية تشتري
وتشتري والعشرة جنيه برضوا ما تكمل .... وفي موديل سنته دي كانت الوالدة الله يديها العافية لما تشتري حاجات
وتضطر تدفع بالدولار بتصرف الدولار مقابل 50 قرش سوداني والغريبة برضوا لونه أخضر زي الدولار
وأخته الأصغر الـ 25 قرش الشهيرة بالطرادة كانت حمراء من غير ما سؤ و برضها قاضية غرض ... موديل سنته دي كان عمري عشرة سنين بقراء في الصبيان وميكي وسمير ...
و موديل سنته دي الشباب لابسين القميص المخطط ( تحرمني منك ) والشارلستون وشعرهم تفه غازين في الخّلال ...
موديل سنته دي كان الناس بتغني تحرموني ولا تحرموني سنة الإسلام السلام طوالى تلقاهم مشغلنها في الباصات واكشاك المرطبات ...
والعصر يوم الجمعة بدري الناس تستني ناس المرحوم عبد العزيز العميرى ومحمد السني دفع الله ومحمد نعيم سعد في محطة التلفزيون الأهلية , شباب ولا أروع , ولا حارسين سهرة حمدي بدر الدين في فرسان في ميدان يهديهم تذاكر للندن عن طريق مانيلا , موديل سنته كان أنور عثمان يسوق الناس في رحله في الكون ذلك المجهول ويكلمهم عن أبولو 11 ونزول قاقرين في القمره مع انو الوكت داك كان نزل وشبع نزول , والدكتور عبد الله الريح بشرح ليهم طبيعة الأشياء قاعد ومالى الاستوديوا أصلات وثعابين وضفادع وهو نفسوا حساس محمد حساس البقرب يوقف قلوب الناس من الضحك لما يقروهوا في يوميات حساس محمد حساس في الايام ولا الصحافة ما عارف ....بكتاباتوا اللماّحة الطريفة , ومع المرحوم الطيب محمد الطيب يتابعوا صورهم الشعبية كل كم حلقة في محل من سودانا الوسيع المتنوع والمتعدد الثقافات , ومع المرحوم البروف عبد الله الطيب يقلبوا السير والأخبار ... ويسافروا معه في تاريخ دولة المرابطين في المغرب وسقوط الأندلس وخيول يوسف ابن تاشفين ... وخنازير الفونسوا ...
موديل سنته دي لسه مناظرة شيخ أبوزيد مع عبد الجبار المبارك مستمرة .... ولسه الناس بحرقوا العمم في الإستاد ...ويا عمار أشعلته النار ... والنقر جاء ... مع أنو الواحد عمروا لا كان هلالابي ولا مريخابي ... والهلب مكانو القلب , وزمنه الموردة موردة مع أنها بقت أثر بعد عين , موديل سنته دي كان نميرى الله يرحموا وكان الأحزاب خلاص صبرهم قّلة بعد سنين المصالحة ما بعد 77 والمناظر هي ذاته الصور نفس المشاهد وبعد الأخبار المرحوم الأستاذ الكبير فراج الطيب الله يرحموا مختال فخور يعلم فيهم لسان العرب , أأأأأأأأأيه ياريت كانو لقوا البعلمهم لسانهم , ماكان جاء علينا زمن كتار قيلننا بلا لسان.... كان زمن جميل بي ناسوا ...
وموديل سنته دي الناس في السودان تريانين وشاربين الويسكي الويت هورس ويمشوا حالهم مرات بالبيرة أم جمل والشري أبو مفتاح .... في قزازات حمراء وخضراء والفضي يبيعوا لبتاع الحمار البيجي يكورك قزاز شولات صفائح ... ويكون النقادي بعجلتو مارى نصًلح سراير ...سراير حديد , وبعد ده الله راضي عنهم والحال ماشي ما وقف الناس بقت دقونه لى سدوره والله رضا عن الحال بعيد ....اللهم إلا نكضب على روحنا ونقول ربنا رضي عننا ...
في بلد زي حصان الرديو أجدع كابوي ما يركبوا دقيقتين , .....
وموديل سنته دي كان وكان لحدي ما تخلص الحكاوي عن زمن عدي فات وغنايو بقي كست قديم مّرمي ...
ويالغربة إن شاء الله تعقري ... وصوت وردي خلفية للحكاية أقول أرحل ...هسه الكل رحل ومن غير ما يقولوا ....
وزمان حمد الريح بغني لمدن بعيدة تنوم وتصحي على مخدات الطرب ....
ممكن بس زمن رحلينا لقناها خلت الطرب وخلت النوم وبقت تساهر بالناس وتسلب نومهم ...
وتخليهم ما يحسوا بالصباح إلا لما منبهم يدق ...
يجي متسلل شمس تملاء الدنيا ضو بدون لفحت نسيم ولا زقزقة عصافير و لا ديوك تناغم بعضه البعض ده يعوعي
والتاني يرد عليهوا ... هنا الصباح منزوع الديوك .................ولا عزاء ........
---------------------------------------------
•الفّراشة على زمنا الناس البفرشوا الكتب والمجلات القديمة
(عدل بواسطة عبد الناصر الخطيب on 05-22-2010, 04:37 AM)
|
|
 
|
|
|
|
محمد سنى دفع الله
فيس بوك
تويتر
انستقرام
يوتيوب
بنتيريست